उद्योगी अग्रवाललाई ७ दिन हिरासतमा राख्न अनुमति
काठमाडौं । कालोबजारीको आरोपमा पक्राउ परेका जगदम्बा समूहका प्रबन्ध निर्देशक सुलभ अग्रवाललाई थप ७ दिन हिरासतमा राखेर अनुसन्धान गर्न प्रहरीलाई जिल्ला अदालत, काठमाडौंले अनुमति दिएको छ । ३ हजारदेखि पाँच हजार रुपैयाँसम्म पर्ने थर्मलगनलाई अग्रवालले १५ हजार रुपैयाँसम्म बिक्री गरिरहेको सूचनाका आधारमा उनलाई महानगरीय प्रहरी अपराध महाशाखाको टोलिले मंगलबार पक्राउ गरेको थियो । प्रहरीले उनको साथबाट ६७ थान थर्मलगन पनि बरामद गरेको थियो । कालोबजारीको आरोपमा पक्राउपरेकाले हिरासतमा राखेर अनुसन्धान गर्न म्याद थप गरेको महानगरीय प्रहरी परिसर काठमाडौंले जानकारी दिएको छ । जगदम्बा ग्रुप नेपालका सबैभन्दा ठूलो उत्पादन मुलक उद्योगमा पर्छ । जगदम्बा स्टील, जगदम्बा सिमेन्ट लगायत ठूला उद्योग यो समूहले चलाउँदै आएको छ ।
लोमस फर्मास्युटिक्लले बनायो स्यानिटाईजर, घरघरमा पुर्याउने तयारी
काठमाडौं । लोमस फर्मास्युटिक्ल कम्पनीले ह्याण्ड स्यानिटाईजरको उत्पादन गरि बजारमा पठाउन सुरु गरेको छ । कम्पनीले स्यानिटाईजर उपभोक्ताको घरघरमा पुर्याउन अनलाइन बिक्रेतासगँ छलफल गरिरहेको जानकारी दिएको छ । केही दिन पछि कम्पनीले उत्पादन गरेको ह्याण्ड स्यानिटाईजर घरघरमा पुर्याउने पनि कम्पनीले जानकारी दिएको छ । विश्वमा फैलिएको कोरोना भाइरसको रोकथाम तथा नियन्त्रणको लागि लोमस फर्मास्युटिक्लले डब्लुएचओको मान्यता अनुसार स्यानिटाईजर उत्पादन गरेको बताएको छ । सो फर्मास्युटिक्लले ह्याण्ड एक्स नामक स्यानिटाईजर बजारमा ल्याएको हो । कम्पनीले दैनिक १० हजार बोटल उत्पादन गरिरहेको छ । लोमस फर्मास्युटिक्लले उत्पादन गरेको सय एमएलको स्यानिटाईजरको बजार मूल्य १ सय ५० रुपैयाँ तोकेको छ । नेपाल सरकारका सबै सम्बन्धित निकायबाट अनुमती लिएर कम्पनीले उत्पादन सुरु गरेको हो ।
उद्योग परिसंघले कर्णाली प्रदेश र काठमाडाैंमा वितरण गर्याे राहत
काठमाडाैं । नेपाल उद्योग परिसंघले कोरोना भाईरसका कारण उत्पन्न विषम परिस्थितीसंग जुध्न विभिन्न तहमा आवश्यक खाद्यान्न सामाग्री वितरणलाई जारी राखेको छ । विविध कारणले खाद्य सामाग्री अभाव भएकाहरुलाई परिसंघले केन्द्र, प्रदेश सरकार तथा स्थानीय निकायसंग समन्वय गरि खाद्य सामाग्री उपलब्ध गराउने प्रयास गरिरहेको छ । आज एक कार्यक्रममा ‘कर्णाली प्रदेश उद्योग परिसंघ’का संयोजक टेक बहादुर भण्डारीले कर्णाली प्रदेशका मुख्यमन्त्री माननीय महेन्द्र बहादुर शाहीलाई राहत सामाग्री उपलब्ध गराएका छन् । एक हजार थान खाद्यान्न लगायतका सामाग्री रहेको प्याकेट प्रदेश सरकारले आवश्यकता अनुसार वितरण गर्ने छ । त्यस्तै, आजै काठमाडाैं महानगरपालिकाको भिमसेनगोला क्षेत्रका विपन्न परिवारलाई परिसंघका अध्यक्ष सतिशकुमार मोर तथा वरिष्ठ उपाध्यक्ष विष्णुकुमार अग्रवालले खाद्यान्न समाग्री वितरण गरेका छन् । प्रदेश सभा सदस्य माननीय गणेश प्रसाद दुलाल, महानगर पालिकाका प्रमुख प्रशासकिय अधिकृत एकनारायण अर्याल, काठमाण्डौ जिल्ला प्रमुख अधिकारी जनकराज दाहाल तथा ३१ नं वडा अध्यक्ष नारायणप्रसाद भण्डारी लगायतकाको रोहवरमा दाल, चामल, नुन, तेल लगायत अन्य अत्यावश्यकीय सामाग्री रहेका प्यकेटहरु वनाई हस्तान्तरण गरिएको हो । परिसंघले नेपालका सवै प्रदेश लगायत काठमाडाैं, ललितपुर तथा भक्तपुरका विभिन्न स्थानहरुमा यस्ता राहत सामाग्रीहरु उपलब्ध गराउदै आएको छ । यस्तो विषम परिस्थितीमा आफ्ना सदस्य प्रतिष्ठानहरुलाई दैनिक उपभोग्य वस्तु तथा अत्यावश्यकीय सामानहरुको उत्पादनलाई निरन्ता दिदै सोको आपुर्ति व्यवस्थालाई दुरुस्त राख्न समेत आर्दिक आग्रह गर्दछ । यस्ता कारखाना तथा उद्योग संचालनमा सहजता ल्याउन त्यहाँ काम गर्ने मजदुर तथा कर्मचारीको आवागमनलाई समेत सहज गराउन सम्बद्ध सवैमा अपिल गर्दछौ ।
