कारको ठक्करबाट मर्निङ वाकमा निस्किएका दुई महिलाको मृत्यु
कृष्णनगर । कपिलवस्तुको बुद्धभूमि नगरपालिका- १ वसन्तपुरमा प्रातः भ्रमणमा निस्किएका दुई महिलाको कारको ठक्करबाट मृत्यु भएको छ । गोरुसिङ्गे-अर्घाखाँची सडक खण्डमा गोरुसिङ्गेतर्फ जाँदै गरेको बीएडी ९५९९ नम्बरको कारले उनीहरूलाई शुक्रबार बिहान ठक्कर दिएको इलाका प्रहरी कार्यालय, गोरुसिङ्गेका प्रहरी निरीक्षक विराट शर्मा पौडेलले जानकारी दिए । दुर्घटनामा गम्भीर घाइते भएकी ६० वर्षीय शान्ता खत्री र ६५ वर्षीय तिलकुमारी रायमाझीलाई उपचारका लागि कपिलवस्तु अस्पताल, तौलिहवा लैजाने क्रममा बाटोमा मृत्यु भएको हो । कार चालक रुपन्देहीको सैनामैना नगरपालिका- ५ निवासी ३२ वर्षीय खिमराज श्रेष्ठलाई प्रहरीले नियन्त्रणमा लिएर अनुसन्धान थालेको छ ।
सगरमाथा संवाद सुरु, ३५० भन्दा बढी विशिष्ट व्यक्तिको सहभागिता
काठमाडौं । ‘जलवायु परिवर्तन, हिमाल र मानवताको भविष्य’ अवधारणामा केन्द्रित अन्तरराष्ट्रियस्तरको सम्मेलन ‘सगरमाथा संवाद’ सुरु भएको छ । प्रधानमन्त्री केपी शर्माले शुक्रबार काठमाडौंमा आयोजित विशेष समारोहमा संवादको समुद्घाटन गरे । समारोहमा स्वदेशी र विदेशी गरी ३५० जनाभन्दा बढी विशिष्ट व्यक्तिको सहभागिता छ । समारोहमा परराष्ट्रमन्त्री एवं संवाद व्यवस्थापन समितिका संयोजक डा. आरजु राणा देउवाले विशिष्ट अथितिको स्वागत गरेकी थिइन् । समारोहमा विशिष्ट अतिथिहरुले सम्बोधन गर्ने क्रम जारी छ । आइतबारसम्म सञ्चालन हुने संवादमा उद्घाटन समारोहपछि विषयगत एवं समानान्तर सत्रहरू सञ्चालन हुनेछन् ।
टेस्लाको गेमप्लान : प्रयोग गरिएका गाडी ‘अपग्रेड’ गरेर दोब्बर मूल्यमा बिक्री !
काठमाडौं । टेस्लाले गत नोभेम्बरमा एक विशेष नीति अन्त्य गर्यो जसले अमेरिकी ग्राहकहरूलाई लीजको अन्त्यमा आफ्नो कार खरिद गर्न निषेध गरेको थियो । यो नीति २०१९ मा सुरु भएको थियो । टेस्लाले मोडेल थ्री सवारीहरू ग्राहकलाई लीजमा दिने भए पनि लीज अवधि पूरा भएपछि ती गाडीहरू रोबोट्याक्सी सञ्जालमा प्रयोग गरिने भन्दै ग्राहकले किन्न नपाउने नीति लागू गरेको हो । एलन मस्कले त्यतिबेला भनेका थिए, 'अर्को वर्षसम्म हामीसँग सडकमा १० लाखभन्दा बढी रोबोट्याक्सी हुनेछ ।' तर त्यो कहिल्यै पनि पूरा भएन । रोबोट्याक्सी आउने वाचा बारम्बार गरिए पनि वास्तविकता फरक रह्यो । स्रोतका अनुसार टेस्लाले ती लिज समाप्त भएका कारहरू नयाँ ग्राहकलाई बिक्री गरेर कमाइको स्रोत बनायो । सस्तोमा फर्किएको गाडीलाई महँगोमा बेच्ने रणनीति प्राप्त जानकारीअनुसार टेस्लाले ती फिर्ता भएका कारहरूमा सफ्टवेयर अपडेट जस्तै 'फुल सेल्फ ड्राइभिङ' (एफएसडी) र 'एस्सीलेरेसन बुस्ट' जस्ता सुविधाहरू थप्थ्यो, जसको मूल्य क्रमशः १५ हजार र २ हजार डलर थियो । त्यसपछि ती गाडीहरू लीज ग्राहकलाई नदिई नयाँ ग्राहकलाई हजारौं डलर बढी मूल्यमा बेचियो । एकजना पूर्वकर्मीका अनुसार 'यो तरिका प्रयोग गरी प्रयोगमा आइसकेका गाडीको मूल्य जबरजस्ती बढाइएको हो ।' गुमेको अवसर र भ्रमित ग्राहक यो व्यवहार मस्कका सार्वजनिक अभिव्यक्तिसँग मात्र होइन, टेस्लाको वेबसाइटमा उल्लेख गरिएका सर्तहरूसँग पनि बाझिन्छ । कानुनी रूपमा यो प्रक्रिया वैध भए पनि यसले लिज ग्राहकहरूलाई औद्योगिक मानकअनुसारको खरीद विकल्पबाट वञ्चित गर्यो र वर्षौंदेखि भ्रममा राख्यो । यसले लगानीकर्तामाझ पनि यस्तो भ्रम फैलायो कि टेस्ला पूर्ण स्वचालित प्रविधिको नजिक छ, जसले कम्पनीको सेयर मूल्यलाई उच्च राख्न मद्दत गर्यो । लीज नीति किन बदलिययो ? कोभिड- १९ महामारीपछि गाडीको अभाव बढेपछि टेस्लाको नीति उपयुक्त देखिएको थियो । तर हाल मस्कको दक्षिणपन्थी राजनीतिक गतिविधिप्रति असन्तुष्टिका कारण टेस्ला गाडीको माग घट्दै गएको छ । अब प्रयोग गरिएका टेस्ला गाडीको मूल्य तीव्र रूपमा घटिरहेको छ । कारगुरुसको अध्ययन अनुसार प्रयोग गरिएका टेस्ला गाडीको मूल्य गत वर्षको तुलनामा ७.६ प्रतिशतले घटेको छ, जबकि अरू ब्रान्डहरूको औसत मात्र ०.८ प्रतिशत रहेको छ । साइबरट्रकको मूल्य झण्डै ४६ प्रतिशतले घटेको छ । यसै कारण टेस्लाले आफ्नो 'लीज अन्त्यपछि खरिद गर्न नपाइने' नीति अन्त्य गरेको विश्लेषकहरूले बताएका छन् । निराश ग्राहकहरू जो मेन्डेनहल नामका एक ग्राहकले मोडेल वाई तीन वर्षका लागि लिजमा लिए । सुरुमा र अन्त्यमा टेस्ला कर्मचारीहरूले गाडी रोबोट्याक्सीका लागि चाहिने बताएका थिए । तर पछि उनले त्यो गाडी लिलामीमा बेचिएको थाहा पाए । उनी लेख्छन्, 'मसँग झुट बोलियो कि मैले आफूले लीज गरिएको गाडी किन्न सक्दिनँ । तर त्यो गाडी रोबोट्याक्सी नभई लिलामीमा बेचियो ।' लगानीकर्ताको भ्रम र अविश्वास एलन मस्कले सन् २०१६ देखि प्रत्येक वर्ष 'आगामी वर्षसम्म पूर्ण स्वचालित टेस्ला आउँछ' भने पनि त्यो कहिल्यै साकार भएन । केही लगानी संस्थाहरू जस्तै एआरके इनभेस्टले टेस्लाको रोबोट्याक्सी योजनामा भरोसा गरेर लगानी गरे । तर अन्य विश्लेषकहरूले भने त्यो योजनालाई 'चरम शंकास्पद' भनेका थिए । एक पूर्वटेस्ला कर्मचारीले भनेका छन्, 'टेस्लाले गाडीहरू राखेर मूल्य घट्न दिने थिएन- बेच्नु उनीहरूको योजना थियो ।' एडमुन्ड्सका विश्लेषक जोशेफ यून भन्छन्, 'आजको अवस्थामा लिज खरिद विकल्प नदिएको निर्णय उल्ट्याउनु टेस्लाको लागि तार्किक थियो- किनकि अब त प्रयोग गरिएका गाडीहरूको मूल्य खस्कँदैछ ।' निसानको पतन या पुनर्जागरण ? चुनौतीपूर्ण मोडमा जापानी अटो कम्पनी टेस्लाभित्रको तलब संघर्षः मस्कका लागि नयाँ प्रस्तावको तयारी गर्दै बोर्ड
ट्र्याक खुलेको १५ वर्षपछि सडक कालोपत्र
म्याग्दी । म्याग्दी जिल्लाको माझफाँट-लेकफाँट हुँदै अन्नपूर्ण गाउँपालिका- ८ नागी-राम्चे जोड्ने सडक योजनाको माझफाँट-लेकफाँट खण्डमा सात किलोमिटर ५०० मिटर कालोपत्र भएको छ । सङ्घीय सरकारको ‘एक निर्वाचन क्षेत्र एक रणनीतिक सडक’ आयोजना कार्यक्रममार्फत जलजला गाउँपालिका- ३ माझफाँटको भुरतुलादेखि वडा नं ५ लेकफाँटको गिद्धेश्वरसम्मको बाटो कालोपत्र भएको हो । दुई लेनको यो सडकको एक किलोमिटर ४०० मिटर ढलान भएको छ । ट्र्याक खुलेको १५ वर्षपछि सडक कालोपत्र र ढलान गरिएको हो । जलजला गाउँपालिकाले पनि बेनीदेखि भुरतुलासम्मको दुई किलोमिटर सडक स्तरोन्नति गरेको छ ।
मधेस प्रदेशमा जीवनबीमाबाट ११ अर्ब १६ करोड रुपैयाँ सङ्कलन
वीरगञ्ज । बिमा कम्पनीहरूले चालु आर्थिक वर्षको नौ महिनामा जीवनबीमा शुल्कबापत ११ अर्ब १६ करोड ७९ लाख रुपैयाँ सङ्कलन गरेको छ । उक्त कार्यालयले गत वर्ष जीवनबीमा शुल्कतर्फ भने १४ अर्ब एक करोड २८ लाख सङ्कलन गरेको थियो । उक्त कार्यालयकी प्रमुख प्रीति देवले चालु आवको नौ महिनामा ८६ हजार ६७० ले जीवनबीमा गरेका बताइन् । कार्यालयले सोही अवधिमा दुई अर्ब ५४ करोड ६० लाख दाबी भुक्तानी गरेको छ । अझै ३९ करोड ६४ लाख दाबी भुक्तानी गर्न बाँकी रहेको उनले जानकारी दिइन् । जीवनबीमातर्फ सातवटै प्रदेशबाट चैत मसान्तसम्म एक खर्ब २७ अर्ब तीन करोड शुल्क सङ्कलन भएको छ ।
नेको इन्स्योरेन्सको २९औं वार्षिक साधारणसभा जेठ ९ गते, ७ प्रतिशत लाभांश अनुमोदन गर्ने
काठमाडौं । नेको इन्स्योरेन्स कम्पनीले आगामी जेठ ९ गते आफ्नो २९औं वार्षिक साधारणसभा गर्ने भएको छ । कम्पनीको सञ्चालक समितिको निर्णयअनुसार सभा काठमाडौंमै आयोजना गरिनेछ । सभाले आर्थिक वर्ष २०८०/८१ का लागि सिफारिस गरिएको कुल ७.३६८४ प्रतिशत लाभांश अनुमोदन गर्नेछ । प्रस्तावित लाभांशमध्ये ७ प्रतिशत बोनस सेयर र कर प्रयोजनका लागि ०.३६८४ प्रतिशत नगद लाभांश समावेश छ । साधारणसभामा कम्पनीको प्रबन्धपत्र तथा नियमावली संशोधन गर्ने प्रस्ताव पनि पेश गरिनेछ । त्यसका लागि आवश्यक पर्ने नियामक निकायको निर्देशन तथा सुझाव कार्यान्वयन गर्न सञ्चालक समितिलाई अख्तियारी दिने विशेष प्रस्ताव पारित गरिनेछ । त्यसैगरी, बोनस सेयर वितरणपछि जारी तथा चुक्तापुँजी वृद्धि गर्नेसम्बन्धी अर्को विशेष प्रस्ताव पनि सभाबाट अनुमोदन गरिनेछ । सभामार्फत अघिल्लो आर्थिक वर्षको वार्षिक प्रतिवेदन, लेखापरीक्षकको प्रतिवेदन स्वीकृति, र चालु आर्थिक वर्षका लागि लेखापरीक्षकको नियुक्ति तथा पारिश्रमिक निर्धारण गर्ने प्रस्तावहरू पनि पारित गरिनेछन् । कम्पनीले साधारणसभा र लाभांश प्रयोजनका लागि वैशाख ३० गते बुक क्लोज गरेको छ । वैशाख २९ गते सार्वजनिक बिदा परेकाले, वैशाख २८ गते ९आइतबार० सम्म सेयरधनी सूचीमा नाम रहेकाहरू मात्र लाभांश प्राप्त गर्न र सभामा सहभागी हुन योग्य हुनेछन् ।
साढे १९ लाख कित्ता सेयर लिलामीमा, बोलकबोलमार्फत दोर्दी खोलाको हकप्रद बाँडफाँट
काठमाडौं । दोर्दी खोला जलविद्युत कम्पनीले करिब साढे १९ लाख कित्ता अवितरित हकप्रद सेयर लिलामीमा ल्याउने भएको छ । कम्पनीले यही जेठ ११ गतेदेखि लिलामी प्रक्रिया सुरु गर्ने जनाएको छ । कम्पनीले १ः१ अनुपातमा प्रति सेयर १०० रुपैयाँ दरले १ करोड ५ लाख ४२ हजार ६०४ कित्ता हकप्रद सेयर बिक्रीमा राखेको थियो। सो क्रममा बाँकी रहेका १९ लाख ४६ हजार ६७६ कित्ता सेयर अब लिलामीमार्फत बिक्रीमा ल्याउन लागिएको हो । उक्त सेयरमध्ये संस्थापक समूहका १२ लाख ८५ हजार ४१ कित्ता र सर्वसाधारण समूहका १ लाख ६५ हजार ९५६ कित्ता सेयर छन् । यिनको ‘लक-इन’ अवधि असार ७ गतेपछि समाप्त हुनेछ । साथै सर्वसाधारण समूहका लक-इनमा नरहेका थप ४ लाख ९५ हजार ६७९ कित्ता सेयर पनि यस लिलामीमा समावेश गरिने कम्पनीले जनाएको छ । सेयर खरिदका लागि इच्छुक व्यक्ति वा संस्थाले न्यूनतम १०० कित्तादेखि अधिकतम सम्पूर्ण सेयरसम्मको लागि बोलकबोल पेस गर्न सक्नेछन् ।
४.७४ प्रतिशत लाभांश पारित गर्न हिमालयन रिइन्स्योरेन्सले डाक्यो साधारण सभा
काठमाडौं । लाभांश प्रस्ताव पारित गर्न हिमालयन रिइन्स्योरेन्सले चौथो वार्षिक साधारण सभा बोलाएको छ । कम्पनी सञ्चालक समितिको जेठ १ गते बसेको बैठकले जेठ २५ गते काठमाडौंमा बिहान ११ बजे साधारण सभा आह्वान गरेको हो । सभाले कम्पनीले गत आर्थिक वर्ष २०८०/८१ को नाफाबाट चुक्ता पुँजी १० अर्ब ४० करोड रुपैयाँको ४.५० प्रतिशतका दरले ४६ करोड ८० लाख रुपैयाँ बोनस सेयर र कर प्रयोजनका लागि ०.२४ प्रतिशतका दरले २ करोड ४६ लाख ३१ हजार रुपैयाँ नगद गरी कुल ४.७४ प्रतिशत लाभांश प्रस्ताव पारित गर्नेछ । सभाले गत वर्ष सामाजिक उत्तरदायित्त्व अन्तर्गत प्रदान गरिएको खर्च तथा अन्य खर्च रकमको अनुमोदन गर्ने, प्रबन्ध पत्र तथा नियमावलीमा गरिएको थप तथा संशोधन र सो को अभिलेख गराउने सम्बन्धमा नियामकबाट कुनै फेरबदलको लागि निर्देशन प्राप्त भए सोही बमोजिम गर्न सम्पूर्ण अख्तियारी संचालक समितिलाई प्रत्यायोजन गर्नेछ । साथै, सञ्चालक समितिको आर्थिक वर्ष २०८०/८१ को वार्षिक प्रतिवेदन, लेखापरीक्षकको प्रतिवेदन, आर्थिक वर्ष २०८१/८२ का लागि बाह्य लेखापरीक्षक नियुक्ति तथा निजको पारिश्रमिक निर्धारण गर्नेछ ।
