प्राईम कलेजमा अन्तराष्ट्रिय स्तरको प्रथम नेपाल एआई पाठशाला
काठमाडाैं । नेपाल अप्लाईड म्याथम्याटिक्स एण्ड इनफरमेटिक्स ईन्स्टिच्यूट अफ रिसर्च, (नामी) को आयोजनामा काठमाडौंमा ११ दिने प्रथम नेपाल एआई पाठशाला सुरु भएको छ । एनसेलको प्रायोजनमा काठमाडौं नयाँबजार, खुशीबुँमा रहेको प्राईम कलेजमा सञ्चालन भइरहेको पाठशाला डिसेम्वर २० तारिख देखि ११ दिनसम्म सञ्चालन हुने भएको छ । नामीका अर्का सदस्य तथा ईम्पेरियल कलेज लण्डनमा पोष्टडक्टरल अनुसन्धानकर्ताको रुपमा कार्यरत डा.विनोद भट्टराईका अनुसार पाठशालाको आयोजना नेपालका लागि कस्तो प्रविधि आवश्यकता हुन्छ भन्ने कुरा नेपालले नै तय गर्नुपर्ने बताएका छन् । नेपालको कृषि, स्वास्थ्य लगायतका क्षेत्रमा आवश्यक प्रविधिका लागि बाहिरी देशसँग निर्भर हुन परिरहेको भट्टराईको भनाई रहेको छ । नेपाल, भारत, चीन, फिलिपिन्स, जर्मनी, नर्वे लगायतका देशहरुबाट आएका १२० जना प्रशिक्षार्थीहरुको सहभागिता रहेको छ । पाठशालामा आर्टिफिसियल ईन्टेलिजेन्सको प्रयोग, उपादयता र आवश्यकताको सन्दर्भमा आवश्यक, तालिम, परामर्श र अनुसन्धान गरिने बताएको छ । उक्त ११ दिने पाठशालामा २२ जना विदेशी, ७० जना काठमाडौं उपत्यका, १७ जना काठमाडौं उपत्यका बाहिरका र २० जना व्यावसायिक क्षेत्रका व्यक्तित्वहरु सहभागि रहेका छन् । विज्ञान प्रविधिको क्षेत्रमा अत्यन्तै पछौटेपन बेहोरिरहेको नेपालमा आर्टिफिसियल ईन्टेलीजेन्स जस्तो अत्याधुनिक विज्ञान र प्रविधिसँग सम्वन्धित विषयमा सोध, तालिम र वहस हुनु सुखद विषय रहेको प्राईम कलेजका प्रिन्सिपल प्राध्यापक डाक्टर कृष्णकुमार श्रेष्ठ नामीले सञ्चालन गरेको पाठशालाले एआई सँगसँगै समग्र सुचना प्रविधि क्षेत्रलाई उत्प्रेरित गर्ने बताएका छन् । नेपालमा सन् २०१८ मा कानुनी प्रकृया पुरा गरी गैर नाफामुलक संस्थाको रुपमा नामीले नेपालको शैक्षिक, औद्योगिक, ब्यवस्थापकीय र स्वास्थ्य क्षेत्रसँगमिलेर उक्त विषयगत क्षेत्रहरुको विकासका लागि एआई सम्वद्ध अध्ययन अनुसन्धान गर्ने तय गरेको छ ।
बजार सिंगल अंकले घट्दा सबै समूह रातै, एनएमबिको सेयर मूल्य ९ प्रतिशतले घट्यो
काठमाडौं । मंगलबारको सेयर बजार सिंगल अंकले घटेको छ । कारोबार शुरु भएदेखि ओरालो लाग्न शुरु गरेको मंगलबारको बजार ओरालो लागेरै बन्द भएको छ । समग्रमा सो दिनको नेप्से परिसूचक ५.७१ अंकले घटेर ११८६.०३ अंकमा अडिएको छ । बजारमा परिसूचकसँगै कारोबार रकममा पनि उच्च गिरावट देखिएको छ । सोमबार ७९ करोड रुपैयाँबराबरको सेयर किनबेच भएको बजारमा मंगलबार जम्मा ४२ करोड रुपैयाँ बराबरको कारोबार भएको छ । अघिल्लो दिनको तुलनामा कारोबार रकम ३७ करोड रुपैयाँले घटी हो । बजारमा १६५ वटा कम्पनीको सेयर किनबेच भएको छ । सो मध्ये सबैभन्दा बढी एनएमबि बैंकको प्रमोटर सेयर मूल्यमा गिरावट आएको छ । बैंकका संस्थापक लगानीकर्ताले एकैदिन ९.३३३३ प्रतिशत गुमाएका छन् । जसको सेयर मूल्य प्रतिकित्ता २०४ रुपैयाँ रहेको छ । त्यस्तै, बैंकको साधारण सेयरको मूल्य पनि प्रतिकित्ता ४ रुपैयाँले घटेर ३३६ रुपैयाँमा झरेको छ । कारोबारमा आएका कुल १० वटा समूह सबैको सूचक राताम्मे भएका छन् । जीवन बीमा २९, निर्जीवन बीमा २४, माइक्रोफाइनान्स १३ र जलविद्युत समूह ११ अंकले ओरालो लागेका छन् । अन्य बाँकी समूहहरु एकल अंकले घटेका छन् । उता मल्टिप्रपोज फाइनान्स कम्पनीका लगानीकर्ताले प्रतिकित्ता ९.८५ प्रतिशत कमाएका छन् । बजारमा सबैभन्दा बढी नेपाल इन्भेष्टमेन्ट बैंकको ६ करोड २४ लाख रुपैयाँ बराबरको सेयर किनबेच भएको छ ।
कृषि विकास बैंकद्धारा वित्तीय साक्षरता कार्यक्रम संचालन
काठमाडौं । कृषि विकास बैंक शाखा कार्यालय चापाकोटको आयोजनामा चापाकोट स्थित गंगालाल माध्यमिक विद्यालयमा वितिय साक्षरता कार्यक्रम सञ्चालन गरियो । शाखा प्रबन्धक विश्वराज मरासिनीको अध्यक्ष्यतामा सञ्चालित कार्यक्रममा प्रमुुख अतिथिका रुपमा क्षेत्रिय कार्यलय पोखराका निर्देशक मोहदत्त शर्मा पौडेल, विशिष्ट अतिथिका रुपमा क्षेत्रिय कार्यालय पोखराका शाखा प्रमुख मोतिप्रसाद पौडेल र शाखा कार्यालय वालिङका प्रबन्धक रामकुमार श्रेष्ठ रहेका थिए । कार्यक्रममा चापाकोट कै समाजसेवी अगुवा हरिप्रसाद पंज्ञानी, गंगालाल मा. वि. का प्र. अ. खेमराज भट्टराई, चापाकोट वार्ड नं. ९ का वडा अध्यक्ष शंकरभत्त भण्डारी, बैकमा २०४५ साल बाट नियमित कारोवार गर्नु भएका बैकका ग्रिनकार्ड होल्डर कर्जाग्राही गिरीधारी भट्टराई अतिथिका रुपमा रहेका थिए । यस कार्यक्रममा आमन्त्रित सबैलाई स्वागत मन्तब्य शाखाका ब्यवसाय सहायक सागर बरालले दिएका थियो भने वित्तीय साक्षरता कार्यक्रमको संचालन कार्यक्रमका संयोजक शाखाका लेखपाल गोविन्द लामिछानेले गरेका हुन्र । चापाकोट नगरपालिका भित्रका विभिन्न १० वटा सहकारी संस्थाका ८० जना सहभागिता रहेको थियो । कृषि बिकास बैंकको मोवाइल बैंकिङ्ग,भिसा कार्ड र आश्वा सम्बन्धि विज्ञापन केही समय बजाएपछि औपचारिक रुपमा कार्यक्रम शुरु गरिएको थियो । प्रमुख अतिथि क्षेत्रीय निर्देशक मोहदत्त शर्मा पौडेलले ब्यानर पढेर उद्घाटन गरि कार्यक्रममा आमन्त्रित अतिथिलाई आफ्नो मन्तब्य राख्न केहि समय दिईएको थियो । मन्तब्य पश्चात कार्यक्रमलाई ३ वटा भागमा वर्गिकरण गरी कृषि बिकास बैंक तथा यसका सेवा सुविधाहरुको वारेमा प्रशिक्षक रामकुमार श्रेष्ठले दिएका थिए । आर्थिक तथा वित्तीय प्रणाली सम्बन्धि जानकारी,बचत लगानी,समग्र बैंकिङ्ग सेवा सूविधा का वारेमा प्रशिक्षक मोतिप्रसाद पौडेलले बताएका छन् ।
वाइड बडी प्रकरणमा मन्त्री र सचिवको बयानः खरिद प्रक्रियाबारे थाहा छैन, छानबीन गर्नुस् कार्वाही गर्छौैँ
काठमाण्डौ । प्रतिनिधि सभा अन्तरगतको लेखा समितिको बैठकमा मंगलबार वाइड बडी बिमान खरिद प्रकरणका बारेमा छलफल भएको छ । छलफलमा पर्यटन मन्त्रालयका सचिव सहित मन्त्री रबीन्द्र अधिकारी उपस्थित भएका थिए । वाइड बडी खरिदमा भएको अनियमितताबारे बैठकमा साँसदहरुले कुरा उठाएका थिए । जवाफमा मन्त्री अधिकारीले बिमान खरिद प्रक्रियामा भएको अनियमितताको बारेमा आफूलाई थाहा नभएको बताए । उनले भने–छानबीन गर्नुस्, दोषी पाइए कारवाही गर्छौँ । बिमान खरिद प्रक्रियामा साँच्चै अनियमितता भएकै हो कि, हल्ला मात्र हो, सत्यतथ्य पत्ता लगाउनुस्, दोषीलाई कारवाही गर्छौँ–मन्त्री अधिकारीले समितिको बैठकमा भने । मन्त्री अधिकारीले भने–वाइड बडीको स्वामित्व नागरिक लगानी कोष र कर्मचारी सञ्चय कोष कै छ, उनीहरुको अनुमति बिना बेच्न वा भाडामा लगाउन पाइदैन । अबको १ वर्षमा नेपाल एयरलाइन्स नाफामा जाने मन्त्री अधिकारीको भनाई थियो । नेपाल एयरलाइन्सलाई युरोपियन युनियनले कालो सूचिमा राख्नु न्यायोचित होइन, कालो सूचिबाट हटाउन पहल भइरहेको उनले बताए । केही समय भित्र नेपाली बिमानले जापानमा उडान भर्ने कुरापनि मन्त्री अधिकारीले जानकारी दिए । बैठकमा उपस्थित पर्यटन मन्त्रालयका मन्त्रालयका सचिव कृष्ण देवकोटाले जहाजको दर्ता र हाइफ्लाइटबारे आफूलाई थाहा नभएको बताए । यसबारेमा नेपाल एयरलाइन्सका अध्यक्ष र प्रबन्ध निर्देशनलाई सोध्न आग्रह गरे ।
नेपाल हाइड्रो डेभलपरले ४ प्रतिशत लाभांश दिने
काठमाडौं । नेपाल हाइड्रो डेभलपर लिमिटेडले आफ्ना सेयरधनीलाई चार प्रतिशत शेयर लाभांश दिने भएको छ । कम्पनीले सेयर लाभांशमा लाग्ने कर प्रयोजनका लागि सामान्य नगद लाभांशको प्रस्ताव गरेको छ । सोमबार बसेको कम्पनीको सञ्चालक समितिको बैठकले आव २०७४/७५ को नाफाबाट उक्त लाभांश दिने प्रस्ताव गरेको हो । सो लाभांश कम्पनीको वार्षिक साधारणसभाले पारित गरेपछि सेयरधनीलाई वितरण गरिनेछ । सो आवमा कम्पनीले एक करोड ९७ लाख ७७ हजार रुपैयाँ नाफा गरेको थियो ।
उपभोक्ता ठग्ने ३ पेट्रोल पम्पमाथि कारबाही, सञ्चालकलाई तीन महिना कैद र १० हजार जरिवाना
हेटौँडा । पेट्रोलियम पदार्थको बिक्री वितरणमा एवं परिमाणमा अनियमितता गर्ने तीन पेट्रोल पम्पलाई कारबाही गरिएको छ । वीरगञ्जस्थित गुणस्तर तथा नापतौल अञ्चल कार्यालयले गरेको छड्के जाँचमा उपकरण बिगारेर २० मिलीलिटरदेखि ४०० मिलीलिटरसम्म पेट्रोलियम पदाथको परिमाण कमी गरेको पाइएकाले ती पम्पका सञ्चालकलाई जनही तीन महिना कैद र १० हजार जरिवाना गरिएको हो । यसरी कारबाहीमा परेका पम्पमा कलैया–१३ को विजय आयल स्टोर्स, कलैया–१४ को मोहम्मद आयल स्टोर्स र कलैया बधवनको शिवशङ्कर ट्रेडर्स रहेको कार्यालय प्रमुख शशीप्रसाद यादवले जानकारी दिए । कार्यालयले चितवन, मकवानपुर, बारा, रौतहट र पर्सा जिल्लाका पम्पमा गरेको अनुगमन तथा विशेष जाँचमा सो अनियमितता पाइएको जनाएको हो । गत असोज १८ गतेदेखि पुस १ गतेसम्म निरन्तर ४२ वटा पम्पमा गरिएको जाँचका क्रममा ती तीन पम्पमाथि कारबाही गरिनाका साथै प्रवीण आयल स्टोर्स रौतहट, अमित आयल स्टोर्स कलैया, बारा गञ्जभवानीपुरको जयविकास आयल स्टोर्स, बाबा आयल ट्रेडर्स सिमरा र अनवर पेट्रोलियम डिस्ट्रिब्युटर्स पिपरारी बारामाथि पानि कारबाही अघि बढाइएको उनले बताए । उक्त कार्यालयले व्यावसायिक तथा औद्योगिक प्रतिष्ठानबाट उत्पादित तथा बिक्री वितरण गरिएका खाद्य सामग्रीमा समेत गुणस्तर जाँच र अनुगमन प्रक्रिया अगाडि बढाएको प्रमुख यादवले जानकारी दिए ।
तीन कम्पनीको बोनस पछिको सेयर मूल्य समायोजन, क-कसको कतिमा खुल्यो कारोबार ?
काठमाडौं । मंगलबार विभिन्न तीन कम्पनीको सेयर मूल्य समायोजन भएको छ । नेपाल स्टक एक्स्चेञ्ज(नेप्से)का अनुसार मिर्मिरे लघुवित्त वित्तीय संस्था, स्वावलम्बन लघुवित्त वित्तीय संस्था र एनएमबि बैंकको मूल्य समायोजन भएको हो । यी तीनवटै कम्पनीले बोनस पछिको सेयरको मूल्य समायोजन गरेका हुन् । मिर्मिरे लघुवित्तको २४ प्रतिशत बोनस पछिको मूल्य समायोजन भएको हो । जसको सेयर कारोबार प्रतिकित्ता ९६९.३५ रुपैयाँमा खुलेको छ । सामायोजन पछिको पहिलो कारोबारमा संस्थाको मूल्य घटेर प्रतिकित्ता ९६० रुपैयाँमा झरेको छ । त्यस्तै, स्वावलम्बन लघुवित्तको २५ प्रतिशत बोनस सेयरपछिको मूल्य समायोजन भएको छ । मंगलबार संस्थाको सेयर कारोबार प्रतिकित्ता ८८६ रुपैयाँमा खुलेको छ । समायोजन पछि कारोबार भएको पहिलो दिन संस्थाको सेयर मूल्य प्रतिकित्ता २१ रुपैयाँले घटेको छ । त्यसैगरी, एनएमबि बैंकको पनि १० प्रतिशत बोनस पछिको मूल्य समायोजन भएको हो । मूल्य समायोजन पछि कम्पनीको सेयर कारोबार प्रतिकित्ता ३५१ रुपैयाँदेखि शुरु भएको छ । मंगलबार करिब दुई बजेसम्मको कारोबारमा यस बैंकको सेयर मूल्य घटेर प्रतिकित्ता ३३५ रुपैयाँसम्ममा झरेको छ ।
मालपोतका कर्मचारी कै कारण सर्वसाधारणको जग्गा असुरक्षित, फोटो फेरेर यसरी भयो किनबेच
काठमाडौं । मालपोतका कर्मचारीबाट सर्वसाधारण व्यक्तिको जग्गा दिनप्रतिदिन असुरक्षित बन्दै गएको छ । एक व्यक्तिको नाममा रहेको जग्गा थाहै नदिई अर्को व्यक्तिको नाममा हक हस्तान्तरण गर्न मालपोत कार्यालयक उच्च पदस्त कर्मचारीहरु नै लागि पर्ने गरेका छन् । चन्दनकृष्ण कायस्थले जब बुठानिलकण्ठ नगरपालिका सविकको विष्णु गाविस वडा नं ७ मा रहेको २ रोपनी ८ आना जग्गा आफ्नो नाममा नरहेको थाहा पाए, तब उनी झस्किए । त्यसपछि उनले अख्तियार दुरुपयोग अनुसन्धन आयोगमा उजुरी गरे । आयोगले जग्गा अनियमितताबारे अध्ययन गर्दा मालपोत कार्यालय चावहिलका ६ जना कर्मचारीहरुले ढड्डामा रहेको कायस्थको फोटो झिकी राजु थापा मगरको फोटो टाँसेको खुल्न आएको छ । मिलेमतो गर्ने कर्मचारीहरुमा अधिकृत खगेन्द्रप्रसाद अर्याल, रामप्रसाद सुवेदी, रामप्रसाद सुवेदी, नायब सुब्बा रञ्जनकुमार खरेल, जमुना कमारी श्रेष्ठ र कार्यालय सहयोगी हरि खड्का रहेका छन् । आयोगका प्रवक्ता रामेश्वर दंगालका अनुसार मगरको टोलीले बुढानिलकण्ठ नगरपालिका ७ कित्ता नं ३२३, ३२५ र ३२९ को नक्कली लालपूर्जा समेत निर्माण गरेका थिए । जग्गा नामसारी गर्न राजु थापा मगरले नै नाइकेको भूमिका खेलेको पुष्टी आयोगले गरेको छ । मगरले सानेभाई श्रेष्ठ, श्रीकृष्ण बरुवाल, भुपाल सिं तामाङ, धुब्रप्रसाद भट्टराई र श्रीकृष्ण देवकोटाको समूह बनाई योजना बनाएका थिए । मगरले कर्मचारीहरुलाई समेत ठूलो आर्थिक प्रलोभन देखाएका थिए । सबै प्रक्रिया पूरा गरेर मगरले जग्गा बिक्रीका लागि प्रक्रिया सुरु गरेका थिए । जग्गाको नामसारी गर्न कर्मचारी मात्र नभएर बैंक तथा सहकारी समेतको संग्लग्नता रहेको देखिएको छ । मिलेमतोको आरोपमा आयोगले अर्थ बचत तथा बचत ऋण सहकारी संस्था लिमिटेड सुन्धाराका निर्देशक नवदुर्गाप्रसाद ढुङगेल, प्रबन्ध निर्देशक सुरेशकुमार थापा र सानिमा बैंक एकान्तकुना ललितपुरका ट्रेलर सनिश सापकोटालाई पक्राउ गरेको छ । जग्गा अनियमिताका दोषीमध्ये केहि व्यक्ति पक्राउ गर्न बाँकी रहेको प्रवक्ता दंगालले जानकारी दिए । आयोगले उनीहरुको खोजी कार्य समेत गरिरहेको छ । १६ जना विरुद्ध मुद्दा दर्ता यता, आयोगले भ्रष्ट्राचार अभियोगमा १६ जना विरुद्ध नै मुद्दा दायर गरेको छ । उनीहरुबाट करिब ६० करोड माग दाबी गरिएको छ । उनीहरु विरुद्ध विशेष अदालत काठमाडौंमा मुद्दा दायर गरिएको हो ।
