मृत्युदण्डको इन्जेक्सनले पनि क्रिस्टालाई मार्न सकेन, मुटु धड्किरह्यो
काठमाडौं । अमेरिकाको टेनेसी राज्यमा मृत्युदण्डको सजाय पाएकी क्रिस्टा पाइकलाई दुई पटक घातक इन्जेक्सन दिइए पनि उनको मृत्यु नभएपछि उनलाई अस्पताल लगिएको छ । ५० वर्षीया पाइकलाई बुधबार राति नासभिलस्थित रिभरबेन्ड म्याक्सिमम सेक्युरिटी इन्स्टिच्युसनमा पेन्टोबार्बिटलका दुईवटा सिरिन्ज दिइएको थियो । इन्जेक्सन दिएपछि पनि पाइकको मुटु धड्किरहेको र उनी सास फेरिरहेको आवाज सुनिएको भन्दै उनका वकिलहरूले तत्काल अदालतमा आपतकालीन निवेदन दिएका थिए । निवेदनमा उनी बेहोस भए पनि मुटुको धड्कन कायम रहेको र घुर्ने जस्तो आवाज आइरहेको उल्लेख गरिएको थियो । घटनाका साक्षीहरूले पनि उनी अझै जीवित रहेको र सास फेरिरहेको बताएका छन् । पाइकका वकिलका अनुसार उनलाई तत्काल जीवनरक्षा गर्ने उपचार आवश्यक परेको थियो । अदालतको आदेशपछि उनलाई कारागारबाट बाहिरी अस्पताल लगिएको हो । टेनेसीको सुधार विभागले भने राज्यले स्वीकृत मृत्युदण्ड प्रक्रियाको हरेक चरण पालना गरिएको दाबी गरेको छ । विभागका अनुसार प्रयोग गरिएको घातक औषधि यसअघि प्रभावकारी रहँदै आएको थियो र त्यस प्रक्रियामा थप कदम चाल्ने व्यवस्था थिएन । चिकित्सा विशेषज्ञ जोएल जोभोटले पर्याप्त मात्रामा पेन्टोबार्बिटल रगतमा नपुगेका कारण श्वासप्रश्वास र मुटुको कार्य बन्द हुन नसकेको हुनसक्ने बताएका छन् । १९ वर्षीया युवतीको हत्या गरेको अभियोग पाइकलाई सन् १९९५ मा १९ वर्षीया कोलीन स्लेमरको हत्या गरेको अभियोगमा मृत्युदण्ड सुनाइएको थियो । अपराध हुँदा पाइक १८ वर्षकी थिइन् । अभियोजन पक्षका अनुसार पाइक, उनका तत्कालीन प्रेमी टेडारिल शिप र अर्की युवतीले स्लेमरलाई आक्रमण गरेका थिए । उनीहरूको भेट समस्यामा परेका किशोरकिशोरीका लागि सञ्चालित रोजगार तालिम कार्यक्रममा भएको थियो । स्लेमरलाई कुटपिट र यातना दिएर हत्या गरिएको थियो । घटनापछि उनको शरीरमा पेन्टाग्रामको चिन्हसमेत काटिएको पाइएको थियो । पाइकले उक्त चिन्ह आफूले बनाएको अस्वीकार गरेकी छन् । पाइकले हालैको क्षमादान निवेदनमा आफूले स्लेमरलाई कुटपिट गर्ने उद्देश्य राखे पनि हत्या गर्ने उद्देश्य नरहेको दाबी गरेकी थिइन् । उनले आफूले बाल्यकालमा भोगेको यौन दुव्र्यवहार र अन्य मानसिक आघातलाई पनि अदालतले सजाय निर्धारण गर्दा पर्याप्त रूपमा विचार नगरेको दाबी गरेकी थिइन् । टेनेसीका गभर्नर बिल लीले उनको क्षमादान निवेदन अस्वीकार गरेका थिए । अमेरिकी सर्वोच्च अदालतले पनि मृत्युदण्ड रोक्ने पछिल्ला कानुनी प्रयासलाई अस्वीकार गरेपछि प्रक्रिया अघि बढाइएको थियो । पाइक टेनेसीको मृत्युदण्डको सूचीमा रहेकी एक मात्र महिला हुन् । सन् १९७६ मा अमेरिकामा मृत्युदण्ड पुनः सुरु भएयता १८ जना महिलालाई मृत्युदण्ड दिइएको छ, जबकि पुरुषको संख्या १ हजार ६६३ रहेको छ ।
सेयर बजारमा ४ अर्ब ८९ करोडको कारोबार
काठमाडौं । बिहीबार सेयर बजार सामान्य अंकले बढेको छ । नेपाल स्टक एक्सचेन्ज (नेप्से) परिसूचक ०.२६ अंकले बढेर २५९९ बिन्दुमा पुगेको हो । नेप्सेका अनुसार १३९ कम्पनीको सेयर मूल्य बढ्दा १२८ कम्पनीको सेयर मूल्य घटेको छ । १२ कम्पनीको सेयर मूल्यमा भने कुनै परिवर्तन आएको छैन । बिहीबार ३५३ कम्पनीको १ करोड कित्ता सेयर किनबेच हुँदा ४ अर्ब ८९ करोड रुपैयाँ बराबरको कारोबार भएको छ । जसमध्ये सबैभन्दा धेरै कारोबार सिद्धार्थ बैंकको भएको छ । सिद्धार्थको ३० करोड ५३ लाख रुपैयाँ बराबरको कारोबार भएको छ । साथै अपि पावरको २२ करोड, हाथवे इन्भेष्टमेन्टको २१ करोड, घलेम्दी हाइड्रोको १८ करोड र रिलाइन्स स्पिीनिङको १४ करोड रुपैयाँ बराबरको कारोबार भएको छ । सेयर बजारमा आज अधिकांश उपसूचकमा सामान्य उतारचढाव देखिएको छ । नेप्सेका ७ वटा उपसूचक बढ्दा ७ वटा उपसूचक घटेका छन् भने एउटा उपसूचक स्थिर रहेको छ । सबैभन्दा धेरै बैंकिङ उपसूचक बढेको छ । बैंकिङ उपसूचक ५.८८ अंकले बढेर १ हजार ४९९.९५ विन्दुमा पुगेको छ । विकास बैंक उपसूचक १२.१९ अंकले बढेर ५ हजार ३६७.११ विन्दुमा पुगेको छ । त्यस्तै वित्त उपसूचक ४.५१ अंकले बढेर २ हजार २०४.३० विन्दुमा पुगेको छ भने जलविद्युत् उपसूचक १.३० अंकले बढेर ३ हजार ५४९.५३ विन्दुमा पुगेको छ । घट्ने उपसूचकमा ट्रेडिङ सबैभन्दा अगाडि रहेको छ । ट्रेडिङ उपसूचक ३४.३२ अंकले घटेर ३ हजार २१९.९८ विन्दुमा झरेको छ। निर्जीवन बीमा उपसूचक ४८.२४ अंकले घटेर ९ हजार ४६३.९० विन्दुमा पुगेको छ । जीवन बीमा उपसूचक १२.७० अंकले घटेर ११ हजार ६८६.९२ विन्दुमा पुगेको छ । होटल तथा पर्यटन ९.३८, उत्पादन तथा प्रशोधन ८.३३, अन्य उपसूचक ५.९२, लघुवित्त १.३२ र म्युचुअल फन्ड ०.०५ अंकले घटेका छन् । लगानी उपसूचक भने ९५.१२ विन्दुमा स्थिर रहेको छ ।
एक महिनामै ८८ हजार बढी पर्यटक भित्रिए
काठमाडौं । एक महिनामै ८८ हजार बढी पर्यटक भित्रिएका छन् । सन् २०२६ को सेप्टेम्बर महिनामा हवाई मार्ग हुँदै कुल ८८ हजार २४८ जना विदेशी पर्यटक नेपाल प्रवेश गरेका हुन् । नेपाल पर्यटन बोर्डले सार्वजनिक गरेको अध्यागमन विभागको तथ्यांकअनुसार, सार्क र एसियाली राष्ट्रबाट नेपाल आउने पर्यटकको संख्या बढेको विभागले उल्लेख गरेको छ । दक्षिण एसियाली (सार्क) मुलुकहरूबाट कुल आगमनको सबैभन्दा ठूलो हिस्सा ३४. ०९ प्रतिशत अर्थात् ३० हजार ८५ जना पर्यटक भित्रिएका छन् । सार्क क्षेत्रमा सबैभन्दा बढी भारतबाट १७ हजार ४२५ जना पर्यटक आएका छन् । त्यसैगरी श्रीलंकाबाट सात हजार १०८ जना, बांगलादेशबाट तीन हजार ९६४ जना, भुटानबाट एक हजार १११ जना, पाकिस्तानबाट ४२९ जना, माल्दिभ्सबाट ४८ जना र अफगानिस्तानबाट आठजना पर्यटक नेपाल आइपुगेका छन् । सार्कबाहेकका अन्य एसियाली मुलुकहरूबाट कुल १९ हजार ८८८ जना पर्यटक आएका छन् । यो अघिल्लो वर्षको तुलनामा ५७.९७ प्रतिशतको वृद्धि हो । यस क्षेत्रमा सबैभन्दा धेरै चीनबाट ११ हजार २१२ जना पर्यटक भित्रिएका छन् । यो गत वर्षको पाँच हजार २३७ को तुलनामा ११४.०९ प्रतिशतको वृद्धि हो । यसबाहेक जापानबाट दुई हजार ६६ जना, मलेसियाबाट एक हजार ८७७ जना, दक्षिण कोरियाबाट एक हजार ४१२ जना, सिंगापुरबाट ८०७ जना, भियतनामबाट ६३७ जना, थाइल्यान्डबाट ६०१ जना, फिलिपिन्सबाट ५३१ जना, इन्डोनेसियाबाट ४२९ जना, म्यानमारबाट २१७ जना र कम्बोडियाबाट ९९ जना पर्यटक भित्रिएका छन् । युरोपेली मुलुकहरूबाट कुल १५ हजार १४८ जना पर्यटक आएका छन् । जुन गत वर्षको तुलनामा ८।७३ प्रतिशतले कम हो । युरोपेली मुलुकमा जर्मनीबाट एक हजार ९७४ जना, फ्रान्सबाट एक हजार ३८९ जना, रुसबाट एक हजार १४३ जना, स्पेनबाट एक हजार १२० जना, इटालीबाट ९१० जना, पोल्यान्डबाट ७५० जना, नेदरल्यान्ड्सबाट ७१४ जना, स्विट्जरल्यान्डबाट ५९२ जना, पोर्चुगलबाट ५३५ जना, बेल्जियमबाट ४२४ जना, अस्ट्रिया र चेक गणतन्त्र प्रत्येकबाट ३३२/ ३३२ जना, आयरल्यान्डबाट २४२ जना, नर्वेबाट २३१ जना, युक्रेनबाट २२८ जना, डेनमार्कबाट २२७ जना, फिनल्यान्डबाट १४२ जना र स्विडेनबाट १३८ जना पर्यटक नेपाल भित्रिएका छन् । अमेरिकी महादेशबाट कुल १० हजार १०७ जना पर्यटक आएका छन् । यस क्षेत्रमा अमेरिकाबाट ८ हजार २९९ जना र क्यानडाबाट एक हजार २२४ जना पर्यटक आएका छन् । भने ब्राजिलबाट ३१८ जना र मेक्सिकोबाट २६६ जना पर्यटक आएका छन् । त्यसैगरी ओसिएनिया क्षेत्रबाट कुल पाँच हजार ४२२ जना पर्यटक आएका छन् । जसमा अस्ट्रेलियाबाट चार ८४२ जना र न्युजिल्यान्डबाट ५८० जना रहेका छन् । मध्यपूर्वका देशहरूबाट दुई हजार ६०६ जना पर्यटक आइपुगेका छन् । जसमा इजरायलबाट एक हजार ९५७ जना, टर्कीबाट ४३४ जना, कुवेतबाट ७४ जना, साउदी अरेबियाबाट ६० जना, यूएई र ओमानबाट क्रमशः ४८ र १९ जना तथा कतारबाट १४ जना रहेका छन् । अफ्रिकी मुलुकहरूबाट ४२४ जना (दक्षिण अफ्रिका १८२, इजिप्ट १२३, मोरक्को ११९) र अन्य विभिन्न सूचीकृत नभएका मुलुकहरूबाट ४,५६८ जना पर्यटक नेपाल भित्रिएका छन् ।
भारतबाट ल्याउँदै गरेको २ करोड ५१ लाखको सुन बरामद
काठमाडौं । रुपन्देहीमा २ करोड ५१ लाख रुपैयाँभन्दा बढी मूल्यको अवैध सुनका गहनासहित एक महिला पक्राउ परेकी छन् । सशस्त्र प्रहरी बल, नेपाल सीमा सुरक्षा गुल्म डण्डा, रुपन्देहीको टोलीले भारतबाट नेपालतर्फ अवैध रूपमा ल्याउँदै गरेको सुनका गहनासहित काठमाडौँ महानगरपालिका–१९ बस्ने ४६ वर्षीया ईला पटेललाई नियन्त्रणमा लिएको हो । असोज १४ गते राति करिब ८ बजे सिद्धार्थनगर नगरपालिका–१ स्थित शान्तिगेट चेकप्वाइन्टमा सशस्त्र प्रहरी नायव उपरीक्षक गोपिकृष्ण भट्टराईको कमाण्डमा खटिएको टोलीले विशेष सूचनाका आधारमा जाँच गरेको थियो । जाँचका क्रममा पटेलको साथबाट २ किलो ६०५ ग्राम तौल बराबरका सुनजस्ता देखिने विभिन्न गहना बरामद गरिएको थियो । बरामद गहनाको परीक्षण तथा परिमाण यकिनका लागि असोज १५ गते सिद्धार्थनगर सुनचाँदी व्यवसायी संघमा पठाइएको थियो। परीक्षणबाट उक्त धातु १ किलोग्राम शुद्ध सुन रहेको पुष्टि भएको छ । यसको बजार मूल्य २ करोड ५१ लाख ९३ हजार ३५० रुपैयाँ कायम गरिएको सशस्त्र प्रहरीले जनाएको छ । पक्राउ परेकी पटेललाई बरामद सुनका सम्पूर्ण गहनासहित आवश्यक कारबाहीका लागि भैरहवा भन्सार कार्यालय, रुपन्देहीमा बुझाइएको छ । बरामद गहनामा ९ वटा हार, ८१ वटा औँठी, १३ वटा चुरा, ४ वटा माला, हसुली किसिमका ८ वटा सिक्री, पत्थरसहितका २० वटा झुम्का, २४ वटा झुम्का, १४ वटा गोली औँठी, १ वटा लकेट, १७ वटा पोते, २४ वटा सिक्रीलगायत छन् । त्यस्तै १८८ जोर बाली तथा जुली, ६४ जोर पत्थरसहितका टप, २२ वटा नाकको फूली, २ वटा पत्थरवाला हार, १० वटा साना झुम्का, ११ जोर कानको बाली र ८ वटा ब्रासलेटसमेत बरामद गरिएको प्रहरीले जनाएको छ ।
१४ हजार फिट तल झर्यो विमान, यात्रुले जोगाए १७४ जनाको ज्यान
काठमाडौं । दुबईबाट इजरायलको राजधानी तेल अभिभतर्फ उडेको फ्लाई दुबईको विमानमा बुधबार (हिजो) भएको घटनाले विश्वभरको उड्डयन क्षेत्रमा तरंग ल्याएको छ । फ्लाई दुबईको एफजेड–१०७३ उडानमा ककपिटभित्रै एक पाइलटले अर्को पाइलटलाई चक्कु प्रहार गरेपछि विमान केही समय नियन्त्रण गुमाउने अवस्थामा पुगेको थियो । चक्कु प्रहारपश्चात विमान तीव्र गतिमा तल झरेको बताइएको छ । तर यात्रु र विमानमा रहेका चालक दलका सदस्यले समयमै हस्तक्षेप गरेपछि विमान सम्भावित ठूलो दुर्घटना बचेको छ । विमानलाई अन्ततः साउदी अरबको ताबुकमा आपतकालीन अवतरण गराइएको थियो । विमानमा रहेका सबै यात्रुलाई फ्लाई दुबईको विमानमार्फत सुरक्षित रूपमा इजरायल पु‍र्याइएको छ । घटना दुबईबाट उडेको करिब साढे दुई घण्टापछि भएको थियो । फ्लाइट ट्र्याकिङ विवरणअनुसार बोइङ ७३७ विमान करिब ३३ हजार फिट उचाइमा उडिरहेको थियो । त्यस क्रममा विमान एकाएक तीव्र गतिमा तल झर्न थाल्यो । केही विवरणअनुसार विमान करिब एक मिनेटभित्र ३३ हजार फिटबाट १७ हजार फिट आसपासमा झरेको थियो भने रोयटर्सले ३० सेकेन्डभन्दा कम समयमा करिब १४ हजार फिटको अवरोह भएको जनाएको छ । घटनाको विभिन्न चरण र तथ्यांकअनुसार अवरोहको समय तथा उचाइमा केही फरक विवरण आएका छन् । फ्लाइट ट्र्याकिङ विवरणले पनि विमानको असामान्य गतिविधि देखाएको छ । विमानले सुरुमा ‘७७००’ आपतकालीन संकेत प्रसारण गरेको थियो । त्यसपछि केही समयका लागि ‘७५००’ कोड प्रयोग भएको थियो । ७५०० अन्तर्राष्ट्रिय उड्डयनमा विमान अपहरण वा गैरकानुनी हस्तक्षेप भएको संकेतका रूपमा प्रयोग हुँदै आएको छ । यसपछि विमानको दिशा पनि परिवर्तन भएको थियो । यही कारण इजरायली पक्षले सुरुमा विमान अपहरण भएको हुनसक्ने आशंका गरेको थियो । विमानमा अधिकांश यात्रु इजरायली नागरिक रहेको बताइएको छ । आपतकालीन संकेत र विमानको असामान्य उडानका कारण इजरायलले आफ्ना लडाकु विमानसमेत तयारी अवस्थामा राखेको थियो। तर विमानभित्रको वास्तविक अवस्था अझ डरलाग्दो थियो । इजरायली प्रधानमन्त्री बेन्जामिन नेतान्याहूले दिएको विवरणअनुसार ककपिटमा एक पाइलटले अर्का पाइलटमाथि चक्कुले आक्रमण गरेका थिए । आक्रमणमा परेका क्याप्टेन गम्भीर रूपमा घाइते भए पनि उनले प्रतिरोध गर्दै ककपिटको ढोका खोल्न सफल भएको बताइएको छ । त्यसपछि यात्रु र चालक दलका सदस्य ककपिटमा प्रवेश गरेका थिए । विमानमा संयोगवश फ्लाई दुबईकै केही ‘अफ–ड्युटी’ चालक दलका सदस्य पनि यात्रुका रूपमा रहेका थिए । उनीहरूले विमानको नियन्त्रण पुनःस्थापित गर्न महत्त्वपूर्ण भूमिका खेलेको फ्लाई दुबईले जनाएको छ । केही यात्रुका अनुसार ककपिटभित्र रगत देखिएको थियो भने पाइलटहरूबीचको संघर्षपछि विमान एकाएक तल झरेको थियो । यात्रुहरूमा ठूलो त्रास फैलिएको थियो । इजरायली सञ्चारमाध्यमसँग कुरा गरेका यात्रुमध्ये केहीले विमान एकाएक डुब्न थालेपछि आफूहरूले विमान दुर्घटना हुन लागेको ठानेको बताएका छन् । केही यात्रु ककपिटतर्फ दौडिएका थिए । त्यही क्रममा आक्रमणकारी पाइलटलाई नियन्त्रणमा लिइएको थियो । यात्रुहरूले उनलाई ककपिटबाट हटाएर नियन्त्रणमा लिएपछि विमानको अवस्था क्रमशः स्थिर भएको थियो । घटनापछि विमानलाई इजरायलतर्फ अघि बढाउनुको सट्टा साउदी अरबको ताबुकतर्फ मोडियो । ताबुक विमानस्थलका अनुसार स्थानीय समयअनुसार बिहान ८ः४४ बजे विमानले आपतकालीन अवतरणका लागि अनुमति मागेको थियो । त्यसको करिब एक घण्टापछि विमान सुरक्षित रूपमा ताबुक विमानस्थलमा अवतरण गरेको थियो । घाइते दुवै पाइलटलाई उपचारका लागि अस्पताल लगिएको थियो । अवतरणपछि विमानमा रहेका यात्रुहरूलाई विमानस्थलमै आवश्यक सहयोग उपलब्ध गराइएको थियो । फ्लाई दुबईले यात्रुहरूलाई इजरायल फर्काउन अर्को विमान पठाएको थियो । पछि यात्रुहरू तेल अभिभस्थित बेन गुरियन विमानस्थल पुगेका थिए । घटनामा संलग्न आक्रमणकारी पाइलटको पहिचान र राष्ट्रियताबारे पनि विभिन्न विवरण सार्वजनिक भएका छन् । इजरायली अधिकारीहरूले उनलाई ओमानका नागरिकका रूपमा उल्लेख गरेका छन् । तर केही प्रारम्भिक विवरणहरू स्वतन्त्र रूपमा पुष्टि भइसकेका छैनन् । आक्रमणमा परेका क्याप्टेनलाई भारतीय नागरिक स्मित मच्छरका रूपमा इजरायली प्रधानमन्त्रीले उल्लेख गरेका छन् । सबैभन्दा ठूलो प्रश्न भने आक्रमण किन भयो ? भन्ने हो । यसको स्पष्ट उत्तर अहिलेसम्म आएको छैन । फ्लाई दुबईले ककपिटमा ‘घटना’ भएको पुष्टि गर्दै त्यसको कारण र उद्देश्यबारे जानकारी अहिलेसम्म स्पष्ट नभएको जनाएको छ । कम्पनीले कारण र उद्देश्य औपचारिक अनुसन्धानबाट मात्रै खुल्ने बताएको छ । इजरायली अधिकारीहरूले भने यसलाई विमान दुर्घटनामा पार्ने प्रयास वा सम्भावित आतंकवादी गतिविधिका रूपमा अनुसन्धान गरिरहेका छन् । नेतान्याहूले आक्रमणपछि पाइलटले विमान नै खसाल्न खोजेको देखिएको बताएका छन् । तर अहिलेसम्म कुनै आतंकवादी संगठनले घटनाको जिम्मेवारी लिएको छैन र आक्रमणकारीको कुनै संगठनसँग सम्बन्ध रहेको प्रमाण पनि सार्वजनिक भएको छैन । त्यसैले घटनालाई अहिले नै निश्चित रूपमा आतंकवादी हमला भन्न सकिने अवस्था छैन । घटनाको अर्को महत्त्वपूर्ण पाटो विमानको ‘ब्ल्याक बक्स’ अनुसन्धान हो । फ्लाई दुबईका अधिकारीहरूले घटनाको वास्तविक क्रम र कारण पत्ता लगाउन ब्ल्याक बक्सलगायत प्रमाण महत्त्वपूर्ण हुने बताएका छन् । विमानको पुच्छरतर्फको रडरमा समेत क्षति पुगेको विवरण सार्वजनिक भएको छ । घटनापछि फ्लाई दुबईले इजरायल जाने र इजरायलबाट आउने आफ्ना उडानहरू अनुसन्धान जारी रहेसम्म स्थगित गर्ने निर्णयसमेत गरेको छ । संयुक्त अरब इमिरेट्सको नागरिक उड्डयन प्राधिकरणले पनि घटनालाई ‘सुरक्षा घटना’का रूपमा अनुसन्धान गरिरहेको जनाएको छ । यस घटनाले एउटा गम्भीर प्रश्न भने उठाएको छ, हजारौं फिट माथि उडिरहेको व्यावसायिक विमानको ककपिटमै पाइलटबीच हिंसात्मक घटना भएमा यात्रु र अन्य चालक दलले कति छिटो प्रतिक्रिया दिन सक्छन् ? फ्लाई दुबईको यो घटनामा यात्रु तथा अफ–ड्युटी चालक दलको तत्काल हस्तक्षेपकै कारण ठूलो मानवीय क्षति हुनबाट जोगिएको देखिन्छ ।
सफ्टवेयर केन्द्रको नियुक्तिमा प्रधानमन्त्री कार्यालयकै सेटिङ
काठमाडौं । प्रतिपक्ष दल राष्ट्रिय प्रजातन्त्र पार्टीकी प्रमुख सचेतक खुश्बु ओलीले सरकारको सुशासन र पारदर्शितामाथि प्रश्न उठाएकी छन् । बिहीबारको प्रतिनिधिसभा बैठकमा उनले प्रधानमन्त्री कार्यालय मातहतको ‘सफ्टवेयर विकास तथा सञ्चालन केन्द्र’ को कार्यकारी निर्देशक नियुक्तिमा नीतिगत भ्रष्टाचार र नियोजित सेटिङ भएको भन्दै संसदीय छानबिन समितिको माग गरेकी हुन् । सांसद ओलीले संसद्मा प्रस्तुत गरेको टाइमलाइनअनुसार जेठ १२ गते कार्यविधि बनाउन गठन गरिएको कार्यदलका संयोजक किरण तिम्सिनाले नै पछि आफू नियुक्त हुने गरी नियम र मापदण्ड तयार पारेको आरोप लगाइन् । उनले प्रमाणका रूपमा तिम्सिनाले लिङ्क्डइनमा राखेको ‘ओ ब्वाइ, दिस वाज टफ’ भन्ने पोस्ट र त्यसपछि प्रधानमन्त्री कार्यालयका कर्मचारीसँगै केक काटेर उत्सव मनाएको तस्बिर सार्वजनिक गरिन् । सांसद ओलीले असोज १ गते हतार–हतार सर्टलिस्ट गरी २ गते अन्तर्वार्ता लिने काम भएको र सोही दिन मन्त्रिपरिषद्ले निर्णय गरे पनि पाँच दिनसम्म सूचना लुकाइएको बताइन् । उनले भनिन्, ‘आफैँ प्रश्नपत्र बनाउने, आफैँ सहभागी हुने र विज्ञापन खुल्नुअघि नै उत्सव मनाउने, यो कस्तो सुशासन हो ? १८२ जना सांसद भएको सरकारलाई विधेयक ल्याउन कसले रोक्यो ? एनआरएनको भोट र नोट चल्ने तर अधिकार नचल्ने ? संसद्मा मौन बस्ने र फेसबुकमा क्रान्तिकारी हुने प्रवृत्ति बन्द गर्नुस् । राजनीति आफ्नो सुविधा हेरेर होइन, सही ठाउँमा सही प्रश्न सोधेर गर्ने हो ।’ उनले यो घटनालाई सुशासन ऐन, २०६४ को मर्मविपरीतको ‘ओपन सेटिङ’ को संज्ञा दिँदै प्रधानमन्त्रीको समेत ध्यानाकर्षण गराइन् । यसैगरी, प्रवासी नेपालीको नागरिकताको मुद्दा उठाउँदै उनले सरकारको दोहोरो चरित्रप्रति असन्तुष्टि व्यक्त गरिन् । गैरआवासीय नेपाली (एनआरएन) ले आफ्नो नागरिकता निरन्तरताको माग गर्दा परराष्ट्रमन्त्रीबाट सम्भव नभएको अभिव्यक्ति आउनु दुर्भाग्यपूर्ण रहेको उनको भनाइ छ । ओलीले सत्तापक्षका सांसदहरूलाई ‘फेसबुक क्रान्तिकारी’ नबन्न आग्रह गरिन् । यस्तो दलीय मौनता र कुशासनको अन्त्य नभए आफ्नो सांसद पदको कुनै औचित्य नहुने चेतावनीसमेत दिइन् ।
गल्छी–बेत्रावती सडकमा ट्र्याक खुल्यो, ग्रेड मिलाउने र ग्राभेल हाल्ने काम भने बाँकी
काठमाडौं । बाढीका कारण क्षतिग्रस्त गल्छी–बेत्रावती सडकखण्डमा ट्र्याक खोल्ने काम सम्पन्न भएको छ । ट्र्याक खुलेसँगै उक्त सडकखण्डमा सर्वसाधारणको आवतजावतसमेत सुरु भएको पूर्वाधार विकासमन्त्री सुनिल लम्सालले जानकारी दिए । रसुवासँग जोडिने मुख्य सडक मार्गका रूपमा रहेको यस सडकखण्डमा ट्र्याक खुले पनि सडकलाई थप व्यवस्थित बनाउन ग्रेड मिलाउने र ग्राभेल हाल्ने काम भने बाँकी रहेको मन्त्री लम्सालले बताए । सडक निर्माण तथा मर्मतको काम भइरहेका बेला बाक्लो सवारीसाधन सञ्चालन हुँदा निर्माण कार्य प्रभावित भइरहेको भन्दै उनले सडक मर्मत तथा पुनःनिर्माणमा आवश्यक सहजीकरण गरिदिन सबैसँग आग्रह गरे । यसैबीच, ट्रयाक खोल्ने काम सम्पन्न भएसँगै सडकखण्डमा बेलिब्रिज जडानको तयारीसमेत अघि बढाइएको छ । नुवाकोटतर्फ बेलिब्रिज निर्माणका लागि फाउन्डेसन तयार भइसकेको छ । नेपाली सेनाको सहयोगमा अब बेलिब्रिज जडानको काम अघि बढाइने भएको छ । त्यस्तै, रसुवातर्फ बेलिब्रिजको फाउन्डेसन निर्माणसमेत अन्तिम चरणमा पुगेको मन्त्री लम्सालले जानकारी दिए । दुवैतर्फको कामलाई तीव्रता दिँदै आगामी एक साताभित्र बेलिब्रिज जडान सम्पन्न गर्ने लक्ष्य राखिएको छ । बाढीका कारण सडक संरचनामा क्षति पुगेपछि रसुवा जाने–आउने यातायात प्रभावित हुँदै आएको थियो ।
प्रतिनिधिमै रोकिए कांग्रेसका यी प्रभावशाली नेताहरू
काठमाडौं । नेपाली कांग्रेसको १५औं महाधिवेशनका लागि महाधिवेशन प्रतिनिधि छनोटमा पार्टीका केन्द्रीय सदस्यदेखि पूर्वमन्त्री, संविधानसभा सदस्य, प्रदेशसभा सदस्य र प्रदेश तहका पदाधिकारीसम्मका नेताहरू पराजित भएका छन् । कांग्रेसले यसपटक पार्टीको केन्द्रीय नेतृत्वमा रहेका नेताहरूले समेत निर्वाचित प्रक्रियाबाट महाधिवेशन प्रतिनिधि बन्नुपर्ने व्यवस्था गरेपछि विभिन्न जिल्लामा भएको निर्वाचनमा स्थापित नेताहरू नै प्रतिनिधि बन्नबाट रोकिएका हुन् । नेपाली कांग्रेसको निर्वाचन समितिले हालसम्म सार्वजनिक गरेको विवरण अनुसार केन्द्रीय सदस्य उमेशजंग रायमाझी, गंगा सुनार, विशेष महाधिवेशनको बन्दसत्रका अध्यक्ष श्यामकुमार खड्का, पूर्वमन्त्री तारिणीदत्त चटौत, संविधानसभा सदस्य तथा बागमती प्रदेश कांग्रेसका उपसभापति चन्द्र महर्जन, निवर्तमान प्रदेशमन्त्री उर्मिला केसी नेपाल प्रतिनिधि बन्न सकेनन् । रायमाझी पनि महाधिवेशन प्रतिनिधिमै रोकिए कांग्रेसका केन्द्रीय सदस्य उमेशजङ्ग रायमाझी १५औं महाधिवेशनका लागि महाधिवेशन प्रतिनिधि बन्ने दौडमा पराजित भएका छन् । भोजपुरबाट खुलातर्फ उम्मेदवारी दिएका रायमाझी ४१६ मतमा रोकिएको निर्वाचन समितिले जानकारी दिएको छ । खुलातर्फबाट प्रतिनिधि छनोटका लागि भएको प्रतिस्पर्धामा उनी निर्वाचित हुन नसकेका हुन् । रायमाझी १४औं महाधिवेशनबाट कांग्रेस केन्द्रीय सदस्य निर्वाचित भएका थिए । उनी कांग्रेसको खेलकुद विभाग प्रमुखसमेत हुन् । पार्टीको पछिल्लो आन्तरिक समीकरणमा रायमाझी लामो समय शेरबहादुर देउवा पक्षमा रहेका थिए । पछिल्लो समय भने पार्टीको संस्थापनको आह्वानअनुसार गगन थापा नेतृत्वको समूहमा समाहित भएका थिए । केन्द्रीय सदस्य सुनार प्रतिनिधिमै रोकिइन् काठमाडौं–५ बाट कांग्रेस केन्द्रीय सदस्य गंगा सुनार दलित क्लस्टरतर्फ महाधिवेशन प्रतिनिधिको उम्मेदवार बनेकी थिइन् । उनी निर्वाचित हुन नसकेको क्षेत्रीय निर्वाचन समितिले जानकारी दिएको छ । उक्त क्लस्टरबाट मेनुका भुसाल निर्वाचित भएकी छन् । सुनार गत पुसमा सम्पन्न विशेष महाधिवेशनबाट कांग्रेस केन्द्रीय सदस्य बनेकी थिइन् । केन्द्रीय सदस्य भए पनि यसपटक निर्वाचित प्रक्रियाबाटै महाधिवेशन प्रतिनिधि बन्नुपर्ने व्यवस्थाका कारण उनी क्षेत्रीय निर्वाचनमा प्रतिस्पर्धामा उत्रिएकी थिइन् । काठमाडौं–५ मै विशेष महाधिवेशनको बन्दसत्रको अध्यक्षता गरेका ज्येष्ठ नेता श्यामकुमार खड्का पनि प्रतिनिधि बन्न सकेनन् । निर्वाचन समितिले दिएको जानकारी अनुसार प्रजातन्त्र सेनानी, शहीद परिवार तथा द्वन्द्व प्रभावित क्लस्टरबाट उम्मेदवार बनेका खड्काले १०१ मत पाएका थिए । सोही क्लस्टरबाट ठाकुरप्रसाद पुडासैनी १३२ मतसहित निर्वाचित भएका छन् । खड्का १४औं महाधिवेशनमा यही क्षेत्रबाट महाधिवेशन प्रतिनिधि निर्वाचित भएका थिए । पूर्वमन्त्री चटौतको प्रतिनिधि बन्ने प्रयास असफल कञ्चनपुर–३ बाट पूर्वमन्त्री तारिणीदत्त चटौत पनि महाधिवेशन प्रतिनिधि बन्न सकेनन् । खुला पुरुषतर्फ १० जना प्रतिनिधिका लागि भएको प्रतिस्पर्धामा चटौतले २४३ मत पाएको निर्वाचन समितिले जानकारी दिएको छ । उक्त क्लस्टरबाट बहादुरसिंह थापा ४२० मतसहित निर्वाचित भएका छन् । ललितपुर–२ मा प्रदेशका तीन नेता बाहिर ललितपुर–२ मा कांग्रेस बागमती प्रदेशका उपसभापति तथा संविधानसभा सदस्य चन्द्र महर्जन महाधिवेशन प्रतिनिधिमा पराजित भएका छन् । त्यस्तै, बागमती प्रदेशकी निवर्तमान मन्त्री उर्मिला केसी नेपाल र कांग्रेस ललितपुर–२ का क्षेत्रीय सभापति महेश खड्का पनि प्रतिनिधि छनोटमा पराजित भएका छन् । यस क्षेत्रको परिणामले प्रदेश तहको नेतृत्वमा रहेका नेताहरूलाई समेत महाधिवेशन प्रतिनिधि छनोटमा प्रतिस्पर्धा सहज नभएको देखाएको कांग्रेस ललितपुरका एक नेताले जानकारी दिए । बाँके–२ मा प्रदेशसभा सदस्यहरूलाई धक्का बाँके–२ मा पनि लुम्बिनी प्रदेशका वर्तमान तथा निवर्तमान प्रदेशसभा सदस्यहरू महाधिवेशन प्रतिनिधि बन्नबाट रोकिएका छन् । लुम्बिनी प्रदेशसभा सदस्य माया पुन मगर महिला क्लस्टरतर्फ २१५ मत पाएर पराजित भइन् । सोही क्लस्टरबाट उमा थापा मगर ४३६, रेनुसिंह ठकुरी ४११, नारायणी रुपाखेती ३४९ र कल्पना रेग्मी ३०९ मतसहित निर्वाचित भएका छन् । दलित क्लस्टरतर्फ प्रदेशसभा सदस्य सुशीला नेपाली वादीले २३६ मत पाएर पराजित हुँदा उक्त क्लस्टरबाट मैकुलाल बाल्मिकी ३३० मतसहित निर्वाचित भएका छन् । निवर्तमान प्रदेशसभा सदस्य याकुव अन्सारी पनि बाँके–२ बाट प्रतिनिधि चयनमा पराजित भएर महाधिवेशन प्रतिनिधि बन्नवाट रोकिएका छन् । प्रतिनिधि छनोटमै देखियो प्रतिस्पर्धा कांग्रेसको १५औं महाधिवेशनअन्तर्गत भइरहेको प्रतिनिधि छनोटमा देखिएका यी परिणामले पार्टीको आन्तरिक निर्वाचनको प्रतिस्पर्धालाई थप रोचक बनाएको छ । यसपटकको व्यवस्थाअनुसार केन्द्रीय तहका नेतासमेत सम्बन्धित क्षेत्रबाट निर्वाचित भएर महाधिवेशन प्रतिनिधि बन्नुपर्ने हुन्छ । केन्द्रीय निर्वाचन समितिका सदस्य सचिव राजु कटुवालका अनुसार पार्टीको पदाधिकारी वा केन्द्रीय सदस्यको हैसियतले मात्रै महाधिवेशनमा प्रतिनिधित्व सुनिश्चित हुने अवस्था छैन । त्यसको प्रत्यक्ष प्रभाव क्षेत्रीय अधिवेशनका परिणाममा देखिएको कटुवालले जानकारी दिए । केन्द्रीय सदस्यदेखि प्रदेश नेतृत्व र पूर्वमन्त्रीसम्मका नेताहरू प्रतिनिधिमै रोकिँदा कांग्रेसको १५औं महाधिवेशनमा प्रतिनिधि छनोटको चरण नै महत्त्वपूर्ण शक्ति परीक्षणका रूपमा देखिएको छ । अझै देशभरका सबै क्षेत्रको परिणाम आइनसकेकाले प्रभावशाली नेताहरूको पराजयको संख्या अझै थपिन सक्नेछ ।
