जनस्वास्थ्य कार्यालयको मूल्यांकनमा किष्ट शिक्षण अस्पताल प्रथम
ललितपुर । जनस्वास्थ्य कार्यालय, ललितपुरले गरेको वार्षिक स्वास्थ्य सेवा मूल्यांकनमा किष्ट शिक्षण अस्पताल प्रथम भएको छ । जनस्वास्थ्य कार्यालयले आयोजना गरेको वार्षिक स्वास्थ्य सेवा तथ्यांक प्रस्तुतीकरण तथा समीक्षा कार्यक्रममा ललितपुर जिल्लाका १५ वटा निजी अस्पताल सहभागी भएका थिए । कार्यक्रममा अस्पतालहरूले वर्षभरि प्रवाह गरेका स्वास्थ्य सेवासम्बन्धी तथ्यांक प्रस्तुत गरेका थिए । वार्षिक समीक्षाका क्रममा विभिन्न स्वास्थ्य सेवा सूचकका आधारमा अस्पतालहरूको सेवा प्रवाह र कार्यसम्पादन मूल्यांकन गरिएको थियो । उक्त मूल्यांकनमा किष्ट शिक्षण अस्पतालले उत्कृष्ट प्रदर्शन गर्दै सहभागी निजी अस्पतालमध्ये पहिलो स्थान हासिल गरेको हो । स्वास्थ्य सेवा प्रवाह, तथ्यांक व्यवस्थापन तथा विभिन्न स्वास्थ्य सेवा सूचकमा उत्कृष्ट कार्यसम्पादन गरेको भन्दै जनस्वास्थ्य कार्यालय, ललितपुरले अस्पताललाई प्रशंसापत्र प्रदान गरेको छ । अस्पतालका अनुसार प्राप्त सम्मान गुणस्तरीय स्वास्थ्य सेवा, प्रभावकारी व्यवस्थापन र तथ्यमा आधारित सेवा प्रणालीलाई प्राथमिकता दिँदै आएको प्रयासको मान्यता हो । यस उपलब्धिले स्वास्थ्य सेवाप्रतिको प्रतिबद्धतालाई थप बलियो बनाएको अस्पतालले जनाएको छ । ग्वार्को, ललितपुरमा रहेको किष्ट शिक्षण अस्पताल सन् २००६ मार्च २३ देखि सञ्चालनमा छ । करिब दुई दशकदेखि स्वास्थ्य सेवा दिँदै आएको अस्पतालले जटिल तथा गम्भीर अवस्थाका बिरामीका लागि विशेषज्ञ चिकित्सकीय सेवा, उन्नत प्रविधि र आधुनिक उपचार सुविधा उपलब्ध गराउँदै आएको जनाएको छ । अस्पतालले आगामी दिनमा पनि गुणस्तरीय, विश्वसनीय तथा सेवाग्राहीमैत्री स्वास्थ्य सेवा प्रदान गर्ने प्रतिबद्धता जनाएको छ ।
प्रधानमन्त्री रोजगार कार्यक्रमको रकम हिनामिना गरेको आरोपमा १० जनाविरुद्ध मुद्दा
काठमाडौं । अख्तियार दुरुपयोग अनुसन्धान आयोगले लमजुङको राइनास नगरपालिकाका तत्कालीन रोजगार संयोजक शेखरनाथ न्यौपानेसहित १० जनाविरुद्ध भ्रष्टाचार मुद्दा दायर गरेको छ । प्रधानमन्त्री रोजगार कार्यक्रमका लागि प्राप्त सशर्त अनुदान रकम फिर्ता नगरेको, पेश्की रकम फर्छ्यौट नगरेको तथा सरकारी सामानसमेत बरबुझारथ नगरी सार्वजनिक सम्पत्तिमा हानिनोक्सानी गरेको आरोपमा अख्तियारले विशेष अदालत, काठमाडौंमा आरोपपत्र दायर गरेको हो । अख्तियारका अनुसार आर्थिक वर्ष २०७६/७७ मा प्रधानमन्त्री रोजगार कार्यक्रम सञ्चालनका लागि राइनास नगरपालिकाले श्रम, रोजगार तथा सामाजिक सुरक्षा मन्त्रालयबाट १६ लाख ७२ हजार रुपैयाँ सशर्त अनुदान पाएको थियो । उक्त रकम कार्यक्रम सञ्चालनमा प्रयोग नगरी फिर्ता गर्नुपर्नेमा तत्कालीन रोजगार संयोजक न्यौपानेले पेश्की लिई अन्य प्रतिवादीहरूको खातामा समेत रकम जम्मा गरेको र हालसम्म फर्छ्यौट नगरेको अख्तियारको अनुसन्धानबाट खुलेको जनाएको छ । त्यस्तै, न्यौपानेले नगरपालिकाबाट बुझेका एक थान ल्यापटप, एक थान प्रिन्टर र एक थान क्यामेरा कार्यालयबाट बर्खास्त भएपछि पनि बरबुझारथ नगरेको अख्तियारले जनाएको छ। ती सामानको परल मूल्य १ लाख ६७ हजार २५६ रुपैयाँ रहेको छ । अख्तियारले न्यौपानेविरुद्ध १८ लाख ३९ हजार २५६ रुपैयाँ बिगो कायम गरी बिगोबमोजिम जरिवाना, कैद तथा बिगो असुलउपरको मागदाबी गरेको छ । त्यस्तै, तत्कालीन प्रमुख प्रशासकीय अधिकृत रामचन्द्र अधिकारी र तत्कालीन लेखापाल नवीनकुमार बरालविरुद्ध १६ लाख ७२ हजार रुपैयाँ बिगो कायम गरी सोहीअनुसार कैद, जरिवाना र बिगो असुलउपरको मागदाबी गरिएको छ । राइनास नगरपालिका वडा नम्बर १ का तत्कालीन वडा अध्यक्ष रमेश न्यौपानेविरुद्ध ८९ हजार १८५ रुपैयाँ, वडा नम्बर ४ का तत्कालीन वडा सदस्य ओजराज पौडेलविरुद्ध २ लाख ९९ हजार ६६२ रुपैयाँ, वडा नम्बर २ का तत्कालीन वडा अध्यक्ष जैमान गुरुङविरुद्ध १ लाख २४ हजार ८५९ रुपैयाँ र वडा नम्बर ५ का तत्कालीन वडा अध्यक्ष नन्दबहादुर कुमालविरुद्ध ८२ हजार ५० रुपैयाँ बिगो कायम गरिएको छ । त्यस्तै, वडा नम्बर ६ का तत्कालीन वडा अध्यक्ष रूकबहादुर तामाङ गुरुङविरुद्ध २ लाख ३९ हजार १६ रुपैयाँ, वडा नम्बर ७ का तत्कालीन वडा अध्यक्ष कृष्णप्रसाद लामिछानेविरुद्ध १ लाख २१ हजार २९२ रुपैयाँ र वडा नम्बर ८ का तत्कालीन वडा अध्यक्ष माधवप्रसाद पराजुलीविरुद्ध २ लाख ५३ हजार २८६ रुपैयाँ बिगो कायम गरी सजाय तथा बिगो असुलउपरको मागदाबी गरिएको अख्तियारले जनाएको छ । अख्तियारका अनुसार प्रतिवादीहरूविरुद्ध भ्रष्टाचार निवारण ऐन, २०५९ को सम्बन्धित दफाअनुसार आरोपपत्र दायर गरिएको हो । आरोपपत्रमा प्रतिवादीहरूबाट कुल ४७ लाख २० हजार ६०६ रुपैयाँ बिगो असुलउपरको मागदाबी गरिएको छ ।
म्यानमारको रखाइनमा हवाई हमला, ४९ जनाको मृत्यु
काठमाडौं । म्यानमारको रखाइन राज्यको क्याउक्ताव सहरमा भएको हवाई हमलामा परी मृत्यु हुनेको ४९ पुगेको छ । अराकान आर्मी (एए) का अनुसार हमलामा करिब ६० जना घाइते भएका छन् । घाइतेमध्ये २२ जनाको अवस्था गम्भीर रहेको बताइएको छ । बीबीसी न्युज बर्मिजका अनुसार स्थानीय स्रोतहरूले भग्नावशेषबाट शव निकाल्ने काम जारी रहेकाले मृतकको संख्या ५८ सम्म पुग्न सक्ने दाबी गरेका छन् । क्याउक्तावस्थित किस्सापनादी पुल क्षेत्र र भारतीय बजार आसपासमा हवाई हमला भएको बताइएको छ । अराकान आर्मीले हमलाका लागि म्यानमारको सेनालाई जिम्मेवार ठहर गर्दै निन्दा गरेको छ । साथै उसले जवाफी कारबाही गर्ने चेतावनीसमेत दिएको छ । यता, सेना समर्थक टेलिग्राम च्यानलहरूले भने मारिनेहरू अराकान आर्मीका सदस्य रहेको दाबी गरेका छन् । यी दाबीको स्वतन्त्र रूपमा पुष्टि हुन सकेको छैन । यो घटना पछिल्ला केही महिनामा रखाइन राज्यमा सर्वसाधारणमाथि भएका सबैभन्दा घातक हमलामध्ये एक मानिएको छ ।
मन्त्रिपरिषद बैठक सुरु
काठमाडौं । प्रधानमन्त्री बालेन्द्र शाहले आह्वान गरेको मन्त्रिपरिषद बैठक सुरु भएको छ । बैठक मंगलबार (आज) अपरान्ह पौने ४ बजेदेखि सिंहदरबारस्थित प्रधानमन्त्री तथा मन्त्रिपरिषद् कार्यालयमा सुरु भएको हो । ३ बजे बस्ने भनिएको बैठक ढिलागरी सुरु भएको हो । बैठकले महत्त्वपूर्ण निर्णय गर्ने जनाइएको छ ।
पोखरा फाइनान्सका ग्राहकलाई जेनस अस्पतालमा २० प्रतिशत छुट
काठमाडौं । पोखरा फाइनान्स लिमिटेडका ग्राहकले बुटवल–८, सुखानगरस्थित जेनस हस्पिटल एन्ड रिसर्च सेन्टर प्रालिमा उपलब्ध विभिन्न स्वास्थ्य सेवामा २० प्रतिशत छुट पाउने भएका छन् । सम्झौताअनुसार पोखरा फाइनान्सका खातावालाले जेनस अस्पतालमा उपचार तथा स्वास्थ्यसम्बन्धी सेवा लिँदा पोखरा फाइनान्सको डेबिट कार्ड वा मोबाइल बैंकिङमार्फत भुक्तानी गरेमा उपलब्ध सबै सेवामा २० प्रतिशत छुट प्राप्त गर्न सक्नेछन् । ग्राहकलाई थप सुविधा तथा लाभ उपलब्ध गराउने उद्देश्यले गरिएको उक्त सहकार्यबाट पोखरा फाइनान्सका खातावालाहरू प्रत्यक्ष रूपमा लाभान्वित हुने विश्वास फाइनान्सले व्यक्त गरेको छ । पोखरा फाइनान्सले हाल ३८ वटा शाखामार्फत नगद कारोबार, आरटीजीएस, आईपीएस, कनेक्ट आईपीएस, रेमिट्यान्स, क्लियरिङ, सीआईएसलगायतका बैंकिङ सेवा प्रदान गर्दै आएको जनाएको छ । साथै, फाइनान्सले मोबाइल बैंकिङ, डेबिट कार्ड, क्यूआर कोडलगायतका डिजिटल बैंकिङ सुविधा पनि उपलब्ध गराउँदै आएको छ ।
इसेवाबाट किस्ताबन्दीमा विद्युतीय स्कुटर किन्न सकिने
काठमाडौं । इसेवाले ‘बाइ नाउ, पे लेटर’ सेवा सार्वजनिक गरेको छ । यो सेवामार्फत ग्राहकले इसेवा एपबाटै किस्ताबन्दीमा विद्युतीय स्कुटर खरिद गर्न सक्नेछन् । यसका लागि इसेवा, रिलायन्स फाइनान्स र विद्युतीय स्कुटर बिक्रेता परिमिता इन्भेष्टमेन्टबीच त्रिपक्षीय साझेदारी भएको छ । असोज ८ गते इसेवाको केन्द्रीय कार्यालयमा आयोजित कार्यक्रममा साझेदारी पत्रमा हस्ताक्षर गरिएको हो । साझेदारीअनुसार परिमिताका विद्युतीय स्कुटर खरिद गर्न इसेवा प्लेटफर्ममार्फत ‘बाइ नाउ, पे लेटर’ सुविधा लिन सकिनेछ । रिलायन्स फाइनान्सले वित्तीय साझेदारका रूपमा कर्जा उपलब्ध गराउनेछ भने परिमिताले विद्युतीय स्कुटर उपलब्ध गराउनेछ । रिलायन्स फाइनान्सले यस सेवाअन्तर्गत ९.९९ प्रतिशत ब्याजदरमा अधिकतम २ लाख रुपैयाँसम्मको डिजिटल कर्जा उपलब्ध गराउनेछ । ग्राहकले उक्त कर्जा अधिकतम ३६ महिनासम्मको किस्तामा भुक्तानी गर्न सक्नेछन् । इसेवाका अनुसार ग्राहकले स्कुटर खरिदका लागि आवश्यक प्रक्रिया इसेवा एपबाटै पूरा गर्न सक्नेछन् । यसले एकैपटक ठूलो रकम भुक्तानी गर्नुपर्ने अवस्थालाई सहज बनाउने कम्पनीको भनाइ छ । इसेवाले डिजिटल माध्यमबाट वित्तीय सेवाको पहुँच विस्तार गर्ने उद्देश्यले नयाँ सेवा ल्याएको जनाएको छ । विद्युतीय स्कुटर खरिदलाई सहज बनाउने यो सेवाले विद्युतीय सवारीसाधनको प्रयोग तथा दिगो यातायात प्रवर्द्धनमा समेत सहयोग पुग्ने कम्पनीको अपेक्षा छ ।
सेयर बजारमा ४ अर्ब ६५ करोडको कारोबार
काठमाडौं । मंगलबार सेयर बजार सामान्य अंकले घटेको छ । नेपाल स्टक एक्सचेन्ज (नेप्से) परिसूचक ९.६२ अंकले घटेर २६०३ बिन्दुमा झरेको छ । नेप्सेका अनुसार ६९ कम्पनीको सेयर मूल्य बढ्दा १९९ कम्पनीको सेयर मूल्य घटेको छ । १० कम्पनीको सेयर मूल्यमा भने कुनै परिवर्तन आएको छैन । मंगलबार ३६३ कम्पनीको १ करोड कित्ता सेयर किनबेच हुँदा ४ अर्ब ६५ करोड रुपैयाँ बराबरको कारोबार भएको छ । जसमध्ये सबैभन्दा धेरै कारोबार हिमालयन डिस्टीलरीको भएको छ । हिमालयनको २२ करोड रुपैयाँ बराबरको कारोबार भएको छ । साथै शिवम् सिमेन्टको १७ करोड, सिद्धार्थ बैंकको १६ करोड, गरिमा विकास बैंकको १५ करोड र हाथवे इन्भेष्टमेन्टको १३ करोड रुपैयाँ बराबरको कारोबार भएको छ । मंगलबार नेप्सेका अधिकांश उपसूचक घटेका छन् । कारोबारमा रहेका १३ उपसूचकमध्ये ११ वटा घट्दा दुई वटा उपसूचक बढेका छन् । सबैभन्दा धेरै ट्रेडिङ उपसूचक १.८७ प्रतिशतले घटेको छ । होटल तथा पर्यटन उपसूचक ०.६५ प्रतिशत, उत्पादन तथा प्रशोधन ०.५० प्रतिशत, विकास बैंक ०.४५ प्रतिशत, म्युचुअल फन्ड ०.४३ प्रतिशत र माइक्रोफाइनान्स उपसूचक ०.५५ प्रतिशतले घटेका छन् । त्यस्तै जलविद्युत उपसूचक ०.५२ प्रतिशत, जीवन बीमा ०.३७ प्रतिशत, वित्त ०.३२ प्रतिशत, बैंकिङ ०.१३ प्रतिशत र लगानी उपसूचक ०.२२ प्रतिशतले घटेका छन् । कारोबारमा निर्जीवन बीमा र अन्य उपसूचक भने बढेका छन् । निर्जीवन बीमा उपसूचक ०.११ प्रतिशत र अन्य उपसूचक ०.१२ प्रतिशतले बढेको छ ।
दीपक मनाङे कांग्रेसको देउवा समूहमा, यस्तो छ उनको राजनीतिक यात्रा
काठमाडौं । गण्डकी प्रदेशका पूर्वमन्त्री राजीव गुरुङ ‘दीपक मनाङे’ नेपाली कांग्रेसको शेरबहादुर देउवा समूहमा प्रवेश गरेका छन् । कांग्रेसको १५औं महाधिवेशनको तयारी भइरहेका बेला मनाङे इतर समूहमा जोडिएका हुन् । मंगलबार (आज) १५औं महाधिवेशन तयारी समितिका संयोजक डा. शशांक कोइरालाले गुरुङलाई पार्टीमा स्वागत गरेका हुन् । गुरुङलाई औपचारिक रूपमा कांग्रेसमा प्रवेश गराइएको नेता डा.प्रकाशशरण महतले जानकारी दिए । मनाङे गण्डकी प्रदेशको राजनीतिमा स्वतन्त्र सांसदका रूपमा स्थापित नेता हुन् । उनी २०७४ र २०७९ को प्रदेशसभा निर्वाचनमा मनाङको प्रदेशसभा क्षेत्रबाट निर्वाचित भएका थिए । २०७४ मा उनलाई नेकपा एमालेले समर्थन गरेको थियो भने २०७९ मा उनी निर्विरोध निर्वाचित भएका थिए । २०७४ को निर्वाचनपछि गण्डकीमा पृथ्वीसुब्बा गुरुङ नेतृत्वको सरकार गठन हुँदा मनाङे युवा तथा खेलकुदमन्त्री बने । त्यसपछि सत्ता समीकरण परिवर्तन भएसँगै कांग्रेस नेता कृष्णचन्द्र नेपाली पोखरेल नेतृत्वको सरकारमा पनि उनी मन्त्री बने । २०७९ को निर्वाचनपछि भने मनाङे नेकपा एकीकृत समाजवादीमा प्रवेश गरेका थिए । तर, त्यसमा उनी लामो समय टिकेनन् । २०८० चैतमा उनले नेकपा एस परित्याग गरी आफू स्वतन्त्र रहेको जानकारी प्रदेशसभा सचिवालयलाई गराएका थिए । त्यसपछि उनी कांग्रेस नेता सुरेन्द्रराज पाण्डे नेतृत्वको गण्डकी प्रदेश सरकारमा सहभागी भए । पाण्डे नेतृत्वको सरकारमा मनाङे भौतिक पूर्वाधार तथा यातायात व्यवस्थामन्त्री बने । गण्डकीमा सरकार गठन र सत्ता समीकरणका क्रममा उनको समर्थन पटक–पटक महत्त्वपूर्ण देखिँदै आएको थियो । मनाङेको राजनीतिक यात्रा भने राप्रपाबाट सुरु भएर एमाले, स्वतन्त्र उम्मेदवारी, एकीकृत समाजवादी हुँदै अहिले कांग्रेससम्म आइपुगेको छ । २०७३ मा राप्रपा प्रवेश गरेका उनी पछि एमालेमा आबद्ध भएका थिए । एमालेबाट प्रदेशसभा निर्वाचनमा टिकट नपाएपछि २०७४ मा स्वतन्त्र उम्मेदवारी दिएका उनले एमालेको समर्थनमा निर्वाचन जितेका थिए । २०७९ मा पनि स्वतन्त्र उम्मेदवारका रूपमा निर्वाचित भएपछि उनी एकीकृत समाजवादीमा प्रवेश गरेका थिए । पार्टी प्रवेश र पुनः स्वतन्त्र हैसियतमा फर्किने क्रमसँगै गण्डकीको सत्ता समीकरणमा भने उनको भूमिका निरन्तर देखिँदै आएको थियो । पछिल्लो समय कांग्रेसको १५औं महाधिवेशनलाई केन्द्रमा राखेर पार्टीभित्र विभिन्न समूहले संगठन विस्तार र राजनीतिक समीकरण निर्माणलाई तीव्रता दिएका छन् । यही क्रममा मनाङे देउवा समूहमा प्रवेश गरेका हुन् ।
