हिमालयन ट्राभल मार्ट शुरु, ‘नेपाल भ्रमण वर्ष २०२० लाई सफल पार्न सहयोगी’
काठमाडौँ । नेपाली पर्यटन क्षेत्रकै ठूलो मेलाका रुपमा लिइने ‘हिमालयन ट्राभल मार्ट’को तेस्रो संस्करण विहीबारदेखि काठमाडौँमा शुरु भएको छ । नेपाललाई हिमालय प्रवेशद्वार तथा साहसिक पर्यटनको केन्द्र एवं सबल पर्यटनमैत्री गन्तव्यका रुपमा विश्वसामु स्थापित गर्ने उद्देश्यका साथ सन् २०१७ देखि नेपालमा ‘मार्ट’ को आयोजना हुँदै आएको छ । संस्कृति पर्यटन तथा नागरिक उड्डयन मन्त्रालय, नेपाल पर्यटन बोर्ड, नेपाल वायुसेवा निगम, एवं पर्यटन क्षेत्रका विभिन्न सङ्घ–संस्थाको सहयोग, समन्वय तथा सहकार्यमा प्यासिफिक एशिया ट्रावल एशोसियशन (पाटा)ले सो ‘मार्ट’ आयोजना गर्दै आएको हो । प्रधानमन्त्री केपी शर्मा ओलीले मार्टको बिहीबार साँझ एक समारोहबीच उद्घाटन गरे । उनले हिमालयको देश नेपाल प्राकृतिक सौन्दर्य, जैविक विविधता तथा साहसिक पर्यटनको उत्कृष्ट गन्तव्य भएको बताए । उनले असिमिति पर्यटकीय ‘प्रडक्ड’लाई उजागर गर्न मार्ट उर्पयुक्त माध्यम भएको बताए , प्रधानमन्त्री ओलीले नेपालको आर्थिक समृद्धिमा पर्यटनको महत्वपूर्ण योगदान रहने र सरकारले समेत पर्यटनलाई उच्च प्राथमिकतामा राखेको बताए । सरकारले घोषणा गरेको नेपाल भ्रमण वर्ष २०२० लाई सफल पार्न समेत सहयोगी हुने विश्वास व्यक्त गरे । पर्यटन राज्यमन्त्री धनबहादुर बुढाले मार्टले सरकार पर्यटनको विकासको लागि प्रतिबद्ध रहेको बताउँदै मार्टले नेपाल भ्रमण वर्ष २०२० को प्रवद्र्धन गर्न सहयोग पुग्ने बताए । कार्यक्रममा पाटा नेपाल च्याप्टरका अध्यक्ष सुनिल शाक्यले हिमालयन ट्राभल मार्ट क्रमशः ब्राण्डिङ हुँदै आइरहको बताए । उनले नेपालको पर्यटन विकासको लागि पूर्वाधार विकास, नीतिगत सुधार तथा जनशक्ति विकासमा ध्यान दिन सरकारलाई आग्रह गरे । उनले नेपालको पर्यटन विकासमा निजी क्षेत्र सधै सक्रिय रहेको बताए । नेपाल पर्यटन बोर्डका प्रमुख कार्यकारी अधिकृत (सिइओ) दीपकराज जोशीले नेपाल पर्यटन उनले मार्ट देशकै प्रमुख अन्तर्राष्ट्रिय ‘ट्राभल ट्रेड’ मेलाको रुपमा स्थापित हुँदै गइरहेको र यसमा आयोजना गरिने ‘बी–टु–बी’ कार्यक्रमले नेपालको पर्यटन प्रवद्र्धनमा सहयोग पुगेको बताए । उनले मार्ट नेपालमा सार्वजनिक निजी साझेदारीको उपर्युक्त नमूना भएको बताए । पाटा इन्टरनेशनलका उपाध्यक्ष वोङ्ग सुन ह्वाले नेपालको विकासमा पर्यटन महत्वपूर्ण माध्यम भएको बताउँदै नेपालको पर्यटन विकासमा पाटा इन्टरनेशनल सधैँ साथमा रहेको बताए । मार्टमा पर्यटन क्षेत्रका विभिन्न राष्ट्रिय तथा अन्तर्राष्ट्रिय व्यक्तिबाट नेपालको पर्यटनका विविध पक्षमाथि अन्तरक्रिया तथा बी टु बी मिटिङ आयोजना हुने पाटा नेपाल च्याप्टरका महासचिव विभूति चन्द ठाकुरले जानकारी दिए । सम्मेलनमा नेपालसहित ४३ देशका करीब ७०० को सहभागिता छ । यसअघि सन् २०१७ मा ५३ देशका २२५ विदेशी प्रतिनिधि र सन् २०१८ मा सम्पन्न भएको ‘मार्ट’मा ३६ देशका १७० भन्दा बढी प्रतिनिधिको सहभागिता थियो । राजधानीमा शुरु भएको मार्ट आइतबारसम्म चल्ने छ । रासस
मेलम्चीको पाइपलाइन बिछ्याउने जग्गाको मुआब्जा ‘१५ दिनभित्र लिनू’
काठमाडौँ । मेलम्ची खानेपानी आयोजनाको खानेपानी ट्याङ्की निर्माण तथा पाइपलाइन बिछ्याउने कार्यको लागि भक्तपुरको सूर्यबिनायक ६(साविक कटुञ्चे गाविस) र मध्यपुर थिमी ९(साबिक निलबराही गाउँ पालिकाका) मा पर्ने १३ कित्ता जग्गाका धनी र मोहीहरुले मुआब्जा पाउने भएका छन् । काठमाडौँ उपत्यका खानेपानी व्यवस्थापन बोर्डको नाममा जग्गा प्राप्त गर्नका लागि लागि मुआब्जा निर्धारण समितिको बैशाख ३१ गतेको निर्णय अनुसार मुआब्जा वितरण गर्न लागिएकाले १५ दिन भित्र सम्पर्क गर्न जिल्ला प्रशासन कार्यालय भक्तपुरले जनाएको छ । साबिको कटुञ्चेका विश्वराम सुवाल, उत्तम/पुष्पलाल/उद्धव/गौतम सुजखु, विष्णुकेहरी/रविभुषण/तारा/श्रीभुषण सुजखु, बासुनारायण सुवाललाई मुआब्जा लिन आउन सूचित गरिएको छ । त्यसैगरी साबिकको निलबहारीका बाबुकाजी, रामबहादुर, कान्छीमाया राजबाहक, ललिता राजबाहक, कान्छी राजबाहक, बेदभक्त/पञ्चकृष्ण श्रेष्ठ, श्यामकुमार राजबाहक र मिश्रीमाया राजबाहकलाई जग्गाधनी/मोहीहरुले आ–आफ्नो हकदैया वा भोगचलन सम्बन्धी निस्सा प्रमाणपत्र सहित मुआब्जा बुझिलिन काठमाडौँ उपत्यका खानेपानी व्यवस्थापन बोर्ड, भैसेपाटीमा सम्पर्क गर्न जिल्ला प्रशासन कार्यालयले सूचना प्रकाशित गरी जनाएको छ ।
कलंकी-महाराजगञ्ज सडक क्षेत्रमा पर्ने संरचना नहटाए भत्काइने
काठमाडौँ । कलंकीदेखि महाराजगञ्जसम्मको चक्रपथ सडक क्षेत्रभित्र रहेका स्थायी वा अस्थायी संरचनाहरु १५ दिन भित्र नहाटाए भत्काइने भएको छ । सडकको केन्द्रबिन्दुबाट दायाँबाँया दुबैतर्फ ३१–३१ मिटर सम्मको सडक सीमा कायम गरिएको छ । सो क्षेत्रभित्र पर्ने घर, टहरा, घुम्ती, बिग्रिएका सवारी, हार्डवेयर पसलका सामान र अन्य प्रकृतिका पसल राख्न काठमाडौँ चक्रपथ सुधार आयोजनाले निषेध गरेको छ । त्यस्ता संरचना १५ दिनभित्र हटाएर सडक खाली नगरे सार्वजनिक सडक ऐन २०३१ को दफा १८ बमोजिम काठमाडौँ उपत्यका विकास प्राधिकरण, जिल्ला आयुक्तको कार्यालयले भत्काउने जनाएको छ । त्यसरी भत्काउँदा लाग्ने खर्च समेत सम्बन्धित संरचना धनीहरुसँग असुलउपर गरिने चक्रपथ सुधार आयोजनाले जनाएको छ ।
५ रोडा ढुंगा उद्योगले कर तिरेनन्, राजश्वले सञ्चालकको घरजग्गा रोक्का गर्ने
काठमाडौँ । आन्तरिक राजश्व कार्यालय कलंकी काठमाडौँले धादिङ जिल्लाका ५ वटा रोडा ढुंगा उद्योगलाई मूल्य अभिबृद्धि कर(भ्याट) बुझाउन ताकेता गरेको छ । लामो समयसम्म बुझाउनु पर्ने बक्यौता नबुझाएको कार्यालयले जनाएको छ । अबको ७ दिनभित्र बक्यौता नबुझाए मूल्य अभिबृद्धि कर ऐन २०५२ को दफा २१ बमोजिम व्यवसायिक कारोबार रोक्का, बैंक खाता रोक्का र घरजग्गा रोक्का गर्ने जनाएको छ । धादिङ जिल्लाको थाक्रे १० मा रहेको माछापुछ्रे रोडा ढुंगा उद्योग, सोही स्थानमा रहेको शिलादेवी रोडा ढुंगा उद्योग, थाक्रे ४ को गोरखकाली स्टोन एण्ड स्याण्ड इण्डष्ट्रिज प्रालि, थाक्रे २ को मनकामना रोडा ढुंगा उद्योग र थाक्रे ७ को थाक्रे कालीका रोडा ढुंगा उद्योग प्रालिले लामो समयसम्म कर नतिरेका हुन् । ती उद्योगका सञ्चालकहरु क्रमशः इन्द्रबहादुर न्यौपाने, रामबहादुर राई, दिलबहादुर श्रेष्ठ, सुब्बा रेग्मी÷बलराम रेग्मी र सरिता कार्कीलाई कर बुझाउन नआए ७ दिनपछि नै कारवाहीको प्रक्रिया थाल्ने राजश्व कार्यालयले जनाएको छ ।
हावाहुरीका कारण दुईको मृत्यु, एक सयभन्दा बढी घाइते
धनगढी । भीषण हावाहुरीले कैलाली र कञ्चनपुरमा दुईको मृत्यु हुनुका साथै ठुलो क्षति भएको छ । क्षतिको पूर्ण विवरण नआए पनि उक्त हावाहुरीमा परेर एक सयभन्दा बढी मानिस घाइते भएको प्रारम्भिक विवरण प्राप्त भएको छ । कैलालीको गोदावरी नगरपालिका–८ मा हावाहुरीको समयमा टिपरसँग से२१प ५८२१ नंको मोटरसाइकल ठोक्किँदा मोटरसाइकल चालक सोही ठाउँका वीरबहादुर चौधरीको मृत्यु भएको प्रहरीले जनाएको छ । त्यसैगरी टिकापुर नगरपालिका–२ स्थित पोल्टीफार्म भत्किँदा त्यसमा च्यापिएर ४७ वर्षीय लहानु डगौराको मृत्यु भएको जिल्ला प्रहरी कार्यालयका प्रहरी निरीक्षक प्रकाश डाँगीले बताए । हावाहुरीको समयमा घरका जस्तापाता लागेर, रुख तथा बिजुलीका खम्बा लागेर कैलालीका विभिन्न ठाउँमा ७६ जना घाइते भएका उनले जानकारी दिए । घाइतेमध्ये गोदावरी नगरपालिकाका जनक मल्ल, गौतम मल्ल, धनगढीका सरिता जोशी र सिक्नटा चौधरी गम्भीर घाइते भएका छन् । घाइते जनक र गौतमको सेती अञ्चल अस्पतालमा उपचार भइरहेको छ भने जोशी र चौधरीलाई थप उपचारका लागि भारत सिफारिश गरिएको छ । अन्य ७२ जना घाइतेको सेती अञ्चल अस्पतालका साथै निजी स्वास्थ्य संस्थामा उपचार भइरहेको प्रहरीले जनाएको छ । हावाहुरीका कारण भएको धनजनको क्षति विवरण आउन अझै बाँकी रहेको प्रहरीले जनाएको छ । बिजुली खम्बा भाँचिएको, ठाउँ ठाउँमा रुढ ढलेका कारण विद्युत् सेवा ठप्प छ भने कतिपय क्षेत्रका सडकमा आवागमन अबरुद्ध भएको छ । हावाहुरीमा फसेका र घाइतेको उद्धारमा तत्काल नेपाली सेना, सशस्त्र प्रहरी तथा नेपाल प्रहरीको टोली परिचालित भएको थियो । यसैगरी कञ्चनपुरको बेदकोट नगरपालिका र भीमदत्त नगरपालिकामा गरी हावाहुरीका कारण २३ जना घाइते भएका छन् । घाइतेमध्ये आठ जनाको सेती अञ्चल अस्पताल कैलालीमा उपचार भइरहेको छ । तीमध्ये एक जना सख्त घाइते छन् । अन्य १५ जनाको महाकाली अञ्चल अस्पतालमा उपचार भइरहेको जिल्ला प्रहरी कार्यालय कञ्चनपुरका प्रहरी नायब उपरीक्षक ज्ञानबहादुर विष्टले जानकारी दिए । ठाउँ ठाउँमा बिजुलीका पोल ढलेका कारण विद्युत् सेवा अवरुद्ध भएको छ । जिल्लाको दक्षिण क्षेत्र जोड्ने बेलौरी–कलुवापुर सडकका ठाउँठाउँमा रुख ढलेका कारण यातायात अवरुद्ध छ । त्यसैगरी डडेल्धुराको जोगबुडा जोड्ने दैजी–जोगबुढा सडक पनि अवरुद्ध छ । जस्तापाता, टायल र खरका छाना भएका घरका छाना उडाएका कारण ठूलो क्षतिभएको जिल्ला प्रहरी कार्यालयले जनाएको छ । हावाहुरीका कारण जिल्ला कारागार शाखा महिला युनिटको भान्साको छाना उडाएको छ भने जिल्ला अस्थायी प्रहरी पोष्टमा समेत क्षति पुगेको छ । रासस
चितवन र धादिङको सिमानामा पर्ने मौवाखोलामा पहिरो, पृथ्वी राजमार्ग अवरुद्ध
चितवन । पृथ्वी राजमार्गको मुग्लिन नौबिसे सडकखण्डमा आज बिहान पहिरो खस्दा सडक अवरुद्ध भएको छ । चितवन र धादिङको सिमानामा पर्ने मौवाखोलामा पहिरो खसेको हो । जिल्ला प्रहरी कार्यालयले दिएको जानकारीअनुसार बिहान ३ः३० बजे पहिरो खसेको थियो । बिहानैदेखि पहिरो पन्छाउने काम भइरहेको प्रहरीले जनाएको छ । सडक अबरुद्ध भएपछि सयौँ सवारीसाधन जाममा रोकिएका छन् । रासस
कर्मचारीका नेता भन्छन्ः घुस लिन लगाउने हाकिमको पोल खोल्छौं
काठमाडौं । कर्मचारीका नेताहरुले घुस लिन लगाउने हाकिमहरुको पोल खोल्ने चेतावनी दिएका छन् । संकलित घुसको ठुलो हिस्सा माथिल्लो तहका हाकिमले लिने गरेको तर तल्लो तहका कार्मचारी मात्रै बदनाम भैरहेकाले घुस संकलन गर्न लगाउने हाकिमहरुको पोल खोल्ने समय आईसकेको नेताहरुले बताएका हुन् । ‘अब कस्को आदेशले खुस संकलन गरिएको हो, तिनको पोल खोल्ने समय आएको छ, तपाईहरु त्यसै गर्नुस’, नेपाल राष्ट्रिय कर्मचारी संगठन–निजामतिका अध्यक्ष हरि रावलले भने । उनले घुस काण्डमा हालसम्म अधिकृत भन्दा माथीका कर्मचारी विरलै फस्ने गरेको पनि बताए । ‘साना कर्मचारीले मात्रै खुस खाएका छन् र ? के ठुला कर्मचारीले घुसै खाँदैनन्, अब वास्तविकता बाहिर ल्याउने समय भएको छ’, रावलले भने । तल्लो तहका कर्मचारी मार्फत घुस संकलन गरेर माथिल्लो तहका कर्मचारीले ठुलो हिस्सा लिने गरेको बताए । ‘तल्लो तहका कर्मचारी मार्फत घुस संकलन गरेर ठुलो हिस्सा माथिल्लो तहकाले खान्छन्, बदनाम हुने र जेल जानुपर्ने चाँही तल्लो तहका कर्मचारी मात्रै भए’, अध्यक्ष रावलले भने । आधिकारिक ट्रेड युनियनका नेताहरुले पनि साना कर्मचारीहरु घुस काण्डमा धेरै फसिरहेकोमा दुःख व्यक्त गरे । आफ्नो तेश्रो राष्ट्रिय भेलाबाट उनीहरुले घुस खुवाउने सेवाग्राहीलाई पनि कारवाही गर्नुपर्ने माग अघि सारेका हुन् । ‘हामी घुस खाने कर्मचारीलाई मात्रै होइन, अब घुस खुवाउने सेवाग्राहीलाई पनि कारवाही गर्नुपर्छ, ति राष्ट्रघाती हुन’, आधिकारीक ट्रेड युनियनका उपाध्यक्ष भोलानाथ पोखरेलले भने । उनले न्युनतम वेतनमा काम गर्ने कर्मचारीहरुलाई घुस दिएर बदनाम गराउनेहरु राष्ट्र घाति भएको आरोप पनि लगाए । आधिकारीक ट्रेड युनियनका अध्यक्ष पुण्य प्रसाद ढकालले पनि साना कर्मचारीहरुको अधिकारका लागि थप संघर्ष आवश्यक रहेको बताए । ‘साना कर्मचारीहरु घुस काण्डमा फसिरहेका छन्, पैसा चाँही ठुलाले खान्छन्, फस्ने चाँही साना मात्रै अब बोल्नुस’, अध्यक्ष ढकालले भने । कर्मचारी युनियनले ४० बुँदे माग पत्र समेत अघि सारेको छ । करारमा नियुक्त गरिएका कर्मचारीहरुलाई एक मुष्ठ स्थायी गरेर नयाँ करार बन्द गर्नुपर्ने उनीहरुको माग छ । त्यस्तै, सरकारले करारमा कर्मचारी नियुक्त गर्ने कानुनी व्यवस्था अघि सार्न लागेको भन्दै बिरोध समेत गरेका छन् । उनीहरुले प्रदेश र स्थानीय तहमा समायोजन गरिएका कर्मचारीहरुलाई संघमा आउने बाटो खुल्ला गरिनुपर्ने माग पनि अघि सारेका छन् ।
प्रदेश समन्वय परिषद्को बैठक सर्यो, जेठ २८ र २९ गते हुने
हेटौंडा । ३ नम्बर प्रदेशको प्रदेश समन्वय परिषद्को बैठक सरेको छ । प्रदेश सरकारले हेटौंडामा गर्न लागेको प्रदेश समन्वय परीषद् बैठक पाँच दिन पछि सारिएको हो । प्राबिधिक कारणबस बैठक स्थगित गरिएको समन्वय परिषद् बैठक पाँच दिन पछी सञ्चालन गरिने प्रदेश नम्बर ३ का प्रमुख सचिब आनन्दराज ढकालले जानकारी दिए । सरकारले यही जेठ २४ र २५ गते हेटौंडामा बैठक सञ्चालन गर्ने जानकारी दिएको थियो । बैठक अब यहि जेठ २९ र ३० गते हेटौंडाको क्लब हेटौंडाको हलमा विहान ७ बजेटबाट हुने मुख्यमन्त्री तथा मन्त्रिपरिषदकोे कार्यालयले जनाएको छ । बैठकका लागि सबै तयारी पूरा भएपनि कारणबस सार्नुपरेको प्रमुख सचिब ढकालले जानकारी दिए । समन्वय परिषद बैठकमा प्रदेशका १३ वटा जिल्लाका जिल्ला समन्वय समिति तथा स्थानीय निकायका प्रमुख तथा उपप्रमुखहरु सहभागी हुने छन् ।
