नेप्सेमा ३ कम्पनीको सेयर मूल्य समायोजन, कुनको कति ?
काठमाडौं । नेपाल स्टक एक्सचेञ्ज (नेप्से) मा तीन कम्पनीको सेयर मूल्य समायोजन भएको छ । प्राइम लाइफ इन्स्योरेन्स, नेपाल इन्स्योरेन्स र गरिमा विकास बैंकको सेयर मूल्य समायोजन भएको हो । प्राइम लाइफको १३ प्रतिशत, नेपाल इन्स्योरेन्सको ८ प्रतिशत र गरिमा विकास बैंकको १३ प्रतिशत बोनस सेयर समायोजन भएको हो । यी तीनै कम्पनीले साधारण सभा तथा लाभांश वितरण प्रयोजनार्थ बुकक्लोज गरेसँगै नेप्सेले सेयरमूल्य समायोजन गरेको हो । साथै नेप्सेले नयाँ नयाँ मूल्य निर्धारण गरेको छ । प्राइम लाइफको सेयर मूल्य ५०३.५४ रुपैयाँ, नेपाल इन्स्योरेन्सको ३८७.९६ रुपैयाँ र गरिमा विकास बैंकको ३३०.९७ रुपैयाँ कायम भएको छ । नेप्सेले बिहीबारको अन्तिम मूल्यका आधारमा मूल्य समायोजन गरेको हो । नयाँ मूल्यलाई आधार मानेर सोमबार दोस्रो बजारमा कारोबार हुनेछ । बिहीबार प्राइम लाइफको सेयर प्रतिकित्ता ५६९ रुपैयाँ, नेपाल इन्स्योरेन्सको ४१९ रुपैयाँ र गरिमा विकास बैंकको ३७४ रुपैयाँमा अन्तिम कारोबार भएको थियो ।
माया खोला हाइड्रोको आईपीओमा आवेदन दिने समय लम्बियो
काठमाडौं । माया खोला हाइड्रोपावर कम्पनीको आईपीओमा आवेदन दिने समय थप गरिएको छ । कम्पनीले मंसिर २३ गतेदेखि निष्काशन तथा बिक्री खुला गरेको आईपीओमा आयोजना प्रभावित क्षेत्रका स्थानिय बासिन्दाका लागि समय थप गरिएको हो । विदेशमा रहेका नेपालीहरुका लागि आईपीओमा आवेदन दिने आज पुस ८ गते अन्तिम दिन हो । कम्पनीले जारी पूँजी १ अर्ब रुपैयाँको ३४ प्रतिशतले हुन आउने प्रतिकित्ता १ सय रुपैयाँ अंकित मूल्य दरका ३४ लाख कित्ता साधारण सेयर निष्काशन गरेको हो । जसमध्ये १० प्रतिशत अर्थात् १० लाख कित्ता सेयर अति प्रभावित क्षेत्र संखुवासभाको चैनपुर नगरपालिका ८ र ९ धर्मदेवी नगरपालिकाका ३, ४ र ५, मादी नगरपालिका ४ र ६ का वासिन्दाहरुका लागि ६ लाख कित्ता र प्रभावित क्षेत्र चैनपुर, धर्मदेवी र मादी नगरपालिका माथिका वडा बाहेक स्थानीयका लागि ४ लाख कित्ता छुट्याइएको छ । यस्तै, १० प्रतिशत अर्थात् २ लाख ४० हजार कित्ता वैदेशिक रोजगारमा रहेका नेपालीहरुका लागि छुट्याइएको छ । कम्पनीको आईपीओमा लगानीकर्ताले न्यूनतम १० कित्ता र आयोजना प्रभावित क्षेत्रका बासिन्दाहरुले अधिकतम १ लाख कित्ता र वैदेशिक रोजगारमा रहेका नपालीहरुले अधिकतम २० हजार कित्तासम्म आवेदन दिन सक्नेछन् । कम्पनीको आईपीओमा आयोजना प्रभावित क्षेत्रका बासिन्दाहरुले पुस २४ गतेसम्म आवेदन दिन सक्नेछन् । कम्पनीको आईपीओ निष्काशन तथा बिक्री प्रबन्धकमा प्रभु क्यापिटल रहेको छ । प्राइम कमर्सियल बैंक, प्रभु बैंक, नेपाल एसबिआई बैंक, ग्लोबल आइएमई बैंक, हिमालयन बैंकका तोकिएका शाखा कार्यालय, प्रभु क्यापिटल र माया खोला हाइड्रोपावरको कार्यालयबाट आयोजना प्रभावित क्षेत्रका बासिन्दाहरुले आवेदन दिन सक्नेछन् । यस्तै, वैदेशिक रोजगारमा रहेको नेपालीहरुले नेपाल धितोपत्र बोर्डबाट स्वीकृती प्राप्त गरेका सम्पूर्ण आस्बा सदस्य बैंक तथा वित्तीय संस्थाहरु र तिनका तोकिएका शाखा कार्यालयहरुबाट सि–आस्बा प्रणालीमार्फत आवेदन दिन सक्नेछन् । कम्पनीको आईपीओलाई इक्रा एनपी इस्यूअर रेटिङ्ग डबल बी माइनस रेटिङ्ग प्रदान गरेको छ । यसले कम्पनीको वित्तीय दायित्व बहन गर्ने क्षमतामा औषत जोखिम रहेको संकेत गर्दछ ।
२ कम्पनीलाई कारवाही गर्दै नेप्सेले माग्यो ३ दिनभित्र स्पष्टिकरण
काठमाडौं । नेपाल स्टक एक्सचेञ्ज (नेप्से) ले २ कम्पनीलाई कारवाही गरेको छ । नेप्सेले कालिका पावर र मल्टीपर्पस फाइनान्सलाई कारवाही गर्दै कारोबार रोक्का गरेको हो । दुवै कम्पनीले लाभांश र साधारण सभाको जानकारी धितोपत्र सूचीकरण विनियमावली, २०७५ को विनियम २२ (१) (घ) बमोजिम नगराएको र धितोपत्रको कारोबार तथा मूल्यसँग सम्बन्धित संवेदनशिल सूचना तथा जानकारीबाट सर्वसाधारणलाई वञ्चित गराएर मूल्यमा प्रभाव पारेको आरोप नेप्सेले लगाएको छ । विनियमावलीको विनियम १६ (१) (ख) मा भएको व्यवस्था अनुरूप उक्त कम्पनीको धितोपत्रको कारोबार रोक्का गरिएको र के कति कारणबाट समयमा जानकारी नदिएको हो ? ३ दिनभित्र स्पष्टिकरण पेश गर्न नेप्सेले निर्देशन दिएको छ । फाइनान्सले पुस ६ गते बेलुकी चार बजे सञ्चालक समिति बैठक गरी लाभांश प्रस्ताव गरेको थियो । उक्त सूचना फाइनान्सले भोलिपल्ट बिहान ११ बजेर १८ मिनेटमा मात्रै नेप्सेलाई दिएको थियो । यस्तै, कालिका पावरले ६ गते नै लाभांश प्रस्ताव पारित गरेको थियो । उसले पनि भोलिपल्ट ११ बजेर ३६ मिनेटमा सूचना दिएको थियो ।
