विद्युतीय सवारी साधन सञ्चालन गर्ने सरकारको निर्णयलाई सुन्दर यातायातले गर्यो स्वागत
काठमाडौं । सुन्दर यातायात प्रा.लि. ले नेपालमा विद्युतीय सवारी साधन सञ्चालनमा ल्याउने नेपाल सरकारको निर्णयलाई स्वागत गरेको छ । सरकारले मन्त्री परिषदको गत जेठ १३ गतेको निर्णय अनुसार सवारी साधान आयात निर्यात कार्य योजना पारित गर्दै विद्युतीय सवारी साधन प्रयोग गर्न प्रोत्साहन गरेको हो । उक्त सवारी साधान सञ्चालन गरी आफ्नो देशको उत्पादित विद्युतबाट सञ्चालित हुने वातावरण मैत्री सवारीसाधन खरीद गर्दा बैंकले ९० प्रतिशतसम्म फाइनान्स गर्न केन्द्रित बैंकलाई नेपालको सरकारको निर्देशन जारी भएको छ । उक्त निर्देशन जारी भई कार्यान्वयनमा गर्न नेपाल राष्ट्र बैंकले सम्पूर्ण बैकहरुलाई परिपत्र समेत जारी भइसकेको छ । साथै, प्रधानमन्त्रीबाट विद्युतीय सवारी साधन, सार्वजनिक बस तथा अन्य विद्युतीय सवारी साधान समेत प्रयोग गर्न गरीएको प्रोत्साहनलाई छिटोभन्दा छिटो कार्यान्वयनमा ल्याउन सुन्दर यातायातले ध्यानाकर्षण गरेको छ । त्यस्तै, विद्युतीय सवारी साधनमा रहेको झन्झटिलो र दररेट तथा भाडादर र नीति नियम समेत कार्यान्वयनमा ल्याउन यातायातले आशा गरेकाे छ ।
३ घण्टा बढी काम गर्दैन सनक्रिम, गोरो छालालाई क्यान्सर हुने सम्भावना बढी: डा. स्मृति श्रेष्ठ
काठमाडौं। झरीको मौसम होस् वा चहकिलो घाम लागेको दिन, जाडो होस् वा गर्मी केही समय बाहिर बिताउँदा तपाईको संवेदनशिल छालालाई असर गर्ने गर्दछ। हामीलाई पहिलैबाट सनस्क्रिन क्रिम प्रयोग गर्नुपर्छ भन्ने सुन्दै आएका छौं तर अझै पनि यसले कसरी काम गर्छ र हाम्रो छालालाई कसरी बचाउँछ भन्ने कुरामा हामी अस्पस्ट छौं। घाममा हाम्रो छालाको मिल्ने साथी भनेर सनस्क्रिनलाई भनिन्छ। सनस्क्रिन क्रिमको प्रयोगले छालालाई धेरै हदसम्म घामका नकरात्मक विकिरणको प्रभावबाट बचाउँछ। घामका किरणहरु देखिने र नदेखिने हुन्छन्। त्यसमा धेरै मात्रामा युभी रे हुने गर्दछ। यि विकिरणहरुले सिधै छालाको बाहिरी सतहलाई असर पार्दै छालाको कोशीकाहरुको बिकास दरमा प्रभाव पार्दछ। घामको किरण र छाला सम्पर्कमा आउँदा छाला डड्नुको साथै पछि गएर छाला चाउरिने, बिग्रिने र छालाको क्यान्सर पनि हुनसक्ने सम्भावना हुन्छ। हाम्रो छाला हाम्रो शरीरको संवेदनशिल भाग हो। घामको प्रत्यक्ष प्रभाव जहिले पनि छालालाई परिरहेको हुन्छ। लामो समयसम्म घामसँग छाला सम्पर्कमा रहँदा छालामा रातो डाबरहरु देखिने, चिलाउने, फोका जस्तो आउने गर्दछ। कसरी सनस्क्रिन क्रिम छान्ने ? बजारमा धेरै संख्यामा विभिन्न ब्राण्डका सनस्क्रिन क्रिमहरु पाइने गर्दछ। त्यसमा कुन हाम्रो छालाको लागि उपयुक्त हुन्छ भन्ने हामीले प्रयोग गरेपछी मात्र थाहा पाउन सक्छौं। त्यसमाथी बजारमा नक्कली ब्राण्डका ब्युटी प्रडक्ट छ्यापछ्यापती पाईन्छन् जसकारण हामी अझै धेरै सजक रहनुपर्छ। यसमा हाम्रो राम्रो छनोट हुन सक्छ मेडिकेटेड सनस्क्रिन क्रिम। यो सजिलै औषधी पसलमा पाउन सकिन्छ। तपाईले औषधी पसलको मानिससँग आफ्नो छालाको प्रकारको बारेमा बुझेर त्यही अनुरुप म्र्डिकेटेड सनस्क्रिन प्रयोग गर्न सक्नुहुन्छ। मेडिकल सनस्क्रिनमा किन्दा हामीले उक्त सनस्क्रिनमा भएको तत्वो र त्यसको एसपिएफ हेर्नुपर्ने हुन्छ। एसपिएफ भन्नाले घामको संरक्षण कारक ब्र्टिस असोसेसियन अफ डर्मेटोलोजिस्टको अनुसार एउटा सनस्क्रिनको एस्पिफ कम्तिमा पनि ३० भन्दा कम एसपिएफको प्रयोग नगर्नु भन्दछ। यस्तै एसपिएफ ५० भन्दा माथिका बजारमा पाईने सनस्क्रिन क्रिमको प्रयोग नगर्न छाला रोग बिशेषज्ञहरु बताउँछन्। धेरै सनस्क्रिनहरुले प्रयोग गरेको आधाघण्टामा आफ्नो काम गर्न थाल्दछ भने केहीले प्रयोग गरेको ५ मिनेटमै आफ्नो काम सुरु गर्दछ। यस्तै कुनै पनि सनस्क्रिन क्रिमले ३ घण्टा भन्दा लामो समय काम भने गर्दैन। त्यसैले दिनमा ३ पटक समय मिलाएर हामीले सनस्क्रिन आफ्नो छालामा प्रयोग गर्नुपर्छ। यो एक पटक लाउँदा आदा चम्चा देखी एक चम्चा लगाउनु पर्दछ। यो अन्य मोस्टराईजर क्रिम जस्तो थोरै प्रयोग गरेर काम गर्ने क्रिम भने होईन। साथै कुनै पनि सनस्क्रिन पूरा सुरक्षा भने होईन त्यसैले घरबाहिर जाँदा जहिले पनि तपाई छालामा सनस्क्रिन र हातमा छाता बोकेर निस्किनुहोला। गोरो छालालाई क्यान्सर हुने सम्भावना बढी तपाईको छालाको रङले तपाईको छालालाई घामको किरणले कत्ति असर गर्छ र गर्दैन भन्ने निर्घारण गर्दछ। सबै प्रकारको छालालाई घामका विकिरणहरुले प्रभाव पार्ने भएता पनि गोरो छाला भएका मानिसलाई कालो छाला भएका मानिसको दाँजोमा बढी प्रभाव पार्ने गर्दछ। कालो छालामा मेलानोसाईट्स भन्ने तत्वो बढी हुनेगर्छ जसले मेलानिन उत्पादन गर्दछ। मेलानिन यस्तो तत्वो हो जसले युभी रे हरुलाई रोक्ने गर्दछ जसकारण कालो छाला भएका मानिसहरु घाममा सजिलै डढ्छन् तर घामको विकिरणको प्रभाव कम हुने गर्दछ। मेलानिन बढी भएको कारण कालो छाला भएका मानिसहरुको गोरो छाला भएका मानिसको दाँजोमा कम चाउरी पर्ने र क्यान्सर हुने सम्भावना कम हुन्छ। ( छाला रोग बिशेषज्ञ डा. स्मृति श्रेष्ठसँगको कुराकानीमा आधारित )
परियोजनामा खर्च भएको ४० अर्ब सरकारलाई शोधभर्ना हुन बाँकी, चालु आवमा दाताले तिरे ५७ अर्ब
काठमाडौं । सरकारले चालु आर्थिक वर्षको १० महिनामासम्म विकास साझेदाबाट संचालित परियोजनामा खर्च भएको कुल ९६ अर्ब ४१ करोड ९८ लाख रुपैयाँमध्ये अझै ३९ अर्ब ७५ करोड ८८ लाख रुपैयाँ उठाउन बाँकी रहेको छ । विकास साझेदारबाट विभिन्न परियोजनामा खर्च भएको रकममध्ये चालू आवमा ५६ अर्ब ६६ करोड प्राप्त भएपनि अझै करिब ४० अर्ब रुपैयाँको शोधभर्ना हुनबाँकी रहेको महालेखा नियन्त्रक कार्यालयका सह लेखानियन्त्रक रुद्र भट्टले बताए । गएको आर्थिक वर्ष भन्दा चालु आवको शोधभर्ना भुक्तानी छिटो भएको उनले बताए । ‘अझै ३९ अर्ब ७५ करोड रुपैयाँ शोधभर्ना हुन बाँकीरहेको कार्यालयले जानकारी दिएको छ । शोधभर्ना हुन बाँकी रहेको रकममध्ये १३ अर्ब ३५ करोड १२ लाख अनुदान हो भने २६ अर्ब ४० करोड ऋण हो । गएको आवको अन्त्यसम्म ४८ अर्ब ५९ करोड ८५ लाख शोधभर्ना हुन बाँकी रहेको थियो । यो अवधिमा दातृनिकायबाट संचालित आयोजनामा खर्च भएको ४७ अर्ब ८२ करोड समेत जोडिदा करिब एक खर्ब शोधभर्ना पुग्ने देखिएकोमा आधाभन्दा बढी रकम शोधभर्ना भएको हो । विकास साझेदाबाट संचालित परियोजनाले समयमा प्रतिवेदन तयार नबुझाउदा शोधभर्ना ढिला भएको हो । सामान्यतया आर्थिक वर्ष समाप्त भएको तीनमहिनामा परियोजना खर्चको विवरण बझाइ सक्नुपर्ने व्यवस्था छ । अर्थमन्त्री डा. युवराज खतिवडाले यहि जेठ १ गते विकास साझेदासँगको छलफलमा जतिसक्दो छिटो शोधभर्ना गरिदिन आग्रह गरेका थिए । दातृ निकायहरूको सहयोगमा निर्माण भइरहेका केही पूर्वाधार परियोजनाको शोधभर्ना समयमा नहुँदा ठेकेदार कम्पनीले काम रोक्ने गरेका छन् । पछिल्लो समयमा राष्ट्रिय गौरवको गौतम बुद्ध अन्तर्राष्ट्रिय विमानस्थलका ठेकेदारले भूक्तानी नपाएको भन्दै काम ठप्प पारेका थिए ।
नेपाल र युएईबीच श्रम सम्झौता, वार्षिक ३० दिनका दरले उपदान पाउने
काठमाडौं । नेपाल र युएईबीच शुक्रबार श्रम समझदारी पत्रमा हस्ताक्षर भएको छ । स्विट्जरल्याण्डको जेनेभामा सम्पन्न बिशेष कार्यक्रमबीच नेपालका तर्फबाट श्रम, रोजगार तथा सामाजिक सुरक्षामन्त्री गोकर्ण विष्ट र युएईका मानव संशाधन मन्त्री नासेर थानी अल हम्लीले सो समझदारीपत्रमा हस्ताक्षर गरेका हुन् । श्रम समझदारीका विशेषताहरु: श्रम समझदारीमा सन् २००७ पछि श्रम आप्रवासनका क्षेत्रमा राष्ट्रिय र अन्तराष्ट्रियस्तरमा आएका मुलभूत मान्यता र सिद्धान्तमा परिवर्तनलाई आत्मसाथ गरी समझदारी पत्रलाई समयानुकुल बनाउन जरुरी देखिएको उल्लेख छ । कामदारको छनौट, भर्नाका सन्दर्भमा लाग्ने सबै शुल्क एवम् लागत रोजगारदाताले नै व्यहोर्नु पर्ने समझदारीमा उल्लेख छ । श्रम समझदारीमा रोजगारदाताको कमि कमजोरीका कारण कामदार वेरोजगार हुनुपर्ने अवस्था आएमा कामदारले वैकल्पिक रोजगारीको खोजी गर्ने सक्ने, कामदारलाई ज्याला, ओभरटाइम भत्ता, कार्य वातारण र न्यायमा पहुँच जस्ता विषयमा विभेद गर्न नपाइने र सबै विदेशी श्रमिकलाई समान व्यवहार हुनुपर्ने मान्यतालाई स्थापित गरिएको, महिला कामदारका लागि श्रमिक कल्याण र सुरक्षाका विशेष उपायहरु सुनिश्चित गर्नुपर्ने उल्लेख छ । राहदानी लगायत व्यक्तिगत परिचय सम्बन्धि कागजात श्रमिककै साथमा रहन पाउने व्यवस्थाको सुनिश्चितता तथा कामदारकको दुःखद मृत्यु हुन पुगेको अवस्थामा शव छिटो साधनद्वारा नेपालमा ल्याउन लाग्ने सम्पूर्ण लागत रोजगारदाताले नै व्यहोर्नु पर्ने, सेवा सुविधा तत्कालै भुक्तानी गर्नुपर्ने र बिलम्व गर्न नपाईने व्यवस्थाको सुनिश्चित रहेको छ । कामदार र रोजगारदाता बीच विवाद उत्पन्न भै अदालतमा मुद्दा परी विचाराधीन रहेको अवस्थामा कामदारलाई कुनै लागत वा शुल्क नलाग्ने गरी कानूनी उपचारको प्रत्याभूति गरिएको, त्यस्तो अवस्थामा कामदारले कानून बमोजिम अस्थायी श्रम स्वीकृतिका लागि आवेदन गर्ने सक्ने उल्लेख छ । समझदारीपत्रको प्रभावकारी कार्यान्वयन र कामदारको भर्ना, रोजगारी र फिर्ता सम्बन्धी विषयमा लाग्ने आइटमगत लागत निर्धारण गर्ने लगायतका विषय दुई देशका प्रतिनिधिहरु संलग्न संयुक्त वैठकबाट तय गरिने, व्यवसायजन्य दुर्घटना वा रोग लागेमा त्यसको उपचारमा लाग्ने सम्पूर्ण खर्च रोजगारदाताले नै व्यहोर्नु पर्नेछ । पाँच बर्ष सम्मको सेवा अवधिका लागि हरेक वर्षको सेवा वापत २१ दिनका दरले र सो भन्दा बढि सेवा अवधिका लागि वार्षिक ३० दिनका दरले उपदान पाउने व्यवस्था सुनिश्चित गरिएको, गन्तव्य मुलुकको कानूनमा कामदारको हित अनुकुल हुने गरी संशोधन भएमा सो व्यवस्था कामदार र रोजगारदाता बीच सम्पन्न करारमा स्वत लागू हुने व्यवस्था गरेको गरिएको छ ।
सञ्चालक सर्वसम्मत भएपछि कुमारीका शेयरधनी उत्साहित, ‘बैंकिङ इतिहासमै नौलो प्रयोग’
काठमाडौं । कुमारी बैंक लिमिटेडले ४ जना नयाँ सञ्चालक पाएको छ । सञ्चालकहरुको चुनाव गर्नकै लागि बोलाइएको विशेष साधारण सभाले संस्थापक र सर्वसाधारण शेयरधनीका तर्फबाट २/२ जना गरी ४ जना सञ्चालक सर्बसम्मत रुपमा चयन गरेको हो । बैंकमा अमिरप्रताप राणा, कृष्ण ज्ञवाली र सर्वसाधारण समूहबाट महेश पोखरेल र अनुराधा चौधरी चयन भएका हुन् । विज्ञ समूहका तर्फबाट गणेशकुमार पाठक भने सञ्चालकमा यथावत छन् । सञ्चालक समितिमा महिला सुनिश्चितताको मागसहित पाटन उच्च अदालतमा परेको मुद्दा जेठ १० गते खारेज भएसँगै बोलाइएको बैंकको साधारणसभामा ३६६ जनाको उपस्थितिसहित ५३.१४ प्रतिशत शेयरधनीको प्रतिनिधित्व थियो । कोरम नपुगेर पटकपटक साधारणसभा रोकिने स्थितिमा तोकिएको समयभित्र सबै उपस्थित हुनु र सभामा उल्लेखनीय प्रतिनिधित्व हुनलाई सभामा बोल्ने अधिकांशले खुसी व्यक्त गरेका छन् । सभामा बोल्ने अमृतनाथ रेग्मी, अशोक उप्रेती, कुवेर श्रेष्ठ, डम्मरबल्लभ घिमिरे लगायतले यसमा प्रशंसा गर्दै सर्वसम्मत गराउन पहल गर्ने सञ्चालक समितिका निवर्तमान अध्यक्षलाई धन्यवाद दिए । श्रेष्ठले ‘सिरान फेर्दैमा बिरामी निको नहुने’ भन्दै नयाँ सञ्चालकहरुलाई कार्यशैली फेर्न सुझाव दिए । उनले नयाँ समिति आफ्ना शेवा सुविधा बढाउन नलागेर शेयरधनीको हितमा काम गर्न सुझाव दिँदै भने- ‘आफू धनी बन्ने होइन, शेयरधनीलाई धनी बनाउन लाग्नुस् ।’ घिमिरेले कुमारी बैंक सञ्चालक समिति सर्वसम्मत हुँदा नूरप्रताप राणाको सपना पूरा भएको रुपमा अथ्र्याए । उनले १७ औं र १८ औं साधारणसभा एकैपटक गरेपनि सञ्चालक चयन गर्न विशेष साधारणसभा बोलाउनुपरेको भन्दै भने- ‘बैंकको निधारमै दुईचोटी साधारणसभा लेखिएको रहेछ ।’ कुमारी बैंकले बैंकिङ इतिहासमै सञ्चालक समितिलाई ५ जनामा सीमित गरेको छ । त्यस्तै कम्पनी ऐनमा रहेको व्यवस्था बमोजिम बैंकले सञ्चालक समितिमा एकजना महिलाको प्रतिनिधित्व पनि सुनिश्चित गराएको छ । कुमारी बैंकका प्रमुख कार्यकारी अधिकृत सुरेन्द्र भण्डारीले बैंक पुरानो पुस्तावकाट नयाँ पुस्तामा सरेको बताउँदै अब बैंक नयाँ जोशका साथ अघि बढ्ने बताए । उनले भने- ‘तर हामी यत्तिकै बसेका थिएनौं विगत केही वर्षमा हामीले सफ्टवेयर बनायौं, पोर्टफोलियो दोब्बर बनायौं, ४ ओटा संस्थालाई गाभ्यौं ।’ उनले बैंकसँग केही समस्या र गुनासो भए सीधै आएर आफुसँग भन्न समेत शेयरधनीहरुलाई आग्रह गरे ।
सधैं नरम देखिने गभर्नर किन भए आक्रोशित ? ‘फोर्स मर्जरमा नजाने भए एक महिनाभित्र गाभिनुस्’
काठमाडौं । नेपाल राष्ट्र बैंकका गभर्नर चिरञ्जीवी नेपाल सबैजसो सार्वजनिक कार्यक्रममा नरम रुपमा प्रस्तुत हुन्छन् । धेरैजसो औपचारिक कार्यक्रममा लिखित मन्तव्य दिएर बिदा हुने शुक्रबार भने शुक्रबारको भाषणका क्रममा भने कुनै कागज लिएर उभिएनन् , बरु उनी लघुवित्त कम्पनीले बजारमा गरेका आलोचनाहरुप्रति बढी आक्रोशित देखिए । आईबीएन मिडिया एण्ड रिसर्चले गरेको कार्यक्रममा गभर्नर नेपालले माइक्रोफाइनान्सका सञ्चालकहरुलाई शेयर बजारमा चलखेल गरेको अप्रत्यक्ष आरोप समेत लगाए । लघुवित्त कम्पनीको कार्यसम्पादनका आधारमा बजारमूल्य एकदमै उच्च भएको बताउँदै गभर्नर नेपालले बजारमा अवान्छित गतिविधि नगर्न समेत आग्रह गरे । ‘तपाईँहरु पनि त मान्छे हो, सोच्नुस् न, एउटा कमर्शियल बैंकको शेयरमूल्य दुई सय, गरिब निमुखालाई ऋण दिने एउटा माइक्रोफाइनान्सको मूल्य ४०००/५०००, यो त साह्रै भएन हाम्रोजस्तो देशमा’ गभर्नर नेपालले भने । गभर्नर नेपालले लघुवित्त कम्पनीहरुको बजार गतिविधि अवान्छित भएको र शेयर कर्नरिङ गरेर अस्वाभाविक मूल्यवृद्धि गरेको संकेत गर्दै उनले अब मर्जरको लघुवित्तहरुमा मर्जरको विकल्प नभएको बताए । गभर्नर नेपालले मौद्रिक नीतिमार्फत् लघुवित्तलाई फोर्स मर्जरमा लैजाने व्यवस्था गर्ने प्रष्ट पार्दै त्यसो नगर्ने भए एक महिनाको अवधिभित्र आफैं मर्जरमा जान उत्साहित भएको अनुभव राष्ट्र बैंकलाई गराउन लघुवित्त कम्पनीहरुलाई चुनौती दिए । ‘तपाईँ हामीलाई स्टेप लिन बाध्य नपार्नुस्, सेन्ट्रल बैंकले एकचोेटी स्टेप लिएपछि लियो लियो, धेरैतिर रुँदै नहिँड्नुस्, विभिन्न नेताकहाँ नचार्नुस्, हामी कसैको कुरा सुन्दैनौं, कि अहिले एक महिनाभित्र मिल्नुस्’ उनले भने । गभर्नर नेपालले गैरबैंकिङ क्षेत्रको अवान्छित गतिविधिको कारण राष्ट्र बैंकले सबै गैरबैंकिङ संस्थाहरुलाई समेत नियमनको दायरामा ल्याउन खोजेको प्रष्ट पारे । गभर्नर नेपालले आफ्नो यो कार्यकालको अन्तिम मौद्रिक नीति सार्वजनिक गर्दैछन् । यसअघि २ अर्ब चुक्ता पुँजी भएको वाणिज्य बैंकहरुलाई ८ अर्ब पुर्याएका नेपालले अब लघुवित्त संस्थालाई मर्ज गराउने र गैरबैंकिङ संस्थालाई समेत नियमनको दायरामा ल्याउनेगरी व्यवस्था गर्न चाहेका छन् । गभर्नर नेपाल ‘क’ ‘ख’ र ‘ग’ वर्गका बैंक तथा वित्तीय संस्थाहरुको मर्जर र पुँजी वृद्धिबारे भने सन्तुष्ठ देखिएका छन् । उनले शुक्रबारको कार्यक्रममा यो क्षेत्रको अर्को मर्जरका सन्दर्भमा कुनै कुरा उठाएनन् । त्यसो त, स्वेच्छिक मर्जरका लागि केही सुविधा थप गर्नेबाहेक फेरि ठूला बैंकहरुको संख्या फोर्स गरेरै घटाउनेतिर गभर्नर नलाग्ने राष्ट्र बैंककै अधिकारीहरु बताउँछन् ।
नेपाल बंगलादेश बैंकबाट सन नेपालको बीमा सेवा पाइने
काठमाडौँ । नेपाल बङ्गलादेश बैक लि. र सन नेपाल लाईफ ईन्स्योरेन्स कं. लि. बीचमा शुक्रबार बीमा सुविधा सम्बन्धि सम्झौता भएको छ । उक्त सम्झौतामा बैकको तर्फबाट नायव प्रमुख कार्यकारी अधिकृत सुरेन्द्रभुषण श्रेष्ठ तथा इन्स्योरेन्सका तर्फबाट प्रमुख बजार व्यवस्थापक राजु केसीले हस्ताक्षर गरेका छन् । सम्झौतापछि बैंकका ग्राहकहरुले ९० वटै शाखाहरुबाट जीवन बीमालेख प्राप्त गर्न, प्रिमियम भुक्तानी र दावी भुक्तानी लगायत बीमा सेवा प्राप्त गर्न सक्ने छन् ।
पाँच वर्षमा गरिबी शून्यमा झार्ने गरी सरकारले काम गरिरहेको छः गृहमन्त्री थापा
काठमाडौं । गृहमन्त्री रामबहादुर थापाले नेपालको गरिबी पाँच वर्षमा शून्यमा झार्ने गरी सरकारले काम गरिरहेको बताएका छन् । पूर्वी चितवनको रत्ननगरमा शुक्रबार आयोजित वृत्ति परामर्श तथा रोजगार मेलाको उद्घाटन गर्दै उनले सरकारले अहिले रहेको १८ प्रतिशत गरिबीलाई शून्यमा झार्ने लक्ष्यसाथ काम अघि बढाइरहेको बताएका हुन् । यसका लागि औद्योगिक क्षेत्रको विकास आवश्यक रहेको उनको भनाइ थियो । जसअनुसार प्रत्येक प्रदेशमा एक औद्योगिक क्षेत्र निर्माण गर्न लागिएको उनले जानकारी दिए । रत्ननगर नगरपालिकाले आयोजना गरेको सो कार्यक्रममा गृहमन्त्री थापाले विकास र समृद्धिका लागि दक्ष जनशक्ति आवश्यक भन्दै विकास र समृद्धिका लागि दक्ष जनशक्ति र जनशक्तिका लागि प्राविधिक र व्यावसायिक शिक्षा आवश्यक रहेकोमा उनको जोड थियो । नेपाल कृषि प्रदान देश रहेको बताउँदै मन्त्री थापाले कृषिलाईऔद्योगिकीकरण गर्नुपर्ने आवश्यकता औल्याउँदै भने, “कृषिलाई औद्योगिकीकरण गरेर रोजगारीको सिर्जना गर्नुपर्छ ।” अहिले श्रम बजारमा रहेका श्रमिकमा दक्षताको अभावका कारण उनीहरुको कमाइले घर खर्चसमेत चलाउन असहज भएको उनको भनाइ थियो । स्वदेशमा रोजगार दिने उद्योग र उद्योगीको सुरक्षाका लागि सरकार सधैँ तयार रहेको मन्त्री थापाले बताएका छन् । रत्ननगर नगरपालिकाका प्रमुख नारायण वनको अध्यक्षतामा सम्पन्न कार्यक्रममा नगरपालिकाका उपप्रमुख विमला दुवाडी, उद्योग सङ्घ चितवनका अध्यक्ष भेषराज दुवाडी, रत्ननगर उद्योग वाणिज्य सङ्घ रत्ननगरका अध्यक्ष राजाराम रेग्मी, क्षेत्रीय होटल सङ्घ सौराहाका अध्यक्ष सुमन घिमिरे लगायतले बोलेका थिए । बेरोजगार युवालाई रोजगार दिने र कामको अभाव भएका उद्योगमा दक्ष कामदार उपलब्ध गराउने उद्देश्यका साथ मेलाको आयोजना गरिएको हो । सो मेलामा काठमाडौँसहित विभिन्न जिल्लाका रोजगारदाताको सहभागिता रहेको छ । वृत्ति परामर्श तथा रोजगार मेलामा वृत्तिविकाससम्बन्धी परामर्श सेवा तथा जानकारी दिइने, सीपमूलक तालिम दिने संस्थाको प्रदर्शनी तथा तालिमबारे जानकारी दिइने प्रमुख वनले बताएका हुन् । मेलामा रोजगारसम्बन्धी सूचना दिइनुका साथै रोजगारदातासँग प्रत्यक्ष सम्पर्क गराइने, निःशुल्क सञ्चालन हुने आधारभूत सीपमूलक तालिमको बारेमा जानकारी गराइने, रोजगारको अवसर प्रदान गरिने र स्थानीय उत्पादनको प्रदर्शन गरेको छ । रोजगारको खोजीमा रहेका युवालाई लक्षित गर्दै सञ्चालन गरिएको सो कार्यक्रममा दुई हजार ५०० देखि तीन हजार युवाको सहभागिता रहने अपेक्षा गरिएको छ । मेलाबाट एक हजार ५०० जनाले वृत्ति परामर्श सेवा लिनेछन् । परामर्श लिएकामध्ये १५० देखि २०० जनाले रोजगारी प्राप्त गर्ने लक्ष्य लिएको छ । वनले रत्ननगर आसपासका क्षेत्रमा तत्कालका लागि ६०० जनाभन्दा बढी कामदारको खोजी भइरहेको र उक्त मेलामा रोजगार दाताका ३० वटा प्रदर्शनी कक्ष रहेका छन् । रासस
