विकासन्युज

दराज ११ः११ मा अनरको स्मार्टफोन किन्दा आकर्षक छुट र उपहार

काठमाडाैं । अनरको आधिकारिक बिक्रेता सेल्ट्रोन नेपालले दराज ११ः११ को अवसरमा विभिन्न आकर्षक अफर ल्याएको छ । कम्पनीले नोभेम्बर ११ देखि सुरु भएकाे दराज ११ः११ को लागि छुट तथा उपहारको अफर सार्वजनिक गरेको हो । ११ः११ को मुख्य आकर्षण फ्रि गिफ्ट रहेको छ । अनर नेपालले फोन खरिदमा निःशुल्क उपहार दिनेछ। अनर एक्स७, अनर एक्स८ वा अनर ५० लाइटको कुनै पनि खरिदमा अनर इयरबड्स एक्स३ लाइट निःशुल्क पाइनेछ । साथै, अनर एक्स९ को खरिदमा अनर ब्यान्ड ६ निःशुल्क पाउनेछन्। कम्पनीले एसेसरिजमा पनि छुट दिएको छ । ५ हजार ४९० मूल्यको अनर इयरबड्स एक्स३ लाइट ४ हजार ४९० मै पाउन सकिनेछ भने ६ हजार ४९० मूल्यको अनर ब्यान्ड ५ हजार ४९० रुपैयाँमा पाउन सकिनेछ ।  

डलरमा चुनावी प्रचार : नियमन न कर

काठमाडौं । प्रतिनिधि र प्रदेशसभा निर्वाचनका लागि अब एक हप्ता मात्रै बाँकी छ । उम्मेदवारहरू आफ्ना कार्यकर्ताका दलबलसहित चुनावी प्रचारमा व्यस्त छन् । मतदाता रिझाउने सबैको आफ्नै लगन र शैली जारी छ । त्यसमा आधुनिक सूचना प्रविधिको प्रयोग पनि भरपूर देखिन्छ । फेसबुक, ट्वीटर, इन्स्टाग्राम, टिकटकलगायत सामाजिक सञ्जाल र इन्टरनेटमा आधारित अन्य प्लेटफर्ममार्फत प्रचार चलिरहेका छन् । जुन स्वभाविक एवं आवश्यकता नै भइसक्यो । तर ‘चुनावमय सञ्जाल’का अन्तरकुन्तर खोज्दा त्यहाँ समस्याका अनेकौं गाँठा भेटिन्छन् । सञ्जालमा चलिरहेका चुनाव केन्द्रित गतिविधि केलाउँदा आर्थिक पाटोसम्म पुग्छ । राज्यसंयन्त्र एवं नियामकको कमजोरीदेखि विधायकी भूमिकामा जान प्रतिस्पर्धा गरिरहेका उम्मेदवारले मौजुदा कानून र वित्तीय अनुशासनमा ध्यान नदिएको देखिन्छ । सामाजिक सञ्जाल फेसबुक सञ्चालन गरिरहेको मेटाले सार्वजनिक गरेको ‘मेटा एड लाइब्रेरी रिपोर्ट’ अनुसार गत सेप्टेम्बरदेखि नोभेम्बर ११ तारिक (सोमबार दिउँसो १२ बजेरसम्ममा) पाँच हजार पाँच सय ६० फेसबुक पेज र प्रोफाइलबाट चुनावी विज्ञापन ‘बुस्ट’ गरिएको छ । यो सङ्ख्या निर्वाचन र राजनीतिक क्षेत्रसँग जोडिएका विषयबारे मात्रै गरिएको सशुल्क विज्ञापनको हो । आज दिउँसोसम्ममा कूल ६७ हजार ३६ अमेरिकी डलर बराबर खर्च भइसकेको मेटाको विवरणमा देखिन्छ । व्यावसायिक, शैक्षिकलगायत प्रयोजनका लागि गरिएका फेसबुक विज्ञापन यसमा समावेश छैनन् । चुनावी मैदानमा रहेका उम्मेदवारहरूले आफ्ना लागि मत माग्नेदेखि प्रतिस्पर्धीलाई आलोचना गर्नेसम्मका सामग्रीहरू फेसबुकमा ‘बुस्ट’ गरिरहेका छन् । जसकारण न्युजफिडमा ‘स्पोन्सर्ड पोस्ट’ अर्थात् पैसा तिरेर विज्ञापन गरिएका चुनावी सामग्री बग्रेल्ती भेटिन्छन् । त्यसरी विज्ञापन गर्दा अमेरिकी डलरमा भुक्तानी गर्नुपर्छ । केन्द्रीय बैंकले विदेशी मुद्रा सञ्चिति घटेका कारण अर्थतन्त्रका अरु सूचक खल्बलिएको बताइरहेको छ । यस्तो बेला डलर तिरेर भोट माग्दा विदेशी मुद्रा सञ्चिति घट्छ र भुक्तानी सन्तुलनमा थप चाप पर्छ । धेरैजसो राजनीतिक दल र उम्मेदवारहरूले विदेशी मुद्रा सञ्चिति बढाउने योजना आफ्ना घोषणापत्रमा समेत राखेका छन् । तर विदेशी मुद्रा सञ्चिति भने उहाँहरूकै कारण घटीरहेको छ । यी गतिविधिबाट मुद्रा सञ्चिति घट्ने र भुक्तानी सन्तुलन बिग्रने मात्र नभई कानुनको समेत उल्लङ्घन भएको छ । के सामाजिक सञ्जालमा पैसा तिरेर (पेड) भइरहेका सबै चुनावी विज्ञापन वैध र विद्यमान कानुनको दायरा भित्र छन् ? नेपाल राष्ट्र बैंक भन्छ– ‘सामाजिक सञ्जालमा भइरहेका चुनावी विज्ञापनको कारोबार माथि शङ्का गर्ने ठाउँ छ ।’ नेपाल राष्ट्र बैंक विदेशी विनिमय व्यवस्थापन विभागका कार्यकारी निर्देशक रामु पौडेलका अनुसार नेपालभित्र बसोबास गरिरहेका व्यक्तिले वार्षिक पाँच सय डलर बराबर खर्च गर्नसक्ने गरी डलर कार्ड सुविधा दिइएको छ । ‘नेपालबाट खर्च गर्न पाउने भनेको वार्षिक पाँच सय डलरसम्म हो । तर कसैले वार्षिक पाँच हजार डलर कमाएको छ भने त्यस्तो अवस्थामा क्रेडिट कार्डबाट थप खर्च गर्ने सुविधा पाउन सकिन्छ’, पौडेलले भने । तर उम्मेदवारहरूले फेसबुक विज्ञापन गर्न एकजनाले तीन हजार एक सय अमेरिकी डलरसम्म खर्चेका छन् । अर्थात् डलर कार्डमार्फत् खर्च गर्न पाउने सीमाभन्दा बढी कसरी खर्च भइरहेको छ । डलर कार्ड नहुनेले विदेशमा बस्ने आफन्त, साथीभाइहरूमार्फत भुक्तानी गर्न लगाउने गरेको र विदेशमा बस्नेले पनि निश्चित प्रतिशत शुल्क लिएर यस्तो रकमको भुक्तानीमा सहयोग गर्ने गरेको सरकारी निकायकै अध्ययनबाट देखिन्छ । मन्त्रिपरिषद्को गत असोज ११ को निर्णयबाट खारेज भएको नेपाल राजस्व परामर्श समितिले तयार पारेको अनलाइन व्यवसायमा करारोपणसम्बन्धी अध्ययन प्रतिवेदन, २०७९ मा भनिएको छ, ‘सामाजिक सञ्जालमा गरिने विज्ञापन सेवा खरिद गर्न विदेशबाटै रकम भुक्तानी गर्ने र सोबाफतको रकम नेपालमा रहेका आफन्त वा साथीभाइलाई भुक्तानी गर्दै आइरहेका छन् ।’ निर्वाचन प्रचारका लागि फेसबुकमार्फत् हुने खर्चमा निगरानी राख्न निर्वाचन आयोगले मेटासँग सम्झौता गरेको छ । फेसबुक पोस्ट बुस्ट गर्न भएको खर्चको विवरण उम्मेदवारले आयोगलाई बुझाउनुपर्छ । राष्ट्र बैंकको नियमअनुसार डलर कार्डबाट भुक्तानी गर्न पाइने पाँच सय डलरको अधिकतम सीमा उल्लङ्घन भएको र विदेशबाट भुक्तानी गर्न लगाएर नेपालमा त्यसको खर्च विवरण बुझाएको दुवै अवस्थामा यो नेपालको मौजुदा कानून विपरित हुन जान्छ । अर्को नीतिगत प्रश्न नेपालभित्र सेवा दिईरहेका सामाजिक सञ्जाललाई करको दायरामा आउन नसक्दा ठूलो परिमाणमा राजस्व गुमिरहेको सरकारी अध्ययनले नै देखाएको छ । राजस्व परामर्श समितिले तयार पारेको ‘राजस्व दायरा बृद्धिका सम्बन्धमा अध्ययन गरी तयार पारिएको प्रतिवेदन, २०७९’ अनुुसार पछिल्ला वर्षमा सामाजिक सञ्जालमा विज्ञापन गर्नेक्रम निकै बढेको छ । प्रतिवेदनमा भनिएको छ, ‘नेपालमा कानुनी रुपमा दर्ता नभएका सामाजिक सञ्जालमा विज्ञापन गर्ने प्रवृत्ति ह्वात्तै बढेको छ । त्यस्ता सामाजिक सञ्जालहरूले वार्षिक अर्बौँ रुपैयाँ नेपालबाट विदेशतर्फ लगिरहेका छन् ।’ सामाजिक सञ्जालहरूले नेपालबाट ठूलो रकम लगिरहेको र त्यसलाई करको दायरमा ल्याउनुपर्ने राजस्व परामर्श समितिको सुझावपछि सरकारले चालु आर्थिक वर्ष २०७९÷८० को बजेटमा नेपाल बाहिरबाट विद्युतीय सञ्जालको प्रयोग गरी नेपालभित्र आर्थिक क्रियाकलाप सञ्चालन हुनेक्रम बढ्दै गएको सन्दर्भमा त्यस्ता व्यवसाय वा कारोबारलाई करको दायरामा ल्याउने उल्लेख गरेको छ । त्यस्तै, आर्थिक ऐन, २०७९ मार्फत् विद्युतीय सेवा कर (डिजिटल सर्भिस ट्याक्स) सम्बन्धी पहिलोपटक व्यवस्था गरिएको आन्तरिक राजस्व विभागका महानिर्देशक रितेश कुमार शाक्य बताउनुहुन्छ । “नेपालका उपभोक्तालाई उपलब्ध गराएको विद्युतीय सेवामा कारोबार रकमको दुई प्रतिशतका दरले डिएसटी (डिजिटल सर्भिस ट्याक्स) र १३ प्रतिशत भ्याट (मूल्य अभिवृद्धि कर) लाग्छ”, महानिर्देशक शाक्यले भन्नुभयो, “केही कम्पनीहरूले निवेदन दिएर दर्ताको पक्रियामा छन् भने केहीले दर्ताका लागि चासो देखाइरहेका छन् । उनीहरू दर्ता भएर आइसकेपछि कारोबारमा कर लगाउने हो ।” नेपालमा सेवा दिइरहेका सामाजिक सञ्जाल तथा इन्टरनेटमा आधारित कम्पनी दर्ताका लागि विभागले डिजिटल पोर्टल खोलेको पनि महानिर्देशक शाक्यको भनाइ छ । राजस्व परामर्श समितिको प्रतिवेनदले डाटा पोर्टल डट कमको तथ्याङ्कलाई उद्धृत गर्दै सन् २०२२ सम्ममा फेसबुकका नेपालमा एक करोड ३३ लाख प्रयोगकर्ता रहेको उल्लेख गरेको छ । त्यस्तै बजारसम्बन्धी अनुसन्धान गर्ने कम्पनी स्टाटिस्टाकाका अनुसार फेसबुकको प्रति विज्ञापनकर्ता विज्ञापन आम्दानी सन् २०२१ मा ४० दशमलव ९६ अमेरिकी डलर पुगेको उल्लेख छ । सो आय सन् २०२० मा ३२ दशमलव ०३ अमेरिकी डलर बराबर थियो । यस प्रकारले हेर्दा नेपाली प्रयोगकर्ताले विज्ञापन हेरेबापत फेसबुकले वार्षिक रु ६० अर्बभन्दा बढी रकम आय गर्दै आइरहेको प्रतिवेदनमा जनाइएको छ ।  

सामाजिक संजालमा प्रचार गर्न श्री गुरुङले गरे ४ लाख खर्च, कुन उम्मेदवारको कति ?

काठमाडौं । सामाजिक सञ्जालमा निश्चित भौगोलिक क्षेत्र, लैंगिक तथा उमेर समूहलगायत लक्षित वर्ग सम्ममा मात्रै सूचना पुग्ने गरी विज्ञापन गरिन्छन् । त्यस्तै खर्च गरिने रकमका आधारमा ‘बुस्ट’ गरिएका ‘पोस्ट’को पहुँच निर्धारण हुन्छ । उम्मेदवारहरूले आफ्ना क्षेत्रकेन्द्रित विज्ञापन गरिरहेका छन् । प्रतिनिधिसभातर्फ काठमाडौं क्षेत्र नम्बर ५ का उम्मेदवार श्रीराम गुरुङले पछिल्लो ३० दिन अवधिमा सबैभन्दा बढी तीन हजार एक सय २५ डलर खर्च गरेको मेटाको विवरणमा उल्लेख छ । काठमाडौं क्षेत्र नम्बर ५ बाट प्रतिनिधि सभातर्फका स्वतन्त्र उम्मेदवार सुशान्त श्रेष्ठको फेसबुक पोस्ट बुस्ट गर्नका लागि दुई हजार दुई सय ३८ डलर खर्च भइसकेको छ । नेकपा (एमाले)का तर्फबाट काठमाडौं क्षेत्र नं १ मा प्रतिनिधिसभाका उम्मेदवार किरण पौडेलले एक हजार तीन सय ५० डलर खर्च गरेका छन् । त्यस्तै, डा. सुरेस बस्नेतको फेसबुक अकाउन्ट बुस्ट गर्नका लागि एक हजार आठ सय डलर खर्च भइसकेको देखिन्छ । बस्नेत भोजपुर–१ बाट प्रतिनिधिसभाका उम्मेदवार हुन् । ‘विकास पुरुष इस्तियाक राइलाई फेरि जिताऔँ, नेपालगञ्जलाई समृद्ध बनाऔँ’ नामको फेसबुक पेजका पोस्ट बुस्ट गर्न एक हजार दुई सय ६८ डलर खर्च भएको छ । राष्ट्रिय स्वतन्त्र पार्टीकातर्फबाट काठमाडौँ क्षेत्र नं ७ मा प्रतिनिधिसभा सदस्य उम्मेदवार गणेश पराजुलीको फेसबुक पेजमा राखिएका पोस्ट बुस्ट गर्न नौ सय ३७ डलर खर्च भइसकेको मेटाको तथ्याङ्कबाट देखिन्छ । काठमाडौं क्षेत्र नं ५(२) बाट प्रदेशसभाका लागि स्वतन्त्र उम्मेदवार जगन्नाथ लामिछानेको फेसबुक पोस्टबाट भएको विज्ञापनका लागि नौ सय चार डलर खर्च भएको छ । फेसबुक पोस्ट बुस्ट गर्नकै लागि भएको खर्चमा त्यस्तै सोमप्रसाद पाण्डे नामको अकाउन्टमा आठ सय ४२ डलर, प्रदीप पौडेल नामको पेजमा सात सय १७ डलर, अनुप बोहराको फेसबुक पोस्टमा छ सय ७८ डलर, रन्जु दर्शना नामको पेजका लागि छ सय ६६ डलर र उपेन्द्र यादव नामको पेजमा छ सय ५२ डलर खर्च भएको छ । ह्वाइ नेपाली कांग्रेस नामको पेजमा पाँच सय ३५ डलर र रवीन्द्र मिश्रको नाममा पाँच सय ३५ डलर खर्च भएको छ । त्यस्तै, ‘नो, नट अगेन’ अभियानका कुरा पनि फेसबुकमा बुस्ट भएका छन् । सामाजिक सञ्जालमा नो नट अगेट अभियान चलाउने व्यक्तिहरू पहिचान गरी कारबाही गर्न निर्वाचन आयोगले प्रहरीलाई पत्राचारसमेत गरेको थियो । तर त्यसविरुद्ध सर्वोच्च अदालतमा मुद्दा प¥र्यो र उक्त अभियानलाई कारबाही नगर्न आदेश दिएको छ । छिमेकी मुलुक भारतमा अनलाइनबाट विज्ञापन गर्दा अठार प्रतिशत जीएसटी र दुई प्रतिशत टिडिएस लाग्दै आएको छ । बङ्गलादेशमा गुगल फेसबुकजस्ता संस्थाहरू दर्ता भई १५ प्रतिशतले मूल्य अभिवृद्धि कर तिर्दै आएका छन् । बङ्गलादेशमा दर्ता नभई सञ्चालनमा रहेका अनलाइन विज्ञापन बापतको रकम भुक्तानी गर्दा पन्ध्र प्रतिशत भ्याट लाग्ने गरेको छ भने गैर बासिन्दालाई अनलाइन विज्ञापनबापत रकम भुक्तानी गर्दा पन्ध्र थप प्रतिशत टिडिएस लाग्ने व्यवस्था रहेको छ । नेपालबाट गरेको आय रकममा पन्ध्र प्रतिशतका दरले मात्र कर सङ्कलन गर्न सकेमात्र पनि नौ अर्बभन्दा बढी रकम सङ्कलन हुने देखिन्छ । यो कुल रकममध्ये एकदमै न्यून रकम मात्र करबापत यहाँ भुक्तानी भएको देखिन्छ ।

युनाइटेडमा उपासनाको डेढ वर्ष : पुरा नभएको त्यो इच्छा र सेयरधनीले पाएको खुसी

काठमाडौं । सोमबारदेखि लागू हुने गरी युनाइटेड इन्स्योरेन्सबाट उपासना पौडेल बाहिरिन् । उनी स्वेच्छिक रुपमा कम्पनीको सीईओ पदबाट बाहिरिएको बुझिएको छ । विभिन्न लक्ष्य र उद्देश्यका साथ युनाइटेड इन्स्योरेन्सको सीईओ बनेकी उपासनाको बर्हिगमनलाई भने धेरैले अप्रत्याशित मात्रै ठानेनन् आश्चर्यका रुपमा पनि लिएका छन् । चार वर्षे कार्यकाल पुरा हुन अझै अढाई वर्ष बाँकी रहँदा उनले युनाइटेड इन्स्योरेन्स छोडेर किन अन्तै जानु पर्ने अवस्था आइलाग्यो ? यो प्रश्नको जवाफ भने अझै अनुत्तरित छ । विकासन्युजलाई प्राप्त सूचना अनुसार उनी हिमालयन रिमा नायब प्रमुख कार्यकारी अधिकृत (डीसीईओ)को रुपमा जान लागेकोले युनाइटेड इन्स्योरेन्स छोडेकी हुन् । युनाइटेडमा सीईओको रुपमा डेढ वर्ष मात्रै काम गरे पनि उपासनाले कम्पनीको उचाइ र उपलब्धिमा भने धेरै काम गरेको बीमा क्षेत्रका जानकारहरुको बुझाइ छ । यस विषयको प्रष्टता कम्पनीले हासिल गरेका पछिल्ला केही सूचकहरुहरुले पनि देखाउँछ । चार वर्षे कार्यकालमा पौडेलले गर्छु भनेर गरेका प्रतिवद्धताहरु सबैले पूर्णता पाउन नसकेपनि अधिकांश योजना र प्रतिवद्धताहरुमा भने उनी सफल बनेकी छन् । कम्पनीको विगत र उपासनाको ‘इन्ट्री’ वि.सं २०५० साल मंसिर १६ गतेदेखि सञ्चालनमा आएको कम्पनी हो युनाईटेड इन्स्योरेन्स । नेपाली निर्जीवन बीमा क्षेत्रमा कम्पनीले करिब तीन दशक पुगेको छ । बजारमा प्रवेश गर्दा कम्पनी नेपालकै पाँचौं निर्जीवन बीमा कम्पनी थियो । हाल उक्त संख्या बढेर १८ पुगेको छ । देशको ठूलो व्यवसायिक घराना चौधरी ग्रुप र एनई ग्रुप लगायतद्वारा प्रवर्द्धित यो कम्पनी कुनै बेला बिजनेसको हिसावले ‘टप थ्री’ बीमा कम्पनीहरुमध्येमा पर्थ्यो । तर, फरक रणनीति र व्यवसायिक योजना लिएर आएका नयाँ–नयाँ बीमा कम्पनीहरुका अगाडि युनाइटेड पछि पर्न थाल्यो । सबैभन्दा बढी प्रमुख कार्यकारी अधिकृतहरु फेरिने कम्पनीहरुको सूचीमा पनि युनाइटेड इन्स्योरेन्स पर्न थाल्यो । २८ वर्षको अवधिमा कम्पनीमा २ दर्जन बढी सीईओ फेरिए । तर, कम्पनीले अपेक्षाकृत प्रगति गर्न सकेन । वि.सं २०७८ बैशाखमा सो कम्पनीको सीईओको रुपमा तिनै उपासना पौडेल भित्रिइन् । उनी सीईओ बनेपछि पनि कम्पनीले एक किसिमको चर्चा पाएको थियो । ‘डाउनवार्ड’ पोर्टफोलियोमा रहेको कम्पनीमा कम उमेरको महिला सीईओ ल्याएपछि धेरैले प्रश्न पनि तेर्साए । तर, एकपछि अर्को सूचकमा चम्केपछि उनको तारिफ बीमा क्षेत्रले गर्यो । त्यसपछि आयो युनाइटेडमा यूटर्न सीईओ बनेपछि युनाइटेड इन्स्योरेन्सले विभिन्न सूचकमा आश्चर्यजनक रुपमा छलाङ मार्यो । विगतमा ‘टप थ्री’को आफ्नो स्थान सुरक्षित राख्ने रणनीतिका साथ कम्पनी अगाडि बढिरह्यो । पौडेल सीईओमा नियुक्त भएकै वर्षमा कम्पनीले नयाँ इतिहास रच्न सफल भयो । कम्पनीले आर्थिक वर्ष २०७७/७८ मा एक अर्बभन्दा बढी प्रिमियम संकलन गर्यो । जुन त्यसअघिकै सर्वाधिक प्रिमियम अर्थात् कम्पनीको पहिलो रेकर्ड हो । पौडेल सीईओमा नियुक्त भएको साढे २ महिनामै कम्पनीले २८ वर्षमा नयाँ इतिहास रच्न सफल भयो । कम्पनीले सञ्चालक, व्यवस्थापन तथा सम्पूर्ण कर्मचारीहरुको अथक प्रयासबाट १ अर्ब रुपैयाँ बीमा शुल्क संकलन गर्न सफल भयो । त्यसलाई ठूलो उपलब्धिका रुपमा लिँदै कम्पनीले केक समेत काटेर उत्सव मनायो । कम्पनीले अघिल्लो आर्थिक वर्ष अर्थात् २०७६/७७ मा ६९ करोड बीमाशुल्क आर्जन गर्यो । कम्पनीकोे सेवामा गरेको निरन्तर गुणस्तरीय विस्तार, शाखा विस्तार, डिजिटाइजेसनको प्रयोग, नयाँ बजार प्रवद्र्धन रणनीति, संगठनात्मक संरचनामा सुधार जस्ता क्रियाकलापमार्फत् यो सफलता हासिल गर्न सहयोग पुगेको कम्पनीको दावी छ । कम्पनीले सामाजिक सञ्जालहरुलाई पनि प्राथमिकता दियो । अहिलेको नयाँ पुस्ता सामाजिक सञ्जालमा बढी अभ्यस्त भएकाले उनीहरुलाई फोकस गरेर पनि युनाइटेडले आफ्नो वेवसाइटलाई परिस्कृत गर्यो । यस्तै, सन् २०२१ मा कम्पनी एशियाकै उत्कृष्ट निर्जीवन बीमा कम्पनी बन्न सफल भयो । इन्डियन चेम्बर अफ कमर्शले नेपालको इन्स्योरेन्स कम्पनीमध्ये यूनाइटेडलाई ‘बेष्ट जनरल इन्स्योरेन्स कम्पनी अफ दि इयर’ बाट सम्मानित गरेको हो । इन्डियन चेम्बर अफ कमर्सले आयोजना गरेको तेश्रो इमर्जिङ एशिया इन्स्योरेन्स कन्क्लेभ एण्ड अवार्डस् कार्यक्रममा कम्पनीले सो अवार्ड पाएको हो । सो कार्यक्रम ३० अप्रिल २०२२ अर्थात २०७९ बैशाख १७ गते भारतको कलकत्तामा भएको हो । त्यस्तै, पौडेलको नेतृत्वमा कम्पनीका बीमितले सातादिन भित्रै दावी भुक्तानी पाए । जुन विगतमा एक/दुई वर्षसम्म पनि भुक्तानी नभएको गुनासो बीमितहरुबाट प्रशस्त आउँथे । अहिले विभिन्न कम्पनीहरु बिजनेस नभएको भन्दै चिन्तित बनेको अवस्थामा उपासनाले नेतृत्व गरेको युनाईटेड इन्स्योरेन्सको बिजनेसमा भने बढोत्तरी आयो । कम्पनीले तीन महिनामै १७.०८ प्रतिशत ग्रोथ गर्न सफल भएको छ । आर्थिक वर्ष २०७९/८० को साउनमा १० करोड ४० लाख रुपैयाँ बराबरको प्रिमियम संकलन गरेको कम्पनीले असोजमा मात्रै १२ करोड १८ लाख बराबरको बीमाशुल्क आर्जन गरेको छ । उपासनाले अपनाएको टेक्निक पौडेल सीईओ भएर आएपछि युनाइटेड व्यवस्थापनले कम्पनीलाई छोडेर गएका ग्राहकहरुलाई पुनः कम्पनीमै ल्याएर गुणस्तरीय सेवा दिन सफल भयो । जुन कम्पनीका लागि ठूलो चुनौति थियो । सीईओ पौडेल कम्पनीलाई पुनः सुरुवातकै चरणमा ल्याउन अर्थात् पुनर्जीवित गर्न आधारभूत कामबाटै शुरु गरेको बताउँछिन् । उनले कम्पनीको रि-ब्राण्डिङ, लोगो परिवर्तनदेखि बजारमा प्रस्तुत हुने शैली समेत परिवर्तन गरिन् । योसँगसँगै कम्पनीले प्रविधिको प्रयोगलाई विशेष प्राथमिकता दियो । ग्राहकलाई आकर्षित गर्नको लागि स–साना विषयहरुमा ध्यान दिनुपर्ने रणनीतिमा लागेकी पौडेलले युनाइटेडले हरेक प्रणाली अटोमेटेड (स्वचालित) गरेर ग्राहकलाई छिटो तथा छरितो सेवा दिन कम्पनी डटेर लागेको अनुभव विकासन्युजसँग सुनाएकी थिइन् । । ‘मेरो ४ वर्षको कार्यकालमा कम्पनीलाई ‘स्टेबल’ बनाउने ईच्छा छ, २०७८/७९ मा जसरी भएपनि लाभांश दिने हो, केही भएन भनेपनि न्यूनतम ५ प्रतिशत त हामी दिन सक्ने अवस्थामा हुन्छौं,’ पौडेलले २०७८ भदौमा नै विकासन्युजसँग भनेकी थिइन् । पौडेलले भनेजस्तै कम्पनीका सेयरधनीले गत आवको लाभांशबाट ५.२६३२ प्रतिशत लाभांश पाउने भएका छन् । विगत ५ वर्षदेखि हात खाली भएर निराश बनेका लगानीकर्ताहरुमा यो वर्ष भने खुशीयाली छाएको छ । लाभांश इतिहास र बिजनेस आर्थिक वर्ष २०७१/७२ देखियताको लाभांश इतिहास हर्ने हो भने कम्पनीले दुई वर्षको नाफाबाट मात्रै लाभांश वितरण गरेको छ । कम्पनीका सेयरधनीले आर्थिक वर्ष २०७१/७२ को नाफाबाट २० प्रतिशत र आर्थिक वर्ष २०७२/७३ को नाफाबाट १० प्रतिशत बोनस सेयर पाएका छन् । त्यसयता लगातार ५ वर्षसम्म भने कम्पनीका सेयरधनीको हात खाली भएको छ । आर्थिक वर्ष २०७३/७४ देखि आर्थिक वर्ष २०७७/७८ सम्मको नाफाबाट सेयरधनीले बोनस र नगद कुनै पनि प्रकारको लाभांश पाएनन् । तर, लामो समयपछि भने कम्पनीका सेयरधनीले लाभांश पाउने भएका छन् । कम्पनीले आर्थिक वर्ष २०७८/७९ को नाफाबाट सेयरधनीलाई ५ प्रतिशत बोनस र ०.२६३२ प्रतिशत नगद लाभांश वितरण गर्ने घोषणा गरेको छ । हाल कम्पनीको चुक्ता पुँजी एक अर्ब २ करोड रुपैयाँ छ । आर्थिक वर्ष २०७८/७९ को चौथो त्रैमासिक वित्तीय विवरण अनुसार कम्पनीको जगेडा कोषमा १९ करोड ३८ लाख रुपैयाँ सञ्चित छ । जुन अघिल्लो वर्षको तुलनामा ४७.९४ प्रतिशतले बढी हो । त्यस्तै, बीमा कोषको आकार १९.९२ प्रतिशतले बढेर ४२ करोड २ लाख रुपैयाँ पुगेको छ । इन्स्योरेन्सले गत आवमा १३ करोड ९६ लाख रुपैयाँ बराबरको खुद नाफा गरेको थियो । जुन अघिल्लो आवको तुलनामा ३ करोड रुपैयाँ बढी हो । त्यस्तै, समीक्षा अवधिमा कम्पनीले एक लाख ३७ हजार वटा बीमालेख जारी गरी कूल एक अर्ब ५६ करोड ४५ लाख रुपैयाँ बराबरको बीमाशुल्क आर्जन गरेको थियो । जुन अघिल्लो आवमा १ अर्ब १० करोड रुपैयाँ बराबरको बीमाशुल्क संकलन गरेको थियो । गत वर्ष कम्पनीको प्रतिसेयर आम्दानी १३.५८ रुपैयाँ, प्रतिसेयर नेटवर्थ १६०.४० रुपैयाँ र पीई रेसियो २५.७७ रहेको छ । असोज मसान्तसम्मको तुलनामा कम्पनीको बजार हिस्सा करिब ३ प्रतिशत रहेको छ । बीमाशुल्कको आधारमा कम्पनीको बजार हिस्सा २.९८ प्रतिशत रहेको हो । असोजसम्म १९ कम्पनीहरुले कूल १० अर्ब ८४ करोड रुपैयाँ बराबरको बीमाशुल्क आर्जन गरेका छन् । यता यूनाईटेडले भने ३२ करोड ३१ लाख रुपैयाँ बराबरको बीमाशुल्क आर्जन गरेको बीमा प्राधिकरणको तथ्याङ्कले बताएको छ । पुरा हुन नपाएको त्यो इच्छा ४ वर्षको कार्यकालमा युनाइटेडलाई ‘स्टेबल’ र ‘नम्बर वान’ बनाउने उनको इच्छा थियो । सो अवधिमा कम्पनीले ५ प्रतिशत बजार हिस्सा ओगेट्ने समेत उनको दावी थियो । युनाइटेडले मर्जरभन्दा पनि प्राप्तितर्फ ध्यान दिने र कुनै कम्पनीलाई प्राप्ति गरेमा अझ कम्पनीको बजार हिस्सा बढ्ने उनले बताएकी थिइन् । तर, कार्यकाल पूर्ण हुन नपाई कम्पनीबाट बाहिरिएपछि पौडेलको त्यो इच्छाले पूर्णता पाउन सकेन । भारतको दिल्ली विश्वविद्यालयको फ्याकल्टी अफ म्यानेजमेन्ट स्टडिज (एफएमएस) बाट एमबीएसम्मको अध्ययन पुरा गरेकी उनी भारतमा नै बीमा व्यवसायको क्षेत्रमा प्रवेश गरेकी हुन् । उनले बीमा क्षेत्रमा एक दशकभन्दा बढी अनुभव बटुलेकी सकेकी छिन् । करिब ३ वर्ष निर्जीवन बीमा क्षेत्रमा काम गरेकी उनी अब पुनर्बीमा क्षेत्रमा प्रवेश गर्ने भएकी छन् । युनाईटेडबाट बाहिरिएपछि उनी हिमालयन रि इन्स्योरेन्समा जाँदैछिन् । बीमा क्षेत्रमा एक क्षमतावान सीईओको रुपमा आफ्नो प्रोफाइल बनाउन प्रयत्नरत पौडेलको कार्यक्षमता र कार्यकुशलताकै कारण हिमालयन रिले उनलाई आकर्षक तलब सुविधासहित डीसीईओका रुपमा नियुक्त गर्न लागिएको बुझिएको छ ।

अब विश्वभरबाट पठाएकाे पैसा सिधै सानिमा बैंककाे खातामा

काठमाडौं । सानिमा बैंकले आफ्ना ग्राहकहरुका लागि सानिमा भिसा डाइरेक्ट सेवा ल्याएको छ । यो सेवा मार्फत् ग्राहकहरुले विदेशबाट पठाएको पैसा तुरुन्तै प्राप्त गर्न सक्नेछन् । विश्वभरबाट सानिमाको भिसा कार्ड नम्बरमा विभिन्न डिजिटल माध्यमहरू जस्तै इन्टरनेट बैंकिङ्ग, मोबाइल बैंकिङ्ग र एटीएमबाट सजिलै रकमान्तर गर्न सकिने छ । यस सेवा बैंकले भिसा इन्टरनेशनलसँग सहकार्य गरी प्रदान गरेको हो । सानिमा बैंकको देशका सातै प्रदेशमा १३० वटा कार्यालय तथा १२३ वटा एटिएम संचालनमा रहेका छन् । साथै, सानिमा बैंकको डेबिट तथा क्रेडिट कार्ड तथा मोबाइल बैंकिङ्ग एप प्रयोग गर्दा विभिन्न अस्पताल, सपिङ्ग आउटलेट, होटेल, रेष्टुरेन्ट आदिमा विशेष छुटको व्यवस्था रहेको छ ।

आर्थिक समृद्धिको नयाँ यात्रा सुरु गर्ने लक्ष्यमा छौं : प्रचण्ड

काठमाडौं । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले आर्थिक समृद्धिको नयाँ यात्रा सुरु गर्ने लक्ष्यमा वर्तमान गठबन्धन रहेको बताएका छन् । तनहुँको बन्दीपुर गाउँपालिका–१ डुम्रेमा आज आयोजित सत्तागठबन्धनको कोणसभालाई सम्बोधन गर्दै अध्यक्ष दाहालले नेपाललाई नयाँ युगमा लैजाने सङ्कल्पसहित गठबन्धन निर्माण भएको बताए । ‘यसपटकको निर्वाचन सामान्य हुनेछैन, यो निर्वाचन नेपालको इतिहासमा विशेष महत्व राख्ने निर्वाचनको रूपमा सम्पन्न हुँदैछ’, उनले भने । संविधानसभाबाट संविधान बनेपछि र त्यो संविधानअनुसारको सरकार बनेपछि अब स्थायित्व र विकासको यात्रातिर नेपाल लाग्नेछ भन्ने सोचे पनि घटनाक्रम त्यसरी विकसित नभएको अध्यक्ष दाहालको भनाइ थियो । ‘घटनाक्रमको विकास लामो सङ्घर्षबाट उपलब्धि प्रहार गर्नेतिर भयो, जसलाई प्रधानमन्त्रीका रूपमा अगाडि सा¥यौँ, उहाँले नै संविधानमाथि प्रहार गर्ने काम गर्नुभयो’, अध्यक्ष दाहालले भने । तीन वर्ष पुग्दा नपुग्दा प्रतिगमनको विरुद्ध, संविधानको रक्षा, जनताको अधिकार रक्षाका निम्ति सडकमा जानुपर्ने अवस्था आइलागेको भन्दै अध्यक्ष उनले जनताको प्रयासकै कारण गठबन्धन स्थापना भएको बताए । उहाँले नेकपा (एमाले) लाई नैतिक दृष्टिकोणले भोट माग्ने अधिकार नभएको बताउनुभयो । ‘संसद् विघटन गर्ने, पार्टी विभाजन गर्ने र अधिकार खोस्नेलाई के भनेर भोट दिने, संविधान च्यात्नका लागि मत चाहियो ? भनेर प्रश्न गर्नुपर्ने बेला आएको छ’, उनले भने । नेपाली कांग्रेसका वरिष्ठ नेता रामचन्द्र पौडेलको अग्रसरतामा गठबन्धन निर्माण भएको भन्दै उहाँ देशको कार्यकारी भूमिकामा पुग्न सक्ने व्यक्ति भएको उल्लेख गरे । ‘पौडेललाई धेरै मत दिएर जिताउनुस् त्यो सम्भावना बढ्यो, बढ्यो, बढ्यो’, अध्यक्ष दाहालले भने ।

लक्ष्मी बैंकले ल्यायो आजिवन निःशुल्क मोबाइल, इन्टरनेट बैंकिङ र डिम्याट सेवा

काठमाडाैं । लक्ष्मी बैंकले फिफा विश्वकपलाई लक्षित गर्दै बचत गरों, च्याम्पियन बनौं याेजना ल्याएकाे छ । बैंककाे अनुसार याे याेजना मंसिर ४ देखि पुस १६ गते सम्म संचालन हुनेछ । यस याेजना अन्तर्गत यस अवधिमा बचत गर्ने निश्चित बचतकर्ताले आजिवन निःशुल्क बैंकको मोबाइल बैंकिङ्ग, इन्टरनेट बेैकिंङ्ग, डिम्याट खाता, मेरो सेयर, भाइबर बैंकिङ्ग, इमेल प्राप्त गर्नेछन् । यसका साथै ग्राहकले पूर्व स्वीकृत क्रेडिट कार्ड र खुत्रुक्के लगायतका आकर्षक उपहारहरु प्राप्त गर्नेछन् । यस अभियानले वर्तमानका र भविष्यका दुवै पुस्ताहरुको भविष्य उज्ज्वल बनाउन ‘बचत’ को शक्ति र भावनालाई प्रवद्र्धन एवं प्रोत्साहन गर्ने लक्ष्य लिएको बैंकले जनाएकाे छ ।  

खप्तड लघुवित्तको सेयर नेप्सेमा सूचीकृत

काठमाडाैं । खप्तड लघुवित्तकाे सेयर नेपाल स्टक एक्सचेन्जमा सूचीकृत भएकाे छ । लघुवित्तकाे चार लाख थान ऋणपत्र कात्तिक २८ गते नेप्सेमा सूचीकृत भएको हो । लघुवित्त र  नेप्सेबीच साेमबार सेयर सूचीकृत सम्झाैता भएकाे हाे । यससँगै कार्त्तिक २९ गतेदेखि खप्तड लघुवित्तकाे सेयर दोस्राे बजारमा किनबेच गर्न पाइने छ । कम्पनीले प्रभु क्यापिटलमार्फत सेयर बिक्री खुल्ला गरेकाे थियाे ।