सिद्धार्थ क्यापिटललाई आइएसओ ९००१:२०१५ प्रमाणपत्र
काठमाडौं । नेपालमा मर्चेन्ट बैंकिङ तथा फन्ड व्यवस्थापन क्षेत्रमा सक्रिय सिद्धार्थ क्यापिटल लिमिटेडले गुणस्तर व्यवस्थापन प्रणालीसम्बन्धी अन्तर्राष्ट्रिय मान्यता प्राप्त आइएसओ ९००१:२०१५ प्रमाणपत्र प्राप्त गरेको छ । अष्ट्रेलिया तथा न्युजिल्यान्डको जोइन्ट एक्रेडिटेशन सिस्टमबाट मान्यता प्राप्त मुम्बईस्थित इन्टरनेशनल सर्टिफिकेशन सर्भिसेस प्रा.लि.ले उक्त प्रमाणपत्र प्रदान गरेको कम्पनीले जनाएको छ । कम्पनीका अनुसार प्रमाणपत्रले संस्थाको सञ्चालन प्रक्रियामा उच्च गुणस्तर, कार्यदक्षता तथा ग्राहक सन्तुष्टि कायम गर्ने प्रतिबद्धतालाई पुष्टि गरेको छ । साथै, आन्तरिक प्रणाली सुदृढ गर्ने, सेवा प्रवाहमा एकरूपता कायम गर्ने तथा संस्थागत कार्यसम्पादनलाई अझ प्रभावकारी बनाउने लक्ष्यलाई समेत यसले प्रतिबिम्बित गरेको छ । यस उपलब्धिबारे कम्पनीका प्रमुख कार्यकारी अधिकृत सन्दीप कार्कीले आइएसओ ९००१:२०१५ प्रमाणपत्र प्राप्त गर्नु कम्पनीका लागि महत्वपूर्ण कोशेढुंगा भएको बताएका छन् । उनले ग्राहक तथा सरोकारवालालाई भरपर्दो र उच्च गुणस्तरका वित्तीय सेवा प्रदान गर्ने प्रतिबद्धता यसबाट थप सुदृढ भएको उल्लेख गरे । आइएसओ ९००१:२०१५ प्रमाणपत्र प्रक्रिया सुधार, जोखिम व्यवस्थापन तथा निरन्तर सुधारजस्ता अन्तर्राष्ट्रिय गुणस्तर मापदण्ड पूरा गर्ने संस्थालाई प्रदान गरिन्छ । सिद्धार्थ क्यापिटल लिमिटेडले मर्चेन्ट बैंकिङअन्तर्गत इश्यु व्यवस्थापन, अन्डरराइटिङ, सेयर रजिस्ट्रार, पोर्टफोलियो व्यवस्थापन तथा कर्पोरेट परामर्श सेवा, साथै फन्ड व्यवस्थापन, डिपोजिटरी र डिपोजिटरी पार्टिसिपेन्ट सेवा प्रदान गर्दै आएको छ । कम्पनीले नेपाली पूँजी बजारमा स्वदेशी तथा अन्तर्राष्ट्रिय उत्कृष्ट अभ्यास अवलम्बन गर्दै मूल्यआधारित वित्तीय समाधान प्रदान गर्ने प्रतिबद्धता जनाएको छ ।
अवैध शुल्क लिने निजी विद्यालयमाथि मन्त्रालयको डण्डा, कारबाहीका लागि गृहसँग समन्वय
काठमाडौं । शिक्षा, विज्ञान तथा प्रविधि मन्त्रालयले गैरकानुनी रूपमा संकलन गरिएको शुल्क विद्यार्थीलाई फिर्ता गर्न निर्देशन दिएको छ । मन्त्रालयले बुधबार (आज) विज्ञप्ति जारी गर्दै देशका केही संस्थागत विद्यालयले अझै पनि कानुन विपरीत शुल्क लिइरहेको गुनासो आएको भन्दै गैरकानुनी रूपमा लिएको शुल्क फिर्ता गर्न सम्बन्धित सबैलाई निर्देशन दिएको हो। मन्त्रालयले कुनै पनि विद्यालयले यो निर्देशनभन्दा अन्यथा गरेको पाइएमा सोही ऐनको प्रावधान तथा अन्य प्रचलित कानुन बमोजिम थप कारवाही प्रकृया अगाडि बढाउनुपर्ने अवस्थामा गृह मन्त्रालय, सम्बन्धित जिल्ला प्रशासन कार्यालयहरू र स्थानीय तहहरूबाट आवश्यक समन्वय हुन अनुरोध गरेको छ । साथै, विद्यार्थीको शुल्कासम्बन्धी सिकायत एवम् गुनासोको रिपोर्टिङ तथा सहजीकरण प्रयोजनका लागि शिक्षा तथा मानवस्रोत विकास केन्द्रमा सहायता कक्ष (हेल्प डेस्क) स्थापना गरिएको मन्त्रालयले जनाएको छ । कसैको सिकायत वा गुनासो भएमा सोही कक्षमा फोन गरी थप साथै, विद्यार्थीको शुल्कसम्बन्धी सिकायत एवम् गुनासोको रिपोर्टिंङ तथा सहजीकरणसहायता प्राप्त गर्न सकिने र सो कक्षको सम्पर्क व्यक्ति केन्द्रका निर्देशक निमप्रकाश सिंह राठौर (फोन ९८५१२१४६३८) मा सम्पर्क गर्न सकिने मन्त्रालयले विज्ञप्तिमा उल्लेख गरेको छ। मन्त्रालयले यसअघि यही चैत २२ गते विज्ञप्ति मार्फत केही संस्थागत विद्यालयहरूले प्रचलित कानुन तथा सर्वोच्च अदालतको आदेश विपरीत हुनेगरी शैक्षिक सत्र २०८३ प्रारम्भ हुनुपूर्व नै विद्यार्थी भर्ना गर्ने र स्वीकृत मापदण्डभन्दा बढी भारी शुल्क असुली गरेको पाइएकोमा गम्भीर ध्यानाकर्षण भएको जनाउँदै नयाँ शैक्षिक सत्र प्रारम्भ भएपछि मात्र विद्यार्थी भर्ना गर्न गराउन आग्रह गरेको थियो । मन्त्रालयले कुनै पनि विद्यालयबाट यस्ता गैरकानुनी काम हुन नदिई अभिभावकहरूबाट कानुन विपरीत ढङ्गले असुल गरिएको भर्ना शुल्क रकम सम्बन्धितलाई फिर्ता गराउने कानुनी प्रक्रिया अगाडि बढाउन सम्बन्धित सबै स्थानीय तहहरूलाई अनुरोध पनि गरेको थियो ।
प्रभु बैंक र फिस टेल लज पोखरासहित दुई होटलबीच छुट सम्झौता
पोखरा । लेकसाइड पोखरास्थित फिस टेल लज पोखरा तथा अन्नपूर्णा जगतपुर लज प्रा.लि. र प्रभु बैंक लिमिटेडबीच छुट प्रदान गर्ने सम्बन्धी समझदारीपत्रमा हस्ताक्षर भएको छ । बुधबार आयोजित कार्यक्रममा प्रभु बैंकका तर्फबाट चिफ मार्केटिङ अफिसर दिपेन्द्र बाबु बिष्ट तथा फिस टेल लज पोखरा र अन्नपूर्णा जगतपुर लज प्रा.लि.का तर्फबाट बिक्री तथा मार्केटिङ क्लस्टर निर्देशक सनीस महर्जनले सम्झौतापत्रमा हस्ताक्षर गरी आदान–प्रदान गरेका हुन् । सम्झौताअनुसार प्रभु बैंकका ग्राहक तथा कर्मचारीहरूले उक्त लजहरूबाट उपलब्ध सेवा तथा सुविधामा विशेष छुट प्राप्त गर्नेछन् । छुट सुविधा लिन बैंकको डेबिट कार्ड, क्रेडिट कार्ड वा बैंकका अन्य विद्युतीय भुक्तानी प्रणालीमार्फत बिल भुक्तानी गर्नुपर्ने व्यवस्था गरिएको छ । यस सहकार्यअन्तर्गत आवासतर्फ विशेष संस्थागत छुटका साथै खाना तथा पेय पदार्थमा १० देखि १५ प्रतिशतसम्म छुट प्रदान गरिने जनाइएको छ । प्रभु बैंकले देशभर रहेका ३१२ शाखा कार्यालय, २८५ एटीएम तथा ६८ एक्सटेन्सन काउन्टरमार्फत करिब ३६ लाखभन्दा बढी ग्राहकलाई ‘विश्वास लिन्छौं, विश्वास दिन्छौं’ भन्ने मूल नारासहित बैंकिङ तथा वित्तीय सेवा प्रदान गर्दै आएको छ ।
एनसेलको इन्टरनेट र डेटा प्याकको शुल्क ६५ प्रतिशतले घट्यो, अब ६९९ रुपैयाँमा नै पाइने
काठमाडौं । एनसेलले कल र इन्टरनेट सेवाको शुल्क आक्रामक रुपमा घटाउँदै आफ्ना प्रिपेड ग्राहकहरूका लागि आकर्षक अनलिमिटेड कम्बो प्याक सञ्चालनमा ल्याएको छ । नयाँ वर्ष २०८३ को अवसर पारेर सञ्चालनमा ल्याइएको यस प्याकमा अनलिमिटेड डेटा, अनलिमिटेड कल, र प्रशस्त एसएमएस सेवालगायत आकर्षक सुविधाहरु रहेको छन् जसले ग्राहकहरुलाई २८ दिनसम्म ढुक्क रहन मद्दत गर्दछ । कम्पनीले यसअघि प्रदान गर्दै आएको १९९९ रुपैयाँको कम्बो अनलिमिटेड कल र इन्टरनेट सेवाको तुलनामा यो प्याकमा पाइने उही सेवाहरुको मुल्य ६५ प्रतिशतले घटेको छ । कर सहित ६९९ रुपैयाँ शुल्क पर्ने यो कम्बो प्याकको समयावधी २८ दिन रहेको छ । कुनै पनि नेटवर्कमा अनलिमिटेड कल गर्न सकिने, अनलिमिटेड डेटा, दैनिक १०० एसएमएस र लायन्स गेट प्लेमा निःशुल्क पहुँच यो प्याकका मुख्य विषेशताहरु हुन् । ग्राहकले सजिलै एस्ट्रिक्स१२३ह्यास डायल गरी यो प्याक लिन सक्छन् । त्यसैगरी एनसेल एप वा नजिकैको एनसेल सेन्टर वा एनसेल पसलबाट पनि यो प्याक लिन सकिन्छ । 'कनेक्टिभिटीको महत्व र दूरसञ्चार सेवाप्रतिको बढ्दो मागलाई ध्यानमा राख्दै, नयाँ वर्ष २०८३ को अवसर पारेर, हामीले अनलिमिटेड डेटा र कलसहितको यो प्याक सञ्चालनमा ल्याएका छौं । यो विशेष प्याकले सेवाको लागत थप घटाउँदै ‘बेस्ट भ्यालु’ प्रदान गर्दछ र ग्राहकहरूको जीवनलाई नन् स्टप र डिजिटल बनाउँदै सधैं अन रहन सहयोग पुर्याउने विश्वास लिएका छौं,' एनसेलका चीफ कन्सुमर बिजनेस अफिसर उपाङ्ग दत्ताले भने । नेपाली उपभोक्ताहरूलाई सशक्त बनाउने आफ्नो प्रतिबद्धता जारी राख्दै यो प्याक सञ्चालनमा ल्याएको र यसले विभिन्न सेवा सुविधाहरु अनलाईनबाटै उपलब्ध गराउने सरकारको योजनामा मद्दत गर्ने दत्ताले बताए । अनलाइनमार्फत कारोबार, किनमेल, वर्क फ्रम होम, पढाई, गेमिङ्ग वा मनोरञ्जन सबैका लागि डेटा सेवाको महत्व धेरै रहन्छ । यो प्याकले मनोरञ्जनाका लागि ग्राहकहरुलाई लायन्स गेट प्लेका विभिन्न प्रकारका सामग्रीहरूमा पहुँच सुनिश्चित गर्दछ । यसमा हलिउडका हिट फिल्महरु देखि लिएर, टिभी सोहरु, लायन्स गेट व्यानरमा बनेका ओरिजिनल कन्टेन्टहरु, वृत्तचित्रहरु लगायतका सामाग्रीहरु रहेका छन् जसले ग्राहकहरुलाई भरपुर मनोरञ्जन प्रदान गर्दछ । लायन्स गेट प्ले एप गुगल प्ले स्टोर, एप्पल एप स्टोर साथै एमेजोन फायर टिभी स्टिकमार्फत डाउनलोड गर्न सकिन्छ ।
सिंहदरबारमा प्रधानमन्त्री शाहले गरे १७ देशका राजदूतसँग सामूहिक संवाद
काठमाडौं । प्रधानमन्त्री बालेन्द्र शाहले नेपालस्थित विभिन्न देशका राजदूत तथा कूटनीतिक नियोगका प्रमुखहरूसँग बुधबार (आज) सामूहिक रूपमा संवाद गरेका छन् । प्रधानमन्त्री तथा मन्त्रिपरिषद्को कार्यालय, सिंहदरबारमा प्रधानमन्त्री शाहले उनीहरूसँग संवाद गरेका हुन् । भारत, पाकिस्तान, कोरिया गणराज्य, बेलायत, कतार, स्विट्जरल्यान्ड, फ्रान्स, इजरायल, जापान, बङ्गलादेश, जर्मनी, इजिप्ट, श्रीलङ्का, साउदी अरेबिया, चीन, संयुक्त राज्य अमेरिका र संयुक्त राष्ट्र सङ्घका राजदूत र नियोग प्रमुखहरूको उपस्थिति रहेको थियो । राजदूत एवं नियोग प्रमुखहरूले प्रधानमन्त्री शाहलाई बधाई दिँदै सफल कार्यकालका लागि शुभकामना व्यक्त गरे। उनीहरूले नेपाली जनताको हितमा परिणाम दिने गरी नेपाल सरकारका कार्यहरूमा समर्थन र सहयोगको प्रतिबद्धतासमेत व्यक्त गरे । प्रधानमन्त्री शाहले नेपालको सन्तुलित र व्यावहारिक परराष्ट्र नीतिलाई दोहोर्याउँदै छिमेकी, मित्र राष्ट्र र विकास साझेदारहरूसँग विश्वास, पारस्परिक सम्मान र साझा समृद्धिमा आधारित सम्बन्धलाई अझ प्रगाढ बनाउनुपर्ने आवश्यकतामा जोड दिए । उनले शान्ति साझा प्राथमिकता हुनुपर्ने भन्दै नेपाली श्रमिक तथा विदेशमा रहेका नेपाली समुदायको सुरक्षा र हित सरकारको उच्च प्राथमिकतामा रहेको बताए । प्रधानमन्त्री शाहले सुशासन, आर्थिक विकास र नेपाली जनताको जीवनस्तर सुधारमा सरकारको दृढ प्रतिबद्धता व्यक्त गरे । सो अवसरमा परराष्ट्रमन्त्री शिशिर खनाल, प्रधानमन्त्रीका राजनीतिक सल्लाहकार असीम शाह, मुख्यसचिव सुमनराज अर्याल, परराष्ट्र सचिव अमृतबहादुर राई र अन्य सरकारी अधिकारीहरूको पनि उपस्थिति रहेको थियो।
चैत २७ मा उपसभामुखको निर्वाचन हुने, प्रक्रिया औपचारिक रूपमा अगाडि बढ्यो
काठमाडौं । प्रतिनिधिसभाको उपसभामुख पदका लागि यही चैत २७ गते निर्वाचन हुने भएको छ । बुधबार बसेको प्रतिनिधिसभाको बैठकमा सभामुख डोलप्रसाद अर्यालले उक्त मिति औपचारिक रूपमा घोषणा गरेका हुन् । सभामुख अर्याल स्वयं भने चैत २२ गते सम्पन्न निर्वाचनबाट निर्विरोध निर्वाचित भएका थिए । उनको एकल उम्मेदवारी परेपछि प्रतिस्पर्धा बिना नै सभामुखमा चयन भएका हुन् । प्रतिनिधिसभा नियमावलीको नियम ७ अनुसार सभामुख चयन भइसकेपछि उपसभामुखको निर्वाचन प्रक्रिया अगाडि बढाइने प्रावधान छ । सोही व्यवस्थाअनुसार अब उपसभामुख चयन प्रक्रिया तीव्र बनेको हो ।
नयाँ वर्ष नजिकिएसँगै होटलहरूले सार्वजनिक गरे आकर्षक प्याकेज
काठमाडौं । नयाँ वर्ष २०८३ नजिकिँदै गर्दा नेपालका विभिन्न होटल तथा रिसोर्टहरूले आकर्षक ‘न्यु इयर प्याकेज’ सार्वजनिक गर्न थालेका छन् । विशेषगरी परिवार, जोडी तथा घुमफिर गर्न चाहनेहरूलाई लक्षित गर्दै बसाइँ, खाना, मनोरञ्जन र अतिरिक्त सुविधासहितका प्याकेज ल्याइएका हुन् । दुषित प्रिन्स होटल काठमाडौंको लाजिम्पाटमा अवस्थित पाँचतारे होटल दुषित प्रिन्सले नयाँ वर्ष लक्षित ‘न्यु इयर इभ’ अफर सार्वजनिक गरेको छ । प्रतिव्यक्ति ३ हजार ४९९ मा होटलले बफेट डिनर, पेयपदार्थसहित विभिन्न सुविधाहरू समावेश गरेको छ । होटलका अनुसार न्यु इयर इभ बेलुका सात बजेपछि सुरु हुने छ । लाइफ म्युजिक, किवु स्काई लाउन्ज, एसएओआइर्ए र स्टे प्याकेजहरू उपलब्ध छन् । साथै वेवभरेजमा २० प्रतिशत डिस्काउन्ट हुने जनाएको छ । होटेल ले हिमालय लाजिम्पाटमा रहेको होटल ले हिमालयले नयाँ वर्षलाई लक्षित गरेर नयाँ अफर सार्वजनिक गरेको छ । नयाँ वर्षलाई उल्लास र थप उत्साहित बनाउनका लागि होटलले न्यु ईयर इभको दिन ६ हजार रुपैयाँमा ब्रेकफास्ट, र वेलकम डिंक समावेश गरिएको छ । र्याडिसन होटल लाजिम्पाटमै रहेको र्याडिसन होटलले पनि न्यु ईयर इभ प्याकेज सार्वजनिक गरेको छ । होटलले प्रतिव्यक्ति ३ हजार ९९९ रुपैयाँ र प्रतिजोडी ७ हजार ४९९ रुपैयाँमा ल्याभिस बफेड डिनरसहित विभिन्न सेवाहरु उपलब्ध हुने जनाएको छ । होटलका अनुसार उक्त प्याकेजभित्र लाइभ म्युजिक, स्नाक्स एण्ड डिर्जट काउन्टर, वान राउण्ड कक्टेल/मक्टेल समावेश गरिएको छ । त्यस्तै, वेभरेजमा २० प्रतिशत र ५ देखि १२ वर्षसम्मका बच्चाहरुको लागि ५० प्रतिशत छुट प्रदान गरेको छ । लेमन ट्री बुढानीलकण्ठमा रहेको पाँचतारे होटल लेमन ट्री प्रिमियर होटलले ‘न्यु इयरर्स इभ गाला एण्ड स्टे’ प्याकेज ल्याएको छ । इभ गाला डिनर एण्ड स्टेको प्रति जोडी १८ हजार ९९९ र डिनर एण्ड स्टेको लागि मात्रै हो भने प्रति जोडी १५ हजार ४९९ तोकिएको छ । यी दुवै प्याकेजमा ब्रेकफास्ट पनि समावेश गरिएको छ । त्यस्तै, होटलले नयाँ वर्षको दिन न्यु ईयर ब्रञ्च प्याकेज ल्याएको छ । उक्त दिन होटलले प्रति व्यक्ति २ हजार ४९९ मा वेलकम ड्रिक, ल्याभिस बफेट ब्रञ्च र लाइभ काउन्टरर्समा पेयपदार्थमा १५ प्रतिशत छुट प्रदान गरेको छ । होटल मनाङ ठमेलमा रहेको चारतारे होटल होटल मनाङले न्यु इयर इभ कार्यक्रम सार्वजनिक गरेको छ । होटलले लाइभ म्युजिक, नेपाली कल्चरल सो आयोजना गर्ने भएको छ । उक्त कार्यक्रममा आउने पाहुनाले प्रतिव्यक्ति २ हजारस ९९० रुपैयाँ तिर्नुपर्ने हुन्छ । टिकट अनलाइनबाट समेत बुकिङ गर्न सकिने होटलले जनाएको छ । त्यस्तै, कार्यक्रम अवधिभरि अललिमिटेड स्नाक्स र बफेट डिनर हुने छ । त्यस्तै, डिनर पनि समावेश छ । माउन्टेन ग्लोरी फरेस्ट रिसोर्ट पोखरास्थित माउन्टेन ग्लोरी फरेस्ट रिसोर्टले नयाँको अवसर पारेर विभिन्न प्याकेजहरू ल्याएको छ । नयाँ वर्षको पूर्वसन्ध्याका लागि प्रतिव्यक्ति ४ हजार ५०० रुपैयाँको विशेष प्याकेज सार्वजनिक गरेको छ । यस प्याकेजमा एक रात बसाइँ, विशेष पूर्वसन्ध्या डिनर र बुफे ब्रेकफास्ट समावेश छन् । साथै अतिथिहरूले इनडोर खेलहरू, स्विमिंग पूल, स्टीम, सौना र ज्याकुजी जस्ता सुविधाहरूको पनि उपयोग गर्न सक्नेछन् । त्यसैगरी, नयाँ वर्षको दिन ‘फ्यामिली डे प्याकेज’ अन्तर्गत प्रतिव्यक्ति १ हजार ९९९ रुपैयाँको व्यवस्था गरिएको छ । यस प्याकेजमा लाइभ संगीत तथा डिजे, स्विमिङ पूल पहुँच, अनुहार चित्रकला, घोडा सवारी र बालबालिकाका लागि खेल क्षेत्र जस्ता आकर्षक गतिविधिहरू समावेश छन् । रिसोर्टले थप सुविधा स्वरूप नयाँ वर्षको ब्रन्च १ हजार ५०० रुपैयाँमा एड–अनको रूपमा उपलब्ध गराउने जनाएको छ । साथै समूहमा आउने पाहुनाका लागि पिकअप तथा ड्रप सेवा समेत उपलब्ध गराइनेछ । चन्द्रगिरी हिल्स चन्द्रागिरी हिल्स रिसोर्टले नयाँ वर्षको पूर्वसन्ध्यालाई लक्षित गरेर अकोमोडेसन प्याकेजसहित विभिन्न अफर सार्वजनिक गरेको छ । रिर्सोटले नयाँ वर्ष पूर्वसन्ध्यामा आउने पाहुनाहरूलाई होटल रुममा विशेष छुट आफर ल्याएको हो । रिर्सोटले स्टान्डर्ड डबल रुमको २१ हजार ९९९, डिलक्स डबल रुमको २२ हजार ९९९ र एक्जुक्युटिभ डबल रुमको २३ हजार ९९९ रुपैयाँ सार्वजनिक गरेको छ । यसबाहेक अन्य सेवाहरुमा पाहुनालाई स्वागत स्वरुप वेलकम ड्रिंक, राउन्ड–ट्रिप केबल कार सवारी, लाइभ म्युजिक, बीबीक्यू स्न्याक्स र गाला डिनरको व्यवस्था गरिएको छ । त्यस्तै, भोलि बिहान बुफे ब्रेकफास्ट स्प्रेड, विशेष खालका जस्तै बिलियड्र्स, ब्याडमिन्टनजस्ता गेमहरू पाहुनाहरूको लागि सार्वजनिक गरेको छ । त्यस्तै, स्पा सेवाहरूमा २० प्रतिशत छुट दिएको रिर्सोटले जनाएको छ। मनकामना हिलक्रेस्ट रिसोर्ट उपत्यका बाहिर अर्थात मनकामनामा अवस्थित मनकामना हिलक्रेस्ट रिसोर्टले ‘वान नाइट स्टे’ नयाँ प्याकेज सार्वजनिक गरेको छ । रिर्सोटले प्रति जोडी १५ हजार ९९९ रुपैयाँ (करसहित) ल्याइएको उक्त अफरमा बसाइ, खानपान, मनोरञ्जनदेखि धार्मिक पर्यटनसम्म समेटिएको छ । रिर्सोटका अनुसार पहिलो दिन पर्यटकलाई स्वागतस्वरूप वेलकम ड्रिंक प्रदान गरिनेछ भने बसाइ अवधिभर विभिन्न मनोरञ्जनात्मक कार्यक्रमहरू राखिएको छ । मनोरञ्जनात्मक प्याकेजअन्तर्गत बिङ्गो, राफेल ड्र, डिजे डान्स फ्लोरसहितको, लाइभ म्युजिक, विभिन्न खेलकुद गतिविधि तथा मगर कल्चरल कौरा सांस्कृतिक नृत्य जस्ता कार्यक्रम समावेश गरिएको छ । यो प्योकेजभित्र पाहुनाहरूका लागि एक ककटेल/मक्टेल निःशुल्क उपलब्ध गराइनेछ । साथै बफेट डिनरको व्यवस्था गरिएको छ । भोलिपल्ट बिहान अर्थात नयाँ वर्षको दिन ११ बजेसम्म फुल इंग्लिस वा कन्टिनेन्टल बफेट ब्रेकफास्टको सुविधा समेत प्याकेजमा समावेश गरिएको होटलले जनाएको छ। प्याकेजको अर्को आकर्षणका रूपमा मनकामना केवलकारको दुईतर्फी टिकट प्रदान गरिएको छ । नयाँ वर्षको दिन खानपानमा १० प्रतिशत छुट दिएको रिर्सोटले जनाएको छ । त्यस्तै, अर्ली बर्ड अफर तथा जिम, स्विमिङ पुल, साउना र स्टीमको सुविधा पनि उपलब्ध गराएको छ । रिसोर्टका अनुसार यही प्याकेजअन्तर्गत परिवारसहित बस्न आउँदा १० वर्षभन्दा मुनिका बच्चाका लागि प्रति बच्चा ३ हजार रुपैयाँ अतिरिक्त शुल्क लाग्नेछ । त्यस्तै, १० वर्षभन्दा माथिका एडल्टका लागि प्रतिव्यक्ति ६ हजार रुपैयाँ शुल्क लाग्ने होटलले जनाएको छ । कान्तिपुर भिलेज होटल नयाँ वर्ष २०८३ लाई लक्षित गर्दै कान्तिपुर भिलेज बुटिक होटलले आकर्षक अफर सार्वजनिक गरेको छ । होटलका अनुसार खुला आकाशमुनि छानामा तयार गरिएको सेटिङमा अतिथिहरूले उत्सवमय रातको अनुभव लिन सक्नेछन् । कार्यक्रम अन्तर्गत २ शट ह्विस्की वा २ गिलास बियर, लाइभ बारबेक्यू, संगीत तथा नयाँ वर्ष विशेष बुफे डिनरको व्यवस्था गरिएको छ । प्याकेजमा आगमनमा स्वागत पेय पदार्थ, ‘सारथी’ विशेष ककटेल वा मकटेलको एक गिलास, इन्फिनिटी स्विमिंग पूल तथा ज्याकुजी पहुँच, बिहानको नास्ता, सुरक्षित पार्किङ र न्यानो आतिथ्य समेत समावेश गरिएको छ । प्रिमियम भोजन, भावपूर्ण संगीत र स्मरणीय क्षणहरूको संयोजनसहितको यो अफर राजधानीमै नयाँ वर्ष मनाउन चाहनेका लागि आकर्षक विकल्प बन्ने होटलले जनाएको छ ।
७ कम्पनीको सेयर मूल्य १० प्रतिशतले बढ्यो, ८ अर्बको कारोबार
काठमाडौं । बुधबार सेयर बजार दोहोरो अंकले बढेको छ । नेपाल स्टक एक्सचेन्ज (नेप्से) परिसूचक ४५ अंकले बढेर २८०२ बिन्दुमा पुगेको हो । नेप्सेका अनुसार २५१ कम्पनीको सेयर मूल्य बढ्दा १५ कम्पनीको सेयर मूल्य घटेको छ । २ कम्पनीको मूल्यमा भने कुनै परिवर्तन आएको छैन । बुधबार ३४६ कम्पनीको १ करोड कित्ता सेयर किनबेच हुँदा ८ अर्ब ३१ करोड रुपैयाँ बराबरको कारोबार भएको छ । जसमध्ये सबैभन्दा धेरै कारोबार एसवाई प्यानलको भएको छ । एसवाई प्यानलको ४६ करोड रुपैयाँ बराबरको कारोबार भएको छ । साथै, रिलाइन्स स्पिीनिङको ४२ करोड, शिवम् सिमेन्टको ४२ करोड, शिवम् सिमेन्टको ३७ करोड र एनआरएनको ३० करोड रुपैयाँ बराबरको कारोबारको भएको छ । बुधबारको कारोबारमा ७ कम्पनीको सेयर मूल्य १० प्रतिशतले बढेर सकारात्मक सर्किट लागेको छ । रिलाइन्स स्पिीनिङ, श्रीनगर एगरिटेक, सोलु हाइड्रो, होटल फोरेस्ट र सुपर खुदि हाइड्रोको सेयर मूल्य १० प्रतिशतले बढेका सकारात्मक सर्किट लागेको छ ।
