गुराँस लघुवित्तको स्वतन्त्र सञ्चालकमा शशिभूषण कर्ण नियुक्त
काठमाडौं । गुराँस लघुवित्त वित्तीय संस्था लिमिटेडको स्वतन्त्र सञ्चालकमा शशिभूषण कर्ण नियुक्त भएका छन् । संस्थाको सञ्चालक समितिको सोमबार बसेको १६९औँ बैठकले विराटनगर महानगरपालिका–१० निवासी कर्णलाई रिक्त रहेको स्वतन्त्र सञ्चालक पदमा नियुक्त गर्ने निर्णय गरेको हो । कर्णलाई आगामी चार वर्षका लागि स्वतन्त्र सञ्चालकमा नियुक्त गरिएको संस्थाले नेपाल स्टक एक्सचेन्ज (नेप्से), को कार्यालयलाई जानकारी गराएको छ । कोशी प्रदेशलाई कार्यक्षेत्र बनाएर ‘घ’ वर्गको वित्तीय संस्थाका रूपमा सञ्चालनमा रहेको गुराँस लघुवित्तको केन्द्रीय कार्यालय धनकुटामा छ भने कर्पोरेट कार्यालय मोरङको बुढीगंगा गाउँपालिका–१, पुष्पलालचोकमा रहेको छ ।
संवेदनशील सूचना चुहाउनेलाई कारबाही गर्ने गृहमन्त्री गुरुङको चेतावनी
काठमाडौं । गृहमन्त्री सुदन गुरुङले गृह मन्त्रालय र मातहतका निकायमा रहेका पदाधिकारी तथा कर्मचारीलाई गोप्य र संवेदनशील सूचना अनधिकृत व्यक्ति वा निकायलाई नदिन चेतावनी दिएका छन् । मंगलबार सामाजिक सञ्जाल फेसबुकमार्फत धारणा सार्वजनिक गर्दै गृहमन्त्री गुरुङले आफ्नो पदीय हैसियत भुलेर संवेदनशील सूचना चुहाउने प्रवृत्ति आफूले लामो समयदेखि नियालिरहेको बताएका छन् । उनले राज्यका संवेदनशील सूचना कसैको निजी सम्पत्ति नभई सार्वजनिक जिम्मेवारी भएको उल्लेख गरेका छन् । पदले सूचनामा पहुँच दिने भए पनि त्यसको दुरुपयोग गर्ने अधिकार नदिने उनको भनाइ छ । गुरुङले गृह मन्त्रालय र मातहतका निकायमा प्राप्त हुने सानोभन्दा सानो सूचना, सुराक वा गुप्त जानकारीले समेत अपराध रोक्न, अनुसन्धान अघि बढाउन तथा भविष्यमा हुन सक्ने गम्भीर घटनाको सत्यतथ्य स्थापित गर्न महत्वपूर्ण भूमिका खेल्ने बताएका छन् । राज्यले सुम्पिएको गोपनीयताको दुरुपयोग गरी देश र संगठनप्रति विश्वासघात गर्ने जोसुकै भए पनि उन्मुक्ति नपाउने उनले बताएका छन् । त्यस्ता व्यक्तिलाई कानुनको कठघरामा ल्याइने गृहमन्त्री गुरुङले चेतावनी दिएका छन् ।
मातातीर्थ–चोभार प्रसारण लाइन निर्माण सम्पन्न, उपत्यकाको विद्युत् आपूर्ति थप भरपर्दो हुने
काठमाडौं । काठमाडौं उपत्यकाको विद्युत् आपूर्ति प्रणालीलाई थप भरपर्दो र गुणस्तरीय बनाउन महत्वपूर्ण मानिएको मातातीर्थ–चोभार १३२ केभी प्रसारण लाइन निर्माण सम्पन्न भएको छ । थानकोट–चापागाउँ–भक्तपुर १३२ केभी प्रसारण लाइन आयोजनाअन्तर्गतको मातातीर्थ सबस्टेसनदेखि चोभार सबस्टेसनसम्मको करिब ६ किलोमिटर प्रसारण लाइन शुक्रबारबाट चार्ज गरिने भएको छ । लाइन चार्ज भएपछि यो राष्ट्रिय प्रसारण प्रणालीमा जोडिएर नियमित विद्युत् प्रवाह हुनेछ । नेपाल विद्युत् प्राधिकरणका कार्यकारी निर्देशक दीर्घायु कुमार श्रेष्ठले मातातीर्थ–चोभार प्रसारण लाइन र चोभार सबस्टेसन सञ्चालनमा आएपछि काठमाडौं उपत्यका तथा आसपासका क्षेत्रमा विद्युत्को माग र आपूर्तिबीच सन्तुलन कायम गर्न सहज हुने बताए । उनका अनुसार चोभार सबस्टेसनदेखि पाटनसम्मको करिब साढे ४ किलोमिटर १३२ केभी भूमिगत प्रसारण लाइन निर्माणलाई पनि उच्च प्राथमिकताका साथ अघि बढाइएको छ । आगामी हिउँदयाममा काठमाडौं उपत्यकामा बढ्ने विद्युत् माग व्यवस्थापन गर्न प्राधिकरणले गत असोज ८ गते मातातीर्थ–चोभार प्रसारण लाइन १५ दिनभित्र चार्ज गर्ने निर्णय गरेको थियो । त्यसका लागि चोभार सबस्टेसनमा दुईवटा वे निर्माण गरिएको छ । चोभार सबस्टेसनमा स्थानीय विद्युत् आपूर्तिका लागि ११ केभीका नौवटा फिडर रहेका छन् । उक्त सबस्टेसनबाट कीर्तिपुर, फर्पिङ, पुल्चोक, एकान्तकुनालगायतका क्षेत्रमा विद्युत् आपूर्ति गरिनेछ । सबस्टेसन सञ्चालनमा आएपछि ती क्षेत्रमा विद्युत्को भोल्टेज सुधार हुनुका साथै आपूर्ति प्रणाली थप भरपर्दो हुने अपेक्षा गरिएको छ । मुख्यतः त्रिशूली र मस्र्याङ्दी नदी जलाधार क्षेत्रमा रहेका जलविद्युत् आयोजनाबाट उत्पादित विद्युत् मातातीर्थ सबस्टेसनमार्फत काठमाडौं उपत्यकामा आपूर्ति हुँदै आएको छ । मातातीर्थदेखि चोभारसम्म १३२ केभी प्रसारण लाइन सञ्चालनमा आएपछि उपत्यकाको विद्युत् आपूर्ति प्रणालीमा थप वैकल्पिक मार्ग उपलब्ध हुनेछ । चोभार सबस्टेसनबाट चक्रपथ हुँदै ललितपुरको लगनखेल (पाटन) सबस्टेसनसम्म करिब साढे ४ किलोमिटर १३२ केभी भूमिगत प्रसारण लाइन निर्माणाधीन छ । त्यसका लागि पाटन सबस्टेसनलाई समेत स्तरोन्नति गरी १३२ केभी स्तरमा सञ्चालन गर्ने काम अघि बढाइएको छ । नेपाल सरकार र नेपाल विद्युत् प्राधिकरणको लगानीमा आर्थिक वर्ष २०५५/५६ देखि थानकोट–चापागाउँ–भक्तपुर १३२ केभी प्रसारण लाइन आयोजना सुरु गरिएको थियो । आयोजनाअन्तर्गत काठमाडौं र भक्तपुरतर्फको प्रसारण लाइन निर्माण सम्पन्न भइसकेको छ । ललितपुरतर्फ भने खोकना, बुंगमती, हरिसिद्धी र लामाटार क्षेत्रमा स्थानीय बासिन्दाले प्रसारण लाइनको रुट परिवर्तनको माग गर्दै अवरोध गरेपछि निर्माण अघि बढ्न सकेको छैन । यसका कारण काठमाडौं उपत्यकाको १३२ केभी प्रसारण प्रणालीलाई पूर्ण रिङ संरचनामा सञ्चालन गर्ने योजना प्रभावित हुँदै आएको छ ।
कांग्रेसको उम्मेदवारी दर्ता सुरू हुँदै, सात ७ हजार ११४ प्रतिनिधिले छान्दैछन् नेतृत्व
काठमाडौं । नेपाली कांग्रेसको १५ औँ महाधिवेशन अन्तर्गत आज नयाँ कार्यसमितिका लागि उम्मेदवारी दर्ता हुँदैछ । सात हजार ११४ महाधिवेशन प्रतिनिधिले नयाँ नेतृत्व छान्ने भएका छन् । निर्वाचन समितिले राष्ट्रिय सभागृहमा कार्यालय स्थापना गरी उम्मेदवारी फारम वितरण र उमेदवारी दर्ता गर्दैछ । निर्वाचन समितिका सदस्य सचिव राजु कटवालका अनुसार बिहान १० बजेपछि उम्मेदवारका लागि मनोनयन दर्ता फारम वितरण हुँदैछ । महाधिवेशन प्रतिनिधिहरूको नामावली राष्ट्रिय सभागृहको भित्री पर्खालमा टाँसिएको छ । उम्मेदवारी दिनेले सभागृहभित्रै प्रभु बैंकका कर्मचारीलाई निर्धारित गरिएको रकम बुझाएर रसिद लिइ उम्मेदवारी दर्ता गर्न सकिने छ । त्यस्तै दिउँसो साढे १२ बजेदेखि अपरान्ह ४ बजेसम्म उम्मेदवारीका लागि मनोनयन दर्ता हुने भएको छ । कांग्रेसले केन्द्रीय कार्यसमितिको आकार १६७ बाट बढाएर २९७ सदस्यीय बनाएको छ । सोमबार संशोधित विधान पारित गरी पदाधिकारी संख्या १४ बाट बढाएर २६ पु‍र्‍याएको छ । नयाँ व्यवस्थाअनुसार एक वरिष्ठ उपसभापति र एक महिला उपसभापति थपिएको छ । उपसभापति संख्या चार पुगेको छ । महामन्त्रीको संख्या तीन पु‍र्‍याइएको छ । एक महिला महामन्त्री अनिवार्य गरिएको छ । दुई खुला सहमहामन्त्री थपिएका छन् । यससँगै सहमहामन्त्रीको संख्या ११ पुगेको छ । प्रवक्ता पद पनि थप गरिएको छ । आवश्यक्ताका आधारमा सहप्रवक्ताको संख्या अझै थप हुने पार्टीले बताएको छ । यसअघि १४औँ महाधिवेशनमा कांग्रेसको केन्द्रीय कार्यसमिति १६७ सदस्यीय थियो । पदाधिकारी संख्या १४ थियो । यसपटक प्रतिनिधि संख्या र समावेशी सहभागिता बढेसँगै केन्द्रीय कार्यसमितिको आकार र पदाधिकारी संख्या पनि बढाइएको कांग्रेसले जनाएको छ ।
सरकारमा राजनीतिक तथा प्रशासनिक अनुभवको कमी छ : मुकुल ढकाल
काठमाडौं । राष्ट्रिय स्वतन्त्र पार्टीका पूर्वमहामन्त्री डा. मुकुल ढकालले वर्तमान सरकारमा राजनीतिक तथा प्रशासनिक अनुभवको कमी रहेको टिप्पणी गरेका छन् । ललितपुरको पुल्चोकमा आयोजित ‘नागरिक आवाज अभियान’ घोषणा कार्यक्रममा बोल्दै ढकालले जेन–जी आन्दोलनबाट स्थापित शक्ति नभई अर्कै शक्तिले अहिले सरकार सञ्चालन गरिरहेको दाबी गरेका हुन् । उनले जेन–जी आन्दोलनले स्थापित राजनीतिक शक्तिलाई झकझकाउने र सुधार्ने उद्देश्य राखेको भए पनि आन्दोलन नियन्त्रणमा लिएर अर्कै शक्तिले पुराना राजनीतिक दल र नेताहरूलाई पूर्ण रूपमा विस्थापित गरेको बताए । उनले राष्ट्रिय स्वतन्त्र पार्टीमा आबद्ध व्यक्तिहरूमा समेत राजनीतिक अनुभवको कमी रहेको आफूले देखेको बताए । अचानक आएको जिम्मेवारीका कारण वर्तमान सरकारमा अनुभवको कमी देखिएको उनको भनाइ छ । तर, फागुन २१ गतेको निर्वाचनपछि ठूलो जनमतबाट सरकारलाई अनुमोदन गरिसकेकाले त्यस जनमतको अवमूल्यन गर्न नहुने उनले बताए । उनले भने, ‘जेन–जी आन्दोलन जुन भदौ २३ मा भयो, त्यसमा जसले आन्दोलन गर्यो, त्यो आन्दोलन गरेको शक्ति आज सत्तामा छैन । यो छुट्टै शक्ति आएर स्थापित भएको हो । फागुन २१ को चुनावमा जनताले अब देश बन्छ, अब देश बनाउनुपर्छ भन्ने आधारमा भोट दिएका हुन् ।’ उनले निर्वाचनमा जनताले देश निर्माणको अपेक्षासहित मतदान गरेको उल्लेख गर्दै अहिले सरकारको नेतृत्व गरिरहेको समूहमा रहेको अनुभवको कमीलाई सुधार गर्दै अघि बढ्नुपर्ने बताए । उनले सरकारले मुलुक र नागरिकको पक्षमा काम गर्ने दिशामा अघि बढ्नुपर्ने बताए ।
क्यानका पूर्व अध्यक्ष नवराज कुँवर असोसियोको उपाध्यक्षमा पुनः निर्वाचित
काठमाडौं । कम्प्युटर एसोसिएसन नेपाल महासंघ (क्यान महासंघ)का पूर्व अध्यक्ष नवराज कुँवर एसियन–ओसियनियन कम्प्युटिङ इन्डस्ट्री अर्गनाइजेसन (असोसियो)को उपाध्यक्षमा पुनः निर्वाचित भएका छन् । इन्डोनेसियाको जकार्तामा सम्पन्न असोसियोको ४२औँ वार्षिक साधारणसभा तथा अधिवेशनबाट कुँवर आगामी सन् २०२७/२८ कार्यकालका लागि उपाध्यक्षमा सर्वसम्मत निर्वाचित भएका हुन् । कुँवरले यसअघि पनि क्यान महासंघको प्रतिनिधित्व गर्दै सन् २०२२ देखि असोसियोको उपाध्यक्षको जिम्मेवारी सम्हाल्दै आएका छन् । उनले सन् २०२२–२०२४ र २०२५–२०२६ कार्यकालमा समेत उपाध्यक्षको भूमिका निर्वाह गरेका थिए । पुनः उपाध्यक्षमा निर्वाचित भएपछि कुँवरले नेपाललाई अन्तर्राष्ट्रिय सूचना प्रविधि मञ्चमा स्थापित गर्ने आफ्नो प्रयासलाई थप ऊर्जा मिलेको बताएका छन् । उनले असोसियोमार्फत एसियाली देशहरूमा मजबुत प्रविधि प्रणाली विकास गर्दै नेपाललाई विश्व आईसीटी क्षेत्रमा स्थापित गर्न सकिने बताए । यसबाट नवप्रवर्तन, प्रविधि विकास र अन्तर्राष्ट्रिय सहकार्यका नयाँ अवसर सिर्जना हुने उनको भनाइ छ । नयाँ कार्यसमितिमा मलेसियाका स्टान सिंह जितको नेतृत्वमा नेपालसहित मलेसिया, थाइल्यान्ड, मकाउ, म्यानमार, जापान, दक्षिण कोरिया, श्रीलंका, भियतनाम, ताइवान, इन्डोनेसिया, लाओस, सिंगापुर र फिलिपिन्सका सूचना तथा सञ्चार प्रविधि क्षेत्रका संगठनका प्रतिनिधि निर्वाचित भएका छन् । क्यान महासंघका महासचिव चन्द्रविलास भुर्तेलले कुँवरको नेतृत्वमा नेपाली सूचना प्रविधि क्षेत्र र संस्थाहरूलाई अन्तर्राष्ट्रियस्तरमा चिनाउन महत्वपूर्ण भूमिका निर्वाह भएकाले पुनः सर्वसम्मत निर्वाचित हुने वातावरण बनेको बताए । उनले आगामी कार्यकालमा पनि कुँवरबाट उल्लेख्य योगदान पुग्ने र त्यसबाट नेपालले लाभ लिन सक्ने विश्वास व्यक्त गर्दै बधाई दिएका छन् । भुर्तेलले असोसियोमा कुँवरको प्रतिनिधित्वले बदलिँदो प्रविधि र डिजिटल अर्थतन्त्रमा सबैको पहुँच विस्तार गर्दै सूचना तथा सञ्चार प्रविधिमार्फत समृद्ध नेपाल निर्माण गर्ने क्यान महासंघको प्रयासमा सहयोग पुग्ने बताए ।
कांग्रेस महाधिवेशन : ७ हजार ११४ प्रतिनिधिको अन्तिम नामावली सार्वजनिक, आजै उम्मेदवारी दर्ता
काठमाडौं । नेपाली कांग्रेसको १५औँ महाधिवेशनअन्तर्गत निर्वाचनमा सहभागी हुने ७ हजार ११४ महाधिवेशन प्रतिनिधिको अन्तिम नामावली सार्वजनिक गरिएको छ । निर्वाचन समितिले दाबी–विरोध तथा आवश्यक जाँचबुझको प्रक्रिया पूरा गरेपछि मतदाताको अन्तिम सूची प्रकाशन गरेको हो । कांग्रेस १५औँ महाधिवेशन केन्द्रीय निर्वाचन समितिका सदस्यसचिव राजु कटुवालले निर्वाचनमा सहभागी हुने प्रतिनिधिको अन्तिम नामावली सार्वजनिक गरिएको जानकारी दिए । अन्तिम सूचीअनुसार अब सभापतिसहित नयाँ केन्द्रीय कार्यसमिति चयनका लागि ७ हजार ११४ प्रतिनिधिले मतदान गर्नेछन् । निर्वाचन समितिका अनुसार मंगलबार बिहान ९ः३० बजेसम्म मतदाता नामावलीमाथि दाबी–विरोध गर्ने समय तोकिएको थियो । त्यसपछि बिहान ९ः३० देखि १०ः३० बजेसम्म दाबी–विरोधमाथि जाँचबुझ गरी बिहान ११ः३० बजे मतदाताको अन्तिम नामावली प्रकाशन गर्ने कार्यतालिका बनाइएको थियो । त्यसपछि निर्वाचन प्रक्रिया थप निर्णायक चरणमा प्रवेश गर्नेछ । निर्वाचन समितिले उम्मेदवार मनोनयन दर्ता फारम वितरण तथा दिउँसो १२ः३० बजेदेखि ४ बजेसम्म उम्मेदवारी मनोनयन दर्ता गर्ने कार्यक्रम तय गरेको छ । कांग्रेसको १५औँ महाधिवेशनअन्तर्गत नयाँ नेतृत्व चयनका लागि यसपटक संशोधित विधानअनुसार निर्वाचन हुँदैछ । सोमबार सम्पन्न बन्दसत्रले पार्टीको विधान संशोधन गर्दै २९७ सदस्यीय केन्द्रीय कार्यसमितिको व्यवस्था गरेको छ । सोही संशोधित संरचनाअनुसार नयाँ नेतृत्व चयन हुने निर्वाचन समितिले जनाएको छ । महाधिवेशनमा सभापति, उपसभापति, महामन्त्री, सहमहामन्त्रीसहित केन्द्रीय कार्यसमितिका विभिन्न पदमा उम्मेदवारी दिने नेताहरूले मंगलबार मनोनयन दर्ता गर्नेछन् । त्यससँगै कांग्रेसको नयाँ नेतृत्वका लागि लामो समयदेखि चल्दै आएको आन्तरिक प्रतिस्पर्धा औपचारिक निर्वाचन प्रक्रियामा प्रवेश गर्नेछ । प्रतिनिधिको व्यवस्थापनमा २०० भन्दा बढी स्वयंसेवक यसैबीच कांग्रेसको १५औँ महाधिवेशनमा सहभागी प्रतिनिधिको व्यवस्थापन तथा सहजीकरणका लागि २०० भन्दा बढी स्वयंसेवक परिचालन गरिएको छ । कांग्रेस केन्द्रीय सदस्य तथा स्वयंसेवक व्यवस्थापन समितिका संयोजक गणेश लामाका अनुसार महाधिवेशनमा सहभागी प्रतिनिधिलाई कार्यक्रमस्थलमा आवतजावत, बैठक तथा निर्वाचन प्रक्रियामा सहजीकरण गर्न स्वयंसेवक परिचालन गरिएको हो । लामाका अनुसार बन्दसत्र सञ्चालन हुने स्थलदेखि निर्वाचन हुने स्थानसम्म स्वयंसेवक खटाइएको छ । प्रतिनिधिको चापलाई व्यवस्थापन गर्दै निर्वाचन प्रक्रिया सहज र व्यवस्थित बनाउन स्वयंसेवक परिचालन गरिएको उनले बताए । कांग्रेसको १५औँ महाधिवेशनमा सहभागी हुन देश तथा विदेशबाट करिब ७ हजार ५ सय प्रतिनिधि काठमाडौं आएको व्यवस्थापन समितिको दाबी छ । यद्यपि निर्वाचनमा सहभागी हुने प्रतिनिधिको अन्तिम सूचीमा भने ७ हजार ११४ जनाको नाम कायम भएको छ ।
सिक्लेस हाइड्रोले सेयरधनीलाई १३.३७ प्रतिशत लाभांश दिने
काठमाडौं । सिक्लेस हाइड्रोपावर लिमिटेडले आर्थिक वर्ष २०८२/८३ का लागि १३.३७५ प्रतिशत लाभांश घोषणा गरेको छ । कम्पनीको असोज १९ गते बसेको सञ्चालक समितिको बैठकले आर्थिक वर्ष २०८२/८३ सम्मको सञ्चित मुनाफाबाट चुक्ता पुँजीको १२.७०६ प्रतिशत बोनस सेयर र कर प्रयोजनका लागि ०.६६९ प्रतिशत नगद लाभांश वितरण गर्ने निर्णय गरेको हो । कम्पनीका अनुसार १२.७०६ प्रतिशत बोनस सेयरको रकम १२ करोड ४२ लाख १ हजार २७७ रुपैयाँ बराबर हुनेछ । यस्तै, ०.६६९ प्रतिशत नगद लाभांशबापत ६५ लाख ३६ हजार ९०९ रुपैयाँ ३२ पैसा वितरण गरिनेछ । कम्पनीले प्रस्तावित बोनस सेयर तथा नगद लाभांश स्वीकृतिका लागि विद्युत् नियमन आयोगसमक्ष पेस गर्ने निर्णय गरेको जनाएको छ । आयोगबाट स्वीकृति प्राप्त भएपछि कम्पनीको आगामी साधारणसभाबाट समेत प्रस्ताव पारित गरी लाभांश वितरण प्रक्रिया अघि बढाइनेछ ।
