सूर्य नेपालद्वारा जिपी कोइराला राष्ट्रिय श्वासप्रश्वास उपचार केन्द्रलाई शव वाहन सहयाेग
काठमाडाैं । सूर्य नेपालले तनहुँको जिपी कोइराला राष्ट्रिय श्वासप्रश्वास उपचार केन्द्रलाई शव वहान उपलब्ध गराएको छ । जिल्लामै शववाहन नहुदा शव व्यवस्थापनमा समास्याका साथै सेवाग्राहीले ठूलो रकम खर्च गर्नुपर्ने भएकाले कम्पनीले आफ्नो सामाजिक उत्तरदायित्व अन्तर्गत शववाहन उपलब्ध गराएको हो । प्राप्त शववाहन तनहुँका १० वटै पालिकाहरुले उपयोग गर्नेछन् । सोमबार एक कार्यक्रमकाबीच जिल्ला कोभिड व्यवस्थापन केन्द्र तनहुँका संयोजक एवं प्रमुख जिल्ला अधिकारी सागर आचार्यलाई कारखाना व्यवस्थापक बाबुराम कार्कीले शववाहनको चाबी हस्तान्तरण गरेका थिए । त्यसलगत्तै अस्पतालका बोर्ड सदस्य समेत रहेका सीडीयो आचार्यले अस्पतालका बोर्ड सदस्य शेषमणि आचार्य र निमित्त कार्यकारी निर्देशक डा. राम कुमार श्रेष्ठलाई चाबी हस्तान्तरण गरेका थिए । सो अवसरमा प्रमुख जिल्ला अधिकारी आचार्यले जिल्लाभरनै शववाहन नहुँदा कोभिडबाट मृत्यु भएका व्यक्तिको शव व्यवस्थापनमा समस्या भएपछि सुर्य नेपालसँग सहयोग माग भए बमोजिम हाल उपलब्ध भएको बताए । अस्पतालका बोर्ड सदस्य शेषमणि आचार्यले सबैको साथ र सहयोगले जिपीको स्तरोन्नती भइरहेको उल्लेख गरे । कार्यक्रममा जिल्ला प्रहरी कार्यालय तनहुँका प्रमुख प्रहरी उपरिक्षक दिनेशराज मैनाली, कम्पनीका प्रतिनिधि गौतम यादब, अन्जन दुवाडी, हुमनाथ अर्याल लगायतको सहभागिता रहेको थियो । अस्पतालका निमित्त कार्यकारी निर्देशक डा. श्रेष्ठले शव वाहनले नियमित सेवा दिने बताए ।
साेमबार परीक्षण गरेकाे १४ प्रतिशतमा संक्रमण पुष्टि
काठमाडौं । पछिल्लो २४ घण्टामा नेपालमा परीक्षण गरेको १४ प्रतिशतमा संक्रमण पुष्ट भएको छ । स्वास्थ्य तथा जनसंख्या मन्त्रालयको अनुसार परीक्षण गरेका कुल १६ हजार २३३ जनामा २ हजार २९५ जनामा संक्रमण पुष्टि भएको हो । पछिल्लो २४ घण्टामा ११ हजार ८९२ जनाको पिसिआर र ४ हजार ३४१ जनाको एन्टिजेन परीक्षण गरिएको थियो । त्यस्तै कोरोना संक्रमणबाट थप १ हजार ८०८ जना संक्रमणमुक्त भएका छन् भने १६ जनाको मृत्यु भएको छ । कोरोनाबाट ज्यान गुमाउनेको कुल संख्या १० हजार ७३० पुगेको छ । यस्तै काठमाडौं उपत्यकामा आज थप ९०६ जनामा कोरोना संक्रमण पुष्टि भएको छ । मन्त्रालयका अनुसार काठमाडौं जिल्लामा ६६५, ललितपुरमा १०३ र भक्तपुरमा १३८ जना संक्रमित थपिएका हुन् ।
बागलुङ अब अक्सिजनमा आत्मनिर्भर हुने
गलकाेट । धौलागिरि अस्पताल परिसरमै अक्सिजन प्लान्ट निर्माण गरिने भएकोे छ । बागलुङ जिल्लास्थित उक्त अस्पतालमा असार अगावै प्लान्ट निर्माण गर्ने भनिए पनि समयमै बजेट नआउँदा दुई महिना ढिला भएको अस्पतालले जनाएको छ । अस्पतालको स्तरवृद्धि गरी २०० श्याको प्रदेशस्तरीय उपप्रादेशिक अस्पताल बनाउन लागिएकाले यसलाई पुग्नेगरी र जिल्लाका अन्य अस्पताल तथा स्वास्थ्यचौकीमा पठाउन सकिने गरी प्लान्ट निर्माण गर्न लागिएकोे हो । अस्पतालमा अहिले सिलिण्डरमा भर्न नमिल्ने २५ श्ययालाई मात्र पुग्ने प्लान्ट सञ्चालनमा छ । कोरोनाको दोस्रो लहरका बेला अस्पतालमा एकै पटक ४७ सख्त बिरामी भर्ना भएकाले अक्सिजनको अभाव भएर पोखराबाट दैनिक १२० सिलिण्डर अक्सिजन ल्याउनु परेको थियो । अक्सिजनमा जिल्लालाई आत्मनिर्भर गराउन सरकारले जिल्लाका सबै स्वास्थ्य संस्थामा पुग्नेगरी यहाँ अक्सिजन प्लान्ट स्थापना गर्ने निर्णय गरेको र त्यसका लागि तीन करोड बजेट विनियोजन गरेको थियो । प्लान्टका लागि बोलपत्र आह्वान गर्दा दुई करोड ४० लाखमा उपलब्ध गराउने एक कंपनीसँग सम्झौता भइसकेको अस्पतालका लेखा अधिकृत झलक शर्माले बताए । चीनबाट आयात गर्नेगरी मेडिटेक प्रालिले अक्सिजन प्लान्ट ल्याउने भएकाले अहिले रु २३ लाखको लागतमा पूर्वाधार निर्माणको काम जारी रहेको उनको भनाइ थियो । भदौ मसान्तभित्रै काम सम्पन्न गरी भुक्तानी माग गर्न सङ्घीय सरकारबाट पत्र आएकाले निर्माण शुरु गरिएको अस्पताल व्यवस्थापन समितिका अध्यक्ष केबी राना मगरले जानकारी दिए । दुई वर्षअघि प्रादेशिक सामाजिक विकास मन्त्रालयले उपलब्ध गराएको ९० लाखको लागतमा प्लान्ट सञ्चालनमा ल्याइएको थियो । अस्पतालमा अहिले तीन सघन उपचार कक्ष, दुई भेन्टिलेटरसहित ३५ श्याको आइसोलेशन भए पनि पूर्वाधार र जनशक्तिको अभाव छ । अहिले मौजुदा जनशक्तिसमेत घटेकाले सघन उपचार कक्षको सेवासमेत बन्द भएको छ । रासस
