नेपाल टेलिकमको प्रबन्ध निर्देशक कामिनी राजभण्डारी बर्खास्त, पहिलाे महिला एमडीकाे कार्यकाल अपूराे
काठमाडौं । सरकारले नेपाल टेलिकमकी प्रबन्ध निर्देशक कामिनी राजभण्डारीलाई पदमुक्त गरेको छ । मंगलबार बसेको मन्त्रिपरिषद्को बैठकले राजभण्डारीलाई पदमुक्त गर्ने निर्णय गरेको सूचना तथा सञ्चार राज्यमन्त्री गोकुल बास्कोटाले जानकारी दिए । टेलिकममा प्रभावकारी रुपमा काम गर्न नसकेको र कुशल व्यवस्थापकीय क्षमता नदेखाएको आरोप लगाउदै मन्त्रिपरिषद बैंठकले उनलाई हटाउन अघि स्पष्टिकरण सोधेको थियो । स्पष्टिकरणमा ‘तपाईलाई जिम्मेवारीबाट किन बर्खास्त नगर्ने ?’ भन्ने प्रश्न गरिएको छ । करिव एक महिनाअघि प्रधानमन्त्री केपी शर्मा ओलीले कामिनीलाई बोलाएर टेलिकमको गतिविधि प्रति असुन्तष्ठि जनाउदै नेतृत्व फेर्ने संकेत गरेका थिए । राजभण्डारी प्रतिस्पर्धाबाट टेलिकमकी प्रवन्ध निर्देशक भएकी हुन् । यस्तै सञ्चालक समितिले पनि प्रबन्ध निर्देशकको कार्यक्षमतामा प्रश्न उठाउँदै कार्य सम्पादन मूल्यांकन सन्तोषजनक नभएको निर्णय गरेको थियो । सरकारले अप्टिकल फाइबर बिछ्याउने काममा ढिलाइ र टेलिफोनको गुणस्तरमा सुधार गर्न नसकेको आरोप लगाइएको छ । तत्कालीन सञ्चारमन्त्री राम कार्कीका पालामा ०७३ साल असोजमा नियुक्ति पाएकी कामिनीको पदावधि ०७६ सम्म थियो । सञ्चाक समिति र सञ्चार राज्यमन्त्री बास्कोटा उनको कार्यशैली प्रति असन्तुष्ठी जनाउँदै आएका थिए । राज्यमन्त्री बास्कोटाले नेपाल दूरसञ्चार प्राधिकरणको कामप्रति पनि असन्तुष्टि जनाएका छन् । सेयर पुँजीको आधारमा नेपालको सबैभन्दा ठूलो कम्पनीको कार्यकरी प्रमुख पदमा महिला पुगेकी थिइन् । तर उनी उक्त पदमा पूर्ण कार्यकाल रहन सकिनन् । ९५ प्रतिशत सेयर सरकारको स्वामित्वमा रहेको यस कम्पनीमा सत्तारुढ दल निकट मान्छेलाई कार्यकारी प्रमुख बनाउँदै आएको छ । परिणाम यस संस्थाको कार्यकारी प्रमुख पद अस्थीर बन्दै आएको छ । सरकारी स्वामित्मा रहेका कम्पनी मध्ये नेपाल टेलिकम सबैभन्दा बढी नाफा गर्ने र सरकारलाई सबैभन्दा बढी कर बुझाउने संस्था हो । तर पछिल्लो समय नेपाल टेलिकम प्रतिस्पर्धामा पछाडि धकेलिदै गएको छ । मन्त्रीपरिषद्का अन्य निर्णय यस्तै मन्त्रीपरिषद्को बैठकले परराष्ट्र मामिला अध्ययन प्रतिष्ठानको पुनर्गठन गर्ने निर्णय गरेको सञ्चार तथा सूचना प्रविधिमन्त्री गोकुलप्रसाद बाँस्कोटाले जानकारी दिए । बैठकले प्रतिष्ठानमा डिल्लीराज घिमिरे, डा खड्क केसी, प्राडा मीना वैद्य मल्ल, उपरथी हिमालय थापा, हरि फुयाँल, डा शंकर शर्मा, भवानी राणा र लालबाबु यादवलाई तीन वर्षका निम्ति नियुक्त गर्ने निर्णय गरेको छ । सरकारले बालबालिकासम्बन्धी कानूनलाई संशोधन र एकीकरण गर्न बनेको विधेयक, खाद्य तथा खाद्य सम्प्रभुताको अधिकारसम्बन्धी विधेयक र रोजगारीको हक सम्बन्धमा व्यवस्था गर्न बनेको विधेयक संघीय संसद्मा पेश गर्ने निर्णय गरेको मन्त्री बाँस्कोटाले बताए । बैठकले निक्षेप तथा कर्जा सुरक्षण कोषको अध्यक्षमा महालेखा नियन्त्रक सुरेश प्रधानलाई तोक्नुका साथै मेलम्ची खानेपानी आयोजनाको पाइप बिछ्याउने कार्यका लागि बूढानीलकण्ठ क्षेत्रको नौ आना जग्गा अधिग्रहण गर्न स्वीकृति दिने निर्णय गरेको छ । साथै बैठकले बोनस (चौथो संशोधन) नियमावली, २०७५ स्वीकृत गर्ने निर्णय गरेको उहाँले जानकारी दिए ।
फास्ट ट्रयाकमा विदेशी सहायता, निजगढ विमानस्थल विदेशीलाई
काठमाडौं । सरकारले बहुप्रतिक्षित काठमाडौं निजगढ फास्ट ट्रयाक निर्माणमा विदेशी लगानी खोज्ने भएको छ । अर्थमन्त्री डा. युवराज खतिवडाले नेपाली सेनाद्धारा निर्माण प्रक्रिया आरम्भ गरिएको फास्ट ट्रयाकका लागि विदेशी सहायता खोज्ने प्रक्रिया अघि बढेको बताएका हुन् । अर्थमन्त्री डा. खतिवडाले कुन दातृ निकायसँग सहायता लिने भन्नेबारे भने केहि पनि खुलाएनन् ।‘फास्ट ट्रयाकको निर्माणका लागि श्रोत जुटाउन दातृ निकायहरुसँग छलफल भैरहेको छ, ठूला परियोजनाहरुमा आफ्नै श्रोत लगाउँदा विकासमा असन्तुलन हुन्छ, श्रोतले पुग्दैन, त्यसकारण दाताहरुसँग छलफल अघि बढेको छ’, मंगलबार संसदको अर्थ समितिमा डा. खतिवडाले भने । विदेशी सहायता दिने भएपछि फास्ट ट्रयाकको निर्माण भने नेपाल आफैंले गर्ने र नेपाली सेना मार्फत नै अघि बढ्ने पनि उनले स्पष्ट पारे । अर्थमन्त्री डा. खतिवडाले निजगढ विमानस्थलको निर्माणको जिम्मेवारी भने निजी क्षेत्रलाई दिने बताए । उनले निजगढ विमानस्थल निर्माणको जिम्मेवारी निजी क्षेत्रलाई दिने पर्यटन मन्त्रालयसँग आवश्यक छलफल भैरहेका जानकारी दिए ।‘निजगढ विमानस्थलको निर्माण निजी क्षेत्रलाई दिने तयारी भैरहेको छ, पर्यटन मन्त्रालयसँग आवश्यक छलफल जारी छ’, अर्थमन्त्री डा. खतिवडाले भने । उनले निर्माण, सञ्चालन तथा हस्तान्तरण(बुट) मोडलमा निजगढ विमानस्थल बनाउने बताए । बुट मोडलमा निर्माण गर्न विदेशी कम्पनीहरुलाई दिनुपर्नेछ । यसअघि कोरियाली कम्पनी ल्याण्डमार्क वर्र्डवाइड(एलएमडब्ल्यु)ले निजगढ विमानस्थलको विस्तृत सम्भाव्यता अध्ययन गरेको थियो । सो रिपोर्टको स्वामित्व हस्तान्तरणका लागि एलएमडब्ल्युले ३५ लाख अमेरिकी डलर मागेको छ । काठमाडौंदेखि निजगढसम्म ७६ किलोमिटर लामो फास्टट्रयाक ४० मिनेट मै पार गर्न सक्ने छ । फास्टट्रयाक बनाउन १ खर्ब १० अर्ब रुपैयाँ भन्दा बढी लाग्ने संभाव्यता अध्ययनले देखाएको छ । यो राजधानीलाई तराई मधेश जोड्ने छोटो दुरीको सडक हो ।
मेगा बैंकको नाफा ३२ प्रतिशत बढ्यो, गत वर्ष १ अर्ब ४ करोड पुग्यो
काठमाडौं । गत आर्थिक वर्ष ०७४/०७५ मा मेगा बैंकको खुदनाफा ३२ प्रतिशत बढेको छ । गत वर्ष बैंकले १ अर्ब ४ करोड ६६ लाख रुपैयाँ खुदनाफा गरेको छ । छोटो अवधिमै बार्षिक नाफा १ अर्ब रुपैयाँ नाघ्नुलाई ऐतिहासिक सफलताको रुपमा लिएको बैंककी प्रमुख कार्यकारी अधिकृत (सिइओ) अनुपमा खुञ्जेलीले बताइन् । बैंक अब अर्ब रुपैयाँ नाफा गर्ने क्लवमा समावेश भएको उनले जानकारी दिइन् । गत बैशाख ३० गते टुरिजम डेभलपमेन्ट बैंकसँग मर्जर भएकाले ९ महिनाको नाफाबाट १४ करोड रुपैयाँ संचित कोषमा राखेको उनले बताइन् । योसहित जोड्ने हो भने बैंकले गत आर्थिक बर्षमा १ अर्ब १९ करोड रुपैँया नाफा गरेको छ । मेगाको ग्राहक संख्या ९० प्रतिशतले बढेर गत आर्थिक बर्ष ४ लाख ९६ हजार पुगेको बैंकले जनाएको छ । आर्थिक बर्ष २०७३/०७४ मा निक्षेप ३८ अर्ब ९४ करोड रुपैयाँ भएकोमा २०७४/७५मा ६२ अर्ब रुपैयाँ पुगेको छ । एक वर्षमा बैंकको निक्षेप परिचालन २४ अर्ब ३ करोड रुपैयाँ बढेको बैंकले जानकारी दिएको छ ।यसैगरी, सोही अवधिमा २२ अर्ब ७ करोड रुपैयाँ बढेको छ । कुल कर्जा ३५ अर्ब १९ करोड रुपैँयाले वृद्धि भई ५७ अर्ब २६ करोड रुपैँया पुगेको हो । बैंकको शाखा संख्या १०१ वटा पुगेको छ । गत आर्थिक बर्षमा बैंकको ४७ वटा शाखा मात्र थियो । मेगाका १४ वटा एक्टेनशन काउन्टर, ११९ वटा शाखारहित बैंकिङ सेवा, २ हजार भन्दा बढी मेगा रेमिट सञ्जाल र ७४ वटा एटीएम छन् ।
ब्रिटानीयाको गुड डेले प्रियंकासँग शुरु गर्यो टेलिभिजन विज्ञापन
काठमाडौं । ब्रिटानिया इण्डस्ट्रिज लिमिटेडले आफ्नो प्रमुख ब्राण्ड गुड डेको टेलिभिजन विज्ञापनमा चर्चित नायिका प्रियंका कार्कीलाई ब्राण्ड दुतको रुपमा प्रस्तुत गरेको छ । सन् १९१८ मा स्थापनाभएको ब्रिटानियाले स्थापनाको सय वर्ष पुरा गरेको अवसरमा टेलिभिजन विज्ञापन सार्वजनिक गरेको हो । २० प्रतिशत बजार हिस्सा ओगट्दै ब्रिटानिया अहिले नेपालको बिस्कुट बजारको अग्रणी कम्पनी बन्न सफल भएको छ । साथै गुड डे नेपाली बिस्कुट बजारको सबैभन्दा ठूलो ब्राण्डको रुपमा स्थापितपनि भैसकेको कम्पनीले जनाएको छ । कम्पनीको अघिल्ला बर्षहरुमा वितरणको विस्तार ३० प्रतिशतले वढेर ७०,००० आउटलेट पुगेको छ । साथै, भविश्यमा ब्रिटानियाले नेपालमै स्थानिय उत्पादन गर्ने लक्ष्य लिएको छ । प्रियंकाकार्कीलाई राखेर बनाइएको अभियान “स्माइलमोर फर अ गुड डे” को मनोभाव नै आफ्नो मुस्कान पत्ता लगाउनुहोस् र संसारसँग बाँडेर अझ बढाउनुहोस् भन्ने हो । एउटा सरल महिला सबैसँग मुस्कान बाँड्दै आफ्नो दैनिक कार्यमा जाँदै गरेको कथा यस टेलिभिजन विज्ञापनले सुन्दर रुपमा चित्रण गरेको छ । पृष्ठभुमीको ह्रृदयस्पर्शी गीत “मुस्कुराउनुमा कन्जुसी किन” ले “स्माइल मोर” को सन्देशलाई आत्मसाथ गर्दै चलचित्रको भावमा रौनकता प्रदान गरेको छ । ब्रिटानिया इण्डस्ट्रिज लिमिटेड, अन्तर्राष्ट्रिय व्यापारका उपाध्यक्ष अनिन्द्य दत्तले भने, “भाषा, वर्ण, वर्ग र विचारलाइ चिर्ने मुस्कान एउटा विश्व व्यापी ईशारा हो । एक अध्ययन अनुसार मुस्कान सजिलै सर्दछ र यो सरल ईशाराले संसारको हरेक कुनाकाजो कसैको दिन चम्किलो बनाउन सक्छ । तर आजको दु्रतगतिको संसारमा हामी आफ्नै अगाडी उभिएको मानिससँग पनि मुस्कुराउनमा कन्जुसाईं गर्छौं । गुड डे ब्राण्डको साथमा हामी विश्वास गछौं की हामी जति मुस्कुराउँछौं संसार त्यति नै अझ सुन्दर ठाऊँ हुनेछ ।” उनले थपे, “यो अभियानको थालनी हामीले नेपाली दर्शक श्रोताहरुका लागी बनाएका हौं ।” प्रियंका कार्कीले भनिन् , “ब्रिटानिया गुड डेको “स्माइलमोर फर अ गुड डे”को अभियानले यहाँका मानिसहरुलाई मुस्कानको आदान प्रदान गर्न सम्झाउँदै यसको वानी बसाउन सघाउनेछ किनकि सबैलाई थाहा छ मुस्कुराउन पैसा पर्दैन ।”
आरएमडीसीकाे एकदिने अन्तर्क्रिया कार्यक्रम सम्पन्न, २८ जना प्रतिनिधीको सहभागिता
काठमाडौं । आरएमडीसी लघुवित्त वित्तीय संस्था लिमिटेडद्धारा आयोजित १ दिने अन्तर्क्रिया कार्यक्रमको सम्पन्न भएको छ । वित्तीय पहुँच अभिवृद्घी तथा उद्यमशिलाको विकासमार्फत देशमा आत्मनिर्भरता अभिवृद्धी र गरिबी न्यूनीकरण गर्न आरएमडीसी र सहकारी संस्थाहरुको साझेदारी बारेमा जानकारी गराउने उद्देश्यले उक्त कार्यक्रमको आयोजना गरिएको हो । इटहरीमा आयोजित उक्त कार्यक्रममा नेपालका पुर्वी भागमा रहेकोका विभिन्न सहकारी संस्थाहरु, ग्रामीण उद्यम तथा विप्रेषण (समृद्धी) आयोजनासँग सहकार्य गरिरहेका सहकारी संस्थाहरु र प्लान इन्टरनेशनल तथा सेवक नेपालद्धरा प्रवद्र्धन गरेका विभिन्न सहकारी संस्थाका २८ जना प्रतिनिधीहरुको उपस्थीति रहेको थियो । कार्यक्रमको अध्यक्षता आरएमडीसीका वरिष्ठ प्रबन्धक पृथबहादुर थापाले गरेका थिए भने कार्यक्रमको संचालन इटहरी शाखाका शाखा प्रबन्धक गोबिन्दप्रसाद पौडेलले गरेका थिए । आरएमडीसीले संस्थागत विकास तथा क्षमता अभिवृद्धीका लागी सहयोगी भुमिका निर्वाह गर्दछ भने वित्तीय सुशासन कायम नगर्ने, नितीनियम भन्दा बाहिर जाने सहकारीहरुसँग आरएमडीसी कडा रुपमापनि प्रस्तुत हुने हुँदा बजारमा आरएमडीसी एउटा ब्राण्डको रुपमा रहेको प्रबन्धक थापाले बताए । उनले कसरी आरएमडीसी र सहकारी संस्थाहरुको साझेदारीमा कसरी संस्थाहरुको संस्थागतविकास तथा क्षमता अभिवृद्धी, वित्तीय पहुँच अभिवृद्धी गरी उद्यमशिलताको विकास मार्फत आत्मर्निभर भै गरिबि न्युनीकरण गर्न सकिन्छ भन्ने बारेमा पनि चर्चा गरेका थिए ।
सुबिसुको पाचौं सेल्स आउटलेट कलंकीमा
काठमाडौं । सुबिसु केवलनेट प्रा. लि.ले आफ्नो पाचौं सेल्स आउटलेट “सुविसु स्टेसन” काठमाडौंको कलंकीमा सञ्चालन गरेको छ । उक्त आउटलेटको उद्घाटन कम्पनीका सञ्चालक सुरेन्द्रबहादुर श्रेष्ठले गरेका हुन् । यस स्टेसनबाट सुबिसुले कलंकी तथा यस क्षेत्र वरिपरिका ग्राहकहरुलाई सुबिसुको सेवासगँ सम्बन्धित सम्पुर्ण जानकारीहरु प्रदान गर्नुका साथै सेवाहरुको बिक्रि तथा वितरण गर्ने छ । साथै, सेवापछिको आफ्टर सेल्स सपोर्ट आफ्ना दक्ष तथा अनुभवि कर्मचारीहरुबाट प्रदान गर्नेछ । यसका साथै, हाल सुबिसु स्टेसनहरु ललितपुरको झम्सीखेल, काठमाडौंको रानीबारी, सुकेधारा, दिल्लीबजार र कलंकीमा रहेका छन् । साथै कम्पनीको आगामी दिनहरुमा आफ्ना विभिन्न क्षेत्रका ग्राहकहरुको आवश्यकता परिपूर्ती गर्न विभिन्न स्थानहरुमा थप आउटलेटहरु स्थापना गर्ने योजना रहेको छ । सुबिसु नेपालको पहिलो कम्पनी हो जसले एउटै तारबाट ग्राहकहरुलाई ईन्टरनेट र टिभी सेवा प्रदान गर्दछ ।
गरिमा विकास बैंक र देवः विकास बैंकबीच रेमिट सम्झौता
काठमाडौं । देवःविकास बैंकले गरिमा रेमिट सेवा प्रदान गर्ने सम्बन्धमा गरिमा विकास बैंकसँग सम्झौता गरेको छ । मंगलबार(आज) सम्पन्न उक्त सम्झौतामा गरिमा विकास बैंकको तर्फबाट प्रमुख कार्यकारी अधिकृत गोविन्दप्रसाद ढकाल र देवःविकास बैंकको तर्फबाट प्रमुख कार्यकारी अधिकृत विजयबहादुर श्रेष्ठले हस्ताक्षर गरेका छन् । यस सम्झौता पछि देवःविकास बैंकका जुनसुकै शाखा कार्यालयबाट गरिमा रेमिट मार्फत रकम पठाउन भूक्तानी गर्न तथा खातामा जम्मा गर्न सकिने गरिमा विकास बैंकका प्रमुख कार्यकारी अधिकृत गोविन्दप्रसाद ढकालले बताएका छन् । हाल बैंकको कुल ५१ वटा शाखा कार्यालयहरु सञ्चालनमा रहेका छन् ।
उद्योग मन्त्रालयको समिक्षा: घरेलु र सैनिक उत्कृष्ट, आयल निगम झुर
काठमाडौं । उद्योग वाणिज्य तथा आपुर्ति मन्त्रालयले आफु सहित मतहतका विभिन्न विभाग,समिति र कार्यालयहरुको वार्षिक कार्य प्रगति मूल्याङकन गरेको छ । आर्थिक वर्ष २०७४ र ०७५ मा घरेलु तथा साना उद्योग विभाग (जिल्ला) र सैनिक सामाग्री उत्पादन तथा यान्त्रिक सेवा महानिर्देशनालय कार्यसम्पादनमा उत्कृष्ट बन्दा अबौंको कारोबार गर्ने आयल निगम सबैभन्दा झुर गर्ने निकायमा दर्ज भएको छ । मन्त्रालयलको समिक्षा विवरण अनुसार घरेलुले १०३.५० प्रतिशत कार्यप्रगति गरेको छ भने सैनिकले १०० प्रतिशत कार्यप्रगति गरको छ । ८० प्रतिशत भन्दा बढी कार्यप्रगति गर्ने ९ वटा विभाग तथा कार्यालय रहेका छन् । जसमा साल्ट ट्रेडिङ कर्पोरेशन लिमिटेड, नेपाल गुणस्तर तथा नाप तौल विभाग, पेट्रोलियम अन्वेषण परियोजना, खानी तथा भूगर्भ विभाग, घरेलु तथा साना उद्योग विकास समिति, कम्पनी रजिस्टर कार्यालय र उद्योग वाणिज्य तथा आपुर्ति मन्त्रालय रहेका छन् । यसैगरी ५० देखि ८० प्रतिशत कार्य प्रगति गर्नेमा उद्योग विभाग, सडक विभाग, नेपाल विद्युत प्राधिकरण लगायत १६ वटा कार्यलय तथा विभाग रहेका छन् । यस्तै ५० प्रतिशत भन्दा कम कार्यप्रगति गर्नेमा ५ वटा कार्यालय तथा विभाग रहेका छन् । सबैभन्दा कम कार्यप्रगति गर्नेमा आयल निगम रहेको छ । उसले वर्षभरीमा जम्मा १४ प्रतिशत भन्दा मात्रै कार्यप्रगति गरको छ । आर्थिक वर्ष ०७४/०७५ ५० प्रतिशतभन्दा कम प्रगति गर्नेमा नेपाल भारत क्षेत्रिय व्यापार तथा पारवहन आयोजना, केन्द्रिय कारागार कारखाना र ग्रामिण उद्यम तथा विप्रेषण आयोजना रहेका छन् । मन्त्रालयले मुख्य उपलब्धीहरुमा नवलपरासीको धौवादी फलाम अन्वेषणमा भएको प्रगति, धादिङको चुनढुङगामा भएको प्रगति, निजी क्षेत्रको ४ अर्ब लगानी भई भैरहवामा स्थापना हुने उद्योगले ३ हजार जनालाई रोजगारी दिने लगायत विषयलाई मूख्य उपलब्धीको रुपमा लिएको छ ।
