युनाइटेड इन्स्योरेन्सको विशेष साधारण सभा, २४० % हकप्रद शेयर जारी गर्ने प्रस्ताव पारित
काठमाडौँ । युनाईटेड ईन्स्योरेन्स कं. नेपाल लि. को विशेष साधारण सभा बिहीवार बबरमहल स्थित कार्की ब्याङ्गक्वेटमा सम्पन्न भएको छ । कम्पनी संचालक समितिको ३२३ औँ बैठकले पेश गरेका विशेष प्रस्तावहरु माथि छलफल सहित पारित भएको छ । बिशेष साधारण सभाको निर्णय बमोजिमकम्पनीको वर्तमान चुक्तापूँजी तीस करोड चौविस लाखको २४० प्रतिशत (१ः२.४ अनुपातमा) हकप्रद शेयर जारी गर्ने प्रस्ताव पारित भएको छ । साथै कम्पनीको अधिकृत पुँजी दुई अर्व तथा जारी पूँजी र चुक्तापूँजी एक अर्ब दुई करोड एकासी लाख साठ्ठी हजार रुपैयाँ कायम गर्ने निर्णय भएको छ । कम्पनीको प्रबन्धपत्र तथा नियमावलीमा आवश्यक संशोधन गर्ने निर्णय सर्वसम्मत रुपमा पारित भएको कम्पनी सचिव बिदुरबहादुर भुजेलले जनाएका छन् ।
गैरबैंकिङ संस्थाको नियमन गर्ने अधिकार माग्दै राष्ट्र बैंक, कुलिङ पिरियड पनि घटाउने प्रस्ताव
काठमाडौं । नेपाल राष्ट्र बैंकले गैरबैंकिङ वित्तीय संस्थाहरुको नियमन गर्ने अधिकार माग गरेको छ । नेपाल राष्ट्र बैंकद्वारा नेपाल राष्ट्र बैंक ऐन २०५८ लाई संशोधन गर्न बनाएको विधेयकको मस्यौदामा त्यस्तो प्रस्ताव गरिएका हो । प्रस्तावमा नेपाल सरकारबाट अनुरोध भई आएमा नेपाल सरकारको शेयर स्वामित्व रहेका गैरबैंकिङ वित्तीय संस्थाहरुको समेत नियमन र सुपरीवेक्षण गर्न सक्नेछ भन्ने वाक्यांश उल्लेख गरिएको छ । नेपाल संघीय मुलुकमा रुपान्तरण भएको र संघ, प्रदेश र स्थानीय तहमा स्वायत्त सरकारहरु निर्माण भएको परिप्रेक्षमा ऐनलाई संघीय प्रणालीअनुकुल बनाउन प्रदेश र स्थानीय सरकारसँगको अन्तरसम्बन्ध कायम गर्न मार्ग प्रशस्त गर्न ऐन संशोधन गर्न लागिएको भएपनि केही प्रावधानमा भने त्यसबाहेकका विषयवस्तु समेटिएका छन् । राष्ट्र बैंकले प्रस्ताव गरेको संशोधनमा नेपाल सरकारको अनुरोधमा गैरबैंकिङ वित्तीय संस्थाहरुको नियमन गर्ने काम नेपाल राष्ट्र बैंकले गर्न सक्ने उल्लेख गरिएको छ । त्यसरी नियमन गर्ने गैरबैंकिङ वित्तीय संस्थाहरुको नियमन पनि बैंक तथा वित्तीय संस्थालाई नियमन गर्न बनेको ‘वित्तीय कारोबार नियमन तथा सुपरीवेक्षण ऐनको दफा ८४ बमोजिम हुने’ मस्यौदामा उल्लेख गरिएको छ । राष्ट्र बैंकका अधिकारीहरुको कुलिङ पिरियड घट्ने नेपाल राष्ट्र बैंक अर्थ मन्त्रालयमा पठाएको संशोधनमा नेपाल राष्ट्र बैंकका अधिकारीहरुको कुलिङ पिरियड घटाउने प्रस्ताव समेत गरिएको छ । यसअघि कार्यकारी निर्देशक र डेपुटी गभर्नरको हकमा नेपाल राष्ट्र बैंकबाट अवकाश पाएको ३ बर्ष र अन्य कर्मचारीको हकमा अवकाश पाएको २ वर्षसम्म अन्य बैंक तथा वित्तीय संस्थामा कुनै पनि हैसियतमा रहेर काम गर्न रोक लगाएकोमा अब सबै तहका कर्मचारी, कार्यकारी निर्देशक वा डेपुटी गभर्नरको हकमा कुलिङ पिरियड १ बर्षमै सीमित गर्ने प्रस्ताव गरिएको हो । बैंकले यो प्रावधान संशोधन गर्नुको पछाडि ‘बढीमा १ वर्ष राख्दा नै पर्याप्त हुने’ उल्लेख गरिएको छ । सो मस्यौदा राष्ट्र बैंकले अर्थ मन्त्रालयमा पठाएको छ । अर्थ मन्त्रालयले उक्त संशोधन प्रस्तावमा आवश्यक संशोधन गरी मन्त्रीपरिषद्मा पठाउने व्यवस्था छ । खासगरी गैरबैंकिङ वित्तीय संस्थाहरुको नियमन गर्नसक्ने अधिकार राष्ट्र बैंकलाई दिने वा नदिने भन्नेमा अर्थ मन्त्रालयमा छलफल भइरहेको बताइएको छ । हाल सञ्चालनमा रहेका विभिन्न कोषहरु तथा केही सहकारी संस्थाहरु सरकारी स्वामित्वका गैरबैंकिङ वित्तीय संस्थाहरु हुन् । त्यस्ता कोषहरुलाई हाल अर्थ मन्त्रालयले नियमन गर्दै आएको छ भने सहकारी संस्थाहरुलाई सहकारी विभागले नियमन तथा सुपरीवेक्षण गर्दै आएको छ ।
सन् १९७९ यता नेपालमा ३३ हेलिकप्टर दुर्घटना, ६८ जनाले ज्यान गुमाए
काठमाडौं । नेपालमा हालसम्म ३३ वटा हेलिकप्टर दुर्घटनामा परेको छ । सन् १९७९ मा पहिलो पटक हेलिकप्टर दुर्घटना भएको थियो । हेलिकप्टर दुर्घटनामा ६८ जनाले ज्यान गुमाएका छन् । सन् १९७९ मा भिभिआइपी कम्पनीको अल्टी आइआइआइ नामक हेलिकप्टर लमजुङमा दुर्घटना भएको थियो । सो दुर्घटनामा ६ जनाले ज्यान गुमाका थिए । नेपाल नागरिक उड्डयन प्राधिकरणको तथ्याङक ३३ हेलिकप्टर दुर्घटना भएका छन् । दुर्घटनामा परि ६८ जनाले ज्यान गुमाएका छन् भने १७ जना घाइते भएका छन् । तथ्याङ्क अनुसार ताप्लेजुङ मै २००६ मा सबैभन्दा धेरै व्यक्तिले ज्यान गुमाएका थिए । घटनामा तत्कालीन राज्यमन्त्री गोपाल राई वातावरणविद् हर्क गुरुङ सहित २४ जनाले ज्यान गुमाएका थिए । श्री एयरलाइन्सको २४ सिट क्षमताको हेलिकप्टर दुर्घटना भएको थियो । बुधबार भएको दुर्घटना नेपालको इतिहामै सबैभन्दा उच्च पदस्त व्यक्तिहरुले ज्यान गुमाएका छन् । हेलिकप्टर उड्नको लागि कम्तिमा १ माइल दुरी पाइलटले देख्नुपर्ने मौसम हुनु पर्ने पूर्व क्याप्टेन युवराजकुमार भट्टराईले बताए । हवाई दुर्घटना न्युनिकरण गर्न यो नै गर्नुपर्छ भन्न सकिदैंन । क्याप्टेन भट्टराईले भने–सामान्य नियम पालना गर्नैपर्छ । यस्तो छ हालसम्मको हेलिकप्टर दुर्घटनाको अवस्था
पोखराकी पम्फा देवकोटाः हेल्परदेखि उद्योगीसम्मको यात्रा
काठमाडौं । ५ वर्षसम्म आइसक्रिम उद्योगमा हेल्परको रुपमा काम गरेकी पोखराकी पम्फा देवकोटा अहिले ६५ लाखको उद्योगको मालिक भएकी छिन् । गत जेठ महिनामा रामचन्द्र अधिकारीसँगको सहकार्यमा पोखरा बुढीबजारमा शुरु गरेको दीप आइसक्रिम कम्पनीले अहिले बजारमा राम्रो प्रभाव जमाएको छ । अहिले हेर्दा पम्फाको जीवन सुन्दर देखिन्छ, तर उनको जीवनमा धेरै खालका दुःखकष्ट र अनुभूति छन् । उनको माइतिपनि आर्थिक सम्पन्न छैन । घरमा खान पनि दुःख थियो । सानै उमेरमा बिहे भयो, बिहेपछि श्रीमानले छोडेर एक्लो बनाए । ऋणको भारपनि बोकाए, तर उनले हिम्मत हारिनन् । श्रीमानले छोडेपनि उनले लगाएको ऋण तिर्न पम्फाले निकै संघर्ष गरिन् । पोखरा कै एक आइसक्रिम उद्योगमा हेल्परदेखि सेल्सम्यान र चालक समेतको काम गरिन् । ५ वर्ष कडा मेहनत गरी ऋण तिरिन्, र अहिले आफ्नै व्यवसाय शुरु गरेकी छिन् । पम्फाले २०७५ सालमा जेठमा ६५ लाखको आईसक्रिम व्यवसाय शुरु गरेकी हुन् । रामचन्द्र अधिकारीको सहकार्यमा २०७४ साल मंसिरमा हेटौँडामा कृषिफर्मको शुरु गरेको उनले बताइन् । उनको र्फमा १५ सय कुखुरा, ३० वटा भैंसी, ५० वटा बाख्रा गरिएको छ । यस्तो छ पम्फाको जीवनी गोरखाको सामान्य परिवारमा २०४८ सालमा जन्मिएकी पम्फाको परिवारमा ८ दिदिबहिनी, १ दाई रहेका छन् । उनले २०६५ सालमा गाउँबाटै एसएलसी उत्तीर्ण गरेकी थिइन् । त्यसपछि घरपरिवारको रोजाईँ चितवनको देवघाटमा उनको विवाह भएको थियो । विवाहपछि पोखरा गइन्, उनले त्यहीबाट १२ कक्षा उत्तीर्ण गरिन् । स्नातक तह पढ्दै गरेकी उनले त्यो अवधिमा १ छोरालाई जन्म दिइन् । छोराको जन्मसँगै उनको पढाई रोकियो । पोखराको एक आईसक्रिम कम्पनीमा काम गर्ने उनका श्रीमानले २०६९ सालको भदौमा कम्पनीबाट ८ लाख रुपैयाँ लिएर फरार भए । त्यसपछि उनको जीवनमा संघर्ष थपियो । अहिले उनी सामाजिक काममा समेत सक्रिय रहेकी छिन् । ‘हृदयको आवाज’ भन्ने संस्थाको स्थापना गरेकी छिन् । एकल महिलाका लागि उर्जा एवम् आत्मनिर्भर गराउने उद्देश्यले उक्त संस्था शुरु गरेको देवकोटाको भनाई रहेको छ । अब आगामी दिन उक्त संस्थाबाट एकल महिलामाथि भएको अन्याय एवम् उनीहरुलाई आत्मनिर्भर बनाउने र आफ्नो व्यवसायलाई थप समृद्ध बनाएर लैजाने उनले बताइन् ।
स्पर्स लघुवितको साढे दुई लाख आईपीओ आउँदै, एक हजारमै भर्न पाइने
काठमाडाैं । स्पर्स लघुवित वित्तीय संस्थाको २ लाख ५२ हजार कित्ता साधारण सेयर(आइपीओ) निष्कासन हुँदै छ । संस्थाले फागुन २६ गतेदेखि कुल २ करोड ५० लाख रुपैयाँ बराबरको आईपीओ निष्काशन गर्न लागेको हो । उक्त सेयरमा न्युनतम १० कित्ता अर्थात एक हजार रुपैयाँमै आवेदन दिन सकिनेछ भने अधिकतम १ हजार ३४० कित्तासम्म आवेदन दिन सकिन्छ । आईपीओको बिक्री छिटोमा फागुन २९ गते र ढिलोमा चैत २५ गते निष्काशन बन्द हुनेछ । संस्थाको आईपीओ निष्कासन तथा बिक्री प्रबन्धकको काम सानिमा क्यापिटल लिमिटेडले गर्ने भएको छ । संस्थाले २ लाख ६९ हजार ६३० कित्ता मध्ये जारी पुँजीको ०.५ प्रतिशत अर्थात ४ हजार १४८ कित्ता सेयर कम्पनीका कर्मचारीहरुको लागि र ५ प्रतिशत अर्थात १३ हजार ४८२ कित्ता सेयर साधारण सेयरहरु सामूहिक लगानी कोषको लागि बाँडफाँड गरेको छ । जसमा बाँकी २ लाख ५२ हजार कित्ता सेयर सर्वसाधारणमा बिक्री गर्न लागेको हो ।
पर्यटनमन्त्री अधिकारी सहित सातै जनाको शव काठमाडौँमा
काठमाडौँ । ताप्लेजुङमा बुधबार भएको हेलिकप्टर दुर्घटनामा परी मृत्यु हुनुभएका संस्कृति, पर्यटन तथा नागरिक उड्डयनमन्त्री रवीन्द्रप्रसाद अधिकारीसहित सातै जनाको शव काठमाडौँ ल्याइएको छ । आज मौसममा सुधार आएसँगै नेपाली सेनाको हेलिकप्टरबाट आज अपराह्न १ बजेर २५ मिनेटमा ती शव त्रिभुवन अन्तरराष्ट्रिय विमानस्थलमा ल्याइएको हो । शव छुट्टाछुट्टै शववाहनमा राखेर परीक्षणका लागि त्रिवि शिक्षण अस्पताल महाराजगञ्ज लगिने भएको छ । काठमाडौँबाट तेह्रथुमको चुहानडाँडामा विमानस्थलको सम्भाव्यता अध्ययनका लागि मन्त्री अधिकारीसहितको टोली कार्यक्रम सकेर पाथीभरा हुँदै काठमाडौँ फर्किने क्रममा बुधबार ताप्लेजुङको दारेभिरमा हेलिकप्टर दुर्घटनामा परेको थियो । दुर्घटनामा मन्त्री अधिकारी, यति एयरलाइन्सका प्रबन्ध निर्देशक आङछिरिङ शेर्पा, नेपाल नागरिक उड्डयन प्राधिकरणका उपमहानिर्देशक वीरेन्द्रप्रसाद श्रेष्ठ र निर्देशक धु्रव भोछिभोया, प्रधानमन्त्री तथा मन्त्रिपरिषद् कार्यालयका उपसचिव युवराज दाहाल, हेलिकप्टरका क्याप्टेन प्रभाकर केसी र मन्त्री अधिकारीका सुरक्षाकर्मी अर्जुनकुमार घिमिरेको निधन भएको थियो ।
बजारमा थरीथरीका सिमेन्टः यी ६ मध्ये ओपीसीमा होङ्शी र पीपीसीमा जगदम्बा सस्तो
काठमाडौं । तपाईँ घर बनाउँदै हुनुहुन्छ ? वा जुनसुकै निर्माणका काम गर्दै हुनुहुन्छ भने तपाईँलाई सिमेन्टको जरुरी पक्कै हुन्छ । तर, बजारमा धेरै कम्पनीका सिमेन्ट पाइन्छ । उही तौलका सिमेन्टको मूल्य फरक फरक छ । ओपीसी सिमेन्टमा बजारमा सबैभन्दा सस्तो होङ्शी शिवम् र पीपीसीमा जगदम्बा सिमेन्ट सस्तो पाइएको छ । त्यसैगरी कम्पनी मूल्य अनुसार ओपीसीमा सबैभन्दा महङ्गो युनाइटेड र पीपीसीमा सबैभन्दा महङ्गो होङ्शी शिवम् सिमेन्ट रहेको छ । बजारमा पाइने ६ वटा सिमेन्टको कम्पनी मूल्य कति छ भनेर विकासन्यूजले बुझ्ने कोशिस गरेको छ । अम्बे, हेटौंडा, जगदम्बा, अर्घाखाँची, युनाइटेड र होङ्शी शिवम् सिमेन्ट मध्ये ओपीसीमा कम्पनीले तोकेको मूल्य अनुसार सबैभन्दा महङ्गो युनाइटेड छ भने सबैभन्दा कम मूल्य होङ्शी शिवम् सिमेन्टको छ । होङ्शी शिवम् सिमेन्ट(पिपिसी)को मूल्य प्रति बोरा ७ सय रुपैयाँ रहेको छ । यता सबैभन्दा महङ्गा सिमेन्ट युनाइटेड (पिपिसी) को कम्पनी मूल्य ८ सय ५० रुपैयाँ रहेको छ । त्यसैगरी ओपिसीमा सबैभन्दा सस्तो जगदम्बा रहेको छ । यसको कम्पनी मूल्य प्रतिबोरा ६६५ रुपैयाँ रहेको छ । ओपिसीमा सबैभन्दा मंहगो होङ्शी शिवम् को कम्पनीले तोकेको मूल्य ८०० रुपैयाँ रहेको छ । यसैगरी ओपीसी सिमेन्टतर्फ कम्पनी मूल्य अम्बे सिमेन्ट ७९०, हेटौँडाका ८४७, जगदम्बाको ७७५, अर्घाखाँचीको ७७०, यूनाइटेडको ८५० र होङ्शी शिवम् को ७०० रुपैयाँ रहेको छ । यसैगरी, पीपीसीतर्फ कम्पनी मूल्य अम्बेको ६८०, जगदम्बाको ६६५ र होङ्शी शिवम् को ८०० रुपैयाँ रहेको छ । सिमेन्ट उद्योगमा २ खर्बको लगानी, उद्योग संख्या ५६ पछिलो समयमा नेपालमा सिमेन्ट उद्योगहरुको संख्यामा वृद्धि भैरहेको छ । नेपाल सिमेन्ट उत्पादनमा आत्मनिर्भर बनेको छ । करिब दुई खर्ब रूपैयाँ लगानी भएको र वार्षिक १५० अर्ब रूपैयाँ बराबरको कारोवार हुँदै आएको सिमेन्ट उत्पादनमा नेपाल यो वर्षदेखि आत्मनिर्भर भएको सिमेन्ट उत्पादक संघका अध्यक्ष ध्रुव थापाले बताए । विश्वमा सन् १८४५ देखि सिमेन्ट उत्पादन शुरु भएपनि नेपालमा १९६० देखि मात्रै उत्पादन शुरु गरिएको हो । नेपालमा अहिले तीन किसिमका सिमेन्टको गुणस्तर मापन भएको छ । नेपालमा सरकारी उद्योग हिमाल सिमेन्टले पहिलो पटक उत्पादन शुरु गरेको थियो । निजी क्षेत्रबाट भने १६ वर्ष पहिलादेखि मात्रै लगानी थालिएको हो । नेपालमा अहिले ५६ वटा सिमेन्ट उद्योगले उत्पादन गर्दै आएका छन् । हाल उदयपुर र हेटौँडा सिमेन्ट उद्योग सरकारले सञ्चालन गर्दै आएको छ ।
एक कुशल अभिभावक गुमायौं : अनेरास्ववियु
काठमाडौं । नेकपाका भातृ संगठन अनेरास्ववियुले साे वक्तव्य जारी गरेकाे छ । संस्कृति, पर्यटन, तथा नागरिक उड्यन मन्त्री तथा नेकपाका एवं विद्यार्थी फाटका प्रमुख रविन्द्र अधिकारको मृत्युले देह देश नै शोकमा रहेका अवस्थामा शाेक वक्तव्य जारी गरेकाे हाे । पोखरामा २०२६ बैशाख २२ गते कास्कीको भरतपोखरीमा जन्मिएका अधिकारीको बुधबार ताप्लेजुङ्गमा भएको हेलिकप्टर दुर्घटनामा परि मुत्यु भएको थियो । उनको निधनबाट अनेरास्ववियुले कुशल अभिभावक, विकासप्रेमि भरोसा योग्य युवा नेता गुमाएकाे उच्च मूल्याङ्कन गर्दै दिवंगत क. रविन्द्र अधिकारीप्रति अनेरास्ववियुकाे अध्यक्ष नविना लामाले लिखित शाेक वक्तव्य जारी गरे ।
