नेप्सेमा थप दुई बीमा कम्पनीको सेयर कारोबार रोक्का
काठमाडौं । नेपाल स्टक एक्स्चेञ्ज (नेप्से)मा थप दुई बीमा कम्पनीको सेयर कारोबार रोक्का भएको छ । नेप्सेले मर्जर प्रकृयामा गएका सानिमा जनरल र जनरल इन्स्योरेन्सको सेयर कारोबार रोक्का गरिदिएको हो । यी दुईले असार २९ गते मात्रै मर्जरमा जानको लागि प्रारम्भिक समझदारी पत्रमा हस्ताक्षर गरेका थिए । सोहि अनुसार नेप्सेले असार ३० गतेदेखि दुबै कम्पनीको सेयर कारोबार रोकिदिएको हो । यससँगै अब दुई इन्स्योरेन्सबीचको मर्जर प्रकृया सम्पन्न भई एकीकृत कारोबार नभएसम्म दोश्रो बजारमा सेयर कारोबार खुल्ने छैन । दुबै इन्स्योरेन्स समान हैसियत अर्थात १ बराबर १ को अनुपातमा एक आपसमा मर्ज हुन लागेका हुन् । पछिल्लो समय नेप्सेमा अधिकांश बीमा कम्पनीको सेयर कारोबार रोक्का भइरहेको छ । सबै कम्पनी धमाधम मर्जर प्रकृयामा जनलाई एमओयू गरेसँगै नेप्सेले कारोबार रोक्का गरिदिएको हो ।
नेप्सेका कर्मचारीलाई नियम विपरित ६ महिनाको तलब बराबरको बोनस
काठमाडौं । नेपाल स्टक एक्सचेञ्ज (नेप्से)ले कर्मचारीलाई नियम विपरित बढी बोनस वितरण गरेको छ । महालेखा परीक्षक कार्यालयले सार्वजनिक गरेको ५९औं वार्षिक प्रतिवेदनका अनुसार नेप्सेले कर्मचारीलाई बोनस विनियमाली २०३९ को नियम ७ विपरित बढी बोनस वितरण गरेको जनाएको हो । नेपाल सरकारको स्वामित्वमा नाफा आर्जन गर्ने उद्देश्यले नेपाल सरकारले तोकिदिएको क्षेत्रमा स्थापना भएको एकाधिकार प्राप्त प्रतिष्ठानमा कार्यरत अधिकृत तहका कर्मचारीले एक आर्थिक वर्षमा शुरु तलव स्केलको दुई महिनाको तलब बराबरको रकम र सोभन्दा तल्लो तहका कर्मचारीले तीन महिनाको तलब बराबरको रकमभन्दा बढी हुने गरी बोनस नपाउने व्यवस्था भएकोमा नेप्सले भने बढी नै बोनस वितरण गरेको प्रतिवेदनामा उल्लेख छ । नेप्सेले २०७६/७७ मा कर्मचारी बोनस व्यवस्था गरेको रकमबाट ६ महिनाको तलब बराबरको ८६ लाख ३ हजार रुपैयाँ वितरण गरेको छ । नियमावलीमा भएको व्यवस्था भन्दा बढी भुक्तानी भएको बोनस रकम असुल हुनु पर्ने प्रतिवेदनमा उल्लेख छ ।
दुई इन्स्योरेन्ससहित २६ संस्थानले गरेनन् लेखापरीक्षण, १२ वटा खारेज
काठमाडौं । गत आर्थिक वर्षमा दुई इन्स्योरेन्ससहित २६ संस्थानले लेखापरीक्षण गराएका छैनन् । महालेखा परीक्षकको कार्यालयले बुधबार सार्वजनिक गरेको ५९ औं प्रतिवेदन अनुसार ती संस्थानले आर्थिक वर्ष २०७७/७८ सम्म लेखापरीक्षण नगराएका हुन् । २६ संस्थानमध्ये इन्स्योरेन्सबाट राष्ट्रिय बीमा कम्पनीले ५ वर्ष र राष्ट्रिय बीमा संस्थानले ९ वर्षदेखि लेखापरीक्षण गराएका छैनन् । त्यस्तै, खाद्य व्यवस्था तथा व्यापार कम्पनीले तीन वर्ष, विशाल बजार कम्पनीले पनि ५ वर्षदेखि लेखापरीक्षण गराउन सकेका छैनन् । २०७८ को जेठ महिनासम्ममा १६ सार्वजनिक संस्थानले मात्र तोकिएको समयमा २०७७/०७८ सम्मको लेखापरीक्षण गराएका छन् । हाल ६९ सार्वजनिक संस्थानमध्ये विभिन्न वर्ष विनिवेश भएका संस्था ३० तथा पछिल्लो समयमा स्थापना भै थप भएका समेत हाल अस्तित्वमा रहेका ४४ संस्थामध्ये ४२ संस्था सञ्चालनमा रहेका छन् । हालसम्म विनिवेश गरिएका ३० संस्थानमध्ये १२ संस्थान खारेजी गरिएकोमा एक संस्थान (कृषि चुन उद्योग लिमिटेड) को मात्र कम्पनी रजिष्ट्रारको कार्यालयबाट कानूनी रुपमा खारेजी प्रक्रिया सम्पन्न भएको छ । अन्य संस्थानहरु कानूनी रुपमा खारेजी प्रक्रिया सम्पन्न भएका छैनन् । रोजगारी तथा उत्पादनमा टेवा पुर्याउने १८ संस्थामध्ये हाल १२ संस्था सञ्चालनमा रहेको, ६ संस्था बन्द भएको तथा निजीकरण भई सञ्चालनमा रहेकामध्ये ७ संस्थान मात्र नाफामा सञ्चालन भएका लेखापरीक्षण भएनन् ।
