पृथ्वी राजमार्गको वैकल्पिक सडक आज ५ घण्टा बन्द हुने
काठमाडौं । पृथ्वी राजमार्गअन्तर्गत धादिङको गजुरी गाउँपालिका-२ स्थित फुर्केखोलाको पुल बगाएपछि सञ्चालनमा ल्याइएको वैकल्पिक सडक आज पाँच घण्टा बन्द हुने भएको छ । जिल्ला प्रशासन कार्यालय धादिङका अनुसार परेवाटार-पिपलटार-आदमटार-बेलिनटार-मास्टार सडकखण्डमा मर्मतसम्भार गर्नुपर्ने भएकाले आज बिहान १० बजेदेखि अपरान्ह ३ बजेसम्म सबै प्रकारका सवारीसाधनको आवागमन बन्द गरिने भएको हो । जिल्ला प्रशासन कार्यालयले वैकल्पिक सडकका विभिन्न स्थानमा मर्मतसम्भार गर्नुपर्ने भएकाले उक्त अवधिमा सवारीसाधन सञ्चालनमा रोक लगाइएको जनाएको छ । भदौ १० गते भोटेकोशीमा आएको बाढीले पृथ्वी राजमार्गअन्तर्गत फुर्केखोलाको पक्की पुल बगाएको थियो । पुल बगेपछि परेवाटार-पिपलटार-आदमटार-बेलिनटार-मास्टार सडकखण्डलाई वैकल्पिक मार्गका रूपमा प्रयोग गरिँदै आएको छ । जिल्ला प्रशासन कार्यालयले सडक बन्द रहने अवधिमा यात्रु तथा सवारीसाधनलाई धादिङबेँसी-सुनौलाबजार-भोर्ले-कोसीखोला-फोस्रेटार-कल्लेरीटार सडकखण्ड वा अन्य वैकल्पिक मार्ग प्रयोग गर्न अनुरोध गरेको छ ।
अर्थमन्त्री डा. वाग्लेको नेतृत्वमा उच्चस्तरीय प्रतिनिधिमण्डल अमेरिका प्रस्थान
काठमाडौं । विश्व बैंक समूहका अध्यक्ष अजय बङ्गाको निमन्त्रणामा दुई दिने भ्रमणका लागि अर्थमन्त्री डा. स्वर्णिम वाग्लेको नेतृत्वमा एक उच्चस्तरीय नेपाली प्रतिनिधिमण्डल आज अमेरिकाको वासिङ्टन डी.सी. प्रस्थान गरेको छ । अर्थ मन्त्रालयद्वारा जारी प्रेस विज्ञप्तिअनुसार आगामी असोज १९ र २० गतेसम्म हुने उक्त भ्रमणका क्रममा द्विपक्षीय सहयोग अभिवृद्धि, पुनर्निर्माणको ’ग्रे लिस्ट’बाट बाहिरिने प्रक्रिया लगायतका बृहत् आर्थिक सुधारका विषयमा गहन छलफल हुनेछ । भ्रमणका क्रममा अर्थमन्त्री डा. वाग्लेले विश्व बैंक, अमेरिकी अर्थ मन्त्रालय र इन्टरनेसनल डेभलपमेन्ट फाइनान्स कर्पोरेसनका उच्चपदस्थ अधिकारीहरूका साथै निजी क्षेत्रका अग्रणी लगानीकर्ताहरूसँग द्विपक्षीय भेटवार्ता गर्नेछन् । सो अवसरमा हालै भोटेकोशीमा आएको बाढीका कारण क्षति पुगेका भौतिक एवं आर्थिक पूर्वाधारको पुनरुत्थान, पुनर्निर्माण तथा उत्थानशील विकासका लागि थप सहायता परिचालनबारे विश्व बैंक र अमेरिकी सरकारका प्रतिनिधिहरूसँग छलफल गर्ने कार्यसूची रहेको छ । साथै, नेपालमा सडक र विद्युत प्रसारण लाइनजस्ता महत्त्वपूर्ण पूर्वाधारमार्फत रोजगारी तथा आर्थिक अवसरको सिर्जना गर्न विकास साझेदार र निजी क्षेत्रको लगानी अभिवृद्धिका लागि पहल गर्ने योजना पनि रहेको मन्त्रालयले जनाएको छ ।
बंकुलबाट १ करोड ५ लाखभन्दा बढी मूल्यको अवैध स्टिकर बरामद
काठमाडौं । सशस्त्र प्रहरी बल, नेपाल बोर्डर आउट पोष्ट सरमजुवा रौतहटको टोलीले भारतबाट अवैध रूपमा नेपालतर्फ ल्याउँदै गरेको १ करोड ५ लाखभन्दा बढी मूल्यको १ लाख २० हजार थान अन्तःशुल्क स्टिकर बरामद गरेको छ । शुक्रबार दिउँसो अन्दाजी १५ः४५ बजे रौतहट जिल्लाको बौधिमाई नगरपालिका–७ स्थित बंकुल भन्सार पछाडिको धानबारीबाट सशस्त्र प्रहरी निरीक्षक अच्युत सुवेदीको कमाण्डमा खटिएको टोलीले उक्त अवैध स्टिकर बरामद गरेको हो । भारतबाट अवैध रुपले कार्टुनमा राखी नेपालतर्फ ल्याउँदै गरेका व्यक्तिले सशस्त्र प्रहरीको गस्ती टोलीलाई देख्नासाथ सामान छाडेर फरार भएका थिए । उक्त कार्टुन जाँच गर्दा नेपाल सरकार आन्तरिक राजस्व विभागबाट जारी हुने किसिमको ५० यूपी १८० एमएल साइजको मदिराको बोतलमा टास्ने स्टिकर फेला पारेको हो । बरामद स्टिकर आवश्यक कारबाहीका लागि गौर भन्सार कार्यालय रौतहटमा बुझाइएको छ ।
ठमेलमा पर्यटकलाई दुःख दिने तीन जना पक्राउ
काठमाडौं । काठमाडौंको पर्यटकीय क्षेत्र ठमेलमा स्वदेशी तथा विदेशी पर्यटकलाई दुःख हैरानी दिने, लागू औषध तथा यौनजन्य गतिविधिमा दुरुत्साहन गर्ने र बिचौलियाको रूपमा काम गर्ने तीन जनालाई प्रहरीले नियन्त्रणमा लिई अनुसन्धान सुरु गरेको छ । ‘सुरक्षित ठमेल, जाने होइन ?’ अभियानअन्तर्गत सार्वजनिक मर्यादा एवं शान्ति भंग गर्ने, डान्स, दोहोरी, बार तथा क्लबहरूमा बिचौलियाको काम गर्ने र अनैतिक क्रियाकलापमा संलग्न रहनेहरूविरुद्ध प्रहरी वृत्त लैनचौरको टोलीले कारबाही अघि बढाएको हो । सार्वजनिक स्थल तथा सडक खण्डमा सर्वसाधारण एवं पर्यटकलाई अभद्र व्यवहार र दुःख हैरानी दिएको गुनासोका आधारमा असोज १५ गतेसम्म सञ्चालन गरिएको कारबाहीका क्रममा प्रहरीले शंकास्पद ३१ जनालाई नियन्त्रणमा लिएको थियो । प्रारम्भिक छानबिन र अनुसन्धानका क्रममा संलग्नता पुष्टि भएपछि पोखरा महानगरपालिका-११ घर भई हाल मनमैजु बस्ने २० वर्षीय लक्की गुरुङ, गोरखा नगरपालिका-९ घर भई नयाँबजार बस्ने २३ वर्षीय प्रबिन तामाङ र सिन्धुली कमलामाई नगरपालिका-४ घर भई सोह्रखुट्टे बस्ने २९ वर्षीय सनिस भुजेलमाथि मुद्दा दर्ता गरिएको छ । पक्राउ परेका तीनै जनाउपर अभद्र व्यवहारसम्बन्धी कसुरमा जिल्ला प्रशासन कार्यालय काठमाडौंबाट तीन दिनको म्याद थप गरी थप अनुसन्धान भइरहेको प्रहरीले जनाएको छ ।
उड्डयन सेवालाई सुरक्षित, स्तरीय, भरपर्दो र सर्वसुलभ बनाउन दुई विधेयक संसदमा दर्ता
काठमाडौं । नागरिक उड्डयन प्राधिकरणलाई टुक्राउने दुई विधेयक प्रतिनिधिसभामा दर्ता भएका छन् । शुक्रबार संस्कृति, पर्यटन तथा नागरिक उड्डयनमन्त्री खडक राज पौडेल (गनेस) ले ती विधेयक संसदमा दर्ता गराएका हुन् । मन्त्री पौडेलले नेपाल हवाई सेवा प्राधिकरण विधेयक, २०८३ र नेपाल नारिक उड्ययन प्राधिकरण, २०८३ प्रतिनिधिसभामा दर्ता गराउनुभएको हो । यी विधेयक पारित भएपछि प्राधिकरण टुक्राउनका लागि बाटो खुल्नेछ । मन्त्री पौडेलले नेपालको नागरिक उड्डयन सेवालाई अन्तर्राष्ट्रिय मापदण्ड अनुरुप विकास तथा विस्तार गर्न र गैरकानूनी हस्तक्षेप रोकी प्रभावकारी नियमनको माध्यमबाट नागरिक उड्डयन सेवालाई सुरक्षित, नियमित, स्तरीय, भरपर्दो र सर्वसुलभ बनाउनका लागि छुट्टाछुट्टै विधेयक दर्ता गरिएको उल्लेख गरे । नयाँ ऐन जारी भएपछि हवाई यातायात जस्तो हवाई यात्रुको सुरक्षा गाँसिएको संवेदनशील क्षेत्रमा नियमनकारी र सेवाप्रदायी कार्यहरु छुट्टाछुट्टै संस्थाबाट सम्पादन भइ विद्यमान स्वार्थको द्वन्द्व अन्त्य हुने मन्त्री पौडेलले उल्लेख गरे । साथै एयर नेभिगेशन सेवा र विमानस्थल सञ्चालन सेवालाई अन्तर्राष्ट्रिय प्रचलन बमोजिम अझ प्रभावकारी ढंगले व्यवस्थापन गर्न सकिने उनले जनाए । मन्त्री पौडलले उल्लेख गरेका छन्, “नियमनकारी कार्यलाई अझ स्वायत्त र सशक्त बनाई एयर नेभिगेशन सेवा, विमानस्थल सञ्चालन सेवा र उड्डयन तालिम संस्था समेतको नियमनको दायरामा आइ हवाई सेवा थप सुरक्षित हुनेछ ।” नेपालको नागरिक उड्डयनको सम्बन्धमा विद्यमान आइकाओ तथा युरोपियन युनियनको उडान सुरक्षा चासो समेत सम्बोधन गर्न सहयोग पुग्ने छ । साथै नागरिक उड्डयन क्षेत्रमा हाल भइरहेका कार्यहरु विशिष्टिकृत रुपमा सञ्चालन भई सेवाको गुणस्तर अभिवृद्धि हुनेमा मन्त्री पौडेलको विश्वास छ । मन्त्री पौडेलले सेवा प्रवाहमा चुस्तता र व्यावसायिकता प्राप्त भई सम्बद्ध कर्मचारीहरु थप उप्रेरित भइ काम गर्ने हुँदा उडान एवम् विमानस्थल सञ्चालन गुणस्तरमा अभिवृद्धि हुने उल्लेख गरे । साथै चुस्त र छरितो संगठन हुने हुँदा जिम्मेवारीका कार्यहरु सम्पादन छिटो र व्यवस्थित हुन जाने उहाँको भनाइ छ । यसबाट अन्तर्राष्ट्रिय मापदण्ड बमोजिम नेपालको विमानस्थल एवम् एयर नेभिगेशन संरचना कायम हुँदा अन्य मुलुक र सम्बद्ध संस्थाहरुले सकारात्मक रुपमा मूल्यांकन गर्ने मन्त्री पौडेलले उल्लेख गरे । सन् २००९ मे महिनामा सम्पन्न अन्तर्राष्ट्रिय नागरिक उड्डयन संगठनको युनिभर्सल सेफ्टी ओभरसाइट अडिट प्रोग्रामअन्तर्गत भएको नेपालको सेफ्टी ओभरसाइट अडिटमा प्राधिकरणको नियमनकारी र सेवा प्रदायकको दोहोरो भूमिका औंल्याइएको थियो । त्यसपछि सन् २०१३ र सन् २०१७ को अडिटमा समेत उक्त विषय दोहोर्याइएको थियो । पछिल्लो पटक सन् २०२२ मा भएको अडिटले समेत विद्यमान प्राधिकरणबाट हुने सेवाप्रदायक र नियामक प्रकृतिका कार्यहरु स्पष्ट रुपमा छुट्याउने कार्यलाई उच्च प्राथमिकता दिनुपर्ने सिफारिस गरेको थियो । साथै नेपालले नागरिक उड्डयनसम्बन्धी अन्तर्राष्ट्रिय मञ्चहरु (आइकाओ सम्मेलन, आइकाओ डिजिसिए सम्मेलन) मा नियमनकारी र सेवा प्रदायक कार्यलाई छुट्टाछुट्टै संस्थामार्फत सञ्चालन गर्ने गरी संस्थागत सुधारको थाली गरिएको जानकारी गराउँदै आएको छ । नेपाल हवाई सेवा प्राधिकरण विधेयक, २०८३ पारित भएपछि नेपाल हवाई सेवा प्राधिकरण स्थापना हुनेछ । यो ऐन राष्ट्रपतिबाट प्रमाणीकरण भएको मितिले ९१औँ दिनदेखि लागू हुनेछ । उक्त प्राधिकरण्को काम, कर्तव्य र अधिकारमा विमानस्थल पूर्वाधार विकास तथा व्यावसायिक सेवा, एयर नेभिगेशन तथा प्राविधिक सेवा, उडान सुरक्षा र जोखिम व्यवस्थापन, नियामक निकायसँग समन्वय र संस्थागत व्यवस्थापन हुनेछ । साथै नागरिक उड्डयन प्राधिकरणको काम, कर्तव्य र अधिकारमा प्रमाणपत्र तथा इजाजत व्यवस्थापन, वायुयान दर्ता र व्यक्तिगत इजाजत, मापदण्ड निर्धारण र नियमन, सुरक्षा सुपरीवेक्षण, अन्तर्राष्ट्रिय दायित्व र नीगित समन्वय तोकिएको छ ।
लुम्बिनी बौद्ध विश्वविद्यालयलाई विशिष्ट पहिचानसहित अघि बढाउन शिक्षामन्त्री पोखरेलको जोड
काठमाडौं । शिक्षा तथा खेलकुदमन्त्री सस्मित पोखरेलले लुम्बिनी बौद्ध विश्वविद्यालयलाई अन्य विश्वविद्यालयभन्दा पृथक र विशिष्ट पहिचानसहित अघि बढाउनुपर्ने बताएका छन् । लुम्बिनी बौद्ध विश्वविद्यालयले शुक्रबार आयोजना गरेको स्वागत कार्यक्रममा सम्बोधन गर्दै मन्त्री पोखरेलले बुद्धको जन्मभूमि लुम्बिनीमा स्थापित विश्वविद्यालयले बौद्ध दर्शन, मौलिक ज्ञान तथा नेपालको रैथाने पहिचानलाई विश्वसमक्ष चिनाउने गरी आफ्नो उद्देश्य केन्द्रित गर्नुपर्ने बताए । उनले विश्वविद्यालयलाई इन्जिनियरिङ, विज्ञानलगायतका परम्परागत विषयमा मात्र सीमित नगरी बौद्ध दर्शन तथा यससँग सम्बन्धित विषयको अध्ययन, अनुसन्धान र प्रवद्र्धनलाई प्राथमिकता दिनुपर्नेमा जोड दिए । विश्वविद्यालयका आङ्गिक क्याम्पसहरू विस्तार हुँदै गए पनि मूल उद्देश्य र बौद्ध दर्शनको अध्ययन–अध्यापनबाट विचलित हुन नहुने उनको भनाइ थियो । विश्वविद्यालयले आफ्नो विशिष्ट पहिचान कायम राख्दै अन्य शैक्षिक संस्थासँग सहकार्य गरेर अघि बढ्नुपर्ने उहाँले बताए । कार्यक्रममा लुम्बिनी बौद्ध विश्वविद्यालयमार्फत नेपालको रैथाने पहिचान, मौलिकता र स्वदेशी ज्ञानलाई विश्वसमक्ष चिनाउने पर्याप्त सम्भावना रहेको चर्चा गरिएको थियो । रसुवा बाढीपीडितका लागि १० लाख सहयोग यसैबीच, लुम्बिनी बौद्ध विश्वविद्यालयले रसुवाका बाढीपीडितका लागि १० लाख रुपैयाँ आर्थिक सहयोग गरेको छ । विश्वविद्यालयले शुक्रबार शिक्षा तथा खेलकुदमन्त्री सस्मित पोखरेलमार्फत राहत कोषका लागि उक्त रकम हस्तान्तरण गरेको हो । बाढीबाट प्रभावित नागरिकको राहत तथा पुनःस्थापनामा सहयोग पुर्याउने उद्देश्यले रकम प्रदान गरिएको विश्वविद्यालयले जनाएको छ ।
भवन ऐन २०८३ को विधेयक संसदमा दर्ता, सबै नागरिकलाई आवास अधिकारको ग्यारेन्टी
काठमाडौं । पूर्वाधार विकास मन्त्रालयले देशका हरेक नागरिकको आवासको अधिकार कानुनी रूपमा सुनिश्चित गर्ने उद्देश्यसहित ‘भवन ऐन २०८३’ को विधेयक संघीय संसद सचिवालयमा दर्ता गराएको छ । पूर्वाधार विकास मन्त्री सुनील लम्सालको नेतृत्वमा तयार पारिएको यो विधेयकले भवन ऐन २०५५ लाई संशोधन गर्नेछ । सरकारको घोषणाअनुसार प्रत्येक नागरिक र तिनका परिवारलाई सुरक्षित र व्यवस्थित आवासको ग्यारेन्टी गर्न ल्याइएको यस विधेयकमा निम्न आय भएका परिवारका लागि आवासको ग्यारेन्टी तथा मध्यम आय भएका परिवारका लागि भूकम्प प्रतिरोधात्मक एवं आधुनिक घर निर्माणका विभिन्न प्रोत्साहनकारी सुविधाहरू प्रस्ताव गरिएका छन् । विधेयकमा पहिलोपटक घर निर्माण गर्ने नेपाली नागरिकलाई सरकारले तोकेको टाइप डिजाइन तथा मापदण्डअनुसार आवश्यक पर्ने नदीजन्य तथा प्रकृतिजन्य निर्माण सामग्री निःशुल्क उपलब्ध गराउने व्यवस्था गरिएको छ । यस्तै, गोठ निर्माणका लागि निवेदन दिने नागरिकलाई समेत आवश्यक प्रकृतिजन्य सामग्री निःशुल्क उपलब्ध गराइनेछ । गरिब तथा विपन्न नागरिकको आवास निर्माणका लागि संघीय सरकारबाट ५० हजार रुपैयाँ र प्रदेश सरकारबाट २५ हजार रुपैयाँ गरी कुल ७५ हजार रुपैयाँसम्म अनुदान दिने प्रस्ताव गरिएको छ । यसका साथै विपत्, असुरक्षित तथा जोखिमपूर्ण बस्तीलाई सुरक्षित स्थानमा स्थानान्तरण गरी सरकार आफैले नयाँ घर निर्माण गरिदिने कानुनी आधार पनि विधेयकले तयार पारेको छ । मध्यम आय भएका नागरिकका लागि भने विधेयकले ९ सयदेखि १ हजार ३ सय प्लिन्थ क्षेत्रका सुरक्षित र भूकम्प प्रतिरोधात्मक स्मार्ट घर निर्माण तथा उपलब्ध गराउने योजना अघि सारेको छ । २० लाखदेखि ७५ लाख रुपैयाँसम्म लागत पर्ने यस्ता घर नागरिकले सहुलियतपूर्ण ऋण र किस्ताबन्दी सुविधामार्फत प्राप्त गर्न सक्नेछन् । यसका लागि प्रारम्भिक रूपमा ५ लाख रुपैयाँ अग्रिम भुक्तानी गरी १५ वर्षसम्म मासिक ११ हजार रुपैयाँ किस्ता तिर्ने विकल्प राखिएको छ । अग्रिम भुक्तानीको क्षमता अनुसार १० लाखमा मासिक १५ हजार, १५ लाखमा मासिक २० हजार, २० लाखमा मासिक ३० हजार र २५ लाख रुपैयाँ अग्रिम भुक्तानीमा मासिक ३५ हजार रुपैयाँ किस्ता तिर्ने लचिला विकल्पहरू समेत प्रस्ताव गरिएका छन् । निम्न आय वर्गका लागि अनुदान र मध्यम वर्गका लागि सहुलियतपूर्ण आवासको व्यवस्था गर्दै सरकारले नागरिकको आवासको मौलिक अधिकारलाई व्यवहारमै लागू गर्न यो ऐन ल्याएको पूर्वाधार विकास मन्त्रालयले जनाएको छ ।
‘म्याक्स टाइगर दशैं धमाका’ : ३६ जनालाई बाइक र स्कुटर, एक जनालाई कार जित्ने मौका
काठमाडौं । म्याक्स टाइगर इनर्जी ड्रिङ्कले आफ्ना उपभोक्ताहरूका लागि चाडपर्वको अवसरमा विशेष उपहारसहित ‘म्याक्स टाइगर दशैं धमाका २०८३’ अभियान सार्वजनिक गरेको छ । राजधानीमा शुक्रबार (आज) आयोजित एक कार्यक्रमका बीच आयोजक तथा ब्रान्ड एम्बेसेडर महानायक राजेश हमालको उपस्थितिमा सो योजना घोषणा गरिएको हो । यस अभियानअन्तर्गत १८ जना भाग्यशाली विजेताले यामाहा स्कूटर, १८ जनाले यामाहा बाइक र एक जना भाग्यशाली बम्पर विजेताले प्रोटोन इमास ७ कार जित्न सक्नेछन् । कार्तिक मसान्तसम्म लागु हुने यो योजनामा सहभागी हुन उपभोक्ताले म्याक्स टाइगर इनर्जी ड्रिङ्क खरिद गरी क्यान वा बोतलको पुलअफको पछाडि हेर्नुपर्नेछ । पुलअफमा पुरस्कार परेको लेखिएको खण्डमा सम्बन्धित खुद्रा पसल वा डिलरमार्फत दाबी गर्न सकिनेछ । उपहार वितरण प्रक्रियालाई पारदर्शी बनाउन कम्पनीले चाडपर्व सकिएलगत्तै काठमाडौंको एक पाँचतारे होटलमा भव्य कार्यक्रम आयोजना गरी मिडियाको उपस्थितिमा विजेताहरूलाई औपचारिक रूपमा पुरस्कार हस्तान्तरण गरिने जनाएको छ । कार्यक्रममा बोल्दै ब्रान्ड एम्बेसेडर राजेश हमालले म्याक्स टाइगर शुद्ध नेपाली, गुणस्तरीय र अत्यन्तै लोकप्रिय ब्रान्ड भएको उल्लेख गर्दै यससँग जोडिन पाउँदा खुसी व्यक्त गरे । उनले स्वदेशका साथै विदेशमा पनि आफ्नो पहिचान बनाउन सफल यस उत्पादक कम्पनीको दशैं धमाका अभियानले चाडपर्वको माहोललाई अझ उत्साहजनक र ऊर्जावान् बनाउने विश्वास व्यक्त गर्दै सबैलाई विजया दशमीको शुभकामना दिए । कम्पनीका सेल्स हेड कृष्ण दाहालले यो योजना केवल उपहार जित्ने अभियान मात्र नभई वर्षभरि म्याक्स टाइगरलाई माया र विश्वास गर्ने उपभोक्ताहरूप्रतिको सम्मान र धन्यवाद ज्ञापन भएको बताए । कम्पनीले दशैंमा सबै नेपालीको जीवनमा नयाँ ऊर्जा, समृद्धि र खुसी छाओस् भन्ने शुभकामना समेत व्यक्त गरेको छ ।
