आइजीआई प्रुडेन्सियलले बिक्रीमा राख्यो ११ वटा मोटरसाइकल
काठमाडौं । आइजीआई प्रुडेन्सियल इन्स्योरेन्स कम्पनीले ११ वटा सवारी साधन बिक्री गर्ने भएको छ । कम्पनीले चालु अवस्थामा रहेका ११ वटा मोटरसाइकल बिक्रीमा राखेको हो । सवारी साधनहरु जे जस्तो अवस्थामा छ सोही अवस्थामा शिलबन्दी बोलपत्रको माध्यमद्धारा बिक्री गर्ने कम्पनीले जनाएको छ । इच्छुक व्यक्ति, फर्म वा संस्थाले १५ दिनभित्र बोलपत्र पेस गर्नुपर्नेछ । कम्पनीका अनुसार बोलपत्र फाराम १ सय रुपैयाँ र आफूले कबोल गरेको मूल्य उल्लेख गरी उक्त रकमको १० प्रतिशत धरौटी रकम जम्मा गर्नुपर्नेछ ।
हिमालयन लाइफबाट बाहिरिँदै संस्थापक विनय तोदी
काठमाडौं । हिमालयन लाइफ इन्स्योरेन्स कम्पनीको संस्थापक सेयर बिक्रीमा राखिएको छ । कम्पनीको संस्थापक सेयरधनी विनय कुमार तोदीले आफ्नो नाममा रहेको सेयर बिक्रीमा राखेका हुन् । संस्थापक सेयरधनी तोदीले आफ्नो स्वामित्वको झण्डै २ लाख कित्ता सेयर बेचेर बाहिरिने भएका हुन् । कम्पनीका अनुसार संस्थापक सेयरधनी तोदीले १ लाख ९६ हजार ९७३ कित्ता सेयर बिक्रीमा राखेका हुन् । कम्पनीको उक्त सेयरमा विद्यमान संस्थापक सेयरधनीले मात्रै आवेदन दिन पाउनेछन् । यदि ३५ दिनभित्र संस्थापकले सेयर खरिद नगरेमा सर्वसाधारण लगानीकर्ताका लागि बिक्री खुला गरिने कम्पनीले जनाएको छ ।
नेशनल लाइफलाई फ्ल्याट भाडामा लिने
काठमाडौं । नेशनल लाइफ इन्स्योरेन्स कम्पनीले घर भाडामा लिने भएको छ । यस कम्पनीले पेप्सीकोला शाखा कार्यालयको लागि पेप्सीकोला चोकमा फ्ल्याट भाडामा लिने भएको हो । कम्पनीका अनुसार पेप्सीकोला चोकको मुख्य सडकको ५ सय मीटर परिधिमा आरसीसी सिस्टमबाट निर्माण भएको फ्ल्याट भाडामा आवश्यक परेको हो । भाडामा दिन इच्छुक व्यक्ति वा संस्थाले आफुले चाहेको मासिक बहाल रकम (कर सहित÷कर बाहेक) उल्लेख गरी ७ दिनभित्र बोलपत्र पेस गर्न कम्पनीले अनुरोध गरेको छ ।
