नेपाली कांग्रेस सबैको योगदानले बनेको हो, सबैलाई समेटेर अघि बढ्छुः गगन थापा
काठमाडौं । नेपाली कांग्रेसका सभापति पदका उम्मेदवार गगन थापाले पार्टी सबैको संघर्ष र योगदानबाट बनेको बताउँदै १५औं महाधिवेशनको बन्दसत्रमा पूर्वसभापति शेरबहादुर देउवालगायतका नेताहरू मञ्चमा अनुपस्थित रहेकोमा दुःख व्यक्त गरेका छन् । बन्दसत्रलाई सम्बोधन गर्दै थापाले निवर्तमान सभापति देउवाले पार्टी निर्माण र प्रजातान्त्रिक संघर्षमा लामो समय ठूलो योगदान पुर्याएको स्मरण गर्दै महाधिवेशनमा शीर्ष नेताहरूको उपस्थिति नहुनुले आफूहरूलाई खुसी नतुल्याएको र मञ्चमा अग्रज नेताहरू पनि हुनुपथ्र्यो भन्ने लागेको बताए । गत पुसमा सम्पन्न विशेष महाधिवेशन विधानसम्मत नै भएको दाबी गर्दै थापाले महाधिवेशनपछि सबै पक्षलाई जोडेर पार्टीलाई एकताबद्ध बनाउने जिम्मेवारी आफूले लिने प्रतिबद्धता व्यक्त गरे । त्यस्तै, अर्को प्रसङ्गमा नेता थापाले अदालतबाट निर्णयको अपेक्षा गरेर बस्नु समयको बर्बादी मात्र हुने टिप्पणी गरे । सर्वोच्च अदालतले नेपाली कांग्रेसको वैधानिकतासम्बन्धी विवादलाई संवैधानिक इजलासमा लैजाने निवेदन दरपीठ गरिदिएको सन्दर्भ उल्लेख गर्दै उनले अदालतबाट भएको यो आठौं निर्णय रहेको बताए । उनले पार्टी मिलाउने र एकताबद्ध बनाएर लैजाने काम आफूले गर्ने भन्दै अन्य नेता-कार्यकर्तालाई आ-आफ्नो जिम्मेवारीअनुसार काममा जुट्न आग्रह गरे ।
उच्च भन्सार मूल्यङ्कन र अधिक करका कारण मूल्यवृद्धि भएको व्यवसायीको गुनासो
काठमाडौं । महान् चाडपर्व नजिकिँदै गर्दा विराटनगर बजारको व्यावसायिक वातावरण, बजार व्यवस्थापन तथा समसामयिक समस्या र समाधानका उपायबारे मोरङ उद्योग व्यापार संघमा सरोकारवाला व्यवसायीहरूबीच छलफल सम्पन्न भएको छ । संघका अध्यक्ष अनिल कुमार साहको अध्यक्षता तथा आमन्त्रित सदस्य पंकज दुगडको सञ्चालनमा आयोजित कार्यक्रममा स्थानीय व्यवसायीहरूले दैनिक व्यापार-व्यवसाय सञ्चालनका क्रममा भोग्नुपरेका नीतिगत र व्यवहारिक कठिनाइहरू प्रस्तुत गरेका थिए । छलफलका क्रममा व्यवसायीहरूले अत्यावश्यक वस्तुको आयातमा उच्च भन्सार मूल्यङ्कन, महसुल, अन्तःशुल्क र भ्याटका कारण मूल्यवृद्धि भई व्यापार प्रभावित भएको गुनासो गरे । साथै एमआरपी लेबलिङको झन्झट, दोहोरो व्यावसायिक कर, घरबहाल कर, फोहोर व्यवस्थापन शुल्क, र डिजिटल कारोबारमा देखिएका समस्याबारे ध्यानाकर्षण गराएका थिए । चाडपर्वको मुख्य किनमेलको समय (पिक-आवर) मा हुने अनुगमनलाई व्यवस्थित बनाउन र सीमावर्ती बिहार राज्यका करिब १७ करोड जनसंख्यालाई लक्षित गरी उपभोक्ता अनुकूल वातावरण निर्माण गर्नुपर्नेमा उनीहरूले जोड दिए । व्यवसायीका समस्यालाई सम्बोधन गर्दै अध्यक्ष साहले सम्पूर्ण मागहरूलाई स्थानीय, प्रदेश र संघीय सरकारसमक्ष पुर्याएर समाधानका लागि सशक्त पहल गर्ने प्रतिबद्धता जनाउँदै चाडपर्वमा बजारलाई मर्यादित र उपभोक्तामैत्री बनाउन आग्रह गरे ।
नेपालका पाँच प्रविधि संस्थालाई अन्तर्राष्ट्रिय असोसियो डिजिटल र एआई अवार्ड २०२६
काठमाडौं । नेपालका पाँच वटा प्रविधि संस्थाहरू प्रतिष्ठित अन्तर्राष्ट्रिय पुरस्कार ‘असोसियो डिजिटल र एआई अवार्ड २०२६’ बाट सम्मानित भएका छन् । एसियन-ओसियनियन कम्प्युटिङ इन्डस्ट्री अर्गानाइजेसनद्वारा इन्डोनेसियाको जकार्तामा आयोजित ‘असोसियो डिजिटल र एआई समिट २०२६’ (अक्टोबर ५-७) का अवसरमा ती संस्थाहरूलाई सो अवार्ड प्रदान गरिएको हो । पुरस्कृत हुने संस्थाहरूमा सनवे इन्टरनेसनल बिजनेस स्कुलले एआई ट्यालेन्ट डेभलपमेन्ट, इनसाइट टेक्नोलोजी प्रालिले एआई इन साइबर सेक्युरिटी, वाइज याक सोलुसन्स प्रालिले एआई इन हेल्थकेयर, डिभी एक्सेलस प्रालिले एआई इन स्मार्ट एग्रिकल्चर’ र अभियान्ता फाउन्डेसनले एआई इन वर्कफोर्स एण्ड फ्युचर स्किल्स विधामा अवार्ड हात पारेका हुन् । कम्प्युटर एसोसिएसन नेपाल महासंघ (क्यान महासंघ) को सिफारिसमा सहभागी यी नेपाली संस्थाहरूले २४ एसियाली-ओसियनियन देशका प्रतिनिधिहरूबिच प्रतिस्पर्धा गरी यो सफलता हासिल गरेका हुन् । क्यान महासंघका पूर्व अध्यक्ष एवम् असोसियोका उपाध्यक्ष नवराज कुँवर र महासचिव चन्द्र विलास भुर्तेलका अनुसार यस्ता अन्तर्राष्ट्रिय मञ्चमा प्राप्त सम्मानले नेपाललाई क्षेत्रीय डिजिटल हबका रूपमा स्थापित गर्न र स्वदेशी प्रविधि कम्पनीहरूलाई विश्वव्यापी प्रतिस्पर्धामा अघि बढ्न ठूलो प्रेरणा मिल्नेछ ।
एनआईसी एशियाको छैठौं बन्दमुखी योजनाको इकाई बाँडफाँड सम्पन्न, कसले कति पाए ?
काठमाडौं । एन आई सी एशिया क्यापिटलको योजना व्यवस्थापन तथा निष्काशन एवं बिक्री प्रबन्धकत्वमा सञ्चालन हुन लागेको छैठौँ बन्दमुखी योजना ‘एन आई सी एशिया इक्विटी अपोर्चुनिटी फण्ड’को इकाई बाँडफाँड सम्पन्न भएको छ । प्रति इकाई अंकित मूल्य १० का दरले कूल ८ करोड इकाईमध्ये १५ प्रतिशत (१ करोड २० लाख इकाई) कोष प्रवद्र्धक एन आई सी एशिया बैंकका लागि सुरक्षित राखी बाँकी ६ करोड ८० लाख इकाई सर्वसाधारणका लागि असोज ७ गतेदेखि बिक्री खुला गरिएको थियो । सर्वसाधारणका लागि निष्काशन गरिएको इकाई पहिलो चार कार्यदिनमै मागभन्दा बढी आवेदन परेकाले असोज १३ गते नै बिक्री बन्द गरिएको थियो । उक्त अवधिमा सि-आश्वा सदस्य बैंक तथा वित्तीय संस्थाहरुमार्फत ४१ हजार १८९ जना आवेदकबाट कूल ८ करोड ७४ लाख ४४ हजार २०० इकाई (मागभन्दा १.२९ गुणा बढी) का लागि आवेदन परेको थियो । प्राप्त आवेदनहरु छानबिन गर्दा ४७ जना आवेदकको ६ हजार २०० इकाई बराबरको आवेदन रितपूर्वक नदेखिएकाले रद्द गरिएको र बाँकी ४१ हजार १४३ आवेदकबाट बीज पूँजीसहित कूल १ अर्ब २ करोड ४३ लाख ७९ हजार रुपैयाँ बराबरको आवेदन सदर भएको क्यापिटलले जनाएको छ । मागभन्दा बढी आवेदन प्राप्त भएकाले धितोपत्र बोर्डको स्वीकृत विवरण पत्र तथा सामूहिक लगानी कोष निर्देशिका, २०६९ बमोजिम फण्डको आकार २५ प्रतिशतले वृद्धि गरी ८० करोडबाट १ अर्ब रुपैयाँ कायम गरिएको छ । बुधबार क्यापिटलको कार्यालय थापाथलीमा गरिएको बाँडफाँड अनुसार १०० इकाईदेखि ३० लाख इकाईसम्म माग गर्ने आवेदकलाई मागबमोजिम र ४० लाखदेखि ५० लाख इकाईसम्म माग गर्ने आवेदकलाई ३८ लाख ९० हजार ५२५ इकाईका दरले इकाई बाँडफाँड गरिएको छ । बाँडफाँडको नतिजा निष्काशनकर्ताको वेबसाइट www.iporesult.cdsc.com.np/meroshare.cdsc.com.np तथा सिडिएससीका सम्बन्धित पोर्टलमार्फत हेर्न सकिने जनाइएको छ।
मैले सभापतिको उम्मेदवारी फिर्ता लिएको छैन: श्यामकृष्ण खड्गी
काठमाडौं । नेपाली कांग्रेसको सभापतिमा उम्मेदवारी दिएका श्यामकृष्ण खड्गीले उम्मेदवारी फिर्ता नलिएको बताएका छन् । बुधबार उनले आफ्नो उम्मेदवारी कायमै रहने बताएका हुन् । ‘मैले उम्मेदवारी फिर्ता लिन्नँ। लोकतान्त्रिक प्रक्रियामा प्रतिस्पर्धामा भाग लिन्छु,’उनले भने । कांग्रेसको १५औं महाधिवेशनअन्तर्गत बुधबार उम्मेदवारी फिर्ता लिने समय तोकिएको थियो । मंगलबार सभापतिमा तीन जनाले उम्मेदवारी दिएका थिए । सभापतिमा गगन थापा, किशोरसिंह राठौर र श्यामकृष्ण खड्गीले उम्मेदवारी दर्ता गराएका थिए । त्यसमध्ये राठौरले बुधबार उम्मेदवारी फिर्ता लिएका छन् । कांग्रेसको १५ औँ महाधिवेशन अन्तर्गत भाेलि निर्वाचन हुँदैछ ।
मिस ग्ल्याम वल्र्ड नेपाल २०२६ को अडिसन सम्पन्न
काठमाडौं । राष्ट्रिय सौन्दर्य प्रतियोगिता ‘मिस ग्ल्याम वल्र्ड नेपाल–२०२६’ को अडिसन काठमाडौंमा सम्पन्न भएको छ । क्रिएटिभ इन्स्टिच्युट अफ फेसन टेक्नोलोजी (सिआईएफटी) को आयोजनामा भएको अडिसनमा १६ देखि ३२ वर्ष उमेर समूहका युवतीहरुको उल्लेख्य सहभागिता रहेको आयोजक संस्थाले जनाएको छ । प्रतियोगिताका लागि एक महिनाअघि नै आवेदन फर्म खुला गरिएको थियो । अडिसनमा मिस नेपाल २००० उषा खड्गी, अन्तर्राष्ट्रियस्तरका कोरियोग्राफर रोजिन शाक्य, कलाकर्मी डटकमकी समाचार सम्पादक अरुणा भट्टराई तथा आयोजक संस्था सिआईएफटीकी प्रमुख सुचिता सची निर्णायकको रुपमा रहेको थिए । अडिसनबाट छनोट हुने २५ जना प्रतिस्पर्धीलाई कोरियोग्राफर रोजिन शाक्यको नेतृत्वमा प्रशिक्षण दिइने छ । प्रतियोगिताको ग्राण्ड फिनाले भने आगामी मंसिर ५ गते ललितपुरको पुल्चोकस्थित द प्लाजामा आयोजना हुनेछ । सिआईएफटीकी प्रमुख सुचिता सचीका अनुसार प्रतियोगिताले फेसन र सौन्दर्यसँगै व्यक्तित्व, आत्मविश्वास, नेतृत्व क्षमता, प्रतिभा, प्रस्तुति शैली तथा सामाजिक चेतनालाई समेत प्राथमिकतामा राखिएको थियो । ‘प्रतियोगिताको उद्देश्य बाह्य सौन्दर्यलाई मात्र आधार बनाएर विजेता छनोट गर्नु होइन । व्यक्तित्व, आत्मविश्वास, नेतृत्व क्षमता, प्रतिभा र सामाजिक चेतनालगायतका पक्षलाई पनि मूल्यांकन गरिने छ’, सचीले बताइन् । सिआईएफटीले ‘मिस ग्ल्याम वल्र्ड नेपाल-२०२६’ मार्फत विभिन्न उमेर समूहका प्रतियोगीलाई समेट्दै तीन अन्तर्राष्ट्रिय उपाधिका लागि नेपाली प्रतिनिधि छनोट गर्ने जनाएको छ । आयोजकका अनुसार एउटै राष्ट्रिय मञ्चबाट ‘मिस ग्ल्याम युनिभर्स नेपाल’, ‘मिस ग्ल्याम वल्र्ड नेपाल’ तथा ‘मिस टिन ग्ल्याम वल्र्ड नेपाल’ का लागि योग्य प्रतियोगी छनोट गरिँदैछ । ‘मिस ग्ल्याम वल्र्ड नेपाल-२०२६’ की विजेताले अन्तर्राष्ट्रिय सौन्दर्य प्रतियोगिता ‘मिस ग्ल्याम वल्र्ड २०२६’ मा नेपालको आधिकारिक प्रतिनिधित्व गर्नेछिन् । आयोजकका अनुसार ‘मिस ग्ल्याम वल्र्ड २०२६’ भारतमा सन् २०२६ को अन्त्यतिर आयोजना गर्ने तयारी भइरहेको छ । सिआईएफटीले फेसन तथा सौन्दर्य क्षेत्रमा रुचि राख्ने युवतीका लागि आफ्नो प्रतिभा प्रस्तुत गर्नुका साथै भविष्यमा यस क्षेत्रमा व्यावसायिक अवसर खोज्न प्रतियोगिताले प्लेटफर्म प्रदान गरेको जनाएको छ ।
यी हुन् मन्त्रिपरिषद्का ६ निर्णय
काठमाडौं । सरकारले भूमिसहित तीन वटा अध्यादेश जारी गर्न राष्ट्रपतिसमक्ष सिफारिस गर्नेसहित विभिन्न ६ वटा निर्णय गरेको छ । बुधबार बसेको मन्त्रिपरिषद् बैठकले भूमि, वन तथा विपद् सम्बन्धी केही नेपाल ऐनलाई संशोधन गर्ने अध्यादेशहरू जारी गर्न राष्ट्रपतिसमक्ष सिफारिस गर्ने निर्णय गरेको सरकारका प्रवक्ता सस्मित पोखरेलले जानकारी दिए । यसैगरी बैठकले राष्ट्रिय मानव अधिकार आयोगको सिफारिस अनुसार १५३ जना पीडितहरूलाई क्षतिपूर्ति उपलब्ध गराउन स्वीकृति प्रदान गर्नुका साथै काठमाडौंमा पोर्चुगलको महावाणिज्यदूतावास स्थापना गर्न सहमति दिने निर्णय गरेको छ । त्यस्तै, मन्त्रिपरिषद्ले नेपाल इन्जिनियरिङ सेवाका नवीनराज सिंह र नेपाल प्रशासन सेवाका चक्रबहादुर बुढालाई सचिव (राजपत्राङ्कित विशिष्ट श्रेणी) पदमा बढुवा गरेको छ भने नेपाल लेखापरीक्षण सेवाका नायब महालेखापरीक्षक चन्द्रकान्त भण्डारीलाई उपमहालेखापरीक्षक पदमा बढुवा गर्ने निर्णय गरेको छ ।
बाढी पीडितको सहयोगका लागि ब्रिटिस गोर्खा नेपाली र रिब्डीकोट बुद्व बिहारद्वारा ऊर्जामन्त्री श्रेष्ठलाई चेक हस्तान्तरण
काठमाडौं । ब्रिटिस गोर्खा नेपाली नागरिकता निरन्तरता (सिएनसिबिसी) र रिब्डीकोट बुद्व बिहार पाल्पाले भोटेकोशी बाढी प्रभावितका लागि आर्थिक सहयोग गरेको छ । दुवै संस्थाले ऊर्जा, जलस्रोत तथा सिँचाइ मन्त्री विराज भक्त श्रेष्ठमार्फत प्रधानमन्त्री देवी प्रकोप उद्वार कोषमा रकम हस्तान्तरण गरेका हुन् । भोटेकोशी बाढी प्रभावित नागरिकको राहत, उद्वार, पुनस्थापना तथा पुनर्निर्माणका लागि आर्थिक सहयोग भन्दै दुवै संस्थाले बुधबार ऊर्जा मन्त्रालयमा मन्त्री श्रेष्ठलाई चेक हस्तान्तरण गरेको प्रमुख स्वकिय सचिव सन्जिव महर्जनले जानकारी दिए । उनकाअनुसार ब्रिटिस गोर्खा नेपाली नागरिकता निरन्तरताले २८ लाख ९८ हजार ६७९ रूपैयाँ सहयोग गरेको हो । भुतपूर्व सैनिक कल्याणकारी समिति नेपालका अध्यक्ष होमबहादुर थापा र सिएनसिबिसीका उपाध्यक्ष दलबहादुर बुढाथोकीले मन्त्री श्रेष्ठलाई चेक हस्तान्तरण गरेका थिए । यसैगरी रिब्डीकोट बुद्व बिहार पाल्पाले ४० हजार रूपैयाँ सहयोग गरेको छ । बिहारका अध्यक्ष हुमबहादुर थापाले मन्त्री श्रेष्ठलाई चेक हस्तान्तरण गरेका थिए ।
