५४ अंकले बढ्यो नेप्से परिसूचक, ४ अर्ब नाघ्यो सेयर कारोबार, शिवमको सर्वाधिक
काठमाडौं । नेपाल राष्ट्र बैंकको मौद्रिक नीतिपछि सेयर बजार निरन्तर बढ्दो छ । चालु आर्थिक वर्ष २०७९/८० को मौद्रिक नीति सार्वजनिक भएपछिको दोश्रो कारोबारमा नेप्से परिसूचक ५४.४५ अंकले बढेको हो । जुन अघिल्लो दिनको तुलनामा २.६२ प्रतिशतले बढेर २१३२.९६ बिन्दुमा पुगेको छ । बजारमा परिसूचकसँगै कारोबार रकममा पनि सुधार देखिएको छ । दिनभरको कारोबारमा ४ अर्ब १० करोड रुपैयाँ बढीको सेयर किनबेच भएको छ । बजारमा पछिल्लो १७ कार्य दिनपछि ४ अर्ब माथिको सेयर कारोबार भएको छ । गत असार २० गतेको बजारमा ४ अर्ब ३४ करोड रुपैयाँ बरारबको सेयर कारोबार भएको थियो । सोमबार सबैभन्दा बढी कारोबार हुनेमा शिवम् सिमेन्ट रहेको छ । शिवमको एकैदिन १५ करोड २९ लाख रुपैयाँ बराबरको सेयर कारोबार भएको हो । जसको सेयर मूल्य पनि बढेर प्रतिकित्ता ८३८ रुपैयाँ पुगेको छ । त्यस्तै, १० करोडभन्दा बढीको कारोबार हुनेमा अरुण काबेली पावर, एनटीसी, हिमालयन डिष्टिलर र अपर तामाकोशी रहेका छन् । सोमबारको बजारमा १० कम्पनीको सेयर सर्किट लेभलमा किनबेच भएको छ । जसमध्ये नारायणी डेभलपमेन्ट बैंक, मल्टीप्रपस फाइनान्स कम्पनी, सूर्योदय वोमी लघुवित्त वित्तीय संस्था, ग्रीन डेभपमेन्ट बैंक, यूनाईटेड मोदी हाइड्रोपावर, मानुषी लघुवित्त वित्तीय संस्था, बलेफी हाइड्रोपावरको सेयर मूल्य १० प्रतिशतले बढेको छ । त्यस्तै, समृद्धि फाइनान्स कम्पनीको ९.९८ प्रतिशत, गोर्खाज फाइनान्सको ९.९६ प्रतिशत र गुहेश्वरी मर्चेन्ट बैंक एण्ड फाइनान्स कम्पनीको सेयर मूल्य ९.९४ प्रतिशतले बढेको छ । त्यसैगरी, बजारमा आएका सबै समूह हरिया देखिएका छन् । जसमध्ये विकास बैंक समूह सबैभन्दा बढी अंकले बढेको छ ।
उत्पादन क्षमता बढाउने तयारीमा बोटलर्स नेपाल, पुँजी ४ अर्ब ४४ करोड पुर्याउने
काठमाडौं । बोटलर्स नेपाल लिमिटेडले आफ्नो पूँजी वृद्धि गर्ने भएको छ । साउन ४ गते बसेको कम्पनी सञ्चालक समितिको बैठकले स्थिर पूँजी वृद्धि गरि ४ अर्ब ४४ करोड रुपैयाँ पुर्याउने निर्णय गरेको हो । कम्पनीले आफ्नो उत्पादन क्षमता बढाउनका लागि उक्त पूँजी वृद्धि गर्न लागेको कम्पनी सचिव प्रतिमा वुर्माले बताइन् । उनका अनुसार यसअघि कम्पनीको स्थिर पूँजी ३ अर्ब १५ करोड रुपैयाँ रहेको थियो । साथै, कम्पनीको सोहि बैठकले चालु पूँजी अर्थात् कार्यगत पूँजी ७० करोड रुपैयाँ पुर्याउने निर्णय गरेको हो । यसअघि उक्त पूँजी ३५ करोड रुपैयाँ रहेको वुर्माले बताइन् । कम्पनीको पूँजी वृद्धि गर्नका लागि आन्तरिक पूँजी परिचालन तथा बैंकबाट ऋण लिन सक्ने कम्पनीले बताएको छ । जसका लागि धितोपत्र बोर्डको अनुमति लिनुपर्ने भएकाले जानकारी मात्रै गराएको कम्पनीले बतायो । बोर्डले अनुमति दिएपछि अन्य प्रक्रिया अघि बढाउने कम्पनीको भनाइ छ ।
राप्ती हाइड्रोको आईपीओ बाँडफाँट सम्पन्न, यसरी हेर्न सकिन्छ नतिजा
काठमाडौं । राप्ती हाइड्रो एण्ड जनरल कन्स्ट्रक्सन लिमिटेडको आईपीओ बाँडफाँट सम्पन्न भएको छ । कम्पनीको सेयर निष्काशन तथा बिक्री प्रबन्धक सिद्धार्थ क्यापिटलका अनुसार कम्पनीको आईपीओ सोमबार बिहान बाँडफाँट सम्पन्न भएको हो । कम्पनीले असार २९ गतेदेखि साउन १ गतेसम्म २३ लाख ६६ हजार २४० कित्ता सेयर निष्काशन गरेको थियो । जसमध्ये ३ प्रतिशत अर्थात् ७० हजार ९८८ कित्ता कर्मचारीहरुका लागि, ५ प्रतिशत अर्थात् १ लाख १८ हजार ३१२ कित्ता सामूहिक लगानी कोषका लागि र २१ लाख ७६ हजार ९४० कित्ता शेयर सर्वसाधारणका लागि छुट्याईएको थियो । कम्पनीको आईपीओमा अन्तिम दिनसम्म १४ लाख ९१ हजार ७२२ जना आवेदकले १ करोड ६२ लाख ७६ हजार ६१० कित्ताका लागि आवेदन परेको क्यापिटलले जनाएको छ । जसमध्ये १ हजार ४२४ जनाको आवेदन रद्द भएको छ भने १४ लाख ९० हजार २१८ जना आवेदकको मात्रै सदर भएको छ । कम्पनीको आईपीओमा मागभन्दा बढी आवेदन परेकोले गोलाप्रथा विधिबाट १० कित्ताका दरले बाँडफाँट गरिएको छ । १० कित्ताका दरले बाँडफाँट गर्दा २ लाख १७ हजार ६९४ जनाले मात्रै कम्पनीको आईपीओ प्राप्त गरेका छन् । बाँकी १२ लाख ७४ हजार २८ जना आवेदकको हात रित्तो भएको छ । कम्पनीको आईपीको नतिजा सिदार्थ क्यापिटलको वेवसाइट, सिडिएससीको मेरो सेयरको वेवसाइट, सिडिएसले आईपीओको नतिजा हेर्न संचालनमा ल्याएको वेवसाइट र कम्पनीको वेवसाइटबाट हेर्न सकिन्छ ।
