रुपन्देहीको तिलोत्तमाको मतगणना स्थगित
रुपन्देही । यहाँको तिलोत्तमा नगरपालिकाको मतगणना अहिले रोकिएको छ । मतगणनामा धाँधली भएको भन्दै नेपाली कांग्रेसका कार्यकर्ताले विरोध जनाएपछि मतगणना रोकिएको हो । तिलोत्तमा नगरपालिकामा रहेको यातायात कार्यालयमा भएको वडा नम्बर १६ र २ को मतगणना रोकिएको हो । मतगणनापछि सङ्ख्या टिपोट गर्ने क्रममा गणक र पार्टी प्रतिनिधिबीच मत सङ्ख्यामा फरक पर्न गएकाले वास्तविक तथ्याङ्क हेरेर गणना अगाडि बढाइने सहमति भएको निर्वाचन अधिकृत माधवप्रसाद लोहनीले बताए । अहिले मतगणनास्थल बाहिर कांग्रेसका कार्यकर्ताले नाराबाजी गरिरहेका छन् ।
भिमाद नगरपालिमाको प्रमुखमा दधिराज र उपप्रमुखमा शारदा निर्वाचित
काठमाडौं । तनहुँको भिमाद नगरपालिमा प्रमुख र उपप्रमुख नै नेपाल कम्युनिष्ट पार्टी (एमाले) का उम्मेदवारहरु निर्वाचित भएका छन् । प्रमुख पदमा दधिराज सुवेदी र उपप्रमुखमा शारदा खनाल निर्वाचित भएकी हुन् । सुवेदीले उनले ८ हजार १ सय २८ मत प्राप्त गरे नगर प्रमुख पदमा निर्वाचित भएका हुन् । उनका प्रतिस्पर्धी नेपाल नेपाल कम्युनिष्ट पार्टी (एकिकृत समाजवादी) का उम्मेदवार काजीमान श्रेष्ठले ५ हजार ८५७ मत ल्याई दोस्रो स्थान लिन सफल भए । यस्तै, खनालले ७ हजार ६ सय ६७ मत प्राप्त उपप्रमुखमा निर्वाचित भएकी छिन् । कांग्रेसका मिलन आले ७ हजार २ सय ५ मत प्राप्त गर्दै दोस्रो भए ।
भरतपुरमा रेनुको अग्रता कायमै, विजय कतिले पछि ?
काठमाडौं । भरतपुर महानगरपालिकामा सत्ता गठबन्धनबाट मेयरकी उम्मेदवार माओवादी केन्द्रकी रेनु दाहालले अग्रता कायम राखेकी छिन् । १८ हजार ४७ मत गनेर सकिँदा रेनुले ६ हजार १९ मत ल्याई अग्रता कायम गरेका हुन् । यस्तै एमालेका उम्मेदवार विजय सुवेदीले ५९५६ मत ल्याएका छन् । पछिल्लो मतगणना अनुसार विजय ६३ मतले पछाडि देखिएका छन् । स्वतन्त्र उम्मेदवार जगन्नाथ पौडेलले २ हजार ९३७ मत ल्याएका छन् । यस्तै, उपप्रमुखमा गठबन्धनबाट उम्मेदवार बनेका कांग्रेसका चित्रसेन अधिकारीले ७ हजार ३४६ मत ल्याई अग्रता कायम गरेका छन् । उनकै प्रतिस्पर्धी राष्ट्रिय प्रजातन्त्र पार्टी राप्रपाकी हिमला गुरूङले ४ हजार ८८३ मत पाएकी छन् । हाल महानगरपालिकाका उमेदवारहरुको मतगणना जारी छ ।
