कृति अवार्ड्सको १३औं संस्करण औपचारिक रूपमा सुरु
काठमाडौं । नेपाल विज्ञापन संघ (आन) ले आयोजना गरेको रेडबुल १३औं कृति अवार्ड्स २०८३ को औपचारिक सुरुवात गरिएको छ । काठमाडौंमा आयोजित विशेष कार्यक्रम ‘कृति इग्नाइट’मार्फत अवार्ड्सको उद्घाटन गरिएको हो । सञ्चार तथा सूचना प्रविधिमन्त्री डा. विक्रम तिमिल्सिनाको प्रमुख आतिथ्यमा आयोजित कार्यक्रममा विज्ञापन तथा सञ्चार क्षेत्रका साथै विभिन्न उद्योग तथा व्यवसाय क्षेत्रका प्रतिनिधिको सहभागिता थियो । नेपाली विज्ञापन तथा सञ्चार क्षेत्रमा सिर्जनशीलता र उत्कृष्टताको सम्मान गर्दै आएको कृति अवार्ड्सको यस वर्षको संस्करणलाई विभिन्न व्यावसायिक तथा नियामक संस्थाले समर्थन गरेका छन् । नेपाल उद्योग वाणिज्य महासंघ, नेपाल उद्योग परिसंघ, नेपाल चेम्बर अफ कमर्स र नेपाल सरकारको विज्ञापन बोर्डले अवार्ड्सलाई समर्थन गरेका छन् । त्यस्तै, ब्रोडकास्टिङ एसोसिएसन अफ नेपाल (बान), सामुदायिक रेडियो प्रसारक संघ (अकोराब), रेडियो ब्रोडकास्टर्स फोरम, नेपाल मिडिया सोसाइटी र मिडिया एलायन्स नेपाल यस वर्षदेखि कृति अवार्ड्सका सह–आयोजकका रूपमा जोडिएका छन् । आयोजकका अनुसार यसपटक आनका गैरसदस्यका लागि समेत मनोनयन खुला गरिएको छ । विभिन्न व्यावसायिक तथा सञ्चार क्षेत्रका संस्थाको सहभागिताले अवार्ड्सलाई थप व्यापक र समावेशी बनाउने आयोजकको अपेक्षा छ । यसबाट नेपाली विज्ञापन तथा सञ्चार उद्योगमा सिर्जनशीलता र व्यावसायिक उत्कृष्टतालाई थप प्रोत्साहन पुग्ने विश्वास लिइएको छ । ‘कृति इग्नाइट’ कार्यक्रममा नेपाली विज्ञापन तथा आमसञ्चार क्षेत्रको विकासक्रम झल्काउने श्रव्यदृश्य सामग्रीसमेत प्रस्तुत गरिएको थियो । कार्यक्रममा आनका पूर्वअध्यक्ष, कृति अवार्ड्सका प्रवर्द्धक तथा मिडिया एलायन्स नेपालका संस्थापक अध्यक्ष भाष्करराज राजकर्णिकारले स्वागत मन्तव्य राखेका थिए । १३औं कृति अवार्ड्सका शीर्ष प्रायोजक सारस बेभरेजका प्रबन्ध निर्देशक सुरेन्द्र सिवाल र विज्ञापन बोर्डका अध्यक्ष सन्तोष श्रेष्ठलगायतले शुभकामना मन्तव्य दिएका थिए । आनका अध्यक्ष सुदीप थापाले धन्यवाद ज्ञापन गरेका थिए । आयोजकका अनुसार कृति अवाड्र्स २०८३ अन्तर्गत नेपाली विज्ञापन तथा सञ्चार क्षेत्रमा उत्कृष्ट सिर्जना र योगदानलाई सम्मान गर्ने प्रक्रिया अब अघि बढ्नेछ ।
भारतमा स्टारलिंक रोकिएको हो ? सरकारको दियो यस्तो जवाफ
काठमाडौं । भारतमा स्टारलिंकको प्रवेश रोक्न खोजिएको एलन मस्कको आरोपबारे केन्द्र सरकारले जवाफ दिएको छ । यस विषयमा प्रेस इन्फर्मेसन ब्युरो (पीआईबी) ले जारी गरेको विज्ञप्तिमा सामाजिक सञ्जालमा भारतको स्याटेलाइट कम्युनिकेसन सेवासम्बन्धी नियामकीय व्यवस्था निष्पक्ष नभएको र त्यसको कार्यान्वयनमा विभेद गरिएको भन्ने दाबी फैलाइएको उल्लेख छ । सरकारले स्याटेलाइट कम्युनिकेसन सेवाका लागि निष्पक्ष र गैरभेदभावपूर्ण नियामकीय व्यवस्था लागू गरिएको जनाएको छ । यसअन्तर्गत भारतमा स्याटेलाइट कम्युनिकेसन सेवा उपलब्ध गराउने प्रतिबद्धताअनुसार गैर–भूस्थिर कक्षामा आधारित स्याटेलाइट कम्युनिकेसन सेवाका लागि तीनवटा ग्लोबल मोबाइल पर्सनल कम्युनिकेसन बाई स्याटेलाइट (जीएमपीसीएस) सेवाप्रदायकलाई दूरसञ्चार लाइसेन्स दिइएको सरकारले जनाएको छ । पीआईबीका अनुसार लाइसेन्सको सर्तअनुसार प्रत्येक लाइसेन्सधारीले सुरक्षा सम्बन्धी मापदण्ड पूरा गरेको प्रमाणित गर्नुपर्ने हुन्छ । यसको उद्देश्य उपलब्ध गराइने सेवाले प्रयोगकर्ता र उनीहरूको तथ्यांकको सुरक्षासम्बन्धी आवश्यकताहरू पूरा गरेको सुनिश्चित गर्नु हो । यसअघि एलन मस्कले सामाजिक सञ्जाल एक्समा पोस्ट गर्दै केही निश्चित उद्योगपतिहरूले भारतमा आफ्नो कम्पनी स्टारलिंकको स्याटेलाइटमा आधारित इन्टरनेट सेवा प्रवेश गर्न ‘रोकिरहेको’ आरोप लगाएका थिए । एक पोस्टको जवाफ दिँदै मस्कले लेखेका थिए, ‘दुर्भाग्यवश, केही निश्चित उद्योगपतिहरूले हामीलाई रोकिरहेका छन्, ताकि भारतीय जनतामाथि उनीहरूको ‘एकाधिकारवादी’ पकड कायम रहोस् । उनीहरू को हुन्, तपाईं अनुमान गर्न सक्नुहुन्छ... यो भारतका जनताविरुद्धको अपराध हो ।’ मस्कले प्रतिक्रिया दिएको पोस्टमा भारतमा स्टारलिंकको आवश्यकता रहेको दाबी गरिएको थियो । भारतका अझै ठूलो संख्यामा गाउँहरू ब्रोडब्यान्ड इन्टरनेटको पहुँचबाट बाहिर रहेको र त्यस्ता क्षेत्रमा स्टारलिंक उपयोगी हुन सक्ने पोस्टमा उल्लेख थियो ।
उपसभामुख मेनुका खाँड, राप्रपा लुम्बिनीको अध्यक्ष निर्वाचित
काठमाडौं । राष्ट्रिय प्रजातन्त्र पार्टी (राप्रपा)को लुम्बिनी प्रदेश अध्यक्षमा प्रदेशसभाकी उपसभामुख मेनुका खाँड निर्वाचित भएकी छन् । प्रदेश अधिवेशनबाट खाँड प्रदेश अध्यक्षमा निर्वाचित भएको राप्रपाले जानकारी दिएको छ । खाँड राप्रपाकी केन्द्रीय सदस्यसमेत हुन् । खाँड २०७९ को प्रदेशसभा निर्वाचनमा राप्रपाको समानुपातिकतर्फबाट लुम्बिनी प्रदेशसभा सदस्य निर्वाचित भएकी थिइन् । प्रदेशसभामा निर्वाचित भएपछि उनी उपसभामुखमा निर्विरोध निर्वाचित भएकी थिइन् । उपसभामुखको संवैधानिक जिम्मेवारीमा रहेकै अवस्थामा पार्टीको प्रदेश नेतृत्वमा खाँड निर्वाचित भएकी हुन् ।
अन्धोपन घट्यो, आँखाका समस्या भने बढ्दै
काठमाडौं । ‘आँखालाई माया गरौं, दृष्टिको रक्षा गरौं’ भन्ने नाराका साथ बिहीबार (आज) विभिन्न कार्यक्रम आयोजना गरी विश्व दृष्टि दिवस मनाइँदैछ । हरेक वर्ष अक्टोबर महिनाको दोस्रो बिहीबार मनाइने दिवसले व्यक्तिगत रूपमा आँखाको हेरचाह गर्न प्रेरित गर्नुका साथै सबैका लागि सर्वसुलभ र गुणस्तरीय आँखा स्वास्थ्य सेवा सुनिश्चित गर्न सरकार तथा सरोकारवालाको ध्यानाकर्षण गराउँदै आएको छ । नेपालमा सन् १९८१ मा अन्धोपनको प्रचलन शून्य दशमलव ८४ प्रतिशत रहेकामा सन् २०२२ को आरएएबी सर्वेक्षणअनुसार यो घटेर शून्य दशमलव २८ प्रतिशतमा पुगेको छ । तर अन्धोपन घट्दै गए पनि आँखासम्बन्धी अन्य समस्या चुनौतीका रूपमा बढिरहेका छन् । नेत्रज्योति सङ्घका कार्यकारी निर्देशक डा. शैलेशकुमार मिश्रका अनुसार ग्लुकोमा, आँखाको पर्दासम्बन्धी रोग, मधुमेहसँग सम्बन्धित दृष्टि समस्या, उमेरसँग सम्बन्धित आँखाका रोग र दृष्टिदोष बढ्दो चुनौती बनेका छन् । बढ्दो औसत आयु, नसर्ने रोगको भार, बदलिँदो जीवनशैली र डिजिटल उपकरणको व्यापक प्रयोगले आँखाको स्वास्थ्यमा नयाँ जोखिम थपिरहेको उनले बताए । सङ्घका अनुसार हालसम्म ५ करोड २ लाख ४८९ जनालाई उपचार सेवा प्रदान गरिएको छ भने ५६ लाख ५९ हजार ६२४ जनाको आँखाको शल्यक्रिया गरिएको छ । संघले २८ आँखा अस्पताल र ४४ जिल्ला शाखाअन्तर्गतका २२६ उपचार केन्द्रमार्फत नेपालीसहित विदेशी नागरिकलाई आँखा सेवा दिँदै आएको छ ।
मतदान सर्यो, दिउँसो १ बजे सुरु हुने
काठमाडौं । नेपाली कांग्रेसको १५औं महाधिवेशन अन्तर्गत नयाँ केन्द्रीय कार्यसमिति चयनका लागि बिहीबार बिहान १० बजेदेखि हुने भनिएको मतदान अपरान्ह १ बजेका लागि सरेको छ । वर्षा र केही प्राविधिक कारणले मतदान अपरान्ह १ बजेदेखि सुरु गरिने केन्द्रीय निर्वाचन समितिले जनाएको छ । महाधिवेशनमा सहभागी देशभरका ७ हजार २५५ जना प्रतिनिधिहरूले आगामी नेतृत्व चयनका लागि आफ्नो मताधिकार प्रयोग गर्दैछन् । प्रतिनिधिहरूको सहजताका लागि काठमाडौंका तीनवटा प्रमुख स्थानमा सात वटा मतदान केन्द्रको व्यवस्था गरिएको निर्वाचन समितिका संयोजक खड्काले जानकारी दिएका छन् । जसअनुसार बागमती प्रदेशका प्रतिनिधिहरूका लागि राष्ट्रिय सभागृहमा मतदानको व्यवस्था मिलाइएको छ । त्यसैगरी कोशी, मधेश, कर्णाली र सुदूरपश्चिम प्रदेशका साथै भ्रातृ, शुभेच्छुक संस्था र जनसम्पर्क समितिका प्रतिनिधिहरूका लागि खुलामञ्चमा मतदान केन्द्र तोकिएको छ । गण्डकी र लुम्बिनी प्रदेशका महाधिवेशन प्रतिनिधिहरूले भने प्रज्ञा भवनमा पुगेर मतदान गर्नुपर्नेछ । मतदानका क्रममा प्रतिनिधिको परिचयपत्र तथा मतदाता नामावली रुजु गरेपछि मात्र भोट हाल्न दिइने निर्वाचन समितिले जनाएको छ ।
एनएमबि बैंकको लाभांश घोषणा
काठमाडौं । एनएमबि बैंकले लाभांश घोषणा गरेको छ । बैंक सञ्चालक समितिको असोज २१ गते बसेको बैठकले ७ प्रतिशत लाभांश प्रस्ताव गरेको हो । बैंकले गत आर्थिक वर्ष २०८२/८३ को नाफाबाट हाल कायम चुक्ता पुँजी १९ अर्ब २८ करोड ५० लाख ४१ हजार रुपैयाँको करसहित ७ प्रतिशतका दरले १ अर्ब ३४ करोड ९९ लाख ५२ हजार रुपैयाँ लाभांश प्रस्ताव गरेको हो । यस्तै, ३ अर्ब रुपैयाँ एनएमबि अविमोच्य असञ्चिति अग्राधिकार सेयरका लागि ८.२५ प्रतिशतका दरले १२ करोड २० लाख ५४ हजार रुपैयाँ नगद लाभांश वितरण गर्ने भएको हो । बैंकले प्रस्ताव गरेको उक्त लाभांश नेपाल राष्ट्र बैंकबाट स्वीकृत भई आगामी वार्षिक साधारण सभाले पारित गरेपश्चात् सेयरधनीहरुलाई वितरण गरिने कम्पनी सचिव प्रमोद कुमार दाहालले जानकारी दिए ।
पहिलोपटक वरिष्ठ नेताका रूपमा भण्डारी एमाले स्थायी कमिटी बैठकमा सहभागी हुँदै
काठमाडौं । नेकपा एमालेको स्थायी कमिटी बैठक आज बस्दैछ । पार्टी कार्यालय च्यासलमा दिउँसो १ बजे बस्ने बैठकमा पूर्वराष्ट्रपति विद्या भण्डारी पहिलोपटक वरिष्ठ नेताका रूपमा सहभागी हुने भएकी छन् । एमालेको केन्द्रीय कमिटी बैठकले स्थायी कमिटीलाई पूर्णता दिँदै सबै पदाधिकारीलाई स्थायी कमिटी सदस्य बनाउनुका साथै थप सात नेतालाई मनोनीत गरेपछि आज पहिलोपटक स्थायी कमिटी बैठक बस्न लागेको हो । पार्टी प्रचार प्रमुख नीरज आचार्यका अनुसार बैठक दिउँसो १ बजे च्यासलस्थित पार्टी कार्यालयमा बस्नेछ ।पूर्वराष्ट्रपति भण्डारीलाई एमालेले वरिष्ठ नेताका रूपमा मनोनयन गरेपछि स्थायी कमिटीको बैठकमा उनको यो पहिलो सहभागिता हुनेछ । राष्ट्रपति पदमा रहँदा पार्टीको सक्रिय राजनीतिबाट अलग रहेकी भण्डारी राष्ट्रपतिको कार्यकाल पूरा गरेपछि पुनः एमालेको राजनीतिमा फर्किएकी हुन् । केन्द्रीय कमिटीको निर्णयअनुसार स्थायी कमिटीमा पार्टीका सबै पदाधिकारी रहने व्यवस्था गरिएको छ । त्यसबाहेक पूर्ववरिष्ठ नेता ईश्वर पोखरेलसहित प्रदीप ज्ञवाली, काशीनाथ अधिकारी, देवराज घिमिरे, लालबाबु पण्डित, थममाया थापा र शिवमाया तुम्बाहाङ्फेलाई स्थायी कमिटीमा थप गरिएको छ । नयाँ संरचनाअनुसार बस्न लागेको बैठकलाई एमालेको आगामी राजनीतिक तथा संगठनात्मक दिशाका दृष्टिले पनि महत्त्वपूर्ण मानिएको छ । विशेषगरी पूर्वराष्ट्रपति भण्डारीको पार्टी राजनीतिमा पुनरागमनपछि उनको स्थायी कमिटी सहभागितालाई एमालेभित्र चासोका साथ हेरिएको छ । आजको बैठकमा पार्टीको समसामयिक राजनीतिक अवस्था, संगठनात्मक विषय तथा पछिल्ला केन्द्रीय कमिटीका निर्णयको कार्यान्वयनलगायत विषयमा छलफल हुने बताइएको छ ।
उत्कृष्ट ठहरिँदै माछापुच्छ्रे बैंकले पायो दुई प्रतिष्ठित अन्तर्राष्ट्रिय अवार्ड
काठमाडौं । ग्राहक सेवा, डिजिटल नवप्रवर्तन तथा जोखिम व्यवस्थापनमा उत्कृष्ट कार्य गरेको आधारमा माछापुच्छ्रे बैंकले दुई वटा प्रतिष्ठित अन्तर्राष्ट्रिय बैंकिङ अवार्ड प्राप्त गरेको छ । बैंकले इन्फोसिस फिनाकल इनोभेसन अवाड्र्स २०२६ अन्तर्गत ‘म्याक्सिमाइजिङ कस्टमर इन्गेजमेन्ट’ (ग्राहक संलग्नता अभिवृद्धि) विधामा प्लेटिनम अवार्ड प्राप्त गरेको हो । ग्राहकको खाता खोल्ने लगायत बैंकिङ सेवामा जोडिने प्रक्रियालाई अझ सरल, सहज र प्रभावकारी बनाउन सञ्चालन गरिएको ‘रिइन्भेन्टिङ कस्टमर अनबोर्डिङ’ पहलकदमीको मूल्यांकन गर्दै बैंकलाई उक्त सम्मान प्रदान गरिएको हो । विश्वभरका वित्तीय संस्थाले प्रविधि र ग्राहक केन्द्रित सेवामा गरेका उत्कृष्ट कार्यलाई सम्मान गर्ने यस कार्यक्रमको सन् २०२६ को संस्करणमा ९ विधामा ५०० भन्दा बढी आवेदनहरूमध्येबाट विजेता छनौट गरिएको थियो । यसैगरी, बैंकले अर्को अन्तर्राष्ट्रिय सम्मानस्वरूप ‘बेस्ट पर्फर्मेन्स अन रिस्क म्यानेजमेन्ट’ (जोखिम व्यवस्थापनमा सर्वोत्कृष्ट प्रदर्शन) अवार्ड समेत प्राप्त गरेको छ । इन्डियन चेम्बर अफ कमर्सद्वारा नयाँ दिल्लीमा आयोजित ‘चौथो इमर्जिङ एसिया बैंकिङ कन्क्लेभ एन्ड अवाड्र्स २०२६’ मा बैंकलाई उक्त अवार्ड प्रदान गरिएको हो । कर्जा जोखिम, सञ्चालन जोखिम, बजार जोखिम तथा तरलता जोखिम व्यवस्थापनका क्षेत्रमा बैंकले गरेको उत्कृष्ट प्रयास र सुरक्षित एवं जिम्मेवार बैंकिङ अभ्यासको कदर गर्दै यो सम्मान दिइएको हो । बैंकले यसअघि पनि भिसा लिडरसिप कन्क्लेभ अवार्ड (२०२३ र २०२४), इन्फोसिस फिनाकल इनोभेसन अवार्ड (२०२३ र २०२५), तथा राइजिङ स्टार इन असेट क्वालिटी अवार्ड (२०२५) जस्ता थुप्रै अन्तर्राष्ट्रिय पुरस्कारहरू प्राप्त गरिसकेको छ ।
