विकासन्युज

गण्डकी सरकारको पहलमा प्रदेशभर १३ अस्पताल स्तरोन्नति, आर्थिक भार नपर्ने

गण्डकी । गण्डकी प्रदेश सरकारले प्रदेशका नौ वटा अस्पताल स्तरोन्नति गर्ने निर्णय गरेको छ । सोमबारको प्रदेश मन्त्रिपरिषद् बैठकले ती अस्पतालको दरबन्दी र शय्या सङ्ख्या निर्धारण गरी स्वीकृत गरको हो । स्वास्थ्यमन्त्री कृष्णप्रसाद पाठकका अनुसार प्रदेश सरकारले यसअघि दुई आयुर्वेद अस्पतालसहित चार अस्पताल स्तरोन्नति गरेको छ । स्तरोन्नति गरिएका १३ वटै अस्पतालको सङ्गठन तथा व्यवस्थापन सर्वेक्षण (ओएनएम) पनि स्वीकृत भइसकेको छ । तेह्रवटै अस्पतालमा करारमा कार्यरत कर्मचारी तथा स्वास्थ्यकर्मीको तलबभत्ता अस्पतालको आन्तरिक स्रोतबाटै भइरहकामा दरबन्दी थप गर्दा मन्त्रालयलाई अतिरिक्त आर्थिक भार पर्ने छैन । बागलुङस्थित धवलागिरि प्रादेशिक अस्पतालमा स्वीकृत शय्याको सङ्ख्या एक सय पुगेको छ । यसअघि उक्त अस्पतालमा स्वीृकत शय्याको सङ्ख्या ५० थियो । कास्कीस्थित मातृशिशु मितेरी र जनरल तथा सरुवा रोग अस्पतालको शय्या सङ्ख्या २५ बाट ५० पुर्याइएको छ । नवलपुरको मध्यविन्दु प्रादेशिक अस्पताललाई १५ बाट एक सय, प्रदेश अस्पताल मुस्ताङ र मनाङलाई १५ बाट २५, पर्वत, स्याङ्जा र तनहुँको दमौली अस्पताललाई १५ बाट ५० शय्यामा स्तरोन्नति गरिएको स्वास्थ्य मन्त्रालयले जनाएको छ । प्रदेश अस्पताल बुर्तिबाङमा ५० र प्रदेश अस्पताल आँपपिल गोरखामा १५ बाट २५ शय्या पुर्याइएको छ । बागलुङस्थित धवलागिरि आयुर्वेद अस्पताल, कास्कीस्थित गण्डकी आयुर्वेद अस्पतालमा २५ शय्याको व्यवस्था हुनेछ । प्रदेश अस्पताल गोरखा, लमजुङ र म्याग्दी यसअघि नै ५० शय्यामा सञ्चालित छन् । प्रदेश सरकारले गोरखाको आँपपिपल र बागलुङको बुर्तिबाङ अस्पताल सञ्चालन गरिरहेको छ । यसै वर्ष कास्कीस्थित गण्डकी आयुर्वेद अस्पताल र बागलुङको धवलागिरि आयुर्वेद अस्पताललाई पनि अन्तरङ्ग सेवासहित २५ शय्याको सुविधायुक्त आयुर्वेद अस्पतालका रुपमा स्तरवृद्धि गरिएको हो । हाल ती अस्पतालको वार्षिक आम्दानी ६६ करोड रहेको मन्त्री पाठकले बताए। नयाँ व्यवस्था अनुसार हरेक अस्पतालले आफ्नो आम्दानीको १५ प्रतिशत रकम अस्पताल सुदृढीकरण कोषमा छुट्याउनुपर्ने छ । कोषको रकम प्रदेश अस्पताल र स्थानीय स्वास्थ्य संस्थाको सुदृढीकरणमा खर्च गर्न नयाँ व्यवस्था भएको हो । रासस

तुलसीपुरको मन्दिरको ७ कठ्ठा जग्गा अतिक्रमणमा, ठूला घर र व्यवसाय सञ्चालन

दाङ । दाङको तुलसीपुर बजारभित्र तुलसी बोर्डिङ चोकदेखि पूर्वतिर ठूला–ठूला घर छन् । ति घर आफ्नै जग्गामा बनेका हुन्, भन्ने लाग्ला । तर, त्यसो होइन् चार/पाँच फ्ल्याटका ती घर त मन्दिरको नामको जग्गामा बनेका घर हुन् । दाङको तुलसीपुर उपमहानगरपालिका–५ स्थित सिद्ध रत्ननाथ मन्दिरको जग्गा १० कठ्ठा हो । तर, त्यो जग्गा मन्दिरले उपभाग गर्न पाएको छैन । मन्दिरले अहिले तीन कठ्ठा मात्रै जग्गा भोगचलन गर्दै आएको छ । बाँकी सबै जग्गा अतिक्रमणमा परेको छ । गुठीअन्तर्गत रहेको उक्त मन्दिरको जग्गामा चार/पाँच तले घरहरू निर्माण भएको मन्दिरका संरक्षक तेजनाथ योगीले बताए । 'ठूला–ठूला घरहरू बनेका छन्, ती घरहरू हटाउन सकिएको छैन, हामीलाई जग्गा नभएर हैरान छ', उनले भने, 'हाम्रो जग्गा फिर्ता ल्याउन कोही पनि निकायले पहल गरेको छैन ।' अहिलेको तुलसी बोर्डिङ चोक नजिक पहिला मन्दिर थियो । पछि यता सारियो । त्यो हुँदा अहिले उक्त क्षेत्र अतिक्रमणको चपेटामा परेको संरक्षक योगीको भनाइ छ । त्यहाँ १५/२० घरहरू बनेका छन् । मन्दिरकै जग्गामा बनेका घरमा मन्दिरलाई जग्गाबापतको भाडा दिए पनि सहज हुने वा एउटा/एउटा सटर दिए पनि सहज हुने उनको तर्क छ । त्यसका लागि पहल गर्ने गरी अगाडि बढाइएको संरक्षक योगीको भनाइ छ । त्यसका लागि अब सम्बन्धित निकायमा माग गर्नेतर्फ आफूहरूले सोच बनाएको उनले बताए । मन्दिरको जग्गा भए पनि सबै अतिक्रमणमा पर्दा अहिले सभाहल कहाँ बनाउने भन्नेमा अन्यौल छ । केही दिन अघि सप्ताह लगाइएको मन्दिरले सभाहल बनाउने योजना बनाएको छ । अहिले मन्दिरदेखि उत्तरतिर केही जग्गा भए पनि त्यति जग्गाले मात्रै पुग्ने अवस्था नहुँदा समस्या भएको छ । मन्दिरको जग्गा सार्वजनिक भएकाले त्यसलाई फिर्ता ल्याउन सरकारले साथ दिनुपर्ने संरक्षक योगीले बताए । बजार विस्तारका क्रममा अतिक्रमण गरेर त्यो जग्गामा घर बनाइएका हुन् । अहिले ती जग्गामा बनेका घरमा ठूला–ठूला व्यवसाय सञ्चालनमा छन् । विभिन्न सरकारी तथा गुठीको जग्गा अतिक्रमणमा परिरहेको अवस्थामा तुलसीपुरस्थित मन्दिरको जग्गा यसरी अतिक्रमणमा परेको हो । रासस

बजेट अभावले नारायणगढ–मुग्लिन सडकको भासिएको भाग बनेन

नारायणगढ । बजेट अभावमा नारायणगढ–मुग्लिन सडकको २६ किलोमा भासिएको भाग चालु आर्थिक वर्षमा नबन्ने भएको छ । सो क्षेत्रमा एक सय ६५ मिटर भाग भासिएको छ । गत असोजको अविरल वर्षापछि सो ठाउँमा सडक भासिएको थियो । सो क्षेत्रको ८५ मिटर लम्बाइ र ३.५ मिटर चौडाइ आठ मिटर तलसम्म भासिएको छ । बाँकी भाग चिरा परेको छ । अब बनाउँदा सबै भागलाई एकैसाथ बनाउनुपर्ने डिभिजन सडक कार्यालयका प्रमुख नारायण लामिछानेले बताए । चालु आर्थिक वर्षमा बजेट सुनिश्चितता हुन नसक्दा काम हुन नसकेको हो । वर्षाले कालोपत्र तलको माटोको भागलाई बगाएर खोक्रो बनाएपछि सडक भासिएको हो । अठारदेखि २५ मिटरसम्म पायल राखेर मर्मत गर्नुपर्ने उनले बताए । सोहीअनुसारको डिजाइन तयार गरेर सडक विभागमा पेस गरिएको छ । गत माघमा डिजाइन तयार गरी फागुनमा स्रोत सुनिश्चितताका पेस गरिएको भए पनि बहुवर्षे ठेक्काका लागि बजेट विनियोजन गर्ने समय समाप्त भएकाले यस वर्ष काम हुन नसकेको उनले बताए । भासिएको भाग मर्मत गर्न ३२ करोड लाग्ने अनुमान गरिएको छ । हाल सडकमा थप क्षति हुन नदिन ग्यावियन जाली लगाएर अस्थायी रोकथामका काम गरिएको छ । यो सडक हुँदै राजधानी काठमाडौं र पोखरातर्फ दैनिक १० हजारभन्दा बढी सवारीसाधन सञ्चालन हुन्छन् ।

लघुवित्त क्षेत्रमा देखिएका समस्या संवादबाट समाधान गर्छु: गभर्नर पौडेल

काठमाडौं । नेपाल राष्ट्र बैंकका गभर्नर डा. विश्वनाथ पौडेलले लघुवित्त वित्तीय संस्थाहरूले वित्तीय क्षेत्रमा खेलेको भूमिकाको तारिफ गरेका छन् । बधाई तथा सफल कार्यकालको शुभकामना दिन मंगलबार राष्ट्र बैंक पुगेको नेपाल लघुवित्त बैंकर्स संघका पदाधिकारीसँगको भेटमा गभर्नर पौडेलले ग्रामीण क्षेत्रको आर्थिक रुपान्तरणमा लघुवित्त संस्थाहरूले उल्लेखनीय भूमिका खेलेको बताए ।  पछिल्लो समय लघुवित्त क्षेत्रमा केही समस्या देखिएपनि यसलाई सुधार गर्दै अघि बढ्नु पर्ने गभर्नर पौडेलले बताए । ‘ग्रामीण क्षेत्रमा लघुवित्त संस्थाहरूको योगदान महत्वपूर्ण छ, सामाजिक रुपान्तरण कार्यमा योगदान पुर्याएका छन् । यो कार्यलाई अझै व्यापक विस्तार गर्नुपर्ने देखिन्छ, सुधार गर्नुपर्नेछ,’ उनले भने ।  लघुवित्त संस्थाहरूसँग सम्बन्धी नीति निर्माण गर्दा सबै पक्षसँग संवाद गरेर अघि बढ्ने उनको भनाइ छ । आफूले लघुवित्त क्षेत्रलाई बुझेको बताउँदै उनले भने, ‘संवाद‘ो माध्यमबाट नीतिगत व्यवस्था गर्नेछु । आफूलाई लघुवित्तको योगदान र सामाजिक मूल्यको बारेमा जानकारी छ । सबै पक्षलाई समेटेर अघि बढ्छु ।’’ भेटमा नेपाल लघुवित्त बैंकर्स संघका अध्यक्ष राम बहादुर यादवले लघुवित्त संस्थाका समस्या समाधानका लागि सकारात्मक भूमिका खेल्नुपर्ने बताए । साथै नीतिगत व्यवस्था सहज गरी व्यवसाय र पहुँच विस्तारमा जोड दिनु पर्ने उनले बताए ।  भेट कार्यक्रममा संघका पूर्व अध्यक्ष बसन्त लम्साल, उपाध्यक्ष रामहरि दाहाल, महासचिव सञ्जय कुमार मण्डल, कोषाध्यक्ष विनोद आचार्य लगायत प्रमुख कार्यकारी अधिकृतहरू थिए । 

राप्ती हाइड्रोले असार १ गतेदेखि १ सय प्रतिशत हकप्रद सेयर बिक्री गर्ने

काठमाडौं । राप्ती हाइड्रो एण्ड जनरल कन्स्ट्रक्सनले असार १ गतेदेखि हकप्रद सेयर निष्काशन तथा बिक्री खुला गर्ने भएको छ । कम्पनीले चुक्ता पुँजी ६१ करोड २७ लाख ९३ हजार रुपैयाँको १ सय प्रतिशत अर्थात् हाल कायम १ कित्ता सेयर बराबर नयाँ १ कित्ता अनुपातमा हकप्रद सेयर बिक्री गर्न लागेको हो ।  कम्पनीले प्रतिकित्ता १ सय रुपैयाँ अकित मूल्य दरका ६१ लाख २७ हजार ९३८ कित्ता हकप्रद सेयर बिक्री गर्नेछ । हकप्रद निष्काशन कम्पनीको चुक्ता पुँजी १ अर्ब २२ करोड ५५ लाख ८६ हजार रुपैयाँ पुग्नेछ । हकप्रद सेयर निष्काशन प्रयोजनार्थ कम्पनीले जेठ ६ गते बुक क्लोज गरेको थियो । त्यसैले जेठ ५ गतेसम्म नेपाल स्टक एक्सचेञ्ज (नेप्से)मा कायम सेयरधनीहरूले कम्पनीको सेयरमा आवेदन दिन सक्नेछन् । कम्पनीको सेयरमा लगानीकर्ताहरूरूे असार २२ गतेसम्म आवेदन दिन सक्नेछन् ।  कम्पनीको हकप्रद सेयर निष्काशन तथा बिक्री प्रबन्धकमा मुक्तिनाथ क्यापिटल रहेको छ । कम्पनीको सेयरमा लगानीकर्ताहरूले बिक्री प्रबन्धकसँगै मुक्तिनाथ विकास बैंकको बिर्तामोड, विराटनगर, विरगंज, जनकपुर, नारायणगढ, पोखरा, बुटवल, नेपालगंज, बीरेन्द्रनगर, धनगढी र महेन्द्रनगर शाखा कार्यालयबाट आवेदन दिन सक्नेछन् । यस्तै, सिआस्बा सेवामा सहभागी बंक तथा वित्तीय संस्थाबाट र सिडिएस एण्ड क्लियरिङ्गले निर्माण गरेको मेरो सेयरबाट पनि आवेदन दिन सक्नेछन् ।  

तिरुपती उड प्यानल इन्डष्ट्रीमा आगलागी

काठमाडौं । सुनसरी–मोरङ औद्योगिक करिडोरस्थित तिरुपती उड प्यानल इन्डष्ट्रीमा आगलागी भएको छ । आज बिहान २ः३० बजेदेखि लागेको आगो निभाउने प्रयास जारी छ ।  इलाका प्रहरी कार्यालयका प्रमुख प्रहरी नायब उपरीक्षक लक्ष्मी भण्डारीका अनुसार विद्युत् सर्ट भएर आगो सल्किएको अनुमान छ । आगो निभाउन धरान, विराटनगर, इटहरी, दमक, पथरी, दुहबी, इनरुवालगायत स्थानका १६ वटा दमकल प्रयोग गरिएको छ । 

१८ जेठदेखि मनसुन सुरू भएर असोज १४ गतेसम्म रहने, १ हजार ५०० मिलिमिटर बढी पानी पर्ने

काठमाडौं । उर्जा, जलस्रोत तथा सिँचाई मन्त्री दीपक खड्काले स्थानीय वडासम्मै मौसम पूर्वानुमान सूचना सम्प्रेषण गर्ने गरी काम भइरहेको बताएका छन् ।  मन्त्रालय अन्तर्गत रहेको जल तथा मौसम विज्ञान विभागमा प्रधानमन्त्री केपी शर्मा ओलीसँगै पुगेका मन्त्री खड्काले वडा वडासम्म मौसम पूर्वानुमान सूचनालाई सम्प्रेषण गर्ने गरी विभागले काम गरिरहेको बताए ।  ‘गत वर्षभन्दा यसवर्ष धेरै वर्षा हुनसक्ने पूर्वानुमान गरिएको छ, मौसम पूर्वानुमान प्रणालीलाई वडा तहसम्म पुर्याउन सकिए विपद्बाट हुने क्षति न्यूनीकरणमा सहयोग पुग्छ भन्ने हो, त्यसका लागि मन्त्रालय र विभागले काम गरिरहेको छ,’ मन्त्री खड्काले भने ।  विभागका महानिर्देशक कमलराम जोशीले यस वर्ष यही जेठ १८ गतेदेखि आगामी असोज १४ सम्म मनसुन अवधि हुने बताए । उनले गण्डकी तथा लुम्बिनी प्रदेशको उत्तरी भाग र कर्णाली प्रदेशको पूर्वी भागमा सरदर भन्दा बढी वर्षा हुने जानकारी गराए ।  महानिर्देशक जोशीले कृषकका लागि साप्ताहिक रुपमा कृषि मौसम पूर्वानुमान प्रणालीबारे जानकारी दिँदै आएको बताए । उनले यो वर्ष एक हजार ५०० मिलिमिटरभन्दा बढी पानी पर्ने पूर्वानुमान गरेको समेत उल्लेख गरे । उनले वर्षाबाट हुने क्षति न्यूनीकरणका लागि समयमै राष्ट्रिय विपद् जोखिम न्यूनीकरण तथा व्यवस्थापन प्राधिकरण, सुरक्षा निकाय, प्रमुख जिल्ला अधिकारी लगायतलाई जानकारी गराउँदै आएको बताए ।  विभागको कार्यालयमा स्थलगत रूपमा पहिलो पटक प्रधानमन्त्री तहबाट अवलोकन र अनुगमन भएकोमा उनले खुसी व्यक्त गरे । महानिर्देशक जोशीले उपलब्ध प्रविधि र स्रोतसाधनको अधिकतम प्रयोग गरी पूर्वानुमानलाई प्रभावकारी बनाउने समेत बताए । अवलोकनका क्रममा उर्जा, जलस्रोत तथा सिँचाई राज्यमन्त्री खमबहादुर गर्बुजा, जलस्रोत तथा सिँचाई सचिव सरिता दवाडी लगायतको सहभागिता रहेको थियो ।                    

दृष्टिविहीन विद्यार्थीलाई कम्प्युटर, मोबाइल एप्स र मोबिलिटी तालिम

काठमाडौं । नेत्रहीन युवा संघ  काठमाडौंले १५ जना दृष्टिविहीनलाई कम्प्युटर, मोबाइल एप्लिकेसन तथा मोबिलिटी तालिम दिएको छ । नेत्रहीन युवा संघ काठमाडौंले गत वैशाख २६ गतेदेखि जेठ १० गतेसम्म सञ्चालन गरेको कार्यक्रम मंगलबार समापन भएको छ । कार्यक्रम १५ दिनसम्म चलेको थियो ।  समापन कार्यक्रममा बोल्दै नेत्रहीन युवा संघ नेपालका अध्यक्ष शिशिर खनालले पुर्खाहरूले दृष्टिविहीन व्यक्तिहरूको हक अधिकार लागि संघर्ष तथा चरणवद्ध आन्दोलन गर्दै नेत्रहीन युवा संघ नेपाल स्थापना भएको बताए । उनले समग्र दृष्टिविहीन व्यक्तिहरूको आधार स्तम्भ नै नेपाल नेत्रहीन युवा संघ भएको दाबी गरे। संघसँग परियोजना नहुँदा समेत काम गरिरहेको उनी बताउँछन् । अध्यक्ष खनालले भने, ‘परियोजनामार्फत दृष्टिविहीनको अधिकार समावेशीकरण, पुनःस्थापना समावेशी शिक्षा, वकालत, पैरवीलगायतका कामहरू हामीले गरिरहेका छौं । संगठनले दृष्टिविहीनहरूलाई संगठित हुन मात्रै होइन एक अर्कामा अन्तर्निहित हुन सहयोग पुर्याउँछ । यदि आजको दिनमा नेत्रहीन संघ नभएको भए यति धेरै यहाँ व्यक्तिहरू जमघट हुने थिएनन् । यो हाम्रो पिर बिसाउने चौतारी हो । हामीलाई कसैले हप्कायो, दप्कायो, हेला गर्यो भने सतिसाल झै उभिएर प्रतिवाद गर्ने दृष्टिविहीनको अधिकार प्राप्त गराउने संस्था हो ।’   उनले हालसम्म नेत्रहीन युवा संघले ५२ जिल्लामा शाखा विस्तार गरिसकेको बताउँदै तीन हजार ५ सयभन्दा बढी सदस्य रहेको जानकारी दिए । उनले यो संख्या ज्यादै न्यून भएको भन्दै नेत्रहीनले थोरै जिल्लाहरू शाखा विस्तार गरेकोमा अब यो संख्या बढ्ने बताए ।  उनका अनुसार सुरु सुरुमा जिल्लामा १५० देखि १७० जनासम्म मात्रै हुने र त्यसमा पनि फारम भर्नुपर्ने अवस्था थियो । तर अब त्यस्तो नभएको बताउँदै सबै जिल्लाहरूमा संघको शाखा विस्तार गर्नुपर्नेमा जोड दिए ।  उनले चाँडै अनिवार्य रुपमा नेत्रहीनको सदस्य बन्ने अभियानमा आजदेखि लाग्न आग्रह गरे । संघले यसअघि इन्स्टिच्युटको तिर्दै आएको पैसा अब उपत्यकाभित्र रहेका दृष्टिविहीनको पैसा संघले तिर्ने नसकिने बताउँदै उनले शिक्षक सेवा तथा लोकसेवामा २५/३० जनालाई सुविधा उपलब्ध गराउने जानकारी दिए । नेत्र युवा संघले पछिल्लो समय महत्वपूर्ण काम गरिरहेको उनको दाबी छ ।  सन् १९७८ देखि दिँदै आइरहेको छात्रवृत्ति महिनामा ४४ जनालाई २५ सयका दरले दिँदा एक वर्षको १३ लाखभन्दा बढी हुन आउने उनको भनाइ थियो ।  ‘सानो लगानीमा जीविकोपार्जनका लागि बिउविजन उपलब्ध गर्ने सूचना नै प्रकाशित गरेर आवेदन मागेका छौं । यति मात्रै होइन नेपालमै दृष्टिविहीन व्यक्तिहरूका लागि कम्प्युटर सिकाउने संस्था नेपाल नेत्रहीन मात्रै हो । हामीले वर्षको तीन पटक विद्यार्थीलाई कम्प्युटर सिकाउने गरिरहेका छौं ।  दृष्टिविहीनहरुको संरक्षण, विकास तथा विभिन्न क्षेत्रमा रोजगारी पाउन तथा स्वरोजगार बन्न कम्प्युटरको पाटो महत्वपूर्ण हुँदो रहेछ । हामीले सिकाएको कम्प्युटरमा पूर्णता छैन पर्याप्तता छैन् । तर हामीले भोक जगाउने काम गरेका छौं,’ उनले भने ।     उनले पालिकाहरुबाट ल्यापटप किनि दिनका लागि चार वर्षअगाडि माग गरेको र संघले सिफारिस गरेको तथा पालिकाले उपलब्ध गराएको बताउँदै यसका लागि अबका दिनमा पनि संघबाट हुने सहयोग हुने प्रतिवद्धता व्यक्त गरे । संघले विभिन्न सवालहरू तथा मुद्धाहरुमा काम गरिरहेको उनको भनाइ छ । स्थापनाकालदेखि नै अधिकारको वकालत र नेत्रहीनहरूको गुणस्तरीय जीवनका लागि संघर्षरत यो संस्थाले दृष्टिविहीनहरूका क्षेत्रमा अनेक महत्त्वपूर्ण उपलब्धिहरू हासिल गरेको उनले सुनाए ।  संघको सहयोगमा धेरै नेत्रहीन शिक्षक, कर्मचारी, डाक्टर, वकिल लगायतका विभिन्न क्षेत्रमा रोजगारी पाउन तथा स्वरोजगार बन्न सफल भएका उनको भनाइ थियो ।  यस्तै १५ दिनसम्म चलेको आधारभुत कम्प्यूटर मोबाइल एप्लिकेसन तथा मोबिलिटी तालिममा दृष्टिविहीन विद्यार्थीहरुको लागि कम्प्यूटर मोबाइल एप्लिकेसन सञ्चालनका आधारभूत ज्ञान प्रदान गर्नुको साथै दृष्टिविहीनरुले चलाउने कम्प्युटर सफ्टवेयर मोबाइल एप्लिकेसन तथा मोबिलिटी बाटोमा हिँड्दा कसरी हिँड्ने लगायत विषयमा समेत तालिम प्रदान गरिएको थियो।  नेपाल नेत्रहीन युवा संघ काठमाडौंका अध्यक्ष शिव अग्रवालका अनुसार तालिममा १५ जना दृष्टिविहीन विद्यार्थीहरूको सहभागिता रहेको थियो । तालिममा एसइइ दिएर घरमै बसेका विद्यार्थी तथा स्नातक अध्ययन गरिरहेका दृष्टिविहीनलाई तालिम दिइएको हो ।  कार्यक्रममा काठमाडौंका विभिन्न विद्यालय तथा कलेजहरूमा अध्ययन गरिरहेका विद्यार्थीहरु सहभागी थिए । वागमती प्रदेश सामाजिक विकास कार्यालयको सहयोगमा भएको तालिम नेपाल नेत्रहीन युवा संघको कार्यालयको भवनमै भएको थियो । तालिममा माईक्रोसफ्टव वर्ड, पेजमेकर, एक्सल, पावर पोईन्ट, ईमेल इन्टरनेट, मोबाइल एप्लिकेसनमा एआईको प्रयोग मोबिलिटीमा बाटोमा कसरी हिँड्ने लगायतका बारेमा शिक्षा प्रदान गरिएको थियो । दृष्टिविहीन विद्यार्थीहरूले कम्प्युटर तालिम आवाज सुनेर सोही अनुसारको मार्गदर्शन अनुसार सिक्दै आएका समेत अध्यक्ष अग्रवालको भनाइ थियो । उनले आागामी दिनहरुमा पनि संघले दृष्टिविहीनहरुको हकहित तथा अधिकारका विषयमा आवाज उठाइरहने समेत बताए । उनले भने, ‘नेत्रहीन युवा संघ काठमाडौंमा हामीले हाल थुप्रै कामहरु गरिरहेका छौं । यसअघि नेत्रहीन युवा संघ काठमाडौं नविकरण नै भएको थिएन् । हाम्रो नयाँ टिम आइसकेपछि यसलाई नविकरण गरेका छौं । दृष्टिविहीनहरुको आवाज बनेर विभिन्न कामहरु गरिरहेका छौं । आगामी दिनहरुमा पनि यी र यस्तै कार्यक्रमका लागि थप पहल गर्ने छौं ।’  यस्तै, उनले कार्यक्रममा सहभागी भएर सहयोग गर्ने सबैमा धन्यवाद व्यक्त गरे ।