१३८ मिलियनका डेम्बेलेको नेइमार भुलाउने खेल
काठमाडौं । बार्सिलोनाका युवा खेलाडी ओसामाने डेम्बेले लयमा देखिन थालेका छन् । बार्सिलोनाको उत्कृष्ट ११ मा स्थान बनाउन सघर्ष गरिरहेका डेम्बेलेले टोटेनह्याम विरुद्ध उत्कृष्ट गोल गरेर आफुलाई प्रमाणित गरेका हुन् । जब नेइमारले उच्च आर्थिक प्रलोभनमा बार्सिलोना छाडे, तनावमा रहेका बार्सा पदाधिकारीहरुले जर्मन क्लब बोरुसिया डर्टमन्डबाट १३८ मिलियन युरोमा डेम्बेलेलाई किने । केहि समयमै डेम्बेले घाइते भएपछि बार्साको खेलाडी ट्रान्सफर असफल भएको र क्लब अध्यक्ष बार्टमाउको आलोचना चुलिएको थियो । अहिले डेम्बेले उच्च फर्ममा रहेका छन् । मैदानको दायाँ भागको स्ट्राइकर भुमिका निर्वाह गरिरहेको उनले बार्सा फ्यानको मन जित्न थालेका छन् । मैदानमा सबैभन्दा तेज गतिमा दौडने र २ जना डिफेन्डरलाई सजिलै छलाउन सक्ने डेम्बेलेको प्रमुख विशेषता रहेको छ । साथै उनको दुबै खुट्टाले शक्तिसाली सुट प्रहार गर्न सक्ने क्षमता रहको छ ।डेम्बेलेको विषयमा उनका टिममेट लियोनल मेसीले खुलेर प्रसंशा गरेका छन् । उनलाई इग्लिस क्लब लिभरपुल र आर्सनलले किन्ने हल्ला चलिरहेको अवस्थामा मेसीले डेम्बेले बार्सिलोनामा आवश्यक रहेका बताएका हुन् । बार्सिलोनाले डेम्बेलेलाई बेचेर नेइमार पुन भित्र्याउने योजना बनाइरहेको समाचार बाहिरीरहँदा डेम्बेलेले नेइमार भुलाउने प्रर्दशन गरिरहेका छन् । उनको ठाउँमा बार्सिलोनाले ब्राजिलका म्कलोहम ल्याएपछि उनी क्लबसँग थप रिसाएको हुनसक्ने अनुमान गरिएको छ । अहिले बार्सिलोनाको मिडफिल्डमा समस्या मुख्य समस्या देखिइरहेको छ । फिलिपे कौटिन्हो र मेसि एकैसाथ मैदान उत्रिदाँ डिबक्ससम्म बल पुग्न सकेको छैन । यस अवस्थामा बार्साले तिब्र गतिका डेम्बेलेलाई भरपुर प्रयोग गर्न सक्छ । डेम्बेलेको एटिटिउड समस्या बार्सिलोनामा डेम्बेलेको व्यवहारलाई लिएर प्रशिक्षक भाल्डभारे चिन्तित रहेकोबताइएको छ । उनी क्लबका अधिकारीहरुलाई जानकारी नदिइ बिदामा बस्ने र ट्रनिङमा समयमा नपुग्ने गरेका छन् । यस्तै समस्याका कारण फ्रान्सका मुख्य प्रशिक्षक देशच्याम्पले उनलाई रसिया विश्वकपमा मैदानमा निकै कम समय खेलाए । यद्यपी बार्सा प्रशिक्षक भाल्डभारेले डेम्बेलेसँगको समस्या सुल्झिसकेको दाबी गरेका छन् ।
गण्डकी विकास बैंककाे नयाँ शाखा तुलसीपुरमा
काठमाडौं । गण्डकी विकास बैंकले आफ्नो नयाँ शाखाको औपचारिक रुपमा तुलसीपुरमा उद्घाटन गरेको छ । प्रमुख अतिथिको रुपमा तुलसीपुर उप महानगरपालिकाका मेयर घनश्याम पाण्डेले उद्घाटन गरेको हुन् । बैंकका संचालक कृष्णबहादुर थापा क्षेत्रीको अध्यक्षतामा रहेको उक्त कार्यक्रम बैंकले प्रदान गर्ने सेवा सुविधा एवंम गतिविधिलाई प्रष्ट रुपमा बैंकका प्रमुख कार्यकारी अधिकृत रेशम थापाले जानकारी दिएका छन् । आर्थिक वर्ष २०७५ ०७६को पहिलो त्रैमासिक संचालन मुनाफा रु १५ करोड ३० लाख आर्जन गरेको छ भने सोही अवधि निक्षेप रकम २३ अर्ब ७२ करोड, कर्जा तर्फ २१ अर्ब २५ करोड पुगेको छ । केन्द्रिय कार्यलय साथै देशभरीका ७७ शाखाहरु मार्फत आकर्षक व्याजदरमा विभिन्न निक्षेप योजना, सहज र सरल रुपमा कर्जा योजनाका साथमा एविविएस, एटिएम, सि एसबिए, आईपीएस मोवाइल बैंकिङ्ग सेवा, सुन धितो सेवा, लकर सेवा, रेमिट्यान्स सेवा रहेका छन् ।
‘राष्ट्रिय उद्यमशील महिला मेला’ पुस ५ देखि शुरू, अनुमानित १० करोडको कारोबार हुने
काठमाडौं । नेपाल उद्यमशील महिला महासङ्घले आन्तरिक उत्पादन प्रवद्र्धन गर्न आगामी पुस ५ देखि ९ गतेसम्म भृकुटीमण्डपमा ‘राष्ट्रिय उद्यमशील महिला मेला’ गर्ने भएको छ । मेलामा देशभरका महिला उद्यमीले उत्पादन गरेका हस्तकलासाथै जुत्ता चप्पल, खेलौना, झोला, टोपीसहितका घरेलु वस्तु प्रदर्शन गरिने छ । बुधबार आयोजित पत्रकार सम्मेलनमा महासङ्घका अध्यक्ष देवकी बुढाथोकीले मुलुकको समग्र आर्थिक विकासका लागि घरेलु उद्योगमा लगानी वृद्धि गरी स्वदेशी उत्पादन बढाएर त्यसको प्रवद्र्धन गर्नुपर्ने बताए । उनले मुलुकको सामाजिक तथा आर्थिक रुपान्तरण गर्न महिला सशक्तीकरणको खाँचो औँल्याउँदै यस्ता घरेलु वस्तुको प्रवद्र्धन भएमा उनीहरुको पहुँचमा लगानी कायम गर्न सहयोग पुग्ने विश्वास व्यक्त गरे । करीब तीन लाख दर्शकले मेला अवलोकन गर्ने र करीब रु दश करोडको कारोवार हुने अनुमान गरिएको छ । देशका ४२ जिल्लामा सञ्जाल विस्तार गरेको महासङ्घमा हाल एक हजार २०० महिला उद्यमी सहभागी छन् । मेलामा उद्योगको अवस्था, व्यापार घाटा न्यूनीकरणलगायत विषयमा विज्ञसम्मिलीत गोष्ठी बताइएको छ । रासस
श्री इन्भेष्टमेन्ट एण्ड फाइनान्सको ११औँ शाखा कार्यालय हात्तीगौँडामा
काठमाडौं । श्री इन्भेष्टमेन्ट एण्ड फाइनान्स लिमिटेडले आफनो एघारौं शाखा कार्यालय बुढानिलकण्ठ–८, हात्तीगौडामा सुरु गरेको छ । विगत २४ वर्षदेखि डिल्लीबजारमा केन्द्रीय कार्यालय रहेको उक्त संस्थाले वित्तीय सेवा प्रदान गर्दै आइरहेका छ । हाल कम्पनीको चुक्ता पूँजी रु. ८१ करोड, निक्षेप ४ अर्व २५ करोड र कर्जा तथा लगानी ४ अर्व ३ करोड रहेको छ । कन्नेक्ट आइपिएस, मोवाइल बैंकिङ्ग, फ्रि एविविएस, सि एसबि जस्ता अत्याधुनिक सेवा वित्तीय संस्थाले ग्राहक महानुभावहरुलाई प्रदान गर्दै आइरहेको छ । देशभरीका विभिन्न ११ स्थानबाट बैकिङ्ग सुविधा प्रदान गरिरहेको उक्त फाइनान्सको ९,१०औं शाखा २०७५ मसिंर २४ गते सल्यान जिल्लाको शारदा नगरपालिका–१, श्रीनगर तथा २६ गते बुधवार नै पश्चिम रुकुम जिल्लाको मुसिकोट नगरपालिका–४, सोलावाङ्गमा समेत शाखा कार्यालय सञ्चालनमा ल्याएइको छ ।
बीमा कम्पनीहरुलाई पुँजी वृद्धि गर्ने समय सीमा २०७६ असार मसान्तसम्म
चिरञ्जीवि चापागाई, अध्यक्ष, बीमा समिति काठमाडौं । तोकिएको समयमा न्यूनतम चुक्ता पुँजी पुर्याउन नसकेका बीमा कम्पनीहरुका लागि खुशीकाे खबर आएको छ । बीमा समितिले पुँजी वृद्धिको समय सीमा २०७६ असार मसान्तसम्म बढाउने भएको छ । बीमा समितिका अध्यक्ष चिरञ्जीवि चापागाईले बीमा कम्पनीहरुको लागि पुँजी वृद्धिको समयावधि बढाउन लागिएको जानकारी दिएका छन् । नेपाल आर्थिक पत्रकार संघ (नाफिज)सँगको भेटघाटका क्रममा अध्यक्ष चापागाईले सो जानकारी गराएका हुन् । वित्त बजारमा लगानी योग्य पुँजीको कमी रहेको र नेपाल फाइनान्सियल रिपोर्टिङ स्ट्याण्डर्ड (एनएफआरएस) लागू गर्ने क्रममा बीमा कम्पनीहरुको एक्चुरी र वार्षिक साधारणसभा समेत ढिला हुने भएकोले ६ महिना समय थप्न लागिएको उनले जानकारी दिए । जतिबेला पुँजी बृद्धि गर्न बीमा समितिले निर्देशन दिएकाे थियाे त्यतिबेला तरलता संकट नभएकाे तर अहिले तरलता संकट भएकाले लगानीकर्ताले पुँजी जुटाउन गाह्राे भएकाे जनाएकाे उनले बताए । सराेकार निकायहरूसँग छलफल गरेर पुँजी वृद्धिकाे समय थप्ने तयारी भएकाे र केही दिनभित्रै पुँजी वृद्धि बारे नयाँ निर्देशन जारी हुने उनले बताए । बीमा समितिले जीवन बीमा कम्पनीको लागि न्यूनतम २ अर्ब रुपैयाँ र निर्जीवन बीमा कम्पनीको लागि न्यूनतम १ अर्ब रुपैयाँ चुक्ता पुँजी तोकेको छ । पुँजी वृद्धिको समय २०७५ असार मसान्तसम्म तोकिएको थियो । विशेष अवस्थामा कम्पनीहरुले ३/३ महिना गरी बढीमा छ महिना समय थप्न पाउने व्यवस्था थियो । हालसम्म नेपाल लाइफ इन्स्योरेन्स, नेशनल लाइफ इन्स्योरेन्स, शिखर इन्स्योरेन्स, हिमालय जनरल इन्स्योरेन्स कम्पनीसहित थोरै कम्पनीले मात्र तोकिएको चुक्ता पुँजी पुरा गरेका छन् ।
लाभांश घोषणाले सेयर मूल्यमा उथलपुथल, सिटिजन्स बैंकले गुमाउँदा सोल्टी र चिलिमेले कमाए
काठमाडौं । नेप्सेमा सूचिकृत कम्पनीहरुको लाभांश घोषणासँगै सेयर मूल्यमा पनि उच्च उतार चढाव देखिएको छ । बुधबार केही कम्पनीको सेयर मूल्यमा उच्च वृद्धि देखिएको छ भने केहीमा उच्च गिरावट देखिएको छ । चिलिमे जलविद्युत कम्पनी लिमिटेडले २० प्रतिशत बोनस सेयर र ५ प्रतिशत नगद लाभांश दिने घोषणा गरेपछि सेयरको मूल्य प्रतिकित्ता ४१ रुपैयाँले बढेको छ । मंगलबार प्रतिकित्ता ६०८ रुपैयाँमा कारोबार भएको सेयर बुधबार प्रतिकित्ता ६५२ रुपैयाँसम्म कारोबार भएको छ । बन्द हुँदा ६४९ रुपैयाँमा कारोबार भयो । बुधबार सोल्टी होटलको सेयर मूल्य प्रतिकित्ता ७६ रुपैयाँले बढ्यो । मंगलबार १३० रुपैयाँमा कारोबार बन्द भएको यस कम्पनीको सेयर बुधबार २०६ रुपैयाँमा कारोबार बन्द भयो । सिटिजन्स बैंक इन्टरनेशनलको सेयर मूल्य २२४ बाट २१५ रुपैयाँमा झरेको छ । बैंकले ३.६२ प्रतिशत बोनस सेयर र १.६३ प्रतिशत नगद लाभांश घोषणा गरेपछि सेयर मूल्यमा गिरावट आएको हो । बुधबार दिनभर रातो देखिएको नेप्से बन्द हुने बेलामा हरियो भयो तर शुन्य दशमलव शुन्य ८ अंकले मात्र बढेको छ । सो दिन कुल १५६ कम्पनीको २६ करोड ८८ लाख रुपैयाँ बराबरको सेयर कारोबार भएको छ । सो मध्ये सबैभन्दा बढी आईएमई जनरल इन्स्योरेन्सको प्रमोटर सेयर बिक्री भएको छ । कम्पनीको एकैदिन ४ करोड ८७ लाख रुपैयाँ बराबरको सेयर कारोबार भएको छ । जसको सेयर मूल्य प्रतिकित्ता २५० रुपैयाँ रहेको छ । बजारमा कारोबारमा आएका १० समूह मध्ये ५ समूह हरिया भएका छन् भने ५ वटा समूह राता भएका छन् । हाइड्रोपावर ३५, जीवन बीमा २३, फाइनान्स ३, उत्पादनमूलक १.५२ र अन्य समूह ०.६२ अंकले बढेका छन् । बाँकी होटल ३७.२७, निर्जीवन बीमा १०.६२, माइक्रोफाइनान्स ८.४६, डेभलपमेन्ट बैंक २.५७ र बैंकिङ् समूह १.३३ अंकले घटेका छन् ।
सिटिजन्स बैंकले गैर सरकारी संस्था “वुमन एक्ट” लाई दियो एक लाख रुपैयाँ
काठमाडौं । सिटिजन्स बैंक इन्टरनेसनल लिमिटेडले “वुमन एक्ट” नामक गैर सरकारी संस्थालाई एक लाख रुपैयाँ बराबरको आर्थिक सहयोग गरेको छ । बैंकले निःस्वार्थ भावले विभिन्न सामाजिक गतिविधि गर्दै आएको उक्त संस्थालाई सो मात्राको आर्थिक सहयोग गरेको हो । बुधबार एक कार्यक्रमकाबीच बैंकका प्रमुख प्रशासकीय अधिकृत उमंग शर्माले एक लाखको चेक संस्थाका संचालक सृजना अधिकारीलाई हस्तान्तरण गरेका छन् । भुकम्प प्रभावित क्षेत्रका महिलाहरूलाई आर्थिक रूपले सबल बनाउनका निम्ति उक्त रकम प्रयोग गरिने कुरा संस्थाका संचालक अधिकारीले बताए ।
वाइडबडी खरीदको छानविन गर्न सात सदस्यीय उपसमिति गठन, १५ दिनभित्र प्रतिवेदन प्रस्तुत गर्ने
काठमाडौं । प्रतिनिधिसभा, सार्वजनिक लेखा समितिले नेपाल वायुसेवा निगमको वाइड बडी जहाज खरीदका सम्बन्धमा उठेको प्रश्नको छानबीन गरी प्रतिवेदन दिन सात सदस्यीय उपसमिति गठन गरेको छ । समितिले वाइड बडी विमान खरीद सम्बन्धमा १५ दिनभित्र यथार्थ विवरणसहितको प्रतिवेदन प्रस्तुत गर्न सांसद राजेन्द्र केसीको संयोजकत्वमा सात सदस्यीय उपसमिति गठन गरेको सभापति भरतकुमार शाहले जानकारी दिए । उपसमितिमा सदस्यहरु प्रेमबहादुर आले, मीना सुब्बा, चन्दा चौधरी, कृष्णलाल महर्जन, प्रदीप यादव र धर्मशीला चापागार्इं छन् । उपसमितिले महालेखा परीक्षकको कार्यालय र सार्वजनिक खरीद अनुगमन कार्यालयको प्रतिवेदनलाई मुख्य आधार मानेर प्रतिवेदन तयार गर्ने कार्यादेश पाएको छ । समितिले यसअघि महालेखा परीक्षकको प्रतिवेदनमा देखाइएको बेरुजुका आधारमा जहाज खरीदका सम्बन्धमा संस्कृति, पर्यटन तथा नागरिक उड्डयनमन्त्री रवीन्द्र अधिकारीलगायत मन्त्रालय र निगमका उच्च पदस्थ अधिकारीसँग छलफल गरिसकेको छ । समितिको निर्देशनअनुसार, सार्वजनिक खरीद अनुगमन कार्यालयले समेत विमान खरीदका सम्बन्धमा आफनो प्रतिवेदन समिति समक्ष बुझाइसकेको छ । उपसमितिको प्रतिवेदन प्राप्त भएपछि समितिले जहाज खरीद सम्बन्धमा के-कस्तो ढङ्गबाट अघि बढ्ने सन्दर्भमा निष्कर्षमा पुग्ने सभापति शाहले जानकारी दिए । समितिको बुधबारको बैठकमा सदस्यले राष्ट्रपति कार्यालयका लागि आवश्यक भनिएको गाडी खरीद, बूढीगण्डकी जलविद्युत् आयोजना, तारा गाउँ विकास समितिको जग्गाको भोगचलन, समितिको वार्षिक कार्यसूचीलगायतको विषयमा आ-आफ्ना धारणा व्यक्त गरेका थिए । रासस
