एफपीओ सुचिकरण ढिलाइ गरेर लगानीकर्ता डुबाउँदै नेपाल बैंक,१५ दिनमा हुनुपर्ने काम ३ महिनामा पनि भएन
काठमाडौं । नेपाल बैंकले थप निष्कासन (एफपीओ) कारोबारका लागि नेपाल स्टक एक्सचेन्ज लिमिटेड (नेप्से) मा सुचिकरण गर्न ढिलाइ गरेको छ । समयमा एफपीओ सुचिकरण नहुदा लगानीकर्ताले गुमाउँदै गएका छन् । गत आइतबार नेपाल धितोपत्र बोर्डले सचेतसहित एफपीओ बिक्री प्रवन्धक सिद्धार्थ क्यापिटल लिमिटेड, बैंक र प्रत्याभूतिकर्तालाई पत्राचार गरी एफपीओ बाँडफाँड गर्न भनेको थियो । तर बैंकले एफपीओ कारोबारका लागि सुचिकरणको काम सुरु गर्नुभन्दा नामसारीका सम्बन्धमा गरेको निर्णयमा पुनरबिचारका लागि आग्रह गर्न बोर्डमा पुगेको छ । सेयर निष्काशन तथा बाँडफाँड नियमावली अनुसार सेयर बाँडफाँड भएको १५ दिनभित्र सेयर सूचिकरण हुनुपर्छ । तर नेपाल बैंकको सेयर बाँडफाँड भएको तीन महिना बित्दा पनि सूचिकरण हुन सकेको छैन । सेयर निष्काशन भएको लामो समय बित्दा समेत एफपीओ सूचीकरण नहुँदा लगानीकर्ताले गुमाउदै गएका हुन् । बोर्डले बाटो खुला गर्दा पनि बैंकले दोहरो चरित्र देखाएर लगानीकर्ता डुवाउने खेलमा लागेको प्रत्याभूतिकर्ता सीबीआईएल क्यापिटलका प्रमुख कार्यकारी अधिकृत (सीईओ) समीरप्रसाद दाहालको दावी छ । “नेपाल बैंक व्यवस्थापन सेयर सुचिकरणतर्फ भन्दा पनि ढिलाइ गर्न लागेको छ” सीईओ दाहालले भने “एफपीओ सुचिकरण छिटो गराउनु पर्ने भएपनि बैंक गैरजिम्मेबार बन्दा लगानीकर्तालाई समस्या भएको छ।” यता बैंकका सीईओ देवेन्द्रप्रताप शाह बोर्डले गरेको निर्णय मान्ने बताए । “पहिलाको निर्णमा पुनरविचार गर्न बोर्डलाई आग्रह गरिएको हो, सेयर सुचिकरणमा ढिलाइ गर्ने बैंकको आशय छैन” उनले भने । एफपीओ निष्काशनका बेला भएका सम्झौता अनुसार काम नहुँदा समस्या देखिएकाले बोर्डलाई आफ्नो निर्देशनमा पुनर्विचार गरिदिन आग्रह गरेको शाहाको भनाई छ । एफपीओमा लगानी गर्ने लगानीकर्ताले मौका गुमाउदै आएका छन् । बैंकको सेयर सूचिकरणमा ढिलाइ हुदा लगानीकर्ताहरु सेयर मूल्य बढेको बेलामा बेच्नबाट बञ्चित भएका छन् । बिहीबारसम्म बैंकको सेयर मूल्य प्रतिकित्ता ३०९ रुपैयाँमा झरेको छ । लगानीकर्ताले बैंककको एफपीओ प्रतिकित्ता २८० रुपैयाँमा किनेका हुन् । बैंकले गत साउन २० गते सेयर बाँडफाँड गरेको थियो । उक्त एफपीओको अण्डरराईटिङ गर्ने कम्पनीहरुले गलत प्रक्रियाबाट सेयर बिक्री गरेको उजुरी नेपाल धितोपत्र बोर्डमा परेपछि सूचिकरण रोकिएको हो । सेयर सूचिकरण भईसक्नु पर्ने समयमा नेपाल बैंकको सेयर प्रतिकित्ता ३३४ रुपैयाँ पुगेको थियो । विहीबार उक्त सेयर प्रतिकित्ता ३०७ रुपैयाँमा झर्दा लगानीकर्ताले प्रतिकित्ता २५ रुपैयाँ गुमाएका छन् । बैंकले प्रतिकित्ता २८० रुपैयाँमा ४ अर्ब ९५ करोड बराबरको एफपीओ जारी गरेकोमा २ अर्ब ६२ करोड रुपैयाँको मात्र आवेदन परेको थियो । नबिकेको सेयर सीबीआईएल क्यापिटल, ग्लोबल आईएमई क्यापिटल, नेपाल एसबीआई मर्चेन्ट बैंकिङ, एनआईबीएल एस क्यापिटल, सिभिल, सनराइज, लक्ष्मी र सानिमा क्यापिटल लिमिटेडले सकारेको थिए ।
होटल टाईगर टप्स बन्द भएपछि मेघौली विमानस्थल सञ्चालनमा आउन सकेन
चितवन । पश्चिम चितवनको मेघौली विमानस्थल सञ्चालनमा आउन सकेको छैन । विसं २०१७ मा स्थापना गरिएको सो विमानस्थल त्यस क्षेत्रको प्रतिष्ठित होटल टाईगर टप्स बन्द भएसँगै नियमित सञ्चालन हुन नसकेको हो । सदरमुकाम भरतपुरबाट २४ किलोमिटर पश्चिमको सो विमानस्थल २३ बिगाहा जमीनमा फैलिएको छ । भरतपुर विमानस्थलका प्रमुख पवनकुमार गौतमका अनुसार एक हजार ६५ मिटर लामो घाँसे धावन मार्ग रहेको छ । विमानस्थललाई तारबार गरी सुरक्षित गरिएको छ । सो क्षेत्रका सामाजिक अगुवा मायाराम चौधरीका अनुसार होटल टाईगर टप्स सञ्चालन हुँदा नेपालका राजारानी, बेलायती रानी एलिजाबेथलगायत स्वदेशी र विदेशी विशिष्ट व्यक्ति जहाज चढेर सो क्षेत्रमा आएका थिए । थारु सांस्कृतिक सङ्ग्रहालय मेघौलीका अध्यक्ष रहेका चौधरीले दैनिक तीन/चार जहाज सो विमानस्थलमा अवतरण हुने गरेको थियो । सोही विमानस्थलमा होटल टाईगर टप्स रहुञ्जेल अन्तर्राष्ट्रिय हात्ती पोलो खेल समेत हुने गरेको थियो । हाल खेल पनि बन्द भएको छ । विसं २०६९ बाट बन्द भएको विमानस्थल गत वर्ष नोभेम्बर र डिसेम्बरमा केही समय सञ्चालनमा आए पनि पुनः बन्द भएको हो । जहाज सञ्चालन भएमा तत्काल टावर सञ्चालनमा ल्याउन सकिने विमानस्थलका प्रमुख गौतमले बताए । भरतपुरमा दैनिक १२/१३ उडान हुँदै आएको भन्दै उनले मेघौली विमानस्थल सञ्चालन गर्न सकेमा भरतपुरको चाप घटाउन सकिने र त्यस क्षेत्रका जनताले सुविधा पाउने बताए । नेपाल एयरलायन्सले हाल तालिकामा राखेर पनि मेघौलीमा विमान चलाएको छैन । विमान सञ्चालन हुन नसक्नुको कारणबारे केन्द्रमा पत्राचार गर्ने उनले बताए । पश्चिम चितवनमा तीन ठूलासहित १० भन्दा बढी पर्यटकीय होटल रहेका छन् । नियमित उडान नहुँदा पर्यटक आगमनमा समेत प्रभाव परेको छ । पश्चिम चितवन होटल व्यवसायी सङ्घका अध्यक्ष सुवोध प्रधानले नियमित उडानका लागि पहल भइरहेको भए पनि उडान हुन नसकेको बताए । सो ठाउँमा हेलिकप्टर र समय समयमा विमान चार्टर गरेर उडान गरिँदै आएको छ । पर्यटन विकास समिति चितवनका महासचिव विश्व सुवेदीले सो विमानस्थल पुरानो भएकाले पश्चिम चितवनको पर्यटकीय विकास र त्यस क्षेत्रका जनतालाई सुविधा दिन नियमित उडान गर्नुपर्ने बताए । जिल्लामा हाल सञ्चालनमा रहेको भरतपुर विमानस्थलबाट दैनिक काठमाडौँं र पोखरा उडान हुँदै आएको छ । रासस
नेपाल फाइनान्सको सीईओमा उद्धवराज थपलिया नियुक्त, १५ बर्षको बैकिङ्ग अनुभव
काठमाडौं । नेपाल फाइनान्स कम्पनी लिमिटेडको प्रमुख कार्यकारी अधिकृत(सीईओ)मा उद्धवराज थपलिया नियुक्त भएका छन् । थपलियाले कात्र्तिक ७ गते बुधवारबाटै कार्यभार पनि सम्हालि सकेका छन् । पांचखाल नगरपालिका काभ्रे स्थायी घर भएका थपलिया लामो समय किष्ट बैंक र प्रभु बैंकमा शाखा प्रबन्धक भइ कार्य गरेका थिए । उनको विभिन्न बैंक तथा वित्तीय संस्थामा समेत गरी करिब १५ बर्षको बैकिङ्ग अनुभव रहेको छ । बेष्ट फाइनान्स (तत्कालिन जनरल फाइनान्स) लाई जापान लगायतका एनआरएनहरुको समुहले खरिद गरी समस्याग्रस्त अवस्थाबाट साधारण अवस्थामा फर्काउने योजना नेपाल राष्ट्र बैंकमा पेश गरे पछि थपलिया जनरल फाइनान्समा वरिष्ठ व्यवस्थापकको रुपमा प्रवेश गरेका थिए । जनरल फाइनान्सको नाम परिवर्तन गरी वेष्ट फाइनान्सको नामबाट कारोवार गर्न, नेपाल राष्ट्र बैंकबाट समस्याग्रस्त अवस्थाबाट साधारण अवस्थामा कम्पनिलाई फर्काउन र बेष्ट फाइनान्सले सिनर्जी फाइनान्सलाई प्राप्ति गरी बेष्ट फाइनान्सको नामबाट कारोवार गर्न आवश्यक पर्ने कार्य गर्न उन्ले महत्वपूर्ण भूमिका निर्वाह गरेका थिए । थपलियाले वेष्ट फाइनान्स कम्पनीले गत साउनमा सिनर्जी फाइनान्सलाई प्राप्ति गर्नु अघिसम्म करिब ६ महिना वेष्ट फाइनान्सको कायम मुकायम प्रमुख कार्यकारी अधिकृत भइ कार्य समेत गरेका थिए । नेपालको पहिलो फाइनान्स कम्पनी नेपाल फाइनान्स अहिले समस्याग्रस्त अवस्थामा छ । नेपाल राष्ट्र बैंकले तत्कालिन संचालक समितिलाई भंग गरी समस्याग्रस्त संस्था व्यवस्थापन महाशाखाका निर्देशकको संयोजक्त्वमा संचालक समिति गठन गरी संस्थालाई नियन्त्रणमा लिएको थियो । तत्कालिन योजना आयोगका सदस्य प्रा. डा. हिरेन्द्रमान प्रधानको समुहले उक्त फाइनान्सको अधिकांश शेयर खरिद गरी थप पूंजी पनि जम्मा गरे पछि नेपाल राष्ट्र बैंकले प्रा. डा. हिरेन्द्रमान प्रधानको अध्यक्षतामा नयां संचालक समिति गठन गरी फाइनान्स कम्पनी व्यवस्थापन गर्ने जिम्मा लगाइ नेपाल राष्ट्र बैंक संचालक समितिबाट बाहिरीसकेको छ । समस्याग्रत हुँदा करिब ४ प्रतिशतले ऋणात्मक रहेको पुँजीकोष नयां लगानीकर्ताले थप पुँजी राखेपछि अहिले करिब २५ प्रतिशत पुगिसकेको छ । साथै, नेपाल राष्ट्र बैंकले तोकेका मापदण्ड पूरा गरी नेपाल फाइनान्सले साधारण अवस्थामा फर्की नियमित कारोवार गर्न नेपाल राष्ट्र बैंकमा कार्य योजना बुझाइसकेको छ ।
नारायणीमा ४ लेनको नयाँ पुल बनाइने, रेखाङकनको काम सुरु
चितवन । चितवनको नारायणगढ र नवलपरासीको गैँडाकोट जोड्ने पूर्व–पश्चिम राजमार्गको नारायणी पुल साँघुरो बन्दै गएपछि नयाँ पुल निर्माणको तयारी थालिएको छ ।चितवनतर्फ भरतपुर महानगरपालिका र नवलपरासीतर्फ गैंँडाकोट नगरपालिकामा मानवबस्ती र बजार बढ्दै गएपछि पुल साँघुरो भएको हो । यससँगै पूर्व–पश्चिम यात्रा गर्ने सवारीको चाप पनि बढ्दै गएको छ । पुलमा दैनिकजसो सवारी आवागमनमा समस्या हुने गरेको स्थानीयवासी बताउँछन् । सडक विभागका उपमहानिर्देशक एवं पुल महाशाखा प्रमुख अर्जुनजङ्ग थापाका अनुसार पुलले धान्न सक्ने क्षमता घट्दै गएका कारण नयाँ पुलको नक्साङ्कनको काम शुरु गरिँदै छ । सोही पुलको समानान्तर उत्तर वा दक्षिणबाट पुल निर्माण गर्ने तयारी गरिएको छ । हालको सो पुल दुई लेनको हो । चार लेनको पुल बनाउने तयारी गरिएको छ । हाल सञ्चालनमा रहेको पुललाई थप मर्मत सम्भार गरी दुबै पुल सञ्चालन गरिने उहाँले बताए । विसं २०३८ मा सो पुल निर्माण गरिएको हो । पुलको भार बहन क्षमताको आयु भने ८० वर्ष हुने प्राविधिक बताउँछन् । थापाका अनुसार दैनिक १० हजार हाराहारी सवारी धान्ने गरी दुई लेनको पुलनिर्माण गरिएको भएपनि हाल सवारी सङ्ख्या बढेपछि आवागमनमा समस्या भएको हो । नारायणीसहित देशका विभिन्न १० नदीमा अत्याधुनिक आकर्षक पुल निर्माण गर्ने तयारी गरिएको छ । विश्व बैंकको सहयोगमा पुल निर्माण गरिने उपमहानिर्देशक थापाले जानकारी दिए । आउँदो आर्थिक वर्षभित्रमा नक्साङ्कन सम्पन्न गरी बोलपत्र आह्वान गर्ने तयारी भइरहेको बताइएको छ । नारायणीसँगै बुटवलसम्मका अन्य पुल पनि नयाँ बनाउने तयारी गरिएको छ । पुलको नक्साङ्कनका लागि विदेशी विज्ञले काम शुरु गरेको थापाको भनाई छ । रासस
विश्वका ११२ देशसँग नेपालको व्यापार घाटा, सबैभन्दा धेरै भारत र चीनसँग
काठमाडौं । विश्वका ११२ देशसँग नेपालको व्यापार घाटा रहेको तथ्याङ्क सार्वजनिक भएको छ । भन्सार विभागले सार्वजनिक गरेको चालू आर्थिक वर्षको पछिल्लो तीन महीनाको विवरणमा विश्वका १४० देशमध्ये २८ देशसँग मात्रै नेपालको व्यापार नाफामा रहेको छ भने ११२ देशसँग घाटा रहेको छ । नेपालको सबैभन्दा धेरै व्यापार घाटा छिमेकी देश भारत र चीनसँग नै रहेको छ । पछिल्लो तीन महीनाको विवरणअनुसार भारतसँग दुई खर्ब २२ अर्ब ९५ करोड ९२ लाख पाँच हजार रुपैयाँ बराबरको व्यापार घाटा छ । भारतबाट मात्रै दुई खर्ब ३६ अर्ब १२ करोड ३४ लाख १९ हजार रुपैयाँ बराबरको माल वस्तु आयात भएको छ । नेपालबाट भारततर्फ भने १३ अर्ब १६ करोड ४२ लाख १४ हजार रुपैयाँ बराबरको वस्तु मात्रै निर्यात भएको छ । व्यापार घाटाको दोस्रो स्थानमा रहेको चीनबाट पछिल्लो तीन महीनामा ५३ अर्ब ११ करोड ५६ लाख ८५ हजार रुपैयाँ बराबरको वस्तु आयात भएको छ । सो अवधिमा नेपालबाट रु ५६ करोड ४० लाख बराबरको माल वस्तु मात्रै निर्यात भएको छ । नेपाल र चीनबीचको व्यापार घाटा रु ५२ अर्ब ५५ करोड १५ लाख ८९ हजार रहेको छ । नेपालको तेस्रो व्यापार घाटा युरोपेली देश फ्रान्ससँग रहेको छ । रु १४ अर्ब २६ करोड ५३ लाख बराबरको माल वस्तु सो देशबाट आयात भएको छ भने नेपालबाट रु ३५ करोड २२ लाख ८८ हजार बराबरको सामान मात्रै निर्यात हुँदा व्यापार घाटा रु १३ अर्ब ९१ करोड ३० लाख १३ हजार हुन पुगेको छ । यस्तै युनाइटेड अरब इमिरेट्स (युएइ)सँगको व्यापार घाटा चौथो स्थानमा रहेको छ । उक्त देशबाट रु सात अर्ब ९० करोड ८३ लाख ८५ हजार बराबरको सामान आयात भएकामा नेपालबाट रु तीन करोड ७५ लाख ४७ हजार बराबरको सामान मात्रै निर्यात भएको छ । सो देशसँग नेपालको व्यापार घाटा रु सात अर्ब ८७ करोड ८३ लाख ८० हजार बराबर छ । नेपालको व्यापार घाटा रहेका देशमा थाइल्याण्ड, स्वीट्जरल्याण्ड, इन्डोनेशिया, क्यानडा, मलेसिया, अर्जेन्टिना, युक्रेन, साउदी अरब, दक्षिण अफ्रिका, इटाली, भियतनाम, दक्षिण कोरिया, अष्टे«लिया, तुर्केमेनिस्तान, चीनको ताइवान, जापान, सिङ्गापुर, हङ्कङलगायत ११२ देश रहेका छन् । अल्वानियाबाट रु एक लाख १४ हजार बराबरको माल सामान आयात भएको छ भने नेपालबाट सो देशमा कुनै पनि माल वस्तु निर्यात हुन सकेको छैन । रुवाण्डाबाट रु एक लाख २२ हजार बराबरको मालसामान आयात भएकामा नेपालबाट रु दुई लाख २० हजार बराबरको निर्यात भएको छ । संयुक्त राज्य अमेरिकासँग भने नेपालको व्यापारमा फाइदा रहेको विभागको पछिल्लो विवरणमा उल्लेख छ । अमेरिकामा रु तीन अर्ब १९ करोड ७८ लाख ५९ हजार बराबरको व्यापार भएको छ । सो देशबाट नेपालमा रु दुई अर्ब ५२ करोड ९५ लाख ३५ हजार बराबरको समान आयात भएकामा रु ६६ करोड ८३ लाख बराबरको नाफा रहेको छ । नेपालको व्यापारमा नाफा रहेका देशमा नर्वे, फिनल्याण्ड, अष्ट्रिया, माल्दिभ्स, मोरक्को, इस्टोनिया, अफगानिस्तान, लेवनान, एल साल्भाडोर, उरुग्वे, साइप्रस लगायतका देश छन् । पछिल्लो तीन महीनामा रु तीन खर्ब ४९ अर्ब ८४ करोड २३ लाख २८ हजार बराबरको व्यापार घाटा हुन पुगेको छ । कूल रु तीन खर्ब ७३ अर्ब ५८ करोड ७२ लाख ५८ हजार बराबरको माल वस्तु आयात हुँदा रु २३ अर्ब ७४ करोड ४९ लाख ३० हजार बराबरको मात्रै निर्यात हुन सकेको छ । रासस
एनआईसी एशिया बैंक भोजपुरको दिङ्गलामा
काठमाडौं । एनआईसी एशिया बैंकको नयाँ शाखा कार्यालय भोजपुरको दिङ्गलामा सञ्चालनमा आएको छ । उक्त शाखाको उद्घाटन षडानन्द नगरपालिकाका मेयर विरबल राईले गरेका छन् । यससहित बैंकको शाखा संख्या २६४ पुगेको छ । साथै, बैंकले २६२ एटिएम, २६ वटा एक्सटेन्सन काउण्टर एवं १८ वटा शाखा रहित बैंकिङ्ग ईकाई मार्फत बैंकिङ्ग सेवा प्रदान गरिरहेको छ । त्यस्तै, बैंकले हरेक सम्भावित बजार क्षेत्रमा आफ्ना ग्राहकलाई सेवा उपलब्ध गराउने अभिप्रायले अन्यविभिन्न स्थानहरुमा चाँडै नै थप शाखा कार्यालय संचालन गर्ने योजना बनाएको छ ।
कोरियाली कम्पनी सुसुङले फास्ट ट्रयाकको डीपीआर तयारी थाल्यो, १०५ दिनमा सकिने
काठमाडौ । काठमाडौँ–तराई– मधेस दू्रतमार्ग (फास्ट ट्र्याक) को विस्तृत परियोजना प्रतिवेदन (डीपीआर) को काम सुरु भएको छ । कोरियाको सुसुङ इञ्जिनियरिङ कम्पनी लिमिटेडले फास्टट्रयाकको डीपीआर बनाउन भौगर्भिक अध्ययन शुरु गरेको छ । नेपाली सेना र दक्षिण कोरियाको सुसुङ इञ्जिनियरिङबीच द्रूतमार्गको डीपीआर निर्माणसम्बन्धी सम्झौतापत्रमा असोज १६ गते हस्ताक्षर भएको थियो । सम्झौताअनुसार उक्त कम्पनीले यही कात्तिक ५ गतेदेखि लागू हुने गरी १०५ दिनभित्र डीपीआर तयार गर्नेछ । डीपीआरलाई अघि बढाउने सिलसिलामा सुसुङ कम्पनीले भौगर्भिक अध्ययनको काम शुरु गरिसकेको नेपाली सेनाका प्रवक्ता गोकुल भण्डारीले जानकारी दिए । उनले भने, “नेपाली सेना र सुसुङ कम्पनीका भौगर्भविद्सहितको प्राविधिक टोली स्थलगत अध्ययनका लागि खटिसकेका छन् । नेपाली सेना र सुसुङ कम्पनीबीच डीपीआर १० करोड १३ लाख रुपैयाँको लागतमा तयार गर्ने सहमति भएको थियो । भारतीय कम्पनी आइएल एण्ड एफएसले तयार गरेकामा डीपीआरको मूल्यका विषयमा सहमति नभएपछि नेपाली सेनाले अर्को बोलपत्रमार्फत सुसुङ कम्पनी छनोट गरेको हो । एशियाली विकास बैंकले सन् २००८ मा तयार गरेको सम्भाव्यता अध्ययन प्रतिवेदनलाई आधार मानेर अहिले सेनाले निर्माणसम्बन्धी आधारभूत र प्रारम्भिक कार्य गर्दै आएको छ । फास्ट ट्र्याक आफैंमा बृहत् र विशिष्ट आयोजना भएकाले समयसीमाभित्र जिम्मेवारी पूरा गर्ने सन्दर्भमा यकिन रेखाङ्कन, सडकको ढाँचा, लागत अनुमान एवं पर्न सक्ने वातावरणीय प्रभावसमेतको विश्लेषणका आधारमा निर्माणसम्बन्धी सबै क्रियाकलाप एकैसाथ अघि बढाइएको आयोजना प्रमुख योगेन्द्र खाँणले जानकारी दिए। प्रस्तावित ७६ किमी लामो उक्त सडकलाई १० भागमा विभाजन गरेर सेनाले २८ वटा सम्झौताकर्तामार्फत काम गराइरहेको छ । यसअघि उक्त द्र्रुतमार्गको भारतीय कम्पनी आइएल एण्ड एफएसले डिपिआर तयार गरेकामा प्रतिवेदनको मूल्यका विषयमा सहमति नभएपछि नेपाली सेनाले अर्को परामर्शदाताको छनोट गरेको हो । सडक निर्माण गर्ने क्रममा आवश्यक पर्ने ९० प्रतिशत जग्गा अधिग्रहण र द्रुतमार्ग क्षेत्रमा पर्ने २० हजारको सङ्ख्यामा रूख कटान भइसकेको छ । आयोजना अघि बढाउने सिलसिलामा छोक्रेडाँडादेखि बादरे खोल्सीसम्मको करीब १२ किलोमिटर क्षेत्रमा तीन वटा सुुरुङ निर्माण गर्ने गरी दु्रतमार्गको यसअघिको रेखाङ्कन परिवर्तन गर्नुपर्ने देखिएको सेनाले जनाएको छ । यद्यपि यो विषय डिपिआर निर्माणसँगै टुङ्गिनेछ । विस २०७४ वैशाख २१ गते मन्त्रिपरिषद्ले नेपाली सेनाको व्यवस्थापनमा निर्माण गर्ने निर्णय गरेको उक्त दू्रतमार्गको प्रारम्भिक अनुमानित लागत १ खर्ब ११ अर्ब रहने अनुमान गरिएकोे छ । रासस
ग्लोबल आइएमई बैंकको १०४आैँ शाखारहित बैंकिङ्ग सेवा भक्तपुरको सरस्वतीस्थानमा
काठमाडौं । ग्लोबल आइएमई बैंकले १०४आैँ शाखारहित बैंकिङ्ग सेवा भक्तपुरको सरस्वतीस्थानमा सञ्चालनमा ल्याएको छ । उक्त शाखारहित बैंकिङ्ग सेवाको उद्घाटन भक्तपुर जिल्लाका सहायक सिडिओ जयकुमार घिमिरेले गरेका छन् । साथै, सरस्वतीस्थानमा खोलिएको शाखारहित बैंकिङ्ग सेवाको लागि स्थानिय गौरव तिमल्सिनालाई व्यवसायीक प्रतिनिधि नियुक्त गरिएको छ । यो शाखारहित बैंकिङ्ग सेवा ग्लोबल आइएमई बैंकको सूर्यविनायक शाखा अन्तर्गत रहने छ । यस सहित बैंकको शाखा संख्या १३२ पुगेको छ । साथै, बैंकको १४० एटिएम, ६एक्सटेन्सनकाउण्टर, १५ वटाराजश्व संकलन काउण्टर र १०४शाखा रहित बैंकिङ्ग सेवा, विदेशमा ३ प्रतिनिधि/सम्पर्क कार्यालय संचालनमा छन् ।
