दोहोराे अंकले घट्यो नेप्से परिसूचक, ३ अर्बको कारोबार
काठमाडौं । सेयर कारोबार मापक नेप्से परिसूचक दोहोरो अंकले घटेको छ । बुधबार नेप्से परिसूचक १५ दशमलव ५ अंकले घटेर २ हजार ७ सय २०.४३ अंकमा झरेको हो । मंगलबारको तुलनामा बुधबार नेप्से परिसूचक घटेसँगै कारोबार रकम पनि घटेको छ । बुधबार ३ अर्ब १३ करोड १२ लाख १० हजार २८२ रुपैयाँमा कारोबार रोकिएको छ । बुधबार २२८ ओटा धितोपत्रमध्ये सबैभन्दा बढी नेपाल दुरसञ्चार कम्पनीको सेयर कारोबार भएको छ । कम्पनीको एकैदिन १ करोड ८४ लाख रुपैयाँ बराबरको कारोबार भएको हो । यस्तै, दिब्यासोरी हाइड्रोपावर र युनाइटेड आईडीआई मार्दी आरबी हाइड्रोपावरको सेयर मूल्यमा भने पोजिटिभ सर्किट नै लागेको छ । दुबै कम्पनीको सेयरमा खरिद चाप देखिंदा मूल्य १० प्रतिशतले बढेको छ । यस्तैगरी, बजारमा प्रभु बैंक र नेपाल फाइनान्स लिमिटेडको सेयर मूल्य ३ प्रतिशतले घटेको छ । प्रभु बैंकको सेयर मूल्य ३९ दशमलब २० रुपैयाँले घटेर प्रतिकित्ता ९ सय ५० रुपैयाँमा झरेको हो । त्यस्तै नेपाल फाइनान्स लिमिटेडको सेयर मूल्य २५ दशमलब ९० रुपैयाँले घटेर प्रतिकित्ता ६ सय ८९ रुपैयाँमा झरेको हो । बुधबार १३ ओटा समूहमध्ये १२ ओटा उपसमूहहरु राताम्मे देखिएका छन् । जसमध्ये हाइड्राेपावरको सेयर मूल्य ३५ दशमलब ६६ रुपैयाँले बढेको हो ।
नेप्सेले २५ प्रतिशत आईपीओ निकाल्न छलफल चलायो
काठमाडौं । नेपाल स्टक एक्सचेञ्ज (नेप्से) ले २५ प्रतिशत साधारण सेयर (आईपीओ) निष्काशन गर्ने छलफल सुरु गरेको छ । नेप्सेले सर्वसाधारणका लागि २५ प्रतिशत सेयर निष्कासनका लागि सरोकारवालासँग छलफल चलाएको हो । मंगलबार सेयर लगानीकर्ता, नेपाल उद्योग वाणिज्य महासंघ, नेपाल उद्योग परिसंघ, नेपाल चेम्बर अफ कमर्स तथा मर्चेट बैंकर्ससँग धितोपत्र बजार व्यवस्थापन सम्बन्धि सुझाव संकलन कार्यक्रममा छलफल गर्दै नेप्सेले सर्वसाधारणका लागि २५ प्रतिशत साधारण सेयर निश्कासनको विषयमा छलफल गरेको हो । सेयर स्वामित्व संरचनालाई परिवर्तनका लागि नेप्सेले २५ प्रतिशत सर्वसाधारणका लागि छुट्याउने योजनाका साथ अगाडि बढेको हो । सेयर निश्कासन कुन तरिकाबाट गर्ने, कति रुपैयाँ मूल्य तोक्ने लगायत विषयमा भने नेप्सेले सरोकारवालाको सुझाव लिइरहेको छ । हाल नेप्सेमा सरकारको ५८.६६ प्रतिशत, राष्ट्र बैंकको १४.६० प्रतिशत, कर्मचारी सञ्चयकोषको १० प्रतिशत, राष्ट्रिय वाणिज्य बैंकको ६.१४ प्रतिशत, प्रभु बैंकको ५ प्रतिशत, लक्ष्मी बैंकको ५ प्रतिशत र अन्य ०.६० प्रतिशत सेयर स्वामित्व छ । सेयर निश्कासन गरेर पूँजी वृद्धि गर्ने नेप्सेको योजना छ । यस्तै नेप्सेले विदेशी रणनीतिक साझेदार भित्र्याउने याेजना गर्नुको साथै विदेशी साझेदारलाई १५ प्रतिशत सेयर दिने भन्ने प्रस्तावमा पनि छलफल चलाएको छ ।
खुल्यो नेष्डो समृद्ध लघुवित्तको आईपीओ
काठमाडौं । नेष्डो समृद्ध लघुवित्त वित्तीय संस्थाको आईपीओमा आजदेखि आवेदन दिन पाइने भएको छ । कम्पनीले सर्वसाधारणका लागि बुधबार (फागुन ११ गते) देखि साधारण सेयर बिक्री खुला गरेको हो । कम्पनीले प्रतिकित्ता एक सय रुपैयाँअङ्कित मूल्यमा आठ करोड २८ लाख ७५ हजार रुपैयाँ बराबरको आठ लाख २८ हजार ७५० कित्ता प्रारम्भिक सार्वजनिक निष्कासन ९आइपीओ०को बिक्री खुला गरेको हो । कम्पनीले निष्काशन गर्ने साधारण सेयरमा कूल निष्काशनको ५ प्रतिशत अर्थात् ४१ हजार ४३७ कित्ता सामूहिक लगानी कोषलाई र जारी पुँजीको ०.५ प्रतिशत अर्थात् १२ हजार ७५० कित्ता सेयर कर्मचारीलाई सुरक्षित गरी बाँकी रहने सात लाख ७४ हजार ५६३ कित्ता सेयर खरिदका लागि सर्वसाधारणले आवेदन दिन पाउने कम्पनीले जनाएको छ । सर्वसाधारणले फागुन १५ गतेसम्म न्यूनतम १० कित्तादेखि अधिकतम एक हजार कित्तासम्मका लागि आवेदन दिन सक्नेछन् र सो अवधिसम्म माग गरिएबमोजिम आवेदन नआए आगामी फागुन २५ सम्म निष्काशन खुला रहने कम्पनीले जनाएको छ । उनीहरुले नेपाल धितोपत्र बोर्डबाट सिआस्वा सुविधा प्रदान गर्न अनुमति पाएका बैंक तथा वित्तीय संस्था र तिनका शाखा कार्यालयका साथै अनलाइनमार्फत ‘मेरोसेयर’ प्रयोग गरेर पनि शेयर खरिदका लागि आवेदन दिन सकिने कम्पनीको धितोपत्र निष्काशन तथा बिक्री प्रबन्धकमा ग्लोबल आइएमई क्यापिटलले जनाएको छ । हाल कम्पनीको चुक्ता पुँजी १७ करोड २१ लाख रुपैयाँ छ । आईपीओ पश्चात २५ करोड ५० लाख रुपैयाँ पुग्नेछ । धितोपत्रको सार्वजनिक निष्काशन गर्दा क्रेडिट रेटिङ गर्नुपर्ने व्यवस्थाअनुसार रेटिङ गर्दा इक्रा नेपालले कम्पनीलाई ‘इक्राएनपी आइआर बिबी प्लस’ ग्रेडिङ प्रदान गरेको छ । रेटिङअनुसार कम्पनीको हालको अवस्था वित्तीय दायित्व वहन गर्ने क्षमतामा मध्यम जोखिम रहेको भन्ने बुझिन्छ ।
