डेढ अर्ब नपाए काम नगर्ने मेलम्चीका स्वदेशी ठेकेदारको चेतावनी
काठमाडौं । मेलम्ची खानेपानी आयोजनामा मुल ठेकेदारका लागि काम गरिरहेका ४४ वटा सहायक ठेकेदारहरुले एक अर्ब ५० करोड रुपैंयाँ भुक्तानी नपाए काम रोक्ने चेतावनी दिएका छन् । मंगलबार राजधानीमा पत्रकार सम्मेलन गर्दै उनीहरुले सरकारका कारण आफूहरुले ठेकेदारबाट भुक्तानी नपाएको गुनासो पोख्दै तत्काल पैसा नपाए काम रोक्ने चेतावनी दिएका हुन् । उनीहरुले आफूहरुको विभिन्न ४४ वटा कम्पनीलगायतले सीएमसीबाट करिब डेढ अर्ब रुपैयाँ भुक्तानी पाउन बाँकी रहेको पनि जानकारी गराए । मेलम्ची आयोजनालाई निर्धारित समयमै सम्पन्न गर्न र नेपालीहरुले आयोजनामा बैंक कर्जा लिएर वा घरखेत बेचेर गरेको लगानी उठाउन वर्तमान सरकार गम्भिर हुनुपर्ने पनि उनीहरुको आग्रह छ । बिरामोटर्स, ज्योतिश्री, बीएम ईन्टरप्राईजेज, मेगाटेक हाईड्रो एण्ड ईन्फ्रास्ट्रक्चर, एचजी ईन्टरप्राईजेज, जाल्पा ईन्फ्रस्ट्रक्चर लगायत विभिन्न ४४ वटा कम्पनीका प्रतिनिधिहरुले पत्रकार सम्मेलनमार्फत विभिन्न ५ बुँदे मागसमेत अघि सारेका छन् । उनीहरुले अघि सारेका मागहरुमा उक्त आयोजनाले हालसम्म भुक्तानी गर्न सम्पूर्ण बाँकी रकम नेपाली व्यवसायी एवम् कामदारलाई तिर्ने शर्त ठेकेदार सीएमसीलाई भुक्तानी सरकारले गर्नुपर्ने, कुनै कारणवश ठेक्का रद्द हुने अवस्था आए सीएमसीको धरौटी वा भुक्तानी गर्न सम्पूर्ण बाँकी रकम वा रिटेन्सनबाट नेपाली व्यवसायीको भुक्तानी सरकारले गर्नुपर्ने र खानेपानीजस्तो संवेदनशील राष्ट्रिय गौरवको आयोजना निर्धारित समय तालिकामा सम्पन्न गर्न तत्काल कार्यतालिका सार्वजनिक गर्न र आयोजना सुचारु गर्नुपर्ने रहेका छन् । कार्यक्रममा मेलम्ची खानेपानी आयोजनाको मुख्य ठेकेदार कम्पनी सीएमसी पीडित नेपाली समूहका संयोजक ई. श्रीराम न्यौपानेले उक्त आयोजनालाई सम्पन्नको अन्तिम चरणमा पुर्याउन योगदान गर्ने नेपाली उपकरण, नेपाली श्रम र नेपाली लगानीलाई खेर जान नदिन सरकार गम्भिर बन्नुपर्ने धारणा राखे । उनले भने,‘यो आयोजनालाई सम्पन्न गराउन हामी नेपाली व्यवसायीले मुख्य भूमिका निर्वाह गरेको कुरा सर्वविदितै छ । अब सरकारले हामीलाई भुक्तानी गर्ने शर्तमा मात्रै यो आयोजनाको मुख्य ठेकेदार कम्पनी सीएमसीलाई भुक्तानी गरोस् । अथवा कुनै कारणवश यो ठेक्का रद्द हुने अवस्था आएमा ठेकेदारलाई भुक्तानी गर्नुपर्ने रकमबाट कट्टा गरी वा धरौटी वा रिटेन्सनबाट समेत कट्टा गरि हामीलाई भुक्तानी गर्नतर्फ सरकारको ध्यानाकार्षण गराउँछौं ।’ सरकारका तर्फबाट आफूहरुको माग सम्बोधन हुनेमा आफुहरु विश्वस्त रहेको पनि न्यौपानेले सुनाए । उनले भने,‘सरकारले हाम्रो माग सम्बोधन गर्छ भन्ने हामीलाई पूर्ण विश्वास छ । यही विश्वासका साथ हामी कामदार, निर्माण सामग्री वितरणकर्ता, ढुवानीकर्ता, उपठेकेदारलगायतका पीडित पक्षलाई सहयोग पुर्याउन नेपाल सरकार, मन्त्रालय, मेलम्ची खानेपानी विकास समिति, वैदेशिक लगानीकर्ता, राजनीतिक दलहरु, सञ्चार माध्यम, काठमाडौंवासी तथा सम्पूर्ण देशवासीमा हार्दिक अपिल गर्दछौं ।’ त्यस्तै उनीहरुले सरकारले आफ्ना मागहरु समयमै सम्बोधन नगरे ‘नो सप्लाई, नो वर्क’ अर्थात ‘सामग्री ढुवानी नगर्ने र कामपनि नगर्ने’को नीतिसहित कडा रुपमा प्रस्तुत हुनेपनि चेतावनी दिएका छन् । आफूहरुको बाध्यकारी कदमबाट उत्पन्न हुने जस्तोसुकै परिस्थितिको जिम्मेवारी स्वयम सरकार नै हुनेपनि उनीहरुको भनाई छ । कार्यक्रममा विष्णुमणि आचार्य, किरण थापा, विज्ञहरु इञ्जिनियर. नियाज अहमद, इञ्जिनियर तारा सापकोटालगायतले सरकार उक्त आयोजनाको मुख्य ठेकेदार कम्पनी सीएमसी पीडित नेपाली समूहको मागप्रति संवेदनशील बन्नुपर्ने धारणा राखेका थिए । आफूहरुले उठाएका माग तत्काल सम्बोधन नभए आफूहरु बाध्यकारी कदम चाल्न पनि पछि नहट्ने उनीहरुको चेतावनी छ । इञ्जिनियर सापकोटाले करार सम्झौताका प्रावधानबारे प्रकाश पार्दै उक्त आयोजनामा सम्झौता उल्लंघन गर्ने पक्षले ठूलो मुल्य चुकाउनुपर्ने खतरा औंल्याए । उनले भने,‘ठेक्का सम्झौताको दफा १६ को उपदफा २ बमोजिम समयमै पैसा भुक्तानी नगरेका कारण र ठेकेदार पक्षले मेलम्ची बोर्डको कमजोरी देखाई एकतर्फी ठेक्का सम्झौता तोड्नेजस्तो अवस्था निम्तिनु दुर्भाग्य हो ।’
‘अबको भाइटिकामा मल्लकालीन शैलीको रानीपोखरीमा पानी देख्न पाइन्छ’
काठमाडौं । नेपाल पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीले आगामी तिहारको भाइटिकामा मल्लकालीन रानीपोखरीमा पानी देख्न पाइनेगरी निर्माण कार्य अघि बढिरहेको बताएका छन् । नेपाल पुनर्निमाण प्राधिकरणको ३ बर्षको प्रगति एवं आगामी २ वर्षको कार्ययोजनासम्बन्धी जानकारी दिन आयोजित पत्रकार सम्मेलनमा सीईओ ज्ञवालीले भने – ‘यसअघि रानीपोखरीलाई कुन शैलीमा पुनर्निमाण गर्ने भन्नेवारे विवाद थियो । पुरातत्व विभाग र काठमाडौं महानगरपालिकाबीच त्यसमा मतैक्यता थिएन । अहिले त्यसको टुङ्गो लागेको छ मल्लकालीन ग्रन्थकुट शैंलीमा बन्ने रानीपोखरीमा अबको भाइटिकासम्ममा तपाईँहरुले पानी देख्नुहुन्छ ।’ रानीपोखरीका निर्माणका लागि टेन्डर प्रक्रिया अन्तिम चरणमा पुगेको जानकारी प्राधिकरणलाई प्राप्त भएको समेत ज्ञवालीले बताए । रानीपोखरीमा आफैं पानी आउने अवस्था भने नरहेको पत्रकार सम्मेलनका क्रममा ज्ञवालीले जानकारी दिए । ३०० मिटर पर ट्युबेलिङ गरेर पानी निकाल्ने र पोखरीमा पठाउने व्यवस्था मिलाउनेगरी प्रक्रिया अघि बढेको समेत ज्ञवालीले जानकारी दिए । रानीपोखरीमा आधुनिक शैलीमा बनाउने र कंक्रिटको प्रयोग गर्ने तयारी महानगरपालिकाले गरेपछि विवाद सिर्जना भएको थियो । महानगरको यस्तो तयारीमा पुरातत्व विभागले हस्तक्षेप गरेपछि पोखरी पुनर्निमाणको प्रक्रिया रोकिएको थियो ।
कार्यभार सम्हालेको १४ दिन नबित्दै मेक्सिकोका गभर्नरकाे मृत्यु
मेक्सिको । मेक्सिकोमा सोमबार हेलिकप्टर दुर्घटना हुँदा पुब्ला राज्यका गभर्नर र उनका श्रीमान्, एकजना सिनेटरको मृत्यु भएको राष्ट्रपतिको कार्यालयले जनाएको छ । उक्त दुर्घटनामा सिनेटर राफेल मोरेनो भाल्ले एवं उनकी पत्नी र गभर्नर मार्था एरिका अलोन्सोको मृत्यु भएको हो । मेक्सिकोका राष्ट्रपति मानुएल लोपेज ओब्राडोरले ट्वीट गर्दै गहिरो समवेदना व्यक्त गरेका छन् । उनले दुर्घटनाको अनुसन्धान शुरु भइसकेको जानकारी दिए । साथै, दुर्घटनामा हेलिकप्टरका दुई चालक र एकजना सहयोगीको समेत मृत्यु भएको छ । पुब्लाको सान्ता मारिया कोरोनान्गो क्षेत्रबाट उडेको १० मिनेटभित्रै दुर्घटनाग्रस्त भएको थियो । गभर्नर अलोन्सोले गत डिसेम्बर १० मा मात्र पदभार ग्रहण गरेका थिइन्। उनी पुब्लाको पहिलो महिला गभर्नर थिइन् । उनका पति सन् २०११ देखि २०१७ सम्म पुब्लाको गभर्नर थिए । रासस/एएफपी
कसरी अभिभावकलाई आफ्नो समस्या बताउने र बुझाउने ?
काठमाडौं। धेरै बुवाआमाहरुले आफ्नो बच्चाहरुको मनको कुरा बुझ्न सकिरहेका हुँदैनन। छोराछोरीहरुले आफ्नो समस्या भएका कुराहरु भन्दा पनि उनिहरुले त्यसमा खासै ध्यान दिईेएको पनि पाईदैन। बुवाआमालाई आफ्नो कुरा बुझाउन धेरैलाई हम्मे हम्मे पर्ने गर्छ। सबैभन्दा पहिला सबैको अभिभावक एकै किसिमका हुँदैनन। कसैको कुरा नभनी बुझ्ने हुन्छन् भने कसैले जति भने पनि बुझदैनन्। यो ब्यक्ती ब्यक्तीमा फरक पर्न जान्छ। कोही अभिभावक आफ्नो कुरा पनि बच्चाको अगाडि खुलेर राख्दैनन् र बच्चाहरुलाई पनि आज विधालयमा के गर्यौ, खाजा के खायौ, घरमा के गर्यौ भनेर पनि सोध्दैनन। यस्तो हुँदा अभिभावक र छोराछोरी बिच दुरी बढ्दै जान्छ जसको कारणले आफुलाई आईपर्ने समस्याको बारेमा बच्चाहरुले खुलेर अभिभावकलाई भन्न झक्झकाउँछन्न। जो आभिभावक बच्चाहरुलाई धेरै बोल्न दिदैनन् र आफ्नो मात्रा कुरा सुन्न भन्छन्, यस्ता अभिभावकलाई छोराछोरीले कुरा बुझाउन निकै नै अफ्ठेरो हुने गर्छ।जुन बच्चा आफ्नो आमाबुवाको धेरै सम्मान गर्छ, उहाँहरु बोल्दा बोली फर्काउन सक्दैन, सोझो छ त्यस्ता ब्यक्तीलाई आफ्नो बुवाआमालाई सम्झाउन गार्हो हुन्छ। मनमा जे आयो त्यही बोल्नेहरुलाई यस्तो कुरामा खासै समस्या पर्दैन। जसलाई आफ्नो समस्या अभिभावकलाई भन्न गार्हो हुन्छ उनीहरुले यि कुरालाई अप्नाए आफ्नो कुरा अभिभावकलाई राम्रोसँग राख्न सक्छन्। के गर्ने ? बुझन् नखोज्ने आमाबुवालाई सम्झाउनको लागि तपाईंले सबैभन्दा पहिला तपाईंको ब्यक्त गर्ने शैलीमा परिवर्तन ल्याउन जरुरी छ। तपाईंलाई मानसिक पिडा छ वा अरु कुनै समस्या छ भने सबैभन्दा पहिला आफ्नो मिल्ने साथीहरुसँग कुरा गर्नुहोस् अझै घर आईरहने साथीसँग आफ्नो कुरा राख्नुहोस् धेरै समयमा अभीभावकहरुले तपाईको कुरा नसुनेर तपाईंको साथीको कुरा सुन्ने गर्छन्। अथवा बिधालयामा आफ्नो शिक्षकसँग कुरा गर्नुहोस् किनभने आमाबुवाले शिक्षकको कुरामा पनि विश्वाश गर्नेगर्छन्। के नगर्ने ? १। सिधै मलाई त डिप्रेसन छ भनेर कहिले पनि नभन्नुहोस्। यसो भन्दा प्राय आमाबुवाले तँलाई किन के चिन्ता परेको छ, हामीले सबै गर्देको छौ, तेरो काम पढ्ने हो तँ पढ् र भनेर भन्नुहुन्छ। २। यदी आफ्नो बुवाआमा त्यस्तै नबुझ्ने हुनुहुन्छ भने सर्वप्रथम त तपाईंलाई के कस्तो समस्या भईरहेको छ त्यसको एउटा लिस्ट तयार पार्नुहोस्। लिस्ट बनाउँदा लक्षणहरु लेख्नुहोस् र त्यस लक्षणले आफुलाई कस्तो असर गरेको छ त्यो सबै लेख्नुहोस् र ति लक्षणहरु किन सामान्य होईनन् त्यो पनि लेख्नुहोस्। उदाहरणको लागि- यदी तपाईंलाई निन्द्रा लागेको छैन भने तपाईंलाई कति दिन देखी कति समय निन्द्रा लागेको छैन त्यसकुरालाई स्पस्ट पार्नुहोस्। निन्द्रा सामान्य रुपमा धेरैलाई लागिरहेको हुँदैन तर तपाईलाई निन्द्रा नलाग्नु सामान्य होईन भनेर स्पस्ट पार्नुहोस्। एक दिन-दुई दिन निन्द्रा नलाग्नु सामान्य हुनसक्छ तर २-३ हप्ता सम्म निन्द्रा नलाग्नु सामान्य हुनसक्दैन। ३। मलाई डिप्रेसन छ भनेर भन्नु भन्दा पनि मैले चिन्ता लिनु पर्ने बिषय केही पनि छैन त्यै पनि म चिन्ता लिईरहेको हुन्छु भनेर भन्नुहोस्। म भित्रै देखी खोक्रो महसुस गरिरहेको छु तर थाहा छैन किन भईरहेको छु भनेर भन्नुहोस्। त्यसो भनेपछी बुवाआमाले भन्ने बाटो केही पनि हुँदैन।
शेयर ब्रोकर कम्पनी आशुतोषको कारोबार रोक्न धितोपत्र बोर्डको पत्राचार, नेप्सेले गर्यो निलम्बन
काठमाण्डौ । नेपाल धितोपत्र बोर्डले कालोसूचिमा समावेश आशुतोष ब्रोकर एण्ड सेक्युरिटिजलाई कारोबार गर्न रोक लगाएको छ । मंगलबार बोर्डको बैठकले सो सेक्युरिटिज कालोसूचिबाट फुकुवा नभएसम्म र बोर्डले यसबारेमा पत्र नपठाएसम्म कारोबार रोक्का गर्न नेपाल स्टक एक्सचेञ्ज(नेप्से) र सीडीएसलाई पत्र लेखेको छ । यता, नेपाल स्टक एक्सचेञ्ज(नेप्स)ले आशुतोष ब्रोकर एण्ड सेक्युरिटिज प्रालिलाई निलम्बन गरेको छ । कम्पनी र कम्पनीका सञ्चालकहरु कर्जा सूचना केन्द्रको कालोसूचिमा समावेश देखिएकाले कालोसूचिमा पर्नुको कारण तथा तथ्य खुलाई नेप्सेमा पेश गर्न मंगलबार नेप्सेले पत्र काटेको छ । धितोपत्र व्यवसायी(धितोपत्र दलाल, धितोपत्र व्यापारी तथा बजार निर्माता) नियमावली, २०६४ को नियम १८(६) मा सञ्चालक वा कार्यकारी प्रमुखको अयोग्यता सम्बन्धी प्राबधान अनुसार अर्को निर्णय नभएसम्म सदस्यता निलम्बन गरी धितोपत्र कारोबारमा रोक लगाइएको नेप्सेको पत्रमा उल्लेख छ । साथै, पत्रमा त्यस कम्पनीबाट कारोबार राफसाफ तथा फर्छ्यौट लगायतका अन्य कारोबार हालका लागि नेप्सेसँग समन्वय गरेर मात्र गर्न भनिएको छ । याे पनि हेर्नुहाेस् सेयर ब्रोकर कम्पनी आशुतोष कालोसूचीमा, धितोपत्र बोर्डले लाइसेन्स खारेज गर्न सक्ने
पुनर्निमाणको तीन बर्ष : साढे ३ लाख घर बने, ३ लाखलाई प्राधिकरणले भन्यो –‘नो’
काठमाडौं । नेपाल पुनर्निमाण प्राधिकरणले आफ्नो स्थापनाको ३ बर्षमा ३ लाख ३७ हजार निजी आवास निर्माण सम्पन्न गरेको दाबी गरेको छ । प्राधिकरणको स्थापनाको तेस्रो वर्ष पूरा गरेको अवसरमा आयोजित समीक्षा तथा भावी कार्ययोजना सार्वजनिक गर्न डाकेको पत्रकार सम्मेलनमा प्राधिकरणले कुल ८ लाख ८४ हजार ८०० जनाले आवास पुनर्निमाणका लागि आवेदन दिएकोमा ८ लाख २२ हजार ९ सय ९ जना लाभग्राहीको सूचीमा परेको, त्यसमध्ये ९० प्रतिशत अर्थात् ७ लाख ४२ हजार १ सय ३५ जनासँग अनुदान सम्झौता भएको, अनुदान सम्झौता भएकामध्ये ९९ प्रतिशत अर्थात् ७ लाख ३३ हजार ९०५ जनाले पहिलो किस्ताबापतको रकम लिएको जानकारी दिएकाे छ । त्यस्तै, ७१ प्रतिशत अर्थात् ५ लाख २३ हजार ३७३ जनाले दोस्रो किस्ताको रकम लिएको, ४५ प्रतिशत अर्थात् ३ लाख ३५ हजार ४८५ जनाले तेस्रो किस्ता लिएको, ३ लाख ३७ हजार ३१९ जनाले घरनिर्माण सम्झौता गरेको तथ्याङ्क सार्वजनिक गरेको छ । घर निर्माण सम्पन्न गरेका र निर्माणधिन रहेकाको संख्या अनुदान सम्झौता भएको लाभग्राहीको ७७ प्रतिशत रहेको पनि प्राधिकरणको तथ्याङ्कमा उल्लेख छ । साढे ४ लाखको गुनासो, ३ लाख अस्वीकृत घर पुनर्निमाणको लाभग्राही सूचीमा समावेश नभएका साढे ४ लाख ३६ हजार ९ सय ११ जना भुकम्पपीडितले आफू पनि लाभग्राहीको सूचीमा समावेश हुनुपर्ने भन्दै गुनासो दर्ता गराएका छन् । त्यसमध्ये १ लाख ३१ हजार ७३२ जना लाभग्राहीको सूचीमा थपिएका छन् जसमध्ये ८८ हजार १०५ जना पुनर्निमाण र ४३ हजार ६२७ जना प्रबलीकरणअन्तर्गत समावेश भएका हुन् । बाँकी ३ लाख ५ हजार १७९ जनाको निवेदन भने अस्वीकार गरिएको छ । अस्वीकृत भएका ३ हजार २१२ जनाले पुनरावेदन समितिमा निवेदन दिएको समेत प्राधिकरणले जनाएको छ ।
सिप्रदी अटोपार्टसको टाटागुरु भेलामा १२० बढी गुरु सहभागी, बिग्रिएका गाडी अब ४ घण्टा भित्रै बनाइसक्ने
काठमाडौं । टाटा मोटर्स् र सिप्रदी अटोपार्टस् प्रा.लि द्धारा टाटा गुरु कार्यक्रम सम्पन्न भएको छ । पोखरामा आयोजित उक्त कार्यक्रममा जनकपुरदेखि महेन्द्रनगर र पोखरासम्म गरी करीब १२० भन्दा धेरै टाटा गुरुहरुको उपस्थिति रहेको थियो । सिप्रदी अटोपार्टसको प्रतिवद्घता अनुसार टाटा गुरुहरुलाई ज्ञान, सिप र प्रविधिको क्षेत्रमा गरिएको कार्यविवरण, आगामी दिनमा टाटा गुरुको क्षेत्रमा ल्याईने विविध कार्यक्रमहरुका जानकारी दिइएको थियो । कार्यक्रमले टाटा गुरुलाई सिप्रदीअटो पार्टसको पुर्णरुपमा सहयोग रहने र गुरुबाट पनि सहयोगको अपेक्षा रहेको सिप्रदीअटो पार्टसका माहाप्रबन्धक युवराज बुढाथोकीले बताए । सिप्रदीटाटा गुरुको सहयोगले कुनै पनि टाटा गाडि बिग्रीएको अधिकतम ४ घण्टाभित्रमा बनाइसक्ने कम्पनीको योजना रहेको छ । जसको लागि टाटागुरुहरुको सहयोगको अपेक्षा रहेको र टाटागुरुलाई सक्षम बनाउन कुनै तरहको पनि सहयोग गर्न आफु तत्पर रहको कुरा सिप्रदी कम्पनीजका प्रमुख कार्यकारी अधिकृत राजनबाबु श्रेष्ठले बताए । उक्त कार्यक्रममा अटो मेकानिक्स व्यवसायी महासंघका उपाध्यक्ष गोपाल भटराईले हरेक मेकानिकले बदलिदो प्रविधिलाईलाई छिटो भन्दा छिटो अगिंकार गर्न सक्नुपर्छ भन्दै सम्पुर्ण अटो मेकानिक्सहरुलाई दक्ष बनाउन आफुले सक्दो सहयोग गर्ने प्रतिवद्धता जनाएका छन् । त्यसैगरी अटोमेकानिक्स महासघंका महासचिव ठाकुरप्रसाद न्यौपानैले विभिन्न ठाउँमा सिप्रदीले तालिमका कार्यक्रम संचालन गरी हाम्रा अटो मेकानिक्सहरुलाई सक्षम बनाउन खेलेको भुमिकाको सरहाना गरेका थिए । टाटा गाडिलाई बढी भन्दा बढी जेनयुन पार्टसको प्रयोगमा सहयोग गर्ने टाटा गुरुहरुलाई सम्मान तथा प्रोत्साहान गरीएको थियो । जसमा विशेष सम्मान प्राप्त गर्नेहरुमा, इटहरीका इस्राफील अन्सारी पहिलो, बुटवलका अशोक देवकोटा दोश्रो, महाकालीका विनोद राई तेश्रो, बुटवलका राजकुमार गौतम चौँथो, धनगढिका चतराज पाण्डे पाचौँ र हेटौँडाका गणेश बानिया छैटौँ भएका छन् । साथै सहभागी अन्य गुरुहरुलाई अन्य विधामा सम्मान गरीएको कम्पनीले जनाएको छ ।
गभर्नर नेपालले भने-घट्दो पूँजी बजार र बढ्दो बैंकिङ ब्याजदरलाई सन्तुलनमा ल्याउनु पर्छ
काठमाडौँ । नेपाल राष्ट्र बैंकले चालू आवको अन्त्यसम्ममा ७५३ वटै स्थानीय तहका सदरमुकामसम्म कम्तीमा एकवटा वाणिज्य बैंक पुग्ने जनाएको छ । सबै स्थानीय निकायमा वित्तीय पहुँच तथा साक्षरता पुर्याउने नीतिअनुरुप हाल ६८७ स्थानीय निकायमा वित्तीय पहुँच पुगेको जनाएको छ । सोही बैंकमार्फत् सरकारको आफ्नो सञ्चित कोष सञ्चालन गरेको छ । प्रतिनिधिसभा, अर्थ समितिको आजको बैठकमा नेपाल राष्ट्र बैंकका गभर्नर डा. चिरञ्जीवी नेपालले सो जानकारी दिँदै सबै जनतालाई बैंकिङ पहुँचमा ल्याउन बैंकले प्राथमिकता दिएको बताए । उनले भने, “अहिले पनि ६० प्रतिशत जनताको बैंकसम्म पहुँच नै छैन ।” गर्भनर नेपालले पूँजी बजारलाई गतिशीलता दिई वित्तीय स्थायित्व प्रदान गर्न नेपाल राष्ट्र बैंकले वित्तीय क्षेत्रलाई निर्देशन दिएको जानकारी दिँदै बैंकलाई निक्षेपको ब्याजदर बढाउन राष्ट्र बैंकले नैतिक दबाब दिएको बताए । पूँजी बजारलगायत समग्र वित्तीय सुधारका लागि वित्तीय सुधार समन्वय समितिले दिएका ५८ बुँदे सुझावलाई बैंकले कार्यान्वयनमा ल्याएको उहाँले बैठकमा जानकारी दिए । अर्थ मन्त्रालयका सचिव राजन खनालले पूँजी बजार, मुद्रा व्यवस्थापन र दीर्घकालीन स्रोत व्यवस्थापनमा अर्थ मन्त्रालयको ध्यान दिएको चर्चा गर्दै पूँजी बजारलगायत समग्र वित्तीय सुधारका लागि वित्तीय सुधार समन्वय समितिले दिएका ५८ बुँदे सुझावलाई मन्त्रालयले कार्यान्वयनमा ल्याएको जानकारी दिए । उनले घट्दो पूजीँ बजार र बढ्दो बैंकिङ ब्याजदरलाई सन्तुलनमा ल्याउन जरुरी रहेको बताए । सरकारले नेपाल राष्ट्र बैंकका डेपुटी गभर्नर शिवराज श्रेष्ठको संयोजकत्वमा सरकारले पूँजी बजारलगायत समग्र वित्तीय सुधारका लागि वित्तीय सुधार समन्वय समिति गठन गरेको थियो । समितिले आफ्नो प्रतिवेदन अर्थमन्त्री डा युवराज खतिवडासमक्ष प्रस्तुत गरिसकेको छ । बैठकमा सांसद ज्ञानेन्द्रबहादुर कार्की र तुलसा थापाले पूँजी बजारमा देखिएको समस्यालाई तत्काल सम्बोधन गर्न माग गरे ।
