अमेरिकी आर्थिक वृद्धिदरमा सामान्य सुधार, ‘सन् २०२० मा भने घट्ने’
वासिङ्टन । अमेरिकी आर्थिक वृद्धिमा गत अप्रिलमा गरिएको प्रक्षेपणको तुलनामा सामान्य सुधार देखिएको अन्तर्राष्ट्रिय मुद्रा कोषले बिहीबार जनाएको छ । यधपी यो चीन-अमेरिका व्यापार विवादका कारण अमेरिकी अर्थतनत्रमा पर्नसक्ने समग्र प्रभाव तथा ‘निर्माण सामग्री’ को अभावका कारण छायाँमा पर्नसक्ने मुद्रा कोषले बताएको छ । मुद्रा कोषले सन् २०१९ का लागि अमेरिकाको कुल ग्राहस्थ उत्पादनका लागि गरेको प्रक्षेपणमा केही सुधार देखिएको र २.६ प्रतिशत पुग्ने बताइएको छ । अर्थात् अप्रिलमा गरिएको अनुमानको तुलनामा तीन दशांश वृद्धि भएको छ । तर मुद्रा कोषले अमेरिकी अर्थतन्त्रको बार्षिक मुल्याङ्कन गर्दै आगामी सन् २०२० का लागि अमेरिकी आर्थिक वृद्धिमा सामान्य गिरावट आई दुई प्रतिशतमा झर्नसक्ने अनुमान गरेको छ । मुद्रा कोषका अनुसार अमेरिकी ऋणको अनुपात बढ्दो रहने र वृद्धिदरमा असमानता देखिने चेतावनी दिएको छ । मुद्रा कोषले अमेरिका लगायत विश्व अर्थतन्त्रमा देखिएको प्रभावलाई मध्यनजर गर्दै चीन–अमेरिका व्यापार विवादलाई समयमै समाधान गर्नसमेत भनेको छ । रासस/एएफपी
भारी कर छुटसँगै हाइब्रिड कारकाे मूल्य १० लाख रुपैयाँ घट्ने, अर्थमन्त्रालयको निर्णय शंकास्पद
काठमाडौं । बजेट मार्फत सरकारले हाइब्रिड गाडीमा उच्च दरमा कर छुट दिएको छ । हाइब्रिड गाडी आयातमा ५० प्रतिशत भन्सार र ५० प्रतिशत अन्तशुल्क छुट दिने व्यवस्था आर्थिक ऐन २०७६ मा गरिएको छ । भन्सार र अन्तशुल्कमा गरिएको छुटका आधारमा हाइब्रिड गाडीको मूल्य प्रतिकार १० लाखसम्म सस्तो हुने व्यवसायीको अनुमान छ । ‘एउटा कारको मूल्य १० लाख रुपैयाँसम्म घट्न सक्छ’ एक व्यवसायीले विकासन्युजसँग भने । हाल नेपालमा हाइब्रिड गाडी नगन्य मात्रामा छन् । सरकारले करमा धेरै छुट दिएपछि यस्तो गाडीको आयात बढ्ने यातायात व्यवस्था विभागका उपनिर्देशक इञ्जिनियर प्रेमकुमार सिंहले बताए । सरकारले विद्युतीय तथा हाईब्रिड कार खरिद गर्न ८० प्रतिशतसम्म कर्जा लगानी गर्न सक्ने व्यवस्था पनि गरेको छ । यस्तो व्यवस्थाले कम बचत भएका व्यक्तिलाई पनि कार किन्न सजिलो हुन्छ । विगतमा किन्दा ४५ लाख मूल्य पर्ने हाइब्रिड गाडी अब ३५ लाखमा पाइन्छ । ७ लाख रुपैयाँ बचत हुनेले ८० प्रतिशतसम्म फाइनान्सको सुविधा लिएर यस्तो गाडी किन्न सक्छ । पेट्रोल तथा डिजेलबाट चल्ने गाडी किन्न ५० प्रतिशत मात्र कर्जा लिने पाउने राष्ट्र बैंकको नियमका कारण ४५ लाख पर्ने गाडी किन्न चाहानेसँग कम्तिमा २२ लाख ५० लाख रुपैयाँ बचत हुनुपर्छ । कस्तो हुन्छ हाइब्रिड गाडी हाइब्रिड गाडीमा एउटा डिजेज, पेट्रोल वा ग्यासबाट चल्ने इन्जिन हुन्छ भने अर्को विद्युतीय पावरबाट चल्ने मोटर हुन्छ । हाइब्रिड कारपनि दुई प्रकारका हुन्छन्, (१) हाइब्रिड, (२) प्लग इन हाइब्रिड । ‘प्लग इन हाइब्रिड’ गाडीमा शक्तिशाली व्याट्रीको प्रयोग हुन्छ । यो व्याट्रीमा विद्युतको प्लग जोडेर रिचार्ज गरिन्छ । यस्तो गाडी स्टार्ट गर्नदेखि ३०/४० किलोमिटर गुुडाउन पनि विद्युतीय उर्जाको प्रयोग हुन्छ । व्याट्रीको चार्ज सकिएपछि पेट्रोल वा डिजेल इन्जिनबाट गाडी गुड्छ । ‘सहरी क्षेत्रमा दैनिक छोटो दूरीमात्र गाडी चलाउनेहरुको लागि यस्तो गाडीमा पेट्रोलियम पदार्थको प्रयोग नगर्न पनि सकिन्छ । लामो दूरीको यात्रा गर्दा मात्र पेट्रोलियम पदार्थको प्रयोग हुन्छ । यस्ता गाडीले वातावरणीय प्रदुषणमा पनि कम असर गर्छ । यस्ता गाडीमा भने सरकारले भन्सार तथा अन्तशुल्क छुट दिनु सहि भएको व्यवसायीहरुको भनाई छ । टाेयटाकाे हाइब्रिड कार तर, अर्को प्रकारको हाइब्रिड गाडीका लागि आवश्यक उर्जाको ९० प्रतिशत पेट्रोलियम पदार्थ हो । गाडी स्टार्ट गर्नेदेखि गुडाउने क्रममा आवश्यक उर्जाको लागि पेट्रोलियम पदार्थको प्रयोग हुन्छ । गाडी जाममा परेको तथा ट्राफिक लाइटमा रोकेको अवस्थामा गाडीको इन्जिन चालु राख्न र उच्च गतिमा गाडी गुड्दा कम उर्जा भए पुग्ने अवस्थामा व्याट्रीमा आधारित मोटर चल्छ । काठमाडौंमा सवारी चापका कारण उच्च गतिमा गाडी गुडाउन नसक्ने, राजधानी बाहिर उकालो, घुम्ती, खाल्टाखुल्टी सडकका कारण उच्च गतिमा गाडी गुडाउन गाह्रो हुने भएकोले यस्ता गाडीमा व्याट्री मोटरले कम काम गर्ने बताइएको छ । यस्तो गाडीमा रिचार्जएवल व्याट्री जडान गरिएको हुन्छ, तर व्याट्री चार्ज गर्नको लागि विद्युत वा अन्य वाह्य उर्जा प्रयोग हुँदैन । गाडी गुडेको अवस्थामा व्याट्री चार्ज हुन्छ । व्याट्रीबाट प्रवाह हुने उर्जाको हिस्सा बढीमा १० प्रतिशत मात्र हुन्छ । यस्तो सवारीमा पेट्रोलियम पदार्थको प्रयोग अधिक हुन्छ भने वातावरणीय प्रदुषण पनि परम्परागत सवारीको हाराहारीमा नै गर्छ । विकसित देशहरुमा यस्तो सवारीलाई सरकारले कम प्राथमिकतामा राखेको छ । तर नेपाल सरकारले भने यस्ता सवारीमा पनि ५० प्रतिशत भन्सार र ५० प्रतिशत अन्तशुल्क छुट दिएर आयातलाई प्रोत्साहित गरेको छ । ‘यस्तो सवारी आयातलाई सरकारले प्रोत्साहित गर्नु हुन्न थियो । जिम्मेवार अधिकारीहरुले विषय नबुझि निर्णय लिएको जस्तो देखिन्छ’ एक जना अनुभवी अटो व्यवसायीले भने । शंकास्पद निर्णय बजेटको पूर्व तयारीको क्रममा गाडी बिक्रेताहरुको संगठन नाडा अटोमोवाईल्स एशोसिएशनले हाइब्रिड गाडीमा ५० प्रतिशत भन्सार छुट दिन माग गरेको थियो । ‘हाल इलेक्ट्रीकलका साधनहरु अझै प्रशस्त मात्रामा उत्पादन नभई रहेको बर्तमान अवस्थामा हाइब्रिड जस्ता सवारी साधनहरुमा लाग्ने भन्सार महशुलमा २५ प्रतिशत छुटको व्यवस्था भई आएकोमा सो लाई बृद्धिगरी ५० प्रतिशत भन्सार महशुल छुटको व्यवस्था हुनु पर्ने’ नाडाको सुझाव पत्रकाे बुँदा नम्बर १२.१ मा लेखिएको छ । सरकारले व्यवसायीले भने झै ५० प्रतिशत भन्सार मात्र छुट दिएन, अन्तशुल्कमा पनि ५० प्रतिशत छुट दिएको छ । व्यवसायीले मागेभन्दा बढी कर छुट दिने गरी सरकारले गरेको निर्णय शंकास्पद भएको र यसभित्र नीतिगत भ्रष्टाचार भएको समेत हुन सक्ने आशंका गरिएको छ । सरकारले विद्युतीय सवारीमा १० प्रतिशत मात्र भन्सार लगाउने नीतिकाे व्यवसायीहरूले स्वागत गरेका छन् । तर, नविकरणीय उर्जा नगन्य मात्रामा प्रयाेग हुने, पेट्राेलियम पदार्थकाे अधिक प्रयाेग हुने र वातावरण पनि प्रदुषण गर्ने सवारीमा उच्च दरका कर छुट दिने नीति उपयुक्त नहुने जानकारहरू बताउँछन् ।
भारतका दोस्रा धनी अजिम प्रेमजीले लिए अवकाश, घट्यो विप्रो कम्पनीको सेयर
मुम्बई । भारतका ‘दोस्रो धनी व्यक्ति’ अजिम प्रेमजीले सक्रिय व्यवसायिक जीवनबाट अवकासको घोषणा गरेका छन् । घ्यू उत्पादनबाट व्यवासायिक जीवन शुरू गरी विश्वप्रख्यात सूचना प्रबिधिसम्बन्धी कम्पनीको सफल व्यवसाय विप्रो कम्पनीका अध्यक्ष रहँदै आएका प्रेमजीले बिहीबार अवकासको घोषणा गरेका हुन् । “मैले विप्रोसँग प्रत्यक्ष तथा परोक्ष सरोकार राख्ने पूर्व तथा वर्तमान सम्पूर्ण कर्मचारी, शुभचिन्तक तथा उनीहरूका परिवारप्रति धन्यवाद दिन चाहन्छु । उहाँहरूको सहयोग र प्रेरणाले नै कम्पनीलाई आजको सफलताको अवस्थामा पु¥याउन सम्भव मिलेको हो,” ७३ बर्षीय सफल व्यवसायी प्रेमजीले जारी गरेको विज्ञप्तिमा उल्लेख छ । उनले भने, “यो मेरो लागी लामो सन्तुष्टिको यात्रा भएको छ । भविष्यमा मैले बाँकी जीवनलाई परोपकारका गतिविधिमा लगाउनेछु ।” प्रेमजीले विप्रोलाई सन् १९६० को दशकको अन्त्यदेखि नेतृत्व प्रदान गरेका थिए । उनको नेतृत्वमा विप्रोले एक सफल सूचना प्रबिधि क्षेत्रमा विश्वभर ख्याति प्राप्त गर्न सफल भएको छ । हाल विप्रोले विश्वका ५० मुलुकभन्दा बढीमा बार्षिक आठ अर्ब ५० करोड अमेरिकी डलर बराबरकोे कारोबार गर्दै आएको छ । प्रेमजीले विप्रोको कार्यकारी अध्यक्षबाट आगामी जुलाई ३० देखि अवकास लिनुहुनेछ भने उहाँको उत्तराधिकारीका रूपमा छोरा रिषाद प्रेमजीले कम्पनीलाई नेतृत्व प्रदान गर्नेछन् । प्रेमजीले कम्पनीको गैर–कार्यकारी निर्देशक तथा संस्थापक अध्यक्षका रूपमा भने सम्लग्नता रहनेछ । गत मार्चमा प्रेमजीले विप्रोमा रहेको आफ्नो शेयरको ३४ प्रतिशत शेयरलाई आफ्नो नाममा रहेको एक प्रतिष्ठानमार्फत परोपकारी गतिविधिका लागि योगदान गर्ने बताएको ब्लुमवर्गको समाचारमार्फत् जानकारी गराइएको थियो । विप्रोका अध्यक्षबाट प्रेमजीले राजीनामा गर्ने समाचारसँगै यस कम्पनीको शेयरमा बिहीबार एक प्रतिशतले गिरावट आएको छ । रासस/एएफपी
ठमेल पर्यटन विकास परिषदको महासचिवमा अधिकारीको उम्मेदवारी
काठमाडौं । ठमेल पर्यटन विकास परिषदको महासचिव पदमा ध्रुव अधिकारीले उम्मेदवारी घोषणा गरेका छन् । आगामी २ वर्षे कार्यकालका हुने शनिबार हुने निर्वाचनमा अधिकारीले महासचिव पदमा उम्मेदारी घोषणा गरेका हुन् । विगत २ दशक भन्दा बढी समयदेखि ठमेलको पर्यटन विकासमा सक्रिय अधिकारीले सुन्दर र व्यवस्थित ठमेल निर्माणका लागि आफु उम्मेदवार बनेका बताए । ‘ठमेललाई स्वदेशी तथा विदेशी पर्यटकहरुको निर्विकल्प गन्तव्यका रुपमा स्थापित गराउन मैले परिषदको चुनावमा महासचिवमा उम्मेदवारी दिएको हुँ’, अधिकारीले भने । उनले ठमेलसँग आफ्नो नङ र मासुको जस्तै सम्बन्ध रहेको पनि बताए । ठमेलमा भिआईप पब सहित अधिकारीले स्पा,लगायतका आधा दर्जन भन्दा बढी क्षेत्रमा लगानी गरेका छन् । उनले ठमेलको गरिमा बढाउन आफुलाई मतादन गर्न आग्रह पनि गरे । शनिबार हुने निर्वाचनमा ठमेल क्षेत्रका करिब ८ सय व्यवसायीले मतदान गर्नेछन् । नयाँ नेतृत्वका लागि ३ वटा प्यानल चुनावी मैदानमा खडा भएको छ ।
महालक्ष्मी पेन्सनसहितको ‘जीवन हेरचाह बीमा योजना’ सञ्चालन गर्दै, ‘बजारमा नौलो’
काठमाडौँ । महालक्ष्मी लाईफ इन्स्योरेन्स लिमिटेडले जेठ २६ गतेदेखि चौथो योजनाको रुपमा ‘जीवन हेरचाह बीमा योजना’ सञ्चालन गर्ने भएको छ । एउटै बीमा योजनामा टर्म इन्स्योरेन्स, एन्यूटी (पेन्सन) इन्स्योरेन्स र इण्डोमेन्ट इन्स्योरेन्सको समिश्रण रहेको यो योजना नेपालको बीमा बजारमा नौलो भएको कम्पनीले जनाएको छ । केटाकेटी र सन्तानको सुरक्षित भविश्यलाई लक्षित गरी ल्याइएको यो बीमा योजनामा प्रस्तावक (अभिभावक)को मृत्यू भएमा इच्छाईएको व्यक्तिलाई विमाङक रकम एकमुष्ट तुरुन्त भुक्तानी गरिनेछ । बिमाङ्क रकम भुक्तानीपछि पनि बीमाले निरन्तरता पाउँदै अवधि समाप्ती नभएसम्म प्रत्येक तीन–तीन महिनामा विमाङ्क रकमको २.५प्रतिशत बाँकी जीवन निर्वाह भत्ता (पेन्सन)को रुपमा पाईरहने, बाँकी अवधिको लागि बीमा शुल्क तिर्नु नपर्ने र भुक्तानी अवधि समाप्ती पछि पुनः विमाङ्क रकम र आर्जित वोनस एकमुष्ट भुक्तानी पाउने व्यवस्था गरिएको छ । साथै प्रस्तावक दुर्घटनामा स्थायी अपाङ्ग वा असक्त भएमा बाँकी अवधिको बीमा शुल्क छुट हुने र १२ वर्ष सम्म त्रैमासिक रुपमा विमाङ्क रकमको २.५ प्रतिशत जीवन निर्वाह भत्ता उपलब्ध हुने व्यवस्था समेत गरिएको छ । नेपालको बीमा बजारमा केटाकेटी बीमामा बच्चाको मृत्यू पछि बीमा योजना रद्द हुने व्यवस्था रहेको छ । तर, महालक्ष्मी लाईफले ल्याएको योजनामा इच्छाइएको वा बच्चाको मृत्यू पछिपनि बीमाले निरन्तरता पाईरहने र सो बीमा परिवारको इच्छाईएको व्यक्ति वा दोस्रो सन्तानमा हक हस्तान्तरण हुने एकदमै नौलो व्यवस्था गरिएको छ । प्रस्तावक जिवितै रहेको अवस्थामा भुक्तानी अवधि समाप्तीपछि विमाङ्क र आर्जीत बोनस एकमुष्ट पाउने व्यवस्था रहेको छ ।
अध्यक्ष पदका लागि अभिनेता रबिन्द्र खड्काको उम्मेदवारी
काठमाडौँ । वरिष्ठ अभिनेता रबिन्द्र खड्काले चलचित्र कलाकार संघको अध्यक्ष पदको लागि उम्मेदवारी दिएका छन् । संघमा एक कार्यकाल अध्यक्ष रही सकेका भूतपुर्व अध्यक्ष खड्काले यस पटक पनि अध्यक्ष पदमा उम्मेदवारी दिएका हुन् । यसैक्रममा विगत तीन दशकभन्दा बढी कलाकारितामा सक्रिय भूमिका निर्वाह गरिसकेका खड्काले चलचित्रकर्मीहरुको भविष्य सुनिश्चित गर्न, कलाको माध्यमबाट राष्टमा योगदान दिने वरिष्ठ कलाकर्मीहरुको बाँकी जीवनका लागि उच्च सम्मान सहित व्यवस्थापन गर्ने योजना बनाएका छन् । साथै, पूर्व अध्यक्ष नायक स्वर्गीय रामकेशर बोगटी लगायत चलचित्र संघको सपना संघको आफ्नै भवन निर्माणका लागि यथाशीघ्र अगाडि बढ्ने लगायतका थुप्रै थुप्रै सुकार्यको लागि सदा झैँ अगाडि बढ्ने प्रण गर्दै उनले उम्मेदवारी दर्ता गराएका हुन् ।
पूँजीगत लाभकरको बम्पर उपहारले तानेन लगानीकर्तालाई, किन फर्किएन कन्फिडेण्ट ?
काठमाडौ । बजेटले सेयर कारोबारमा लाग्दै आएको पुँजीगत लाभकर २.५ प्रतिशतले घटायो । यस अघि ७.५ प्रतिशत रहेको करको दर अहिले जम्मा ५ प्रतिशतमा सिमित छ । सेयर बजार प्रति अनुदार मानिएको अर्थमन्त्रीले गरेको यो व्यवस्थालाई ‘बम्पर उपहार’ मानिएको थियो । तर बजेट आएपछि पनि सेयर बजार ओरालो लाग्ने क्रम भने रोकिएको छैन । बजार प्रति लगानीकर्तामा अझै पनि कन्फिडेन्ट बढ्न नसकेको स्पष्टै देखिन्छ । बजेट पछिको ६ दिने कारोबारमा एकदिन बाहेक सेयर बजार हरेक दिन घटेको छ । सो ६ कारोबार दिनमा बजार २९.२९ अंकले घटेको हो । बजेट भाषणका दिन नेप्से परिसूचक १३ सय १३ दशमलव ८८ बिन्दुमा रहेको थियो । बजेट आएको भोलिपल्ट अर्थात जेठ १६ गते बजारमा सामान्य वृद्धि भई बिहीबार १३ सय १९ दशमलब ४७ बिन्दुमा पुग्यो । त्यसपछि बजारमा निरन्तर गिरावट आईरहेको छ । जेठ १९ आईतबार बजार १३ सय ५ दशमलव ६८ बिन्दुमा झर्यो । सोही क्रमलाई निरन्तरता दिँदै नेप्से परिसूचक सोमबार २० गते १२ सय ९२.८४ बिन्दु कायम भयो । मंगलबार २१ गते १२ सय ८९.२८ बिन्दुमा झर्यो । सेयर कारोबार हुने साताको अन्तिम दिन जेठ २३ गते बिहिबार नेप्से परिसूचक १२ सय ८४.५९ बिन्दुमा आई पुगेको छ । किन बढेन कन्फिडेण्ट ? अनामनगरस्थित आर्यतारा सेक्यूरिटीजमा भेटिएका लगानीकर्ता अमृत बञ्जाडे भन्छन् –‘अहिले सेयर बजार बढ्न नसक्नुमा लगानीकर्तालाई इन्ट्रेस्ट रेटले समस्यामा पारेको छ ।’ बञ्जाडेले बजारमा नयाँ लगानीकर्ता प्रवेश नभएका कारण पनि बजार बढ्न नसकेको बताए । उनले प्रशस्त पूँजी भएका लगानीकर्ताले त्यसको प्रयोग नगरेकाले बजारमा असर परिरहेको जोड दिएका छन् । साथै, उनले बजारमा सेयरका लागि लगानीकर्ताको डिमान्डमा कमी रहेकोमा प्रकाश पारे । वित्तीय संस्थाहरुको नाफा वृद्धि भएमा त्यसको प्रभाव प्रत्यक्ष रुपमा सेयर बजारमा पर्ने उनको तर्क छ । कालिका सेक्यूरिटीजमा भेटिएका लगानीकर्ता निर्मल न्यौपाने भन्छन्-‘बजेटले बिग मर्जरको बाटो खोलेको भएपनि अब हामीले मौद्रिक नीतिले त्यसलाई कसरी लैजान्छ भन्ने कुरा महत्वपूर्ण हुने बताएका छन् ।’ उनले बजेटले नै सेयर बजारलाई प्रभाव पारेको कुरा केही हदसम्म मात्र मिल्ने तर्क दिएका छन् । क्रिष्टल कञ्चनजंगामा भेटिएका लगानीकर्ता ऋषिराम खनालका अनुसार करको बारेमा लगानीकर्ता ठूलो दुविधामा रहेका कारण बजार बढ्न सकेको छैन । खनालले भने-‘साढे सात बाट ५ प्रतिशतमा कायम गरिएको कर अन्तिम कर हो भन्ने कुरामा लगानीकर्तालाई ठूलो दुविधा रहेको छ ।’ खनालले आगामी दिनमा सरकारले अर्को किसिमको कर थप्न सक्ने हो की भन्ने अन्योलमा लगानीकर्ता गुज्रीरहेको बताए । उनले बजेट आउँने बेलाका उत्साहहरु त्यसको कार्यान्वयनका पक्षले निराशामा बदल्ने गरेको बताए । यस्तै, बजारमा लिक्वीडिटीको फ्लो हुन आवश्यक रहेको बताएका छन् । हाल सेयर बजारमा लगानी गर्न चाहने लगानीकर्ताले समेत नपाई रहेको अवस्था छ । सो सन्दर्भ भने बैंक र पैसासँग जोडिने लगानीकर्ताले बताएका छन् । बम्परले पनि हटाएन त्रास बजेटले पुँजीगत लाभकर घटाएको भएपनि त्यसलाई नै अन्तिम करका रुपमा गणना गर्ने सुनिश्तिता नहुँदासम्म लगानीकर्तामा त्रास कायमै छ । सरकारले वर्षभरीको सेयर कारोबारबाट आर्जित नाफामा आयकर लगाउने वा नलगाउने भन्नेबारे अझै निर्णय गरिसकेको छैन् । हरेक कारोबारमा ५ प्रतिशत पुँजीगत लाभकर तिरेपछि बार्षिक रुपमा आर्जित नाफामा पुनः आयकर तिर्नु नपरोस् भन्ने लगानीकर्ताको माग छ । तर सरकारले अहिलेसम्म त्यस्तो कर लिने वा नलिने कुनै निर्णय नगरेकाले जुनसुकै दिन आयकरको लफडामा फसिने डरले लगानीकर्तालाई सताईरहेको छ ।
एशियन लाइफले हकप्रद सेयर बेच्न टेण्डर खोल्यो, कहिले भर्ने ?
काठमाडौँ । एशियन लाईफ इन्स्योरेन्स कम्पनी लिमिटेडले २ लाख २१ हजार कित्ता हकप्रद सेयर बिक्रीका लागि शिलबन्दी बोलपत्र(टेण्डर) आह्वान गरेको छ । कम्पनीले २०७५ चैत २५ गतेदेखि २०७६ बैशाख २९ गतेसम्म हकप्रद सेयर बिक्री खुला गरेको थियो । तर, माग बमोजिम आवेदन नपरेपछि उक्त परिमाणको हकप्रद सेयर टेण्डर गरी बिक्री गर्न लागेको हो । असार १ गतेदेखि असार ८ गतेसम्म शिलबन्दी बोलपत्र(टेण्डर) पेश गर्न सकिने बिक्री प्रबन्धक एनआइबिएल एस क्यापिटल लिमिटेडले जनाएको छ । धितोपत्र निष्काशन तथा बाँडफाँड निर्देशिका २०७४ को निर्देशन नम्बर १५ को प्रावधानलाई आधार मानी सेयरहरु बोलकबोल बढाबढ गरी बिक्री गर्न लागिको कम्पनीले जनाएको छ । उक्त सेयरहरु खरिद गर्न इच्छुक जो कोही व्यक्ति, कम्पनी, संघसंस्थाहरुले प्रति कित्ता के कति दर रेटमा लिन कबुल गर्ने हो, गोप्य शिलबन्दी बोलपत्र पेश गर्न सकिने कम्पनीले जनाएको छ । कम्पनीका अनुसार संस्थापक समूहतर्फको २४२०.७० कित्ता र सर्वसाधारण समूहतर्फको २१८९३९.०३ कित्ता गरी २२१३५९.७३ कित्ता सेयर बोलपत्रद्वारा बिक्री गर्न लागिएको हो । बिक्री प्रबन्धक एनआइबिएल एस क्यापिटल लिमिटेडका अनुसार एनआबीएल एस क्यापिटलका शाखाहरु, नेपाल इएन्भेष्टमेन्ट बैंक लिमिटेडका शाखा कार्यालयहरु नारायणगढ, हेटौँडा, बिर्तामोड, जनकपुर, तुल्सीपुर, दाङ, सुर्खेत, नेपालगञ्ज र धनगढी तथा ग्रीन डेभलपमेन्ट बैंक लिमिटेड बाग्लुङबाट बोलपत्र आवेदन फारम लिन र बुझाउन सकिने छ ।
