नेपाल लाइफको प्रस्तावित लाभांश पारित, लगानी विस्तार गर्दै जाने कम्पनीको नीति
काठमाडौं । नेपाल लाइफ इन्स्योरेन्स कम्पनीको प्रस्तावित लाभांश पारित भएको छ । चैत २१ गते सम्पन्न कम्पनीको २१औं वार्षिक साधारणसभाले प्रस्तावित १४.०७४ प्रतिशत लाभांश प्रस्तावलाई पारित गरेको हो । यससँगै, सेयरधनीले चुक्ता पुँजीको १४ प्रतिशत बोनस सेयर र कर प्रयोजनको लागि ०.७४ प्रतिशत नगद लाभांश पाउनेछन् । यससँगै, प्रस्तावित बोनसपश्चात कम्पनीको चुक्ता पुँजी ८ अर्ब २० करोड रुपैयाँ पुगेको छ । जुन जीवन बीमा क्षेत्रकै सर्वाधिक चुक्ता पुँजी हो । सभामा अध्यक्ष गोविन्द लाल संघईले समीक्षा वर्षमा कम्पनीले कुल बीमाशुल्क करिब २७ अर्ब ६५ करोड आर्जन गरी सर्वाधिक बजार हिस्सा हासिल गर्न सफल भएको बताए । साथै, २१ वर्षमा जीवन बीमा क्षेत्रमा कम्पनीको व्यवसायिक हिस्सा र गरिमालाई तमाम चुनौतिहरु बीच अझै नयाँ उचाइमा अगाडि बढाउनका लागि आगामी दिनहरुमा अगाडि बढ्ने अध्यक्ष संघईले प्रतिवद्धता गरेका छन् । सभामा कम्पनीका वरिष्ठ नायव प्रमुख कार्यकारी अधिकृत प्रवीण रमण पराजुलीले बीमा समितिबाट जारी लगानी निर्देशिकाको परिधिभित्र रही दीगो एवं भरपर्दो लगानीका क्षेत्रहरुमा लगानी विस्तार तथा विविधीकरण गर्दै जाने नीति लिएको बताए । त्यसैगरी, सम्पत्ति र दायित्वबीच सन्तुलन कायम गर्न पुँजीगत लगानी वृद्धि गर्न आवश्यक भएकोले मुलुकका विभिन्न सहरहरुमा दीर्घकालिन पूँजीगत लगानीका लागि ठोस कार्य गर्ने लक्ष्यकासाथ कम्पनी अगाडि बढेको जानकारी गराए । सभाले संस्थापक सेयरधनीका तर्फबाट चार जना संचालकमा निर्विरोध निर्वाचित गरेको छ । जसमा गोविन्द लाल संघई, कमलेश कुमार अग्रवाल, विवेक अग्रवाल र शक्ति कुमार गोल्यान रहेका छन् । त्यस्तै, साधारण सभा सम्पन्न पश्चात् बसेको संचालक समितिको ३३६औं बैठकले नव निर्वाचित संचालक गोविन्द लाल संघईलाई संचालक समितिको अध्यक्षमा सर्वसम्मत चयन गरेको छ । हाल कम्पनीको लगानी १ अर्ब ३३ खर्ब रुपैयाँ रहेको छ भने जीवन बीमाकोष १२४ अर्ब ८४ करोड रुपैयाँ र सेयरधनी कोष ९ अर्ब ६७ करोड रुपैयाँभन्दा बढी रहेको छ । कम्पनीमा २ लाख भन्दाबढी प्रशिक्षित अभिकर्ता रहेका छन् । हाल कम्पनीले आफ्ना सेवाग्राहीहरु तथा ग्राहकका लागि २ सय २ कार्यालय सञ्जालहरू मार्फत जीवन बीमासम्बन्धी सम्पूर्ण सेवा उपलब्ध गराइरहेको छ । त्यस्तै, कम्पनीमा हालसम्म वैदेशिक रोजगार समेत गरि ३० लाख भन्दा बढी बीमितहरु रहेका छन् । साथै, ग्राहकहरूको हितलाई ध्यानमा राखी यस कम्पनीले समयसापेक्ष आवश्यक थप सेवा तथा सुविधाहरुसमेत उपलब्ध गराउँदै जाने प्रतिवद्धता व्यक्त गरेको छ ।
२५०० बिन्दुबाट झरेर साढे तीन महिना यताकै न्यून बिन्दुमा नेप्से परिसूचक
काठमाडौं । सेयर मूल्य मापक नेप्से परिसूचक २५०० बिन्दुबाट तल झरेको छ । सोमबार (चैत २१ गते) को बजारमा परिसूचक १४.८८ अंकले झरेर २४९८.५३ बिन्दुमा अडिएको हो । जुन साढे तीन महिना यताकै न्यून बिन्दुु हो । २०७८ पुस ५ गतेको बजारमा नेप्से परिसूचक २५०७.७१ बिन्दुमा अडिएको थियो । त्यसयताको बजारमा भने परिसूचक २५ सय बिन्दुबाट तल झर्न सकेको थिएन । सोमबारको बजारमा परिसूचक घटेपनि कारोबार रकममा भने केही सुधार देखिएको छ । आइतबार १ अर्ब ४६ करोड रुपैयाँ बराबरको सेयर कारोबार भएको बजारमा सोमबार भने १ अर्ब ५८ करोड रुपैयाँ बराबरको सेयर कारोबार भएको छ । सोमबार सबैभन्दा बढी इमर्जिङ नेपालको सेयर किनबेच भएको छ । कम्पनीको एकैदिन ६ करोड ३९ लाख रुपैयाँ बराबरको सेयर कारोबार भएको छ । त्यस्तै, कम्पनीको सेयर मूल्य ९.१२ प्रतिशतले बढेर प्रतिकित्ता १४७० रुपैयाँमा कारोबार भएको छ । निरन्तर घटेको बजारमा पनि केही कम्पनीको सेयर मूल्यमा भने निरन्तर सकारात्मक सर्किट लागिरहेको छ । राष्ट्र उत्थान लघुवित्त वित्तीय संस्था र नेष्ठो समृद्ध लघुवित्त वित्तीय संस्थाको सेयर मूल्य १०/१० प्रतिशतले बढेर क्रमशः प्रतिकित्ता १५९६.५० र १२७७.३० रुपैयाँमा कारोबार भएको छ । सोमबार टप लुजरको अग्रस्थानमा सिटिजन्स म्युचुअल फण्ड २ रहेको छ । जसको इकाई मूल्य ५.६६ प्रतिशतले घटेर प्रतिइकाई १० रुपैयाँमा कारोबार भएको छ । निरन्तर रुपमा घटेको बजारमा कारोबारमा आएका सबै समूह निरन्तर रुपमा घटिरहेका छन् । सोमबारको बजारमा निर्जीवन बीमा समूह सबैभन्दा बढी अर्थात २०० अंकले ओरालो लागेको छ ।
बलेफीको आइपीओमा मागभन्दा १३ गुणा बढीको आवेदन
काठमाडौं । बलेफी हाइड्रोपावर लिमिटेडको आइपीओमा मागभन्दा करिब १३ गुणा बढीले आवेदन दिएका छन् । भोलिसम्म आवेदन दिने म्याद रहेको आइपीओमा आजसम्म १८ लाख ७० हजार ७०९ जनाले दुई अर्ब १२ करोड २६ लाख ७५ हजार बराबरको आवेदन दिएका छन् । यो आवेदन रकम मागभन्दा १२.७६ प्रतिशत बढी हो । बलेफीले चैत १६ गतेबाट सर्वसाधारणका लागि १६ लाख ६३ हजार ४५३ कित्ता आइपीओ निष्कासन गरेको हो । बिक्री प्रबन्धक ग्लोबल आइएमई क्यापिटलका अनुसार यो तथ्यांक आइतबार साँझ साढे ५ बजेसम्मको हो । ग्लोबल आइएमई क्यापिटलका अनुसार कूल १८ लाख २७ हजार ९७० कित्ता सेयरमध्ये ५ प्रतिशत अर्थात् ९१ हजार ३९८ कित्ता सामूहिक लगानी कोष र ७३ हजार ११९ कित्ता सेयर कर्मचारीहरुका लागि छुट्याएर बाँकी रहेको १६ लाख ६३ हजार ४५३ कित्ता सेयर सर्वसाधारणलाई जारी भएको हो ।
