भेस्पा र एप्रिलियाको नाडा अफर, स्कुटर खरिदमा २८ हजार ५ सयसम्म लाभ
काठमाडौं । भेस्पा र एप्रिलियाको नेपालका लागि आधिकारिक वितरक डेल्टा अटोकर्प प्रालिले नाडा अटो शो २०२६ लाई लक्षित गर्दै ‘द सेभिङ एक्स्ट्राभागान्जा’ योजना सार्वजनिक गरेको छ । योजना अन्तर्गत अटो शो अवधिभर स्कुटर खरिद वा बुकिङ गर्ने ग्राहकले २८ हजार ५ सय रुपैयाँसम्मको विशेष लाभ पाउने भएका छन् । भृकुटीमण्डपस्थित टिडब्लुई–११ नम्बर स्टलमा सञ्चालन भइरहेको यो अफर नगद, फाइनान्स र एक्सचेन्ज तीनै माध्यमबाट स्कुटर खरिद गर्ने ग्राहकका लागि लागू हुने कम्पनीले जनाएको छ । साथै स्कुटर खरिदकर्तालाई भेस्पा र एप्रिलियाको आकर्षक ल्यापटप ब्याग पनि उपहारस्वरूप प्रदान गरिनेछ । यस वर्ष डेल्टा अटोकर्पले आफ्नो स्टललाई इटालियन कफे थिममा सजाएको छ । कम्पनीका अनुसार स्टलमार्फत आगन्तुकलाई प्रिमियम इटालियन जीवनशैली र ब्रान्डको फरक अनुभव दिने प्रयास गरिएको छ । नाडा अटो शोमा कम्पनीले एप्रिलिया एसआर १७५ एचपीई पहिलोपटक नेपाली बजारमा सार्वजनिक गरेको छ । कम्पनीका अनुसार नयाँ स्कुटरमा आधुनिक प्रविधि र उच्च कार्यसम्पादनको संयोजन गरिएको छ । यससँगै भेस्पा १२५ लाई नयाँ लाइल्याक रङमा र भेस्पा एस १२५ लाई ओरो रङमा सार्वजनिक गरिएको छ । प्रदर्शनीमा एप्रिलियाको स्टर्म १२५, एसआर १६० तथा भेस्पाको जेडएक्स १२५, भेस्पा १२५ र भेस्पा एस १२५ का विभिन्न भेरियन्ट पनि प्रदर्शनमा राखिएका छन् । डेल्टा अटोकर्पका निर्देशक तथा प्रमुख कार्यकारी अधिकृत विजयकुमार महतोले नाडा अटो शोमार्फत नयाँ मोडल र विशेष अफर नेपाली ग्राहकसामु ल्याउन पाउँदा उत्साहित रहेको बताए । उनले कफे थिमको स्टल र आकर्षक अफरले आगन्तुकको अटो शो अनुभवलाई थप स्मरणीय बनाउने विश्वास व्यक्त गरे ।
नयाँ ब्रेजासँगै सुजुकीको योजना, स्क्र्याच गर्दा २ लाखसम्म नगद छुट
काठमाडौं । नेपालमा सुजुकी गाडीको आधिकारिक वितरक सीजी मोटोकर्प ले चाडपर्वलाई लक्षित गर्दै ‘सुजुकी पर्वोत्सव’ योजना सार्वजनिक गरेको छ । नाडा अटो शो २०२६ को अवसरमा ल्याइएको यस योजनाअन्तर्गत ग्राहकले स्क्र्याच एन्ड विन अफरमार्फत २ लाख रुपैयाँसम्म नगद छुट जित्ने अवसर पाउनेछन् । कम्पनीका अनुसार योजना केही दिनअघि नै सुरु भइसकेको छ । चाडपर्वको समयमा सुजुकी गाडी खरिदलाई थप सहज र लाभदायी बनाउने उद्देश्यले नगद छुट, एक्सचेन्ज बोनस, निःशुल्क एक्सेसरिज, निःशुल्क आवधिक मर्मतसम्भार (पीएमएस) पार्ट्स तथा एक वर्षको निःशुल्क अटो प्लस बीमालगायत सुविधा उपलब्ध गराइएको छ । सुजुकी पर्वोत्सवअन्तर्गत ग्राहकले १ लाख रुपैयाँसम्म नगद छुट र १ लाख रुपैयाँसम्म एक्सचेन्ज बोनस प्राप्त गर्न सक्नेछन् । साथै मोडेलअनुसार निःशुल्क एक्सेसरिज, पीएमएस पार्ट्स र एक वर्षको निःशुल्क अटो प्लस बीमा पनि उपलब्ध हुनेछ । यो योजना साउन २७ गतेदेखि मंसिर १५ गतेसम्म देशभरका सबै आधिकारिक सुजुकी शोरुममा लागू हुने कम्पनीले जनाएको छ । कम्पनीका अनुसार अल्टो के१०, वागनआर, सेलेरियो, इको कार्गो, इको भ्यान, ब्रेजा, जिम्नी, फ्रोन्क्स, ग्रान्ड भिटारा र ईभिटारासहित सुजुकीका अधिकांश मोडेल यो योजनामा समेटिएका छन् । विद्युतीय एसयूभी ईभिटारा का ग्राहकका लागि ‘फर्स्ट १०० युनिट प्रमोशनल स्किम’ छुट्टै सञ्चालनमा रहनेछ । कम्पनीले पहिलो १०० युनिटका ग्राहकलाई सवारीसँगै उपलब्ध हुने ३ किलोवाट स्ट्यान्डर्ड चार्जरका अतिरिक्त ७ किलोवाट होम चार्जर निःशुल्क उपलब्ध गराउने जनाएको छ । होम चार्जर जडान भने ग्राहकको घरमा प्राविधिक सम्भाव्यता अनुसार गरिनेछ । सुजुकीले नाडा अटो शो २०२६ मार्फत नयाँ ब्रेजा नेपाली बजारमा पहिलोपटक सार्वजनिक प्रदर्शनमा राखेको छ । कम्पनीका अनुसार अद्यावधिक फिचर, नयाँ पावरट्रेन र सुरक्षा प्रणालीसहित आएको ब्रेजाले भारत एनक्यापको पाँच-तारे सुरक्षा रेटिङ प्राप्त गरेको मोडेल हो । नाडा अटो शो अवधिभर आगन्तुकले नयाँ ब्रेजासहित सुजुकीका सम्पूर्ण मोडेल अवलोकन, अनुभव तथा बुकिङ गर्न सक्नेछन् । प्रदर्शनीका क्रममा सुजुकी प्याभिलियनमा छनोट गरिएका मोडेल बुकिङ गर्ने ग्राहकका लागि २ लाख रुपैयाँसम्मको पुरस्कार रहेको स्क्र्याच एन्ड विन अफर पनि उपलब्ध हुनेछ । सीजी मोटोकर्पका महाप्रबन्धक सिरज पन्तले नाडा अटो शोमा आएर मोडेलअनुसार उपलब्ध सुविधा र सीमित अवधिको अफरको लाभ लिन ग्राहकलाई आग्रह गरेका छन् ।
शशिधर शर्मा २ करोड धरौटीमा रिहा
काठमाडौं । कर्जा दुरुपयोग आरोपमा एसियन भिलेज रिसोर्टका अध्यक्ष शशीधर शर्मा धरौटीमा रिहा भएका छन् । मंगलबार उच्च अदालत पाटनले संयुक्त वाणिज्य इजलासका न्यायाधीश अर्जुन कोइराला र न्यायाधीश स्वीकृति पराजुलीको इजलासले २ करोड धरौटीमा रिहा गर्न आदेश दिएको हो । गत असार ३० गते नेपाल प्रहरीको केन्द्रीय अनुसन्धान ब्यूरो (सीआईबी)ले बैंकिङ कसुर तथा सजाय ऐन, २०६४ अन्तर्गत कर्जा दुरुपयोग गरेको आरोपमा एसियन भिलेज रिसोर्ट प्रालिका अध्यक्ष शर्मालाई पक्राउ गरेको थियो । नेपाल राष्ट्र बैंक, बैंक सुपरिवेक्षण विभागले २०८३ असारमा तयार गरेको विशेष स्थलगत निरीक्षण प्रतिवेदनका आधारमा अनुसन्धान अघि बढाइएको हो। प्रतिवेदनअनुसार एसियन भिलेज रिसोर्ट प्रालिले रिसोर्ट निर्माण तथा जग्गा खरिदका लागि प्रभु बैंक लिमिटेडबाट ४८ करोड रुपैयाँ कर्जा लिएको थियो। रुपन्देहीको तिलोत्तमा नगरपालिका–४ निवासी हुन्। उनी एसियन भिलेज रिसोर्ट प्रालिका अध्यक्षसमेत हुन्।
नेपाल टेलिकमको नयाँ सुविधा : हजारौँ नम्बरमा एकैपटक भ्वाइस म्यासेज पठाउन मिल्ने
काठमाडौं । नेपाल टेलिकमले एकैपटक हजारौँ टेलिफोन तथा मोबाइल प्रयोगकर्तालाई रेकर्ड गरिएको भ्वाइस म्यासेज पठाउन सकिने ‘आउटबाउन्ड आईभिएर’ सेवा व्यावसायिक रूपमा सञ्चालनमा ल्याएको छ । कम्पनीले केही समयदेखि आन्तरिक परीक्षणका रूपमा सञ्चालन गर्दै आएको यो सेवालाई अब व्यावसायिक रूपमा ग्राहकका लागि उपलब्ध गराएको जनाएको छ । नेपाल टेलिकमका अनुसार यस सेवामार्फत अधिकतम एक मिनेटसम्मको रेकर्ड गरिएको सूचनामूलक वा प्रवर्द्धनात्मक भ्वाइस सन्देश एकैपटक ठूलो संख्यामा पठाउन सकिनेछ । टेलिकमका अनुसार आउटबाउन्ड आईभिएर सामूहिक सूचना प्रवाहका लागि उपयोगी सेवा हो । विभिन्न संघ–संस्था, व्यवसाय, शैक्षिक संस्था वा सेवा प्रदायकले सूचना, परीक्षाको नतिजा, कार्यक्रमको जानकारी वा प्रचार–प्रसारसम्बन्धी सन्देश हजारौँ व्यक्तिसम्म एकैपटक पुर्याउन सक्नेछन् । यो सेवा लिन इच्छुक कार्यालय, संस्था वा व्यवसायीले फोन गर्नुपर्ने नम्बरहरूको सूची र पठाउनुपर्ने भ्वाइस फाइल नेपाल टेलिकममा उपलब्ध गराई तोकिएको प्रक्रिया पूरा गर्नुपर्नेछ । यस सेवामार्फत कल जाँदा प्राप्तकर्ताको मोबाइल वा टेलिफोनमा सन्देश पठाउने संस्था वा सेवा प्रदायकको नाममा दर्ता भएको नम्बर नै कलर आईडी का रूपमा देखिने नेपाल टेलिकमले जनाएको छ । हालका लागि सेवा लिन इच्छुक ग्राहकले दूरसञ्चार कार्यालय, सुन्धारा पुगेर तोकिएको फाराम भरी सेवा लिन सक्नेछन् । नेपाल टेलिकमले स्वचालित रूपमा ठूलो संख्यामा कलमार्फत सूचना पठाउने सेवाको माग आगामी दिनमा बढ्दै जाने अपेक्षा गरेको छ ।
स्रोत नखुलेको रकमसहित चिनियाँ नागरिक पक्राउ
काठमाडौं । प्रहरीले लागुऔषधको कारोबारी खोज्न जाँदा स्रोत नखुलेको रकमसहित चिनियाँ नागरिकलाई पक्राउ गरेको छ । सोमबार काठमाडौं महानगरपालिका १५ स्थित चमतीबाट ५२ वर्षीय मा यागुबीलाई ३१ लाख नगदसहित पक्राउ गरेको हो । यागुबी चौमतीमा घर भाडामा लिएर बस्दै आएका थिए । घर खानतलासी गर्दा कोठा भित्रबाट लागु औषध नभेटिएको तर स्रोत नखुलेको रकम भेटिएको प्रहरीले जनाएको छ । लागुऔषध ब्यूरोका प्रवक्ता दुर्गाराज रेग्मीका अनुसार उनी हालसम्म ६ पटक नेपाल आएर फर्केको देखिन्छ । पछिल्लो पटक जुलाई २३, २०२६ मा आएको अध्यागमनको रेकर्डबाट देखिन्छ । उनलाई थप अनुसन्धान गर्न जिल्ला प्रहरी परिसर काठमाडौंमा पठाइएको छ। यागुबीकाे साथबाट प्रहरीले नेपाली नगद ३१ लाख, पासपोर्ट थान १, सुन काट्न प्रयोग गरिने कैची थान १, ह्याम्मर थान १, डिजिटल तराजु थान १, क्यालकुलेटर थान १, विभिन्न कम्पनीका मोबाइल थान ४, एनआइएमबी बैँकको चेकबुक थान २ र एनआइसी बैंकको चेकबुक थान १ बरामद गरेकाे छ ।
गाडी किन्नेलाई एनआईएमबीको अफर, ५.१३ प्रतिशत ब्याजदरमै अटो लोन
काठमाडौं । नेपाल इन्भेष्टमेण्ट मेगा बैंक (एनआईएमबी) ले नयाँ सवारीसाधन खरिद गर्न चाहने ग्राहकलाई लक्षित गर्दै आकर्षक अटो लोन योजना सार्वजनिक गरेको छ । बैंकले सीमित अवधिका लागि वार्षिक ५.१३ प्रतिशत ब्याजदरमै सवारी कर्जा उपलब्ध गराउने जनाएको हो । मंगलबार जारी प्रेस विज्ञप्तिअनुसार सवारी कर्जा प्रक्रियालाई सहज, छिटो र सर्वसुलभ बनाउने उद्देश्यले यो योजना ल्याइएको हो। बैंकले यस योजनाअन्तर्गत प्रोसेसिङ शुल्क ०.५ प्रतिशत मात्रै कायम गरेको जनाएको छ । बैंकका अनुसार आवश्यक सम्पूर्ण कागजात बुझाएपछि तीन कार्यदिनभित्रै कर्जा स्वीकृत र प्रवाह गरिनेछ। यो सुविधा बैंकका देशभर रहेका सबै शाखामार्फत उपलब्ध हुनेछ । प्रतिस्पर्धी ब्याजदर, न्यून सेवा शुल्क र द्रुत कर्जा स्वीकृतिका कारण नयाँ गाडी खरिद गर्ने योजनामा रहेका ग्राहकलाई यो योजना लाभदायी हुने बैंकको विश्वास छ । बैंकले यो विशेष अटो लोन योजना सीमित अवधिका लागि मात्रै लागू हुने जनाएको छ ।
नाडा अटो शोको पहिलो दिनमै ईभीमा झुम्मिए अवलोकनकर्ता
काठमाडौं । भृकुटीमण्डप यतिबेला सवारीसाधनका पारखीहरूको महाकुम्भ बनेको छ । नेपाल अटोमोबाइल डिलर्स एसोसिएसन (नाडा) को ५० वर्षे लिगेसी र १८ औं संस्करणको यो उत्सवले काठमाडौंको माहोललाई थप चलायमान बनाएको छ । उपराष्ट्रपति रामसहाय प्रसाद यादव र नाडाका अध्यक्ष सुरेन्द्र कुमार उप्रेतीले संयुक्त रूपमा उद्घाटन गरेसँगै सुरु भएको यो मेलामा नयाँ प्रविधि, ईभी गाडीप्रतिको मोह र सुरक्षा सचेतनाको एउटै थलो बन्न पुगेको छ । यसपटकको अटो शोमा पनि सबैकाे राेजाइ विद्युतीय सवारीसाधन (ईभी) तर्फ नै मोडिएको छ । मेला अवलोकन गर्न उदयपुरबाट आएका व्यवसायी प्रदीप थापा भन्छन्, ‘जता हेर्यो त्यतै ईभीको चहलपहल छ । अबको १०/१५ वर्षमा सडकमा पर्यावरणमैत्री गाडी छाउने निश्चित देखिन्छ ।’ उनी जस्तै धेरै अवलोकनकर्ताहरू गाडीको लुक र ईभीले दिने सुविधा बुझ्न व्यस्त देखिन्छन् । कतिपय भने मेलाको पहिलो दिनमै गाडी बुक गर्ने मनसायका साथ आइपुगेका छन् । त्रिपुरेश्वरका विक्रम अछामी टाटाको पन्च ईभी बुक गर्ने योजनाका साथ मेलामा भौंतारिइरहेका भेटिए । ‘एकै ठाउँमा धेरै ब्रान्डका गाडी र तिनको स्पेसिफिकेसन तुलना गर्न पाइने हुनाले अटो शो निकै सजिलो माध्यम हो,’ उनले भने । यद्यपि, उनले अघिल्ला वर्षहरूका मेलाको तुलनामा यसपालि रोबोटिक्स र नयाँ प्रविधिको प्रदर्शनी केही कम भएको महसुस पनि सुनाए । सवारी मात्र होइन, सुरक्षा पनि मेलाको अर्को आकर्षण हो, ट्राफिक प्रहरीको स्टल । गाडी किन्ने मात्र होइन, गाडी चलाउँदा अपनाउनुपर्ने सुरक्षाबारे पनि सचेतना फैलाउन ट्राफिक प्रहरी सक्रिय देखिएको छ । काठमाडौं उपत्यका ट्राफिक प्रहरी कार्यालयका प्रहरी निरीक्षक लोकेन्द्रबहादुर मल्लका अनुसार नेपालमा हुने ७० देखि ८० प्रतिशत दुर्घटना दुई पाङ्ग्रे सवारी साधनका कारण हुने गरेका छन् । ‘हामी यहाँ सवारीका पारखीहरूलाई ट्राफिक नियम पालना गर्न सिकाउँदैछौं । करोडौंका गाडी किने पनि एक सेकेन्डको लापरवाहीले अमूल्य जीवन र सम्पत्ति दुवै नष्ट हुन्छ,’ मल्लले भने । विशेषगरी युवाहरूले गर्ने तीव्र गति र लेन अनुशासनको कमी नै दुर्घटनाको मुख्य कारण रहेको उनको अनुभव छ । मेलामा दुर्घटनाका भिडियो दृश्य र ट्राफिक प्रहरीले प्रयोग गर्ने उपकरणहरूको प्रदर्शनीले अवलोकनकर्तालाई सडक सुरक्षाप्रति जिम्मेवार बन्न प्रेरित गरिरहेको छ । भृकुटीमण्डप छिर्नका लागि टिकट काउन्टरमा लामो लाइन बस्नुपर्ने झन्झटलाई डिजिटल प्रविधिले कम गरिदिएको छ । खल्ती एपमार्फत सहजै टिकट काट्न सकिने व्यवस्था गरिएको छ । सर्वसाधारणका लागि २०० रुपैयाँ र विद्यार्थीका लागि ५० प्रतिशत छुटको व्यवस्था गरिएको यो मेलामा ७० वर्ष नाघेका ज्येष्ठ नागरिकलाई भने निःशुल्क प्रवेशको व्यवस्था छ । नाडाका अध्यक्ष सुरेन्द्र कुमार उप्रेतीका अनुसार यसपटक २०० भन्दा बढी स्टलहरू रहेका छन् । भृकुटीमण्डप आसपासको पार्किङ समस्यालाई मध्यनजर गर्दै नाडाले सटल बसको निःशुल्क व्यवस्था समेत गरेको छ । नाडाका अध्यक्ष सुरेन्द्र कुमार उप्रेती । ‘हामीले सुन्धारा, आरएनसी र पुरानो बसपार्कमा पार्किङ गरेर अवलोकनकर्तालाई मेला स्थलसम्म ल्याउन सटल बस चलाएका छौं, जसले ट्राफिक व्यवस्थापनमा ठुलो सहयोग पुगेको छ,’ उप्रेतीले भने । प्रदर्शनीको पहिलो दिनमै अवलोकनकर्ता र ग्राहकहरूको उल्लेख्य उपस्थिति देखिएको नाडा अटो शोका सभापति अनुप बरालले जानकारी दिए । मानिसहरूको भीडले आयोजक टोलीलाई निकै उत्साहित बनाएको उनको भनाइ छ । उनले भने, ‘सुरुवात एकदमै राम्रो भएको छ । मर्निङ शोज द डे भने झैं उद्घाटन सत्रसँगै बढेको यो उत्साहले आगामी दिनहरू अझै सफल हुने संकेत गरेको छ ।’ अनुप बराल । उनका अनुसार प्रदर्शनीमा दुई पाङ्ग्रे, चार पाङ्ग्रे, छ पाङ्ग्रे र आठ पाङ्ग्रे सवारी साधनहरूका साथै पछिल्लो समय लोकप्रियता कमाइरहेका ईभी र परम्परागत आईसीई इन्जिन भएका सवारीहरू समेत राखिएका छन् । सवारी साधनका अतिरिक्त अटोमोबाइल कम्पोनेन्ट र सफ्टवेयरहरूको समेत प्रदर्शनी भइरहेको छ । छोटो समयको तयारीका बावजुद व्यवस्थापन पक्षलाई चुस्त बनाउन टोली अहोरात्र खटिएको र अवलोकनकर्ताहरूले फरक तथा स्तरीय अनुभव पाउने सभापति बरालले दाबी गरे । आयोजक टोली आगामी दिनमा अझ बढी अवलोकनकर्ता आउनेमा विश्वस्त रहेको उनले बताए । सभापति बरालले सम्पूर्ण अटो प्रेमी तथा सर्वसाधारणलाई भृकुटीमण्डप पुगेर अटो शोको अवलोकन गरिदिन समेत आग्रह गरे । अटो शोमा ५ दर्जनभन्दा बढी विश्वस्तरीय अटोमोबाइल ब्रान्डका प्यासेन्जर सवारीसाधनका साथै कमर्सियल सेग्मेन्टअन्तर्गतका ईभी माइक्रो, भ्यानदेखि ठूला कमर्सियल सवारीसाधनसम्म दर्शनीमा राखिएका छन् । हुन्डाई, टाटा, बीवाईडी, दिपल, लिपमोटर, बीएआईसी, होङ्छी, अवतार, एवान, चांगन, चेरी, जिली र स्काइवेललगायत विश्वस्तरीय ब्रान्डका साथै रोयल इन्फिल्ड, यामाहा र होन्डालगायत दर्जनौँ ब्रान्डका विभिन्न उत्पादन प्रदर्शनीमा छन् । त्यस्तै, नेपालको उत्पादन ‘यात्री पी-२’ समेत प्रदर्शनमा राखिएको छ । अटोकम्पोनेन्ट, टायर, लुब्रिकेन्ट, स्पेयर पार्ट्स तथा एसेसरिजका कम्पनीहरूको समेत सहभागिता छ ।
सम्पत्ति शुद्धीकरण कसुरमा कर्णलाई २५ लाख धरौटीमा रिहा गर्न आदेश
काठमाडौं । विशेष अदालतले सम्पत्ति शुद्धीकरणको कसुरमा मनोज कुमार लाल कर्णलाई धरौटीमा छाड्न आदेश दिएको छ । मंगलबार न्यायाधीश नारायणप्रसाद पौडेल, न्यायाधीश डिल्लीरत्न श्रेष्ठ र न्यायाधीश विदुर कोइरालाको इजालासले २५ लाख रुपैयाँ धरौटीमा रिहा गर्न आदेश दिएको हो । विशेष अदालत नियमावली २०८० को नियम ३० को उपनियम ( २)अदालतको आदेशमा धरौटी नबुझाएम थुनुवा पुर्जी थमाएर कारागारमा पठाउन आदेशमा उल्लेख गरिएको छ । कर्णले हिमालयन लाइफ इन्सुरेन्सका तत्कालीन प्रमुख कार्यकारी अधिकृतको पदमा कार्यरत रहँदा अन्य प्रतिवादीहरुसँगको मिलेमतोमा नेपाल रिइन्सुरेन्सको शेयरसमेत कर्नरिङ्ग गर्ने कार्यमा सहभागी भएको आदेशमा उल्लेख गरिएको छ । मूल्य उतारचढाव समेतको कसुरजन्य कार्यमा सहभागी भई व्यक्तिगत लाभ लिई हिमालयन लाइफ इन्सुरेन्सको विमा कोषको रकम दुरुपयोग गर्ने मनसायले रु। ७ करोड २२ लाख ४६ लाख ८५ हजार ९७४ रुपैयाँ बराबरको कारोबार मार्फत गैरकानुनी सम्पत्ति आर्जन गरेको आदेशमा बताइएको छ ।
