विकासन्युज

बढ्दै बलात्कारका घटनाः एक हजार ८७३ मुद्दा दर्ता

काठमाडौं । मुलुकभर जबर्जस्ती करणीका घटना बढेका छन् । प्रहरी प्रधान कार्यालयले दिएको जानकारीअनुसार आर्थिक वर्ष २०७४/७५ को तुलनामा आव २०७५/७६ मा जबर्जस्ती करणीका मुद्दामा वृद्धि भएको हो । आव २०७४/७५ मा एक हजार ४८० मुद्दा दर्ता भएकामा आव २०७५/७६ मा एक हजार ८७३ मुद्दा दर्ता भएका छन् । आव २०७३/७४ मा भने एक हजार १३७ मुद्दा दर्ता भएका थिए । केन्द्रीय प्रहरी प्रवक्ता एवं प्रहरी नायब महानिरीक्षक विश्वराज पोखरेल जबर्जस्ती करणीका घटना हिजोका दिनमा लुकाउने गरे पनि पछिल्लो समय प्रहरीलाई सूचना दिने प्रवृत्तिका कारण यस्ता घटनामा वृद्धि आएको बताएका छन् । कुनै पनि महिलाको इच्छाबेगर जबर्जस्ती रूपमा यौन सम्पर्क गर्न खोज्नुलाई जबर्जस्ती करणी भनिन्छ । प्रहरी प्रवक्ता पोखरेल आफूले चिनेका व्यक्ति, आफ्नो नाता सम्बन्ध र छरछिमेकका व्यक्तिबाट धेरै जबर्जस्ती करणीका घटना हुने गरेको बताउँछन् । “हिजो विश्वास गरेका व्यक्ति, नाता र छरछिमेक आज अविश्वासमा परिणत भएको छ”, उनले भने । सामाजिक सञ्जाल र प्रविधिको प्रयोगबाट पनि यस्ता घटना बढेकोे उनको भनाइ छ । रासस

फ्रान्सेली विद्यार्थीको सहयोगमा ज्येष्ठ नागरिक दिवा सेवा केन्द्रको स्थापना

कास्की । सोलिडारिटी फर फ्रान्स नेपालअन्तर्गत त्यहाँका विद्यार्थीको सहयोगमा कास्कीमा एक ज्येष्ठ नागरिक दिवा सेवा केन्द्रको स्थापना गरिएको छ । ज्येष्ठ नागरिकहरु भेला हुने र सुख–दुःखका अनुभूति साटासाट गर्न सहयोग पुर्याउने उद्देश्यले माछापुच्छे गाउँपालिका–३ घाचोकमा केन्द्रको स्थापना गरिएको हो । गत असार २१ गते नेपाल आएका फ्रान्सको पेरिसस्थित इएससीपी कलेजका छ युवा विद्यार्थीको समूहले स्थानीयवासीसँग सहकार्य गर्दै २५ दिन लगाएर सेवा केन्द्र भवन तयार गरेका थिए । आमा स्मृति प्रतिष्ठान नेपालको समन्वयमा उनीहरु निर्माण कार्यमा लागेका हुन् । प्रतिष्ठानका अध्यक्ष बसन्तराज दवाडीले स्वयंसेवक विद्यार्थीले रातको १ बजेसम्म पनि निरन्तर काम गरेर भवन, शौचालयलगायतका पूर्वाधार निर्माण गरेको बताए । विद्यार्थीले रु तीन लाख ८० हजार नगद र रु दुई लाख बराबरको श्रमदान गरेका थिए । प्रतिष्ठानका अध्यक्ष दवाडीले गाउँपालिका तथा अन्नपूर्ण संरक्षण क्षेत्र आयोजनासमेतको लगानीमा रु आठ लाख खर्च गरेर भवन निर्माण गरिएको बताएका छन् । स्वयंसेवकका रूपमा नेपाल आएका ३० विद्यार्थी पाँच समूहमा विभाजित भएर नेपालका विभिन्न गाउँहरुमा सामाजिक काममा लागेको र यहाँ सहयोग गर्न पाउँदा आफूहरु खुशी भएको सो समूहका टोली नेता गास्पर्ड डारिगल बताउँछन् । आमा स्मृति प्रतिष्ठान, सोलिडारिटी फर फ्रान्स नेपाल तथा गाउँपालिकाको आर्थिक सहयोगमा सो भवन निर्माण गरिएको थियो । भवनमा ५० वृद्धवृद्धाका लागि टेलिभिजन, आराम तथा मनोरञ्जनका सामग्रीहरु राखिएको छ । स्थानीय ज्येष्ठ नागरिक तोयनाथ शर्मा लम्सालले विगतमा गाउँघरमा भएका चौतारीहरु अहिले मासिइसकेको बताउँदै दुःख–सुखका अनुभूति साटासाट गर्ने र दिन कटाउनका लागि सेवा केन्द्र निर्माण भएपछि आफूहरु खुशी भएको बताए । उनले भने, “हामी वृद्धवृद्धालाई शीतल ताप्ने र एक ठाउँमा बसेर मनको बह, गुनासा पोख्ने ठाउँ पनि छैन, अब भने जमघटको थलो पाएका छौँ ।” सेवा केन्द्र वडा कार्यायललाई विहीबार हस्तान्तरण गर्दैै गण्डकी प्रदेशसभाका सदस्य रामजीप्रसाद बरालले ज्येष्ठ नागरिक राज्यका अमूल्य सम्पत्ति भएको चर्चा गर्दै उनीहरुका सीप, अनुभव र ज्ञानलाई राज्यले संरक्षण गर्नुपर्ने भनाइ राखेका छन् । गाउँपालिकाका कार्यवाहक अध्यक्ष कृष्णकुमारी दवाडीले सबै वडामा ज्येष्ठ नागरिकका लागि दिवा सेवा केन्द्र स्थापना गर्ने योजना रहेको सुनाए । रासस

सम्पत्ति विवरण नबुझाउने २१४ शिक्षक परे जरिवानामा

परासी । तोकिएको समयमा सम्पत्ति विवरण बुझाउन अटेरी गर्ने नवलपरासीका २१४ शिक्षक जरिवानामा परेका छन् । आर्थिक वर्ष २०७४/७५ को सम्पत्ति विवरण नबुझाउने २१४ शिक्षकलाई कारवाहीस्वरुप जरिवाना तिर्न आग्रह गरिएको शिक्षा विकास तथा समन्वय एकाइ कार्यालय पश्चिम नवलपरासीले जनाएको छ । कार्यालयले ती शिक्षकहरुलाई प्रतिशिक्षक रु पाँच हजारका दरले अविलम्ब जरिवाना दाखिला गर्न आग्रह गरेको छ । नयाँ आव शुरु भएको ६० दिनभित्रमा सम्पत्ति विवरण बुझाउनुपर्ने प्रावधान रहेको उल्लेख गर्दै शिक्षा विकास तथा समन्वय एकाइ प्रमुख डोलराज पाण्डेले भन्नुभयो, “सम्पत्ति विवरण बुझाउन अटेरी गरेका शिक्षकको सूची मन्त्रालयबाट प्राप्त भएको छ, त्यो सूचीमा केही अवकाश पाएका, सरुवा भएर गएका, दोहोरिएका र सम्पत्ति विवरण बुझाइसकेका समेत नाम भेटिएको छ”, उनले थपे, “त्यो सूची छानबिन गरी नबुझाएका शिक्षकलाई अविलम्ब विवरण फारम भर्न र जरिवाना बुझाउन निर्देशन दिएका छौँ ।” यसरी, सामुदायिक विद्यालयमा कार्यरत स्थायी शिक्षकहरुले विद्यालय किताबखानामा र अस्थायी शिक्षकहरुले सम्बन्धित स्थानीय तहमा सम्पत्ति विवरण बुझाउनुपर्ने प्रावधान रहेको कार्यालयले जनाएको छ । रासस

सिसी क्यामेराको सहयोगले फरार अपराधी पक्राउ

सुर्खेत । जिल्ला प्रहरी कार्यालय सुर्खेतले सिसी क्यामेराको फुटेजको साहयताले अपराधी पक्राउ गर्न सफल भएको छ । बुधबार मध्याह्न १२ः३० बजे वीरेन्द्रनगर नगरपालिका–६ मङ्गलगढी सुर्खेतस्थित पुरानो बसपार्क सडकखण्डमा एक वृद्धा महिलालाई ठक्कर दिएर फरार भएका युवकलाई पक्राउ गरिएको हो । पक्राउ पर्नेमा गुँरास गाउँपालिका–१ दैलख स्थायी घर भई हाल वीरेन्दनगर नगरपालिका–५ चिसापानी सुर्खेत निवासी २४ वर्षीय गगन गुरुङ रहेको जिल्ला प्रहरी कार्यालय सुर्खेतका प्रवक्ता एवं प्रहरी नायब उपरीक्षक प्रदीपबहादुर क्षेत्रीले जानकारी दिएका छन् । प्रवक्ता क्षेत्रीका अनुसार भे८प ८१६० नंको मोटरसाइकलमा सवार चालक गुरुङले तीनकुनेचोकबाट मङ्गलगढीतर्फ आउँदै गर्दा वीरेन्द्रनगर नगरपालिका–९ सुर्खेतका ६५ वर्षीया वृद्धा काली नेपालीलाई ठक्कर दिई गम्भीर घाइते बनाई फरार भएका थिए । घाइते नेपालीको उपचारका क्रममा कर्णाली प्रदेश अस्पताल सुर्खेतमा बुधबार बेलुका मृत्यु भएको हो । घटनालगत्तै प्रहरीले खोजी कार्यलाई तीव्र बनाएको थियो । प्रहरीले फरार युवकको मोटरसाइकलको नम्बर नखुल्दा १५० सिसीको निलो कलरको पल्सर मोटरसाइकल सिसी क्यामेरामा हेरेर पत्ता लगाएको थियो । त्यसका आधारमा फरार मोटरसाइकल चालक गुरुङ र उनको पछि बसेका वीरेन्द्रनगरपालिका–५ चिसापानी सुर्खेतका २२ वर्षीय मनबहादुर धामीलाई बिहीबार नियन्त्रणमा लिई कारवाहीका लागि आवश्यक अनुसन्धान थालिएको प्रहरी नायब उपरीक्षक क्षेत्रीले जनाएका छन् । रासस

भारतका एक्चुरीलाई वित्तीय विवरण पठाउँदा कति रहला गोपनियता ? बीमा कम्पनी भन्छन्-‘विश्वासमा चल्ने हो’

काठमाडौँ । बीमा कम्पनीहरुले भविश्यमा आइपर्ने जोखिम र त्यसलाई कसरी व्यवस्थापन गर्ने भन्ने बारेमा गरिने बीमाङ्कीय मूल्याङ्कनका लागि वित्तीय विवरणहरु भारतमा पठाउने गरेका छन् । नेपालमा बीमाङ्की(एक्चुरी) नभएकाले बीमा कम्पनीहरुका सबै विवरण भारतका एक्चुरीका कहाँ पठाउँदा कम्पनीहरुको गोपनियता भङ्ग हुने संभावना रहन्छ । यसरी एक्चुरीले वित्तीय विवरणहरु हेरिसकेपछि एक कम्पनीको पोलिसी अर्को कम्पनीमा पुग्ने सम्भावना हुन्छ । जसले बीमा कम्पनीहरुलाई धरासायी बनाउन सक्नेमा विज्ञहरुले आशंका व्यक्त गरेका छन् । नेपालमा बीमा व्यवसाय संचालन गर्दै आएका बीमा कम्पनीहरुको एक्चुरी भ्यालुयसनको कारण गोपनियतामा पर्ने सक्ने असरलाई विश्वाससँग जोडेर हेर्ने गरेका छन् । यता, बीमकहरुले बीमा विश्वासमा चल्ने व्यवसाय भएकाले नै आफूहरु सुरक्षित रहेको जानकारी दिएका छन् । नेपालको एक्चुरी छैनन् । सोही कारण वित्तीय विवरण भारत लानु पर्ने बाध्यता छ । बीमा कम्पनीहरुले अनिवार्य रुपमा वार्षिक वित्तीय विवरण एक्चुरियल भ्यालुयसन गराउनु पर्छ । कम्पनीहरुले उक्त एक्चुरी गरेको विवरण बीमा समितिमा पनि पठाउँछन् । पुनः बीमा समितिले आफैँले नियुक्त गरेको एक्चुरी मार्फत वित्तीय विवरण स्विकृत गर्ने गर्छ । तर, बीमा समितिले समेत सो कुरा सही हो कि होइन भन्ने नेपालमा पत्ता लगाउन सक्दैन । नेपालमा पत्ता नलाग्ने भएको कारण छिमेकी राष्ट्र भारतको एक्चुरी मार्फत नै बीमा समितिले पनि काम गराउँदै आएको छ । कम्पनीले भारतमा वित्तीय विवरण मात्र पठाउँदैनन, आफूले हालसम्म सोच्दै आएका केही गोप्य कागजपत्र समेत पठाउँछन् । यस्तो अवस्थामा बीमा कम्पनीहरुले आफूले अन्य कम्पनीहरुसँग लुकाएका सूचनाहरु बाहिरिन सक्ने खतरा रहेकोमा स्वीकार गरेका छन् । बीमा कम्पनीहरुले सफ्ट कपी मात्र नभएर कतिपय सन्दर्भमा हार्ड ड्राईभको समेत प्रयोग गर्ने गरेका छन् । बीमा समितिले पनि आफ्नै एक्चुरी नभएका कारण एक्चुरी भ्यालुयसन टेष्ट भारतमै गराउनु पर्ने बाध्यता रहँदै आएको बताएको छ । साथै, सोही कारण बीमाका वित्तीय विरण तयार हुन पनि केही ढिलाई हुने गर्छ । बीमा समितिक एक अधिकारीले भने-‘एक्चुरीयल भ्यालुएसन टेष्टका लागि हामीले बीमा समितिमा एउटा ढाँचा तयार गरेका छौँ, सोही ढाँचा अनुसार काम गर्ने गर्छौ ।’ उनले कम्पनीहरुले इस्यू गरेका पोलिसी, ल्याप्स भएका पोलिसी, सरेण्डर भएका पोलिसी लगायत सम्पूर्ण विवरण पठाउने गरेको जानकारी दिए । साथै, विजेनश स्ट्राटीजी अनुसार काम गरिने भएकाले यस्ता सूचनाहरु नबाहिरिने उनले जानकारी दिए । एउटा कम्पनी र अर्को कम्पनी, एउटा एक्चुरी र अर्को एक्चुरीबाट सूचना बाहिरिने सम्भावना भएपनि त्यस्तो अनैतिक कार्य कसैले नगर्ने उनको तर्क छ । यस्तै, बीमा कम्पनीका एक प्रमुख कार्यकारी अधिकृतले भने-‘हामीले एक्चुरी भ्यालुएसनका लागि सम्पूर्ण वित्तीय विरण पठाउने गरेका छौँ, यो त सबै विश्वसले नै गर्दा हो, विश्वास टुटन गएमा हामीले नयाँ एक्चुरी छनोट गर्नुपर्ने हुन्छ ।’ ‘बीमा समितिले बीमा कम्पनी पिच्छे फरक फरक एक्चुरी नियुक्त गर्नु पर्ने व्यवस्था गरेकाले गोपनियता सुरक्षित हुन्छ’-उनले भने । सन नेपाल लाइफका प्रमुख कार्यकारी अधिकृत(सिईओ) राजकुमार अर्यालले बीमा कम्पनीको नियामक बीमा समिति भएकाले आफ्नो समस्यामा समितिले भूमिका निभाउने बताए । प्रमुख कार्यकारी अर्यालका अनुसार-‘बीमा कम्पनीको असहजतामा समितिले सहयोग गर्छ, बीमा भनेको विश्वासले चल्ने व्यवसाय हो, शंकाले शंकाले चल्दैन ।’ बोनस दरको डर छ बीमा कम्पनीहरुले दिएको जानकारीलाई आधार मान्ने हो बोनस दर बिमितलाई आफूले भन्नु भन्दा अगाडि नै सार्वजनिक हुने होकी भन्ने डर रहेको पाइन्छ । तर, बीमा कम्पनीहरुले सो विषयमा आफूहरुले बीमा समितिप्रति विश्वास गर्दै आएको मत जाहेर गरेका छन् । एक्चुरीले अनुशासन पालन नगर्दा मात्र बीमा कम्पनीको गोपनियता अर्को कम्पनीसम्म पुग्ने जानकारहरु बताउँछन् । साथै, एक्चुरीले पेशागत मर्यादा कायम गर्ने भएकाले बीमा व्यसायमा कुनैपनि हानी नपुग्ने उनीहरुको तर्क छ ।

अज्ञात समूहद्वारा वडा कार्यालयमा आगजनी, महत्वपूर्ण सामग्री जलेर नष्ट

चितवन । चितवनको कालिका नगरपालिका वडा नं ३ को कार्यालयमा आगजनी गरिएको छ । वडा कार्यालयमा आज बिहान ३ बजे अज्ञात समूहले आगजनी गरेको जिल्ला प्रहरी कार्यालय चितवनले जानकारी दिएको छ । आगजनीबाट कार्यालयभित्र रहेका कागजात, टेबुल, कुर्सी, कम्प्युटर, प्रिन्टरलगायतका महत्वपूर्ण सामग्री जलेर नष्ट भएको छ । कार्यालयको झ्याल फोडेर पेट्रोल छर्केर आगजनी गरेको वडाध्यक्ष टीकाराम रिजालले राससलाई जानकारी दिएका छन् । प्रहरी र स्थानीयवासीको सहयोगमा साढे ३ बजे आगो नियन्त्रणमा ल्याइएको थियो । आगजनी कसले र किन गरेको भन्नेबारे केही नखुलेको र अनुसन्धान भइरहेको प्रहरीले जनाएको छ । रासस

अख्तियारद्वारा पाँच प्रहरी घुस लिँदालिँदै पक्राउ

काभ्रेपलाञ्चोक । टिपरबाट घुस लिँदै गरेको अवस्थामा काभ्रेपलाञ्चोकमा कार्यरत पाँच प्रहरीलाई अख्तियार दुरुपयोग अनुसन्धान आयोगको एक टोलीले प्रक्राउ गरेको छ । आयोगको टोलीले काभ्रेपलाञ्चोकस्थित अरनिको तथा हेलम्बू राजमार्गको विभिन्न पोष्टमा कार्यरत प्रहरीलाई टिपरसँग घुस लिँदालिँदै पक्राउ गरेको हो । बिहीबार साँझसम्मको स्थलगत अनुगमनका क्रममा तीन ट्राफिक तथा दुई जनपद प्रहरी टिपर चालकबाट पैसा लिइरहेको अवस्थामा पक्राउ गरिएको अख्तियारका प्रवक्ता प्रदीप कोइरालाले जानकारी दिएका छन् । उनका अनुसार मण्डनदेउपुर नगरपालिकास्थित हेलम्बू राजमार्गमा पर्ने हिगुवापाटी प्रहरी चौकीमा कार्यरत प्रहरी जवान तेजप्रसाद भट्टराई, जिल्ला ट्राफिक प्रहरी कार्यालय बनेपामा कार्यरत हवल्दार रामहरि मानन्धर र जवान हरिप्रसाद बाँनियालाई टिपर चालकसँग घुस लिँदालिँदै पक्राउ गरिएको हो । साथै, पाँचखाल प्रहरी चौकीमा कार्यरत हवल्दार भक्तबहादुर हायू र जवान ज्ञानबहादुर लाम्गाडेलाई अरनिको राजमार्गस्थित केराघारीबाट पक्राउ गरिएको छ । उजुरीका आधारमा स्थलगत अनुगमन गर्दा ती प्रहरीलाई पक्राउ गरिएको प्रवक्ता कोइरालाले बताएका हुन् । उनका अनुसार ओभरलोड तथा सडकमा पानी चुहाउन नियन्त्रण गरेको भन्दै ट्राफिक तथा जनपद प्रहरीले टिपर चालकसँग रकम असुल्दै आएका थिए । उजुरीमा प्रहरीले प्रतिटिपर चालकसँग मासिक रु दुई हजार असुल्दै आएको उल्लेख गरेपछि स्थलगत अनुगमन गरिएको अख्तियारले जनाएको छ । पक्राउ गरिएका प्रहरीले टिपरसँग रु दुई हजार लिइएको अवस्थामा रङ्गेहात पक्रिएको हो । काभ्रेपलाञ्चोकस्थित अरनिको र विपी राजमार्गमा दैनिक एक हजार ५०० टिपर गुड्ने गर्दछन् । रासस

काठमाडौँ-नारिता उडान असोजदेखि, धेरै यात्रु पाउने निगमको विश्वास

काठमाडौँ । राष्ट्रिय ध्वजाबाहक नेपाल वायु सेवा निगम (नेपाल एयरलाइन्स)ले जापानको नारिता अन्तर्राष्ट्रिय विमानस्थलमा चार्टर्ड उडान गर्ने भएको छ । आगामी भदौ १२ गतेदेखि जापानको ओसाका सिधा उडान गर्ने तयारी गरेको निगमले नारिता विमानस्थलमा उडानको अनुमति पाएको हो । निगमले आउँदो अक्टोबरअर्थात् असोज महिनादेखि चार्टर्ड उडानको अनुमति पाएको निगमका प्रवक्ता गणेशबहादुर चन्दले जानकारी दिए । निगमले नारिता विमानस्थलमा दुई वटामात्र चार्टर्ड उडान अनुमति पाइएको बताइएको छ । वाइडबडी ए–३३० जहाजमार्फत ओसाका र नारिता उडान गरिनेछ । निगमले नारितामा नियमित उडानका लागि सबै कागजी प्रक्रिया पूरा गरिसकेको छ । यो गन्तव्यमा सातामा तीन दिन उडान गर्ने निगमको योजना छ । नारिता गन्तव्यमा धेरै नेपाली यात्रु पाउने निगमको विश्वास छ । नारिता जापानको राजधानी टोकियो प्रवेश गर्ने मुख्य हवाई प्रवेशद्वार मानिन्छ । ओसाकामा नारिताको तुलनामा कम नेपालीको बसोबास रहेको छ । निगमले त्रिभुवन अन्तर्राष्ट्रिय विमानस्थलबाट ओसाका कन्साई अन्तर्राष्ट्रिय विमानस्थलमा साताको तीन दिन मङ्गलबार, बिहीबार र शनिबार उडान भर्ने निगमले जनाएको छ ।