रसुवा बाढीः २ सय ५८ जनाको शव फेला, ९ सय १० सम्पर्कविहीन
काठमाडौं । रसुवामा आएको बाढीका कारण हालसम्म २ सय ५८ जनाले ज्यान गुमाएका छन् । राष्ट्रिय विपद् जोखिम न्युनीकरण तथा व्यवस्थापन प्राधिकरणकी प्रवक्ता शान्ति महतका अनुसार बिहीवार दिउँसो २ बजेसम्म देशभर २ सय ५८ जनाको शव फेला परेको हो । यस्तै, ९ सय १० जना सम्पर्कविहीन रहेको उनले जानकारी दिइन् । उनका अनुसार चितवनमा सबैभन्दा धेरै १ सय ८ वटा शव फेला परेका छन् । नवलपरासी पूर्वमा ६२, धादिङमा २७, गोरखामा २०, नवलपरासी पश्चिममा १५, नुवाकोट र तनहुँमा १२–१२, तथा रसुवामा २ वटा शव फेला परेको उनले जानकारी दिइन् । यस्तै, नेपाल प्रहरीका २८, नेपाली सेनाका ४४, सशस्त्र प्रहरी बलका १३, भन्सार कार्यालयका १५ र अध्यागमन कार्यालयका ४ जना सम्पर्कविहीन छन् । रसुवाका अन्य १६१ जना नागरिक र नुवाकोटका एक जना पनि सम्पर्कविहीन रहेको तथ्यांक प्राप्त भएको उनले जानकारी दिइन् । उनका अनुसार बाढीका कारण ३५ देशका ५ सय १७ जना विदेशी नागरिक सम्पर्कविहीन रहेको तथ्यांकमा उल्लेख छ । नेपाल घुम्न आएका तर विदेशमा बसोबास गर्ने १ सय २७ जना नेपाली पनि सम्पर्कविहीन रहेको उनले जानकारी दिइन् । उनका अनुसार खोज तथा उद्धारका लागि नेपालका तीनवटै सुरक्षा निकायबाट ९ हजार २६० जना सुरक्षाकर्मी परिचालन गरिएको छ । नेपाल प्रहरीका ३ हजार ३१८, नेपाली सेनाका ४ हजार २ सय र सशस्त्र प्रहरी बलका १ हजार ७४२ जना सुरक्षाकर्मी फिल्डमा खटिएका छन् । प्रवक्ता महतका अनुसार बिहीबार दिउँसो २ बजेसम्म हेलिकप्टरमार्फत ३ सय ५१ जना प्रभावितको उद्धार गरिएको छ । उद्धारका लागि बिहीबार मात्रै ६९ वटा हवाई उडान भएको उनले जानकारी दिइन् । उद्धार गरिएकामध्ये ४६ जना विदेशी नागरिक समेत रहेका छन् । प्राधिकरणले प्रभावित क्षेत्रमा खोज तथा उद्धार कार्यलाई निरन्तरता दिइरहेको जनाएको छ । –न्युज एजेन्सी नेपाल
बाढी प्रभावितका लागि आइएमई लाइफको १ करोड सहयोग
काठमाडौं । आइएमई लाइफ इन्स्योरेन्स कम्पनी लिमिटेडले रसुवाको भोटेकोशी नदीमा आएको विनाशकारी बाढीबाट प्रभावित नागरिकको उद्धार, राहत तथा पुनर्स्थापनाका लागि प्रधानमन्त्री दैवीप्रकोप उद्धार कोषमा १ करोड रुपैयाँ सहयोग गर्ने घोषणा गरेको छ । कम्पनीले बिहीबार जारी गरेको विज्ञप्तिमा रसुवा, नुवाकोट, धादिङ, गोरखा र चितवनलगायत नदी तटीय क्षेत्रमा बाढीका कारण भएको ठूलो मानवीय तथा भौतिक क्षतिप्रति गहिरो दुःख व्यक्त गरेको छ । बाढी र डुबानका कारण सयौं नागरिकको ज्यान गएको, कैयौं बेपत्ता भएको तथा बस्ती र पूर्वाधारमा ठूलो क्षति पुग्दा सयौं परिवार विस्थापित हुनुपरेको उल्लेख गर्दै कम्पनीले प्रभावित नागरिकप्रति हार्दिक सहानुभूति व्यक्त गरेको छ । संस्थागत सामाजिक उत्तरदायित्वअन्तर्गत उपलब्ध गराइने १ करोड रुपैयाँ नेपाल सरकारमार्फत उद्धार, राहत र दीर्घकालीन पुनर्स्थापनाका कार्यमा परिचालन गरिने कम्पनीले जनाएको छ । कम्पनीले स्थापनाकालदेखि नै प्राकृतिक विपद्, महामारी र राष्ट्रिय संकटका बेला सहयोग गर्दै आएको उल्लेख गर्दै यसपटकको सहयोगले प्रभावित क्षेत्रको खोज तथा उद्धार, खाद्यान्न, स्वास्थ्य उपचार र पुनर्स्थापनामा टेवा पुग्ने विश्वास व्यक्त गरेको छ । आइएमई लाइफले बाढीमा ज्यान गुमाउनेहरूप्रति श्रद्धाञ्जली अर्पण गर्दै शोकसन्तप्त परिवारप्रति समवेदना व्यक्त गरेको छ । साथै बेपत्ता नागरिकको शीघ्र खोजी, घाइतेहरूको स्वास्थ्यलाभ र उद्धार तथा राहतमा खटिएका सुरक्षाकर्मी, स्वयंसेवक तथा सम्बन्धित निकायप्रति आभार व्यक्त गरेको छ ।
बाढी प्रभावित क्षेत्रमा दूरसञ्चार सेवा सुचारु गर्न जेनेरेटर र प्राविधिक टोली परिचालन
काठमाडौं । बाढीका कारण प्रभावित रसुवा, नुवाकोट र धादिङका विभिन्न क्षेत्रमा दूरसञ्चार सेवा सुचारु गर्न सञ्चार तथा सूचना प्रविधि मन्त्रालयले जेनेरेटर, इन्धन तथा प्राविधिक जनशक्ति परिचालन गरेको छ । रसुवाको न्यौपानेचौर र राम्चे रिपिटर साइटमा हेलिकप्टरमार्फत जेनेरेटर तथा ब्याट्री पठाएर आसपासका विभिन्न क्षेत्रमा दूरसञ्चार सेवा पुनः सञ्चालन गरिएको छ । त्यस्तै, धुन्चेमा जेनेरेटर, इन्धन तथा कर्मचारी परिचालन गरी सेवा सञ्चालनको व्यवस्था मिलाइएको छ। नुवाकोट र धादिङका मदनपुर, बट्टार, विदुर बसपार्क तथा बैरेनी–ठमेल डाँडालगायतका क्षेत्रमा पनि जेनेरेटर, इन्धन तथा प्राविधिक जनशक्ति परिचालन गरी सेवा सुचारु गर्ने काम जारी रहेको छ। महत्त्वपूर्ण दूरसञ्चार साइटहरूमा सेवा निरन्तर सञ्चालनका लागि आवश्यक जेनेरेटर, इन्धन र कर्मचारीको व्यवस्था गरिएको छ। साथै सञ्चालनमा रहेका मोबाइल नेटवर्क टावरमा नेटवर्क पहुँच, क्षमता वृद्धि तथा नेटवर्क व्यवस्थापन तथा सुधार गरी सेवा थप प्रभावकारी बनाइएको छ। यसैबीच बाढी तथा पहिरोबाट प्रभावित सेवाग्राहीलाई उपलब्ध गराइएको निःशुल्क दूरसञ्चार सुविधाको अवधि थप तीन दिन बढाइएको छ। अब भदौ १२, १३ र १४ गतेसम्म प्रभावित क्षेत्रमा फोन कल निःशुल्क हुनुका साथै प्रतिदिन २ जीबी डेटा इन्टरनेट र ५० वटा एसएमएस निःशुल्क उपलब्ध हुने व्यवस्था गरिएको छ। विपद्का कारण सञ्चार सम्पर्क प्रभावित भएका क्षेत्रमा उद्धार, राहत तथा समन्वयका लागि दूरसञ्चार सेवा महत्वपूर्ण हुने भएकाले नेटवर्कलाई यथाशीघ्र पूर्ण क्षमतामा सञ्चालन गर्ने प्रयास भइरहेको मन्त्रालयले जनाएको छ।
बाढी प्रभावित १५२ साइटमध्ये ९२ मा टेलिकम सेवा सञ्चालनमा
काठमाडौं । भोटेकोशी बाढी र पहिरोका कारण प्रभावित रसुवा, नुवाकोट, धादिङ र चितवनका विभिन्न क्षेत्रमा दूरसञ्चार सेवा पुनः सञ्चालनका लागि नेपाल टेलिकमले मर्मत तथा पुनःस्थापनाको काम तीव्र बनाएको छ । टेलिकमले बिहीबार जारी गरेको विज्ञप्तिअनुसार रसुवाका न्यौपानेचौर र राम्चे रिपिटर साइटमा हेलिकोप्टरमार्फत जेनेरेटर, ब्याट्री तथा अन्य आवश्यक उपकरण पुर्याएर सेवा सुचारु गरिएको छ । यसबाट न्यौपानेचौर र राम्चे आसपासका केस्पाङ (काउले), ठुलेगाउँ, तादी, फिकुरी, कालिकास्थान, ग्राङ, डाँडागाउँ, मैलुङ, पाङसाङ डाँडा, लाङटाङ र क्याङ्जिनलगायत क्षेत्रमा दूरसञ्चार सेवा सञ्चालनमा आएको कम्पनीले जनाएको छ । धुन्चेमा सेवा पुनः सञ्चालनका लागि पनि जेनेरेटर, इन्धन र प्राविधिक कर्मचारी परिचालन गरिएको टेलिकमले जनाएको छ । यस्तै, नुवाकोटको मदनपुर, बट्टार र विदुर बसपार्क तथा धादिङको बैरेनी र ठमेल डाँडामा पनि जेनेरेटर, इन्धन र प्राविधिक टोली परिचालन गरी सेवा सुचारु गर्ने काम भइरहेको छ । टेलिकमका अनुसार प्रभावित क्षेत्रमा प्राथमिकतामा राखिएका साइटलाई निरन्तर सञ्चालनमा ल्याउन आवश्यक उपकरण र जनशक्ति परिचालन गरिएको छ । साथै सञ्चालनमा रहेका अन्य बीटीएसमा कभरेज विस्तार, क्षमता वृद्धि र अप्टिमाइजेसनको काम पनि भइरहेको छ । बाढीबाट प्रभावित चार जिल्लाका कुल १५२ साइटमध्ये ९२ साइट सञ्चालनमा आइसकेका छन् भने ६० साइट अझै सञ्चालनमा आउन बाँकी छन् । चितवनका ५ मध्ये ३, धादिङका ३६ मध्ये १३, नुवाकोटका ७९ मध्ये ३१ र रसुवाका ३२ मध्ये १३ साइटमा सेवा पुनः सञ्चालन भएको टेलिकमले जनाएको छ । नेपाल टेलिकमले विपद्को समयमा नागरिकको सञ्चार आवश्यकतालाई सहज बनाउन सेवा निरन्तरता, पूर्वसूचना, सचेतना तथा आवश्यक प्राविधिक कार्यलाई उच्च प्राथमिकतामा राखेर काम गरिरहेको जनाएको छ ।
बाढीपीडितका लागि कालिका कन्स्ट्रक्सनको १ करोड १ लाख सहयोग
काठमाडौं । कालिका ग्रुपका अध्यक्ष एवं प्रबन्ध निर्देशक विक्रम पाण्डेले प्रधानमन्त्री दैवी प्रकोप उद्धार कोषमा १ करोड १ लाख रुपैयाँ सहयोग गरेका छन् । पाण्डे अध्यक्ष एवं प्रबन्ध निर्देशक रहेको कालिका कन्स्ट्रक्सन प्रालिले उक्त रकम बाढीपीडितको सहयोगार्थ उपलब्ध गराएको हो । पूर्वमन्त्रीसमेत रहेका पाण्डेले बिहीबार प्रधानमन्त्री दैवी प्रकोप उद्धार कोषमा सो रकम हस्तान्तरण गरेका हुन् । चीनको तिब्बततर्फबाट रसुवाको भोटेकोशी हुँदै त्रिशूली नदीमा आएको भीषण बाढीका कारण रसुवा, धादिङ, नुवाकोट, गोरखालगायत जिल्लामा भएको ठूलो मानवीय तथा भौतिक क्षतिप्रति पाण्डेले गहिरो दुःख व्यक्त गरेका छन् । उनले विपद्मा परी ज्यान गुमाएका नागरिकप्रति श्रद्धाञ्जली अर्पण गर्दै घाइतेहरूको शीघ्र स्वास्थ्यलाभको कामना गरेका छन् । पाण्डेले विपद्को यस कठिन घडीमा प्रभावित नागरिकको उद्धार, राहत तथा पुनःस्थापनाका लागि सबै पक्षबाट सहयोग र सहकार्य आवश्यक रहेको बताएका छन् ।
बाढीपीडितलाई रकम पठाउँदा डिजिटल कारोबारको सीमा नलाग्ने
काठमाडौं । बाढीपीडितलाई सहयोग पठाउँदा मोबाइल बैंकिङ तथा ई-मनीमार्फत हुने कारोबारमा अधिकतम सीमा लागू नहुने भएको छ । बाढीबाट प्रभावित नागरिकको राहत तथा उद्धारका लागि आर्थिक सहयोग पठाउँदा मोबाइल बैंकिङ, वेब एप्लिकेसन तथा ई-मनीमार्फत हुने कारोबारमा तोकिएको अधिकतम सीमा लागू नहुने नेपाल राष्ट्र बैंकले जनाएको हो । नेपाल सरकारबाट प्रधानमन्त्री दैवी प्रकोप उद्धार कोष र प्रधानमन्त्री राहत कोषमार्फत आर्थिक सहयोग परिचालन भइरहेको सन्दर्भमा राष्ट्र बैंकले यस्तो व्यवस्था गरेको हो । राष्ट्र बैंकका अनुसार संलग्न खातामा रकम पठाउँदा भुक्तानी प्रणालीसम्बन्धी एकीकृत निर्देशन, २०८२ को अ.प्रा. निर्देशन नं. ५/०८२ को बुँदा नं. २ र ३ मा उल्लेखित अधिकतम कारोबार सीमा लागू हुने छैन । राष्ट्र बैंकले सोहीबमोजिम आवश्यक व्यवस्था गर्न अनुमतिपत्र प्राप्त सबै संस्थालाई निर्देशन दिएको छ । यस व्यवस्थाले बाढी तथा डुबानबाट प्रभावित नागरिकका लागि राहत कोषमा डिजिटल माध्यमबाट आर्थिक सहयोग पठाउन सहज हुने अपेक्षा गरिएको छ ।
भोटेकोशी बाढी प्रभावितका लागि बीवाईडी र साइमेक्सको ७ करोड सहयोग
काठमाडौं । नेपालमा बीवाईडीका आधिकारिक वितरक साइमेक्स इंक प्रालिसँगको सहकार्यमा बीवाईडीले भोटेकोशी बाढीबाट प्रभावित रसुवालगायतका क्षेत्रमा राहत, पुनर्स्थापना र पुनर्निर्माणका लागि प्रधानमन्त्री दैवीप्रकोप उद्धार कोषमा ७ करोड रुपैयाँ सहयोग गर्ने घोषणा गरेको छ । बीवाईडी र साइमेक्सले बाढी प्रभावित समुदायप्रति ऐक्यबद्धता जनाउँदै उक्त सहयोग उपलब्ध गराउने निर्णय गरेको जनाएका छन् । सहयोग रकम प्रधानमन्त्री तथा मन्त्रिपरिषद्को कार्यालयमार्फत सरकारको आधिकारिक संयन्त्रबाट राहत तथा पुनर्स्थापनाका कार्यमा परिचालन गरिनेछ । कम्पनीका अनुसार उक्त सहयोगले प्रभावित क्षेत्रमा सञ्चालन भइरहेको उद्धार, उपचार, तत्काल राहत, पुनर्स्थापना तथा क्षतिग्रस्त पूर्वाधारको पुनर्निर्माणमा टेवा पुग्ने अपेक्षा गरिएको छ । यसबाट प्रभावित परिवारलाई सामान्य जीवनमा फर्किन र स्थानीय पूर्वाधार पुनर्निर्माणमा पनि सहयोग पुग्ने विश्वास व्यक्त गरिएको छ । हालैको बाढीले रसुवा जिल्लामा ठूलो जनधनको क्षति पुर्याएको छ । नेपाल–चीन व्यापारको प्रमुख नाका रहेको रसुवा बीवाईडीका विद्युतीय सवारीसाधन नेपाल भित्रिने महत्वपूर्ण व्यापारिक मार्गसमेत भएकाले यस क्षेत्रको विशेष महत्व रहेको कम्पनीले जनाएको छ । बीवाईडी समूहका उपाध्यक्ष तथा बीवाईडी एसिया प्रशान्त अटो बिक्री विभागका महाप्रबन्धक लिउ स्युएलियाङले नेपालमा आएको बाढीबाट भएको क्षति र नागरिकले भोग्नुपरेको कठिन अवस्थाप्रति गहिरो दुःख व्यक्त गरेका छन् । उनले प्रभावित परिवार, उद्धारमा खटिएका टोली र घटनास्थलमा काम गरिरहेका सबैप्रति बीवाईडीको सहानुभूति र ऐक्यबद्धता रहेको बताएका छन् । लिउले स्थानीय साझेदार साइमेक्ससँगको सहकार्यमा गरिएको सहयोगले सरकारको राहत तथा पुनर्स्थापनाको अभियानमा योगदान पुग्ने विश्वास व्यक्त गरे । उनले सामूहिक प्रयास र एकतामार्फत प्रभावित समुदाय अझ बलियो भएर पुनःउभिने विश्वास पनि व्यक्त गरेका छन् । साइमेक्सले नेपालमा दिगो विद्युतीय यातायातको विस्तारका लागि बीवाईडीसँग लामो समयदेखि सहकार्य गर्दै आएको उल्लेख गर्दै विपद्को कठिन समयमा देश र जनतासँग उभिने साझा प्रतिबद्धताका रूपमा यो सहयोगलाई लिइएको जनाएको छ । बीवाईडी र साइमेक्सले विपद्पछिको राहत, पुनर्स्थापना र पुनर्निर्माणमा सामूहिक प्रयासको महत्वलाई जोड दिँदै प्रभावित परिवार र समुदायको शीघ्र पुनःउत्थान तथा पुनर्निर्माणको काम सफलतापूर्वक अघि बढ्ने विश्वास व्यक्त गरेका छन् ।
बाढी प्रभावितलाई थप तीन दिन निःशुल्क २ जीबी डाटा, भ्वाइस कल र ५० एसएमएस
काठमाडौं । नेपाल टेलिकमले भोटेकोशी बाढीबाट प्रभावित क्षेत्रका सेवाग्राहीलाई उपलब्ध गराउँदै आएको निःशुल्क भ्वाइस कल, डाटा र एसएमएस सुविधा थप तीन दिनका लागि विस्तार गरेको छ । कम्पनीले बिहीबार जारी गरेको विज्ञप्तिअनुसार अब उक्त सुविधा भदौ १२, १३ र १४ गतेसम्म उपलब्ध हुनेछ । यसअघि नेपाल टेलिकमले रसुवा र आसपासका प्रभावित क्षेत्रका सेवाग्राहीका लागि दुई दिन निःशुल्क भ्वाइस कल, प्रतिदिन २ जीबी डाटा र ५० वटा एसएमएस उपलब्ध गराउने निर्णय गरेको थियो । टेलिकमले भोटेकोशी र त्रिशूली नदीको बहाव तीव्र रूपमा बढिरहेका कारण रसुवा, नुवाकोट, धादिङ, गोरखा र चितवनलगायत नदी आसपासका क्षेत्रमा बसोबास गर्ने नागरिकलाई उच्च सतर्कता अपनाउन र सुरक्षित स्थानमा जान आग्रह गरेको जनाएको छ । प्रभावित क्षेत्रका सेवाग्राहीलाई एसएमएसमार्फत पनि सचेतनामूलक सूचना पठाइएको कम्पनीले जनाएको छ । विपद्को कठिन परिस्थितिमा प्रभावित नागरिकले आफ्ना आफन्त, उद्धार तथा राहतकर्मी र सम्बन्धित निकायसँग सहज रूपमा सम्पर्क गर्न सकून् भन्ने उद्देश्यले निःशुल्क सञ्चार सुविधा उपलब्ध गराइएको टेलिकमले जनाएको छ । बाढीका कारण कम्पनीका विभिन्न दूरसञ्चार संरचनामा क्षति पुगे पनि सेवा यथासम्भव नियमित राख्न र प्रभावित संरचनाको मर्मत–सम्भार गर्न प्राविधिक टोली निरन्तर परिचालित रहेको कम्पनीले जनाएको छ । नेपाल टेलिकमले विपद्को समयमा सेवा निरन्तरता, पूर्वसूचना, सचेतना र आवश्यक प्राविधिक सहयोगलाई उच्च प्राथमिकतामा राख्दै प्रभावित नागरिकको सञ्चार आवश्यकतालाई सहज बनाउने प्रयास जारी रहेको जनाएको छ ।
