पालिका

म्याग्दी । मङ्गला गाउँपालिका–५ हाँडेभिरमा पालिकास्तरीय अस्पतालको भवन निर्माण थालिएको छ । सङ्घीय सरकारको सबै पालिकामा आधारभूत तहको अस्पताल सञ्चालन गर्ने योजनानुसार मङ्गलाको केन्द्र बाबियाचौरसँगै रहेको हाँडेभिरमा भवन निर्माण हुन लागेको हो । मङ्गला गाउँपालिकाका इञ्जीनियर सुजन पौडेलले १० शय्या क्षमताको अस्पतालका लागि एक हजार १२४ दशमलव ६४ वर्गमिटर क्षेत्रफलमा दुई भवन निर्माण थालिएको जानकारी दिए । ‘आकस्मिक, अन्तरङ्ग, बहिरङ्ग, प्रयोगशाला, प्रशासनिक, औषधि भण्डारण, उपचारका लागि छुट्टाछुट्टै कक्षसहितको भूकम्प प्रतिरोधी क्षमताको अपाङ्गतामैत्री भवन बनाउन लागिएको हो’, उनले भने, ‘आगामी २०८० असारसम्म भवन निर्माण सम्पन्न गर्ने लक्ष्य छ ।’ भवन निर्माणका लागि ओमबुद्ध इन्टरनेशनल कन्सट्रक्शन काठमाडौंसँग २०७८ असारमा नौ करोड ११ लाखमा ठेक्का सम्झौता गरिएको थियो । भवनको कूल १२ करोड ९७ लाखको लागत अनुमान गरिएको छ । प्रमुख प्रशासकीय अधिकृत मनोहर ढुङ्गानाका अनुसार दुई भवनमा ३५ कोठा निर्माण गरिनेछन् । विसं २०७७ पुस १५ गते सो अस्पताल भवनको गाउँपालिकाका अध्यक्ष सतप्रसाद रोकाले शिलान्यास गरेका थिए । अस्पतालका लागि अर्मन स्वास्थ्यचौकी परिसरमा तीन वर्षअघि आठ रोपनी जग्गा व्यवस्थापन गरिएको थियो । मङ्गलाका साथै म्याग्दीको अन्नपूर्ण र धवलागिरि गाउँपालिकाले पनि आधारभूत अस्पताल भवन निर्माण सुरु गरेका छन् । धवलागिरि गाउँपालिकाले ताकममा र अन्नपूर्ण गाउँपालिकाले वडा नं १ दोबामा अस्पताल निर्माण सुरु गरेका छन् । अस्पताल बनाउन सरकारले गत आवमा अन्नपूर्ण र धवलागिरि गाउँपालिकालाई ७०–७० लाख तथा रघुगङ्गा र मङ्गला गाउँपालिकालाई ८५–८५ लाख बजेट विनियोजन गरेको थियो । रासस

काठमाडौं । काठमाडौं महानगरपालिकाले विभिन्न सडकका विभिन्न रुटमा २१ सय वटा स्मार्ट स्ट्रीट लाइट जडान गर्ने भएको छ । महानगरपालिकाले नेपाल विद्युत प्राधिकरणसँग सहकार्य गरी बत्ती जडान गर्न लागेको हो । रातको समयमा सडकलाई उज्यालो बनाउने उद्देश्यका साथ उक्त लाइट जडान गर्न लागेको महानगरका सार्वजनिक निर्माण विभागका विभागीय प्रमुख रामबहादुर थापाले बताए । स्मार्ट स्ट्रीट लाइट जडानको लागि आवश्यक काम हाल विद्युत प्राधिकरणबाट भइरहेको छ । ‘महानगरसँग सम्झौता भई उक्त काम प्राधिकरण मार्फत गर्ने भनिएको हो, प्राधिकरणले टेन्डर गरेर सम्झौताको प्रक्रिया अगाडि बढाएको छ,’ थापाले भने । विद्युत प्राधिकरणका अनुसार भ्याट सहित १२ करोड रुपैयाँको लागतमा काठमाडौं महानगका विभिन्न स्थानमा उक्त बत्ती जडान हुनेछन् । यसमा ६० प्रतिशत महानगरले र ४० प्रतिशत प्राधिकरणको खर्च गर्दैछन् । महानगसँग सम्झौता भएर काम सुरु भएको ४ महिनाभित्र बत्ती जडान गरी सक्ने योजना रहेको प्राधिकरणले जानकारी दियो । एयरपोर्टबाट बानेश्वर हुँदै कलंकीसम्म, माइतीघरबाट महारागंज हुँदै चक्रपथसम्म र बल्खुमा गरी करिब ६० किलोमिटर सडकमा स्ट्रीट लाइट जडान गर्न लागिएको प्राधिकरणका इन्जिनियर विराट शर्माले जानकारी दिए । ‘प्राधिकरणको तर्फबाट प्रक्रियागत काम गरिसकेका छौं, महानगरबाट आउन बजेट आएको छैन, बजेट आएपछि महानगरसँग सम्झौता गरी लाइट जडानको काम सुरु हुन्छ,’ उनले भने । इन्जिनियर शर्माका अनुसार स्मार्ट बत्ती अरू सडक बत्तीभन्दा फरक हुनेछन् । प्राधिकरण र महानगरबीच यो हप्ता सम्झौता भयो भने काम सुरु गरेको ४ महिनामा बत्ती जडान भइसक्छ । महानगरका अधिकांश सडकमा बत्ती नहुँदा सवारी चालक र यात्रुले समस्या भोग्नु परेको छ भने रातका समयमा सडक दुर्घटना पनि बृद्धि भइरहेको छ । यस्तै, महानगरपालिकाले ९ करोड ९० लाख रुपैयाँ लागतमा काठमाडौंका ८० ठाउँमा हाइमेक्स बत्ती जडान गर्न योजना पनि अगाडि सारेको छ । लाइट जडान गरेको १७ वर्षसम्म ढुक्क स्मार्ट बत्ती जडान भएको १७ वर्षसम्म टिक्ने प्राधिकरणका इन्जिनियर सागर ज्ञवाली बताए । सडकमा एउटा वटा बत्ती १२० वाटको हुनेछ । ज्ञवालीका अनुसार लाइटको डाटा प्राधिकरणले सर्भर लिइरहेको हुन्छ, बिग्रिएको २४ घण्टाभित्र लाइट बनाइ सक्नु पर्छ, सुरक्षा र बत्ती हिसाबले यो लाइट आकर्षक रहेको छ । विद्युत प्राधिकरणसँग वत्तीको अवस्था बारे जानकारी दिने कन्ट्रोल रुम पनि रहेको ज्ञवालीले बताए । यो बत्ती सडकमा यात्रु र सवारीसाधन नहुँदा निभ्ने, उनीहरू आउँदा आफैं बल्ने छन् । १३ पालिकामा लाइट जडान गर्दै प्राधिकरण नेपाल विद्युत प्राधिकरणले १३ पालिकासँग सम्झौता गरी स्मार्ट स्ट्रीट लाइट जडानको काम अगाडि बढाएको छ । प्राधिकरणले काठमाडौं वाहेक ललितपुर, पोखरा, भरतपुर महानगरका सडकको विभिन्न रुटमा स्मार्ट बत्ती (लाइट) जडान गर्ने योजना अगाडि सारेको हो । प्राधिकरणले भक्तपुरको विभिन्न ठाउँमा बत्ती जडान गरिसकेको छ । प्राधिकरणका अनुसार पोखरामा ११ करोड रुपैयाँमा १७ सय बत्ती, भरतपुरमा २ हजार बत्ती १२ करोडको लागतमा जोड्ने योजना रहेको छ । बेलका, भीमदत्त, भीमेश्वर र कनकाई नगरपालिकामा पनि लाइट जडान गर्ने काम भइरहेको इन्जिनियर शर्माले जानकारी दिए । बुढानिलकण्ठ, कीर्तिपुर, महालक्ष्मी, फिदिम र कटहरी नगरपालिकामा बत्ती जडान गर्नको लागि टेन्डर प्रक्रिया अगाडि बढाएको प्राधिकरणले जनाएको छ । प्राधिकरणका प्रबन्ध निर्देशक कुलमान घिसिङले नेपाल भर एक लाख स्मार्ट स्ट्रीट लाइट जडान गर्ने योजना राखेका थिए । घिसिङले उज्याले सहर अभियान सञ्चालन गरी नेपालभर लाइट जडान गर्नको लागि पालिकाहरुलाई आव्हान पनि गरेका थिए । यस कार्यक्रममा सहभागी हुन थप २५ नगरपालिकाले निवेदन दिएका प्राधिकरणले जनाएको छ । रात्रिकालिन बिजुलीको खपत बढाउने उद्देश्यले सडकमा बत्ती जडानलाई प्राधिकरणले उच्च प्राथमिकतामा राखेको हो । नेपालभरका सडकमा लाइट जडान गर्दा साँझको समयमा थप १ सय मेगावाट विद्युत खपत हुने प्राधिकरणको अनुमान छ ।

काठमाडाैं । भरतपुर महानगरपालिकाकी मेयर रेणु दाहालले गौतमबुद्ध अन्तर्राष्ट्रिय क्रिकेट रंगशालाको स्वामित्व अब भरतपुर महानगरपालिकाले लिने बताएकी छिन् । मेयर दाहालले धुर्मुस–सुन्तली फाउण्डेशनले दिएको आर्थिक र प्राविधिक प्रतिवेदनको सरकारी पक्षबाट मूल्यांकन गरिसकेपछि रंगशालाको स्वामित्व भरतपुर महानगरपालिकाले लिने बताएकी हुन् । दहालले धुर्मुस–सुन्तली फाउण्डेशनले आफूलाई १७ करोड ऋण लागिसकेको र राष्ट्रिय तथा अन्तर्राष्ट्रिय स्तरबाट पनि सोचेअनुरुपको सहयोग प्राप्त नभएकोले महानगरलाई स्वामित्व लिन आग्रह गरेको र महानगरले अब रंगशालाको लागि काम अघि बढाउने बताएकी छिन् । मेयर दाहालले सरकार जिम्मेवारीबाट पन्छिन नमिल्ने भन्दै रंगशाला बनाउँदा लागेको ऋण र बहुवर्षीय योजनाअनुसार काम अघि बढाउन संघीय सरकारलाई आग्रह गर्ने बताइन् ।