लिङ्देनको दावी– देश अनिश्चितताको अँध्यारो सुरुङभित्र प्रवेश गरेको छ
काठमाडौं । राष्ट्रिय प्रजातन्त्र पार्टी (राप्रपा) का अध्यक्ष राजेन्द्रप्रसाद लिङदेनले जेन–जी विद्रोहपछि जनतामा आशा जाग्ने काम हुन नसकेको बताएका छन् । जनताको आकांक्षा पूरा गर्ने दिशामा देश अघि बढ्न नसकेको भन्दै उनले मुलुक अनिश्चितताको अँध्यारो सुरुङभित्र प्रवेश गरेको टिप्पणी गरेका हुन् । आइतबार काठमाडौंमा आयोजित राप्रपा काठमाडौं जिल्ला अधिवेशनमा बोल्दै लिङदेनले विद्रोह जुन उद्देश्यका लागि भएको थियो, त्यसअनुसार जनताको अपेक्षा पूरा हुने वातावरण बन्न नसकेको बताए । उनले जनतामा आशा जाग्ने अवस्था सिर्जना हुनुको सट्टा राजनीतिक तरलता र अनिश्चितता झन् बढ्दै गएको दाबी गरे । उनले भने, ‘जुन विद्रोह भएको थियो, जुन उद्देश्यका लागि भएको थियो, त्यसअनुसार जनतामा आशा जाग्ने काम हुन सकेको छैन । जनताको आकांक्षा पूरा गर्ने दिशामा देश अगाडि बढ्न सकेको देखिँदैन । बरु देशमा आशा जाग्नुको सट्टा अनिश्चितताको अँध्यारो सुरुङभित्र प्रवेश गरेको अवस्था छ । राजनीतिक तरलता र अनिश्चय झन् बढ्दै गएको छ ।’ उनका अनुसार जनताको आकांक्षा परिपूर्ति गर्ने दिशामा देश अघि बढ्न नसक्दा विद्रोहपछि पनि अपेक्षित परिवर्तनको अनुभूति हुन सकेको छैन ।
गुणस्तरहीन सेपोक्स एन्टिबायोटिक औषधि बजारबाट फिर्ता गर्न निर्देशन
काठमाडौं–औषधी व्यवस्था विभागले गुणस्तर मापदण्ड पूरा नगरेको पाइएपछि लोमस औषधी उद्योगले उत्पादन गरेको ‘सेपोक्स २००’ नामक एन्टिबायोटिक औषधि तत्काल बजारबाट फिर्ता गर्न निर्देशन दिएको छ । विभागले जारी गरेको सूचनाअनुसार बजार अनुगमनका क्रममा संकलन गरिएको उक्त औषधीको नमुना राष्ट्रिय औषधी प्रयोगशालामा परीक्षण गर्दा तोकिएको गुणस्तर मापदण्डभन्दा न्यून रहेको पाइएको हो । ‘सेपोक्स २००’ (सेफपोडोक्सिम प्रोक्सेटिल २०० मिलिग्राम) को ब्याच नम्बर सीईटी ३.०८२५ परीक्षणका क्रममा युएसपी–२०२६ मा उल्लेख गरिएको घुलन परीक्षण मापदण्ड पूरा गर्न नसकेको पाइएको छ । विभागले औषधी ऐन, २०३५ को दफा १४ बमोजिम उक्त खेप नम्बर को औषधिको बिक्री–वितरण रोक्का गरी बजारबाट तत्काल फिर्ता गर्न सम्बन्धित उद्योग तथा प्रतिनिधिलाई निर्देशन दिएको जनाएको छ । उक्त औषधीको उत्पादन मिति २०२५ डिसेम्बर र म्याद सकिने मिति २०२७ नोभेम्बर रहेको छ । विभागले स्वास्थ्य संस्था, औषधि व्यवसायी तथा सर्वसाधारणलाई उक्त खेप नम्बरको औषधि बिक्री, वितरण तथा प्रयोग नगर्न आग्रह गरेको छ । साथै बजारमा रहेको मौज्दात तत्काल फिर्ता गरी विभागमा विवरण पेस गर्न सम्बन्धित पक्षलाई निर्देशन दिएको छ।
नर्भिकले ४२ प्रतिशत लाभांश वितरण गर्ने
काठमाडौं । नर्भिक इन्टरनेशनल हस्पिटल एण्ड मेडिकल कलेज लिमिटेडले ४२ दशमलव १०५ प्रतिशत लाभांश वितरण गर्ने निर्णय गरेको छ । शुक्रबार आयोजित छैटौं वार्षिक साधारणसभाले आर्थिक वर्ष २०८२/८३ को मुनाफाबाट २० प्रतिशत बोनस सेयर तथा २२ दशमलव १०५ प्रतिशत नगद लाभांश (कर प्रयोजन समेत) वितरण गर्ने निर्णय गरेको हो । उक्त साधारणसभाले २० प्रतिशत बोनस सेयर वितरणपश्चात कायम हुने चुक्ता पुँजीको २० प्रतिशत बराबरको सेयर बुक बिल्डिङ प्रक्रियाबाट सर्वसाधारणका लागि सेयर निष्काषन गर्ने तथा उक्त प्रक्रियाका लागि संस्थागत लगानीकर्ताहरूलाई वितरण गरिने विवरण पत्र स्वीकृत गर्ने लगायत काम कारबाहीको अख्तियारी संचालक समितिलाई प्रदान गर्ने निर्णय पनि गरेको छ । आर्थिक वर्ष २०८२/८३ मा अस्पतालको कुल आम्दानी फार्मेसी बाहेक रु.२ अर्ब ८३ करोड, कुल खर्च रु.२ अर्ब ३६ करोड तथा खुद नाफा रु.४७ करोड भन्दा माथि रहेको वार्षिक प्रतिवेदनमा उल्लेख गरिएको छ । यस्तै, फार्मेसीसहित कुल आम्दानी रु ३ अर्ब ४७ करोड, कुल खर्च रु २ अर्ब ९९ करोड तथा खुद नाफा रु ४७ करोड ८५ लाख भन्दा माथि रहेको जनाएको छ । हस्पिटलको वार्षिक प्रतिवेदनअनुसार नर्भिकले २०८२/८३ मा ओपिडि तर्फ एकलाख ७९ हजार, आइपीडीतर्फ ९ हजार र आकस्मिक तर्फ ६ हजारजना बिरामीलाई उपचार सेवा प्रदान गरेको छ । त्यस्तै, ४१ हजार सेवाग्राहीलाई अस्ट्रेलिया, युके, जापान, न्युजिल्यान्ड तथा पपुवा न्युगिनियाका लागि इमिग्रेसन हेल्थ स्क्रिनिङ सेवा प्रदान गरेको छ ।
हरिवंशको टिप्पणी–करिब ५० वर्षदेखि बिग्रिँदै आएको काठमाडौं बल्ल सुधारिँदै छ
काठमाडौं । वरिष्ठ कलाकार हरिवंश आचार्यले काठमाडौं महानगरपालिका करिब ५० वर्षदेखि क्रमशः बिग्रिँदै आए पनि पछिल्लो समय महानगरलाई सफा, सुन्दर र व्यवस्थित बनाउने दिशामा केही सकारात्मक काम भएको बताएका छन् । आइतबार काठमाडौं महानगर प्रहरी बलको ३४औं वार्षिकोत्सव कार्यक्रममा बोल्दै आचार्यले काठमाडौं उपत्यकाका विभिन्न स्थानमा निर्माण भएका फल्चाले मौलिक सम्पदा र संस्कृति संरक्षणमा महत्वपूर्ण भूमिका खेल्ने बताए । फल्चा बाहिरबाट हेर्दा बस्ने वा ओत लाग्ने सामान्य ठाउँजस्तो देखिए पनि त्यसको संरचनाभित्र काठमाडौंको मौलिक सम्पदा, संस्कृति र सांस्कृतिक पहिचान लुकेको उनको भनाइ थियो । आचार्यले काठमाडौंलाई देवताहरूको सहरका रूपमा चित्रण गर्दै यहाँका बासिन्दाले पनि आफ्नो सम्पदा र सहरलाई देवताकै रूपमा मानेर संरक्षण गर्नुपर्ने बताए । उनले केही महिनाअघि भारतीय युट्युबरहरूले काठमाडौंको सरसफाइ र सौन्दर्यका विषयमा तयार पारेको कार्यक्रम आफूले हेरेको पनि बताए । भारतीय सञ्चारमाध्यम तथा युट्युबरहरूले काठमाडौंको प्रशंसा गरेको देख्दा नेपाली हुनुका नाताले आफूलाई गर्व लागेको उनको भनाइ थियो । ‘करिब ५० वर्षअघिदेखि नै महानगर बिग्रिन सुरु भएको हो । अब जति बिग्रिनु थियो, धेरै बिग्रिसकेको छ । तर पछिल्लो समय महानगरलाई सफा, सुन्दर र व्यवस्थित बनाउने केही राम्रा काम भएका छन्,’ उनले भने । उनले काठमाडौंका विभिन्न स्थानमा निर्माण भएका फल्चालाई केवल बस्ने वा ओत लाग्ने ठाउँका रूपमा मात्र हेर्न नहुने बताए । ‘हेर्दा फल्चा बस्ने र ओत लाग्ने ठाउँजस्तो देखिए पनि त्यसको भित्र हाम्रो सम्पदा र संस्कृति लुकेको हुन्छ,’ उनले भने । आचार्यले महानगरमा पछिल्लो समय भएका सकारात्मक कामलाई निरन्तरता दिँदै सम्पदा संरक्षण, सरसफाइ र सहरको सौन्दर्यमा थप ध्यान दिनुपर्नेमा जोड दिए । महानगरको विकास र संरक्षणमा महानगरवासीको समेत महत्वपूर्ण भूमिका रहने उल्लेख गर्दै उनले सबै नागरिकलाई आफ्नो सहरप्रति जिम्मेवार बन्न आग्रहसमेत गरे ।
अमेरिकालाई ब्रिक्सको कडा सन्देश : एकतर्फी कर र व्यापारिक अवरोध स्वीकार्य छैन
काठमाडौं । दिल्लीमा आयोजित दुईदिने ब्रिक्स शिखर सम्मेलनको पहिलो दिन सदस्य राष्ट्रहरूले अमेरिकाको नाम नलिई एकतर्फी रूपमा लगाइने भन्सार कर र व्यापारिक अवरोधप्रति कडा असन्तुष्टि जनाएका छन् । ब्रिक्स राष्ट्रहरूले कुनै पनि देशले भन्सार करका विषयमा मनपरी गर्न नहुने सन्देश दिएका छन् । विश्वभर बढिरहेको भन्सार कर युद्ध र व्यापारिक तनावबीच ब्रिक्स राष्ट्रहरूले एकतर्फी भन्सार कर तथा गैरभन्सार व्यापारिक अवरोधप्रति गम्भीर चिन्ता व्यक्त गरेका हुन् । ब्रिक्स शिखर सम्मेलनमा सदस्य राष्ट्रहरूले ‘नयाँ दिल्ली घोषणा–२०२६’ लाई सर्वसम्मतिले अनुमोदन गरेका छन् । घोषणामा एकतर्फी रूपमा चालिने यस्ता कदमले विश्व व्यापारलाई प्रभावित पार्ने र विश्व व्यापार संगठन (डब्लूटीओ)का नियमसँग मेल नखाने उल्लेख गरिएको छ । भारतको अध्यक्षतामा भएको बैठकमा भारतीय प्रधानमन्त्री नरेन्द्र मोदीले घोषणालाई अनुमोदन गर्न प्रस्ताव गरेका थिए । कुनै पनि सदस्य राष्ट्रले आपत्ति नजनाएपछि घोषणा सर्वसम्मतिले पारित भएको हो । ब्रिक्स घोषणामा एकतर्फी भन्सार कर तथा गैरभन्सार उपायमा भइरहेको वृद्धिप्रति गम्भीर चिन्ता व्यक्त गरिएको छ । समूहले यस्ता व्यापारिक कदमले विभिन्न देशबीच समान प्रतिस्पर्धाको वातावरण प्रभावित पार्ने र विश्व व्यापार व्यवस्थामा अनिश्चितता बढाउने जनाएको छ । घोषणामा डब्लूटीओका नियमअनुसार व्यापार व्यवस्था कायम राख्नुपर्नेमा जोड दिइएको छ । विश्वका प्रमुख अर्थतन्त्रबीच आयातमा लाग्ने भन्सार करलाई लिएर तनाव बढिरहेका बेला ब्रिक्स राष्ट्रहरूले यस्तो धारणा सार्वजनिक गरेका हुन् । अमेरिकासहित विभिन्न देशले आफ्नो घरेलु उद्योग संरक्षणका लागि भन्सार कर तथा अन्य व्यापारिक प्रतिबन्ध प्रयोग गरिरहेका बेला ब्रिक्सको यो धारणा सार्वजनिक भएको हो । ब्रिक्स राष्ट्रहरूले भन्सार कर मात्रै नभई गैरभन्सार व्यापारिक अवरोधप्रति पनि चिन्ता व्यक्त गरेका छन् । यस्ता अवरोधमा आयातका लागि लगाइने विभिन्न प्रकारका सर्त, प्राविधिक नियम तथा अन्य त्यस्ता उपाय पर्छन्, जसले विदेशी वस्तुलाई सम्बन्धित देशको बजारमा प्रवेश गर्न कठिन बनाउन सक्छन् । विश्व व्यापारमा स्थिरता र निष्पक्ष प्रतिस्पर्धाका लागि नियममा आधारित बहुपक्षीय व्यापार व्यवस्थालाई थप बलियो बनाउन आवश्यक रहेको ब्रिक्सको धारणा छ । घोषणामा अन्तर्राष्ट्रिय कानुनविपरीत लगाइने एकतर्फी आर्थिक दबाब र उपायको पनि निन्दा गरिएको छ । ब्रिक्स राष्ट्रहरूले लामो समयदेखि कुनै एक देश वा समूहले लगाउने आर्थिक प्रतिबन्ध तथा दबाबको असर विश्व व्यापार र विकासशील अर्थतन्त्रमा पर्न नहुने धारणा राख्दै आएका छन् । ब्रिक्सको पछिल्लो अडान विश्व आर्थिक व्यवस्थामा आफ्नो भूमिका थप विस्तार गर्ने र बाह्य आर्थिक दबाबप्रतिको निर्भरता कम गर्ने सदस्य राष्ट्रहरूको व्यापक प्रयासकै हिस्सा भएको देखिन्छ । ब्रिक्समा ब्राजिल, रुस, भारत, चीन, दक्षिण अफ्रिका, इजिप्ट, इथियोपिया, इन्डोनेसिया, इरान र संयुक्त अरब इमिरेट्स सदस्य छन् । ब्रिक्सको सुरुवात चार राष्ट्रबाट भएको हो । सन् २००९ मा पहिलो ब्रिक शिखर सम्मेलन आयोजना हुँदा ब्राजिल, रुस, भारत र चीन गरी चार राष्ट्र यसको सदस्य थिए । सुरुमा यी चार राष्ट्रको नामको पहिलो अक्षरबाट समूहको नाम ब्रिक राखिएको थियो । सन् २०१० मा दक्षिण अफ्रिका समूहमा थपिएपछि यसको नाम ब्रिक्स राखिएको हो । यसको मुख्य उद्देश्य उदीयमान अर्थतन्त्र भएका देशबीच आर्थिक तथा राजनीतिक सहकार्य विस्तार गर्नु र विश्वका अन्तर्राष्ट्रिय संस्थामा विकासशील देशको आवाजलाई थप बलियो बनाउनु हो ।
रसियन हाउसमा २८ नेपाली कलाकारका चित्रकला प्रदर्शनी
काठमाडौं । नेपाली कलाकारका विविध सिर्जना समेटिएको सामूहिक चित्रकला प्रदर्शनी काठमाडौंस्थित रसियन हाउसमा सुरु भएको छ । रसियन हाउस, काठमाडौंको प्रस्तुतिमा नेपाल–रसिया आर्ट क्लब र सुषमा आर्ट ग्यालरीको संयुक्त आयोजनामा भएको प्रदर्शनीको उद्घाटन सांसद तथा पूर्वमन्त्री पद्मा अर्यालले गरिन् । उद्घाटन कार्यक्रममा रसियन हाउसकी निर्देशक अनासातासिया खोख्लोभा, नेपाल–रसिया आर्ट क्लबकी अध्यक्ष सुषमा राजभण्डारी, नेपाल–रसिया फ्रेन्डसिप तथा कल्चरलका महासचिव स्वराज शाक्य, कलाकार शिवजी यादव, दिवस अमात्यलगायत वरिष्ठ कलाकार, कलाकार, पत्रकार तथा व्यक्तिहरूको उपस्थिति थियो । कार्यक्रम प्राज्ञ, गायक तथा संगीतकार माधव प्रधानले सञ्चालन गरेका थिए । कार्यक्रममा रसियन हाउसकी निर्देशक खोख्लोभाले उपस्थित अतिथिलाई खादा लगाएर स्वागत गरेकी थिइन् भने नेपाल–रसिया आर्ट क्लबका सचिव मदन श्रेष्ठले अतिथि तथा कलाकारहरूलाई स्वागत गरेका थिए । प्राज्ञ धर्मराज शाक्यले प्रदर्शनीमा राखिएका कलाकृतिबारे समीक्षा गरेका थिए । निर्देशक खोख्लोभाले नेपाली कलाकारहरूको सामूहिक चित्रकला प्रदर्शनी आयोजना गर्न पाएकोमा खुसी व्यक्त गर्दै आगामी दिनमा पनि नेपाल–रसिया आर्ट क्लबसँग सहकार्य गरेर नेपाल र रसियाका कलाकारहरूको संयुक्त चित्रकला प्रदर्शनी आयोजना गर्ने जानकारी दिइन् । प्रमुख अतिथि पद्मा अर्यालले नेपाली कलाकारहरूको सामूहिक चित्रकला प्रदर्शनी उद्घाटन गर्न पाउँदा खुसी लागेको बताउँदै प्रदर्शनीमा राखिएका चित्रहरू हेर्दा आफूले नौलो अनुभव प्राप्त गरेको बताइन् । नेपाल–रसिया आर्ट क्लबकी अध्यक्ष सुषमा राजभण्डारीले प्रदर्शनीमा सहभागी कलाकार तथा उपस्थित सबैलाई धन्यवाद दिँदै क्लबले आगामी दिनमा पनि नियमित रूपमा कला प्रदर्शनी आयोजना गर्दै जाने बताइन् । उनले प्रदर्शनीमा धेरैभन्दा धेरै महिला कलाकारका कलाकृति समेट्न पाएकोमा खुसी व्यक्त गरिन् । कार्यक्रमका क्रममा नेपाल–रसिया आर्ट क्लबका नयाँ सल्लाहकार तथा पदाधिकारीहरूको समेत घोषणा गरिएको थियो । प्रदर्शनीमा प्राज्ञ विजय थापा, प्राज्ञ चन्दा श्रेष्ठ, जीवन राजोपाध्याय, रत्नकाजी शाक्य, गजेन्द्रमान श्रेष्ठ, प्राज्ञ सुषमा राजभण्डारी, विजयराज शाक्य, राजाबाबु शाक्य, प्राज्ञ धर्मराज शाक्य, प्राज्ञ धनु याक्खा, प्राज्ञ उमेश श्रेष्ठ, पुरुषोत्तम मानन्धर, दीपाञ्जली प्रधान, रेनुका महर्जन, ज्योति खड्का, सजनी श्रेष्ठ, उमा श्रेष्ठ, सुनेना ठाकुर, सरुनादेवी महर्जन, प्रविण श्रेष्ठ, मदन श्रेष्ठ, राखी कर्न, हेमा दास, जेम्स महर्जन, विनोद गिरी, सुमित्रा थुस, कृपा जोशी र हरिराम चौधरी गरी २८ जना कलाकारका चित्रहरू राखिएका छन् ।
इरानी राष्ट्रपति पेजेशकियानले भने– सर्वोच्च नेता मोजतबा खामेनेई जीवित छन्
काठमाडौं । इरानका राष्ट्रपति मसुद पेजेशकियानले सर्वोच्च नेता मोजतबा खामेनेई जीवित रहेको र आफ्नो जिम्मेवारीअनुसार काम गरिरहेको बताएका छन् । ब्रिक्समा सहभागी हुन भारत आएका पेजेशकियानले ‘इन्डिया टुडे’लाई दिएको अन्तर्वार्तामा खामेनेईबारे धारणा राखेका हुन् । अन्तर्वार्ताका क्रममा पेजेशकियानलाई इरानका सर्वोच्च नेता मोजतबा खामेनेई कहाँ छन् र उनको अवस्था कस्तो छ भनेर सोधिएको थियो । जवाफमा पेजेशकियानले भने, ‘हाम्रा सर्वोच्च नेता जीवित हुनुहुन्छ र उहाँ पहिलेझैँ त्यही प्रणालीअन्तर्गत आफ्नो काम गरिरहनुभएको छ ।’ उनले शत्रुहरूले खामेनेईको वास्तविक स्थान पत्ता लगाउन नसकेका कारण विभिन्न अड्कलबाजी फैलाइएको दाबी गरे । उनका अनुसार शत्रुहरूले इरानका नयाँ सर्वोच्च नेतासँग पनि अघिल्ला सर्वोच्च नेतासँग गरेजस्तै व्यवहार गर्न खोजिरहेका छन् । पेजेशकियानले अमेरिका र इजरायलले एक व्यक्तिलाई लक्षित गर्दै उसको सम्पूर्ण परिवारको हत्या गर्ने र भवनसमेत ध्वस्त पार्ने गरेको आरोप लगाए । त्यसपछि उक्त व्यक्तिलाई आतंकवादी भएको दाबी गर्ने गरिएको उनको भनाइ थियो । उनले भने, ‘हामी जुन संसारमा बाँचिरहेका छौं, त्यसमा यो अपराध गर्ने नयाँ तरिका बनेको छ ।’ इरानका वर्तमान सर्वोच्च नेता मोजतबा खामेनेईले पद सम्हालेको करिब छ महिना भइसक्दा पनि सार्वजनिक रूपमा उपस्थिति जनाएका छैनन् । यद्यपि, उनका लिखित सन्देशहरू सार्वजनिक हुँदै आएका छन्। साथै, इरानी अधिकारीहरूले पनि खामेनेई जीवित रहेको दाबी निरन्तर गर्दै आएका छन्।
बढ्यो सुनचाँदीको मूल्य, प्रतितोला कतिमा हुँदैछ कारोबार ?
काठमाडौं । आइतबार सुनचाँदीको मूल्य बढेको छ । नेपाल सुनचाँदी व्यवसायी महासंघका अनुसार सुनको मूल्य आज तोलामा १२ सय रुपैयाँले बढेर ३ लाख २ हजार २ सय रुपैयाँमा कारोबार भइरहेको छ । शुक्रबार सुनको मूल्य ३ लाख १ हजार रुपैयाँमा कारोबार भएको थियो । आज चाँदीको मूल्य प्रतितोला ६० रुपैयाँले बढेर ४ हजार ६६० रुपैयाँ कायम भएको छ । शुक्रबार चाँदी प्रतितोला ४ हजार ६०० रुपैयाँमा कारोबार भएको थियो ।
