विकासन्युज

‘मेमोरी किङ’ को सुनौला सपना

काठमाडौं । ‘मेमोरी किङ’ का नामले विश्वमा परिचित अर्पण शर्मा कट्टेललाई भावी नेपाली पुस्तालाई स्मरणशक्तिको विधिबाट पढाएर शिक्षाको क्षेत्रबाट देशको मुहार फेर्न मन छ । विद्यमान शिक्षा प्रणालीले बालबालिकालाई पढ्न असाध्यै कठिनाइ भएको र परीक्षामा पास गर्नका लागि मात्र उनीहरुलाई पढाउने खालको शिक्षा प्रणालीमा परिर्वतन ल्याउनमा आफू लाग्ने योजना उनको छ । ‘नेपालको शिक्षा प्रणालीमा परिर्वतन गर्न मन छ, रटेर अध्ययन गर्ने विधि परिवर्तन मेरो नेतृत्वमा गर्न मन छ’, दुईपटक स्मरणशक्तिको माध्यमबाट विश्व रेकर्ड राख्न सफल शर्माले आफ्नो भावी योजना सुनाउँदै भने, ‘शिक्षाको क्षेत्रबाट देशको मुहार फेर्न मन छ, मेरो सपना छ, म पूरा गरेरै छाड्छु ।’ उनलाई हिजो पढेर आज बिर्सने शिक्षा प्रणालीमा परिर्वतन गर्न मन छ । आफूले लिएका कक्षाहरूमा पनि विद्यार्थीलाई प्रभावकारी तरिकाले पढाउन नसकिएको अनुभव भएपछि उनले पाँच सय विद्यार्थीबाट अहिले एकपटकमा एक सय जनामात्र विद्यार्थीलाई कक्षा लिन थालेका छन् । ‘मलाई पनि थाहा भएन, अहिले मैले एक सय जना मात्र राखेर पढाइरहेको छु’, उनले आफ्नो आगामी योजना सुनाउँदै भने, ‘मङ्सिर महिनादेखि एउटा कक्षामा ८० जना मात्र राखेर कक्षा सञ्चालन गर्ने तयारी गरेको छु, त्यो सिकाइ प्रभावकारी हुने रै’छ ।’ उनको कक्षा लिन मासिक एक हजारदेखि एक हजार पाँच सयसम्मले नाम दर्ता गर्ने गर्दछन् । तर इच्छुक धेरै हुँँदा कक्षा लिनका लागि समयको प्रतिक्षा गर्नुपर्ने हुन्छ । एकपटक कक्षा सञ्चालन गर्दा १० दिनको हुन्छ । ‘धेरैजसो अधिकृत र उपसचिवमा नाम निकाल्ने तयारीका मानिस आउँछन्”’ उनले आफ्नो कक्षा लिन आउने विद्यार्थीका बारेमा सुनाउँदै भने, ‘उपत्यकाबाट छोरी र उपत्यका बाहिरबाट छोरा धेरै आउने गरेका छन् ।’ उनको कक्षामा ७ कक्षाभन्दा माथिका विद्यार्थीलाई मात्र आउन मिल्छ । कक्षा लिएर गएको विद्यार्थीले पठाएको सन्देश देखाउँदै उनले भने, ‘म सफल भएँ भनेर म्यासेज पठाउँछन्, मलाई असाध्यै खुसी लाग्छ, अझ राम्रो गर्न प्रोत्साहन मिल्छ ।’ उनले आएका सन्देशलाई सुरक्षित राखेका छन् । झापाको भद्रपुर–८ मा विसं २०४६ माघ २३ गते मोहनप्रसाद कट्टेल र आमा खीना शर्माको तेस्रो सन्तानका रूपमा जन्मिएका शर्माले झापाकै एसएस निकेतनमा एसएलसी पास, एम्ब्रेल कलेजबाट व्यवस्थापनमा स्नातक गरेका छन् । उनले पनि जीवनमा स्मरणशक्तिकै प्रयोग गरेर विश्व रेकर्ड राख्न सक्छु भन्ने कल्पना जीवनमा गरेका थिएनन् । सानैदेखि धार्मिक परिवारमा जन्मिएका शर्मालाई पूजापाठ गर्दा ध्यान गर्ने बानी परेको थियो । तर स्मरणशक्ति बढाउन ध्यानले मद्दत गर्छ भन्ने चाहिँ थाहा थिएन । ‘मैले दशजोड दुई पढ्दा एउटा दुई मिनेटको भिडियो हेरेको थिएँ, स्मरणशक्ति बढाउनेसम्बन्धी थियो’, उनले त्यो भिडियो स्मरण गर्दै सुनाए, ‘दशवटा रटेर गर्ने र दशवटा टेक्निक लगाएर याद गर्ने थियो, मैले त्यो रटेर गर्ने तरिका र टेक्निक लगाएर गर्ने दुवै गरेँ, तर टेक्निक लगाएर याद गरेको धेरै लामो समयसम्म याद आइरहयो ।’ उनले त्यसपछि १५, २०, ३० हुँदै याद गर्दै गए । उनले यस्तो सम्भव छ भनेर अध्ययन गर्दा १८औँ शताब्दीदेखि नै राजा–महाराजाका बौद्धिक सल्लाहकारले यस्तो टेक्निक प्रयोग गरेको अध्ययनमा पाए । ‘धेरै वर्ष पहिला अहिलेजस्तो प्रविधिको जमाना थिएन’, उनले थपे, ‘लेख्ने मात्र जमाना थियो, जसले प्रयोग गरे, त्यो व्यक्तिमा मात्र रह्यो ।’ प्रत्येक व्यक्ति जन्मँदा स्मरणशक्ति ९९ प्रतिशतको उस्तै हुने तर एक प्रतिशतको मात्र जन्मजात नै स्मरणशक्ति लिएर जन्मने उनको अनुभव छ । स्मरणशक्तिबाट यसरी विश्व रेकर्ड साथीहरूसँग व्यवस्थापन विषयमा अध्ययन गर्दैगर्दा साथीहरूबीच स्मरणशक्तिको प्रतिस्पर्धा गर्ने कुरा चल्यो । पहिलोपटक ३०–३० वटा शब्द याद गर्ने सहमति भयो । ‘मैले सबैभन्दा छिटो याद गरेँ तर, साथीहरूलाई धेरै समय लाग्यो’, उनले विगत स्मरण गर्दै भने, ‘यो तरिकाले विश्व रेकर्ड राख्न सकिन्छ भनेर साथीहरूले भने, हेर्दै जाँदा एक मिनेटमा २२ वटाको रेकर्ड थियो, मलाई अहिले नै सक्छु जस्तो भयो, अनि प्रक्रिया अगाडि बढाइयो ।’ प्रक्रिया अगाडि बढाउँदा केही समय लाग्यो । शर्माले पहिलोपटक गिनिजबुक अफ वल्र्ड रेकर्डको सेप्टेम्बर २६, २०१५ मा एक मिनटमा ४२ वस्तुको क्रम स्मरण गरी स्मरणशक्तिमा विश्व कीर्तिमान कामय गरेका थिए । दोस्रोपटक जुन ३, २०२२ मा एक मिनटमा ८३ वस्तुको क्रम स्मरण गरी स्मरणशक्तिमा विश्व कीर्तिमान कायम गरेका हुन् । झापाको भद्रपुर सानोगाउँमा जन्मिएका सामान्य परिवारमा हुर्किएका शर्मालाई जीवनमा यति राम्रा मोड आउँलान् भन्ने लागेको थिएन । विश्व कीर्तिमान र सम्मान अद्भुत स्मरणशक्ति भएका शर्माले गिनिजबुक अफ वल्र्ड रेकर्डमा कीर्तिमान कायम गरेपछि नेपाली छोरो विश्व चर्चित भए । नेपालीले दिमागले यस्तो कीर्तिमान कायम गर्नु वास्तवमा नेपाल र नेपालीका लागि खुसीको विषय हो । यो समाचारपछि राष्ट्रिय–अन्तराष्ट्रियरूपमा शर्मा सम्मानित भए । आफ्नो अद्भुत स्मरणशक्तिको प्रयोगकै कारण उनले धेरै पुरस्कार प्राप्त गरेका छन् । नेपाल सरकारको युवा तथा खेलकुद मन्त्रालयबाट राष्ट्रिय युवा पुरस्कार–२०७२, नेपाल जेसिस वर्ष, २०७६ को उत्कृष्ट युवा पुरस्कार, स्वर्ण पदकद्वारा पुरस्कृत भएका थिए । त्यस्तै युवा प्रतिभा सम्मान, २०७८ प्राप्त गरेका थिए । हिमालय इन्टरनेशनल अवार्ड, २०७८, विश्व कीर्तिमानी युवा प्रतिभा तथा समाजसेवी सम्मान–२०७८, युवा प्रतिभा सम्मान–२०७८, नेपाल बहुउद्देश्यीय सहकारी संस्था लिमिटेड झापाद्वारा वर्ष उत्कृष्ट प्रतिभा–२०७४ प्राप्त गरेका छन् । उनको जीवनी र सफलताको कथालाई अष्ट्रेलियाको एक प्रतिष्ठित विश्वविद्यालयले साउथेन क्रस युनिभर्सिटीले सन् २०२० जुनमा आफ्नो ब्लगमा पनि सम्मानजनक स्थान दिएर लेखेको थियो ।

मोटरसाइकल दुर्घटना हुँदा एकको मृत्यु, एक घाइते

भक्तपुर । भक्तपुर सल्लाघारीमा पानी ट्याङ्करमा मोटसाइकल ठोक्किँदा मोटरसाइकल चालकको मृत्यु भएको छ भने एक गम्भीर घाइते भएका छन् । बागमती प्रदेश०२–०३१प ७८६२ नंको मोटरसाइकल बा४ख ४२६८ नंको पानीट्याङ्करमा ठोक्किँदा मोटरसाइकल चालक मध्यपुरथिमि नगरपालिका–१ लोकन्थली बस्ने २६ वर्षीय साजन दुवारीको मृत्यु भएको महानगरीय प्रहरी परिसर भक्तपुरका प्रहरी नायब उपरीक्षक राजु पाण्डेले जानकारी दिए । मोटरसाइकलमा सवार झापा घर भई हाल मध्यपुरथिमि –३ बस्ने २३ वर्षीय अनिल साहको इवामुरा मेमोरियल अस्पतालमा उपचार भइरहेको उनले जानकारी दिए । प्रहरीले दुर्घटना भएका दुवै सवारीसाधन र ट्याङ्कर चालक भक्तपुर नगरपालिका–२ ब्यासी बस्ने २८ वर्षीय प्रवीण सुवाललाई पक्राउ गरी अनुसन्धान गरिरहेको जानकारी दिएको छ ।

सोल्टी होटलको तीन महिनाको नाफा ११.२० करोड, कुल आम्दानी २३४.१५ प्रतिशत बढ्यो

काठमाडौं । सोल्टी होटलले चालु आर्थिक वर्षको पहिलो त्रैमासमा ११ करोड २० लाख रुपैयाँ खुद नाफा आर्जन गरेको छ । गत आर्थिक वर्षको सोही अवधिमा कम्पनीले २ करोड ११ लाख रुपैयाँ नोक्सानमा थियो । असोज मसान्तसम्म सोल्टीको व्यवसायबाट कुल आम्दानी २३४.१५ प्रतिशत बढेर ४१ करोड ३२ लाख रुपैयाँ गरेको छ । गत वर्षको सोही अवधिमा २ करोड ३६ लाख रुपैयाँ कुल आम्दानी भन्दा धेरै हो । कम्पनीको आम्दानीमा वृद्धि भएपछि खुद नाफा बढेको हो । कम्पनीको सञ्चालन नाफा १२ करोड ६६ लाख रुपैयाँ गरेको छ । गत वर्ष २ करोड १ लाख रुपैयाँ सञ्चालन नोक्सानमा रहेको थियो । कम्पनीको चुक्ता पूँजी ८४ करोड २५ लाख ७९ हजार रुपैयाँ र जगेडा कोष ९९ करोड ८७ लाख रुपैयाँ छ । कम्पनीको प्रतिसेयर आम्दानी १ रुपैयाँ ३३ पैसा र प्रतिसेयर नेटवर्थ २१ रुपैयाँ ८५ पैसा छ ।

मर्जर र लाभांश प्रस्ताव पारित गर्न ग्लोबल आइएमई र बैंक अफ काठमाण्डूको साधारण सभा आह्वान

काठमाडौं । ग्लोबल आइएमई बैंक र बैंक अफ काठमाण्डूले आफ्नो वार्षिक साधारण सभा बोलाएका छन् । दुवै बैंकले मर्जर प्रस्ताव र लाभांश वितरण गर्ने प्रस्ताव पारित गर्न साधारण सभा बोलाएका हुन् । दुबै बैंकको साधारण सभा मंसिर २३ गते शुक्रबार हुने भएको छ । ग्लोबल आइएमई बैंकको १६ औँ वार्षिक साधारण सभा सिल्भर ओक बैंकेट एण्ड इभेन्ट्स सेन्टर, गैह्रीधारा, काठमाडौँमा बिहान १० बजे बोलाएको छ । बैंकको सभाले हाल कायम चुक्ता पूँजीको ३ प्रतिशत बोनस सेयर र १०.६ प्रतिशत नगद गरी कूल १३.६ प्रतिशत लाभांश वितरण गर्ने प्रस्ताव पारित गर्नेछ । यस्तै, बैंक अफ काठमाण्डूको २८ औँ वार्षिक साधारण सभा त्रिभुवन आर्मी अफिसर्स क्लब, टुडिखेल, काठमाडौँमा बिहान १० बजे बोलाएको छ । बैंकको सभाले हाल कायम चुक्ता पूँजीको ६ प्रतिशत बोनस सेयर र १४.९५ प्रतिशत नगद गरी कूल २०.९५ प्रतिशत लाभांश वितरण गर्ने प्रस्ताव पारित गर्नेछ । दुबैं बैंकको सभाले ग्लोबल आइएमई बैंक र बैंक अफ काठमाण्डू एक आपसमा गाभिने सम्बन्धी अन्तिम सम्झौता पत्र स्वीकृत गर्ने, मर्जर सम्बन्धी अन्य आवश्यक कार्य पुरा गरी अन्तिम स्वीकृती प्रदान गर्ने, १ बराबर १ को सेयर स्वाप रेसियो स्वीकृत गर्ने प्रस्ताव पारित गर्नेछ । दुबै बैंकहरुको सेयर कारोबार गत असार २ गतेदेखि बन्द रहेको छ ।

रिलायबल लाइफको नाफा ३४.७० प्रतिशत बढ्यो, जीवन बीमा कोष ५.१५ अर्ब माथि

काठमाडौं । रिलायबल लाइफ इन्स्योरेन्सको चालु आर्थिक वर्षको पहिलो त्रैमासमा खुद नाफा ३४.७० प्रतिशत बढेर १० करोड ३ लाख रुपैयाँ आर्जन गरेको छ । गत आर्थिक वर्षको सोही अवधिमा कम्पनीले ७ करोड ४५ लाख रुपैयाँ खुद नाफा आर्जन गरेको थियो । असोज मसान्तसम्ममा कम्पनीको खुद बीमा शुल्क ८.१७ प्रतिशत घटेर ८५ करोड २९ लाख रुपैयाँ आर्जन गरेको छ । गत आर्थिक वर्षको सोही अवधिमा कम्पनीले ९२ करोड ८९ लाख रुपैयाँ खुद बीमा शुल्क आर्जन गरेको थियो । तीन महिनाको अवधिमा कम्पनीको कुल बीमा शुल्क ८ प्रतिशत घटेर ८९ करोड ३१ लाख रुपैयाँ मात्रै आर्जन गरेको छ । गत आर्थिक वर्षको सोही अवधिमा कम्पनीले ९७ करोड १० लाख कुल बीमा शुल्क आर्जन गरेको थियो । गत आर्थिक वर्षको तीन महिनामा २३ करोड ४१ लाख रुपैयाँ खुद दावी भुक्तानी गरेको कम्पनीले चालु आवको तीन महिनामा १५ करोड २ लाख ६४ हजार रुपैयाँ मात्रै दावी भुक्तानी गरेको छ । समिक्षा अवधिमा कम्पनीको चुक्ता पूँजी १ सय प्रतिशत बढेर २ अर्ब ८० करोड रुपैयाँ, जगेडा कोष २९.७२ प्रतिशत बढेर १ अर्ब १८ करोड रुपैयाँ, जीवन बीमा कोष ७० प्रतिशत बढेर ५ अर्ब १५ करोड रुपैयाँ पुगेको छ । कम्पनीको वार्षिक प्रति सेयर आम्दानी १४ रुपैयाँ ३४ पैसा रहेको छ भने प्रति सेयर नेटवर्थ १४६ रुपैयाँ ३८ पैसा रहेको छ ।

राष्ट्रिय बीमा कम्पनीको नाफा ५.३८ करोड, खुद बीमा शुल्क ११५ प्रतिशत बढ्यो

काठमाडौं । राष्ट्रिय बीमा कम्पनीको चालु आवको पहिलो त्रैमासमा खुद नाफा १३ प्रतिशत घटेर ५ करोड ३८ लाख ६० हजार रुपैयाँ आर्जन गरेको छ । गत आर्थिक वर्षको सोही अवधिमा कम्पनीले ६ करोड २० लाख ८७ हजार रुपैयाँ खुद नाफा आर्जन गरेको थियो । असोज मसान्तसम्ममा कम्पनीको खुद बीमा शुल्क ११५ प्रतिशत बढेर १५ करोड ८२ लाख ५२ हजार रुपैयाँ आर्जन गरेको छ । गत आर्थिक वर्षको साही अवधिमा कम्पनीले ७ करोड ३६ लाख ४२ हजार रुपैयाँ खुद बीमा शुल्क आर्जन गरेको थियो । कम्पनीले चालु आर्थिक वर्षको ३ महिनामा १ अर्ब १३ करोड रुपैयाँ कूल बीमा शुल्क आम्दानी गर्न सफल भएको छ । गत आर्थिक वर्षको सोही अवधिमा ४४ करोड ६७ लाख रुपैयाँ कूल बीमा शुल्क आम्दानी गरेको थियो । कम्पनीको चुक्ता पूँजी २६ करोड ६६ लाख रुपैयाँ, जगेडा कोषमा ३ अर्ब ४१ करोड २१ लाख रुपैयाँ र बीमा कोषमा २ अर्ब ६९ करोड ३८ लाख रुपैयाँ रहेको छ । कम्पनीको प्रतिसेयर आम्दानी २०.२० रुपैयाँ रहेको छ ।

एलआइसी नेपालको नाफासँगै ईपीएस पनि ऋणात्मक, जीवन बीमा कोष साढे ९७ अर्ब

काठमाडौं । लाइफ इन्स्योरेन्स कर्पारेशन (एलआइसी) नेपालको चालु आर्थिक वर्षको पहिलो त्रैमासमा ५९ लाख २९ हजार रुपैयाँ नोक्सानीमा छ । गत आर्थिक वर्षको सोही अवधिमा कम्पनीले ३ करोड १९ लाख रुपैयाँ खुद नाफा आर्जन गरेको थियो । यस अवधिमा ५ करोड ५७ लाख रुपैयाँ प्रोभिजन गरेका कारण कम्पनीको नोक्सानीमा गएको हो । चालु आर्थिक वर्षको असोज मसान्तसम्ममा कम्पनीको खुद बीमा शुल्क १४.०३ प्रतिशत घटेर ४ अर्ब ४९ करोड ४९ लाख रुपैयाँ आर्जन गरेको छ । गत आर्थिक वर्षको सोही अवधिमा कम्पनीले ५ अर्ब २२ करोड ८९ लाख रुपैयाँ बीमा शुल्क आर्जन गरेको थियो । समिक्षा अवधिमा कम्पनीको कुल बीमा शुल्क १३.९८ प्रतिशत घटेर ४ अर्ब ५१ करोड ७७ लाख रुपैयाँ आर्जन गरेको छ । गत आर्थिक वर्षको सोही अवधिमा कम्पनीले ५ अर्ब २५ करोड १७ लाख रुपैयाँ कुल बीमा शुल्क आर्जन गरेको थियो । कम्पनीको समिक्षा अवधिमा खुद दाबी भुक्तानी ४७.४३ प्रतिशत घटेर १ अर्ब ९५ करोड ८२ लाख रुपैयाँ मात्रै गरेको छ । गत आर्थिक वर्षको सोही अवधिमा कम्पनीले ३ अर्ब ७२ करोड ४७ लाख रुपैयाँ खुद दाबी भुक्तानी गरेको थियो । गत वर्ष अभिकर्ताले ५० करोड १४ लाख रुपैयाँ कमिसन पाएका थिए भने यस वर्ष भने ३५ करोड रुपैयाँ मात्रै कमिसन पाएका छन् । समिक्षा अवधिमा कम्पनीको चुक्ता पूँजी २० प्रतिशत बढेर २ अर्ब ६५ करोड ३२ लाख रुपैयाँ, जगेडा कोष ८.८५ प्रतिशत घटेर ६० करोड ९७ लाख रुपैयाँ, जीवन बीमा कोष १६.९० प्रतिशत बढेर ९७ अर्ब ५० करोड रुपैयाँ र महाविपत्ति कोष ३५ प्रतिशत बढेर ३६ करोड रुपैयाँ पुगेको छ । कम्पनीको नाफा घटेसँगै प्रतिसेयर आम्दानी पनि ऋणात्मक छ । कम्पनीको प्रतिसेयर आम्दानी ०.९८ प्रतिशत ऋणात्मक रहेको छ । कम्पनीको प्रतिसेयर नेटवर्थ १३६ रुपैयाँ छ ।

साना किसान लघुवित्तको नाफा ४१.८३ प्रतिशत बढ्यो, ईपीएस ५९.५२ रुपैयाँ

काठमाडौं । साना किसान लघुवित्त वित्तीय संस्थाको चालु आर्थिक वर्षको पहिलो त्रैमासमा खुद नाफा ४१.८३ प्रतिशत बढेर २३ करोड २७ लाख ७९ हजार रुपैयाँ आर्जन गरेको छ । गत आर्थिक वर्षको सोही अवधिमा लघुवित्तले १६ करोड ४१ लाख ३० हजार रुपैयाँ खुद नाफा आर्जन गरेको थियो । असोज मसान्तसम्ममा लघुवित्रको खुद ब्याज आम्दानी ४३.८६ प्रतिशत बढेर ४३ करोड ९ लाख ३३ हजार रुपैयाँ आर्जन गरेको छ । यस्तै, लघुवित्तको सञ्चालन नाफा ४१.६० प्रतिशत बढेर ३३ करोड १९ लाख ९४ हजार रुपैयाँ पुगेको छ । समिक्षा अवधिमा लघुवित्तको चुक्ता पूँजी २५ प्रतिशत बढेर १ अर्ब ५६ करोड ४४ लाख रुपैयाँ, जगेडा कोष १७.६८ प्रतिशत बढेर १ अर्ब ४३ करोड ८७ लाख रुपैयाँ, सापटि २७ प्रतिशत बढेर १७ अर्ब ७७ करोड ८ लाख रुपैयाँ, निक्षेप १ अर्ब ३२ करोड ९४ लाख रुपैयाँ र कर्जा २८.४८ प्रतिशत बढेर ४ करोड ८ लाख रुपैयाँ पुगेको छ । यस अवधिमा लघुवित्तको नाफा बढेसँगै प्रतिसेयर आम्दानी ६ रुपैयाँ ८८ पैसा बढेर ५९ रुपैयाँ ५२ पैसा पुगेको छ । लघुवित्तको प्रतिसेयर नेटवर्थ भने २८२ रुपैयाँ २० पैसा छ भने मूल्य आम्दानी अनुपात १७.१० गुणा रहेको छ । लघुवित्तको खराब कर्जा ०.७५ प्रतिशत छ ।