नेप्से परिसूचकले पार गर्यो २९०० को बिन्दु, डेढ घण्टामै पौने ४ अर्बको कारोबार
काठमाडौं । साताको पहिलो दिन खुलेको सेयर बजारमा नेप्से परिसूचकले २९०० बिन्दु पार गरेको छ । कारोबार खुलेको केही मिनेटमै परिसूचकले सजिलै २९०० को बिन्दु पार गर्न सफल भएको हो । दिउँसो १२ बजेर १९ मिनेट जाँदा परिसूचक ६८.६९ बिन्दुले उकालो लागेर २९२६.४४ बिन्दुमा पुगेको छ । जुन अघिल्लो कारोबारको तुलनामा २.४० प्रतिशतले बढी हो । त्यस्तै, कारोबार खुलेको डेढ घण्टामै पौने ४ अर्बको सेयर कारोबार भएको छ । यो समाचार तयार पार्दासम्म बजारमा २२१ स्क्रिप्सको ३ अर्ब ७६ करोड रुपैयाँ बराबरको सेयर कारोबार भइसकेको छ । जसमध्ये अरुण भ्याली हाइड्रो डेभलपमेन्ट कम्पनीको उच्च कारोबार भएको छ । यो अवधिसम्म कम्पनीको १५ करोड ४७ लाख रुपैयाँ बराबरको सेयर किनबेच भएको हो ।
सेन्ट्रल फाईनान्सको ११ प्रतिशत लाभांश पारित, पुँजी ९४ करोड ८८ लाख पुग्ने
काठमाडौं । सेन्ट्रल फाईनान्सको प्रस्तावित ११ प्रतिशत लाभांश पारित भएको छ । पुस ३० गते सम्पन्न संस्थाको २५औं वार्षिक साधारणसभाले प्रस्तावित लाभांश पारित गरेको हो । यससँगै सेयरधनीले आर्थिक वर्ष २०७७/७८ को नाफाबाट चुक्ता पुँजीको ७.७ प्रतिशत बोनश सेयर र ३.३ प्रतिशत नगद लाभांश पाउने छन् । प्रस्तावित ७.७ प्रतिशत बोनस सेयरपछि संस्थाको चुक्ता पुँजी ९४ करोड ८८ लाख रुपैयाँ पुग्ने छ । त्यस्तै, हाल संस्थाको निक्षेप ५ अर्ब ८२ करोड रुपैयाँ र कर्जा लगानी ५ अर्ब १ करोड रुपैयाँ पुग्ने छ । १४ वटा शाखा र भक्तपुरको सल्लाघारीमा १ एक्सटेन्सन काउण्टर सञ्चालनमा रहेको संस्थाले छिट्टै नै झापाको बिर्तामोड र रुपन्देहीको भैरहवामा नयाँ शाखा सञ्चालनमा ल्याउने तयारी गरिरहेको छ । त्यस्तै, भविष्यमा थप शाखा खोली शाखा सञ्जाल र कार्यक्षेत्र थप विस्तार गरिने प्रमुख कार्यकारी अधिकृत रजोज मान श्रेष्ठले बताए । संस्थाले डेबिट कार्ड, एसएमएस बैंकिङ्ग, चेक क्लियरिङ्ग, आईपीएस, कनेक्ट आईपीएस, रेमिट्यान्स तथा सी-आस्वा जस्ता आधुनिक बैंकिङ्ग सेवा प्रदान गर्दै आएको छ । ग्राहकहरुको बैंक खाता, वालेट, क्यूआर जस्ता विद्युतीय रकमान्तर तथा भुक्तानीका माध्यममा सहज पहुँचको लागि नेपाल क्लियरिङ्ग हाउसले प्रवद्र्धन गरेको नेशनल पेमेन्ट स्वीच (एनपीएस) मा संस्था सदस्य बनिसकेको छ । संस्थाले विभिन्न शाखा कार्यालयहरुमा एटीएम मेसिन पनि संचालन गरिरहेको छ । त्यस्तै, संस्थाले सेन्ट्रल स्मार्ट मोबाइल बैंकिङ्ग एप पनि सञ्चालनमा ल्याएको जानकारी दिँदै प्रविधिको उच्चतम प्रयोग गरी थप आधुनिक सेवा प्रदान गर्दै लैजाने पनि सभामा जानकारी दिए ।
समृद्धि फाइनान्सको सञ्चालक समितिमा ६ जना निर्वाचित, भट्टराई बने अध्यक्ष
काठमाडौं । समृद्धि फाइनान्सको सञ्चालक समितिमा ६ जना निर्वाचित भएका छन् । पुस ३० गते सम्पन्न संस्थाको सभाले संस्थापक समूहबाट ४ जना र सर्वसाधारण समूहबाट २ जनालाई सञ्चालक समितिमा निर्वाचित गरेको हो । जसमा संस्थापक समुहबाट ठाकुरप्रसाद भट्टराई, दिपक अधिकारी, गुप्तबहादुर राना र सुजन अधिकारी तथा सर्वसाधारण समुहबाट विनोद कुमार सुवेदी र शिवलाल पुरी निर्वाचित भएका हुन् । त्यस्तै, उक्त सभाबाट बसेको संचालक समितिको बैठकले नवनिर्वाचित सञ्चालक ठाकुरप्रसाद भट्टराईलाई अध्यक्ष पदमा चयन गरेको छ । संस्थाले आफ्नो २० औं बार्षिक साधारण सभा प्रधान कार्यालय रहेको हेटांैडा, मकवानपुरको होटेल एभोकाडो आर्किड रिसोर्टमा सञ्चालक समितिका अध्यक्ष विनोद कुमार सुवेदीको अध्यक्षतामा सम्पन्न गरेको हो । सभामा भौतिक र भर्चुअल माध्यमबाट सेयरधनीहरुले सहभागीता जनाएका थिए । सभामा सञ्चालक समितिको तर्फबाट प्रस्तुत हुने अघिल्लो आ.व.को वार्षिक प्रतिवेदन पारित गर्ने, वासलात, नाफा नोक्सान र नगद प्रवाह विवरण माथि छलफल गर्ने आ.व. २०७८/०७९ लागि बाह्य लेखापरिक्षक नियुक्ति गर्ने र निजको पारिश्रमिक तोक्ने, संस्थापक र सर्वसाधारण समुहबाट संचालकको निर्वाचन गर्ने, फाइनान्सको मुख्य कार्यालय परिवर्तन गरि काठमाडौं-२८ मा स्थान्तरण गर्ने लगायतका एजेन्डाहरु रहेका थिए ।
