इसेवाको सीईओमा निरज शर्मा नियुक्त
काठमाडौं । नेपालको डिजिटल भुक्तानी सेवा प्रदायक कम्पनी इसेवा लिमिटेडले नयाँ प्रमुख कार्यकारी अधिकृत (सीईओ) नियुक्त गरेको छ । कम्पनीले निरज शर्मालाई असोज १२ गतेदेखि लागू हुने गरी सीईओ नियुक्त गरेको हो । इसेवाको सञ्चालक समितिले भदौ ३० गते बसेको बैठकबाट शर्मालाई चार वर्षका लागि सीईओ नियुक्त गर्ने निर्णय गरेको जनाएको छ । कम्पनीका अनुसार शर्मासँग बैंकिङ तथा वित्तीय क्षेत्रमा २५ वर्षभन्दा बढीको अनुभव छ । उनले ट्रान्जेक्सन बैंकिङ, कार्ड प्रणाली, डिजिटल रूपान्तरण र रिटेल बैंकिङ क्षेत्रमा काम गरेका छन् । इसेवाले उनको नेतृत्वमा कम्पनीको डिजिटल सेवा र ग्राहक अनुभव अझ सुदृढ हुने विश्वास व्यक्त गरेको छ । जगदीश खड्काको कार्यकाल सकियो इसेवाका निवर्तमान सीईओ जगदीश खड्काको चार वर्षे कार्यकाल पूरा भएको छ । उनी २०७९ असोज १२ गते सीईओ बनेका थिए । कम्पनीका अनुसार खड्काको नेतृत्वमा इसेवाले डिजिटल भुक्तानी सेवाको दायरा उल्लेखनीय रूपमा विस्तार गरेको छ । उनको कार्यकालमा इसेवाका प्रयोगकर्ताको संख्या १ करोड ४० लाख र मर्चेन्टको संख्या ६ लाखभन्दा बढी पुगेको छ । यस अवधिमा इसेवाले डिजिटल कर्जा, फाइनान्स ३६०, इसेवा सर्कल, बिजनेस एप, इन्टेन्ट पे, बीमा सेवा लगायत नयाँ डिजिटल सेवा थप गरेको कम्पनीले जनाएको छ । दृष्टिविहीन प्रयोगकर्ताका लागि ‘टकब्याक’ फिचर र नेपाली भाषामा एप सञ्चालन पनि यही अवधिमा सुरु गरिएको थियो । कम्पनीले खड्काले इसेवाको डिजिटल विस्तार र समावेशी वित्तीय सेवामा महत्वपूर्ण योगदान दिएको उल्लेख गर्दै उनको आगामी यात्राको सफलताको शुभकामना दिएको छ ।
नगर विकास कोषले माग्यो ईडी, कति चाहिन्छ योग्यता ?
काठमाडौं । नगर विकास कोषले रिक्त कार्यकारी निर्देशक (ईडी) पदका लागि आवेदन माग गरेको छ । नगर विकास कोष ऐन, २०५३, नियमावली, २०५४ तथा नगर विकास कोष कर्मचारी सेवा शर्त (संशोधित) विनियमावली, २०६८ बमोजिम रिक्त पदमा नियुक्तिका लागि आवेदन माग गरिएको हो । इच्छुक योग्य उम्मेदवारले सूचना प्रकाशित भएको मितिले २१ दिनभित्र आवेदन दिनुपर्नेछ । कार्यकारी निर्देशक पदका लागि मान्यता प्राप्त विश्वविद्यालयबाट अर्थशास्त्र, व्यवस्थापन, चार्टर्ड एकाउन्टेन्सी वा इन्जिनियरिङमध्ये कुनै एक विषयमा स्नातकोत्तर उपाधि हासिल गरी सम्बन्धित क्षेत्रमा कम्तीमा पाँच वर्षको अनुभव भएको हुनुपर्नेछ । त्यस्तै, उल्लिखित विषयमध्ये कुनै एकमा स्नातक उपाधि हासिल गरी सम्बन्धित क्षेत्रमा कम्तीमा सात वर्षको अनुभव भएकाले पनि आवेदन दिन सक्नेछन् । चार्टर्ड एकाउन्टेन्सीलाई मात्र शैक्षिक योग्यताको आधार बनाएका उम्मेदवारले कानुनले तोकेको निकायबाट समकक्षताको प्रमाणपत्र लिएको हुनुपर्नेछ । दरखास्त दिने अन्तिम मितिसम्म उम्मेदवारको उमेर ३५ वर्ष पूरा भएको र ५४ वर्ष ननाघेको हुनुपर्नेछ । आवेदनका साथ नेपाली नागरिकता, शैक्षिक योग्यता, तालिम तथा अनुभवका प्रमाणित प्रतिलिपि पेस गर्नुपर्नेछ । साथै, नगर विकास कोष कर्मचारी सेवा शर्त (संशोधित) विनियमावली, २०६८ को अनुसूची १० बमोजिमको दरखास्त फाराम पेस गर्नुपर्नेछ । त्यस्तै, विनियमावलीको विनियम १३८ बमोजिम अयोग्य नरहेको स्वघोषणा तथा कार्यकारी निर्देशक सिफारिस समितिले उपलब्ध गराएको ढाँचामा तयार गरिएको व्यावसायिक योजनासहितको कार्यपत्र दुई प्रति पेस गर्नुपर्नेछ । कार्यपत्र नेपाली भाषामा ५ हजार शब्दमा नबढ्ने गरी तयार गर्नुपर्नेछ । कार्यकारी निर्देशकको पारिश्रमिक तथा सुविधा नगर विकास कोष नियमावली, २०५४ मा तोकिएबमोजिम हुने जनाइएको छ । कोषका अनुसार सम्बन्धित कानुन, दरखास्त फाराम, व्यावसायिक योजनाको ढाँचा र स्वघोषणाको ढाँचा नगर विकास कोषको वेबसाइटबाट प्राप्त गर्न सकिनेछ । रीतपूर्वक प्राप्त नभएका दरखास्त फाराम सिफारिस समितिले रद्द गर्न सक्नेछ ।
यातायात तथा पारवहन समितिको उपसभापतिमा मेघराज पौडेल
काठमाडौं । अटोमोबाइल क्षेत्रका अनुभवी व्यवसायी मेघराज पौडेल नेपाल उद्योग वाणिज्य महासंघ (एफएनसीसीआई) अन्तर्गतको यातायात तथा पारवहन समितिको उपसभापतिमा मनोनीत भएका छन् । एफएनसीसीआईले कार्यकारिणी समिति सदस्य लिलेन्द्र प्रसाद प्रधानको सभापतित्वमा गठित यातायात तथा पारवहन समितिमा पौडेललाई उपसभापतिको जिम्मेवारी दिएको हो । महासंघले यातायात तथा पारवहन क्षेत्रका चुनौती समाधान, व्यापार सहजीकरण तथा महासंघका कार्यक्रमलाई प्रभावकारी बनाउन पौडेलको अनुभव, ज्ञान र सक्रिय सहभागिताले महत्वपूर्ण योगदान पुग्ने विश्वास व्यक्त गरेको छ । पौडेल हाल नाडा अटोमोबाइल्स एसोसिएसन अफ नेपाल (नाडा) का सचिव तथा अल्फा अटोमोटिभ प्रालि का निर्देशकका रूपमा कार्यरत छन् । उनी लामो समयदेखि नेपालको अटोमोबाइल व्यवसाय, बजार विस्तार तथा नीतिगत विषयमा सक्रिय रहँदै आएका छन् । नेपालमा दुईपांग्रे सवारीसाधनको बजार विस्तारको सुरुआती चरणदेखि नै अटोमोबाइल व्यवसायमा आबद्ध रहेका पौडेलले एउटा शोरुमबाट वार्षिक करिब ५० वटा मोटरसाइकल बिक्री हुने अवस्थादेखि अहिलेको विस्तारित बजारसम्मको यात्रा नजिकबाट अनुभव गरेको उल्लेख गरिएको छ । व्यवसायिक भूमिकासँगै पौडेल नाडामार्फत अटोमोबाइल क्षेत्रसँग सम्बन्धित कर तथा राजस्व नीति, एसेम्बली उद्योग, एमआरपी, व्यवसाय सञ्चालनको वातावरण तथा स्थानीय उत्पादन र स्वदेशी पार्ट्सको प्रयोगलगायत विषयमा सरकार र सम्बन्धित निकायसँग हुने छलफलमा पनि सक्रिय सहभागी रहँदै आएका छन् । स्थानीय उत्पादन र एसेम्बली उद्योगको विकास, अन्तर्राष्ट्रिय मापदण्डअनुसार स्वदेशी पार्ट्सको प्रयोग तथा व्यवसायमैत्री नीतिगत वातावरण निर्माणमा उनले निरन्तर जोड दिँदै आएको पनि विज्ञप्तिमा उल्लेख छ । एफएनसीसीआईको यातायात तथा पारवहन समितिले यातायात व्यवसाय, पारवहन, व्यापार सहजीकरण तथा यस क्षेत्रसँग सम्बन्धित नीतिगत विषयमा निजी क्षेत्रको धारणा प्रस्तुत गर्दै आएको छ । महासंघले पौडेलको अनुभवले समितिका आगामी पहल र नीतिगत छलफलमा थप योगदान पुग्ने अपेक्षा गरेको छ ।
