एक कर्मचारी एक बिरुवा रोप्ने कार्यक्रम सुरु
काठमाडौं । सरकारको एक नेपाली एक फलफूलको बिरुवा रोप्ने कार्यक्रमलाई सहयोग पु¥याउने उद्देश्यले फलफूलका बिरुवा रोप्ने कार्यक्रम सम्पन्न भएको छ । जिल्ला प्रशासन कार्यालय चितवनले आफ्नै परिसरमा वृक्षरोपण गरी जिल्लामा यो अभियानको थालनी गरेको हो । एक कर्मचारी एक फलफूलको बिरुवा रोपनका नामबाट प्रमुख जिल्ला अधिकारी जितेन्द्र बस्नेतले श्रीखण्डको बिरुवा रोपेर कार्यक्रमको शुभारम्भ गरेका हुन् । सो अवसरमा उनले विश्व बातावरण दिवसका अवसरमा प्रधानमन्त्रीले एक नेपाली एक फलफूलको बिरुवा रोप्ने कार्यक्रम शुभारम्भ गरेको भन्दै गृहमन्त्रालयले आफ्ना मातहतका कार्यालयहरूमा एक कर्मचारी एक बिरुवा रोप्ने कार्यक्रम गर्न निर्देशन दिएको बताए । वर्षभरीनै यो कार्यक्रम जारी रहने उनले बताए। सो अवसमा श्रीखण्ड, म्याङ्गोस्टिक, जामुना, कपुर, रुद्राक्ष, लिची, आँपजस्ता फलफूलका बिरुवा रोपिएको थियो । एक सय वटा बिरुवा आज प्रशासन परिसरमा रोपिएको हो । रासस
नेपाल धानमा आत्मनिर्भर कहिले होला ?
काठमाडौं । असार १५ ले नेपालमा किसानहरूको धान रोपाइँ गर्ने चटारोलाई संकेत गर्दछ । यही दिनलाई विगत १५ वर्षदेखि नेपालमा राष्ट्रिय धान दिवसको रूपमा मनाउने गरिएको छ। देशको प्रमुख अन्नबालीको रूपमा रहेको धान उत्पादनमा ३ वर्षमा आत्मनिर्भर हुने सरकारको लक्ष हासिल हुन मुस्किल पर्ने किसानहरूले बताएका छन्। सरकारले यस्तो लक्ष्य सार्वजनिक गरिरहेको समयमा किसानहरूले भने सिँचाइ र गुणस्तरीय बीउको अभाव तथा धानको राम्रो बजार नहुने जस्ता पुरानै समस्या कायम रहँदा उत्पादन वृद्धि दिगो पार्न नसकिने बताएका छन्। देशभरको खेतीयोग्य जग्गाको करिब ३८ प्रतिशत जमिनमा मात्र सिँचाइ सुविधा पुगेको सरकारी आँकडा छ। आकाशे पानीकै भरमा धान बाली लगाउनुपर्ने बाध्यताको अन्त्य नहुँदासम्म धानमा आत्मनिर्भर हुने सरकारको लक्ष्य पूरा हुन नसक्ने किसानहरु बताउँछन्। किसान आयोगका अध्यक्ष चित्रबहादुर श्रेष्ठले भने, रासायनिक मल, बीउ बीजन र सिँचाइको राम्रो व्यवस्था सरकारले गर्नुपर्छ। सिँचाइ नभएको अवस्थामा समयमा पानी परेन भने कसरी बढ्न सक्छ उत्पादन बढ्न सक्छ ? यस्तो पाराले गरिने खेतीको वृद्धिदर दिगो नहुने उनले बताए। नेपालमा वार्षिक ६० लाख मेट्रिन टन धान खपत हुन्छ। त्यसमध्ये गत वर्ष ५१ लाख मेट्रिक टन धान उत्पादन भयो भने बाँकी करिब १० लाख मेट्रिक टन धान अन्य मुलुकबाट आयात भएको थियो। २२ अर्ब रुपियाँ भन्दा बढीको धान आयात भएको तथ्याङ्क हालै सार्वजनिक भएको छ। कृषि तथा भुमिसुधार व्यवस्था मन्त्रालयका प्रवक्ता योगेन्द्र कार्कीको भनाइमा सरकार अहिले धान आयात घटाइ धानमा आत्मनिर्भर हुनका लागि प्रयासरत छ। उनले भने, यसपटक हामीले चैते धान व्यापक रूपमा लगाएका छौँ। यस्तै धानको उत्पादन दोब्बर बनाउन अन्तर्राष्ट्रिय धान अनुसन्धान संस्था (आईआरआई) सँग ५ वर्षको सम्झौता गरेका छौँ। सिँचाइका लागि ट्युबवेल र सौर्य सिँचाइ विस्तार गरिरहेका छौँ। देशको कुल उत्पादनमा कृषिको २९ प्रतिशत योगदान छ। धान उत्पादन बढाउन सके यसले अर्थतन्त्रमा नै सकारात्मक असर पर्ने जनकारहरु बताउँछन्। कृषिलाई आधुनिकीकरण र ठूलो संख्यामा वैदेशिक रोजगारीमा जाने युवालाई आकर्षित नगर्दासम्म धानबालीमा आत्म निर्भर हुने सरकारी लक्ष्य हासिल गर्न कठिन हुने उनीहरुको भनाइ छ। स्रोत : बीबीसी
बुटबलदेखि बर्दघाटसम्म २२० केभी प्रसारणलाइन बन्दै, विद्युत प्राधिकरणले ग्लोबल टेण्डर खुलायो
काठमाडौं । नेपाल विद्युत प्राधिकरणले बुटवलदेखि बर्दघाटसम्म २२० केभी क्षमताको प्रसारणलाइन निर्माण गर्न लागेको छ । प्रसारणलाइन निर्माणका लागि ठेकेदार नियुक्तिको तयारी सुरु भएको छ । विद्युत प्राधिकरणले ठेकेदार छनौटका लागि शुक्रबार विश्वव्यापी बोलपत्र (ग्लोबल टेण्डर) आब्हान गरेको छ । बोलपत्र पेश गर्ने अन्तिम दिन अगष्ट १३ लाई तोकिएको छ । काम सुरु गरेको ५४० दिनमा प्रसारणलाइन सकिनु पर्ने उल्लेख गरिएको छ । एसियाली विकास बैंक (एडीबी) को ऋण सहयोगमा आयोजना निर्माण हुन लागेको हो । यो आयोजना सासेकअन्र्तगत रहेको छ ।
नेचा सल्यानमा जीप दुर्घटना हुँदा ७ जनाको मृत्यु
सल्लेरी । सोलुखुम्बुको नेचा सल्यानमा जीप दुर्घटना हुँदा ७ जनाको मृत्यु भएको छ । शुक्रबार बिहान नेचा सल्यानबाट काठमाडौ जाँदै गरेको ना१ज १८६० नम्बरको जीप दुर्घटना भएको घटनास्थलबाट सञ्चारकर्मी डिल्ली शर्माले जानकारी दिए । दुर्घटनामा एक जना गम्भीर घाइते भएका छन् । उनलाई उपचारका लागि मिनस अस्पताल ओखलढुंगा लगिएको बताइएको छ । जीपमा आठ जना सवार रहेको बुझिएको छ । तिङ्ला र सल्यानको सिमानामा पर्ने गुप्तेश्वर महादेवको मन्दिर नजिकबाट जीप करिब १ हजार मिटर तल खसेको अनुमान गरिएको छ । विस्तृत विवरण आउन बाँकी रहेको प्रहरी निरीक्षक एवम् सूचना अधिकारी प्रधुम्न अधिकारीले जानकारी दिए । रासस
बैंक अफ काठमाण्डुको साधारणसभा असार २८ मा, १३.२५ प्रतिशत बोनस सेयर स्वीकृत गर्ने
काठमाडौं । बैंक अफ काठमाण्डु लिमिटेडको २३ औं वार्षिक साधारणसभा असार २८ गते हुने भएको छ । बैंकले लगानीकर्तालाई १३.२५ प्रतिशत बोनस सेयर दिने प्रस्ताव पारित गर्ने छ । यस्तै संस्थापकतर्फबाट ३ जना सञ्चालकको निर्वाचन गर्ने कार्यक्रम रहेको छ । चुत्तापुँजी वृद्धि भएपछि सोहीअनुसार प्रवन्धपत्र नियमावली सभाले संशोधन गर्नेछ ।
कुमारी बैंकको साढे ११ लाख कित्ता हकप्रद बिक्री भएन, लिलामी हुदै
काठमाडौं । कुमारी बैंकको हकप्रद सेयर बिक्री नभएपछि पुनः लिलामी गर्न लागिएको छ । बैंकको संस्थापक र सर्वसाधारणको गरी ११ लाख ४१ हजार ३७४ कित्ता हकप्रद सेयरलाई आवेदन नपरेपछि लिलामी गर्न लागेको हो । जसअनुसार संस्थापकतर्फ ५ लाख १ हजार ९२१ र सर्वसाधारणको ६ लाख ३९ हजार ४५२ कित्ता हकप्रद सेयर रहेको छ । हकप्रद लिलामी बिक्री खुला असार २२ देखि सुरु भई २९ गतेसम्म तोकिएको छ । संस्थापकतर्फ न्युनतम १ हजार र सर्वसाधारणतर्फ १०० कित्ता प्रस्ताव गर्नुपर्ने छ । बैंकले गत बैशाख २८ देखि जेठ ३१ गतेसम्म बिक्री खुला गरेकोमा आवेदन नपरेपछि लिलामी गर्न लागेको हो । बिक्री भएको हकप्रद सेयर बाँडफाँड भइसकेको एनआईबीएल एस क्यापिटल लिमिटेडले जनाएको छ ।
सांसद मोहन आचार्यको रसुवा कन्सट्रक्सनसहित १० ठेकेदार कालोसूचिमा पर्दै
काठमाडौं । रसुवाका सांसद मोहन आचार्यको रसुवा कन्सट्रक्सनसहित १० वटा निर्माण कम्पनी कालोसूचिमा पर्ने भएका छन् । सडक विभागले पुष्पलाल मध्यपहाडी लोकमार्गका विभिन्न खण्डमा ठेक्का हात पारेर काम नगर्ने १० वटा कम्पनीसँगको ठेक्का रद्द गरि कालोसूचिमा राख्ने प्रक्रिया अघि बढाएको हो । कालोसूचिमा पर्ने कम्पनीहरुमा रसुवाबाट प्रतिनिधि सभामा प्रत्यक्ष निर्वाचित काँग्रेस सांसद मोहन आचार्यको रसुवा कन्स्ट्रक्सन समेत रहेको छ । पर्साबाट प्रतिनिधि सभामा संघीय फोरमका तर्फबाट विजयी बनेका हरि नारायण रौनियारको कम्पनी पप्पु कन्सट्रक्सनलई पनि कालोसूचिमा राख्ने प्रक्रिया सुरु भएको छ । त्यस्तै, काभ्रेमा काँग्रेसका तर्फबाट प्रदेश सभामा उम्मेदवार बनेका गणेश लामाको विरुवा कन्सट्रक्सन पनि रहेको छ । सडक विभागले १५ दिन भित्र ठेक्का सम्झौता अनुसार काम सुरु नहुनुको कारणसहित स्पष्टीकरण मागेको छ । सो अवधिमा चित्त बुझ्दो जवाफ नआएमा ठेक्का सम्झौता रद्द गरेर कालोसूचिमा राख्ने गरि सार्वजनिक सूचना प्रकाशित गरेको हो । यस अघि मौखिक तथा लिखित रुपमा सम्झौता अनुसार काम अघि बढाउन आग्रह गर्दा पनि आलटाल गरेपछि विभागले ठेक्का रद्द गरेर कालोसूचिमा राख्ने प्रक्रिया आरम्भ गरेको हो ।
नेशनल लाइफ इन्स्योरेन्सको हकप्रद सेयर साउन १ देखि, असार २१ सम्म कायम भएकाले भर्न पाउने
काठमाडौं । नेशनल लाइफ इन्स्योरेन्स कम्पनी लिमिटेडले साउन १ देखि हकप्रद सेयर निष्कासन गर्ने भएको छ । कम्पनीले चुक्तापुँजी बढाउन ९९ करोड ३६ लाख ४७ हजार रुपैयाँ बराबरको ९९ लाख ३६ हजार ४७० कित्ता हकप्रद सेयर निष्कासन गर्न लागेको हो । हकप्रद निष्कासन भदौ १ गते बन्द हुने बिक्री प्रवन्धक एनआईबीएल एस क्यापिटल लिमिटेडले जनाएको छ । असार २१ गतेसम्म नेपाल स्टक एक्सचेन्ज लिमिटेडमा कारोबार भई कायम रहेका सेयरधनीले मात्र हकप्रद भर्न पाउने छन् । हकप्रद बाँडफाँडपछि कम्पनीको चुक्तापूँजी २ अर्ब ६४ करोड ९७ लाख रुपैयाँ पुग्ने छ । हाल १ अर्ब ६५ करोड ६० लाख रुपैयाँ चुक्तापुँजी छ । कम्पनीमा संस्थापक सेयरधनी नेपालीको ४५, विदेशी संस्थापकको १०, सर्वसाधारणको ३५ र राष्ट्रिय वाणिज्य बैंकको १० प्रतिशत स्वामित्व रहेको कम्पनीले जनाएको छ ।
