विपद् व्यवस्थापनका लागि करिब २५ अर्ब वैदेशिक सहायता सुनिश्चित
काठमाडौं । अर्थमन्त्री डा. स्वर्णिम वाग्लेले मुलुकमा प्राकृतिक विपद्को सामना गर्न सरकारले स्रोत र साधनको अभाव हुन नदिने प्रतिवद्धता व्यक्त गरेका छन् । बिहीवार सिंहदरबारमा आयोजित प्रमुख राजनीतिक दलका शीर्ष नेताहरूको बैठकपछि अर्थमन्त्री वाग्लेले उद्धार, राहत र पुनर्निर्माणका योजनाबारे जानकारी दिएका हुन् । अर्थमन्त्री वाग्लेले बाढी, पहिरो र डुबानमा परी बेपत्ता भएका तथा अलपत्र परेका नेपाली नागरिक र विदेशी पर्यटकहरूको उद्धार कार्य तिब्र पारिएको बताए । उनका अनुसार, भौगोलिक र मौसमी प्रतिकूलताका बाबजुद हाल २२ वटा हेलिकोप्टरमार्फत उद्धार कार्य जारी राखिएको छ । विपदपछिको पुन:स्थापना र पुनर्निर्माणका लागि वैदेशिक सहायता जुटाउन सरकार सक्रिय भइसकेको उनले उल्लेख गरे । अर्थमन्त्री वाग्लेले भने, ‘विश्व बैंकसँगको समन्वयमा करिब २५ अर्ब रुपैयाँ बराबरको आर्थिक सहायता सुनिश्चित गरिएको छ । यसका साथै चीन, भारत, जापान, एसियाली विकास बैंक र रेडक्रसको अन्तर्राष्ट्रिय महासंघ (आईएफआरसी) बाट पनि सहयोगको प्रतिबद्धता प्राप्त भएको छ ।’ ‘प्रधानमन्त्री दैवी प्रकोप उद्धार कोषमा २ अर्ब ३४ करोड र गृह मन्त्रालयको कोषमा १ अर्ब १७ करोड रुपैयाँ मौज्दात छ । त्यसैले तत्काल राहत र उद्धारमा साधन–स्रोतको कमी हुने छैन,’ उनले थपे । प्रारम्भिक तथ्यांकअनुसार विपद्बाट २५ वटा पक्की पुल र निजी क्षेत्रका ७०० मेगावाट क्षमताका जलविद्युत आयोजनाहरूमा क्षति पुगेको छ । अर्थमन्त्री वाग्लेले २०७२ सालको भूकम्पपछिको पुनर्निर्माण जस्तै अहिले पनि वैज्ञानिक तथ्यका आधारमा पुनर्निर्माणको महाअभियान सञ्चालन गर्नुपर्ने आवश्यकता औंल्याए । अर्थमन्त्रीले राष्ट्रिय संकटको घडीमा सबै राजनीतिक दलहरू एकै ठाउँमा उभिने नेपाली राजनीतिको मौलिक चरित्रको प्रशंसा गरे । नवलपुर र चितवन लगायतका क्षेत्रमा भेटिएका शवहरूको व्यवस्थापन र बेपत्ताहरूको खोजी कार्यलाई सरकारले उच्च प्राथमिकतामा राखेको समेत उनले उल्लेख गरे ।
प्रहरीको आग्रह– फेसबुकमा राहतको नाममा पैसा मागेमा नदिनू
काठमाडौं । नेपाल प्रहरीले राहत कोषका नाममा सामाजिक सञ्जाल र अन्य डिजिटल माध्यमबाट स्क्याकम तथा दुरूपयोग हुने भएकाले नागरिकहरूलाई सचेत रहन आग्रह गरेको छ । ‘प्रधानमन्त्री दैवी प्रकोप उद्धार कोष’ वा ‘प्रधानमन्त्री राहत कोष’ को नाम प्रयोग गरेर व्यक्तिगत बैंक खाता वा ई–वालेटमा रकम माग्ने, आधिकारिक निकायको लोगो, नाम वा ढाँचा नक्कल गरी बनाइएका फर्जी क्यूआर कोड सामाजिक सञ्जालमा प्रसार गर्ने जस्ता स्क्यामका सम्भावित तरिकाहरू हुन सक्ने हुनाले त्यसप्रति सचेत रहन नेपाल प्रहरीले अनुरोध गरेको छ । यसैगरी, फेसबुक, ह्वाट्सएप, टिकटक, इन्स्टाग्राम, भाइबर लगायतका प्लेटफर्ममा फरक–फरक ‘राहत कोष’ वा ‘सहयोग अभियान’ का नाममा बनाइएका फर्जी पेज वा समूह सञ्चालन गर्ने, ‘राहत सहयोग दर्ता’ का नाममा फोन कल मार्फत व्यक्तिगत तथा बैंकिङ विवरण माग्ने, फिसिङ लिंक पठाई ओटीपी, पासवर्ड चोरी गर्ने, ‘म सुरक्षित छु, मलाई पैसा पठाइदिनू’ भनेर अपरिचित नम्बरबाट मेसेजहरू पठाई आर्थिक सहयोग माग्न सक्ने प्रहरीर्ले जनाएको छ । पैसा माग गर्ने प्रति सचेत रहन र कुनै पनि सहयोग रकम पठाउनुअघि सम्बन्धित कोषको खाता विवरण प्रधानमन्त्री तथा मन्त्रिपरिषद्को कार्यालयको आधिकारिक वेबसाइट वा प्रमाणित सामाजिक सञ्जाल पेज बाट मात्र पुष्टि गर्न प्रहरीले उल्लेख गरेको छ। अपरिचित व्यक्ति वा पेजबाट आउने क्यूआर कोड, लिंक वा खाता नम्बरमा तत्काल विश्वास नगर्न, कसैले फोन वा म्यासेजमार्फत बैंक खाता नम्बर, कार्ड विवरण, पिन वा ओटीपी माग्यो भने साझा नगर्न एवं अपरिचित व्यक्तिले सहयोग रकम माग गरेमा, पैसा पठाउनु अघि अनिवार्य रूपमा भिडियो कल गरेर वा प्रत्यक्ष फोन गरेर पुष्टि गर्न प्रहरीले नागरिकहरूलाई अनुरोध गर्दछ । कुनै पनि व्यक्ति वा समूहले विपद् राहतको नाममा स्क्याम गरेको वा गर्न खोजेको शंका लागेमा नजिकको प्रहरी कार्यालय वा साइबर ब्यूरोमा तुरुन्त सम्पर्क गर्न समेत अनुरोध गरिएको छ ।
भोटेकोशी बाढीपीडितका लागि नाडाको १० लाख सहयोग, अटो शो भने निरन्तर सञ्चालन हुने
काठमाडौं । नाडा अटोमोबाइल्स एसोसिएसन अफ नेपालले रसुवाको भोटेकोशी नदीमा आएको भीषण बाढीबाट प्रभावित नागरिकको उद्धार, राहत तथा पुनर्स्थापनाका लागि प्रधानमन्त्री दैवीप्रकोप राहत कोषमा १० लाख रुपैयाँ सहयोग गर्ने निर्णय गरेको छ । नाडाका अध्यक्ष सुरेन्द्रकुमार उप्रेतीले बिहीबार जारी गरेको विज्ञप्तिमा रसुवा, नुवाकोट, धादिङ, गोरखा र चितवनमा बाढीका कारण भएको ठूलो मानवीय तथा भौतिक क्षतिप्रति गहिरो दुःख व्यक्त गरिएको छ । बाढीमा ज्यान गुमाउनेहरूप्रति श्रद्धाञ्जली अर्पण गर्दै शोकसन्तप्त परिवारप्रति समवेदना र घाइतेहरूको शीघ्र स्वास्थ्यलाभको कामना गरिएको छ । नाडाले विपद्को यस घडीमा राज्यसँग काँधमा काँध मिलाएर उभिनु सबै नागरिकको साझा जिम्मेवारी भएको उल्लेख गर्दै देशभरका अटोमोबाइल व्यवसायीलाई एकजुट भएर उद्धार र राहत अभियानमा सहयोग गर्न आह्वान गरेको छ । विज्ञप्तिमा सुरक्षा निकाय, स्थानीय प्रशासन र सरकारी संयन्त्रले उद्धार तथा राहतमा देखाएको सक्रियताको प्रशंसा गरिएको छ । साथै प्रधानमन्त्री र गृहमन्त्रीले विपद् व्यवस्थापनका लागि गरेको समन्वय र निजी क्षेत्रलाई सहयोगका लागि गरेको आह्वानको स्वागत गर्दै नाडा सरकारसँग सहकार्य गर्न सधैं तयार रहेको जनाएको छ । नाडाले विपद्पछिको राहत तथा पुनरुत्थान अभियानलाई सहयोग पुर्याउन तत्काल प्रधानमन्त्री दैवीप्रकोप राहत कोषमा १० लाख रुपैयाँ आर्थिक सहयोग उपलब्ध गराउने निर्णय गरेको जनाएको छ । यसैबीच, महाविपद् नाडा अटो शो २०२६ सञ्चालन भइरहेकै बेला आएको उल्लेख गर्दै आर्थिक गतिविधिलाई निरन्तर चलायमान राख्न भृकुटीमण्डपमा जारी अटो शो पूर्वनिर्धारित कार्यक्रमअनुसार सञ्चालनमा रहने नाडाले स्पष्ट पारेको छ । नाडाले विपद्को सामना गर्न सरकार, निजी क्षेत्र, व्यवसायी र आम नागरिक सबैले आ–आफ्नो क्षेत्रबाट हातेमालो गर्नुपर्नेमा जोड दिएको छ ।
रसुवा बाढी : एनएमबि बैंकका ४ कर्मचारी सम्पर्कविहीन
काठमाडौं । रसुवामा आएको बाढीपछि एनएमबि बैंकाको टिमुरे शाखामा कार्यरत चार कर्मचारी सम्पर्कविहीन भएका छन् । बैंकका अनुसार भदौ १० गते बिहान करिब ८:४५ बजे टिमुरे आसपासमा आएको बाढीपछि शाखामा कार्यरत कर्मचारीहरू सम्पर्कविहीन भएका हुन् । सम्पर्कविहीन हुनेमा धर्मराज रिमाल, नवीन गौतम, सुभाष रावल र अर्जुन पण्डित रहेका छन् । उनीहरू सबै टिमुरे शाखामा कार्यरत कर्मचारी हुन् । बैंकले उनीहरूलाई कसैले देखेको, भेटेको वा अवस्थाबारे कुनै जानकारी प्राप्त गरेको भए तत्काल बैंकलाई जानकारी गराइदिन आग्रह गरेको छ ।
रसुवाको बाढीमा ५१७ विदेशी पर्यटक सम्पर्कविहीन
काठमाडौं । रसुवाको बाढीमा परेर ५१७ जना विदेशी पर्यटक सम्पर्कविहीन भएका छन् । नेपाल पर्यटन बोर्डका अनुसार अष्ट्रेलियाका ३५, जापानका ५, रसियाका ८, क्यानडाका २५, भारतका १७८, युक्रेनका ३५, बेलायतका ३३ र अमेरिकाका ६५ जना पर्यटकहरू रहेका छन् । त्यसैगरी, १२७ आन्तरिक पर्यटक सम्पर्कविहीन भएका छन् । बुधबार बिहान ९ बजे आएको बाढीले रसुवा, नुवाकोट, धादिङ र गोर्खामा क्षति पुर्याएको छ । नेपाल प्रहरीका अनुसार हालसम्म १ सय ६२ जनाको शव फेला परेको छ । २८ जना प्रहरीहरू सम्पर्कविहिन भएका छन् ।
चितवनबाट ७० शव संकलन, खोजी कार्य जारी
काठमाडौं । नारायणी नदीमा ७० वटा शव फेला परेको छ । रसुवाबाट बगेर गएको ७० वटा शव नारायणी नदीमा फेला परेको चितवनका सहायक प्रमुख जिल्ला अधिकारी चिरञ्जीवी शर्माले विकासन्युजलाई जानकारी दिए । उनका अनुसार संकलन गरिएका शवलाई विभिन्न अस्पतालमा सुरक्षित राखिएको छ । शवको पहिचान गर्ने तथा आवश्यक कानुनी प्रक्रिया पूरा गर्ने काम समेत अघि बढाइएको शर्माले जानकारी दिए । बुधबार बिहान ९ बजे आएको बाढीले रसुवा, नुवाकोट, धादिङ र गोर्खामा क्षति पुर्याएको छ । नेपाल प्रहरीका अनुसार हालसम्म १ सय ६२ जनाको शव फेला परेको छ । २८ जना प्रहरीहरू सम्पर्कविहिन भएका छन् ।
शेखर गोल्छाले बाढीपीडितका लागि १ करोड ५० लाख सहयोग गर्ने
काठमाडौं । उद्योगी शेखर गोल्छाले रसुवाको भोटेकोशी नदीमा आएको भीषण बाढीबाट प्रभावित नागरिकको उद्धार, राहत तथा मानवीय सहायता कार्यका लागि प्रधानमन्त्री दैवीप्रकोप उद्धार कोषमा १ करोड ५० लाख रुपैयाँ सहयोग गर्ने घोषणा गरेका छन् । गोल्छाले बिहीबार फेसबुकमार्फत बाढी प्रभावित क्षेत्रबाट आइरहेका तस्बिर र भिडियोले सबैलाई स्तब्ध र दुःखी बनाएको उल्लेख गर्दै विपद्मा ज्यान गुमाउनेका परिवारप्रति हार्दिक समवेदना व्यक्त गरेका छन् । उनले अझै पनि आफ्ना आफन्तको खोजीमा रहेका परिवारको पीडा र चिन्तामा आफूहरू साथमा रहेको बताएका छन् । उनले अहिलेको अवस्थामा सबैभन्दा ठूलो प्राथमिकता उद्धार, राहत र प्रभावित परिवार तथा समुदायसम्म आवश्यक सहयोग पुर्याउनु रहेको उल्लेख गरेका छन् । गोल्छाले विपद्को समयमा निजी क्षेत्र पनि सरकार र समुदायसँग हातेमालो गर्दै राहत तथा पुनर्स्थापनामा सक्दो योगदान दिनुपर्ने साझा जिम्मेवारी रहेको बताएका छन् । सोही प्रतिबद्धताअनुसार गोल्छा ग्रुपले बाढी प्रभावितहरूको उद्धार, राहत तथा मानवीय सहायता कार्यमा सहयोग पुर्याउन प्रधानमन्त्री दैवीप्रकोप उद्धार कोषमा १ करोड ५० लाख रुपैयाँ उपलब्ध गराउने घोषणा गरेको हो । गोल्छाले विपद्बाट प्रभावित सबै परिवार र समुदायप्रति गोल्छा ग्रुपको साथ र ऐक्यबद्धता रहने प्रतिबद्धता पनि व्यक्त गरेका छन् ।
बाढीपीडितको राहत र पुनर्स्थापनाका लागि एनसेल फाउन्डेसनले दियो १ करोड
काठमाडौं । रसुवाको भोटेकोशी नदीमा आएको भीषण बाढीबाट प्रभावित नागरिकको उद्धार, राहत तथा पुनर्स्थापनाका लागि एनसेल फाउन्डेसनले प्रधानमन्त्री दैवीप्रकोप उद्धार कोषमा १ करोड रुपैयाँ सहयोग गर्ने घोषणा गरेको छ । एनसेलले बुधबार जारी गरेको विज्ञप्तिअनुसार रसुवा, नुवाकोट, धादिङ, गोरखालगायत जिल्लामा आएको बाढीबाट ठूलो जनधनको क्षति भएको र प्रभावित समुदायलाई तत्काल राहत तथा पुनर्स्थापनाको आवश्यकता रहेकाले सरकारको आह्वानमा उक्त सहयोग गर्ने निर्णय गरिएको हो । कम्पनीले बाढीमा ज्यान गुमाउनेहरूप्रति श्रद्धाञ्जली व्यक्त गर्दै शोकसन्तप्त परिवारजनप्रति गहिरो समवेदना जनाएको छ । साथै बेपत्ता भएका तथा प्रभावित नागरिकको शीघ्र उद्धार, राहत र पुनर्स्थापनाको कामना गरेको छ । आर्थिक सहयोगसँगै एनसेलले बाढी प्रभावित क्षेत्रमा रहेका आफ्ना ग्राहकका लागि सञ्चार सेवामा पनि विशेष सहुलियत उपलब्ध गराएको छ । हिजोदेखि लागू हुने गरी प्रभावित क्षेत्रमा रहेका ग्राहकलाई तीन दिनका लागि निःशुल्क भ्वाइस सेवा, डेटा सेवा र १०० वटा एसएमएस उपलब्ध गराइएको कम्पनीले जनाएको छ । एनसेलका अनुसार यस सुविधाले प्रभावित नागरिकलाई आफ्ना परिवार, आफन्त तथा उद्धार र राहतमा खटिएका टोलीसँग सहज रूपमा सम्पर्कमा रहन सहयोग पुग्नेछ । एनसेलकी कर्पोरेट कम्युनिकेसन, मार्केटिङ तथा सस्टेनेबिलिटी डाइरेक्टर विशाखा लक्ष्मी खड्काले विपद्को कठिन घडीमा प्रभावित समुदायको साथमा उभिनु सबैको साझा जिम्मेवारी भएको बताइन् । उनले सरकार र सम्बन्धित निकायको उद्धार, राहत तथा पुनर्स्थापनाको प्रयासमा साथ दिन १ करोड रुपैयाँ सहयोग गर्ने निर्णय गरिएको भन्दै प्रभावित परिवार र समुदायसँग एनसेल सधैं साथमा रहेको उल्लेख गरिन् । एनसेलले विगतदेखि नै प्राकृतिक विपद्का समयमा उद्धार, राहत तथा पुनर्स्थापनाका अभियानमा सहयोग गर्दै आएको जनाउँदै आगामी दिनमा पनि प्रभावित समुदायको आवश्यकता अनुसार सहकार्य र सहयोगलाई निरन्तरता दिने प्रतिबद्धता व्यक्त गरेको छ ।
