१० वर्षपछि विदेशबाट विद्यार्थी नेपाल पढ्न आउने सम्भावना छ-विष्णु पोखरेल
बोस्टन एजुकेशनल सर्भिस प्रा.लिका प्रबन्ध निर्देशक विष्णु पोखरेल विगत १३ वर्षदेखि शैक्षिक परामर्श सेवामा सक्रिय छन् । लामो शसस्त्र द्वन्द्व, राजनीतिक संक्रमण, अस्थायीत्वले भविष्यप्रति निरास भनेर नेपाली युवा विदेशीने दिन विस्तार परिवर्तन हुने उनको विश्लेषण छ । विगतमा विदेशमा अध्ययन गर्ने जाने विद्यार्थी मध्ये फाट्टफुट्ट मात्र नेपाल फर्कने गरेकोमा अब विदेशमा शिक्षा लिएपछि नेपाल फर्कने क्रम बढ्ने र अागामी १० वर्षपछि शैक्षिक परामर्शदाताहरु विदेशी विद्यार्थी नेपाल ल्याउने दिशामा जान सक्ने उनको विश्लेषण छ । प्रस्तुत छ विष्णु पोखरेलसँगको कुराकानी । विष्णु पोखरेल, प्रबन्ध निर्देशक-बोस्टन एजुकेशनल सर्भिस प्रा.लि. शैक्षिक परामर्श सेवा सञ्चालन गर्नुभएको कति भयो ? अफिसियली २००६ बाट शुरु गरेको हो । त्योभन्दा अघि डेनमार्कको एउटा कलेजसँग एशोसिएट थिएँ । एकजना डेनिस केयर नेपालको प्रतिनिधि हुनुहुन्थ्यो । उनी आफ्नो देशको एक स्कूलमा एशोसियट रहेछन् । उनले डेनिस ल्याङ्ग्वेज पढ्न नेपालदेखि विद्यार्थी जान चाहन्छ भने मेरो कलेज छ भनेर मलाई भने । त्यसपछि मैले २/४ जना विद्यार्थीहरु पठाए । ४ देखि ६ महिनाको ल्याङ्ग्वेज कोर्ष गरेर उनीहरु त्यहाँको युनिभर्सीटीमा अध्ययन गर्न सक्ने स्थिति हुन्थ्यो । डेनिस ल्याङ्ग्वेज फाउन्डेसनको रुपमा पढ्ने हो । त्यसपछि युनिभर्सीटी, कलेज पढे विद्यार्थीहरुलाई जागिर खान धेरै सजिलो हुन्थ्यो । स्थानीयहरुसँग भिज्नका लागि पनि धेरै सहज हुन्थ्यो । पछिल्लो समयमा त्यसरी ल्याङ्ग्वेजको लागि गएपछि युनिभर्सीटीहरुले १ वर्षको शुल्क शुरुमै लिने चलन आयो । रकम पनि उच्च भएकोले विद्यार्थीहरुलाई जानको लागि हामीले नै डिस्करेज गरेका छौं । डेनमार्कमा १/२ वटा कलेजले मात्रै सिधै विद्यार्थी लिन्छन् । उक्त देश विद्यार्थीको लागि सुरक्षित छ । डेनिसहरु धेरै फ्रेण्डली हुन्छन् । अपराध भन्ने हुँदैन । भष्टाचार जिरो, देश राम्रो छ । डेनमार्कमा कति छन् नेपालीहरु ? पहिले करिब ३/४ हजार भएकोमा अहिले विद्यार्थीहरु गएर त्यहीँ सेटल भएका छन् । सन् २००७ देखि सेटल भएर पीआर लिएर बसेकाहरु गरी करिब १० हजार पुग्लान् । शुरुका दिनहरुमा त्यहाँ नेपालीहरुले धेरै संघर्ष गर्नु परेको थियो । अहिले उच्च ओहोदा बैंक, आईटी लगायतको छुट्टाछुट्टै कम्पनीमा नेपालीहरु कार्यरत छन् । त्यतिमात्रै होइन राजनीतिमा पनि नेपालीहरु स्थापित भएका छन् । त्यहाँको स्थानीय राजनीतिमा नेपालीहरु सहभागी भएको अवस्था छ । पढ्न जाने मध्ये कति नेपाल फर्कन्छन् ? मैले २००५ मा पठाएको विद्यार्थीहरुमध्ये मलाई थाहा भएसम्म २/४ जना मात्रै फर्केका छन् । किनभने कोही त्यहाँबाट पढ्न नसक्ने विद्यार्थीहरु पोर्चुगल स्पेनतिर गएका देखिन्छन् । कति फ्रान्सतिर गएर त्यहाँका आर्मी भएको देखिन्छ । पढ्ने विद्यार्थीहरु राम्रो अध्ययन गरेर ग्रीनकार्ड लिएर डेनमार्कमै बसेका छन् । जो पढ्न नसक्ने विद्यार्थीहरु अन्य देशतिर डाइभर्ट भएको अवस्था हो । पढन् विदेश जाने नेपालीहरु पछि नेपाल नफर्कनुको कारण राजनैतिक अवस्था पनि हो । विगतमा १० वर्ष सशस्त्र द्वन्द्वमा देश रोमलियो । सो समय नेपालमा शिक्षा, स्वास्थ्य रोजगारीको ग्यारेन्टी नभएको कारणले गएको नेपालीहरु फर्कन चाहेनन्, त्यतै बसे । पछिल्लो समय राजनीतिक अवस्था सुध्रिदै गएको छ , शान्ति छाएको छ, अध्यारोदेखि उज्यालोतिर देश अघि बढेको छ । विगतमा भविश्य नदेखेर विदेश गएकाहरु अब नेपाल फर्कने कुरा गर्दैनन् ? म बीच–बीचमा विदेशमा यात्रा गरिरहन्छु । दुई महिनाअघि मात्रै यूएसबाट आएको हुँ । यूरोप गइरहन्छु । विदेशमा बस्ने नेपालीहरु वामगठवन्दनदेखि आशावादी छन् । नेपालमा केही राम्रो भयो भने कति आउलान् । सबै होइन, ५/१० प्रतिशत नेपाली फर्कन राजी छन् । त्यहाँ स्थापित भइसकेकाहरु कि एनआरएनएको रुपमा व्यापार गर्न आउन तत्पर छन् अथवा राजनैतिक पहुँच देखाउन आउन तत्पर छन् । सर्वसाधारण जो स्थापित नभएका आउछन् । सबै फर्कदैनन् । नेपालीहरु धेरै जसो विदेशमा आफ्नै विजनेश गरेर स्टाब्लिस्ट भएका छन् । २०४६ पछि नेपालबाट सर्वसाधारणहरु विदेश जान थालेका हुन् । विगतमा राणाहरु जान्थे । सर्वसाधारणहरु पछि मात्र जान थालेका हुन् । सर्वसाधारणहरु गएका देशमा शुरुमा उनीहरुको अवस्था दयनिय थियो । अहिले आएर नेपालीहरु उच्च पहुँचमा पुगेका छन् । अाफूले काम गर्ने, सिक्ने अनि विजनेश स्टाब्लिस्ट गर्ने गरेका छन् । त्यहाँ विजनेशको सिस्टम छ । उनीहरु एउटा सिस्टममा बसिसकेकोले नेपाल आएपछि घुलमिल हुन समय लाग्छ । हाम्रोमा सिस्टमको विकास हुनु पर्यो । अहिले काठमाडौं उपत्यकामा धुलोले हिड्न नसक्ने अवस्था छ । धुलाम्य हुन्छ । नेपालमा सिस्टम बसेको छैन । सिस्टममा देश आयो, वातावरण राम्रो भयो भने उनीहरु फर्कन चाहन्छन् । विकसित देशको जस्तो सुविधा नेपालमा पनि हुनुपर्यो ताकि नेपालीहरु विदेश नजाउन् । डेनमार्कमा सहजै सिस्टमको माध्यमले ट्याक्स उठ्छ । नेपालमा त्यस्तो छैन । यहाँ विभिन्न ढनाढ्य, विजनेशम्यानहरुले कर छलेको कुरा बाहिर आएको छ । पटक पटक करफछ्र्याैट आयोग बन्छ । मलाई लाग्छ, दुनियाँमा कँही पनि यस्तो आयोग हुँदैन । सरकारले यी सबै पाटोहरु सुधार गरेर विदेशमा बसेका नेपालीहरुलाई लगानी गर्न आग्रह गर्दै, सुरक्षाको पनि ग्यारेन्टी दियो भने आउन सक्छन् । सबैले पहिले आफुलाई हेर्ने हो, अनि परिवार । त्यसपछि देशलाई । देशले त्यो वातावरण तयार गरिदिनु पर्छ । आफूले विदेशमा पठाएको विद्यार्थीको प्रगतिबाट लोभिएर तपाईलाई पनि विदेश जान मन लाग्दैन ? त्यस्तो सोच नआउने होइन तथापी विभिन्न जिम्मेवारी छन् । मैले देशमा बस्नु पर्छ । जानेको कुरा बताउनुपर्छ भनेर म यही बसेको हुँ । म राजनैतिक पार्टीसँग पनि जोडिएको छु । मेरो पनि बाध्यताहरु छन् । त्यसको सट्टा विदेशमा देखेको, सुनेको कुरा ल्याएर नेपालमै सदुपयोग गर्नुपर्छ भन्ने लाग्छ । शुरुका दिनहरुमा म कन्सल्टेन्सी व्यवसाय गर्छु भनेर सोचेको थिइन । मैले विदेश जानकै लागि गरे । मेन्टालिटी त्यतै गएकोले सिकेँ । त्यसै सन्दर्भमा २००६ मा म यूरोप घुमे । यूरोप घुम्ने मौका पाएँ । त्यहाँ मैले विभिन्न अध्ययन गरे । समग्र अध्ययन गर्दा म मेरै देशमा बसेर केही गर्छु भनेर नेपालमा बस्ने निर्णय गरेको हुँ । मलाई घुम्न जान मन लाग्छ । तर उही नै बस्नुपर्छ भन्ने सोच अहिलेसम्म पलाएको छैन । अहिले ४० वर्षको भए । अब यो उमेरमा त्यहाँ विदेश गएर सेटल हुन्छु जस्तो पनि लाग्दैन । म समृद्धिमा जोडिन चाहे । व्यवसाय छ । वेस्टेन एजुकेशन सर्भिसेस चलाउछु । राजनीतिलाई सेवाको रुपमा हेरेको छु । मलाई पद लोलुप्ता छैन । विगतको स्थानीय निकायमा म मेरो स्थानीय ठाँउमा अहिले नेतृत्वमा पुगकाे दलको पक्षबाट मेयरमा पनि मोरङको रतुवामाई नगरपालिकामा सिफारिस आएको हो । तर मैले लिदिन भने । जहाँ आफू बसिन्छ त्यहाँ राम्रो गरौं । बसिदैन राम्रो नराम्रो नगरौं भन्ने मेरो सोच हो । राजनैतिक कार्यकताहरु आर्थिक समृद्धिमा जोडिनुपर्छ, पार्टीले त्यहि नीति लिएको छ । मन्त्रालय फाइल बोकेर कुद्नुभन्दा, कुनै ठाँउ चन्दा उठाएर समय वर्वाद गर्नुभन्दा केही न केही व्यवसाय गरेर रहेको समय राजनीतिमा लगाउनु पर्छ भन्ने मेरो सोच हो । त्यसबाट सेवा मिल्छ । सरकारले नेपालमै रोजगार दिन्छु, विदेश गएकालाई फर्काउछु भन्छ । विदेशमा पढ्न गएका नेपालीहरु अब नेपाल फर्कन्छन् होला ? अहिलेको प्रधानमन्त्री केपी शर्मा ओलीले जुन रुपमा आफूलाई अगाडी बढाइरहेका छन् । निश्चित रुपमा मुलुकमै राम्रो भयो भने कोही पनि विदेश जादैनन् । अबको १० वर्षमा यो इण्डस्ट्रिज अहिलेको जस्तो हुदैन । विगत १० वर्षमा भएको द्वन्द्वको कारणले अहिले यस्तो भएको हो । धरैले विदेशको बाटो रोजे । २०४६ सालपछि बहुदल आयो । देश गिरिजाप्रसाद कोइरालाको हातमा पुग्यो । त्यसपछि सशस्त्र द्वन्द्व शुरु भयो । कोइरालाले जुन ट्रयाकमा देशलाई अगाडी बढाउन पथ्र्यो त्यसो गर्न सकेनन् पछि प्रचण्डको उदय भएपछि पनि देश ट्रयाकमा आएन, उनले पनि ल्याउन सकेनन् । अहिले केपी ओली र प्रचण्डले नै महशुस गरेर वामगठवन्दनको सरकार बनाएका छन् । अहिले उनीहरुले भने जसरी नै देश अघि बढ्ने हो भने अबको १० वर्षसम्म कन्सल्टेन्सी त रहला तर अहिले जस्तो काम नगर्ला । त्यसको ठिक उल्टो नेपालबाट विदेश जानेभन्दा पनि विदेशबाट नेपाल आउनेहरुकोे लागि कन्सल्टेन्सीको जिम्मेवार समाल्लान् । हाम्रो देश सुन्दर छ । यहाँ शिक्षाको हब बनाउन सक्छौं । त्यसरी अघि बढाए भारतको बिहार, युपी, दिल्ली बंलादेशको ढाका मात्रै नभएर यूरोपीयन मुलुकहरुबाट पनि नेपालमा विद्यार्थीहरु पढ्न आउन सक्छन् । विदेश जाने संख्या घट्ला आउने बढ्न सक्छ । हाम्रो देशमा अन्तर्राष्ट्रिय मापदण्डअनुसारको स्कुल, कलेज युनिभर्सीटीको विकास गर्ने हो भने विश्वका विद्यार्थीहरुलाई आकर्षण गर्न सकिन्छ । तर अहिलेकै करिकुलम, इन्फास्ट्रक्चरले हामी केही गर्न सक्दैनौं ।
निर्माण व्यवसायी महासंघका पूर्वअध्यक्ष यक्षध्वज कार्कीलाई २४ घण्टाभित्र पक्राउ गर्न जिल्ला प्रशासनको पत्राचार
काठमाडौं । जिल्ला प्रशासन कार्यलय काठमाडौंले नेपाल निर्माण व्यवसायी महासंघको पुर्वअध्यक्ष यक्षध्वज कार्कीलाई पक्राउन गर्न प्रहरीलाई पत्राचार गरेको छ । प्रशासन कार्यलयले महानगर प्रहरी परिसरलाई २४ घण्टाभित्र निर्माण व्यवसायी कार्कीलाई पक्राउ गर्न पत्राचार गरेको काठमाडौंका सहायक सीडीओ वासु घिमिरेले बताए । कार्कीको कम्पनी विकोई स्काई जेभीले मालपोत कार्यालय काठमाडौंको भवन निर्माण गर्न ठेक्का लिएको लामो समयदेखि सम्पन्न नगरेपछि पक्राउ गर्न पत्राचार गरेको हो । विकोइ स्काइले ०७३ फागनु २० गते सम्पन्न गर्ने सम्झौता गरेको थियो । उसले मालपोत कार्यलयको भवन निर्माणको ०६९ सालमा ठेक्का पाएको हो । चावहिलमा भवन निर्माण गर्न जिम्मा लिएर हालसम्म काम नगरेपछि कार्कीलाई पक्राउ गर्न निर्देशन दिएको हो ।
मिर्मिरे माइक्रोफाइनान्सको सेयर मूल्य समायोजन, प्रतिकित्ता १७९५ रुपैयाँ
काठमाडौं । आइतबार मिर्मिरे माइक्रोफाइनान्स डेभलपमेन्ट बैंकको सेयर मूल्य समायोजन भएको छ । नेपाल स्टक एक्स्चेञ्ज(नेप्से)ले कम्पनीको हकप्रद पछिको सेयरको मूल्य समायोजन गरेको हो । समायोजन पश्चात कम्पनीको सेयर मूल्य प्रतिकित्ता एक हजार ७९५ रुपैयाँ रहेको छ । हाल कम्पनीको सेयर प्रतिकित्ता १७६५ रुपैयाँमा कारोबार भइरहेको छ ।
नेपालगञ्जमा सानिमा लाईफ इन्स्योरेन्सको थप नयाँ शाखा
काठमाडौं । सानिमा लाईफ इन्स्योरेन्स लिमिटेडले नेपालगञ्जमा थप नयाँ शाखा कार्यालय विस्तार गरेको छ । उक्त शाखाको उद्घाटन कम्पनीका मुख्य प्रबन्धक गणेश चौलागाईले गरेका हुन् । कम्पनीले आफ्नो व्यवसायिक लक्ष्य प्राप्तीका लागि देशभरी शाखा सञ्जाल विस्तार गर्ने लक्ष्य लिएको छ । साथै, उक्त स्थानमा बीमा चेतना जगाई नेपालीहरुलाई जीवन बीमाको दायरामा ल्याई अत्याधुनिक स्तरको प्रविधियुक्त जीवन बीमा सेवा प्रदान गर्ने कम्पनीको उद्देश्य रहेको छ ।
एनएमबि बैंकलाई एफपीओ निष्कासन गर्न बोर्डको अनुमति, प्रतिकित्ता ३३३ रुपैयाँ
काठमाडौं । एनएमबि बैंक लिमिटेडलाई फरदर पब्लिक इस्यु (एफपिओ) निष्कासनका लागि नेपाल धितोपत्र बोर्डले अनुमति दिएको छ । कम्पनीले शुक्रबार एक करोड १४ लाख १५ हजार १६३ कित्ता एफपिओ निष्काशन गर्न अनुमति पाएको हो । कम्पनीले प्रिमियम मूल्यसहित प्रतिकित्ता ३३३ रुपैयाँमा एफपिओ निष्कासन गर्न लागेको हो । बैंकको सेयर निष्काशन तथा बिक्री प्रबन्धकमा नागरिक लगानी कोष रहेको छ । हाल बैंकको चुक्ता पुँजी ६ अर्ब ४६ करोड रुपैयाँ रहेको छ । पछिल्लो समय कम्पनीको सेयर प्रतिकित्ता ४०५ रुपैयाँमा कारोबार भएको छ ।
एशियन लाईफ इन्स्योरेन्सको बोनस सेयर पास, ६० प्रतिशत हकप्रद सेयर पनि अाउने
काठमाडौं । एशियन लाईफ इन्स्योरेन्स कं.लि.को दशौं वार्षिक साधारणसभा बीरगंजमा जेठ १९ गते शनिवार सम्पन्न भएको छ । साधारणसभाले सेयरधनीलाई ४ करोड ८३ लाख ३५ हजार रुपैयाँ बोनस सेयर वितरण गर्ने जनाएको छ । उक्त नाफा कम्पनीले निष्काशन गरेको ५० प्रतिशत हकप्रद सेयर खरिद गर्नेले पनि पाउने कम्पनीले जनाएको छ । बोनस सेयर वितरणसँग कम्पनीको चुक्ता पुँजी १ अर्ब २५ करोड ६७ लाख रुपयाँ भएको छ । साथै कम्पनीको साधारणसभाले १०० बराबर ६० कित्ताको अनुपातमा हकप्रद शेयर जारी गर्ने प्रस्ताव समेत पारित गरेको छ । हकप्रद शेयर जारी पश्चात कम्पनीको चुक्ता पूँजी दुई अर्ब एक करोड सात लाख साठी हजार रुपैयाँ हुने कम्पनीका प्रमुख कार्यकारी अधिकृत राजेश श्रेष्ठले जानकारी दिए । बीमा समितिले जीवन बीमा कम्पनीहरुको लागि चुक्ता पूँजीे २ अर्ब रुपैयाँ तोकेकोे छ । कम्पनीको अधिकृत पूँजी ५ अर्ब रुपैयाँको रहेकोछ । साधारणसभाले संचालक समितिको तर्फबाट अध्यक्ष दीपककुमार श्रेष्ठद्धारा प्रस्तुत आ.व.२०७३/७४ को वार्षिक प्रतिवेदन पास गरेको छ । २०६४ देखि कारोवार संचालन गरेको यस कम्पनीको २०७४ सालचैत्र मसान्त सम्ममा १२ अर्ब ९ करोडको जीवन बीमा कोष र १२ अर्ब २८ करोड रुपैयाँ लगानी तथा कर्जामा रहेकोे छ । त्यस्तै गरी कम्पनीले चालु आ.व. को बैशाख मसान्त सम्ममा कूल २ अर्ब १६ करोड १४ लाख रुपैयाँ बीमा शुल्क आर्जन गरिसकेको छ । कम्पनीले २८ वटा शाखा तथा ६९ वटा उप शाखाहरुबाट बीमा सेवा प्रदान गर्दै आईरहेको छ । कम्पनीले हालसम्म बालबालिकालाई लक्षित गरी बाल उमंग तथा बाल भविष्य बीमा योजना, सबैको हातमा पेन्सन भन्ने नारा सहित पेन्सन बीमा योजना, एशियन सावधिक, अग्रिम भुक्तानी सावधिक, सुखी जीवन बीमा योजना, जीवन रत्न (सीमित भुक्तानी सावधिक) जीवनबीमा योजना, पति पत्नीको लागि संयुक्त सावधिक जीवन बीमा योजना तथा धन समृद्धि आदि जस्ता योजनाहरु प्रचलनमा ल्याएको छ । आगामी दिनहरुमा नेपालको ७७ जिल्लाको अधिकांश गाँउहरुमा समेत जीवन बीमाको पहुँच पुर्याई सर्व सुलभ बीमा सेवा प्रदान गर्ने तथा समय सापेक्ष र आकर्षक तथा नयाँ बीमा योजनाहरु ल्याउने कम्पनीको योजना रहेको छ ।
३९० सिसिको केटिएम ड्यूक १ लाखमै किन्ने हो ? यसरी बेच्दैछ ३१ वटा मोटरसाइकल भन्सारले सरकारी दाममा
काठमाडौं । कृष्णसार भन्सार कार्यालयले विभिन्न कम्पनीका ३१ वटा मोटरसाइकल टेण्डर प्रक्रियाबाट बिक्री गर्ने भएको छ । कार्यालयले ३९० सिसिको केटीएम ड्यूक १ लाख मै बिक्री गर्ने भएको हो । चोरी निकासी पैठारी अभियोगमा विभिन्न मितीमा कार्यालयले जफत गरेको मोटरसाइकलहरु विक्री गर्न लागेको हो । मोटरसाइकलहरु सन् २०१० देखि २०१७ सम्म उत्पादन भएका छन् । बिक्रीमा राखिएका मोटरसाइकलहरुमा १३ वटा बजाज कम्पनी, ३ वटा टीभीएसको अपाचे, ६ वटा होण्डा, ५ वटा हिरो होण्डा, २ वटा केटीएम ड्यूक ३९० सिसि र बुलेट ३५० सिसिको २ वटा मोटरसाइकल रहेका छन् । यस्तै ३५० सिसिको बुलेट मोटरसाइकलको न्युनतम मूल्य पनि कार्यालयले १ लाख नै राखेको छ । मोसटरसाइकल टेण्डर प्रक्रियाबाट लिलामी हुने प्रमुख भन्सार अधिकृत पुण्यविक्रम खड्काले बताए । उनका अनुसार मोटरसाइकल खरिद गर्न चाहने व्यत्तिठ, फर्म र संघसंस्थाले २१ दिन भित्र कार्यालयमा निवेदन दिनु पर्नेछ । बोलपत्रमा सहभागिता जनाउन बोलपत्र आवेदकले न्युनतम मूल्यको १० प्रतिशत रकम नेपाल बैंकमा जम्मा गर्नु पर्नेछ । यसैगरी कार्यालयले पत्रु सामाग्रीको रुपमा प्रयोग गर्ने गरी २ थान जिप र ३१ थान मोटरसाइकल समेत लिलामीमा राखेको छ ।
माधव नेपाल र नारायणकाजी ब्राजिल भ्रमणमा, मार्क्सवादबारे एसियन स्कुल चलाउने
काठमाडौं । नव गठित नेपाल कम्युनिष्ट पार्टी(नेकपा)का बरिष्ठ नेताद्धय माधव कुमार नेपाल र नारायणकाजी श्रेष्ठ ब्राजिल भ्रमणका गएका छन् । कम्युनिष्ट पार्टीहरुको अन्तराष्ट्रिय दुई दिने सेमिनार सम्पन्न गरे लगत्तै बरिष्ठ नेता नेपाल र श्रेष्ठ ब्राजिल भ्रमणमा गएका हुन् । उनीहरुले ब्राजिलमा रहेको फ्लोर्सटन फर्नान्डेज नेशनल स्कुलको अवलोकन भ्रमण गर्नेछन् । सो स्कुलले ब्राजिलमा मार्क्सवादबारे नियमन प्रशिक्षण सञ्चालन गर्दै आएको छ । नेपालमा पनि मार्क्सवादबारे नियमन अध्यापनका लागि मदन भण्डारी एसियन स्कुल स्थापनाको तयारी भैरहेको छ । सो स्कुल स्थापनाका लागि ब्राजिलको अनुभव बुझ्न दुई नेता भ्रमणमा निस्किएका हुन् । नेता नेपालकै पहलमा विश्वभरका कम्युनिष्ट पार्टीका नेताहरु सहभागी गराएर नेपालमा कम्युनिष्ट सेमिनार आयोजना गरिएको थियो । नेता नेपालले अब मार््क्सवादबारे नयाँ पुस्तालाई अध्ययन गराउन मदन भण्डारी एसियन स्कुल स्थापनाको पहल गरिरहेका छन् । बरिष्ठ नेता नेपाल र श्रेष्ठले १० दिनसम्म ब्राजिलको अवलोकन भ्रमण तथा राजनीतिक भेटघाट गर्नेछन् ।
