पोष्टमार्टम गर्न ढिलाई, हेलिकप्टर दुर्घटनामा निधन भएकालाई शुक्रबार श्रद्धाञ्जलि
काठमाडौँ । ताप्लेजुङमा बुधबार भएको हेलिकप्टर दुर्घटनामा परी निधन हुनुभएका संस्कृति, पर्यटन तथा नागरिक उड्डयनमन्त्री रवीन्द्रप्रसाद अधिकारीसहित सातै जनालाई श्रद्धाञ्जलि दिने कार्यक्रम शुक्रबार हुने भएको छ । दुर्घटनामा निधन भएका सबैका शव आज अपराह्न काठमाडौँ ल्याई शव परीक्षणका लागि त्रिवि शिक्षण अस्पताल महाराजगञ्जमा राखिएको छ । शव परीक्षणको जटिताका कारण श्रद्धाञ्जलिको कार्यक्रम आज ढिलाई हुने भएपछि शुक्रबार बिहान ८ बजेका लागि तय भएको नेपाल कम्युनिष्ट पार्टी (नेकपा)का कार्यालय सचिव कृष्णगोपाल श्रेष्ठले जानकारी दिए । सातै जनाको शव बिहान ८ बजेदेखि ११ बजेसम्म टुँडिखेलमा राखिने र श्रद्धाञ्जलिका लागि राष्ट्रपति विद्यादेवी भण्डारी, उपराष्ट्रपति नन्दबहादुर पुन, प्रधानमन्त्री केपी शर्मा ओली, उपप्रधानमन्त्री, मन्त्रीलगायत विशिष्ट व्यक्ति पुग्ने उनले बताए । श्रद्धाञ्जलिपछि शव आफन्तजनलाई जिम्मा दिइने बताइएको छ । काठमाडौँबाट तेह्रथुमको चुहानडाँडामा विमानस्थलको सम्भाव्यता अध्ययनका लागि मन्त्री अधिकारीसहितको टोली कार्यक्रम सकेर पाथीभरा हुँदै काठमाडौँ फर्किने क्रममा बुधबार ताप्लेजुङको दारेभिरमा हेलिकप्टर दुर्घटनामा परेको थियो । दुर्घटनामा मन्त्री अधिकारी, यति एयरलाइन्सका प्रबन्ध निर्देशक आङछिरिङ शेर्पा, नेपाल नागरिक उड्डयन प्राधिकरणका उपमहानिर्देशक वीरेन्द्रप्रसाद श्रेष्ठ र निर्देशक धु्रव भोछिभोया, प्रधानमन्त्री तथा मन्त्रिपरिषद् कार्यालयका उपसचिव युवराज दाहाल, हेलिकप्टरका क्याप्टेन प्रभाकर केसी र मन्त्री अधिकारीका सुरक्षाकर्मी अर्जुनकुमार घिमिरेको निधन भएको थियो ।
हनोई वार्ता विना सम्झौता टुङ्गियो, उत्तर कोरियाको प्रस्ताव अस्वीकार
हनोई । अमेरिकी राष्ट्रपति डोनाल्ड ट्रम्प र उत्तर कोरियाली नेता किम जोङ अनबीच भियतनामको हनोईमा जारी शिखर वार्ता कुनै लिखित सम्झौता बेगर सम्पन्न भएको छ । अमेरिकी राष्ट्रपति ट्रम्पले वार्तापछि आयोजित पत्रकार सम्मेलनमा अर्को शिखर वार्ताका लागि उत्तर कोरियाले राखेको प्रस्तावलाई अस्वीकार गरेको बताए । निकै महत्वका साथ हेरिएको हनोई वार्तामा कुनै ठोस प्रगति हुन सकेन भने आणविक निःशस्त्रीकरण सम्बन्धी सम्झौता पनि भएन । उत्तर कोरियामाथि लागेका प्रतिबन्धहरु फुकुवा गर्न नेता किमले राखेको प्रस्तावलाई आफूले अस्वीकार गरेको पनि राष्ट्रपति ट्रम्पले बताए ।तेस्रो शिखर वार्ताको सम्भावनाका बारेमा पत्रकारले सोधेको प्रश्नमा राष्ट्रपति ट्रम्पले भने, “अहिल्यै त्यो सम्भव छैन, पछि के हुन्छ भन्न सकिन्न ।” रासस/एएफपी
फागुन १९ गते नर्भिक हस्पिटलमा नाक-कान-घाँटीको निःशुल्क परीक्षण
काठमाडौँ । नर्भिक इन्टरनेशनल हस्पिटलको नाक–कान–घाँटी विभागले विश्व श्रवण शक्ति दिवसका अवसरमा विरामीहरूको निःशुल्क जाँच–परीक्षण गर्ने भएको छ । यस वर्षको विश्व श्रवण शक्ति दिवस यही फागुन १९ गते मनाइदैछ । यस वर्षको विश्व श्रवण शक्ति दिवसको नारा “आफ्नो श्रवण शक्ति जाँचौ” रहेको छ । विकासशील र अल्प विकसित मूलुकहरूमा हाल तीब्र गतिमा बढ्दै गएका विविध प्रदूषणहरुः जस्तै ध्वनि प्रदुषण, वायु प्रदूषण, कोलाहल, विविध संक्रमणहरु, आदिका कारण मानिसहरूको श्रवण शक्तिमा क्रमिक ह्रास आउन थालेको छ । त्यसमा पनि अत्यधिक ध्वनिसहितका कल–कारखाना, विमानस्थल वरपरका वासिन्दा, अनियन्त्रित सार्वजनिक यातायातका ध्वनि, लामो समय ठूलो आवाजसहितको एयर फोन प्रयोग गर्ने वानी, चर्को आवाजसहितको मनोरञ्जन र कानका त्यस्ता केही संक्रमणहरू जसले मानिसको श्रवण शक्तिमा ह्रास ल्याउने मात्रै नभएर बहिरोपन निम्त्याउने समेत सम्भावना रहन्छ । समयमा रोगको पहिचान, निदान एवम् उपचार गर्ने हो भने श्रवण शक्ति ह्रासका धेरै समस्याहरु निवारण गर्न सकिन्छ । उपर्युक्त तथ्यलाई मनन गर्दै नर्भिकको नाक–कान–घाँटी विभागले यहि फागुन १९ गते आइतवार विहान ९ः०० बजेदेखि साझ ५ः०० बजेसम्म कान सम्बन्धी समस्याहरूको निःशुल्क जा“च तथा परामर्श सेवा उपलब्ध गराउने नर्भिक इन्टरनेशनल हस्पिटलले जनाएको छ । सेवा परिचालनका लागि नाक–कान–घाँटी विशेषज्ञहरु प्रा.डा. दिपेन्द्र श्रेष्ठ, डा. रेस्की देवको टोली कार्यरत रहने हस्पिटलले जनएको छ । निःशुल्क परीक्षण सेवा प्राप्त गर्नेहरूमध्ये कसैलाई श्रवण यन्त्रको आवश्यकता परेमा उक्त यन्त्र २० प्रतिशत छुटसहितको दर÷रेटमा प्राप्त हुने र सेवाग्राहीहरूमध्ये यदि कसैको शल्यक्रियात्मक उपचार आवश्यक परेमा मार्च महिनाभित्रै शल्यक्रिया गराउदा विरामीले शल्यक्रिया शुल्कमा २५ प्रतिशत छुट प्राप्त गर्ने प्रावधान राखिएको हस्पिटलले जनाएको छ ।
पाँचथर पावरको आईपीओ भर्ने मिति थप, अब शुक्रबारसम्म आवेदन दिन पाइने
काठमाडौं । पाँचथर पावर कम्पनीले हाल निष्कासन गरिरहेको आईपीओको म्याद एकदिनको लागि थपिएको छ । बिहीबार सार्वजनिक बिदा भएपछि सो दिन बन्द हुन लागेको उक्त आईपीओको म्याद शुक्रबारसम्मको लागि थपिएको हो । म्याद थपिएपछि इच्छुकले अब शुक्रबार(फागुन १७ गते)सम्म कम्पनीको आईपीओमा आवेदन दिन पाउने भएका छन् । माग भन्दा बढी आवेदन परेपछि कम्पनीले बिहीबार आवेदन बन्द गर्न लागेको थियो । तर बिहीबार सार्वजनिक बिदा भएपछि बैंक तथा वित्तीय संस्थाहरु बन्द हुने भएकाले आईपीको आवेदनको समय थपिएको हो । बुधबार पर्यटनमन्त्री रबिन्द्र अधिकारीको हेलिकप्टर दुर्घटनामा परी निधन भएपछि सरकारले बिहीबार सार्वजनिक बिदा दिएको हो । बिक्री प्रबन्धक सानिमा क्यापिटलका अनुसार बुधबार बेलुकीसम्म आईपीओमा २१ करोड १० लाख रुपैयाँको आवेदन परेको छ । जुन मागभन्दा बढी आवेदन हो । कम्पनीले फागुन १३ गतेदेखि फागुन १६ गतेसम्म कुल १७ करोड ५० लाख रुपैयाँ बराबरको आईपीओ निष्काशन गरेको थियाे । निष्काशित सेयरमध्ये कम्पनीले ३५ हजार ५ कित्ता कर्मचारीलाई, ८७ लाख ५१२ कित्ता सामुहिक लगानी कोषलाई र बाँकी १६ लाख २७ हजार ७३३ कित्ता सर्वसाधारणका लागि छुट्याईएको छ ।
ग्यास उद्योगी र बिक्रेता आन्दोलनमा, बजारमा अभावः सरकार भन्छ-अत्यावश्यक वस्तुमा हड्ताल नगर
काठमाडौं । नेपाल एलपी ग्यास उद्योग संघ र ग्यास विक्रेता महासंघ नेपालले कमिशन बृद्धिको माग सहित बिक्री बन्द गर्ने सम्मको आन्दोलनको कार्यक्रम घोषणा गरेपछि बजारमा ग्यासको अभाव सिर्जना भएको छ । उद्योगी र बिक्रेताले आन्दोलनको घोषणा गरेपछि सरकारले भने अत्यावश्यक बस्तुमा हड्ताल नगर्न भनेको छ । ग्यास उपभोक्ताहरुले ग्यास उद्योगीहरुले अन्दोलको घोषणा गरेपछि ग्यास अभाव हुने डरले उपभोक्ताहरुले घरमा जगेडा ग्यास लगेको कलंकीको ग्यास विक्रेता बताउँछन् । पोखरेली ग्यास सप्लार्यसका सञ्चालक बसन्तराज पोखरेले भने–ग्यास उपभोग गर्ने उपभोक्ताहरुले हलाको पछि लागेर नयाँ ग्यास किनीरहेका छन् । ग्यास सटेज हुने हल्लाले नयाँ नयाँ उपभोक्ताहरु पनि ग्यास किन आएको पोखरेले बताए । नेपाल एल पि ग्यास संघका अध्यक्ष गोकुल भण्डारीले भने– ‘हामीले उद्योगका लागि ५ प्रतिशत र विक्रेताहरुले ६ प्रतिशत कमिशन वृद्धिको माग गरेर अन्दोलनमा उत्रेको हो ।’ उद्योगहरुको सञ्चालन खर्च, ग्यास बिक्रेताहरुको कमिसन, स्थानीय ढुवानी भाडा, उद्योगको कार्यगत नोक्सानी र बीमा खर्च लगाएतका कुरा उठाएर शुक्रवार देखी अन्दोलन हुने भण्डारीले बताए । उद्योग, वाणिज्य तथा आपूर्ति मन्त्रालयका प्रवक्ता नवराज ढकालले जनतालाई थप मारमा पारेर उद्योगीलाई राहत प्रदान नगरिने बताए । ग्यास उद्योगीहरुले पहिले देखी नै कमिशन बृद्धिको माग गरिरहेका छन् । ग्यास उद्योगीहरुले ग्यासमा मुनाफा छैन भनिरहेका छन् । तर, ग्यास उद्योगमा मुनाफा नभएको भए किन नयाँ ग्यास उद्योगका लागि आवेदन दिरहेका छन् त ? ग्यास उद्योग संघले माग पूरा नभए फागुन १७ गतेदेखि ग्यासको पीडीओ खरिद नगर्ने घोषणा गरेको छ । फागुन २२ गतेदेखि एलपी ग्यासको लोडिङ बन्द गर्ने, फागुन २५ गतेदेखि भन्सार आयात रोक्ने, फागुन २८ देखि उद्योगहरु समेत बन्द गर्ने र ३० गतेदेखी सम्पूर्ण ग्यास विक्रेताहरुबाट ग्यास विक्री वितरण पूर्ण रुपमा बन्द गर्ने संघले चेतावनी दिएको थियो । बिक्रेता महासंघले पनि आन्दोलनमा ऐक्यबद्धता जनाएको छ ।
नेपाल घरेलु तथा साना उद्योग महासंघद्वारा श्रद्धाञ्जली व्यक्त
काठमाडौं । संस्कृति, पर्यटन तथा नागरिक उड्डयन मन्त्री रविन्द्रप्रसाद अधिकारीको हेलिकोप्टर दुर्घटनामा परी दुःखद निधन भएकोमा नेपाल घरेलु तथा साना उद्योग महासंघ स्तब्ध भएको छ । उनको निधनबाट मुलुकले एउटा होनाहार युवा राजनीतिज्ञ गुमाएको छ भने पर्यटन व्यवसायमा समेत क्षति पुग्न गएको महासंघले जनाएको छ । दुःखको यस घडीमा उहाँ लगायत उहाँसँगै यात्रामा रहनु भई शहादत प्राप्त गर्नुहुने उड्डयन प्राधिकरणका उपमहानिर्देशक विरेन्द्र श्रेष्ठ तथा निर्देशक ध्रुव भोछिभोया, उपसचिव युवराज दाहाल, पर्यटन व्यवसायी आङछिरिङ शेर्पा, पाइलट प्रभाकर के.सी र सुरक्षाकर्मी अर्जुन घिमिरेको आत्माले शान्ति पाओस् भनी महासंघ मृत आत्माप्रति हार्दिक श्रद्धाञ्जली अर्पण गर्दछ–कार्यवाहक अध्यक्ष उमेशप्रसाद सिंहद्वारा प्रकाशित विज्ञप्तिमा जनाइएको छ ।
ताप्लेजुङ दुर्घटनाप्रति परिसंघको समवेदना
काठमाडौँ । बुधवार ताप्लेजुङमा भएको हेलिकोप्टर दुर्घटना परी मृत्यु भएकाहरुप्रति नेपाल उद्योग परिसंघले गहिरो दुःख प्रकट गरेको छ । परिसंघले विहीबार विज्ञप्ति जारी गर्दै घटनामा परी मृत्यु भएकाहरुप्रति श्रद्धाञ्जली अर्पण गर्दै परिवारजनप्रति समवेदना प्रकट गरेको छ । विज्ञप्तिमा अकल्पनीय र अप्रत्यासित दुर्घटनाले देशले अपुरणीय क्षति व्यहोर्नु परेको उल्लेख छ । नेपालले एक उदीयमान मुलुक र जनताका लागि सदैव समर्पित, विकास प्रेमीयुवा राजनीतिज्ञ, नेपालको पर्यटन एवम् उड्डयन क्षेत्रको विकासमा समर्पित एक सफल उद्यमी तथा कर्तव्यनिष्ठ राष्ट्र सेवकहरु गुमाएको छ–विज्ञप्तिमा उल्लेख छ ।
सेताम्मे चन्द्रागिरिमा खचाखच आगन्तुक, तोडिएला रेकर्ड ?
काठमाडौं । रातभरी परेको पानीले उपत्यका आसपासका डाँडाहरु हिउँले सेताम्मे बने । हिउँले भरिएका डाँडाहरुमध्ये आन्तरिक पर्यटकहरुको अत्यधिक आकर्षणको केन्द्रका रुपमा स्थापित चन्द्रागिरि डाँडामा आन्तरिक पर्यटक भरिभराउ देखियो । एकै दिन १५ हजार आन्तरिक पर्यटक पुगेर बनेको पुरानो रेकर्ड तोडिने सम्भावना रहेको चन्द्रागिरी हिल्सका प्रबन्ध निर्देशक अभिषेक प्रताप शाहले बताए । ‘२०७५ सालको नयाँ बर्षमा १५ हजारले भिजिट गरेका थिए, यसपाली त्यो रेकर्ड तोडिन्छ भन्ने आस छ’, शाहले भने । चन्द्रागिरिमा बिहानै देखि आगन्तुकहरुको खचाखच भिड देखिन्थ्यो । करिब २ किलोमिटर लामो लाइनमा बसेर आगन्तुकहरु चन्द्रागिरी डाँडोमा पुग्न आतुर देखिन्थे । करिब १४ मिनेट केबलकारको यात्रापछि काठमाडौं खाल्डोबाट सिधै चन्द्रागिरिको डाँडोमा पुग्न सकिन्छ जहाँ सेताम्मे डाँडापाखा हेरेर मोहित नहुने सायदै होलान् । रुखका पात र हाँगाहरुमा जमेका हिउँलाई हेर्दै रमाउन के बालबालिका, के युवायुवती सबै झुम्मिएको देखिन्थे । राजधानीबाट हिउँ खेल्न जाने पुराना गन्तव्य नगरकोट, शिवपुरी र फुल्चोकी हुन् । तर त्यहाँसम्म पुग्दा हिउँ पग्लिसक्ने सम्भावना रहन्थ्यो । हिउँ पर्ने सम्भावित दिन हेरेर अघिल्लो दिन नै त्यता लाग्नुपर्ने बाध्यता समेत थियो । तर चन्द्रागिरिमा केबलकार बनेसँगै हिउँ खेल्ने चाहना क्षण भरमै पुरा हुन्छ । हिउँ परेको जानकारी पाएको अधिकतम एक घण्टा नपुग्दै हिउँ खेल्ने अवसर प्राप्त हुन्छ ।
