४० माइक्रोनभन्दा पातलो प्लाष्टिक झोला प्रयोगमा सरकारको प्रतिबन्ध
काठमाडौं । सरकारले वातावरणीय प्रदूषण न्यूनीकरण गर्ने उद्देश्यले ४० माइक्रोनभन्दा पातलो प्लाष्टिकका झोलाको प्रयोगमा कडाइ गरेको छ । वाणिज्य, आपूर्ति तथा उपभोक्ता संरक्षण विभागले सूचना जारी गर्दै यस्ता झोलाको उत्पादन, आयात, बिक्री वितरण र प्रयोग नगर्न निर्देशन दिएको हो । चालु आर्थिक वर्ष २०८२/८३ को बजेट वक्तव्यको बुँदा नं. ११८ मा उल्लेख भएअनुसार संवत् २०८२ मंसिर १ गते देखि नै देशभर ४० माइक्रोनभन्दा पातलो प्लाष्टिकमा पूर्ण प्रतिबन्ध लगाइएको थियो । मन्त्रिपरिषद्को २०७८ माघ १७ गतेको निर्णयबाट स्वीकृत प्लाष्टिक झोला प्रतिबन्ध सम्बन्धी कार्ययोजना, २०७८ लाई प्रभावकारी रूपमा कार्यान्वयन गर्न विभागले यो कदम चालेको हो । विभागको जारी सूचनामा भनिएको छ ४० माइक्रोन भन्दा पातलो प्लाष्टिक झोलाको आयात, उत्पादन, बिक्री वितरण र दैनिक कामकाजका क्रममा प्रयोग नगर्नु/नगराउनुहुन सम्बन्धित सबैलाई यसै सूचना मार्फत पुनः अनुरोध गरिन्छ ।’ पातलो प्लाष्टिक नष्ट हुन सयौं वर्ष लाग्ने र यसले माटो तथा जलस्रोतमा गम्भीर असर पुर्याउने हुनाले, सहरको ढल निकासमा अवरोध पुर्याउने र फोहोर व्यवस्थापनमा चुनौती थप्ने भएकाले तथा सरकारको नीति र बजेट वक्तव्यमा गरिएको व्यवस्थालाई कार्यान्वयनमा ल्याउन प्रतिबन्ध गरेको जनाएको छ । विभागले अनुगमनका क्रममा प्रतिबन्धित प्लाष्टिक प्रयोग गरेको पाइएमा कानुन बमोजिम कारबाही गरिनेसमेत संकेत गरेको छ । सर्वसाधारण र व्यवसायी दुवैलाई वातावरणमैत्री विकल्पहरू प्रयोग गर्न विभागले प्रोत्साहन गरेको छ ।
‘ज्ञान मसला’को ब्रान्ड एम्बेसडरमा अभिनेत्री स्वस्तिमा खड्का
काठमाडौं । नेपालको प्रतिष्ठित व्यावसायिक घराना के एल दुगर ग्रुप अन्तर्गतको ‘ज्ञान मसला’ ले अभिनेत्री स्वस्तिमा खड्कालाई आफ्नो ब्रान्ड एम्बेसडर नियुक्त गरेको छ । कम्पनीले एक कार्यक्रमका बीच खड्कालाई ब्रान्डको नयाँ अनुहारको रूपमा सार्वजनिक गरेको हो । यस साझेदारीमार्फत कम्पनीले आफ्नो ब्रान्ड पहिचानलाई थप ऊर्जावान् बनाउने र विशेषगरी नयाँ पुस्ताका उपभोक्ताहरूसँग बलियो सम्बन्ध स्थापित गर्ने लक्ष्य राखेको छ । सन् १९८९ मा स्थापना भएको के एल दुगर ग्रुपले तीन दशकभन्दा बढी समयदेखि नेपाली बजारमा गुणस्तर र विश्वास आर्जन गर्दै आएको छ । कम्पनीका अनुसार ज्ञान ब्रान्डले नेपाली भान्सामा शुद्धता र स्वादको नयाँ मानक स्थापित गरेको छ । ज्ञान मसलासँग जोडिन पाउँदा अभिनेत्री स्वस्तिमा खड्काले पनि खुसी व्यक्त गरेकी छन् । उनले लामो समयदेखि आफ्नो घरमा समेत प्रयोग हुँदै आएको ब्रान्डको शुद्धता र गुणस्तरलाई अझ धेरै उपभोक्तामाझ पुर्याउन आफूले सक्रिय भूमिका खेल्ने प्रतिबद्धता जनाइन् । उपभोक्ताको बदलिँदो स्वाद र आवश्यकतालाई ध्यानमा राख्दै कम्पनीले हाल १४ विभिन्न प्रकारका मसलाहरू बजारमा उपलब्ध गराएको छ । बजारको मागअनुसार गुणस्तर र सान्दर्भिकता कायम राख्दै नयाँ उत्पादनहरू पनि थप्दै जाने कम्पनीको योजना छ ।
३० वर्ष पुरानो टाइम फर्मास्युटिकल्सले सर्वसाधारणका लागि सेयर जारी गर्ने
काठमाडौं । नेपाल स्टक एक्सचेञ्ज (नेप्से) र टाइम फर्मास्युटिकल्सबीच बुक बिल्डिङ विधिमार्फत सेयर निष्कासनका लागि शिलबन्दी बोलपत्रसम्बन्धी कार्य सञ्चालन गर्ने सम्झौता सम्पन्न भएको छ । नवलपरासीको गैंडाकोटमा केन्द्रीय कार्यालय रहेको कम्पनीले धितोपत्र दर्ता तथा निष्कासन नियमावली र बुक बिल्डिङ निर्देशिका, २०७७ को प्रावधानअनुसार बोलपत्र दर्ता, खोल्ने र निर्णय गर्ने प्रक्रियामा नेप्सेको सहजीकरण प्राप्त गर्ने गरी यो सम्झौता गरेको हो । सम्झौता पत्रमा नेप्सेका तर्फबाट प्रमुख कार्यकारी अधिकृत (सीईओ) चुडामणि चापागाईं र टाइम फर्मास्युटिकल्सका तर्फबाट प्रबन्ध सञ्चालक सुदर्शनलाल श्रेष्ठले हस्ताक्षर गरे । उक्त अवसरमा कम्पनी सचिव अधिवक्ता सुदिप घिमिरे र बिक्री प्रबन्धक नबिल इन्भेष्टमेन्टको तर्फबाट मनोहर कडेलको समेत उपस्थिति रहेको थियो । कम्पनीले १० करोड ८६ लाख ५० हजार रुपैयाँ बराबरको कुल १० लाख ८६ हजार ५०० कित्ता साधारण सेयर निष्कासन गर्ने तयारी गरेको छ । जसमध्ये ४० प्रतिशत अर्थात् ४ लाख ३४ हजार ६०० कित्ता सेयर योग्य संस्थागत लगानीकर्ताका लागि बुक बिल्डिङ विधिमार्फत बोलकबोल गरिनेछ भने बाँकी ६० प्रतिशत सेयर सर्वसाधारणका लागि सार्वजनिक निष्कासन गरिनेछ । यस सेयर निष्कासनपश्चात कम्पनीको चुक्ता पुँजी ५३ करोड रुपैयाँ पुग्नेछ । ३० वर्षदेखि औषधि उत्पादनमा सक्रिय यो कम्पनी डब्ल्यूएचओ(जीएमपी प्रमाणित उद्योग हो, जसले हाल २०० भन्दा बढी प्रकारका औषधि उत्पादन गर्दै ३०० जनालाई प्रत्यक्ष रोजगारी प्रदान गरिरहेको छ । नवलपरासीको उत्पादन प्लान्ट र ललितपुरको सातदोबाटोस्थित मार्केटिङ कार्यालय मार्फत कम्पनीले आफ्नो व्यवसाय विस्तार गर्दै आएको छ।
इनड्राइभले चालकहरूका लागि २२ लाख रुपैयाँ बराबरको इन्धन सहयोग गर्ने
काठमाडौं । विश्वव्यापी मोबिलिटी एण्ड डेलिभरी प्लेटफर्म इनड्राइभले नेपालमा बढ्दो इन्धन मूल्य र महँगीको प्रभावलाई मध्यनजर गर्दै ड्राइभर पार्टनरहरूलाई सहयोग गर्न २२ लाख रुपैयाँ बराबरको इन्धन सहयोग गर्ने घोषणा गरेको छ । यस पहलमार्फत कम्पनीले चालकहरूको आर्थिक दबाब कम गर्दै उनीहरूको आम्दानीलाई स्थिर राख्न सहयोग गर्ने लक्ष्य राखेको छ । नेपालमा राइड–हेलिङ सेवाको विस्तारसँगै हजारौं चालकहरूका लागि यो महत्वपूर्ण रोजगारीको स्रोत बनेको छ । साथै, यात्रुहरूले पनि सहज र किफायती यातायात सेवा उपभोग गर्दै आएका छन् । तर पछिल्लो समय इन्धन मूल्यमा भएको निरन्तर वृद्धिले चालकहरूको सञ्चालन खर्च बढाएको छ, जसले उनीहरूको दैनिक आम्दानीमा प्रत्यक्ष असर पुर्याएको छ । अर्कोतर्फ, यात्रुहरू पनि भाडा वृद्धि प्रति संवेदनशील रहेको अवस्थामा बजारमा सन्तुलन कायम राख्नु चुनौतीपूर्ण बन्दै गएको छ । यही दोहोरो चुनौतीलाई सम्बोधन गर्न इनड्राइभले चालकहरूको दिगोपन र यात्रुहरूको किफायती सेवाबीच सन्तुलन कायम गर्ने प्रतिबद्धता जनाएको छ । कम्पनीले चालक समुदायबाट उठिरहेका चासो र गुनासाहरूलाई गम्भीरतापूर्वक लिँदै, यातायात क्षेत्रका संरचनात्मक समस्याहरू समाधान गर्न भइरहेको पहलहरूलाई पनि समर्थन गरेको जनाएको छ । चालकहरूका लागि इन्धन सहयोग पहल बढ्दो सञ्चालन लागतलाई ध्यानमा राख्दै इनड्राइभले २०२६ अप्रिल १५ (वैशाख २, २०८३) देखि लागू हुने गरी रु २२ लाखको इन्धन सहयोग कार्यक्रम सुरु गर्ने घोषणा गरेको छ । यो कार्यक्रममार्फत इन्धन मूल्य वृद्धिबाट प्रभावित चालकहरूको आर्थिक भार कम गर्न मद्दत पुग्ने अपेक्षा गरिएको छ । यस पहलले चालकहरूको आम्दानीमा आएको दबाबलाई न्यूनीकरण गर्नुका साथै यात्रुहरूमा थप आर्थिक भार नपार्दै सेवा निरन्तरता कायम राख्न सहयोग गर्ने लक्ष्य राखेको छ । यसले बजारअनुकूल र व्यवहारिक समाधानमार्फत चालकहरूको दिगोपन सुदृढ गर्ने तथा किफायती यातायात सेवा निरन्तर उपलब्ध गराउने इनड्राइभको प्रतिबद्धतालाई पुनः पुष्टि गर्दछ । चालक आम्दानी र लचिलोपन सुदृढ गर्ने प्रयास इन्धन सहयोग पहलसँगै इनड्राइभले चालकहरूको आम्दानी वृद्धि र कार्यगत लचिलोपनलाई थप मजबुत बनाउन विभिन्न उपायहरू कार्यान्वयन गर्दै आएको छ । तीमध्ये प्रमुख पहलहरू यसप्रकार छन् : केही चयन गरिएका राइडहरूमा कम सेवा शुल्क लागू गरिएको । प्लेटफर्ममा सक्रिय सहभागिता बढाउन कार्यसम्पादनमा आधारित प्रोत्साहन तथा पुरस्कार व्यवस्था र चालकहरूको कमाइ क्षमता बढाउने विभिन्न अभियान र इन्सेन्टिभ कार्यक्रमहरू । विश्वव्यापी रूपमा इनड्राइभले राइड–हेलिङ उद्योगमै सबैभन्दा न्यून सेवा शुल्क संरचना मध्ये एक कायम राख्दै आएको छ, जसले यसको 'ड्राइभर फस्र्ट' दृष्टिकोणलाई झल्काउँछ । साथै, इनड्राइभको पियर–टु–पियर मोडेलले यात्रु र चालकलाई भाडा प्रत्यक्ष रूपमा तय गर्न सक्ने सुविधा प्रदान गर्दछ । यसले वास्तविक समयको बजार अवस्था र सञ्चालन खर्चलाई ध्यानमा राख्दै न्यायोचित भाडा निर्धारण गर्न सहयोग र्पुयाउँछ । सन्तुलित र दिगो मोबिलिटी प्रणालीप्रति प्रतिबद्धता इनड्राइभ नेपालकी सिनियर ड्राइभर अपरेशन्स स्पेसलिस्ट सुनिता जिमी राईले भनिन्, 'बढ्दो इन्धन लागतले हाम्रा ड्राइभर पार्टनरहरूको दैनिक आम्दानीमा प्रत्यक्ष प्रभाव पारेको छ । यस्तो अवस्थामा प्लेटफर्महरूको जिम्मेवारी भनेको तत्काल राहत दिने मात्र होइन, दीर्घकालीन रूपमा चालक र यात्रु दुवैका लागि न्यायोचित र सन्तुलित प्रणाली निर्माण गर्नु हो ।' 'हाम्रो प्लेटफर्मको मूल आधार नै न्याय हो । चालकलाई सशक्त बनाउँदै सेवा सबैका लागि पहुँचयोग्य राख्नु हाम्रो प्राथमिकता हो, जसले दिगो र सन्तुलित मोबिलिटी इकोसिस्टम निर्माणमा योगदान पुर्याउँछ ।' नेपालको मोबिलिटी क्षेत्र तीव्र रूपमा विकास भइरहेको सन्दर्भमा इनड्राइभले चालक समुदाय, साझेदारहरू तथा अन्य सरोकारवालाहरूसँग सहकार्य गर्दै चुनौतीहरूको समाधान खोज्ने आफ्नो प्रतिबद्धता पुनः दोहोर्याएको छ । कम्पनीले बजार अवस्थाको निरन्तर अनुगमन गर्दै आवश्यकता अनुसार आफ्ना कार्यक्रमहरूलाई थप परिमार्जन गर्दै लैजाने जनाएको छ ।
सिद्धार्थ बैंकका ग्राहकलाई नेपाल ईन्टरनेस्नल हेल्थ सर्भिसेजमा ५० प्रतिशतसम्म छुट
काठमाडौं । सिद्धार्थ बैंक र नेपाल ईन्टरनेस्नल हेल्थ सर्भिसेजबीच सम्झौता सम्पन्न भएको छ । जसअन्तर्गत बैंकका ग्राहकहरूले विभिन्न स्वास्थ्य सेवामा छुट पाउने भएका छन् । सम्झौताअनुसार जमलस्थित नेपाल ईन्टरनेस्नल हेल्थ सर्भिसेजमा बैंकको कार्ड वा मोबाइल बैंकिङ प्रयोग गरी भुक्तानी गर्दा ग्राहकहरूले ५० प्रतिशतसम्मको छुट प्राप्त गर्न सक्नेछन् । सिद्धार्थ बैंकले यस सम्झौताले ग्राहकहरूलाई छुटको सुविधा उपलब्ध गराउनुका साथै नगद कारोबारबाट डिजिटल कारोबारमा जाने प्रवृत्ति बढाउने विश्वास लिएको छ ।
पूर्वपत्नीको जाहेरीले जीपी तिमिल्सिना पक्राउ
काठमाडौं । सञ्चारकर्मी जीपी तिमिल्सिना पक्राउ परेका छन् । पूर्वपत्नीसमेत रहेकी पूर्वमिस नेपाल उषा खड्गीले जाहेरी दिएपछि जीपी पक्राउ परेका हुन् । परिसरका डीएसपी प्रकाश जबेगुले जीपीले मंगलबार पक्राउ परेको जानकारी दिए । ‘हामीले तिमिल्सिनालाई पक्राउ गरेका छौं,’ उनले भने । उषा खड्गीले तिमिल्सिनाविरुद्ध अभद्र व्यवहारको कसुरमा जाहेरी दिएकी थिइन् । केही दिनअघि खड्गीले सामाजिक सञ्जालमार्फत पूर्वपतिविरुद्ध अभद्र व्यवहार गरेको उल्लेख गरेकी थिइन् ।
पहिला विनास, पछि छानबिन
काठमाडौं । पोखराको फेवा ताल किनारामा रहेको अतिक्रमित जग्गामा निर्मित संरचना पहिला स्थानीय सरकारले भत्काउने र पछि संघीय सरकारले छानबिन समिति गठन गर्ने कार्यले अनिश्चितता बढाएको छ । सर्वोच्च अदालतले २०७९ असार ६ गते दिएको आदेशअनुसार तालको उच्च जलरेखाबाट ६५ मिटरभित्रका सबै संरचना हटाउन र अवैध जग्गा दर्ता खारेज गर्न निर्देशन दिएको थियो । सर्वोच्च अदालतको सोही आदेशअनुसार पोखरा महानगरपालिकाले केही दिनदेखि फेवा किनाराका अतिक्रमित जग्गामा रहेका घर टहरा भत्काइरहेको छ । महानगरको उक्त काममा गृह मन्त्रालयको समेत सहयोग रहेको र मन्त्रालयकै प्रेरणामा अतिक्रमण हटाउने काम भइरहेको पोखरा महानगरका प्रमुख धनराज आचार्यले जानकारी दिए । तर, अदालतको आदेश कार्यान्वयनको क्रम चलिरहेको समयमा सरकारले फेरि अर्को समिति गठन गरेर विषयलाई गिजोल्न खोजेको महानगरको बुझाइ रहेको छ । सरकारले फेवातालको चार किल्लाभित्रको जग्गाको हालको अवस्था यकिन गर्न ५ सदस्यीय छानबिन समिति गठन गरेको छ । भूमि व्यवस्था, सहकारी तथा गरिबी निवारण मन्त्रालय अन्तर्गतको समितिले भूमिसम्बन्धी विवरण संकलन, संरचना अध्ययन र अभिलेखीकरण कार्य गर्नेछ । समितिलाई ७ दिनभित्र प्रतिवेदन पेश गर्नेगरी कार्यभार तोकिएको छ । मन्त्रालयले भूमि व्यवस्था तथा अभिलेख विभागका महानिर्देशकको संयोजकत्वमा ५ सदस्यीय समिति गठन गरेको हो । प्रधानमन्त्री वालेन्द्र शाहको चासोपछि पोखरा महानगरले अतिक्रमित क्षेत्र खाली गर्ने अभियान सुरु गरिसकेको छ । यस्तो अवस्थामा केन्द्रीय सरकारले समिति गठन गर्नुलाई महानगरले चासोका साथ हेरिरहेको महानगरका उपप्रमुख मञ्जु गुरुङले जानकारी दिइन् । सरकारको यस कदमले कुन जग्गा वैध र कुन अवैध भन्ने जटिलता देखिन सक्ने महानगरको शंका रहेको छ । तर, संघीय सरकारले भने कागजी रूपमा वैध देखिने तर ऐतिहासिक रूपमा अतिक्रमणमा परेको जग्गा, सरकारी त्रुटिबाट दर्ता भएका लालपूर्जा र वास्तविक अतिक्रमण छुट्याउन कठिन भएकाले सरकारले नयाँ रणनीति अघि सारेको बताएको छ । भूमि मन्त्रालयका एक अधिकारी भन्छन्, ‘समिति गठनले महानगरले गरिरहेको काममा कुनै असर गर्दैन ।’ संघ–प्रदेशको दोहोरो पहल यसअघि नै गण्डकी प्रदेश सरकारले मुख्यमन्त्रीको नेतृत्वमा उच्चस्तरीय समिति गठन गरेर सीमांकन र अतिक्रमण हटाउने काम अगाडि बढाइरहेको छ । प्रदेश समितिले ताल वरपर पोल गाडेर संरचना हटाउने काम सुरु गरिसकेको छ । साथै भूमि व्यवस्था, सहकारी तथा गरिबी निवारण मन्त्रालयले भूमि व्यवस्था तथा अभिलेख विभागका महानिर्देशकको संयोजकत्वमा ५ सदस्यीय उच्चस्तरीय समिति गठन गरेको छ । यस समितिको काम पनि चार किल्लाभित्रको जग्गाको कानुनी स्थिति प्रमाणित गर्नु, वैध र अवैध दर्ताको स्पष्ट वर्गीकरण र अदालतको आदेश कार्यान्वयनको कानुनी आधार बलियो बनाउने रहेको छ । यसले फेवा किनारा फेरि दोहोरो शक्ति सन्तुलनको चेपुवामा पर्न सक्ने स्थानीय पूर्ण लामाले बताए । संघीय समिति प्राविधिक र कानुनी सत्यता सुनिश्चित गर्ने ट्रुथ फाइन्डरको रूपमा काम गर्ने भनिएपनि प्रदेश समिति कार्यान्वयन र तत्काल संरचना हटाउने जिम्मेवारीमा छ । यसले दोहोरो शक्ति संघर्षको अवस्था सिर्जना गर्नसक्ने भय रहेको प्रदेश मुख्यमन्त्री कार्यालयका एकजना उच्च अधिकारीले नाम नबताउने सर्तमा विकासन्युजलाई बताए । पहिला भत्काउने, पछि छानबिन गर्ने महानगरले आफ्नो काम गरिरहेको अवस्थामा र प्रदेश सरकारले आफ्नो काम अगाडि बढाइरहेको अवस्थामा संघीय सरकारले नयाँ समिति बनाउँदा क्षेत्राधिकारको समस्या आउन सक्ने उपमेयर गुरुङले बताइन् । उनले भनिन्, ‘संघीय सरकारको चाहना पनि अवैध संरचना हटाउने नै होला तर क्षेत्राधिकार जुध्दा काममा अवरोध हुनसक्छ ।’ गुरुङका अनुसार लेकसाइड, खपौंदी, पुम्दी–भुम्दी क्षेत्रका घर, होटल, रिसोर्ट हटाइने काम भएको छ । ताल वरपर सार्वजनिक क्षेत्र खाली गरिसकिएको छ । महानगरले आफ्नो काम अगाडि बढाएको छ । उपमेयर गुरुङले भनिन्, ‘फेवातालको भविष्य अब संघप्रदेशको संयुक्त पहल, अदालतको आदेश र उच्चस्तरीय समितिको निर्णयमा निर्भर छ ।’ स्थानीय पूर्ण लामा भने पहिला भत्काउने, पछि छानबिन गर्ने रणनीतिले तत्काल संरक्षण र दीर्घकालीन कानुनी स्पष्टतामा असहजता सिर्जना गर्नसक्ने बताउँछन् । उनी भन्छिन्, ‘दुवैको उद्देश्य राम्रै होला ? यस निर्णयको परिणामले नेपालमा प्राकृतिक स्रोत व्यवस्थापन र अतिक्रमण नियन्त्रणमा नयाँ आयाम तय गर्नसकोस् ।’
भिभोको ५० एमपी जाइस सुपर टेलिफोटो क्यामेरासहित भी७० सार्वजनिक
काठमाडौं । भिभोले भी सिरिज अन्तर्गत नयाँ स्मार्टफोन भी७० सार्वजनिक गरेको छ । कम्पनीका अनुसार यो स्मार्टफोन रूपमा उच्च गुणस्तरको पोट्र्रेट फोटोग्राफी र टाढाबाट स्पष्ट तस्बिर खिच्न सकिने गरी डिजाइन गरिएको छ । नयाँ भी७० मा ५० मेगापिक्सेल जाइस सुपर टेलिफोटो क्यामेरा समावेश गरिएको छ, जसले टाढाबाट पनि स्पष्ट र उच्च गुणस्तरका तस्बिर खिच्न मद्दत गर्छ । लाइट कम हुँदा पनि राम्रो फोटो खिच्ने यस क्यामेराले प्रयोगकर्ताहरुले महत्वपूर्ण क्षणहरू कैद गर्न सक्ने कम्पनीको दाबी छ । स्टेज कार्यक्रम वा पोट्र्रेट फोटो खिच्दा पनि यसले उत्कृष्ट विवरण र स्पष्टता प्रदान गर्ने जनाइएको छ । यसैगरी, भी सिरिज अन्तर्गतको भी७० मा पहिलो पटक ४के ६० फ्रेम प्रति सेकेन्ड भिडियो रेकर्डिङ सुविधा उपलब्ध गराइएको छ । एआई स्टेज मोडको सहयोगले १ गुणादेखि १० गुणा र २० गुणासम्म जूम गरेर पनि स्पष्ट दृश्य कैद गर्न सकिन्छ । यसले विशेष गरी कन्सर्ट तथा स्टेज कार्यक्रमहरूमा टाढाबाट खिचिएका तस्बिरमा अनुहारको स्पष्टता र साना विवरणहरू सुरक्षित राख्न मद्दत गर्ने बताइएको छ । साथै, जाइस मल्टिफोकल पोट्र्रेट र जाइस स्टाइल बोकेह जस्ता फिचरहरूले पोट्र्रेट फोटोग्राफीलाई अझ आकर्षक बनाउनेछन् । डिजाइनतर्फ, भी७० मा एयरोस्पेस–ग्रेड ६–सिरिज एल्युमिनियम एलोय फ्रेम प्रयोग गरिएको छ, जसले उपकरणलाई मजबुत र टिकाउ बनाउनुका साथै जंग प्रतिरोधी क्षमता पनि प्रदान गर्छ । फ्ल्याट डिस्प्ले विथ राउन्डेड कर्नर्स डिजाइनले आधुनिक र प्रयोगमैत्री अनुभव दिने कम्पनीको भनाइ छ । फ्ल्यागशिप मेटालिक क्यामेरा मोड्युलले यसको प्रिमियम लुकलाई अझ निखार दिएको छ । यो स्मार्टफोन ड्युन ग्रे र स्यान्डलवुड ब्राउन रंगमा उपलब्ध हुनेछ । प्रदर्शनका हिसाबले, भी७० मा १.५के अल्ट्रा क्लियर ओएलईडी डिस्प्ले र १२० हर्ज रिफ्रेस रेट राखिएको छ, जसले स्मूद र स्पष्ट दृश्य अनुभव प्रदान गर्छ । ६५०० एमएएच् क्षमताको ब्लुभोल्ट ब्याट्री र ९० वाट फ्ल्यासचार्ज प्रविधिले लामो समयसम्म प्रयोग गर्न सकिने र छिटो चार्ज हुनेछ । साथै, आईपी६८ र आईपी६९ स्तरको धुलो तथा पानी प्रतिरोधी क्षमताले दैनिक प्रयोगमा थप सुरक्षा प्रदान गर्ने कम्पनीले जनाएको छ । कम्पनीका अनुसार भी७० देशभर बिक्रीका लागि उपलब्ध भइसकेको छ । यसको १२ जीबी र्याम तथा २५६ जीबी स्टोरेज भेरियन्टको मूल्य ८३,९९९ रुपैयाँ तोकिएको छ भने १२ जीबी र्याम तथा ५१२ जीबी स्टोरेज भेरियन्टको मूल्य ९४,९९९ रुपैयाँ रहेको छ । यो स्मार्टफोन भिभोका आधिकारिक बिक्रेताहरू तथा दराज अनलाइनमार्फत खरिद गर्न सकिनेछ । भिभोे भी७० लाई थप आकर्षक बनाउन भिभोले विशेष अफरहरू पनि ल्याएको छ । पहिलो १,२०० ग्राहकले भिभो बड्स एयर ३ निःशुल्क प्राप्त गर्नेछन् । त्यसैगरी, पहिलो २,००० ग्राहकले ६ महिनासम्म मान्य हुने एकपटकको स्क्रिन रिप्लेसमेन्ट र एकपटकको वाटर ड्यामेज प्रोटेक्सन सुविधा प्राप्त गर्नेछन् । साथै, ४ जना भाग्यशाली ग्राहकले बम्पर उपहारस्वरूप ईभी स्कुटर जित्ने अवसर पनि पाउनेछन् । ग्राहकहरूले भी७० लाई १२ महिनाको शून्य प्रतिशत ब्याजदरको ईएमआई सुविधामा पनि खरिद गर्न सक्नेछन् ।
