भक्तपुरका २९ पत्रकारको पिसिआर रिपोर्ट नेगेटिभ
काठमाडौं । नेपाल कोरियामैत्री अस्पतालले सञ्चालनमा ल्याएको पिसिआर मेशिनसहितको ल्याबमा गरिएको कोरोना परीक्षणमा भक्तपुरका क्रियाशील पत्रकारको नतिजा नेगेटिभ आएको छ । मध्यपुरथिमि नगरपालिकाद्वारा सञ्चालित उक्त अस्पतालमा गत शुक्रबार भक्तपुर जिल्लाका कार्यरत २९ पत्रकारको स्वाब सङ्कलन गरी पिसिआर परीक्षण गरिएको थियो । ल्याबले आइतबार नतिजा सार्वजनिक गर्दै परीक्षण भएका सबै पत्रकारको रिपोर्ट नेगेटिभ आएको नगरपालिकाका प्रमुख मदनसुन्दर श्रेष्ठले जानकारी दिए । समाचार सङ्कलनका क्रममा अग्रभागमा रहेर काम गर्ने क्रियाशील पत्रकारको कोरोना परीक्षण गर्न नगरपालिकाले आग्रह गरी स्वाब सङ्कलन गरेको थियो । यसअघि सोही ल्याबमा नगरपालिकाका जनप्रतिनिधिका साथै विदेशबाट मध्यपुरथिमिमा फर्किएका करिब १ सयभन्दा बढीको पिसिआर परीक्षण गरिएको थियो । ती सबैको नतिजा नेगेटिभ नै आएको उनले जानकारी दिए । रासस
नेपालमा कोरोनाबाट मृत्यु भएका दाेस्राे व्यक्ति को हुन् ?
काठमाडाैं । नेपालमा कोरोना भाइरसको कारण थप एक जना युवकको मृत्यु भएको छ । योसँगै नेपालमा कोरोनाका कारण मृत्यु हुनेको संख्या दुई पुगेको छ । आज मृत्यु भएका युवक बाँकेका भएको बताइएको छ । उनकाे बाँकेको नरैनापुरको दीपेन्द्र मावि भोजभगवानपुरको क्वारेन्टाइनमा मृत्यु भएकाे स्वास्थ्य तथा जनसंख्या मन्त्रालयका प्रवक्ता डा. विकास देवकोटाले जानकारी दिए । उनी २५ वर्षका युवा हुन् । मृतक वैशाख ३० गते भारतबाट नेपाल आएका थिए । क्वारेन्टाइनमा बस्ने क्रममा स्वासप्रश्वासमा समस्या भएको र आइतबार विहान ६ः४० बजे मृत्यु भएको हो । हिजाे मात्रै सिन्धुपाल्चाेककी महिलाकाे काराेनाकाे कारण निधन भएकाे थियाे ।
नेपालमा कोरोना भाइरसको कारण दुई जनाको मृत्यु
काठमाडौं । नेपालमा कोरोना भाइरस सङ्क्रमणका कारण थप एक जनाको मृत्यु भएको छ । स्वास्थ्य तथा जनसङ्ख्या मन्त्रालयका अनुसार काेराेनाकाे कारण बाँकेका २५ वर्षीय युवकको मृत्यु भएको हाे । बाँकेको नरैनापुर गाउँपालिकास्थित क्वारेन्टिनमा बसेका उनलाई शनिबार राति बान्ता भएको थियो । त्यसपछि एक्कासी ज्वरो देखिएको र बिहान ६ बजेर ४० मिनेटमा मृत्यु भएको मन्त्रालयका प्रवक्ता डा. विकास देवकोटाले बताए । उनी गत वैशाख ३० मा भारतको मुम्बईबाट आएर क्वारेन्टिनमा बसेका थिए । हिजाे अर्थात जेठ ३ गते मात्रै काेराेनाकाे कारण सिन्धुपाल्चाेकमा एक महिलाकाे मृत्यु भएकाे थियाे । यससँगै, नेपालमा काेराेनाबाट मृत्यु हुनेकाे संख्या दुई पुगेकाे छ ।
