नेपाल विद्युत् प्राधिकरणको आफ्नै मोबाइल एप्स, बिद्युत किन काटिँदैछ जानकारी पाइने
काठमाडौँ । तपाईंको कार्यालय वा निवासमा कुनै कारणवश विद्युत् कटौती भयो भन्ने कुराको जानकारी लिन नेपाल विद्युत् प्राधिकरणले प्रकाशित गर्ने सूचनाको भर पर्नुपर्ने अवस्था थियो । उक्त सूचना सञ्चार माध्यममा प्रकाशित वा प्रसारित भएपछि मात्रै थाहा हुन्थ्यो । पछिल्लो दिनमा प्राधिकरणले सूचना र प्रविधिको क्षेत्रमा देखिएको उपलब्धिलाई प्रयोग गरेर उपभोक्तालाई सहजै सूचना दिने उद्देश्यले नयाँ खालको मोबाइल एप्लिकेशन सञ्चालनमा ल्याएको छ । प्राधिकरणका कार्यकारी निर्देशक कुलमान घिसिङका अनुसार नेपाल इलेक्ट्रिसिटी अथोरेटी(एनइए) नामक मोबाइल एप्लिकेशन सञ्चालनमा ल्याइएको छ । प्राधिकरणले विकास गरेको उक्त एप्लिकेशनले कुन स्थानमा के कारणले विद्युत् काटिँदैछ भन्ने विषयको जानकारी सहजै दिनेछन् । हाल गुगल प्ले स्टोरमा मात्र उपलब्ध रहेको उक्त एप्लिकेशन ग्राहकले आफ्नो मोबाइल फोनमा डाउनलोड गर्न सक्नेछन् । एप्लिकेशनमा देशैभरका प्राधिकरणका कार्यालयको विवरणसमेत समावेश गरिएको छ । एप्लिकेशनमा युजरनेममा ग्राहकले आफ्नो नाम र जन्म मिति उल्लेख गर्नुपर्नेहुन्छ । प्राधिकरणका क्षेत्रीय कार्यालय, जिल्ला कार्यालय र वितरण केन्द्रसमेत उपलब्ध रहेको छ । यस्तै नो लाइट सेवाका नम्बरसमेत उपलब्ध भएको एप्लिकेशनमा उपभोक्ताले आफ्नो बिलको बारेमा समेत जानकारी लिन सक्नेछन् । प्राधिकरणका वितरण केन्द्रले कुन स्थानमा के कारणले विद्युत् कटौती हुँदैछ, कति समयमा विद्युत् आउँछ भन्ने कुराको जानकारीसमेत सोही एप्लिकेशनले दिनेछ । यस्तै ग्राहकको जन्म दिनको अवसरमा समेत प्राधिकरणले सूचना दिनेछ । एप्लिकेशनमार्फत नै हाल नेपाल इन्भेस्टमेन्ट बैंक र इ सेवामार्फत विद्युत् महसुल भुक्तानी गर्न सकिनेछ । कुनै गुनासो वा सूचना भए पनि एप्लिकेशनबाटै जानकारी गराउन सकिनेछ । प्राधिकरणका सूचना, समाचार, बिलको जानकारी तथा प्राधिकरणका प्रकाशन तथा रोजगारीको सूचनासमेत उपलब्ध हुने गरी एप्लिकेशनमा उपलब्ध गराइएको कार्यकारी निर्देशक घिसिङले जानकारी दिए । उपभोक्तालाई बढीभन्दा बढी सहज र सरलरुपमा सेवा दिने लक्ष्यका साथ मोबाइल एप्लिकेशन सञ्चालनमा ल्याइएको र त्यसमा थप सेवा थप्दै लैजाने योजनामा प्राधिकरण रहेको छ । सरल तरिकाबाट पनि उपभोक्तालाई सही र तथ्यपूर्ण सूचना दिन सकिन्छ भन्ने ध्येयका साथ मोबाइल एप्लिकेशन सञ्चालनमा ल्याइएको कार्यकारी निर्देशक घिसिङको भनाइ छ । यस्तै प्राधिकरणले सोही एप्लिकेशनलाई थप परिमार्जन गरेर कति दिनमा लाइन काटिँदैछ भन्ने कुराको जानकारी समेत दिनेछ । यस्तै के कति परिमाणमा विद्युत् महसुल उठ्यो, कति दिनमा तिर्नुपर्छ भन्ने विषयको समेत जानकारी प्राप्त हुनेछ । त्यसैगरी प्राधिकरणको कुन स्थानको ग्राहकले कति पटक गुनासो गरे, कति पटक कुन स्थानको लाइन काटियो र के कसरी समाधान गरियो भन्ने विषयको समेत यथेष्ट जानकारी पाइने भएकाले सम्बन्धित कार्यालयको कार्य क्षमता तथा समस्या समाधानमा चालिएको कदमको बारेमा समेत सहजै सूचना प्राप्त हुनेछ । ग्राहकलाई सही र समयै जानकारी दिने लक्ष्यका साथ एप्लिकेशन सञ्चालनमा ल्याइएको बताउँदै कार्यकारी निर्देशक घिसिङले भन्नुभयो ‘सूचना प्रविधिको प्रयोग गरेर सहज सेवा प्रदान गर्न प्राधिकरण लागि परेको छ । यसलाई थप व्यवस्थित गरेर लैजाने सोचमा छौँ । रासस
१३ कर्मचारीविरुद्ध भ्रष्टाचार मुद्दा, कृषि बीउबिजन वितरणमा अनियमितताको अभियोग
काठमाडौँ । अख्तियार दुरुपयोग अनुसन्धान आयोगले जिल्ला कृषि विकास कार्यालय, दैलेखका प्रमुख वरिष्ठ कृषि विकास अधिकृत डा नरहरिप्रसाद घिमिरेसहित १३ जनाविरुद्ध विशेष अदालतमा मुद्दा दायर गरेको छ । उनीहरुमाथि कृषि बीउ तथा बिजन वितरणमा अनियमितता गरेको, कृषि सामग्री खरीद नै नगरी खरिद गरेको देखाई ढुवानीसमेत गरेको नक्कली बिल भरपाई बनाई भ्रष्टाचार गरेको अभियोग लागेको छ । उक्त बिल भरपाई सदर गरी भुक्तानी लिनेदिने कार्य गरी प्राप्त नभएको सामान आम्दानी बाँधी खर्च देखाई, उक्त बीउ खरीद गर्ने र प्रयोग गर्ने प्रयोजनलाई कार्यालयका कर्मचारी तथा ठेकेदारसँग मिलेर भ्रष्टाचार गरेको पाइएकाले उनीहरुविरुद्ध मुद्दा दायर गरिएको आयोगले जनाएको छ । आयोगले तत्कालीन कार्यालय प्रमुख डा घिमिरे १० लाख ५० हजार ९६१, वाग्वानी विकास अधिकृत सूर्यनाथ योगीविरुद्ध १८ लाख ३६ हजार ४००, कृषि प्रसार अधिकृत नरेन्द्रबहादुर थापा १० लाख तीन हजार २६३, लेखा अधिकृत ढालबहादुर हमाल १२ लाख ४६ हजार ४८१, प्राविधिक सहायक गमानसिंह थापा दुई लाख २४ हजार ४३१, वाग्वानी विकास अधिकृत भुवनबहादुर मल्ल र नायब सुब्बा नमराज थापाले आठ लाख १२ हजार १७८ भ्रष्टाचार गरेको अभियोग लगाएको छ । यस्तै लेखापाल रामकुमार शाह १६ लाख ९१ हजार ७१७, प्राविधिक सहायक मिमबहादुर शाही एक लाख ७५ हजार २६२, नायब प्राविधिक सहायक रङ्गबहादुर वपाल रु ३९ हजार ४५०, प्राविधिक सहायक पूर्णबहादुर थापा, सबइञ्जिनीयर रामप्रसाद शर्मा १० लाख २७ हजार ४०२ र ताजा तरकारी उत्पादन समूह दैलेखका अध्यक्ष प्रेमबहादुर शाहीलाई रु २२ हजार बराबरको भ्रष्टाचार गरेको अभियोग आयोगले लगाएको छ । उनीहरुविरुद्ध बिगो असुल गरी कैद सजायको समेत माग गरिएको आयोगका प्रवक्ता रामेश्वर दङ्गालले जानकारी दिए ।
सिटिजन्स बैंकको भरतपुर शाखा स्थानान्तरण
काठमाडौं । सिटिजन्स बैंक इन्टरनेसनल लिमिटेडले भरतपुर महानगरपालिका वडा नं. ३ मा रहेको शाखाको स्थानान्तरण गरेको छ । बैंकले उक्त शाखा करिब १०० मिटरको दुरिमा रहेको सोही नगरपालिकाको वडा नं. २मा रहेको भवनमा स्थानान्तरण गरी बैंकिंग कारोबार सञ्चालन गरेको छ । सोही भवनबाट थप छिटो, छरितो, चुस्त र दुरुस्त रूपमा ग्राहकहरुलाई बैंकिंग सेवा प्रदान गर्ने बैंकको प्रतिबद्धता रहेको छ । औद्योगिक नगरी नारायणघाटमा आयात, निर्यात, व्यापार तथा अन्य व्यवसायिक क्षेत्रमा सम्भावना रहेको र यसलाई टेवा पुर्याँउने हेतुले विभिन्न नयाँ योजनाहरु संचालन गर्ने बैंकले जनाएको छ । हालसम्म बैंकले ८० वटा शाखा, ७५ वटा एटीएम र ९९ वटा शाखारहित बैंकिङ्ग एकाईहरुबाट बैंकिङ्ग सेवाहरु दिँदै आएको छ ।
सन नेपाल र सिभिल बैंकबीच बैंकास्योरेन्स सम्झौता
काठमाण्डौ । सन नेपाल लाइफइन्स्योरेन्स र सिभिल बैंकबीच बैंकास्योरेन्स सम्झौता भएको छ । उक्त सम्झौतामा सन नेपाल लाइफइन्स्योरेन्स कम्पनीको तर्फबाट प्रमुख कार्यकारी अधिकृत राजकुमार अर्याल र सिभिल बैंकको तर्फबाट सिबिओ सुजितकुमार शाक्यले हस्ताक्षर गरे । सम्झौता पछि सिभिल बैंकका सम्पूर्ण ग्राहकहरुले बीमा शुल्क भुक्तानी गर्न, बीमा लेख लिन तथा बीमा दाबी भुक्तानी सहज रुपमा सन नेपाल लाइफइन्स्योरेन्सबाट प्राप्त गर्न सक्नेछन् । उत्कृष्ट सेवासहित सरल, सुलभ तरिकाले सन नेपाल लाइफइन्स्योरेन्स कम्पनीका विभिन्न बीमालेखहरु सिभिल बैंकका सम्पूर्ण शाखाहरु मार्फत उपलब्ध हुनेछ ।
कान्ति अस्पताललाई सनराइज बैंकको सहयोग
काठमाडौं । सनराइज बैंक लिमिटेडले संस्थागत सामाजिक उत्तरदायित्व कार्यक्रम अन्तर्गत कान्ति बाल अस्पताललाई सहयोग गरेको छ । बैंकले सहयोग स्वरुप अस्पतालको बर्न वार्डको लागि आवश्यक डरम्याटोनी(स्किन ग्राफ्टिङ्) मसिन दिएको छ । मेसिन सहित खाद्य सामाग्रीहरु बैंकका संचालक समितिका अध्यक्ष मोतीलाल दुगड तथा संचालक ज्योतिकुमार बेगानीले संयुक्त रुपमा कान्ति अस्पतालका निर्देशक गणेशकुमार राईलाई हस्तान्तरण गरेका छन् । साथै, कान्ति अस्पतालका निर्देशक राईले सनराइज बैंकले गरेको सहयोगका लागी धन्यवाद दिँदै भविष्यमा यस्ता कार्यक्रमहरुको निरन्तरताका लागी अनुरोध गरेका छन् ।
हिमस्टारले ल्यायो चारैतिर ताप फैलाउने नयाँ हलोजन हिटर, १ वर्षको वारेन्टी
काठमाडौं । गोल्छा अर्गनाइजेसनको भगिनी संस्था हिम इलेक्ट्रोनिक्स्ले जाडो मौसमलाई लक्षित गरी नयाँ हिटरहरु सार्वजनिक गरेको छ । जाडो मौसममा तातो राख्न कम्पनीले विभिन्न तीन मोडलहरु सार्वजनिक गरेको छ । ४००, ८००, १२०० वाटका रहेका उक्त हिटरहरु सबै पोर्टेबल आकारमा छन् जसले प्रयोगकर्ताहरुलाई वरपर अथवा चारैतिर लैजान सजिलाे हुने कम्पनीले जनाएको छ । साथै, सबै तीन मोडलहरूमा वाईड अश्सिकिलेटिंग फंक्शन रहेको छ जसले तापलाई चारैतिर फैलाउँछ । कम्पनीका अनुसार सबै मोडेलहरूमा सुरक्षा टिप-ओभर स्विच छ र त्यो सबै प्लास्टिक र धातुको कभरमा आउँछ । हलोजन हिटरहरूका यी तीन मोडलहरू उत्पादमा १ वर्ष वारेन्टी रहेका कम्पनीले जनाएको छ ।
निसानले ल्यायो ‘विन्टर फेष्ट अफर’, गाडी खरिदमा ५ लाखसम्म छुट
काठमाण्डौ । निसान गाडीको आधिकारिक वितरक तथा बजार व्यवस्थापक कम्पनी पायोनियर मोटो कर्पले निसानका गाडीहरुमा ‘विन्टर फेष्ट अफर’को उपहार योजना ल्याएको छ । यो उपहार योजना निसानका सबै गाडीहरु ल्ष्ककबल ह्(त्चबष्,ि त्भचचबलय, ल्बखबचब, क्गललथ, ःष्अचब ब्अतष्खभ मा लागू हुने कम्पनीले जनाएको छ । निसान “विन्टर फेष्ट अफर”योजना अन्तर्गत ग्राहकहरूले हरेक निसान गाडीको खरिदमा पाँचलाखसम्म छुट पाउन सक्ने छन् । गाडी एक्सचेन्ज गर्दा एक्सचेन्ज बोनस र लोयल्टी बोनसबाट पनि ग्राहकहरु लाभान्वित हुन सक्नेछन् । सुख्खा जाडोलाई उत्सवमय बनाउन ग्राहकहरुलाई “विन्टर फेष्ट अफर”मार्फत अन्यथुप्रै सुविधाहरु पनिनिसानले दिने भएको छ । यो योजनाअन्तर्गत ग्राहकहरुले २ वर्षको निःशुल्क स्वास्थ्यबीमा(आफ्नो निकटतम परिवारका सदस्यहरुलाई) ३ वर्षको वारेन्टी र सर्भिसिङ र एकवर्षको विस्तृत ईन्स्योरेन्स निःशुल्क प्राप्त गर्नेछन् । पायोनियर मोटो कर्पका अनुसार यो योजना अवधिभर पुराना गाडीहरुको उत्कृष्ट मूल्याङकन हुनुका साथै सहज फाइनान्सको पनि सुविधा रहको कम्पनीले जनाएको छ ।
सिमेन्टलाई कंक्रीट र प्लास्टरमा कसरी प्रयोग गर्ने विषयमा शिवम् सिमेन्टले गर्यो गोष्ठी कार्यक्रम
काठमाडौं । शिवम् सिमेन्ट लिमिटेडले आफ्नो सामाजिक उत्तरदायित्व अन्तर्गत “मजबुत निर्माणमा गुणस्तरिय सिमेन्टको भुमिका” बारेमा सचेतनामुलक गोष्ठी सम्पन्न गरेको छ । शिवम् सिमेन्टले पुर्वको गौरादहमा गरेको उक्त कार्यक्रममा निमार्ण व्यवसायी, ठेकेदार, मिस्त्री, इन्जिनियरको सहभागिता रहेको थियो । कार्यक्रममा शिवम् सिमेन्टका तर्फबाट प्राविधिक विज्ञ आनन्द चतुर्वेदीले सिमेन्टलाई कंक्रीट र प्लास्टरमा सहि तरिकाले प्रयोग गर्न प्राविधिक ज्ञान तथा ओ.पि.सी. सिमेन्टको फाइदा र विशेषताको बारेमा जानकारी गराएका थिए । कुनै पनि निर्माण बलियो बनाउन राम्रो बालुवा कसरी छान्ने, राम्रो इट्ठा कसरी छान्ने, राम्रो सिमेन्ट कसरी छान्ने आदि जस्ता विषयमा पनि उक्त कार्यक्रममा छलफल गरिनुको साथै सरल प्राविधिक विधी बारेमा मिस्त्रीहरुलाई जानकारी गराएका थिए । उक्त गोष्ठीमा गुणस्तरीय भौतिक संरचना निर्माणको लागि सिमेन्टको गुणस्तर उच्च रहनु पर्ने कुरालाई मध्यनजर गर्दै यस्ता सचेतनामुलक कार्यक्रमहरु आगामी दिनहरुमा समेत देश भरी नै संचालन गर्दै जाने जानकारी गराए । शिवम् सिमेन्टले नो कम्प्रोमाइजको नारा सहित विभिन्न क्षेत्रहरु जस्तै शिक्षा, स्वास्थ्य, खेलकुद, यातायात, वातावरण व्यवस्थापन एवम् वृक्षारोपण, सरसफाई, मनोरञ्जन जस्तो क्षेत्रमा विभिन्न कार्यक्रमहरु गर्दै आएको छ ।
