काठमाडौंका ६ अस्पतालमा ६६ घाइते उपचाररत, १४ डिस्चार्ज
काठमाडौं । रसुवाको बाढीमा परेर घाइते भएका ६६ जनाको काठमाडौंका विभिन्न अस्पतालमा उपचार भइरहेको छ । नेपाल प्रहरीका अनुसार त्रिवि शिक्षण अस्पतालमा २६, ट्रमा सेन्टरमा २०, वीर अस्पतालमा २, वीरेन्द्र सैनिक अस्पतालमा १, नर्भिक अस्पताल २ र मनमोहन अस्पतालमा १४ जना उपचाररत छन् । त्यसैगरी विभिन्न अस्पतालमा उपचार गराइरहेका १४ जना घाइते डिस्चार्ज भएका छन् । हालसम्म २ सय ७० जना शव फेला परेको प्रहरीले उल्लेख गरेको छ । २८ प्रहरीहरू सम्पर्कविहिन भएको प्रहरीले बताएको छ । उद्धार तथा राहतमा ४ हजार ५० जना प्रहरीहरू परिचालित रहेका छन् । बुधबार बिहान ९ बजे आएको बाढीले रसुवा, नुवाकोट, धादिङ र गोर्खामा क्षति पुर्याएको छ ।
प्रधानमन्त्री दैवीप्रकोप उद्धार कोषमा अपि पावरले दियो ३५ लाख
काठमाडौं । भोटेकोशी नदीमा आएको भीषण बाढीबाट प्रभावित नागरिकको खोज, उद्धार, राहत तथा पुनर्स्थापनाका लागि अपि पावर कम्पनीले प्रधानमन्त्री दैवीप्रकोप उद्धार कोषमार्फत ३५ लाख रुपैयाँ सहयोग गरेको छ । कम्पनीले भदौ १० गते आएको आकस्मिक बाढीबाट प्रभावित नागरिकको तत्काल राहत र उद्धार कार्यमा सहयोग पुग्ने उद्देश्यले उक्त रकम उपलब्ध गराएको जनाएको छ । अपि पावरकी अध्यक्ष सिर्जना खड्काले यो सहयोगले प्रभावित नागरिकको खोज तथा उद्धार अभियानमा तत्काल टेवा पुग्ने विश्वास व्यक्त गरिन् । खोज तथा उद्धार कार्यपछि आवश्यकताअनुसार दीर्घकालीन पुनर्स्थापनामा पनि कम्पनी थप सहयोग गर्न तयार रहेको उनले बताइन् । कम्पनीले बाढीका कारण विभिन्न जलविद्युत् आयोजना र अन्य भौतिक संरचनामा भएको ठूलो जनधनको क्षतिप्रति गहिरो दुःख व्यक्त गरेको छ । साथै बाढीमा ज्यान गुमाउनेहरूप्रति श्रद्धाञ्जली अर्पण गर्दै शोकसन्तप्त परिवारप्रति समवेदना र घाइतेहरूको शीघ्र स्वास्थ्यलाभको कामना गरेको छ । अपि पावरले विभिन्न जलविद्युत् आयोजनामा कार्यरत कर्मचारीसहित बेपत्ता भएका नागरिकको तत्काल खोजी र उद्धारका लागि सम्बन्धित निकायसँग आग्रह गरेको छ । साथै यस विषम परिस्थितिमा थप जनधनको क्षति हुन नदिन सबैले आ–आफ्नो क्षेत्रबाट अधिकतम सावधानी अपनाउँदै खोज, उद्धार र राहत अभियानमा सहयोग गर्न कम्पनीले अपिल गरेको छ । हाल अपि पावरले ५६ मेगावाट क्षमताका जलविद्युत् आयोजना र ६ मेगावाट क्षमताको सौर्य आयोजना सञ्चालन गरी नियमित विद्युत् उत्पादन गरिरहेको छ । कम्पनीले सहायक कम्पनीहरूमार्फत जलविद्युत्, कृषि, पर्यटन तथा पूर्वाधार क्षेत्रमा पनि लगानी र काम गर्दै आएको जनाएको छ ।
बाढीपीडितको उद्धार र राहतमा सहयोग गर्न एलपी ग्यास उद्योग संघको अपिल
काठमाडौं । एलपी ग्यास उद्योग संघ नेपालले रसुवाको भोटेकोशी नदीमा आएको भीषण बाढीबाट प्रभावित नागरिकको उद्धार, राहत, उपचार तथा पुनःस्थापनामा सहयोग गर्न उद्योगी, व्यवसायी, संघसंस्था तथा आम नागरिकलाई आग्रह गरेको छ । संघले बुधबार जारी गरेको विज्ञप्तिमा रसुवा, नुवाकोट, धादिङ, चितवन, गोरखा, तनहुँलगायत विभिन्न क्षेत्रमा बाढीका कारण ठूलो जनधनको क्षति भएकोप्रति दुःख व्यक्त गरेको छ। अचानक आएको बाढीका कारण ठूलो संख्यामा नागरिकको ज्यान गएको, कैयौं बेपत्ता तथा घाइते भएको र घरबस्ती, उद्योग व्यवसाय, सडक, पुल, जलविद्युत् आयोजना, यातायातका साधन तथा अन्य भौतिक संरचनामा गम्भीर क्षति पुगेको भन्दै संघले दुःख व्यक्त गरेको हो । संघले बाढी तथा विपद्मा ज्यान गुमाउनेहरूप्रति श्रद्धाञ्जली अर्पण गर्दै शोकसन्तप्त परिवारप्रति समवेदना व्यक्त गरेको छ। साथै घाइतेहरूको शीघ्र स्वास्थ्यलाभको कामना गरेको छ। विपद्को कठिन परिस्थितिमा प्रभावित नागरिकको तत्काल उद्धार, राहत, उपचार तथा पुनःस्थापनालाई उच्च प्राथमिकतामा राख्नुपर्ने संघको भनाइ छ। आवश्यक खाद्यान्न, औषधि, खानेपानी तथा अत्यावश्यक वस्तुको सहज आपूर्ति सुनिश्चित गर्न सरकार, स्थानीय तह, सुरक्षा निकाय तथा सम्बन्धित सरोकारवालाले गरिरहेको प्रयासमा सहकार्य गर्न संघ प्रतिबद्ध रहेको जनाएको छ। संघले विपद् प्रभावित नागरिकको उद्धार, राहत तथा पुनःस्थापनाका लागि आवश्यक सहयोग गर्न सबै उद्योगी, व्यवसायी, संघसंस्था तथा आम नागरिकलाई अपिल गरेको छ। यसैगरी, प्रभावित क्षेत्रमा एलपी ग्यासजस्तो अत्यावश्यक वस्तुको आपूर्ति तथा वितरणमा समस्या हुन नदिन सम्बन्धित ग्यास उद्योगी, व्यवसायी तथा विक्रेतालाई आवश्यक समन्वय र सहकार्य गर्न संघले आग्रह गरेको छ।
दुई नदीको संगम नजिकै बन्यो ‘खतरनाक ताल’, ३ दिनभित्र फुट्न सक्ने चीनको चेतावनी
काठमाडौं । चीनको जलस्रोत मन्त्रालयले नेपालको छोछेन खोला र प्युरेपु त्साङपो नदीको संगम नजिकै ठूलो अवरोध ताल (बेरिअर लेक) बनेको जनाएको छ । बिहीबार बिहानसम्म उक्त तालमा करिब २० लाख घनमिटर पानी जम्मा भएको र ताल भरिएर पानी बाहिरिन थालेको चिनियाँ सरकारी सञ्चारमाध्यम सीसीटीभीले जनाएको छ । मन्त्रालयका अनुसार आगामी तीन दिनमा थप ३० लाख घनमिटर पानी तालमा थपिने अनुमान गरिएको छ । सोही कारण ताल फुट्ने जोखिम उच्च रहेको चेतावनी दिइएको छ । चीनको जलस्रोत मन्त्रालयले तालको अवस्थालाई नजिकबाट निगरानी गरिरहेको छ । सम्भावित रूपमा ताल फुटेमा आउन सक्ने बाढीको अवस्था पहिल्यै आकलन गर्न बाढीसम्बन्धी सिमुलेसन तथा विश्लेषणसमेत भइरहेको मन्त्रालयले जनाएको छ । यसबाट सम्भावित आपत्कालीन उद्धार तथा राहत कार्यका लागि आवश्यक तयारी र सहयोग उपलब्ध गराउने उद्देश्य राखिएको छ । यसैबीच, नेपाल–चीन सीमाको नेपाली क्षेत्रमा आएको विनाशकारी पहिरो तथा बाढीले चीनको दक्षिणपश्चिमी तिब्बत स्वायत्त क्षेत्रस्थित केरुङ बन्दरगाह (ज्यारोङ पोर्ट) मा ठूलो क्षति पुर्याएपछि चिनियाँ अधिकारीहरूले विभिन्न तहबाट उद्धार टोली परिचालन गरेका छन् । आपत्कालीन उद्धारकर्मी, जनमुक्ति सेना (पीएलए), इन्जिनियरिङ टोली, दूरसञ्चार कम्पनी तथा राहत संस्थाहरूले विपद् प्रभावित क्षेत्रमा जनशक्ति, हेलिकप्टर तथा अन्य विमान, उपकरण र राहत सामग्री पठाइरहेका छन् । कठिन भौगोलिक अवस्था, निरन्तर भइरहेको वर्षा र थप प्राकृतिक विपद्को बढ्दो जोखिमबीच उद्धार कार्य तीव्र पारिएको छ । बिहीबार बिहानसम्म घटनामा तीन जनाको मृत्यु पुष्टि, दुई जनाको उद्धार र ५५८ जना बेपत्ता रहेको चिनियाँ पक्षले जनाएको छ । बेपत्तामध्ये २६० जना विदेशी नागरिक रहेको बताइएको छ ।
सर्वोत्तम पेन्ट्सको सेयर मूल्य १५ प्रतिशतले बढ्यो
काठमाडौं । बिहीबार सेयर बजारमा सामान्य अंकको गिरावट आएको छ । नेपाल स्टक एक्सचेन्ज (नेप्से) १.०४ अंकले घटेर २५५७.३१ बिन्दुमा झरेको छ । नेप्सेका अनुसार १४६ कम्पनीको सेयर मूल्य बढ्दा ११८ कम्पनीको सेयर मूल्य घटेको छ । १५ कम्पनीको सेयर मूल्यमा भने कुनै परिवर्तन आएको छैन । बिहीबार ३४८ कम्पनीको १ करोड कित्ता सेयर किनबेच हुँदा ३ अर्ब ७८ करोड रुपैयाँको कारोबार भएको छ । जसमध्ये सबैभन्दा धेरै कारोबार शिवम् सिमेन्टको भएको छ । शिवम् सिमेन्टको २१ करोड रुपैयाँ बराबरको कारोबार भएको छ । साथै नेपाल एसबीआई बैंकको १६ करोड, आँखु खोलाको ११ करोड र रिलाइन्स स्पिीनिङको १० करोड रुपैयाँ बराबरको कारोबार भएको छ । आज सर्वोत्तम पेन्ट्सको सेयर मूल्य १५ प्रतिशतले बढेर सकारात्मक सर्किट लागेको छ । नेप्सेका अधिकांश उपसूचकमा सामान्य वृद्धि देखिएको छ । बिहीबारको कारोबारमा उत्पादन तथा प्रशोधन उपसूचक सबैभन्दा धेरै १.७५ प्रतिशतले बढेको छ । उत्पादन तथा प्रशोधन उपसूचक १७९.१४ अंकले बढेर १० हजार ४१२.९७ विन्दुमा पुगेको छ । वित्त उपसूचक १४.९६ अंकले बढेर २ हजार २६८.७३ विन्दुमा पुगेको छ भने विकास बैंक उपसूचक २३.९० अंकले बढेर ५ हजार ४३८.३७ विन्दुमा पुगेको छ । होटल तथा पर्यटन उपसूचक २९.६३ अंकले बढेर ७ हजार १५२.९८ विन्दुमा पुगेको छ । बैंकिङ उपसूचक २.०९ अंकले बढेर १ हजार ४२८.५६ विन्दुमा पुगेको छ । त्यस्तै लघुवित्त उपसूचक ५.३९ अंक, लगानी उपसूचक ०.१४ अंक र व्यापार उपसूचक ०.१२ अंकले बढेका छन् । यस्तै जलविद्युत् उपसूचक १९.७८ अंकले घटेको छ । जीवन बीमा उपसूचक २८.१० अंक, अन्य उपसूचक १९.९५ अंकले घटेका छन् । सबैभन्दा धेरै गिरावट गैरजीवन बीमा उपसूचकमा देखिएको छ । उक्त उपसूचक २०३.४२ अंक अर्थात् २.०४ प्रतिशतले घटेर ९ हजार ७३२.१६ विन्दुमा झरेको छ । त्यस्तै म्युचुअल फण्ड उपसूचक ०.६३ अंक अर्थात् ३.१२ प्रतिशतले घटेर १९.६७ विन्दुमा कायम भएको छ ।
विपद् व्यवस्थापनमा एकजुट हुन कार्यवाहक प्रमुख डंगोलको अपिल
काठमाडौं । काठमाडौं महानगरपालिकाका कार्यवाहक प्रमुख सुनिता डंगोलले भोटेकोशी बाढीबाट उत्पन्न मानवीय संकटको सामना गर्न उद्धार, राहत तथा पुनःस्थापनाका काममा एकजुट हुन सबैमा अपिल गरेकी छन् । बुधबार बिहान भोटेकोशी नदीमा ठूलो बाढी प्रवेश गरेपछि भएको जनधनको क्षतिप्रति गहिरो दुःख व्यक्त गर्दै डंगोलले उद्धारको पर्खाइमा रहेका व्यक्ति तथा परिवारलाई तत्काल उद्धार र राहत उपलब्ध गराउन आग्रह गरेकी हुन् । उनले बाढीका कारण विस्थापित परिवारलाई पुनःस्थापित गर्ने, त्रासमा रहेका नागरिकलाई सुरक्षित र भयमुक्त वातावरण प्रदान गर्ने तथा आवश्यक मानवीय सहयोगका लागि सबै पक्ष सक्रिय हुनुपर्नेमा जोड दिएकी छन् । संकट व्यवस्थापनमा महानगरपालिका आफ्नो दायित्वप्रति जिम्मेवार रहेको उल्लेख गर्दै डंगोलले तीनै तहका सरकार, सुरक्षा निकाय, जनप्रतिनिधि, सामाजिक संघसंस्था, निजी क्षेत्र तथा आम नागरिकलाई समन्वयात्मक रूपमा परिचालन हुन आग्रह गरेकी छन् । ‘यो दुःखलाई केवल समाचारका रूपमा मात्र हेरेर बस्ने होइन। हाम्रो सानो सहयोगले कसैको जीवन बच्न सक्छ । त्यसैले आफूले जे सकिन्छ, उद्धार, राहत सामग्री, यातायात वा स्वास्थ्य सेवामार्फत सहयोग गर्न म हार्दिक अपिल गर्दछु,’ उनले भनेकी छन् । बाढी प्रभावित क्षेत्रका बासिन्दालाई सुरक्षित र सतर्क रहन तथा स्थानीय प्रशासन र सुरक्षा निकायको निर्देशन पालना गर्न पनि कार्यवाहक प्रमुख डंगोलले आग्रह गरिन् । भूगोलले छुट्याए पनि मानवीय संवेदनाका आधारमा विपद्को समयमा सबै नेपाली एकजुट हुनुपर्ने उनको भनाइ छ । काठमाडौं महानगरपालिका बाढी प्रभावित नागरिकलाई संकटबाट उकास्न आवश्यक सहयोग र समन्वयका लागि प्रतिबद्ध रहेको उनले जनाइन् । डंगोलले जीवन बचाउने र प्रभावित परिवारमा आशा जगाउने अभियानमा सबैलाई हातेमालो गर्न आह्वानसमेत गरिन् ।
बट्टार र त्रिशूली बजारमा विद्युत् सेवा पुनः सुचारु
काठमाडौं । भोटेकोशी नदीमा आएको बाढीका कारण प्रभावित नुवाकोटका बट्टार र त्रिशूली बजार क्षेत्रमा विद्युत् सेवा पुनः सुचारु भएको छ । नेपाल विद्युत् प्राधिकरणले वैकल्पिक व्यवस्थामार्फत बालाजु–त्रिशूली र चपली–देवीघाट ६६ केभी प्रसारण लाइनलाई ११ केभीमा चार्ज गरी विद्युत् आपूर्ति सञ्चालनमा ल्याएको हो । बाढीका कारण नियमित विद्युत् आपूर्ति प्रणालीमा क्षति पुगेपछि प्राधिकरणले उपलब्ध प्रसारण संरचनाको वैकल्पिक प्रयोग गर्दै प्रभावित क्षेत्रमा विद्युत् सेवा पुनःस्थापना गर्ने काम अघि बढाएको थियो । उक्त व्यवस्थापछि बट्टार, त्रिशूली बजारलगायत आसपासका क्षेत्रमा विद्युत् आपूर्ति सुचारु भएको जानकारी प्राप्त भएको छ । प्राधिकरणले बाढीबाट क्षतिग्रस्त विद्युत् संरचनाको मर्मत तथा पुनःस्थापनालाई तीव्रता दिँदै प्रभावित सबै क्षेत्रमा विद्युत् सेवा नियमित बनाउने प्रयास जारी राखेको जनाएको छ ।
बाढी प्रभावित नुवाकोटमा प्रधानमन्त्री शाहको निरीक्षण, उद्धारदेखि पुन:स्थापनासम्म तीव्रता दिन निर्देशन
काठमाडौं । प्रधानमन्त्री बालेन्द्र शाह (बालेन) ले बाढीबाट अत्यधिक प्रभावित नुवाकोटको विदुर तथा आसपासका क्षेत्रको स्थलगत निरीक्षण गरेका छन् । प्रधानमन्त्री शाह बिहीबार (आज) बिहान ९ः३० बजे पूर्वाधार विकासमन्त्री सुनिल लम्सालसहित सडकमार्ग हुँदै नुवाकोट पुगेका थिए । उनले बाढी प्रभावित बस्तीहरूको भौतिक अवस्था, क्षतिको विवरण तथा प्रभावित नागरिकको अवस्थाबारे स्थलगत जानकारी लिएका हुन् । निरीक्षणका क्रममा प्रधानमन्त्रीको टोलीले बाढीबाट क्षतिग्रस्त भौतिक संरचना तथा पूर्वाधारको अवलोकन गर्नुका साथै स्थानीय प्रशासन, सुरक्षा निकाय र जनप्रतिनिधिसँग प्रभावित क्षेत्रको अवस्था र उद्धार तथा राहत कार्यबारे विस्तृत छलफल गरेको थियो । प्रधानमन्त्री शाहले बाढीबाट विस्थापित परिवारलाई तत्काल राहत उपलब्ध गराउन, अवरुद्ध सडक तथा अन्य अत्यावश्यक पूर्वाधार शीघ्र सञ्चालनमा ल्याउन र प्रभावित क्षेत्रमा उद्धार तथा राहतलाई थप प्रभावकारी बनाउन सम्बन्धित निकायलाई निर्देशन दिएका छन् । त्यसैगरी, तत्कालीन राहतसँगै प्रभावित क्षेत्रको दीर्घकालीन पुनस्र्थापनाका लागि आवश्यक कामलाई तीव्रता दिन पनि उनले निर्देशन दिएका छन् । यसअघि रसुवाको भोटेकोशी हुँदै आएको भीषण बाढीले नदी तटीय क्षेत्रमा ठूलो क्षति पुर्याएपछि प्रधानमन्त्री शाहले उद्धार, राहत तथा विपद् व्यवस्थापनका कामलाई प्रभावकारी बनाउन उच्चस्तरीय बैठकहरू आह्वान गर्दै सम्बन्धित निकायलाई निरन्तर निर्देशन दिँदै आएका थिए । प्रधानमन्त्री शाह स्थलगत निरीक्षण तथा आवश्यक निर्देशनपछि आजै काठमाडौं फर्किएका छन् ।
