कतार एयरवेजले सिड्नी-क्यानबेरा उडानमा क्यूसुइट सुरुवात गर्ने, साउन १६ गतेदेखि दैनिक सेवा
कतार । कतार एयरवेजले कम्पनीको नयाँ अष्ट्रेलियन गन्तव्य सिड्नी-क्यानबेराको उडानमा बिजनेस क्लास सेवा क्यूसुइट सुरुवात गर्ने भएको छ । कम्पनीले आगामी जुलाई १(असार १८ गते)देखि उक्त क्लास सेवा शुरु गर्ने घोषणा गरेको छ । गत फेब्रुअरीबाट सञ्चालनमा आएको क्यान्बेरा मार्गको सुरुवातको छ महिना नबित्दै एयरलाइन्सले यो घोषणा गरेको हो । दोहादेखि क्यानबेराको उडानले सिड्नीमार्फत दैनिक दुईवटा उडानले त्यहाँका बासिन्दाहरुलाई कतारी क्षेत्रसँग जोड्दछ । सुरुवातमा यस उडान मार्गमा क्यूसुइटको सेवा साप्ताहिक चार पटक प्रदान गरिने छ भने दैनिक सेवा आगामी १ अगस्ट(साउन १६ गते) बाट प्रारम्भ हुनेछ । कतार एयरवेज ग्रुपका प्रमुख कार्यकारी अधिकृत अकबर अल बकेरले भने “यसको सुरुवातदेखि नै क्यूसुइट विश्वव्यापी रुपमा आकर्षणको मुख्य केन्द्र बनेको हो । हामी यस उत्कृष्ट सेवा हाम्रो क्यानबेरा तथा सिड्नी उडान मार्गमा प्रस्तुत गर्न पाउँदा निकै उत्साहित छौँ । क्यूसुइटसँगै हामीले बिजनेस एवं लक्जरी यात्रालाई एक नयाँ पहिचान दिलाएका छौँ, र हामी विश्वस्त छौँ यस शानदार सेवा अष्टे«लियन यात्रुहरुका लागि एक थप आकर्षण हुनेछ । ” साथै, यस विमान सेवाले गत वर्षको समारोहमा ‘सर्वश्रेष्ठ एयरलाइनः मध्य पूर्वी एसिया’, ‘विश्वको सर्वश्रेष्ठ बिजनेस क्लास’ तथा ‘विश्वको सर्वश्रेष्ठ फस्र्ट क्लास एयरलाइन लाउन्ज’ सहित विभिन्न महत्वपूर्ण पुरस्कारहरु हात पारेको थियो ।
हकप्रद र लाभांश सम्बन्धी सञ्चालक समितिको निर्णयमा अंकुश लगाइँदै, नियामकको पूर्व स्वीकृति अनिवार्य
काठमाडौं । सूचिकृत कम्पनीहरुले हकप्रद सेयर तथा लाभांश सम्बन्धी निर्णय फेर बदल गर्न नपाउने भएका छन् । नेपाल धितोपत्र बोर्डले सुचिकृत कम्पनीको लाभांश र हकप्रद सेयर सम्बन्धी निर्णयहरु नियामक निकायको स्वीकृति र साधारणसभाबाट पारित नभइ सार्वजनिक गर्न नपाइने व्यवस्था लागु गर्न लागेको हो । कम्पनीको सञ्चालक समितिले नियामक निकायको स्वीकृति नलिइ लाभांश दिने प्रस्ताव सार्वजनिक गर्ने र त्यसले सेयर बजारमा नकारात्मक असर गरेपछि कडाई गर्न लागेको बोर्डका अध्यक्ष डा. रेवत बहादुर कार्कीले बताए । ‘कम्पनीको सञ्चालक समितिले नियामक निकायसंग छलफल गरेर पुर्वस्वीकृति लिएर मात्र लाभांश दिने प्रस्ताव गर्नुपर्नेमा त्यसो नगरी सिधै यति दिने भन्ने कुरा आउने गरेको छ’, उनले भने, ‘बोर्डले अब रोकेर सम्बन्धित नियामकको स्वीकृतिपछि मात्र निर्णय सार्वजनिक गरिनुपर्छ । उनले सञ्चालक समितिलाई सूचना बाहिर ल्याउने अधिकार नभएको जिकिर पनि गरे । सञ्चालक समितिको निर्णय २४ घण्टा भित्र नेपाल स्टक एक्सचेन्ज लिमिटेड (नेप्से) मा गर्नुपर्ने वाध्यकारी अवस्था छ नी भन्ने विकास न्युजको प्रश्नको जवाफ दिदै उनले भने नेप्से हाम्रो आफनो संस्था भएकाले यसको नियममा पनि परिमाजर्न गरिने छ । उनले कतिपय कम्पनीको बोर्डमा गरेको निर्णय साधारणसभासम्म नै नजाने गरेको पनि पाइएको उनले बताए । महत्वपूर्ण एजेन्डा साधारणसभाबाट मात्र सार्वजनिक गरिनु पर्ने उनको तर्क छ । एभरेष्ट इन्स्योरेन्स कम्पनीको हकप्रद सेयर सम्बन्धी निर्णयले पनि हजारौं लगानीकर्ता अन्यायमा परेका छन् । कम्पनीको सञ्चालक समितिले ६ सय प्रतिशत हकप्रद सेयर निष्काशन गर्ने निर्णय सार्वजनिक गरेको थियो । तर कम्पनीको पूँजी संरचना नै विद्यमान नियमानुसार नदेखिएपछि एभरेष्टको हकप्रद सम्बन्धी निर्णय कार्यान्वयन नहुने अवस्था आएको छ । हकप्रदका आसमा दोश्रो बजारबाट सेय खरिद गरेका लगानीकर्ताहरुमाथी अन्याय भएको देखिन्छ । एसियन लाइफ इन्स्योरेन्स कम्पनीको सञ्चालक समितिले १२ प्रतिशत बोनस सेयर दिने निर्णय गरेको थियो । तर बीमा समितिले त्यसलाई घटाएर ६ प्रतिशत बनाईदियो । १२ प्रतिशत बोनस सेयरको आसमा दोश्रो बजारबाट एसियन लाइफको सेयर खरिद गरेका लगानीकर्ता अन्यायमा परे । सञ्चालक समितिहरुका यस्तै निर्णयहरुले लगानीकर्तामाथी अन्याय भएको देखेपछि बोर्डले हकप्रद र बोनस सम्बन्धी निर्णयमाथी कडाई गर्न लागेको अध्यक्ष कार्कीले बताए । बोर्डले आगामी आर्थिक बर्ष २०७५।७६ को नीति तथा कार्यक्रम मार्फत हकप्रद र बोनस सम्बन्धी सञ्चालक समितिको निर्णयमाथी अंकुश लगाउन लागेको हो ।
बैंकले दिने भन्दा मार्जिन ट्रेडिङबाट पाइने ऋण महंगो हुनेछ-रेग्मी
काठमाडौं । पूँजी बजारको दिगो विकास प्रस्थान विन्दु भनेको नीतिगत व्यवस्था नै हो । त्यसका संरचनाहरुको निर्माण र प्रबिधीमैत्री वातावरणले सहयोग गर्नुपर्छ । त्यसकै आधारमा टेकेर नेपालको पूँजी बजारको विस्तार र विकास गर्न सकिन्छ । भर्खरै सरकारले नयाँ बजेट ल्याएको छ । हाम्रा पुरै आकांक्षाहरु पुरा भएनन् होला यद्यपी बजेटमा भएका व्यवस्थाले पूँजी बजारको विकास र विस्तारमा सहयोग नै गर्छ । हामीले बजारको आयातन बढाउन बजेटले जोड दिन्छ भन्ने अपेक्षा गरेका थियौं । जुन केहि हदसम्म पुरा भएको छ । पूँजी बजारमा मूल्य अभिवृद्धि कर (भ्याट) को बिषय टुंगीएको छ । ब्रोकरहरुलाई ३० प्रतिशत आयकरको दायरामा लगिएको छ । जसलाई हामीले पनि राम्रो कदमका रुपमा लिएका छौं । लगानीकर्ताले तिर्ने पूँजीगत लाभकरका सन्दर्भमा व्यक्तिगत तर्फ ७.५ प्रतिशत बनाइएको छ । संस्थागत तर्फ भने १० प्रतिशत नै कायम राखिएको छ । बोनस र हकप्रद सेयरका सवालमा देखिएको अन्यौलता तत्कालका लागि रोकिएको छ । १५ दिनमा तयार हुने अध्ययन प्रतिवेदनले त्यसको अन्तिम टुंगो लगाउनेछ । सरकारले आर्थिक समृद्धिको मार्ग खोल्ने भनिरहेको छ । पूँजी बजारलाई पूँजी संकलनको माध्यमका रुपमा अंगीकार गर्ने सरकारले भनिरहेको छ । त्यसले पूँजी बजारको दिगो विकास र विस्तारका लागि सकारात्मक मार्ग निर्देश गर्नेछ भन्ने हाम्रो अपेक्षा हो । सरकारको कलर(रंग)लाई हेरेर सेयर बजारमा यस्तो भयो भनेर हल्ला गर्नुपर्ने अवस्था छैन् । ब्याज दर बढिरहेको छ, सेयरको आपूर्ति पनि बढि नै छ । कम्पनीहरुले दिने लाभांश पनि घटि रहेको छ । बजारको वास्तविक अवस्थालाई नहेरि खाली सरकारलाई गाली मात्रै गर्ने चलन सुरु भएको छ । अघिल्लो पाली केपी ओलीकै नेतृत्वमा सरकार हुँदा नेपाली सेयर बजारले उच्चतम बिन्दुको इतिहास रचेको थियो । सरकारले पूँजी बजारलाई तल झार्ने र माथी उकास्ने नीति लिन्छ भन्ने मलाई लाग्दैन् । त्यसले पुँजी बजारलाई भरोसा योग्य, गहिरो र दिगो बनाउँछ भन्ने लाग्छ । सरकारले पुँजी बजारको विधिबिकरणका लागि उत्पादनमुलक कम्पनीलाई प्रवेश गराउन केहि बाध्यकारी व्यवस्था अघि सारेको पनि छ । संस्थागत लगानीकर्ताको प्रवेश, सर्ट सेल, ऋण पत्रको कारोबार, इन्ट्रा डे कारोबार लगायतका काम धितोपत्र बोर्ड आफैंले अघि बढाउन सक्छ । पूँजी बजारकै संरचना बढाउन पनि सरकारले चासो र तदारुकता देखाएकै छ । अहिले मार्जिन ट्रेडिङ कार्यान्वयनको चरणमा छ । त्यसले लगानीकर्ता र ब्रोकरहरुलाई पनि सकारात्मक कुरा नै हो । मार्जिन ट्रेडिङ भनेको अल्पकालिन लगानी हो । यसले बजारमा देखिएको अवसरलाई तत्कालै सदुपयोग गर्नका लागि उपयोग गर्न सकिन्छ । यद्यपी यसका फाइदा र जोखिम पनि छन् । सही ढंगले उपयोग गरियो भने लगानीकर्ताले फाइदा लिन सक्छन् । तर गलत उपयोग भयो भने यसले समस्या पनि ल्याउन सक्छ । यसका पनि २/३ वटा बिषय बाँकी नै छन् । मार्जिन ट्रेडिङको सेवा शुल्क कति हो ? जसलाई हामीले ब्याजदर भन्छौं भने नेप्सेले सेवा शुल्क भनेको छ । सेवा शुल्कको स्वीकृतिका लागि नेपाल राष्ट्र बैंकमा पठाइएको छ । कारोबार प्रणाली र राफसाफ प्रणाली र ब्रोकरहरुको प्रणालीगत सुधारको काम भैरहेको छ । त्यसपछि मार्जिन ट्रेडिङ कार्यान्वयनमा आउँछ । मार्जिन ट्रेडिङ सुबिधा उपलब्ध गराए वापत ब्रोकरले लिने सेवा शुल्कको सिमा तोकिएको छैन् । ब्रोकर र लगानीकर्ताको सहमतिमा शुल्क तोक्न सकिने व्यवस्था गरिएको छ । अहिलेका लागि केहि ब्रोकरहरुले मात्रै मार्जिन ट्रेडिङको सेवा आरम्भ गर्नेछन् । केहि समयपछि बाँकी ब्रोकरहरुले पनि आफ्नो क्षमता बढाएर मार्जिन ट्रेडिङ सेवा प्रदान गर्न सक्छन् । मार्जिन ट्रेडिङ एक प्रकारले परिक्षणका लागि अघि सारिएकाले पनि सुरुमा थोरै ब्रोकर मार्फत मात्रै कार्यान्वयन गर्न लागिएको हो । बैंक तथा वित्तिय संस्थाले उपलब्ध गराउने ऋण भन्दा मार्जिन ट्रेडिङबाट पाइने ऋण केहि महंगो हुनेछ । बाणिज्य बैंकहरुबाट ऋण लिएर लगानीकर्तामा लगानी गर्नु पर्ने भएको यो अलि महंगो पर्छ नै । त्यसैले हामीले मार्जिन ट्रेडिङलाई अवसर छोप्न सक्ने लगानीकर्ताहरुका लागि हो भनिरहेका छौं । फेरी मार्जिन ट्रेडिङकै कारण बजार बढ्छ भन्ने चाँही होइन् । यसले १० देखि १५ प्रतिशत कारोबार भने बढाउन सक्छ । बजार बढ्ने वा घट्ने कुरा चाँही बजारको नियमित प्रक्रियामा भर पर्छ । यो साना लगानीकर्ताहरुका लागि लक्षित सुबिधा हो । मार्जिन ट्रेडिङबाट २ बर्षका लाग लगानी गर्छु भन्नेहरु चाँही डुब्नु नै । नाफा भयो भने नाफा बुक गर्ने अनि घाटा भयो भने लगानी जोगाउने प्रयोजनका लागि मार्जिन ट्रेडिङलाई उपयोग गर्ने हो । ब्रोकरले आफ्नो क्षमताको १० प्रतिशत मात्रै मार्जिन ट्रेडिङमा लगानी गर्न पाउने हो । ब्रोकरहरु संस्थागत हुनुपर्छ भन्ने कुरा लामो समयदेखि उठ्दै आएको छ । संस्थागत हुनु भनेको ब्रोकरले गर्ने काम र त्यसका लागि आवश्यक पर्ने पुँजी, प्रबिधी र बजार हो । ब्रोकर कम्पनीहरुको कार्यक्षेत्र बढाउनुस, त्यसपछि पूँजी बढाउँछन जसले दक्ष जनशक्तिको खोजी गर्छ । त्यसले सिंगो पूँजी बजारका लागि सकारात्मक काम गर्छ । ब्रोकरहरु पनि व्यवसायी हुन् । खाली पूँजी वृद्धि मात्रै भनेर हुन्न । त्यसकारण हामीले नियमनको घेरा भित्र कार्यक्षेत्र विस्तार गर्नु पर्यो भन्दै आएका छौं । त्यसले पुँजी, प्रबिधी र जनशक्तिको क्षमता अभिवृद्धि हुन्छ जसकार कारण पूँजी बजारकै लागि राम्रो फाइदा पुग्छ । लामो समयदेखि दोश्रो स्टक एक्सचेञ्ज ल्याउनेबारे बहस चलिरहेको छ । नयाँ स्टक ल्याउने की नल्याउने भन्ने कुरा सरकारले निर्धारण गर्ने हो । अहिलेको नेप्सेले राम्रोसँग काम गर्न नसकेको साँचो हो । नेप्से व्यवसायीक हुन नसकेकाले सिंगो पूँजी बजार व्यवसायीक हुन सकिरहेको छैन् । ब्रोकर कम्पनीहरुले प्रदान गर्ने सेवा भनेको नेप्सेले बनाएको सफ्टवेयरमै मात्र हो । त्यसरकारण नेप्सेको व्यवसायीकता अभिवृद्धि अत्यावश्यक छ । अहिले मौद्रिक नीतिको बहस सुरु भैसकेको छ । मार्जिन ट्रेडिङको कारोबारलाई मौद्रिक नीतिले समेट्नु पर्छ । त्यस अघि नै सो कार्यबिधी कार्यान्वयनका लागि स्वीकृति प्राप्त होस भन्ने अपेक्षा छ । नेपालको पूँजी बजारमा बैंक तथा वित्तिय संस्थाको वर्चश्व रहेकाले मौद्रिक नीतिमा आउने कुराले पूँजी बजारलाई प्रत्यक्ष असर गर्छ । तरलताको उचित व्यवस्थापन नै पूँजी बजारको त्राण हो । मौद्रिक नीतिले तरलता व्यवस्थापनको उचित कार्यक्रम ल्याओस् । अर्काे कुरा भनेको अनलाईन सेयर कारोबार आरम्भ गर्ने तयारी भैरहेको छ । त्यो समयमै सम्पन्न भएर अजोखिमरहित ढंगले अघि बढोस् । (स्टक ब्रोकर एसोसियसनका अध्यक्ष रेग्मीसँग गरिएको कुराकानीमा आधारित)
फुटबल टेनिस होइन, मेसीलाई रोक्नी कुनै सुत्र छैन: इभान राकेटिक
काठमाडौं । क्रोयोसियका मिडफिल्डर इभान राकेटिकले २०१८ को विश्वकपमा अर्जेन्टिनाका मेसीलाई रोक्ने कुनैपनि सुत्र नहुने बताएका छन् । स्पेनीस अनलाईन मार्कालाई अन्तर्वाता दिदैं राकेटिकले मेसी जादुमई खेलाडी भएको बताएका हुन् । राकेटिकले मेसीबारे बोल्दै भने-“मेसीलाई रोक्ने सुत्र कसैले पाउन सक्दैन । यो मेरा लागि अरुका लागि जो कसैका लागि वास्तवमै कठिन छ । हामी उनीसँगै हाम्रो क्षमताको आधारमा तुलना गर्छौ । एक उत्कृष्ट खेलाडीसँग खेल्न पाउनु हाम्रो लागि ठूलो भाग्य हो । तर हामी कति खतरनाक छौं त्यो उनले बुझिसकेका छन् । साच्चिनै उनले विश्वकप जित्नेछन र देखाउनेछन् को हुन् मेसी, तर फुटबल टेनिस हाेइन, मेसी एक्लैको लबबाबले कप जित्न सक्दैनन् । कपको लागि ३२ देशको ३२ सपना छ । यदि अन्तिममा उनले कप जित्छन् भने त्यसमा हामी मेसीका लागि खुशि हुनेछौं । यदि उनी उत्कृष्ट छन् यदि कोहि उत्कृष्ट छ उसले एउटा कप जितोस वा ५० हजार ! एउटा विश्व कपले को हुन् मेसी भनेर चिनाउँदैन । मेसी र राकेटिक बार्सिलोना फुटबल क्लबबाट सँगै फुटबल खेल्दै आएका छन् ।”
सवारी साधन र इलेक्ट्रोनिक वस्तुको भन्सार दर घटाउन डब्ल्युटीओको दवाब, अर्थले भन्यो : यो वर्ष हुदैन्
काठमाडौं । विश्व व्यापार संगठन(डब्ल्युटीओ) नेपाललाई ले सवारी साधन र इलेक्ट्रोनिक समानहरुको भन्सार दरबन्दी घटाउन दवाव दिएको छ । डब्ल्युटीओले उद्योग बाणिज्य तथा आपूर्ति मन्त्रालय मार्फत भन्सार दर घटाउन दवाब दिएको हो । नेपालले डब्ल्युटीओमा गरेको प्रतिवद्धता प्रतिकुल हुने गरी गाडी, इलेक्ट्रोनिक लगायत ४ श्रेणी अन्र्तगत ४० ओटा विभिन्न माल वस्तुको भन्सार दर बढाएपछि डब्लुटीओले सम्झौता अनुसार कायम गर्न भनेको हो । मन्त्रालयमा उपसचिव रामकृष्ण अधिकारीले डब्लुटीओसँग नेपालले प्रतिवद्धता जनाइसकेकोले सोही अनुसारको नियम नेपालले पनि मान्नु पर्ने बताए । ‘तर गाडी, इलेक्ट्रोनिक लगायतका विभिन्न सामाग्रीहरुमा डब्लुटीओको मापदण्ड पालना हुन नसकेको पाइएपछि हामीले अर्थ मन्त्रालयसँग भन्सार दर घटाउन भनेका हौं,’ उनले भने ‘त्यो विषयमा अर्थलाई बजेट आउन हप्तादिन अघि नै सुझाब दिएका थियौं ।’ मन्त्रालयका अनुसार सो सम्बन्धमा उच्चस्तरिय छलफलहरु भइरहेको छ । बजेटमा घोषणा भएको भन्सार दर नै कायम हुन्छ वा पुनःसंरचना हुन्छ । जारी छलफलले निक्र्याैल गर्ने उपसचिव अधिकारीको भनाइ छ । अहिलेसम्म टुङ्गोमा भने पुग्न सकेको छैन । उनका अनुसार व्यापार घाटा घटाउन भन्सार दर बढाउनुभन्दा पनि त्यो बाहेकका डब्ल्युटीओकै मापदण्डमा रहेर अरु विभिन्न विकल्पहरु खोज्न सकिने छ । ‘व्यापार घाटालाई सम्बोधन गर्ने थुप्रै विकल्पहरु हुनसक्छन् । त्यो विषयमा पनि छलफल भइरहेको छ,’ उनले भने । यता राजश्वसचिव शिशीरकुमार ढुङानाले डब्ल्युटीओले भन्सार दरबन्दी घटाउन दवाव दिएको बताए । “दवावका बावजुद यो वर्ष पनि भन्सार दर बढाएका छौं” उनले भने “उद्योग सचिवज्यूले गाह्रो भो भनिरहनु भएको छ, जे होलाहोला भनेर यो पटक ४ वटा वस्तुको दर बढाएका छौं ।” डब्ल्युटीओमा भएको प्रावधानअनुसार नेपालले भन्सार दरवन्दी कम गर्दै लैजानु पर्ने छ । पछिल्लो समयमा सरकारले भन्सार शुल्क भन्दा पनि आन्तरिक राजश्वलाई बढी जोड दिएको छ । भन्सारबाट हुने राजश्व कम हुदै गएको छ । नेपालले विस्तारै भन्सार दरवन्दी शुन्यमा झार्ने तयारी गरेको छ ।
कुमारी बैंकको हकप्रद सेयर भर्ने अन्तिम दिन बिहीबार
काठमाडौं । कुमारी बैंकको हकप्रद निष्कासन बिहीबारसम्म मात्र हुने भएको छ । बैंकको हकप्रद निष्कासन बिहीबार बैंकिङ समयपछि बन्द हुने निष्कासन तथा बिक्री प्रवन्धक एनआईबीएल एस क्यापिटल लिमिटेडले जनाएको छ । हकप्रद निष्कासन ३ दिन मात्र बाँकी रहेको छ । बैंकले चुक्तापुँजी बढाउन बैंशाख २८ गतेदेखि हकप्रद सेयर निष्कासन गरेको हो ।बैंकले चुक्तापुँजी बढाउन २० प्रतिशत अर्थात १ अर्ब १९ करोड ३८ लाख रुपैयाँ बराबरको १ करोड १९ लाख ३८ हजार कित्ता हकप्रद सेयर निष्कासन गरेको छ । हकप्रद सेयर निष्कासन बन्द जेठ ३१ गते हुने छ । हकप्रद सेयर बाँडफाँडपछि बैंकको चुक्तापुँजी ७ अर्ब १६ करोड रुपैयाँ पुग्ने छ ।
सिद्धार्थ इन्स्योरेन्सको हकप्रद सेयर असार १७ देखि, बैशाख ३० गतेसम्म कायम रहेकाले भर्न पाउने
काठमाडौं । सिद्धार्थ इन्स्योरेन्स लिमिटेडले असार १७ गतेदेखि हकप्रद सेयर निष्कासन गर्ने भएको छ । कम्पनीले चुक्तापुँजी बढाउन ३५ प्रतिशत अर्थात २२ करोड ४४ लाख ९७ हजार रुपैयाँ बराबरको २२ लाख ४४ हजार ९७३ कित्ता हकप्रद सेयर निष्कासन गर्न लागेको हो । हकप्रद निष्कासन साउन २० गते बन्द हुने निष्कासन तथा बिक्री प्रवन्धक एनएमबी क्यापिटल लिमिटेडले जनाएको छ । बैंशाख ३० गतेसम्म कायम रहेका सेयरधनी मात्र हकप्रद सेयरका लागि आवेदन दिन योग्य हुने भएका छन् । हकप्रद बाँडफाँडपछि कम्पनीको चुक्तापुँजी बढेर ८६ करोड ५१ लाख रुपैयाँ पुग्ने छ । हाल सिद्धार्थको चुक्तापुँजी ६४ करोड १४ लाख रुपैयाँ छ ।
आरएसडीसी लघुवित्तले हकप्रद सेयर निष्कासन गर्दै, असार १७ देखि साउन २० सम्म खुला हुने
काठमाडौं । आरएसडीसी लघुवित्त वित्तीय संस्था लिमिटेडले हकप्रद सेयर निष्कासन गर्ने भएको छ । चुक्तापुँजी बढाउन संस्थाले ५ कित्ता बराबर ३ कित्ता अनुपातमा २१ करोड ५९ लाख ७० हजार रुपैयाँ बराबरको २१ लाख ५९ हजार ७०० कित्ता हकप्रद सेयर निष्कासन गर्न लागेको हो । हकप्रद निष्कासन असार १७ देखि साउन २० गतेसम्म खुला हुने निष्कासन तथा बिक्री प्रवन्धक एनआईबीएल एस क्यापिटल लिमिटेडले जनाएको छ । रुपन्देहीको बुटवलमा केन्द्रीय कार्यलय रहेको आरएसडीसीको हकप्रद बाँडफाँडपछि चुक्तापुँजी ५७ करोड ५९ लाख रुपैयाँ पुग्ने छ । हाल संस्थाको चुक्तापुँजी ३५करोड ९९ लाख रुपैयाँ छ । संस्थामा ६० प्रतिशत संस्थापक र ४० प्रतिशत सर्वसाधारणको स्वामित्व रहेको छ । जेठ २१ गतेसम्म नेपाल स्टक एक्सचेन्ज लिमिटेडमा कारोबार भई कायम रहेका साविकका सेयरधनीले मात्र हकप्रदका लागि आवेदन दिन पाउने छन् ।
