बिहान उठ्नेबित्तिकै मोबाइल हेर्ने बानीले बढाउन सक्छ तनाव, मुटुमा कस्तो असर पर्छ ?
काठमाडौं । बिहान आँखा खुल्नेबित्तिकै मोबाइलमा सामाजिक सञ्जाल, ह्वाट्सएप, इमेल, समाचार तथा अन्य सूचनाहरू हेर्ने बानी धेरैमा छ । कतिपयले ओछ्यानबाट नउठ्दै कार्यालयका सन्देश, कामको दबाब र विश्वभरका समाचार हेर्न थाल्छन् । तर, दिनको सुरुवात गर्ने यो बानीले तनाव र मुटुको स्वास्थ्यमा कस्तो असर पार्न सक्छ भन्नेबारे ध्यान दिन आवश्यक छ । बिहान उठ्नेबित्तिकै मोबाइल चलाउनु आफैँमा मुटुका लागि हानिकारक प्रमाणित भएको छैन । तर, मोबाइलमा आउने तनावपूर्ण सन्देश, नकारात्मक समाचार वा कामको दबाबसँग सम्बन्धित सूचनाले केही व्यक्तिमा चिन्ता र बेचैनी बढाउन सक्छ । लामो समयसम्म तनाव रहिरहने, निद्रा बिग्रने र अस्वस्थ दिनचर्याले भने मुटुको स्वास्थ्यमा असर पार्न सक्छ । बिहान उठ्नेबित्तिकै मोबाइल हेर्ने बानी किन बढ्दै छ ? कार्यालयका इमेल हेर्न, परिवारका सन्देशको जवाफ दिन, सामाजिक सञ्जालका अपडेट थाहा पाउन र रातभरिका समाचार पढ्न धेरैले बिहानै मोबाइल चलाउँछन् । बिस्तारै यो बानी नियमित बन्दै जाँदा कतिपयले सोचविचार नगरी मोबाइलको स्क्रिन हेर्न थाल्छन् । मोबाइलमा आउने नयाँ सन्देश, लाइक र सूचनाले पनि बारम्बार फोन हेर्ने बानी बढाउन सक्छन् । ओछ्याननजिकै मोबाइल राख्ने गर्दा उठ्नेबित्तिकै फोन चलाउन झन् सजिलो हुन्छ । यद्यपि, मोबाइल हेर्दा हरेक पटक तनाव हुन्छ भन्ने होइन । परिवारका सदस्यको राम्रो सन्देश वा मनपर्ने गीतले खुसी पनि दिन सक्छ । तर, मोबाइल खोल्नेबित्तिकै कामको दबाब, नकारात्मक समाचार, विवाद वा चिन्ता बढाउने सामग्री देखिएमा मानसिक तनाव बढ्न सक्छ । नेसनल सेन्टर फर बायोटेक्नोलोजी इन्फर्मेसन (एनसीबीआई) मा प्रकाशित एक समीक्षाले समस्याजनक स्मार्टफोन प्रयोग र खराब निद्राको गुणस्तर तथा चिन्ताबीच सम्बन्ध रहेको देखाएको छ । तर, यस्तो अध्ययनले बिहान मोबाइल हेर्ने बानीले मात्रै यी समस्या निम्त्याउँछ भन्ने प्रमाणित गर्दैन । तनावपूर्ण सामग्रीले शरीरमा कस्तो असर पार्छ ? बिहान उठ्नेबित्तिकै कार्यालयको तनावपूर्ण इमेल, आर्थिक समस्यासम्बन्धी समाचार वा चिन्ता बढाउने सन्देश देख्दा मस्तिष्कले त्यसलाई चुनौती वा सम्भावित खतराका रूपमा लिन सक्छ । यस्तो अवस्थामा शरीरमा तनावसम्बन्धी प्रतिक्रिया सक्रिय हुन सक्छ । तनाव हुँदा शरीरमा एड्रेनालिनजस्ता हर्मोन निस्कन्छन् । यसले मुटुको धड्कन र श्वासप्रश्वासको गति बढाउन सक्छ भने रक्तचाप पनि केही समयका लागि बढ्न सक्छ । यो शरीरको सामान्य प्रतिक्रिया हो, जसले चुनौतीको सामना गर्न शरीरलाई तयार पार्छ । अमेरिकन हार्ट एसोसिएसनका अनुसार तनावपूर्ण अवस्थामा एड्रेनालिन निस्कँदा मुटुको धड्कन, श्वासप्रश्वास र रक्तचाप अस्थायी रूपमा बढ्न सक्छन् । लामो समयसम्म तनाव कायम रहँदा भने यसले स्वास्थ्यमा जोखिम बढाउन सक्छ । यद्यपि, बिहान मोबाइलमा नकारात्मक समाचार पढेकै कारण सीधै मुटुरोग हुन्छ भन्न मिल्दैन । तर, दिनहुँ तनाव र बेचैनीबाट दिनको सुरुवात भइरहेको छ भने आफ्नो बिहानको दिनचर्यामा परिवर्तन गर्नु उपयोगी हुन सक्छ । तनावले मुटुको धड्कन र रक्तचाप किन बढाउँछ ? चिन्ता वा तनाव हुँदा शरीरको सिम्पेथेटिक नर्भस सिस्टम सक्रिय हुन सक्छ । यसले मुटुलाई छिटो धड्कन संकेत दिन्छ र रक्तनलीमा हुने परिवर्तनका कारण रक्तचापसमेत बढ्न सक्छ । यस्तो अवस्थामा केही व्यक्तिले मुटुको धड्कन असामान्य रूपमा तेज भएको महसुस गर्ने, हत्केलामा पसिना आउने, बेचैनी हुने वा श्वासप्रश्वास छिटो चल्ने अनुभव गर्न सक्छन् । उदाहरणका लागि, बिहान उठ्नेबित्तिकै कामको समयसीमा, आर्थिक समस्या वा विवादसँग सम्बन्धित सन्देश देख्दा तनाव उत्पन्न हुन सक्छ । यस्तो प्रतिक्रिया सामान्यतया अस्थायी हुन्छ । तनाव कम हुँदै जाँदा मुटुको धड्कन र रक्तचाप पनि सामान्य अवस्थामा फर्किन सक्छन् । मोबाइल चलाउने बानी र निद्राबीच कस्तो सम्बन्ध छ ? राति अबेरसम्म मोबाइल चलाउने र बिहान उठ्नेबित्तिकै स्क्रिन हेर्ने बानीले निद्रा तथा आरामको दिनचर्यालाई प्रभावित गर्न सक्छ । विशेषगरी, राति पर्याप्त निद्रा नपुग्ने र मोबाइलका सूचनाले बारम्बार ध्यान भंग हुने अवस्थामा शरीरले आवश्यक आराम नपाउन सक्छ । तर, बिहान मोबाइल हेर्ने बानी र खराब निद्राबीच प्रत्यक्ष कारण–परिणाम सम्बन्ध स्थापित भइसकेको छैन । त्यसैले बिहान फोन चलाएकै कारण निद्रा बिग्रन्छ वा मुटुरोग हुन्छ भन्न मिल्दैन । मोबाइलमा आउने सामग्रीले चिन्ता बढाउने, सूचनाले ध्यान भंग गर्ने र रातिको निद्रा प्रभावित हुने अवस्था लामो समयसम्म रहिरहेमा भने यी बानीले अप्रत्यक्ष रूपमा मुटुको स्वास्थ्यमा असर पार्न सक्छन् । बिहानको मोबाइल प्रयोग कसरी व्यवस्थित गर्ने ? बिहान उठ्नेबित्तिकै मोबाइल हेर्नुको सट्टा केही समय आफ्ना लागि छुट्याउनु उपयोगी हुन सक्छ । दिनको सुरुवात शान्त र व्यवस्थित बनाउन निम्न उपाय अपनाउन सकिन्छ: मोबाइल हेर्न केही समय पर्खनुहोस् उठ्नेबित्तिकै फोन चलाउनुको सट्टा व्यक्तिगत दिनचर्याका लागि केही समय छुट्याउनुहोस्। अनावश्यक सूचना बन्द गर्नुहोस् काम वा सामाजिक सञ्जालका सबै सूचना तुरुन्तै हेर्नुपर्ने बाध्यता कम गर्नुहोस्। तनाव बढाउने सामग्रीबाट दूरी राख्नुहोस् बिहानै नकारात्मक समाचार वा चिन्ता बढाउने सामग्रीमा धेरै समय नबिताउनुहोस्। निद्रालाई प्राथमिकता दिनुहोस् राति पर्याप्त निद्रा लिनुहोस् र सुत्नुअघि मोबाइल प्रयोग सीमित गर्ने प्रयास गर्नुहोस्। तनाव व्यवस्थापनमा ध्यान दिनुहोस् शान्त भएर दिनको योजना बनाउने, हल्का व्यायाम गर्ने वा केही समय आराम गर्ने बानी बसाल्नुहोस्। बिहान मोबाइल चलाउने बानी मात्रै मुटुरोगको कारण हो भन्ने प्रमाण छैन । तर, मोबाइलको प्रयोगले तनाव बढाइरहेको छ वा निद्रा प्रभावित भइरहेको छ भने त्यसलाई व्यवस्थित गर्नु राम्रो हुन्छ । स्वस्थ दिनचर्या, पर्याप्त निद्रा र तनाव व्यवस्थापनले समग्र स्वास्थ्यमा सकारात्मक भूमिका खेल्न सक्छ ।
कांग्रेस सभापति गगन थापाको शपथग्रहण आज
काठमाडौं । नेपाली कांग्रेसका नवनिर्वाचित सभापति गगनकुमार थापाले आज पद तथा गोपनीयताको शपथ ग्रहण गरी पदभार ग्रहण गर्ने भएका छन् । कांग्रेसको १५औँ महाधिवेशनबाट सभापतिमा निर्वाचित थापाको शपथग्रहण तथा पदबहाली कार्यक्रम आज दिउँसो २ बजे पार्टी केन्द्रीय कार्यालयमा आयोजना गरिएको छ। पार्टीका कार्यवाहक मुख्यसचिव कृष्णप्रसाद दुलालले जारी गरेको सूचनाअनुसार महाधिवेशनको मतगणना सम्पन्न भएपछि नवनिर्वाचित सभापतिको पदबहाली कार्यक्रम तय गरिएको हो । सभापति बाहेक निर्वाचित सबैको पद तथा गोपनीयताको शपथ ग्रहण कार्यक्रम दशैं पछि हुने बताइएको छ ।
हानि तथा नोक्सानी कोषको आकस्मिक बैठक बोलाइयो, रसुवा बाढी मुख्य एजेन्डा
काठमाडौं । रसुवाको भोटेकोशी–त्रिशूली करिडोरमा गएको विनाशकारी बाढीपछि उत्पन्न मानवीय तथा भौतिक सङ्कट सम्बोधन गर्न संयुक्त राष्ट्रसङ्घीय जलवायु संरचनाअन्तर्गतको ‘हानि तथा नोक्सानी कोष’ (फन्ड फर रेस्पोन्डिङ टु लस एन्ड ड्यामेज) को सञ्चालक समितिको आकस्मिक बैठक आगामी कात्तिक ५ गते बस्ने भएको छ । विपद्पछिको आपत्कालीन सहायता उपलब्ध गराउने विषयमा निर्णय गर्न कोषले २६ सदस्यीय बोर्डको विशेष भर्चुअल बैठक आह्वान गरेको हो । गत भदौ १० गते (२६ अगस्ट) रसुवामा आएको बाढी जलवायुजन्य विपद् भएको उल्लेख गर्दै नेपाल सरकारले भदौ १५ गते (३१ अगस्ट) मा कोषसमक्ष ‘र्‍यापिड रेस्पोन्स’ (तत्काल प्रतिकार्य) संयन्त्रमार्फत आपत्कालीन आर्थिक सहायता माग गरी औपचारिक पत्राचार गरेको थियो । नेपालको पत्राचारलाई स्वीकार गर्दै कोषले यसैलाई बैठकको प्रमुख एजेन्डा बनाएको जलवायु वित्त विज्ञ राजु पण्डित क्षेत्रीले जानकारी दिएका छन् । न्युज एजेन्सी नेपालसँग कुरा गर्दै क्षेत्रीले भने, 'जलवायुजन्य विपद्का घटनामा तत्काल राहत पुर्याउन कोषको विधानमै ‘र्‍यापिड रेस्पोन्स’ र आकस्मिक बैठकको व्यवस्था छ । यद्यपि, कोषले हालसम्म कुनै पनि देशका लागि यसरी रकम प्रवाह गरेको थिएन । नेपालको गम्भीर परिस्थितिलाई आत्मसात् गर्दै कोषले इतिहासमै पहिलोपटक यस्तो आकस्मिक बैठक डाकेको हो ।' विज्ञ क्षेत्रीका अनुसार बैठकले नेपाललाई करिब २० मिलियन अमेरिकी डलर (करिब २ अर्ब ७० करोडदेखि ३ अर्ब रुपैयाँसम्म) सहायता दिने निर्णय गर्न सक्ने बलियो सम्भावना छ । कोषको बोर्डमा १४ विकासशील र १२ विकसित मुलुकसहित २६ सदस्य रहने र त्यहाँ मतदान नभई सर्वसम्मतिका आधारमा निर्णय हुने भएकाले नेपालको पक्षमा वातावरण अनुकूल रहेको उनको भनाइ छ । कोषको बोर्डमा प्रतिनिधित्व गर्ने अतिकम विकसित (एलडीसी), अफ्रिकी तथा एसिया–प्रशान्त क्षेत्रका राष्ट्रहरूले समेत नेपाललाई तत्काल सहायता दिन औपचारिक पत्रमार्फत माग गरिसकेका छन् । कोषले सहायता स्वीकृत गरे पनि खर्च गर्ने ढाँचा (मोडालिटी) का कारण रकम तत्कालै हात परिहाल्ने सम्भावना भने कम रहेको क्षेत्रीले स्पष्ट पारे । बैठकले नेपालको सन्दर्भमा मुख्यतः तीनवटा विकल्पमा निर्णय लिन सक्ने उनको विश्लेषण छ । पहिलो, नेपाललाई निश्चित सहायता रकम तोकेर तत्काल उपलब्ध गराउने । दोस्रो, कुन–कुन क्षेत्रमा कसरी खर्च गर्ने भन्ने कार्ययोजना र ढाँचा माग गर्ने । अथवा तेस्रो, नेपालले पेस गर्ने खर्च योजनाको अध्ययन गरी आगामी डिसेम्बरमा बस्ने बोर्डको दसौँ बैठकबाट अन्तिम निकासा गर्ने । दुबईमा सम्पन्न राष्ट्रसङ्घीय जलवायु सम्मेलन (कोप–२८) बाट सञ्चालनमा आएको यस कोषमा विश्वभरका जोखिमयुक्त राष्ट्रहरूबाट हालसम्म २.८ अर्ब डलर बराबरको क्षतिपूर्ति माग भइसकेको छ । नेपालले यसअघि नै नियमित प्रक्रियाअन्तर्गत तीनवटा प्रस्ताव दर्ता गराइसकेको भए पनि रसुवा बाढीका लागि माग गरिएको यो सहायता भने पूर्ण रूपमा छुट्टै र आपत्कालीन प्रकृतिको हो । गत भदौ १० गते रसुवाको भोटेकोशी तथा त्रिशूली नदीमा आएको भीषण बाढीले ठूलो सङ्ख्यामा मानवीय क्षति पुर्याउनुका साथै निर्माणाधीन तथा सञ्चालनमा रहेका जलविद्युत् आयोजना, सडक र स्थानीय पूर्वाधारमा अर्बौँको भौतिक क्षति पुर्याएको थियो ।
विदेशी सामग्रीमा निर्भरता घटाउने सरकारको नीति, सडकदेखि भवनसम्म स्वदेशी उत्पादनलाई जोड
काठमाडौं । सरकारले सार्वजनिक खरिद तथा पूर्वाधार निर्माणमा स्वदेशी उत्पादन र प्रविधिको प्रयोगलाई प्राथमिकता दिने नीति अघि सारेको छ । मन्त्रिपरिषद् बैठकले ‘सार्वजनिक खरिदमा स्वदेशी उत्पादनको प्रवर्धन र प्रयोगसम्बन्धी निर्देशिका, २०८३’ स्वीकृत गरेसँगै सरकारी निर्माण आयोजनामा आयातित सामग्रीको निर्भरता घटाउने व्यवस्था गरिएको हो । निर्देशिकाले सडक, पुल र भवनलगायत पूर्वाधार निर्माणमा स्वदेशी सामग्री तथा प्रविधिको प्रयोग बढाउन जोड दिएको छ । प्राविधिक रूपमा उपयुक्त स्वदेशी विकल्प उपलब्ध हुँदाहुँदै विदेशी सामग्री प्रयोग गर्नुपर्ने गरी डिजाइन बनाउन नपाइने व्यवस्था गरिएको छ । सडक निर्माणमा आयातित बिटुमिनमा आधारित कालोपत्रेको विकल्पका रूपमा प्राविधिक रूपमा उपयुक्त भए स्वदेशी सिमेन्टबाट बन्ने कङ्क्रिट सडक, स्थानीय ढुङ्गा तथा अन्य स्वदेशी निर्माण प्रविधि अपनाउनुपर्ने निर्देशिकामा उल्लेख छ । यसले बिटुमिन र असफाल्टबाट सडक बनाउन पूर्ण प्रतिबन्ध लगाएको भन्दा पनि उपयुक्त अवस्थामा स्वदेशी विकल्पलाई प्राथमिकता दिन खोजेको देखिन्छ । निर्देशिकाअनुसार निर्धारित गुणस्तर तथा प्राविधिक मापदण्ड पूरा गर्ने स्वदेशी मालसामान र स्थानीय सामग्री उपलब्ध भएसम्म सरकारी निकायले तिनको प्रयोग गर्नुपर्नेछ । सरकारी भवन निर्माणमा आयातित ग्रेनाइट र टायलको सट्टा उपयुक्त स्वदेशी मार्बल, ढुङ्गा, स्लेट तथा टायल प्रयोगलाई प्राथमिकता दिइनेछ । भवनको सजावट, विद्युतीय जडान, फर्निचर र स्यानिटरी सामग्रीमा समेत स्वदेशी विकल्प अपनाउनुपर्ने व्यवस्था छ । स्वदेशी सामग्रीको प्रयोग बढाउँदा गुणस्तर, सुरक्षा, टिकाउपन र प्राविधिक मापदण्डमा भने सम्झौता गर्न पाइने छैन । स्वदेशी उद्योगको उत्पादन विस्तार, रोजगारी सिर्जना र आयात प्रतिस्थापनलाई प्रोत्साहन गर्ने उद्देश्य निर्देशिकाले राखेको छ । त्यस्तै, उपयुक्त स्वदेशी विकल्प उपलब्ध हुँदाहुँदै कुनै विदेशी ब्रान्ड, उत्पादनस्थल वा उत्पत्तिको मुलुकलाई लक्षित गरी सरकारी खरिदको प्राविधिक विवरण तयार गर्न नपाइने व्यवस्था गरिएको छ । आयोजनाको सम्भाव्यता अध्ययन, डिजाइन, विस्तृत परियोजना प्रतिवेदन (डीपीआर), लागत अनुमान र बोलपत्र तयारीकै चरणदेखि स्वदेशी उत्पादन तथा प्रविधिको अधिकतम प्रयोग सुनिश्चित गर्नुपर्ने छ। निर्माणसम्बन्धी बोलपत्र, प्राविधिक विवरण, परिमाण सूची र खरिद सम्झौतामा स्वदेशी सामग्री प्रयोग गर्ने सर्त राख्नुपर्ने निर्देशिकामा उल्लेख छ । सम्झौतामा स्वदेशी सामग्री तोकिएपछि स्वीकृतिबिना विदेशी सामग्री प्रयोग गर्न पाइने छैन । नेपालभित्र उपलब्ध प्राकृतिक स्रोत तथा कच्चा पदार्थबाट उत्पादित वा प्रशोधित निर्माण सामग्रीलाई देशभरका सार्वजनिक आयोजना र सरकारी खरिदमा प्रयोग गर्न सकिने व्यवस्था पनि निर्देशिकामा गरिएको छ। स्वदेशी सामग्रीको प्रयोग सुनिश्चित गर्ने जिम्मेवारी सम्बन्धित सार्वजनिक निकायका प्रमुख, अध्ययन तथा डिजाइन तयार गर्ने प्राविधिक र परामर्शदाता तथा स्वीकृति दिने पदाधिकारीलाई तोकिएको छ । स्वदेशी उत्पादनको नाममा विदेशी सामग्री आपूर्ति गर्ने, नक्कली ब्रान्ड वा लेबल प्रयोग गर्ने तथा उत्पादनस्थलबारे झुटो विवरण दिने निर्माण व्यवसायी वा आपूर्तिकर्तामाथि पनि कारबाही हुने व्यवस्था छ। त्यस्ता सामग्री अस्वीकार गर्न, भुक्तानी रोक्न तथा कालोसूचीमा राख्ने र कानुनी कारबाहीको प्रक्रिया अघि बढाउन सकिने निर्देशिकामा उल्लेख छ । सरकारी बजेटबाट हुने निर्माण तथा खरिदमा स्वदेशी सामग्रीको प्रयोग बढाएर देशभित्रै उत्पादन, रोजगारी र आर्थिक गतिविधि विस्तार गर्ने लक्ष्यसहित निर्देशिका स्वीकृत गरिएको हो ।
दशैं बिदामा अस्पतालका अत्यावश्यक सेवा नियमित राख्न स्वास्थ्य मन्त्रालयको पत्राचार
काठमाडौं । स्वास्थ्य तथा खाद्य स्वच्छता मन्त्रालयले दशैंको बिदाका अवधिमा नागरिकलाई सहज, सुलभ र निरन्तर स्वास्थ्य सेवा उपलब्ध गराउन प्रदेशका स्वास्थ्य हेर्ने मन्त्रालय तथा सबै सङ्घीय सरकारी अस्पताललाई पत्राचार गरेको छ । मन्त्रालयले दशैं बिदाका समयमा अस्पतालका अत्यावश्यक स्वास्थ्य सेवा अवरुद्ध हुन नदिन आवश्यक व्यवस्थापन मिलाउन सम्बन्धित निकायलाई आग्रह गरेको हो । मन्त्रालयले अस्पतालमा आवश्यक स्वास्थ्यकर्मी तथा अन्य कर्मचारीको ड्युटी रोस्टर तयार गरी पर्याप्त जनशक्तिको व्यवस्था गर्न र आकस्मिक सेवा, आकस्मिक शल्यक्रिया, प्रसूति सेवा, सघन उपचार सेवासहितका अत्यावश्यक स्वास्थ्य सेवा नियमित सञ्चालन हुने सुनिश्चित गर्न अनुरोध गरेको छ । त्यसैगरी, अस्पतालमा आवश्यक औषधि, स्वास्थ्य उपकरण, रगत तथा रक्तजन्य पदार्थ र अन्य स्वास्थ्य सामग्रीको पर्याप्त मौज्दात राखी आकस्मिक अवस्थामा तत्काल सेवा प्रदान गर्न तयारी अवस्थामा रहन मन्त्रालयले निर्देशन दिएको छ। दसैँ बिदाको अवधिमा अस्पताल पूर्ण रूपमा बन्द नगर्न तथा अत्यावश्यक स्वास्थ्य सेवा कुनै पनि अवस्थामा अवरुद्ध हुन नदिनसमेत मन्त्रालयले आग्रह गरेको छ। सेवा प्रवाहका क्रममा देखिन सक्ने समस्या तथा गुनासोको तत्काल सम्बोधन र समन्वयका लागि अस्पतालहरूले एक जना सम्पर्क व्यक्ति (फोकल पर्सन) तोक्नुपर्नेछ । साथै, सम्पर्क व्यक्तिको नाम, पद, सम्पर्क नम्बर र ड्युटी रोस्टरसहितको विवरण मन्त्रालयले तोकेको इमेल ठेगानामा अनिवार्य रूपमा पठाउनुपर्ने भनिएको छ । मन्त्रालयले सम्बन्धित निकायलाई उल्लिखित व्यवस्थाको प्रभावकारी कार्यान्वयन तथा अनुगमन गरी दसैँ बिदाको अवधिभर नागरिकले आवश्यक स्वास्थ्य सेवा सहज रूपमा प्राप्त गर्ने सुनिश्चित गर्न अनुरोध गरेको छ।
७१औँ प्रहरी दिवसमा ट्राफिक प्रहरी प्रमुख एसएसपी नवराज अधिकारी सम्मानित
काठमाडौं । ७१औँ प्रहरी दिवसको अवसरमा काठमाडौं उपत्यका ट्राफिक प्रहरी कार्यालयका प्रमुख प्रहरी वरिष्ठ उपरीक्षक (एसएसपी) नवराज अधिकारी सम्मानित भएका छन् । महानिरीक्षक (आईजीपी) दानबहादुर कार्कीबाट अधिकारीलाई उत्कृष्ट प्रहरी कार्यालय व्यवस्थापनतर्फ प्रशंसापत्र प्रदान गरिएको हो । ट्राफिक प्रहरी कार्यालयको व्यवस्थापन तथा कार्यसम्पादनमा पुर्याएको योगदानको कदर गर्दै प्रदान गरिएको यस सम्मानले प्रहरी संगठनभित्र जिम्मेवारी, व्यावसायिकता र उत्कृष्ट कार्यसम्पादनको महत्त्वलाई थप उजागर गरेको छ । ७१औँ प्रहरी दिवसका अवसरमा नेपाल प्रहरीले विभिन्न क्षेत्रमा उल्लेखनीय योगदान पुर्याउने प्रहरी कर्मचारीलाई सम्मान तथा पुरस्कार प्रदान गरेको जनाएको छ ।
गुल्मीमा बुवाआमाको स्मृतिमा प्रतीक्षालय निर्माण
गुल्मी । गुल्मीको धुर्कोट गाउँपालिका–५, वस्तु निवासी ७६ वर्षीय लालमनी पाण्डेले आफ्ना दिवंगत बुवाआमा तथा परिवारका सदस्यहरूको स्मृतिमा प्रतीक्षालय निर्माण गरेका छन् । उनले इस्मा गाउँपालिका–३ र ५ को सङ्गमस्थल हुलाकेमा स्थानीयवासी तथा यात्रुहरूको सुविधाका लागि प्रतीक्षालय निर्माण गरेका हुन् । पाण्डेले आफ्ना स्वर्गीय बुवा शोभाखर पाण्डे तथा आमा जीवकला पाण्डे र उदकला पाण्डेको स्मृतिमा प्रतीक्षालय निर्माण गरेका हुन् । प्रतीक्षालय निर्माण भएपछि उक्त क्षेत्रमा आवतजावत गर्ने यात्रु तथा स्थानीयवासीलाई विश्राम गर्न सहज हुने अपेक्षा गरिएको छ । जीवनभर दुःख, कष्ट र सङ्घर्ष गर्दै सन्तानको पालनपोषण तथा भविष्य निर्माणमा योगदान दिएका अभिभावकहरूको सम्झनालाई सामाजिक सेवासँग जोड्ने उद्देश्यले प्रतीक्षालय निर्माण गरिएको हो । व्यक्तिगत स्मृतिलाई सामुदायिक हितसँग जोड्ने पाण्डेको यो प्रयासले दिवंगत अभिभावकप्रतिको सम्मानसँगै सामाजिक उत्तरदायित्वको भावनासमेत उजागर गरेको छ । ७६ वर्षीय पाण्डेले भारतीय सेनामा आठ वर्ष सेवा गरेका थिए । सेनाको जागिर छाडेपछि उनले गाउँमै सामान्य जीवन बिताउँदै आएका छन्। उनका एक छोरा र तीन छोरी गरी चार सन्तान छन्। चारै जना सन्तान सरकारी सेवामा कार्यरत छन्। व्यक्तिगत जीवनलाई सरल बनाउँदै सामाजिक सेवामा योगदान पुर्याएका पाण्डेको यो कार्य स्थानीय समुदायका लागि उपयोगी बनेको छ। बुवाआमाको सम्झनामा निर्माण गरिएको प्रतीक्षालयले यात्रुहरूलाई सुविधा प्रदान गर्नुका साथै समाजप्रतिको जिम्मेवारी र सेवाभावको सकारात्मक सन्देशसमेत दिएको छ।
४ हजार ९९९ रुपैयाँको इन्टरनेट प्याकेजबारे नेपाल टेलिकमको स्पष्टीकरण
काठमाडौं । नेपाल टेलिकमले ३० एमबीपीएसको ४ हजार ९९९ रुपैयाँको इन्टरनेट प्याकेजका विषयमा सञ्चारमाध्यममा प्रकाशित समाचारप्रति ध्यानाकर्षण भएको जनाएको छ । कम्पनीले उक्त प्याकेजबारे तथ्यभन्दा फरक समाचार प्रकाशित तथा प्रसारित भइरहेको भन्दै भ्रममा नपर्न सरोकारवालालाई आग्रह गरेको छ । नेपाल दूरसञ्चार प्राधिकरणले २०८३ असोज ३० गते इन्टरनेट सेवा प्रदायकहरूले अनुमति पत्रका सर्तविपरीत काम गरेको विषयमा जारी गरेको प्रेस विज्ञप्तिलाई आधार मानेर प्याकेजबारे भ्रमपूर्ण समाचार सम्प्रेषण भएको नेपाल टेलिकमले जनाएको छ । कम्पनीका अनुसार नेपाल टेलिकमले विगतदेखि नै सञ्चालन गर्ने विभिन्न प्याकेज स्वीकृतिका लागि नेपाल दूरसञ्चार प्राधिकरणलाई पत्राचार गर्दै आएको छ । असोज ३० गते अफरका रूपमा सञ्चालनमा ल्याइएको ३० एमबीपीएसको एफटीटीएच इन्टरनेट प्याकेजबारे पनि प्राधिकरणलाई जानकारी गराइसकिएको टेलिकमले स्पष्ट पारेको छ । टेलिकमका अनुसार उक्त प्याकेज यसअघि विद्यार्थी अफरका रूपमा समेत प्राधिकरणलाई जानकारी गराएर सञ्चालनमा ल्याइएको थियो । कम्पनीले ४ हजार ९९९ रुपैयाँको इन्टरनेट प्याकेजको स्वीकृति तथा सञ्चालनका विषयमा विभिन्न सञ्चारमाध्यममा प्रकाशित समाचारका आधारमा भ्रममा नपर्न सबै सरोकारवालालाई अनुरोध गरेको छ । नेपाल सरकारको स्वीकृत नीति तथा प्रचलित कानुनको परिधिभित्र रहेर काम गरिरहेको उल्लेख गर्दै नेपाल टेलिकमले कानुनको पालना गर्न आफू प्रतिबद्ध रहेको जनाएको छ ।
