पहिरोका कारण ५ स्थानका सडक अवरुद्ध
काठमाडौं । देशका विभिन्न स्थानमा गएको बाढी र पहिरोका कारण गोरखा, काभ्रेपलाञ्चोक र सुर्खेतका प्रमुख सडक खण्डहरू पूर्ण रूपमा अवरुद्ध भएका छन् । गोरखाको आरुघाट गाउँपालिका-२ र ३ जोड्ने सोतीस्थित बुढीगण्डकी नदीमा रहेको फलामे मोटरेबल पुल बाढीले बगाएपछि ती दुई वडाहरूबीचको सडक सम्पर्क विच्छेद भएको छ । यस्तै, काभ्रेपलाञ्चोकको रोशी गाउँपालिका-९ स्थित पिन्थली र वडा नं ८ को गिम्दीबेँसीमा पहिरो खसेपछि बीपी राजमार्ग पूर्ण रूपमा अवरुद्ध बनेको छ भने सुर्खेतको बराहताल गाउँपालिका-७ स्थित औलिसेमा सुक्खा पहिरो खस्दा कर्णाली राजमार्गको यातायात सेवा पनि ठप्प भएको छ । यसैबीच, सम्भावित बाढी तथा पहिरोको जोखिमलाई मध्यनजर गर्दै मकवानपुर र ललितपुर जोड्ने कान्ति लोकपथमा रातिको समयमा सवारी साधन आवागमनमा रोक लगाइएको छ ।
रास्वपाको सचिवालय बैठक बस्दै, समसामयिक विषयमा छलफल हुने
काठमाडौं । राष्ट्रिय स्वतन्त्र पार्टी (रास्वपा) को सचिवालय बैठक आज बस्दैछ । पार्टी सभापति रवि लामिछानेको अध्यक्षतामा देशको समसामयिक राजनीतिक विषयमा छलफल गर्न बैठक बोलाइएको रास्वपाका प्रवक्ता जगदीश खरेलले जानकारी दिएका छन् । उक्त बैठक बिहान ११ बजे काठमाडौंको वनस्थलीस्थित पार्टी केन्द्रीय कार्यालय घन्टीघरमा बस्ने तय भएको छ ।
पहिरो र लेदो खस्दा बिपी राजमार्ग अवरुद्ध
काठमाडौं । काभ्रेपलाञ्चोकमा पहिरो र लेदो खस्दा बीपी राजमार्ग पूर्ण रूपमा अवरुद्ध भएको छ । जिल्ला प्रहरी कार्यालय काभ्रेपलाञ्चोकका अनुसार राजमार्गअन्तर्गत रोशी गाउँपालिका-९ पिन्थलीमा खहरे खोलाबाट ढुङ्गा र माटोसहितको लेदो सडकमा आएको छ भने रोशी गाउँपालिका-८ गिम्दीबेसीमा पनि लगातार पहिरो खसिरहेको छ । सडक दुवैतर्फ पूर्ण रूपमा बन्द भएपछि र अझै पनि पहिरो तथा लेदो झर्ने उच्च जोखिम कायम रहेकाले प्रहरीले बीपी राजमार्ग हुँदै यात्रा गर्ने तयारीमा रहेका सबै यात्रुलाई तत्काल यात्रा सुरु नगर्न अनुरोध गरेको छ । सडक खुल्नेबारे आधिकारिक जानकारी नआएसम्म जोखिम मोलेर यात्रा नगर्न र सुरक्षित स्थानमै बस्न सम्बन्धित निकायले सबैमा आग्रह गरेको छ ।
