सानिमा लाइफ इन्स्योरेन्सको लाभांश घोषणा
काठमाडौं । सानिमा लाइफ इन्स्योरेन्सले सेयरधनीलाई ४.४२ प्रतिशत लाभांश वितरण गर्ने भएको छ । इन्स्योरेन्सले आर्थिक वर्ष २०७६/७७ को नाफाबाट चुक्ता पुँजीको ४.२ प्रतिशत बोनस र कर प्रयोजनको लागि ०.२२ प्रतिशत लाभांश वितरण गर्ने प्रस्ताव गरेको हो । चैत २९ गते बसेको इन्स्योरेन्सको सञ्चालक समितिको बैठकले उक्त प्रस्ताव गरेको हो । जसलाई बीमा समितिले स्वीकृत तथा कम्पनीको साधारण सभाले पारित गर्नुपर्ने छ । हाल इन्स्योरेन्सको चुक्ता पुँजी २ अर्ब रुपैयाँ छ । ४.२ प्रतिशत बोनसपछि कम्पनीको चुक्ता पुँजी २ अर्ब ८४ करोड रुपैयाँ नाघ्ने छ ।
पुस यताकै न्यून बिन्दुमा झर्यो नेप्से परिसूचक
काठमाडौं । सेयर मूल्य मापक नेप्से परिसूचक गत पुस महिनायताकै न्यून बिन्दुमा झरेको छ । निरन्तर घटीरहेको परिसूचक २४ सय बिन्दुबाट तल झरेर पुस यताकै न्यून बिन्दुमा झरेको हो । चैत २९ गते सोमबारको बजारमा परिसूचक ३४.७९ अंकले घटेर २३८५.०१ बिन्दुमा झरेको छ । जुन गत पुस ६ गतेयताकै न्यूनतम बिन्दु हो । सो दिनको बजारमा परिसूचक २४१५.५५ बिन्दुमा थियो । त्यसयताको कारोबार भने परिसूचक भने सो भन्दा तल झरेको थिएन । सोमबारको बजारमा १ अर्ब ५२ करोड रुपैयाँ बराबरको सेयर कारोबार भएको छ । जुन अघिल्लो दिनको तुलनामा घटी हो । आइतबारको बजारमा २ अर्ब २६ करोड रुपैयाँ बराबरको सेयर कारोबार भएको थियो । बजारमा सबैभन्दा बढी हिमालयन डिष्टिलरीको सेयर कारोबार भएको छ । कम्पनीको एकैदिन ५ करोड ७५ लाख रुपैयाँ बराबरको सेयर कारोबार भएको हो । त्यस्तै, बढी कारोबार गर्नेको दोश्रो स्थानमा नबिल बैंक छ । बैंकको एकैदिन ४ करोड ३४ लाख रुपैयाँ बराबरको सेयर कारोबार भएको हो । घटेको बजारमा पनि नेष्डो समृद्ध लघुवित्त वित्तीय संस्थाको सेयर मूल्य १० प्रतिशतले बढेर प्रतिकित्ता २०५७ रुपैयाँ पुगेको छ । सबैभन्दा बढी प्रतिशतले घट्नेमा इमर्जिङ् नेपाल रहेको छ । कम्पनीको सेयर मूल्य ६.५९ प्रतिशतले घटेर प्रतिकित्ता ९३५ रुपैयाँमा अन्तिम कारोबार भएको छ ।
२०९ अंकले बढ्यो नेप्से परिसूचक, आठ महिनामै साढे १ खर्बको धितोपत्र सूचीकृत
काठमाडौं । २०७८ फागुन मसान्तमा सेयर मूल्य मापन नेप्से परिसूचक २६६८.१ बिन्दुमा रहेको छ । जुन अघिल्लो वर्षको तुलनामा २०९.६ अंकले बढी हो । नेपाल राष्ट्र बैंकका अनुसार २०७७ फागुन मसान्तमा उक्त सूचक २४५८.५ बिन्दुमा रहेको थियो । त्यस्तै, समीक्षा अवधिमा धितोपत्र बजार पुँजीकरण ३३ खर्ब ८७ करोड रुपैयाँबाट बढेर ३७ खर्ब ८२ अर्ब ७९ करोड रुपैयाँ पुगेको छ । एक वर्षको अवधिमा सूचीकृत कम्पनीको संख्या पनि बढेको छ । २०७७ फागुनमा २१७ रहेको सूचीकृत कम्पनीको संख्या २०७८ फागुनमा बढेर २२८ पुगेको छ । २०७८ फागुनमा सूचीकृत कम्पनीहरुमध्ये १४४ बैंक तथा वित्तीय संस्था र बीमा कम्पनी रहेका छन् भने ४७ जलविद्युत् कम्पनी, १९ उत्पादन तथा प्रशोधन उद्योग, ६ लगानी कम्पनी, ५ होटल, ४ व्यापारिक संस्था र ३ अन्य समूहका रहेका छन् । सूचीकृत कम्पनीहरूमध्ये बैंक तथा वित्तीय संस्था र बीमा कम्पनीको धितोपत्र बजार पुँजीकरणको हिस्सा ६६ प्रतिशत रहेको छ । त्यसैगरी, जलविद्युत कम्पनीको हिस्सा १०.६ प्रतिशत, लगानी कम्पनीको ७१ प्रतिशत, उत्पादन तथा प्रशोधन उद्योगको हिस्सा ४.१ प्रतिशत, होटेलको हिस्सा १.४ प्रतिशत, व्यापारिक संस्थाको हिस्सा ०.४ प्रतिशत तथा अन्य समूहका कम्पनीहरुको हिस्सा १०.३ प्रतिशत रहेको छ । नेपाल स्टक एक्सचेन्ज (नेप्से) मा २०७८ फागुनसम्ममा सूचीकृत ६ अर्ब ६१ करोड सेयरको चुक्ता मूल्य ६ खर्ब ५१ अर्ब २१ करोड रुपैयाँ रहेको छ । आर्थिक वर्ष २०७८/७९ को पहिलो आठ महिनासम्ममा ४६ अर्ब १६ करोड रुपैयाँ बराबरको डिबेन्चर, ३७ अर्ब १६ करोड रुपैयाँ बराबरको बोनस सेयर, २९ अर्ब ५० करोड रुपैयाँ बराबरको विकास ऋणपत्र, १७ अर्ब ८३ करोड रुपैयाँ बराबरको साधारण सेयर, ९ अर्ब १८ करोड रुपैयाँ बराबरको हकप्रद सेयर र ३ अर्ब ७५ करोड रुपैयाँ बराबरको म्युचुअल फण्ड गरी कुल १ खर्ब ४३ अर्ब ५८ करोड रुपैयाँ बराबरको थप धितोपत्र सूचीकृत भएका छन् । समीक्षा अवधिमा नेपाल धितोपत्र बोर्डले ४ अर्ब ८० करोड रुपैयाँ बराबरको डिबेन्चर, ३ अर्ब ११ करोड रुपैयाँ बराबरको हकप्रद सेयर, ३ अर्ब रुपयाँ बराबरको म्युचअल फण्ड र २ अर्ब ८४ करोड रुपैयाँ बराबरको साधारण सेयर गरी कुल १३ अर्ब ७५ करोड रुपैयाँ बराबरको धितोपत्र सार्वजनिक निष्काशनका लागि अनुमति दिएको छ ।
