नागढुङ्गादेखि कलङ्कीसम्मका घरमा एकै रंग लगाइने, १२ सय बत्ति जडान गरी झिलमिल बनाइदै सडकखण्ड
काठमाडौं । राजधानी प्रवेश गर्ने मुख्यद्वार रहेको नागढुङ्गा–कलङ्की सडकको दायाँबायाँ सुन्दर हुने भएको छ । चन्द्रागिरि नगरपालिकाले सोलारबत्ती जडान, वृक्षरोपण एवं घरधनीलाई एकै किसिमको रङ्ग रोगन गर्न लगाई सडकखण्डलाई आकर्षित गर्न लागेको हो । नगरप्रमुख घनश्याम गिरीले भने “नगरपालिकाले सडकखण्डको दायाँबायाँ करीब एक हजार २०० सोलारबत्ती जडान, वृक्षरोपण एवं नगरबस सञ्चालनको अन्तिम तयारीमा जुटेको छ । यात्रु चढ्ने र ओर्लने स्थानमा विद्युतीय स्मार्ट प्रतिक्षालय हुने छ ।” नगरप्रमुख गिरीले सडक विस्तार कार्य छिटो निर्माण सम्पन्न गर्न सरकारसँग आग्रह गरे। केन्द्रीय सरकारले आवश्यक बजेट र निर्माणको अख्तियारी दिएमा तीन महिनाभित्र सडक निर्माण कार्य सम्पन्न गर्न नगरपालिका तयार रहेको जनाएको छ । नगरपालिकाले खानेपानी सरसफाइ, वातावरण तथा विपद् व्यवस्थापन, शहरी आवास तथा भौतिक पूर्वाधारको विकास, शिक्षा, स्वास्थ्य तथा खेलकूद, सामाजिक सुरक्षा तथा विकास, पर्यटकीय पूर्वाधारको विकास, कृषि, वन, पशु, संस्थागत सुशासन तथा सेवा प्रवाह, सम्पदा संरक्षणलगायतका क्षेत्रलाई आफ्नो प्राथमिकताको क्षेत्र बनाएको छ । जमीन बाँझो राख्नेलाई कर लगाउने एक वडा एक उद्यान, जमीन बाँझो राख्नेलाई कर लगाउने, नगरक्षेत्रमा सुपथमूल्य पसल सञ्चालन, एक घर दुई बिरुवा नीतिमा कडाइ, सामुदायिक अस्पताल निर्माण, नगरपालिकाभित्रका परम्परागत एवं जीवन्त बाजा, पर्व संरक्षण तथा प्रवद्र्धन गर्ने नीति पनि नगरपालिकाले लिएको छ । काठमाडौँको सबैभन्दा ठूलो नगरपालिकाका रुपमा रहेको सो नगरपालिकाले सामाजिक सेवासँग सम्बन्धित रहेका प्रमुख सिफारिशलाई निःशुल्क बनाएको छ । ती सेवामा नागरिकताको प्रमाणपत्र सिफारिश, जन्म दर्ता, विवाह दर्ता, बसाइँसराइ दर्ता, सम्बन्धबिच्छेद दर्ता, मृत्यु दर्ता, छात्रवृत्ति सिफारिश, स्वास्थ्य, पेन्सन, रातोकार्ड प्राप्त भूकम्पपीडितका नक्शापास दस्तुर छुटसम्बन्धी सिफारिशलगायतका रहेका छन् । साविकका नयाँभञ्ज्याङ, बाडभञ्ज्याङ, पुरानो भञ्ज्याङ, बलम्बु, महादेवस्थान, तीनथाना, सतङ्गल, मातातीर्थ, मच्छेगाउँ, नैकाप गाविस समेटेर २०७१ मङ्सिर १६ गते सरकारले सो नगरपालिका घोषणा गरेको थियो । पछिल्लो जनगणनाअनुसार नगरपालिकाको जनसङ्ख्या ८६ हजार १९८ र घरधुरी सङ्ख्या २० हजार ५३२ रहेको छ । रासस
डोनाल्ड ट्रम्पले पोर्न स्टार मार्फत चुनावमा पैसा बाँडेको पुष्टि, महाअभियोगको सम्भावना
न्यूयोर्क । अमेरिकी अदालतले अमेरिकी राष्ट्रपति डोनाल्ड ट्रम्पमाथि सन् २०१६ को चुनावी अभियानमा वित्तीय नियमको उल्लङ्घन गरेको आरोप लगाएको छ भने उनका दुईजना नजिकका सहियोगीमाथि जेल सजाय तोकेको छ । राष्ट्रपति ट्रम्पकै आदेशमा चुनावी रकम गैरकानुनी भुक्तानी भएको उनका पूर्व सहयोगी माइकल कोहेनले अदालतसमक्ष बयान दिएका छन् । अमेरिकाकै दुई सहरमा सन् २०१६ को चुनावताका भएका रकम दुरुपयोगका विषयमा अदालतले सुनुवाई गरिरहेका छन् । ट्रम्पका लामो समयदेखिका कानुन व्यवसायी माइकल कोहेनले चुनावी प्रचारको रकमको दुरुपयोग भएको स्वीकारेका कारण न्यूयोर्कको अदालतले उनीमाथि आठवटा मुद्दामा दोषी ठहर गरेको छ । कोहेनले पोर्नस्टार स्टोर्मी ड्यानियल्स र प्लेब्वाय मोडेल कारेन म्याकडगललाई कानुन विपरीत चुनावी प्रचारको रकम भुक्तान गरेको अदालत समक्ष जानकारी गराएका छन् । भुक्तानी गरिएका दुवैसँग ट्रम्पको नाजायज सम्बन्ध रहेको बताइन्छ । विगतदेखि नै चर्चामा रहेको यो मुद्दाको राजनीतिक र कानुनी महत्व रहिआएको छ । यस खुलासाले ट्रम्पमाथि चर्को दबाब सिर्जना हुने अड्कलबाजी गरिएको छ । कोहेनले राष्ट्रपति ट्रम्पमाथि नै औंला ठड्याएका छन् । राष्ट्रपति ट्रम्पकै आदेश र संयोजनमा आफूले रकम भुक्तानी गरेको कोहेनको भनाई छ । “यो रकम भुक्तानी गर्दा चुनावलाई प्रभावित पार्ने नै उद्देश्य थियो,” न्यायाधीश समक्ष कोहेनले भने । खचाखच भरिएको अदालतको इजलासमा बयान दिँदा कोहेन थरथर काँपेका थिए । यो स्वीकारोक्तीले राष्ट्रपति ट्रम्पमाथि कानुनी जोखिम उत्पन्न गराएको छ । ट्रम्पका कानुनी सल्लाहकार रुडी जिउलियानीले अमेरिकी सञ्चार माध्यममा पठाएको वक्तव्यमा भनिएको छ, “राष्ट्रपतिका विरुद्धमा कोहेनले कुनै गलत आरोप लगाएका छैनन् ।” कोहेनको नाटकीय बयान सार्वजनिक भइरहेको अवस्थामा भर्जिनियाको जुरीले राष्ट्रपति ट्रम्पका चुनावी अभियानका अध्यक्ष पल म्यानाफोर्ट दोषी रहेको ठहर गर्दै आठवटा मुद्दामा सजाय गर्ने आदेश दिएको छ । उनीमाथि बैंक धोखाधडी, कर छली गरेको र विदेशी बैंक खातासम्बन्धी स्वघोषणा नगरेको लगायतका आरोप लागेको छ । यी समाचार प्रसार हुनासाथ ट्रम्पले खेद व्यक्त गर्दै म्यानाफोर्ट “असल मानिस” रहेको प्रतिक्रिया दिएका छन् । “मलाई अति दुःख लागेको छ,” ट्रम्पले पश्चिम भर्जिनियामा आयोजित मध्यावधि चुनावी सभाकै क्रममा संवाददाताहरुलाई भने । “जे भएको छ त्यो ज्यादै दुःखद छ, र चुनावका समयमा रुससँग कुनै साँठगाँठ थिएन ।” तर पछिल्लो समय ट्रम्पले म्यानाफोर्टसँग आफूलाई टाढा राख्न थालिसक्नु भएको छ । अमेरिकी कानुनी परम्परामा राष्ट्रपतिमाथि अदालतमा मुद्दा लाग्दैन, तर अभियोगहरु यदि प्रमाणित भएमा संसदमा महाभियोग लाग्न सक्दछ । आगामी नोभेम्बरमा हुने कङ्ग्रेसको मध्यावधि चुनावमा यो मुद्दा पेचिलो बन्नेछ । “मध्यावधि चुनावमा महाभियोगको विषयले प्रमुखता अवश्य पाउनेछ,” रिपब्लीकन रणनीतिकार तथा ट्रम्पका आलोचक रोब स्टजम्यानले भने । “डेमोक्रेटहरुले त यो विषय अवश्य जनतासमक्ष जोडतोडले राख्नेछन् ।”
८ तले स्मार्ट पार्किङको सोमबार टेण्डर, १ अर्बमा १६० वटा कार अट्ने यस्तो बन्दैछ ई-पार्किङ
काठमाडौं । काठमाडौं महानगरले स्मार्ट पार्किङको लागि आगामी सोमबार बोलपत्र आब्हन गर्ने भएको छ । महानगरले स्वदेशी वा विदेशी दुबै कम्पनीहरुलाई काम गर्न पाउने गरी बोलपत्र आब्हान गर्न लागेको हो । बोलपत्रको अन्तिम तयारी भैरहेको महानगरका पुर्वाधार प्रमुख महेश काफ्लेले बताए । “हामीलाई जनता र मेयरबाट यति दबाब आइसक्यो कि हामीले कुनै हालतमा यो काम गर्नु पर्ने अवस्था छ, यस आयोजना १ अर्ब रुपैंयामा निजी क्षेत्रलाई दिने तयारी गरेका छौं, काफ्लेले भने आइतबारसम्ममा आयोजनालाई अन्तिम रुप दिन सकिए सोमबार बोलपत्र आब्हान गर्नेछौ ।” काफ्लेका अनुसार बोलपत्रका लागि १५ दिनको समयअवधि दिइनेछ । त्यसपछिको १५ दिनमा कम्पनी छनोट गरिनेछ । आवश्यक प्राविधिक र दक्ष जनशक्तिको अभावमा काम छिटो सञ्चालन गर्न नसकिएको महानगरका प्रवक्ता ज्ञानेद्र कार्कीले बताए । उनले भने हाम्रो देशमा दक्ष प्राविधिक जनशक्ति रहेको छैन, यसको लागि अन्तर्राष्ट्रिय जनशक्ति आवश्यक हुन्छ । त्यसैले समयमै काम शुरु गर्न नसकिएको हो । स्मार्ट पार्किङ महानगरको महत्वपुर्ण काम भएकोले अब अघि बढ्नेछ । पार्किङ निर्माणको लागि धर्मपथमा महानगरले २ रोपनी जग्गा तयार गरिसकेको छ । यस पार्किङमा भर्टिकल पार्किङ, अन्डरग्राउन्ड पार्किङ गर्न सकिनेछ । ई पार्किङमा केहि समयमै सजिलै सवारी पार्किङ गर्न सकिनेछ । पुराना पार्किङ भन्दा ई पार्किङ आर्थिक रुपले सस्तो पर्न जाने महानगरले विस्वास गरेको छ । यस पार्किङमा १५० वटा कार पार्किङ गर्न सकिनेछ । बागबजार, खिँचापोखरी, कलंकी, महाराजगन्ज, सामाखुसी, कोटेश्वर, बल्खु, कौशलटार, जडीबुटी, बानेश्वर, तीनकुने, न्युरोडलगायत क्षेत्रमा पार्किङ नहुँदा सडकमै सवारीसाधन पार्किङ गर्ने गरिएको छ । काफ्लेका अनुसार दरबारमार्गमा पनि साइकल, मोटरसाइकल, कार, जीप लगायतको सवारी पार्किङ गर्न सकिने गरि स्मार्ट पार्किङ निर्माण गरिनेछ । स्मार्ट पार्किङमा अग्रीम बुकिङ समेत गर्न सकिनेछ । पार्किङबाट कति रकम तोक्ने पछि नै निर्णय हुने पुर्वाधार प्रमुख काफ्लेले बताए । प्रत्येक तलामा २० वटासम्म कार पार्किङ गर्न सकिनेछ । १ देखि माथिल्लो तलामा इलेक्ट्रिक मार्फत कार राख्न र निकाल्न सकिनेछ । आयोजना एक वर्ष ढिलो गरि शुरु हुने भएको हो । काठमाडौंमा पार्किङको समस्या कम गर्नको लागि धर्मपथ, दरबारमार्ग लगायतको स्थानमा बनाउन २०७४ ०७५ कै नीति तथा कार्यक्रममा समेटेको थियो । यस्तो बन्नेछ पार्किङ भिडियो
८ अर्ब लगानीमा एसियाकै उत्कृष्ट अपार्टमेन्ट पोखरामा बन्दै, तीन वर्षमा सम्पन्न हुने
पोखरा । गण्डकी प्रदेशको पर्यटकीय नगरी पोखरामा एसियाकै उत्कृष्ट ‘लेक भ्यु रिसोर्ट एण्ड अपार्टमेन्ट’ निर्माणको काम अगाडि बढेको छ । बि एण्ड बि प्रालीद्धारा निमार्ण हुन थालेको सो अपार्टमेन्टले नेपालकै पर्यटन क्षेत्रको चलायमान बनाउने दावी कम्पनीले गरेको छ । रियलस्टेट क्षेत्रमा २५ वर्षदेखि काम गरेका पोखराका सफल युवा व्यवसायीको लगानीमा परियोजना अगाडी बढेको हो । पोखरा महानगरपालीका १८ स्थित फेवातालको उत्तर पश्चिम सेदीमा अवस्थित ३६ रोपनी क्षेत्रफलमा एसीयाकै नमुना अपार्टमेन्ट बन्ने दावी परियोजनाका प्रवन्ध निर्देशक बिमल बसेलले जानकारी दिए । तीन वर्षमा सम्पन्न गर्न सो परियोजना ८ अर्ब रुपैयाँको लागतमा निमार्ण हुने भएको हो । अपार्टमेन्टमा ‘३ तलाको पार्किङसहित १८ तला सम्म अपार्टमेन्ट निर्माण हुन्छ,’ बसेलले भने , ‘पोखरामा अन्तर्राष्ट्रिय विमानस्थल बनिसक्दा आफूहरु पनि सेवाका लागि तयार भइसक्नेछौं ।’ परियोजनाका बारेमा बोल्दै बसेलले भने- पर्यटन क्षेत्रमा गण्डकी प्रदेश सरकाले लिएको लक्षलाई पुरा गर्ने पनि यो आवश्यक छ । प्रदेश सरकाले यस क्षेत्रलाई लगानी मैत्री बनाउन लगानी सम्मेलन गदै छ । स्थानीय व्यवसायीको अगुवाईमा सञ्चालन हुने सो परियोजनाले पोखरामा लगानी गर्ने वातावरण सिर्जना भएको व्यवसायीहरुले बताएका छन् । एसियाकै नमुना अपार्टमेन्टमा २ वटा विल्डिङमा ४ सय ६४ वटा अपार्टमेन्ट निर्माण गरिने सो कम्पनीका ईन्जीनीयर बिक्रम थापाले जानकारी दिए । ‘टाइम सेयरिङ’ अवधारणाबाट अपार्टमेन्ट निर्माण हुने छ । अपार्टमेन्टका आफ्नै विशेषता छन्,’ प्रबन्ध निर्देशक बसेलले भने- अपार्टमेन्टले संसारभरका मानिसहरुलाई दोस्रो घरको याद दिलाउनेछ ।’ जसमा २ वटा रेस्टुरेन्ट, २ वटा स्विमिङ पुल, सुपरमार्केट, ट्राभल सुविधा, मनि चेञ्जर, व्युटिपार्लर, स्पा, सैलुन, हेल्थ क्लब, पेन्ट घर लगायत मानवीय आवश्यकता प्रशस्त सुविधा रहने छन् । अपार्टमेन्टको बार्दलीबाट फेवाताल, पोखरा, शान्तिस्तुपा लगायत पोखरा वरपरका सुन्दर दृश्यहरुको दृश्यावलोकन गर्न सकिनेछ । नमुनायोग्य प्रोजेक्टले पोखराको पर्यटन क्षेत्रलाई ब्राण्डिङ गरेर संसारभर चिनाउन योगदान पुर्याउने कम्पनीका अध्यक्ष बिमला बसेलले बताए । परियोजना निर्माण हुने स्थान सम्याउने काम सकिएको निर्देशक राम बसेलले जानकारी दिनु भयो । अपार्टमेन्टका विशेषताहरु सेभेन स्टार स्तरको हुने छ । संसारकै उत्कृष्ट अवधारणाबाट निमार्ण हुने अपार्टमेन्टको बुकिङसमेत सुरु भएको छ । १ करोड ३३ लाख रुपैयाँदेखि २ करोड ८९ लाख रुपैयाँसम्मका अपार्टमेन्ट खरिद गर्न सकिनेछ । प्रि लन्चिङको अवसरमा ५ प्रतिशत छुटको व्यवस्था गरिएको छ कम्पनिको भनाई छ । प्रि लन्चिङका अवसरमा झण्डै ९० बटा अपार्टमेन्ट बुकिङ भएको बताईएको छ । यता पोखरा सागुरो हुँदै गएको छ सानासाना घरले पोखरालाई अव्यवस्थित बनाउने भएपछि महानगरले मापडण्डमा थप उदार हुन थालेको छ । हालसम्म पोखरा ३५ फिटको अनुमती लिएर ११ तलाका होटल बनेका छन । सोहीलाई आधार मानेर महानगरले उचाईको मापडण्डलाई परिमार्जन गर्ने थालेको छ । उचाईको मापदण्ड बढाउने प्रकृया अगाडी बढाएको महानगरका नक्सा शाखा प्रमुख ईन्जिनियर पुर्ण गुरुङले बताए ।
दोस्रो एका अस्ट्रेलियन एजुकेसन फेयर हुँदै
काठमाडौं। विदेशमा उच्च शिक्षा हाँसिल गर्न चाहने नेपाली विद्यार्थीहरुको लागि अस्ट्रेलिया एउटा आकर्षक र उपयुक्त शैक्षिक गन्तब्यका रुपमा स्थापित भईसकेको छ। अस्ट्रेलिया अध्ययन गर्न जान चाहने नेपाली विद्यार्थीहरुको संख्या पनि दिनानुदिन बृदि भैरहेको छ। उच्च शिक्षाको लागि आकर्षक गन्तब्य बनिरहेको अस्ट्रेलिया अध्ययन गर्न जाने सोचमा रहनुभएका विद्यार्थीहरुको हितलाई मध्यनजर गर्दै अस्ट्रेलियामा रहेका शैक्षिक परामर्स केन्द्रहरुको साझा छाता संगठन अस्ट्रेलिया एजुकेसन कन्सल्ट्यान्ट् एलाईन्स (एका) ले अगस्ट २४ र २५ (भाद्र ८ र ९ गते) दोस्रो अस्ट्रेलिया शैक्षिक मेलाको आयोजना गर्दैछ। प्लस टु सकेर अस्ट्रेलिया उच्च शिक्षाको अध्ययनको लागि जाने क्रम बढीरहँदा विद्यार्थीसंगै अभिभावकहरुको समेत उत्तिकै जिम्मेवारी रहेकोले मेलामा एकाको नारा ” विद्यार्थीसंगै अभिभावक” रहेको छ। होटल अन्नपूर्णमा आयोजना हुने शैक्षिक मेलामा अस्ट्रेलियाका सात वटा कालेज तथा २२ वटा शैक्षिक परामर्सदाताहरुको प्रत्यक्ष सहभागी रहने उनिहरुले जनाएको छ। दुई दिन सम्म चल्ने शैक्षिक मेलामा अस्ट्रेलियाको शैक्षिक अवस्था, विद्यार्थी तथा अभीभावकको जिम्मेवारी, पढाई खर्च र पढ्ने बिषय, कलेज तथा बिस्वोबिद्यालयका बारेमा बिशेष जानकारी उपलब्ध गराउने जानकारी समेत् दिए।
यसकारण संघीयता महंगो भएको छ : भीम उपाध्याय
संघीयता महंगो भयो भनेर हल्ला त खुब मच्चाईएको छ । तर यो कसरी महंगो हुन पुग्यो ? यसमा कसैले ध्यान दिएको छैन १. पहिला ४१४६ वटा निकाय निकाय वा सरकारहरू थिए । अहिले ७६१ सरकार मात्र छन् । २.पहिले २ लाख निर्वाचित जनप्रतिनिधि थिए अहिले ३९ हजार मात्र छन् । ३ पहिले ६० जनासम्म मन्त्री थिए अहिले ११५ जति छन्। ४. पहिले २०५ सांसद थिए अहिले ८८० छन्। ५. पहिले ७५ जिल्ला थिए अहिले ७७ छन् । ६. पहिले सेनाप्रहरी गरी ५० हजार थिए अहिले २ लाख छन् । ७. पहिले निजामति कर्मचारी १ लाख थिए । अहिले ८० हजार छन् । ८. पहिले करिब १५० जना न्यायाधीश थिए अहिले ४०० जति छन् । ९. पहिले नेताहरूले गाडी तेल तलब खासै लिदैन थिए । सेवाभावले राजनीति गर्थे अहिले सबै नेता र तिनका आसेपासेलाई तलब गाडी तेल सुविधा लिनुपर्छ जागिरेभावले नेता बनेका छन् । १०. पहिले खासै खर्च नगरी चुनाव लड्थे जित्थे अहिले करोडौं खर्च नगरी चुनाव जितिन्न जितेपछि कैयन गुणा असुल्नुपर्छ। ११. पहिले माफियातन्त्र थिएन । अहिले अधिकॉश नेता माफिया र अण्डरवर्ल्डका मतियार छन् । १२. पहिले नेताहरू ट्याम्पु बस पनि चढ्थे ती अक्सर बाटामा भेटिन्थे तर अहिले ल्याण्डक्रुजर भन्दा सस्तो गाडी चढ्दा हिनभावना पाल्छन् । १३. पहिले ईमानलाई सूत्र बनाईन्थ्यो अहिले लुटलाई धर्मकर्म मानिन्छ । १४. पहिले कानुन न्याय पुण्य समाजमा ईज्जतलाई महत्व दिईन्थ्यो अहिले सर्बभक्षी हुनमा लाज घीन पाप मान्दैनन् । तसर्थ, संघीयताका कारणले हैन, मगज मक्किएर कुहिएर यो व्यवस्था महंगो हुदैछ । त्यसो त नेपालीहरूको स्वभावमा जे राजनीतिक व्यवस्था हातमा पर्यो त्यसलाई मिल्काउने राजनीतिक(मानसिक रोग छ । हातमा भएको चरीको मतलब हुदैन आकाशमा उडेको गन्दै आत्मरति गर्छन् । स्खलित नैतिक, आध्यात्मिक , मानसिक , धार्मिक, सांस्कृति, संस्कार, शिक्षा, संगति, संगठन, जीवनशैली, सोच, सहकार्य, समानता, सेवाभावका कारणबाट नेपालीहरूको जीवन महंगो मात्र हैन दुरूह र भ्रष्ट बन्दै गएको छ । हालमा जीवनचर्या महंगो हुनाको मूल कारण संघीयता हैन, होलसेल सबै क्षेत्र, समाज र वर्गमा व्याप्त विश्व्यापी भ्रष्टचार नै हो । यसका निम्ति अरू सबै कुरालाई दोष दिनु फट्याई र बहानाबाजी मात्र हुन् ।
१८१ परिवार भूकम्प पीडितलाई एकिकृत बस्ती: बत्ती, पानी, विद्यालय र खेल मैदान पनि
काठमाडौं । राष्ट्रिय पुनर्निर्माण प्राधिकरणले सिन्धुपाल्चोक, रामेछाप र काभ्रेपलाञ्चोक जिल्ला गरी पाँचवटा एकीकृत बस्ती विकासको प्रारम्भिक योजनालाई स्वीकृत गरेको छ । राष्ट्रिय पुनर्निर्माण प्राधिकरणको प्रमुख कार्यकारी अधिकृतमा सुशील ज्ञवाली नियुक्त भएपछि पहिलो पटक बसेको प्राधिकरणको कार्यकारी समितिको बैठकले तीन जिल्लाका पाँच ठाउँमा एकिकृत बस्ती बसाउने निर्णय गरेको हो । पहिलो एकिकृत बस्ती सिन्धुपाल्चोक जिल्ला हेलम्बु गाउँपालिका वडा नं २ खर्कडाँडास्थित नोर्वुलिङमा निर्माण हुनेछ । सो एकीकृत बस्ती विकास योजनामा ४० घरधुरी रहनेछन् । त्यस्तै, दोश्रो एकिकृत बस्ती पनि सिन्धुपाल्चोक कै मेलम्ची नगरपालिका वडा नं १२ मा नम्डोललिङमा निर्माण हुनेछ । सो बस्तीमा ७० घरधुरी रहनेछन् । सिन्धुपाल्चोककै भोटेकोशी गाउँपालिका वडा नं ५ त्याङथलीमा तेश्रोत एकीकृत नमूना निर्माण हुनेछ । जसमा १० घरधुरी रहनेछन् । चौथो एकिकृत बस्ती भने रामेछापको मन्थली नगरपालिका वडा नं ८ माझी बस्ती गाइखुरामा निर्माण हुनेछ । त्यहाँ २४ घरधुरी रहनेछन् । काभ्रेपलाञ्चोकको मण्डनदेउपुर नगरपालिका वडा नं १० स्थित तीनधारामा होमस्टेसहितको नमुना तामाङ बस्ती निर्माण हुनेछ । त्यहाँ ३७ घरधुरी रहनेछन् । प्राधिकरण अन्तर्गत रहेका केन्द्रीय आयोजना कार्यान्वयन इकाईहरुको लागि कर्मचारी दरबन्दी स्वीकृत भएको छ । जसमा केन्द्रीय आयोजना कार्यान्वयन इकाई (शिक्षा)का लागि ४६३, केन्द्रीय आयोजना कार्यान्वयन इकाई (भवन)का लागि इन्जिनियर सहित ३२५० र केन्द्रीय आयोजना कार्यान्वयन इकाई (अनुदान व्यवस्थापन तथा स्थानीय पूर्वाधार)का लागि ७०४ छन् । बैठकले गुनासो व्यवस्थापन सूचना प्रणालीको अभिलेखमा अन्यत्र बस्नयोग्य घर जनिएका व्यक्तिहरुको सूची सो बमोजिम घर भए/नभएको सम्बन्धमा सम्बन्धित गाउँपालिका तथा नगरपालिका प्रमुख प्रशासकीय अधिकृतहरुलाई प्रमाणित गरी पठाउन निर्देशन दिने निर्णय पनि गरेको छ ।
नबिल बैंकको संचालकमा मुखर्जी
काठमाडौं । नबिल बैंकको सञ्चालकमा मलय मुखर्जी मनोनित भएका छन् । हालै सम्पन्न कम्पनीको ४९३ औं सञ्चालक समितिको बैठकले बैंकको क समूहका सेयरधनीको तर्फबाट मुखर्जी संचालकमा नियुक्त गरेको हो । मुखर्जीले गत भदौ १ बाट नै पदबहाली गरिसकेका छन् । नव मनोनित सञ्चालक मुखर्जी कर्जा विश्लेषण, जोखिम व्यवस्थापन, प्रविधि विकास लगायत बैंकिङ क्षेत्रको लामो अनुभव तथा ज्ञान रहेको वरिष्ट बैंकर हुन् । उनले आईएफसीआई लिमिटेडमा प्रमुख कार्यकारी अधिकृत तथा प्रबन्ध निर्देशकको जिम्मेवारीका साथै आईएफसीआई समूह अन्तर्गत रहेका विभिन्न कम्पनीहरुमा अध्ययन भूमिका निर्वाह गरिसकेका छन् । साथै, उनले सेन्ट्रल बैंक अफ इंडियामा सेप्टेम्बर २०१२ देखि डिसेम्बर २०१३ सम्म कार्यकारी निर्देशकको पदमा समेत काम गरेका थिए । नव मनोनित सञ्चालक मुखर्जीले इण्डियन बैंक चेन्नइमा समेत प्रविधि व्यवस्थापन विभाग, जोखिम व्यवस्थापन विभाग लगायतका विभागहरुमा महाप्रबन्धकको पदमा रहि सेवा प्रदान गरेका थिए ।
