राष्ट्रपति पौडेलद्वारा टिआरसी विधेयक प्रमाणीकरण
काठमाडौं । राष्ट्रपति रामचन्द्र पौडेलले सत्य निरूपण तथा मेलमिलाप आयोग र बेपत्ता नागरिक छानबिन आयोगसम्बन्धी (टिआरसी) विधेयक प्रमाणीकरण गरेका छन् । राष्ट्रपति पौडेलले बिहीबार नेपालको संविधानको धारा ११३ को उपधारा (२) बमोजिम उक्त विधेयक प्रमाणीकरण गरेका हुन् । संघीय संसद्का दुवै सदनको बैठकबाट पारित भई प्रमाणीकरणका लागि राष्ट्रपतिसमक्ष सो विधेयक पेस भएको थियो ।
अरू स्थानीय निकायले सिको गर्ने तिलोत्तमा : ‘ग’ वर्गका फरक क्षमताकालाई पनि भत्ता
काठमाडौं । चिटक्क सजिएको ६ लेनको बाटो । बाटोको दाँयाबाँया बेगनबेली फूलका बोट । सिंगारपटार गरिएकाे आकर्षक सडक । झट्ट हेर्दा गर्दा जो कोहीलाई कुनै विदेशी स्थानको झल्को दिलाउन सक्छ । तर, यो स्थान हाे रुपन्देहीको तिलोत्तमा नगरपालिका । विदेशमै भएको अनुभव दिलाउने अन्य थुप्रै त्यस्ता वस्तुहरू छन् यस नगरपालिकामा । हर्न नबजाइन ६ लेनको सडकमा सान्तसँग गुडिरहेका सवारीसाधन, साइकलयात्रीलाई छुट्टै लेन यस्तै, यस्तै । रुपन्देहीको मध्य भागमा २४.८ वर्ग किलोमिटर क्षेत्रफलमा फैलिएको छ तिलोत्तमा नगरपालिका । २०७१ सालमा स्थापित यो नगरको जनसंख्या १ लाख ४९ हजार छ । त्यस्तै, देशकै बढी २.२६ प्रतिशत वार्षिक जनसंख्या वृद्धिदर छ । आधारभूत स्वास्थ्य, शिक्षा, वातावरण सुधार, चेतना प्रवाह लगायतका काम नगरपालिकाले नियमित गर्दै आएको छ । यसकै कारण उत्कृष्ट र नमुना पालिकाको रूपमा स्थापित भएको छ तिलोत्तमा । देशभरिका २७६ नगरपालिकामध्ये तिलोत्तमाले आर्थिक वर्ष २०७६/७७ मा सहरी सेवा तथा सुशासनको क्षेत्रमा उल्लेख्य सेवा प्रवाह गरेको भन्दै नेपाल नगरपालिका संघले उत्कृष्ट नगरपालिकाका रूपमा सम्मानसमेत गरेको थियो । नगरले ‘समृद्ध नगर खुसी नगरबासी’ भन्ने नारालाई मुल मन्त्रकै रूपमा लिएको नगरप्रमुख रामकृष्ण खाँण बताउँछन् । उनी भन्छन्, ‘स्मार्ट सिटीको अवधारणास्वरूप हामीले अप्टिकल फाइबर बिच्छयाएका छौं, त्यस्तै नगरभित्र वाइफाइ पनि फ्री गरेका छौं ।’ याे बालमैत्री घोषित नगरपालिका पनि हो । नगरपालिकाले आधारभूत शिक्षामा आफ्नै पाठ्यक्रम बनाएको छ । नगरप्रमुखको मासिक सुविधाबाट विपन्न विद्यार्थीलाई छात्रवृत्ति दिइन्छ भने पोषण सुधार्न ६ कक्षासम्मका बालबालिकालाई संघले दिने १५ रुपैयाँको खाजामा १० रुपैयाँ थपिन्छ । कक्षा ६ का विद्यार्थीलाई पनि आफ्नै स्रोतबाट दिवा खाजाको व्यवस्था नगरपालिकाले गरेको छ । सरकारले भने कक्षा ५ सम्म मात्र खाजाको व्यवस्था गरेको छ । कक्षा ५ सम्मकाले पाउने खाजाको रकममा पनि प्रतिविद्यार्थी १० रुपैयाँ थपेर २५ रुपैयाँ पुर्याइएको छ । तिलोत्तमाका ४२ सामुदायिक विद्यालयमा करिब १८ हजार ५ सय विद्यार्थी छन् । नगरपालिकाले फोहोरमैला प्रशोधन, पशु दर्ता, पकेट मेरो पहिलो डस्बिन र विकास निर्माणमा समुदायको बृहत् परिचालनजस्ता थुप्रै कार्यक्रमहरू सञ्चालन गरेको छ । जसका कारण हरेक नागरिकको मन जित्न सफल भएको खाँण बताउँछन् । तिलोत्तमामा सडक संरक्षणको अभावमा निर्माण गरेको वर्ष दिन नबित्दै भत्किएर पुन निर्माण गर्नुपर्ने अवस्थासम्म पुगेका थुप्रै सडकका कथा छन् । तर, यहाँ सडक विभागले बनाएको सडकलाई पनि सिंगारपटार गरेर झनै चिकिट्ट पारिएको छ । ६ लेनको उक्त बाटोलाई दायाँबायाँ फूलका विरुवाहरूले सजाइएको छ । सडक किनारमा फुलेका फूलहरू र शान्तसँग गुडिरहेका सवारीसाधनहरूलाई एकनाशले नियाल्ने हो भने पनि कुनै विदेशभन्दा कम नलाग्ने नगरबासीहरू बताउँछन् । पूर्वपश्चिम, सिद्धार्थ राजमार्ग र सहायक मार्गलाई वृक्षारोपण गरेर हरियाली बनाएको तिलोत्तमाका सडकमा बत्तीको पनि व्यवस्था रहेको छ । लगानी सम्मेलनमार्फत ठूला व्यवसायीलाई आकर्षण गरेको तिलोत्तमाले साना तथा मझौला व्यवसायीका लागि औद्योगिक ग्राम बनाइरहको छ । नगरपालिकाले एक वडा, एक उत्पादनका लागि पकेट क्षेत्र छुट्याइएको नगरप्रमुख खाँण बताउँछन् । ‘हामीले एक वडा, एक उत्पादनका लागि पकेट क्षेत्र छुट्याएका छौं,’ उनी भन्छन्, ‘किसानलाई दूध उत्पादन, उपकरण खरिद र बीउ खरिदमा समेत नगरले अनुदान दिँदै आएको छ ।’ नगरपालिकाले कृषि उपजको बजारीकरण तथा भण्डारणमा पनि सहयोग गर्ने गरेको उनी बताउँछन् । उनका अनुसार युवाहरूलाई स्वदेशमै केही गर्न प्रोत्साहन गर्ने उद्देश्यले पनि नगरपालिकाले थुप्रै कार्यहरू गरेको छ । नगरले रोजगारी बढाउन वैदेशिक रोजगारीबाट फर्केका र अन्यलाई व्यावसायिक तालिमको व्यवस्था गरेको छ । जसबाट सिप सिकेर आफ्नै गाउँघरमा केही गर्न सक्ने बनाउनलाई तालिमहरूको व्यवस्था गरिएको खाँण बताउँछन् । नगरपालिकाले सामुदायिक वन र सार्वजनिक जग्गालाई पनि एकदमै राम्रोसँग व्यवस्थापन गरेकाे उनी बताउँछन् । जसले नगरको आन्तरिक आम्दानी र पर्यापर्यटन बढाएको छ । देश संघीयतामा गइसकेपछि स्थानीय तहले स्थानीय सरकारका रूपमा घरदैलोबाटै नागरिकलाई सेवा दिइरहेका छन् । जसमध्ये कपितयले सयौंको भीडमा नागरिकको मन जित्ने गरी काम गरेर आफूलाई नमुनाका रूपमा पनि उभ्याएका छन् । पछाडि परेका पालिकालाई यिनीहरूले हौसला र प्रेरणा थपिदिएका छन् । पालिकाहरू बेथितिको चाङले भरिएका छन् भन्ने भाष्यलाई चिर्ने काम उत्कृष्ट पालिकाले गरेको देख्न सकिन्छ । तिलोत्तमा पनि यीनै भित्रको एक नगरपालिका हो । यति मात्रै होइन नगरपालिकाले अन्य पनि थुप्रै सुविधाहरू प्रदान गरेको छ । यस पालिकामा ‘ग’ वर्गका अपांगता भएका व्यक्तिलाई पनि भत्ताको व्यवस्था छ । जबकि संघीय सरकारले क र ख वर्गकालाई मात्र अपांगता परिचयपत्र र भत्ता दिने गर्छ । त्यस्तै, यस नगरपालिका क्षेत्रमा गुट्खासमेत खान पाइँदैन । नगरपालिकाले सरसफाइलाई ध्यानमा राख्दै गुट्खा निषेध गरेको नगरप्रमुख खाँण बताउँछन् । जनप्रतिनिधिहरू राजनीतिक प्रतिशोधका कारण विकासका कामहरू नै ठप्प पारेर बसेका उदाहरणहरू पनि थुप्रै छन् । तर, यस नगरपालिकामा भने जनप्रतिनिधिहरूले विकासमा राजनीतिक प्रतिशोध साध्दैनन् । पालिकामा ‘कर्मचारी–जनप्रतिनिधि’ बीचको ‘ट्युनिङ’ मिलेको देखिन्छ । यहाँका जनप्रतिनिधि अघिल्ला पटक ल्याइएका ‘असल’ नीति तथा कार्यक्रमलाई निरन्तरता दिन कत्ति पनि हिच्किचाउँदैनन् । आफूले ल्याएका योजनालाई निरन्तरता दिएको भन्दै विपक्षी दलका पूर्वजनप्रतिनिधिले पनि प्रशंसा नै गर्ने गरेका छन् । जनप्रतिनिधिको यस्तो व्यवहारबाट बुझ्न सकिन्छ कि उनीहरूमा चुनावका बेला मात्रै राजनीति गरौं तर अरू बेला जनताको सेवा गरौं भन्ने भाव छ । तिलोत्तमा पुग्ने जुन कुनै स्थानीय तहका जनप्रतिनिधिहरू पनि त्यहाँको सिको गरेर फर्किने गरेका छन् । नगरपालिकाले प्रविधिलाई पनि उत्तिकै जोड दिएको खाँण बताउँछन् । पालिकाले अनलाइनबाटै कर तिर्ने सुविधा दिएको छ । जसले गर्दा सेवाग्राहीहरूको समय बचत भएको उनी बताउँछन् । नगरपालिकाले सम्पत्ति कर जुनसुकै वडाकाे भए पनि एकै ठाउँमा रकम जम्मा गर्ने सुविधा समेत दिएको छ । यसले थप सहज भएको सेवाग्राहीहरूले बताउने गरेका छन् । नगरपालिकाले अनलाइन कर तिर्ने विषयमा प्रत्येक वडामा तालिम नै चलाएको थियो । नगरपालिका प्रत्येक वडाकाे १ हजार ९ सय २३ टोलमा नै पुगेर तालिम प्रदान गरिएको उनले बताए । नगर बासीले विद्युत्, खानेपानी लगायतका बिल पनि अनलाइनबाट नै तिर्ने गरेका छन् । तिलोत्तमा नगरपालिकाले अनलाइन विलिङसँगै सामुदायिक विद्यालयहरूका एप पनि सञ्चालनमा ल्याएको छ । जुन एपको माध्यमबाट अभिभावकले बालबच्चा घरबाट विद्यालयसम्म पुगेको र शिक्षकले विद्यार्थी घरसम्म पुगेको थाहा पाउन सक्नेछन् । त्यस्तै, विद्यालयको बस कति बेला आउँछ वा फर्किन्छ, विद्यालयको जानकारी, सूचना, विद्यालयमा हुने समयका गतिविधि आदि समावेश गरिएको उनी बताउँछन् । तिलोत्तमा नगरपालिकाले सामाजिक सञ्जालको प्रयोग पनि व्यापक रूपमा गरेको छ । सञ्जालको प्रयोग गरेको सेवाग्राही तथा सर्वसाधारणमा महत्वपूर्ण सूचना तथा जानकारीहरू प्रदान गर्ने गरेको छ । त्यसका लागि नगरपालिकाले फेसबुक, ट्वीटर, युट्युब जस्ता माध्यमको प्रयोग गरेकाे छ । यसमा कार्यालयका विभिन्न गतिविधिसँगै सूचनाहरू समेत राख्ने गरेको नगरपालिकाले जनाएको छ । सामाजिक सञ्जाल प्रयोग नगरपालिकाले कोरोनाको समयमा प्रभावकारि ढंगले सञ्चालन गरेको थियो ।
डेडिकेटेड र ट्रंकलाइन विवाद समाधान गर्न संसदीय समिति गठन गरौं : सांसद बास्कोटा
काठमाडौं । नेकपा एमालेका सांसद गोकुल बास्कोटाले डेडिकेटेड र ट्रंकलाइन विवाद समाधानका लागि संसदीय समिति गठन गर्न प्रस्ताव गरेका छन् । बिहीबार प्रतिनिधि सभाको विशेष समयमा बोल्दै बास्कोटाले सार्वजनिक लेखा समितिमाथि अनुचित दबाब दिइएको भन्दै डेडिकेटेड र ट्रंकलाइन विवाद समाधानका लागि संसदीय समिति गठन गर्न प्रस्ताव गरेका हुन् । उनले तत्कालीन प्रचण्ड सरकारले नै व्यवसायीहरूले डेडिकेटेड र ट्रंकलाइन विद्युत उपयोग गरेबापतको बक्यौता घटाउने काम गरेको दाबी गरे । डेडिकेटेड र ट्रंकलाइनका विषयमा आफूले बदमासी गरेर अर्कोमाथि हिलो छ्याप्ने काम भएको उनले बताए । बास्कोटाले माओवादी सत्ताबाहिर निस्केपछि रन्थनेर नेपाललाई बंगलादेश बनाउने भन्दै आन्दोलन गर्ने चेतावनी दिएको जिकिर गरे । त्यस्तै, बैठकको विशेष समयमा माओवादी सांसद देवेन्द्र पौडेलले डेडिकेटेड र ट्रंकलाइनको बक्यौता नतिर्न पूर्वप्रधानमन्त्री प्रचण्डले भनेको भए बहस गर्न तयार रहेको तर्क गरे । पौडेलले मुलुकको परिवर्तनका लागि माओवादीले गरेको जनयुद्धको अवमूल्यन नगर्न चेतावनी दिँदै अनमिनको रेकर्ड हेर्न सुझाव दिए । अहिले उठेका प्रश्नहरूलाई विगतका घाउ कोट्याउने गरी परिस्थितिलाई असहज नबनाउन उनले आग्रह गरे । उनले जनताले चलाएको आन्दोलन जनयुद्ध नै भएको जिकिर गरे । पौडेलले टुँडिखेलमा विरोध गरेका युवाहरूको कुनै गल्ती नभएको र आवाज उठाएकै भरमा पक्राउ परेकालाई रिहा गर्न माग गरे ।
महालक्ष्मी विकास बैंक र पायोनियर मोटो कर्पबीच समझदारी
काठमाडौं । महालक्ष्मी विकास बैंकमार्फत निसान ब्रान्डका गाडी खरिदका लागि ९.९९ प्रतिशतमै कर्जा प्रदान गर्ने समझदारीपत्रमा बैंक र नेपालका लागि निसान गाडीको आयातकर्ता पायोनियर मोटो कर्प प्रालिबीच एक समझदारी पत्रमा हस्ताक्षर भएको छ । सम्झौताअनुसार निसान ब्रान्डका गाडी खरिद गर्न इच्छुक ग्राहकहरूले महालक्ष्मी विकास बैंकमा ९.९९ प्रतिशतमै कर्जा पाउनेछन् । विद्युतीय गाडीको हकमा अधिकतम ५ वर्ष अवधि रहने गरी भ्याट बिल वा कोटेशन मूल्यको ८० प्रतिशत, जुन कम हुन्छ, सो बराबरको कर्जा र विद्युतीय बाहेकको अन्य गाडीमा अधिकतम ८ वर्ष अवधि रहने गरी भ्याट बिल वा कोटेशन मूल्यको ५० प्रतिशत जुन कम हुन्छ, सो बराबरको कर्जा बैंकले प्रदान गर्नेछ । कर्जा लिन चाहने ग्राहकहरूले बैंकको आधिकारिक वेबसाइट, सामाजिक सञ्जाल, सम्पूर्ण शाखा कार्यालय तथा पत्रपत्रिकामा रहेको क्युआर कोड स्क्यान गरेरसमेत आवेदन दिन सक्नेछन् । ‘सबल बैंक, सफल सहकार्य’ को नारालाई आत्मसाथ गर्दै नेपाली जनताको घरदैलोमा विगत ३० वर्षदेखि अनवरत रूपले गुणस्तरीय वित्तीय सेवा प्रदान गर्दै आएको यस बैंकको देशभरि १०३ शाखा कार्यालय र करिब ८ लाख ग्राहक रहेका छन् ।
फोटोनले २८औं वार्षिकोत्सव नेपालसहित विश्वव्यापी मनायो
काठमाडौं । विश्वको अग्रणी व्यावसायिक सवारीसाधन निर्माता कम्पनी फोटोनले आफ्नो २८औं वार्षिकोत्सव विश्वभिर विभिन्न कार्यक्रम गरी मनाएको छ । नेपालमा यो अवसरलाई एमएडब्लू वृद्धि कमर्सियल भेहिकलले नाडा अटो शोमा भव्य समारोहका साथ मनाएको थियो । फोटोनले नेपाली बजारमा कुशल र भरपर्दो व्यावसायिक सवारीसाधन उपलब्ध गराउने आफ्नो प्रतिबद्धतालाई थप उजागर गर्दै नाडा अटो शोमा आफ्नो वार्षिकोत्सव भव्यताका साथ मनाएको हो । कार्यक्रममा एमएडब्लू वृद्धिका अध्यक्ष विष्णु अग्रवाल र प्रबन्ध निर्देशक विवेक सिकरियालगायत फोटन नेपालका प्रमुख अधिकारीहरूको उपस्थिति रहेको थियो । नाडा अटो शोमा केक काटी कम्पनीको निरन्तर सफलता र स्थानीय समुदायको सेवामा समर्पित रहेको सन्देश दिइएको थियो । एमएडब्लू वृद्धि कमर्शियल भेहिकल, फोटोन मोटर्सको आधिकारिक वितरक (चीनको नम्बर १ कमर्शियल भेहिकल निर्माता) ले हाईरुफ ईभी भ्यान, टुनल्यान्ड र टीएम वान जस्ता कुशल र भरपर्दो सवारी साधनहरूको रेन्ज प्रदान गर्दछ । फोटोनको उत्कृष्ट प्रमाणित ट्र्याक रेकर्ड र नयाँ टेक्नोलोजीहरुको प्रतिबद्धताले फोटोनलाई नेपाली बजारमा निरन्तर वृद्धि र सफलताको लागि थप स्थान दिनेछ ।
नेप्सेमा ३६ अंककाे गिरावट, कारोबार रकम कति ?
काठमाडौं । साताको अन्तिम कारोबार दिन नेप्से परिसूचक घटेर बन्द भएको छ । बुधबार सामान्य अंक बढेर बन्द भएको नेप्से बिहीबार पुनः घटेर बन्द भएको हो । यस दिन नेप्से परिसूचक ३६.८३ अंक घटेर २७४९.५७ बिन्दुमा झरेको छ । नेप्सेसँगै कारोबार रकम पनि घटेको छ । बिहीबार ३२२ स्टकको १२ अर्ब २२ करोड २८ लाख रुपैयाँको कारोबार भएको छ । बुधबार १३ अर्ब ७२ करोडको रुपैयाँ बराबरको कारोबार भएको थियो । नेप्से घटे पनि दुई स्टकको सेयर मूल्य भने सकारात्मक सर्किट लेभलमा कारोबार भएको छ । जनउत्थान सामुदायिक लघुवित्त र कुथेली बुखरी स्मल हाइड्रोपावरको सेयर सकारात्मक सर्किट लेभलमा कारोबार भएको हो । कारोबारमा आएको थ्रि स्टार हाइड्रोपावरको सेयर भने नकारात्मक सर्किट लेभलमा कारोबार भएको छ । कारोबार रकमका आधारमा यस दिन गुडविल फाइनान्स शीर्ष स्थानमा रहेको छ । फाइनान्सको ३७ करोड ४० लाख रुपैयाँ बराबरको सेयर खरिद/बिक्री भएको छ । १३ उपसमूहमध्ये म्युचुअल फण्ड बाहेक सबै समूहको परिसूचक घटेको छ । म्युचुअल फण्ड ०.१० प्रतिशत बढेको छ । यस्तै, जीवन बीमा समूह सबैभन्दा धेरै २.०९ प्रतिशतले घटेको छ । लघुवित्त समूह २ प्रतिशत घटेको छ भने बैंकिङ, विकास बैंक, होटल तथा पर्यटन र निर्जीवन बीमा समूह परिसूचक १ प्रतिशतभन्दा बढी घटेको छ । यस दिन सेन्सेटिभ इण्डेक्स ८.३५ अंक घटेको छ भने फ्लोट इण्डेक्स २.६८ अंक र सेन्सेटिभ फ्लोट इण्डेक्स ३.०९ अंक घटेको छ ।
रविलाई गगनले भने- ९ मिनेटमा सकिन्छ भनेको बयान ९ घण्टा दिनुपर्यो
काठमाडौं । नेपाली कांग्रेसका महामन्त्री तथा सांसद गगनकुमार थापाले सहकारी ठगी प्रकरणमा रास्वपा सभापति रवि लामिछानेको संलग्नताको प्रमाण भएकाले नै संसदीय समितिमा बयान दिनुपरेको बताएका छन् । बिहीबार प्रतिनिधि सभा बैठकमा विशेष समयमा बोल्दै सांसद थापाले सहकारी ठगी प्रकरणमा राष्ट्रिय स्वतन्त्र पार्टीका सभापति रवि लामिछानेको संलग्नताको प्रमाण भएको बताएका हुन् । उनले आफूहरूसँग भएको प्रमाण छानबिन समितिलाई दिएको र सोही प्रमाणका आधारमा लामिछानेमाथि बयान लिइएको बताए । उनले ९ मिनेटमा सबै बताउँछु भनेर लामिछानेले भन्ने गरेको भन्दै ९ घण्टासम्म बयान दिनुपर्ने अवस्था प्रमाणकै कारण आएको बताए । उनले लामिछानेलाई सफाइ पाएको नभइ बयान दिएको कुरा स्मरण गर्न आग्रह गरे । फैसला आउन बाँकी रहेको भन्दै फैसलासम्म कुर्न पनि उनले आग्रह गरे । महामन्त्री थापाले नेकपा (माओवादी केन्द्र) का अध्यक्ष तथा पूर्वप्रधानमन्त्री पुष्पकमल दाहालले केही दिनअघि संसदमा बोल्दै नेपाल बंगलादेश हुनसक्छ भन्ने अभिव्यक्ति दिएको भन्दै असन्तुष्टि व्यक्त गरे । उनले पूर्वप्रधानमन्त्रीको तहबाट त्यो अभिव्यक्ति आउनु गलत भएको पनि बताए ।
शिक्षालाई सिपसँग जोड्ने किसिमले अबको पाठ्यक्रम परिमार्जन हुन्छ: शिक्षामन्त्री भट्टराई
काठमाडौं । शिक्षा, विज्ञान तथा प्रविधिमन्त्री विद्या भट्टराईले शिक्षा मन्त्रालय सबै पाठ्यक्रमहरूलाई परिमार्जन गर्ने गरी अगाडि बढेको बताएकी छन् । ललितपुरमा आयोजित ‘नेशनल सेमिनार अन एजुकेशन एण्ड इम्प्लइमेन्ट लिंकेज’ मा बोल्दै मन्त्री भट्टराईले विश्व बजारमा प्रतिष्पर्धी जनशक्ति तयार गर्नका लागि सबै तहमा पाठ्यक्रम परिमार्जन गर्नुपर्ने बताएकी हुन् । उनले पाठ्यक्रम परिमार्जनका लागि मन्त्रालय लागि परेको बताएकी हुन् । उनले राष्ट्रलाई योगदान दिनसक्ने जनशक्ति तयार गर्ने गरी पाठ्यक्रम बनाउनुपर्नेमा जोड दिएकी छन् । राष्ट्रलाई योगदान दिन सक्ने जनशक्तिले नै अन्तर्राष्ट्रिय बजारमा योगदान दिन सक्ने उनको भनाइ छ । उनले सीटीईभिटीलाई पुनर्संरचना गर्नका लागि काम अगाडि बढाइएको भन्दै यसको पाठ्यक्रम र पुनर्संरचनाका लागि आवश्यक काम गर्न दुई वटा समूह बनाएर जिम्मेवारी दिइएको बताइन् । ‘सीटीइभीटीलाई हामीले पुनर्संरचना गर्नुपर्छ । २०४५ सालको आवश्यकता आज २०८१ सालसम्म आइपुग्दा त्यही संस्थागत मूल्य, त्यही नीति । जसलाई अहिले पनि हामीले ऐनलाई खास संशोधन गरेका छैनौं। नयाँ ढंगले निर्माण गरेका छैनौं । त्यही नीतिबाट मार्गदर्शिक छौं,’ उनी भन्छिन्, ‘म आएपछि सिटीईभिटीलाई पुनर्संरचना गर्ने सोचेँ । सिटीइभिटीलाई अहिलेको अवस्थामा यसको पाठ्यक्रम र पुनर्संरचनाका लागि दुई वटा टिम बनाएर हामीले जिम्मेवारी दिएका छौं ।’ उनले पाठ्यक्रममा उद्यमशिलतामा काम गरिरहेको पंक्तिलाई कसरी जोड्ने भन्ने कुरामा आफ्नो ध्यान केन्द्रित रहेको बताइन् । ‘हामीले नेपालीहरू अन्तर्राष्ट्रिय श्रम बजारमा जान सक्षम जनशक्ति तयार गर्छौ भन्यौं त्यहाँ नै हामी गलत भयौं,’ उनले भनिन्, ‘हामीले नेपालको लागि कस्तो जनशक्ति चाहिन्छ भनेर प्रक्षपण त बारम्बार गर्यौं तर हामीले के भन्यौं भने हाम्रो शिक्षण संस्थाले अन्तर्राष्ट्रिय स्तरमा प्रतिष्पर्धा गर्ने, अन्तर्राष्ट्रिय श्रम बजारमा गएर बिक्ने जनशक्ति तयार गर्नुपर्छ भन्ने कुरा कहिल्यै पनि भन्न छोडेनौं ।’ साँच्चिकै शिक्षालाई सबल बनाउने हो भने प्रतिष्पर्धी जनशक्ति तयार गर्न सक्नुपर्ने उनले बताइन् । ‘ग्लोबल टु लोकल र लोकल टु ग्लोबल’ कसरी लिंकेज स्थापित गर्ने ? त्यसका लागि हामीसँग भएको जनशक्ति जसले पहिले राष्ट्रमा योगदान दिनसक्दा उसले मात्रै अन्तर्राष्ट्रिय रूपमा पनि योगदान गर्नसक्ने उनको भनाइ छ । सोही किसिमको योगदान दिनसक्ने जनशक्ति कसरी तयार गर्ने भन्ने कुरामा अब बहस हुनुपर्ने उनले औंल्याइन । ‘अब शिक्षा मन्त्रालयले हाम्रो पाठ्यक्रमलाई पूरै परिमार्जन गर्नुपर्छ चाहे त्यो जनरल एजुकेशनको होस् चाहे त्यो साइन्सको होस्, चाहे टेक्नीकल एजुकेशनको होस्,’ उनी भन्छिन्, ‘सबै पाठ्यक्रमहरूलाई परिमार्जन गर्नुपर्छ भन्ने हिसाबले नै हामी अगाडि बढेका छौं ।’ उनले शिक्षा मन्त्रालय, उद्योग मन्त्रालय र श्रम मन्त्रालयकाबीच समन्वय गरेर अगाडि बढ्नुपर्नेमा जोड दिएकी छन् । उनले शिक्षा भनेको ज्ञान मात्रै नभइ सिप, कला र उद्यमशिलता पनि हो भन्ने कुरा स्थापित गर्नुपर्ने बताएकी हुन् ।
